Православные святые Западной Европы

Здравствуйте!
Роясь в бумагах одного знакомого мне человека (уже умершего), я нашел несколько листков, отпечатанных на машинке. По всей видимости, это что-то по вашей части, явно церковное. На последнем листке была приписка ручкой
"Сию службу составил иеромонах Александр, сидевший в Экибастузском лагере."
СЛУЖБА
святой мученице Людмиле,
Творим бдение
На вечерне:
на Господи воззвах, глас 6.
Днесь благодать Святаго Духа нас собра, и вси, составившии Христову Церковь, прославляюще Бога нашего, мученицу Его святую воспоим, Людмилу пресветлую, за Христа страдания приявшую.
На святой твой праздник днесь собравшеся, мученице Людмило славная, вопием единеми усты: ходатайствуй пред Господем за мир сей, скорбящим помози, печальных и отчаянных утеши, молящи Господа, да исполнит всяко прошение, к тебе восходящее.
Приявши в сердце свое веру, надежду же не оставивши, возсияла еси любовию велиею, просвещающи мир и ближних научающи, мученице Людмило, и ныне молися ко Господу, да просветит вся ослепленныя.
Днесь праздник твой, Людмило, совершаем, согласно тя поюще, за Христа пострадавшую и в страстех Его не оставльшую, всех же возлюбльшую, мучителей своих благословившую и, в смерть сходящу, сретившую Христа, и ныне за всех нас ходатайствующую.
Причащающися ныне Царствия Христова и в Дусе Святем пребывающи, не оставляеши нас, Людмило мученице, но присно предстоиши Господу и подаеши помощь всем, тоя требующим.
Слава: праздника Воздвижения, стихира Кресте пречестный, егоже обстоят чины ангельстии:, зри в службе праздника.
И ныне: догматик глас 6-й: Кто Тебе не ублажит, Пресвятая Дево:
Вход с кадилом. Прокимен дня. Паримии мученические, зри в Минее.

На стиховне стихиры, глас 5.
Течение жития добре совершивши, Людмило, княгине Чешская, Христовы заповеди исполнивши, чада своя во истине воспитавши, в Течине затворися, идеже и смерть мученическую прия.
Стих: Возведох очи мои в горы, отонудуже приидет помощь моя.
Южика твоя Драгомира, силою сатаниною ослепленная, Господа возненавидевши, восхоте убити тя, святая мученица. Ты же, убийц простивши, вознеслася еси ко Святей Троице, и прияла еси венец неувядаемый.
Стих: Помощь моя от Господа, сотворшаго небо и землю.
Радуйся, Людмило мученице, светозарная праведнице, бяше бо христианка истинна, и во браце с супругом твоим Боривоем во святости поживши, научи чада твоя Истине, и ближних твоих возлюби, темже вси тя согласно величаем.
Стих: Господь сохранит тя, Господь покров твой на руку лесную твою.
Радуйся и веселися, Церковь Божия в пресветлыя и красныя дни сия! Празднество бо творим велие; Воздвижение Креста Христова славим и величаем мученицу Людмилу. Днесь мир нерукотворенный Господа славит, земля же красуется небесною славою, мы же прославляем Господа и молимся Ему о всех и за вся.

Тропарь, гас 4-й:
Оставльша тьму идолослужения и с горячей любовию прияв свет Православныя веры Христовы, явися ты, святая Людмило, яко звезда утренняя, и светом святости твоея истинный день Богопочитания в Честей земли начав.
На утрени.
На Бог Господь: тропарь мученице дважды.
Слава: праздника.
И ныне: Богородичен.
Седален по 1-й стихологии, глас 6-й.
Воспеваем ныне Людмилы святыя честная страдания, яже прия от южиков своих, не ведящих Бога Истиннаго, за Христа, Бога нашего, Емуже служивши вся дни живота своего, уневеститися жаждавши, моляшеся непрестанно, в Немже все упование свое положи, воспоминающи глаголы светлыя, ихже рече Христос: возьмите иго Мое и научитеся от Мене. Якоже агница пред стригущими ю безгласная заклана бысть от неверных. Темже молится с Богородицею, во еже спастися нам.
