Редкие Богослужебные тексты

Месяца ноемврия 19 дне
Служба Пресвятей Богородице ради чудотворнаго Ея образа
«В скорбех и печалех Утешение»
На велицей вечерни
Блажен муж: 1-й антифон.
На Господи, воззвах: поем стихир 8, глас 4:
Утешение наше в скорбех и печалех, Всемилостивая Владычице Богородице, утоли лютое на ны востание, и рабы Твоя от всякия напасти сохрани, Ты бо еси Едина наша в скорбех и печалех Утешительница.
Всемилостивая Владычице Богородице, едина наша Надежда и предстательство, во дни скорби со слезами взываем: сохрани, Владычице, чада Твоя, и утиши лютое скорбей на ны востание, Ты бо еси Едина наша в скорбех и печалех Утешительница.
Владычице, Владычице, услыши днесь рабы Твоя, к Тебе бо притекаем, и от Тебе помощи вси взыскуем, скорбьми бо обстоимы есмы, и чает нечестивый уловити души наша, Ты же, Всемилостивая Госпоже, заступи и спаси молитвами Твоими всех нас, Ты бо еси Едина наша в скорбех и печалех Утешительница.
Пение всеумиленное дерзаем ныне воспети Тебе, Владычице, скорби и печали наша повергаем во смирении пред Ликом Твоим всечестным, со слезами просяще: приими, ныне покаяние наше и умилостивися на чада Твоя, Ты бо еси Едина наша в скорбех и печалех Утешительница.
Лукавыя советы лукавствия служителие сочетают и тщатся со усердием уловити люди Твоя, Ты же, Владычице, Сама Державою Твоею всеславно сих коварство разори, и спаси под кровом молитв вся ны, Ты бо еси Едина наша в скорбех и печалех Утешительница.
Горести чашу и страдания испиваем ныне, Владычице, Ты же Сама, Всепетая, в сладость сию нам преложи молитвами Твоими, да возможем во умилении приносити Тебе хвалы и славословия, Ты бо еси Едина наша в скорбех и печалех Утешительница.
Слава, и ныне, глас 8:
Образ Твой, Всепетая, почитающе, прославляем Тя, Непорочная, со умилением вопиюще: радуйся, печали наша скоро утоляющая; радуйся, скорби наша в радость прелагающая; радуйся, от бед и напастей всех нас избавляющая; радуйся, Покровом Твоим Всечестным град и страну нашу сохраняющая; радуйся, молитвами Твоими упование и радость нам подающая; радуйся, Преблагословенная Дево Богородице Владычице, присное Утешение рабов Твоих.
Вход. Прокимен дне и чтения три.
На литии стихиры, глас 2:
Паче лучей солнечных возсия, Всепетая, благодать Божественная от всеславнаго и чудотворнаго образа Твоего, на немже зрим Тя, Мати Божия, со святыми угодники беседующую, и Сына Твоего и Бога нашего молящую о нас, Ты бо Покров еси и спасение душ наших и Тебе, Всепетой и Всемилостивой, во умилении зовем: Утеши скорби и печали рабов Твоих, едина вскоре предстательствующая.
Слава, и ныне, глас тойже:
Страстей многоплетенныя тенеты разреши молитвами Твоими, Всеблагая, от всякаго недуга зловреднаго избави рабы Твоя, исцели болезни неисцельныя, сердца на Тя уповающих просвети и образу Твоему во умилении припадающих, молитву же Ти непрестанно приносящих: О, Владычице Всепетая, милости Твоя даруй людем Твоим.
На стиховне стихиры, глас 8.
Подобен: О, дивное чудо:
О, дивное чудо зрим ныне и преславное, Дева Отроковица дарует нам образ Свой честный, да утешение подаст во время скорбное, и печали наша в радость преложатся, во умилении припадающих и со слезами зовущих: не остави, Владычице, чада Твоя, но молитвами Твоими от всякаго зла сохрани души наша, Мати наша Непорочная и Всепетая.
Стих: Слыши, Дщи, и виждь, и приклони ухо Твое.
Услыши, Владычице Богородице, молитвы и моления рабов Твоих, во умилении припадающих цельбоносному образу Твоему и со слезами вопиющих: не остави, Всепетая, люди Твоя, но присно осени нас Покровом Твоим Всесвятым.
Стих: Лицу Твоему помолятся богатии людстии.
