Новомученики и исповедники Православной Церкви XX века каждый день

Песнь 9
От Бога Бога Слова, неизреченною мудростию пришедшаго обновити Адама, ядию в тление падшаго люте, от Святыя Девы неизреченно воплотившагося нас ради, вернии, единомудрено песньми величаем.
Светоносную память радостотворнаго жития твоего со святыми празднующе, душами просвещаемся и причастницы Света Небеснаго являемся и песнеными похвалами тя достойно ублажаем.
Егоже поют Ангели Небеснии и славословят Херувими, Страшнаго во Святыни Своей Вседержителя Бога выну созерцаеши в Небесней Славе, священномучениче Никодиме, Егоже моли, да не попалит нас огнем гнева Своего за премногия грехи наша.
Твоим ходатайством грешники от греховныя жизни отвращаются, сластолюбцы к воздержанию прилепляются, ленивии трудолюбцы соделываются и всякая язя скоро врачуется.
Богородичен: Егда совестная деяния обличатися будут, егда вси людие пред Грозным Судиею во страсе и трепете предстанут, тогда не премолчи, Богородице, и вкупе со священномучеником Никодимом и со всеми святыми моли Сына Твоего, Христа Бога нашего, о спасении душ наших.
Светилен
Светоносный отче, Ликом Небесным сотаинниче, светом Христовым озари наша темныя души и, яко в сени смертней грехов и страстей седящии, узрим Свет Неприступный, славяще Бога, дивнаго во святых Своих.
Богородичен:
Светоносная Сене Небесная, духовную благодать в нас направи и вечнаго геенскаго огня исхити, да безконечно славим имя Твое, со избранными вопиюще: радуйся, Благодатная Богородице Дево, даровавшая нам спасение!
На хвалитех стихиры, глас 1.
Подобен: Небесных Чинов:
В дому Господни водворився, яко финикс, благодатию процвете, и яко кедр добродетельми умножися, и яко маслина плодовитая, в саду райстем рукою Божиею насадися, достоблаженне отче Никодиме.
Червлеными мученическими ризы, яко виссоном многоценным украсился еси и на брачную Вечерю Господню со избранными вшел еси, идеже выну веселяся, не забуди нас, во юдоли плачевней пребывающих, добропобедне Никодиме.
Не довлеет похвала наша к славе твоей, священномучениче Никодиме, слава бо твоя паче солнца вещественнаго сияет и радость неизреченная боголюбивое сердце твое исполняет, торжествуеши бо в Церкви святых, преславне отче.
Слава, глас 8.
Подобен: О преславнаго чудесе:
Яко адамант твердейший верою просиял еси, учение Христово в сердце приемый, и яко мудрый купец, Бисер Безценный – Христа стяжал еси, Егоже Лик пресветлый зря, моли о всех, чтущих память твою, священномучениче Никодиме, Христу Богу возлюбленне.
И ныне, Богородичен
Пресвятая Богородице Дево, не возгнушайся песненных похвал рабов Твоих, обаче благоутробно приими и Сыну Твоему и Богу нашему милостивно вознеси, да поставит нас одесную Себе в Страшный День Судный.
Молитва
О священная главо, многострадальне святителю Никодиме! Ты по славе Божией святителем вселенским поревнова, с нимиже и достойную часть приемлеши. Темже с высоты Небесныя на ны милостивно взирая, милостивный ходатаю, умоли Всемилостиваго Христа Бога нашего даровати нам вся потребная ко спасению, Церквам мир и благостояние, священнослужителем благоговение и страх Божий, монашествующим в молитве пребывание, народу благочестие и в вере крепкое стояние, младенцем окормление, юным целомудрие, от пагубных порок и страстей явных и сокровенных избавление; испроси сердце чистое и покаяние истинное всем, молящимся тебе. В темницех сидящих посети, путешествующих сохрани, в унынии и отчаянии сущих ободри, от всех враг видимых и невидимых защиту и избаву нам подаждь молитвами твоими, на воздушных мытарствах и на Страшнем Судищи Божии предстательствуй, да вси прославим Бога, Отца, и Сына, и Святаго Духа, Триипостасную Державу, Едино Царство и Господство, и тя, нашего усерднаго защитника, священномучениче преславне. Аминь