По 2-й стихологии седален, глас тойже: Молишися о нас Богу и призираеши на ны с горних высот, о Людмило милостивая, принесшая светлое учение Православное во страну твою Чехию, не остави нас окамененных, но даруй нам умиление, да воззовем с тобою купно во Царствии Небеснем: слава Ти, Господи, создавшему нас; слава Ти, Господи, не отвергшему нас; слава Ти, Господи, спасшему нас; слава Ти, Господи, обожившему нас; слава Ти, Господи, милующему нас; слава Ти, Боже, во веки.
Полиелей. Величание: Величаем тя, святая мученице Людмило, и чтим честная страдания твоя, яже за Христа претерпела еси.
Псалом избранный: Предзрех Господа предо мною выну, яко одесную мене есть, да не подвижуся. Сего ради вознесеся сердце мое и возрадовался язык мой. Сказал ми еси пути живота, исполниши мя веселия с лицем Твоим. Господь мне Помощник, и не убоюся, что сотворит мне человек.
Слава, и ныне: Аллилуиа, аллилуиа, аллилуиа, слава Тебе, Боже (трижды)
Степенна, антифон глас 4-й. Прокимен: Дивен Бог во святых Своих, Бог Израилев. Стих: В церквах благословите Бога, Господа от источник Израилевых. Всякое дыхание:
Евангелие от Марка, зачало 21
По 50-м псалме стихира, глас 6:
Славим днесь святую мученицу, агницу Христову закланную, Людмилу светлую, просиявшую светом Царствия, стяжавшую Любовь вечную, осветившую яко свеща ею ближних, вопиющую ко Господу: Господи, добро нам здесь быти.

Канон, глас 8
Егоже краегранесие: Святая мученице Людмило, моли Бога о нас.
Песнь 1
Колесницегонителя фараона погрузи, чудотворяй иногда Моисейский жезл, крестообразно поразив, и разделив море, Израиля же беглеца, пешеходца спасе, песнь Богови воспевающа.
Слове Божий, Христе, слова ми подаждь дар, да восхвалю Тя, Животе Неисчерпаемый, и да славлю мученицу Твою Людмилу, песнь Ти поя: поим Господеви, славно бо прославися.
Венец нетленный приявши во страдании твоем, моли, Людмило, Бога славнаго венцы светлыя даровати нам, да, приявше я, воспоим: поим Господеви, славно бо прославися.
Слава: Яко агница непорочная ведена бысть на заклание, ни едино же слово вопреки рекши; обаче воспела еси песнь Богови: поим Господеви, славно бо прославися.
И ныне: Тя, Пречистая, вси роди ублажают, яко носила еси во чреве Превечнаго Бога, Емуже молися за мир, да поим Господеви, славно бо прославися.
Катавасия: Крест начертав Моисей:
Песнь 3
Утверждей вначале Небеса разумом, и землю на водах основавый, на камени мя,. Христе, заповедей Твоих утверди, яко несть свят, паче Тебе, Едине Человеколюбче.
Ангели светлии сретиша на воздусе душу твою пресветлую, страданием невинным убеленную, молитвою преукрашенную, любовию озаренную, песнь Богови поющую: Свят еси, Господи, и поет Тя дух мой.
Яко звезда огненная, яко Ангел пресветлый вознесеся душа твоя на небеса, Людмило, благодатию Святаго Духа преозаренная, поющая: Свят еси, Господи, и поет Тя дух мой.
Слава: Молимтися, Людмило славная, помолися за мир ко Владыце, и помози всем, помощи чающим, утеши скорбящих, возрадуй унывающих, да вопиют и тии ко Господу: Свят еси, Господи, и поет Тя дух мой.
И ныне: Ублажаем Тя вси, о Богомати, яко Матерь Бога нашего, якоже и прорекла еси, и поем Тя со Людмилою мученицею, и Господу зовем: Свят еси, Господи, и поет Тя дух мой.
Песнь 4
Ты моя крепость, Господи, Ты моя и Сила, Ты мой Бог, Ты мое Радование, не оставль недра Отча, и нашу нищету посетив, тем с пророком Аввакумом зову Ти: силе Твоей слава, Человеколюбче.