Лику Твоему всечестному во умилении предстояще, Сыну Твоему моления приносим, да сохранит неврежденно град и люди, Тя, Богородицу, православно почитающия.
Слава, и ныне, глас тойже:
Всепетая Владычице, простри молебныя руце к Сыну Твоему, и умоли избавити от всякия беды люди Твоя, Ты бо еси Едина наша в скорбех и печалех Утешительница.
Тропарь, глас 5:
Утоли болезни многовоздыхающия души моея, Утолившая всяку слезу от лица земли: Ты бо человеком болезни отгоняеши и грешных скорби разрушаеши, Тебе бо вси стяжахом Надежду и Утверждение, Пресвятая Мати Дево.
На утрени
По 1-ом стихословии седален, глас 1:
Сеть уготовляет диавол искушений многоразличных, и стрелы изощряет во еже состреляти во мраце правыя сердцем. Ты же предстательством Твоим во благочестии вся ны утверди, Мати Всепетая.
Слава, и ныне, тойже.
По 2-ом стихословии, седален, глас 1:
Лучами благодати от всечестныя Твоея иконы изливаемыя, просвети сердца всех поющих Тя, Дево Богородице, Владычице Всепетая.
Слава, и ныне, тойже.

По полиелее седален, глас 4:
Приидите, вси вернии, песнь принесем молебную Владычице Деве, и со умилением припадем к чудотворному Ея образу, зовуще: Помози нам, Мати Всепетая, и избави отвсякаго зла, Ты бо еси в скорбех и печалех для всех присное и всерадостное Утешение.
Слава, и ныне, тойже.
Степенна, 1-й антифон 4-го гласа: От юности моея:
Прокимен, глас 4: Помяну имя Твое во всяком роде и роде.
Стих: Лицу Твоему помолятся богатии людстии.
Всякое дыхание: Евангелие от Луки, зачало 4.
По 50-м псалме, стихира, глас 6:
Помилуй нас, Боже, по велицей милости Твоей, от бед и зол спаси рабы Твоя, Всепетыя Матери Твоея мольбами, Сия бо непрестанно молит Тя о всех нас, яко Единая в скорбех и печалех Утешительница.
Канон Богородице, глас 8,
егоже краестрочие в тропарех:
В скорбех и печалех Утешение наше еси.
Песнь 1
Ирмос: Воду прошед яко сушу, и египетскаго зла избежав, израильтянин вопияше: Избавителю и Богу нашему поим.
Воспеваем Тя, Всепетая Владычице, и яже от сердца моление приносим Ти; Госпоже Всемилостивая, недостойных устен немощное пение прими, и спаси от бед вся ны, Ты бо еси в скорбех и печалех наших Утешение.
Скорбей нахождение и прилогов вражиих возстание отжени от нас, Владычице, молитвами Твоими, Ты бо еси в скорбех и печалех наших Утешение.
Коварством распаляемый враг вселукавый тщится озлобити рабов Твоих, Владычице, Ты же молитвами Твоими разори советы сего, яко еси в скорбех и печалех наших Утешение.
Отверзи уста наша немощныя, во еже призывати Тя на помощь, Дево Всепетая, да молитвами Твоими избавимся всякаго озлобления вражия, Ты боеси в скорбех и печалех наших Утешение.
Песнь 3
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.
Распаляемии огнем геенским служителие вселукаваго диавола дерзают возстати на Церковь Сына Твоего, юже стяжа Кровию Своею Святою, сих же дерзость скоро укроти, Владычице, молитвами Твоими.
Безбожницы неистовствующии замышляют нечестивое, сих же советы вскоре разори, Мати Всепетая Единаго Всемилостиваго, и разруши всеконечно молитвами Твоими.
Елеем молитв Твоих Материнских умягчи, Владычице, ожесточенныя сердца и души чад века сего, да отвергнутся злобы и коварства, и обретут мир и веру молитвами Твоими.
Хладность сердечную далече отжени от нас, Дево Всепетая, да, отрясше сон лености и в добродетелех преуспевающе, возможем спасение вечное обрести молитвами Твоими.
Седален, глас 2:
Моление теплое, и стена необоримая, милости источниче, мирови прибежище, прилежно вопием Ти: Богородице Владычице, предвари, и от бед избави нас, едина вскоре предстательствующая.
Песнь 4
Ирмос: Услышах, Господи, смотрения Твоего таинство, разумех дела Твоя и прославих Твое Божество.