Честна пред Господем смерть твоя, мученице, бысть, еюже венец прияла еси нетленный; темже молися ко Господу, да подаст и нам венцы Царствия, да поем Ему присно: слава силе Твоей, Господи.
Егда убивающии тя проклинаху тя, ты же их благословляше, якоже заповеда Христос, Емуже все житие твое предала еси; темже сподоби и нас, внегда скорбни будем, пети Владыце: слава силе Твоей, Господи.
Слава: Несть бози идоли ваши, - рече, Людмило, южиком твоим, жаждущим отвратити тя от веры истинныя, за неяже и смерть прияла еси невинную, - но Един Бог есть, Бог Свят, Емуже Церковь Христова взывает: слава силе Твоей, Господи.
И ныне: Исповедуем Тя вси, Пречистая Дево Марие, Истинною Богородицею, во чреве носившею Бога Истиннаго, плоть приявшаго от Тебе и неложно воплощьшагося и на земли пожившаго, и распятаго, и воскресшаго, вопиюще Ему со Людмилою: слава силе Твоей, Господи.
Песнь 5
Вскую мя отринул еси от лица Твоего, Свете Незаходимый, и покрыла мя есть чуждая тьма окаяннаго, но обрати мя, и к свету заповедей Твоих, пути мои направи, молюся.
Царю Небесному, с Нимже пребываеши на небеси, помолися, Людмило, за всех, помощи чающих, да спасет из глубины отчаяния всех гибнущих, и подаст покой всем зовущим: Господи Боже наш, мир подаждь нам.
Егоже возжада душа твоя зрети и служити верно, Того, ныне зрящи, моли, Людмило, спасти мир наш от злобы диаволи, от вражды же и разделений, и спасение даровати поющим: Господи Боже наш, мир подаждь нам.
Слава: Людмило, агнице Божия, зрящи ныне Агнца лицем к лицу и наслаждающися дарований небесных, не забуди нас, грешных, заблуждших во вражде, не ведущих пети: Господи Боже наш, мир даждь нам.
И ныне: О Пречистая Дево Богородице, молися к Сыну Твоему, Христу Богу нашему, со Людмилою мученицею, закланною агницею незлобивою, да подаст нам мир Свой.
Песнь 6
Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.
Древо крестное спасе весь род человечестий силою распятаго на нем Христа Бога нашего, темже, лобызающе е, вопием со Людмилою, крест свой смиренно понесшею: яко пророка Иону спаси нас, Господи.
Молитву непрестанную стяжала еси к Богу, ходящи пред Ним, якоже Енох, темже научи и нас молитве истинней, да, обратившеся к покаянию, к Богу возопиим, глаголюще: яко пророка Иону спаси нас, Господи.
Слава: Исповедавши Господа пред всеми, исповедана бывши Господем пред Ангелы, венец приявши радости светлый, уневестилася еси Господу, Емуже вопияше выну: яко пророка Иону спаси нас, Господи.
И ныне: Пресвятая Богородице, молися ко Господу, да простит нам беззакония наша и спасет яко от кита пророка Иону, яко Милосерд.
Кондак, глас 6:
От небес прияла еси любовь Божию и смерть претерпела еси за Христа, о Людмило пресветлая, молися о всех нас, верно чтущих тя.
Икос:
Агницу непорочную, Людмилу, вернии, на небесех зряще, молящуюся за ны непрестанно, вси воспоим: Радуйся, себе в жертву Богу принесшая; радуйся, со Ангелы на небеса вшедшая. Радуйся, мира Христова благоухание; радуйся, Божественными добродетельми осиянная. Радуйся, теплая предстательнице наша пред Богом; радуйся, вознесенная к небесным чертогом. Радуйся, верных молитвам внимающая; радуйся, всякое желание благое исполняющая. Радуйся, праведнице, питавшая всех алчущих; радуйся, благою любовию утешавшая всех плачущих. Радуйся, яко злато в горниле, очищенная; радуйся, небесныя славы причастнице. Радуйся, святая мученице Людмило, Богу и людем Его возлюбленная.