Изсуши, Всепетая, источник горький злобы сынов человеческих, и услади сих души молитвами Твоими, да купно с бесплотными лики возмогут Тя величати, яко Матерь нетленную Господа Славы.
Погуби тщатся лукавии служители тьмы века сего рабов Твоих, Дево Всепетая, Ты же Покровом Твоим сих сохрани от всякаго зла, еси бо Матерь нетленная Господа Славы.
Евы праматери чада в пяту присно уязвляющий, и от Тебе во главу сокрушенный вселукавый враг возстает на рабы Твоя, и Церковь Сына Твоего сокрушити тщится: Ты же, Всепетая Богородице, сего коварство вскоре разори, яко еси Матерь нетленная Господа Славы.
Чашу милостей Твоих, Дево Всепетая, излей изобильно на рабы Твоя, и отвсякаго коварства диавольскаго ны избави, Ты бо еси Заступница наша и Матерь нетленная Господа Славы.
Песнь 5
Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.
Аспиду глуху и затыкающу уши своя уподобишася служители тьмы века сего, но сих сердца просвети, Владычице, молитвами Твоими и всякаго озлобления избави рабы Твоя, да купно со всеми святыми воспоим Сына Твоего и Бога, всем концем земли Подающаго мир.
Льва ярость и скимна рыкающа неистовство стяжаша лжемудрии мудрецы и суесловцы века сего, Церковь Христову хуляще и сию разорити тщащеся, но сих озлобления избави рабы Твоя, Всепетая, всем концем земли Подающая мир.
Ересей и расколов служители разорвати тщатся хитон нешвенный Сына Твоего и Бога нашего, но сих коварства и неистовства избави вся ны, Владычице, и под кровом молитв сохрани град и люди Ты бо еси Всепетая и непорочная Мати Божия, всем концем земли Подающая мир.
Хулами и лукавством, яко оружием и дрекольми вооружившеся, возстают ныне на Церковь служители безбожныя вселукаваго диавола, и изощряют лжу яко меч обоюдоостр, во еже погубити неповиннаго. Ты же, Мати наша Всепетая, разори сих безбожныя советы и подаждь всем концем земли мир.
Песнь 6
Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Утверди ны во истинней вере, Всепетая Владычице, да не соблазнит нас тьма и злоба века сего, нижe погубит лукавство диавольское, но сподоби молитвами Твоими соблюсти неврежденно веру Православную, в нейже утверждаемся.
Треволненьми житейскими возмущается ныне море жития нашего, Ты же, Владычице, умири бурю сию молитвами Твоими и сподоби ны даже до скончания века соблюсти неврежденно веру Православную, в нейже утверждаемся.
Елеем милостей Твоих, Владычице, исполни лампады сердец наших, да светом любви и жития добродетельнаго просвещаемии, сподобимся предстательством Твоим сохранити веру Православную, в нейже утверждаемся.
Шестокрилатии серафими славу Твою воспевают, Дево Всепетая, и земнородных лицы дерзают восславити купно с Небесными силами Твое заступление, мы же, недостойнии, во смирении зовем: предстательством Твоим сподоби ны сохранити веру Православную, в нейже утверждаемся.
Кондак, глас 6:
Не ввери мя человеческому предстательству, Пресвятая Владычице, но приими моление раба Твоего: скорбь бо обдержит мя, терпети не могу демонскаго стреляния, покрова не имам, ниже где прибегну окаянный, всегда побеждаемь, и утешения не имам, разве Тебе, Владычице мира, упование и предстательство верных, не презри моление мое, полезно сотвори.

Икос:
Тьмою искушений и соблазнов отовсюду обстоими есмы и диавол яко лев рыкаяй обходит, иский кого уловити, темже к Твоему Матернему Покрову прибегающе, во умилении вопием: Владычице, Владычице, заступи и от всякаго зла избави, загради уста велеречивыя и от сетей вражиих измимя, Упование и Предстательство верных, не презри моление мое, полезно сотвори.
Песнь 7
Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще: отцев Боже, благословен еси.
Евангельским светом наставляемии и милостию Твоею соблюдаемии, Владычице Дево, дерзаем воспевати Сына Твоего: отцев наших Боже, благословен еси.
Низпосли молитвами Твоими мир незыблемый стране нашей, Владычице, и умири всех, вражду носящих в сердцах своих, да сподобимся едиными усты и единым сердцем Господа воспевати: отцев наших Боже, благословен еси.