Песнь 7
Превозносимый отцев Господь пламень угаси, отроки ороси, согласно поющия: Боже, благословен еси.
Молящуюся тя зрящи к Богу ныне, Людмило, радуется Церковь Чешская, радуемся и мы, яко обретохом предстательницу верную, дарующую нам радость Небесную, и зовем вси к Богу, давшему нам тя: Боже, благословен еси.
Одевающися днесь, яко ризою, светом, облачающися во любовь Христову, помяни, Людмило, мир твой, воспомяни братий твоих и сестр, да совокупит их Господь во едино и сподобит пети: Боже, благословен еси.
Слава: Лесть бесовскую отгнавши, о Людмило непорочная, послужи Богу во всем животе твоем, возлюбивши Его всем сердцем и душею, и Ему единому прилепляющися; темже молися за ны, да деем и мы такожде, выну вопиюще: Боже, благословен еси.
И ныне: О Тебе, Преблагословенная Марие, изрядно благодарим Бога нашего, Ты бо Заступница еси всем нам и земли Русския покров; спаси нас, Тя хвалящих, яко Матерь всех Владыки, и научи пети со Людмилою купно: Боже, благословен еси.
Песнь 8
Седмерицею пещь халдейский мучитель богочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.
Божественныя славы сподобилася еси, о Людмило мученице, наслаждаешися же днесь любовию Божиею; темже молися о нас, да возлюбим друг друга и, единомысленно исповедающе Отца и Сына и Святаго Духа, воспоим: Господа пойте, дела, и превозносите во вся веки.
О Людмило, мученице светлая, имущая одежду брачную святу, благоухающая неизреченно, добродетельми Божественными осиянная, испроси тех и нам, да всем сердцем воспоим: Господа пойте, дела, и превозносите во вся веки.
Благословим Отца и Сына и Святаго Духа, Господа. Глаголы наша внуши, Господи, якоже внял еси древле званию триех отроков в пещи Вавилонстей, и подаждь нам любовь и сострадание, мир же и радость со кротостию, молитвами святыя мученицы Людмилы, зовущей: Господа пойте, дела, и превозносите во вся веки.
И ныне: Ангели служат Ти, Пресвятая, умы быстролетнии, песнь Трисвятую Богови воспевающии и славящии Тя непрестанно, яко Матерь Божию, Заступницу нашу.
Песнь 9
Ужасеся о сем Небо, и земли удивишася концы, яко Бог явися человеком плотски, и чрево Твое бысть пространнейшее Небес. Тем Тя, Богородицу, Ангелов и человек чиноначалия величают.
Молися за ны, Людмило, ко Господу, да наставит на путь истинный, научит оправданием Своим, ихже исполнила еси в житии твоем, освященною соделавшися; да подаст нам мудрость и силу познати правду Божию, Бога возславити и Богородицу в песнех возвеличити.
Не забуди нас, Людмило, источавшая любовь в земнем житии твоем; предстоящи Престолу Божию, ходатайствуй о нас, да предстанем и мы Престолу сему страшному неосужденно и дерзнем воспети: Богородицу в песнех величаем.
Слава: Ангельскую песнь воспевающи днесь Богу на небесех, научи и нас молитве истинней, не остави нас, грешных, но в бедах заступи, в унынии посети, в болезни исцели, в беззакониих обрати, о Людмило, да поминающе житие твое выну, зовем Богоотроковице: Богородицу в песнех величаем.
И ныне: Славим вси Бога, создавшаго нас и даровавшаго нам Тя, Матерь Свою, во предстательство, да спасены будем вси, да узрим лик Его, и да поим Тебе со Ангелы: Богородицу в песнех величаем.
Светилен: Крест, хранитель всея вселенныя: дважды.
Слава, и ныне: Крест воздвизается днесь: единожды.
На хвалитех стихиры Честнаго Креста, две, и мученицы едина, глас 5:
Радуйся, Людмило благодатная, ты бо всю страну Чешскую осветила еси светом Православия, прияла же еси смерть Господа ради и вознеслася еси душею на Небеса, и ныне нам помогаеши.