Иссопом молитв Твоих окропи сердца наша, Владычице Всемилостивая, да скверны греховныя очистимся и уста наша к славословию отверзем, во еже неосужденно прославляти Сына Твоего: отцев наших Боже, благословен еси.
Егоже воинства небесная славят, Сына Твоего и Бога, моли, Дево Всепетая, да сохранит Церковь святую, юже стяжа Кровию Своею, да избавит от бед и скорбей люди Своя, непрестанно во умилении зовущия: отцев наших Боже, благословен еси.
Песнь 8
Ирмос: Царя Небеснаго, Егоже поют вои ангельстии, хвалите и превозносите во вся веки.
Неизреченныя славы Твоея и нас причастники соделай, Всепетая Владычице, да купно со ангельскими силами хвалим и превозносим Тя во веки.
Адама праотца и Евы праматери плач утешившая, утеши скорби тех сынов и дщерей, теснимы бо отовсюду есмы лютыми прилоги вражиими, Ты же, Всепетая, сих нас скоро свободи, да купно со ангельскими силами хвалим и превозносим Тя во веки.
Шатания еретическия и дерзости безбожныя утиши молитвами Твоими, Богородице Дево, и сохрани от всех бед люди Твоя, да купно со ангельскими силами хвалим и превозносим Тя во веки.
Единороднаго Сына Божия, Егоже родила еси плотию, Господа нашего Иисуса моли, Всенепорочная, да помилует и спасет люди христоименитыя, поющия и превозносящия Тя во веки.
Песнь 9
Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе.
Едина Пречистая и Неискусомужная Дево и Мати, к Тебе прибегаем и Тебе пение днесь приносим, Владычице Всепетая, в скорбех и печалех утешение нам подающая.
Со слезами вопием днесь: избави нас лукавстия змия древняго, и от злобы сего служителей неврежденны сотвори рабы Твоя, Ты бо еси, Владычице Всепетая, в скорбех и печалех утешение нам подающая.
Избави, Владычице, Церковь Святую и люди Твоя от всякаго дела и слова неприязненаго и от злохищрений лукавых ны свободи, Ты бо еси, Мати Всепетая, в скорбех и печалех утешение нам подающая.
Богородицу воистину Тя именуем и Приснодеву прославляем, чудеса Твоя славим и образу Твоему верно покланяемся. Ты же, Всемилостивая, сохрани нас от всякаго зла, еси бо всем нам в скорбех и печалех Утешение.
Светилен:
Светом Сына Твоего просвети души наша и скорбный мрак отжени от рабов Твоих, Дево Всенепорочная, да выну славим Твоя чудеса.
Слава, и ныне:
Образу Твоему честному предстояще, во умилении зовем: Богородице Владычице Всепетая, просвети омраченныя грехми очи сердечныя во еже зрети нам волю Сына Твоего, и от стезей неправды возбрани стопам нашим и на путь покаяния направи рабы Твоя, Ты бо еси всем нам в скорбех и печалех Утешение.
На хвалитех стихиры, глас 1:
Кто возгласит величие славы Твоея, Владычице, кто же множество чудес изчести возможет, иже от святыя Твоея иконы милостивно подаеши во утверждение веры православныя и во укрепение чад Твоих, непрестанно взывающих: Радуйся, Небесное утешение нам присно Подающая.
К кому возопием, Владычице, к кому в скорбех воззвати потщимся, где обрящем помощь во обстояниих, кто избавит нас от враг злокозненных, аще не ты, Владычице, скорбящих Радосте и грешных Споручнице, кающихся Помощнице, немощных Предстательнице, Ейже вси зовем: Радуйся, Небесное утешение нам присно Подающая.
Скорби наша умири, Владычице, бед же и напастей огнь угаси, исцели немощи и недуги наша, исполни во благих желания чад Твоих, мирное и безгрешное житие даруй всем, во умилении зовущим: Радуйся, Небесное утешение нам присно Подающая.
Всемилостивая Госпоже Дево Богородице, от всех зол и искушений чада Твоя сохрани, плененныя избави, немощи исцели, заблудшия обрати, мир умири и спасение исходатайствуй всем, со умилением пред иконою зовущим: Радуйся, Небесное утешение нам присно Подающая.
Слава, и ныне, глас 8:
Владычице, прими молитвы раб Твоих и утеши ны во всяких скорбех и печалех.
На Литургии служба вся Богородице.