Мульткалендарь. 18 марта 2017г

<p id="eow-description" class="">Святой благоверный князь Феодор Смоленский
Память мученика Конона Исаврийского
Священномученик Адриан Пошехонский
Преподобный Исихий, постник

Тропарь благоверных князей Феодора Смоленского и чад его Давида и Константина
глас 4
Измлада явистеся святии,/ Богомудре Феодоре и блаженне Давиде с Константином славным,/ Божественный сосуди, избранный Богови./ Ныне же источаете нам многа исцеления от честных мощей ваших,/ вся ереси потопляюще,/ и спасающе присно град свой,/ и всех верных сохраняюще невредимо/ от видимых и невидимых враг./ Темже верою молим вас, святии:/ молите Христа Бога/ в мире сохранитися нам и спасти души наша.
Кондак благоверных князей Феодора Смоленского и чад его Давида и Константина
глас 8
Богомудренно преселистеся, святии,/ во град, присно добродетельми цветущий,/ в жизни сей приносяще Богови плоды благи,/ преподобне Феодоре и блаженне Давиде с Константином славным,/ и явистеся, яко многоцветущая райская древеса жизни/ и яко многосветлыя звезды, в мире сияюще благодатию,/ в добродетели исправивше жизнь свою,/ и сего ради получисте живот вечный на Небесех./ Темже благодарственно вам зовем:/ радуйтеся, всемирнии светильницы и граду нашему Ярославлю великое утверждение.

Тропарь мученика Конона Исаврийского
глас 4
Яко девственника предивна/ и мученика непоколебима,/ блаженнаго страдальца,/ на бесы власть приемшаго,/ Конона песньми восхвалим и к нему возопиим:/ моли Христа Бога,/ да спасет души наша.
Кондак мученика Конона Исаврийского
глас 3
Чистотою яко Ангел на земли пожив,/ отонудуже собеседник Ангелом быти сподобился еси,/ и родители ко Христову познанию привел еси,/ и, единаго Бога в Троице исповедав,/ пострадал еси до крове,/ мучениче Кононе,/ моли Его непрестанно о всех нас.

Ин тропарь преподобномученика Адриана Пошехонского
глас 4
Аще и смертию нуждною умерл еси,/ аще и смертная сень внезапу найде на тя,/ обаче, яко деву мудрую, душу твою обрете Христос/ и в чертог Свой Небесный введе,/ и со святыми всели,/ чудесы возвеличив имя твое,/ Адриане мучениче преподобне,/ Емуже молитву о нас сотвори,/ память твою почитающих.

Кондак преподобномученика Адриана Пошехонского
глас 6
Житейския молвы избежав, преподобне,/ в пустыню вселился еси,/ и, тамо обитель иноков возградив,/ последи от разбойник мученически пострадал еси,/ и ныне сияеши нетлением и чудесы,/ Адриане многострадальна,/ молитвенниче о душах наших.

Молитва преподобномученику Адриану Пошехонскому
Преподобне отче преблаженне Адриане, первейший пустыни Пошехонския просветителю и монашескаго жития в ней основателю, пришедый в ню со Ангелом Господним и осветивый ю Пресвятыя Богородицы чудотворною иконою и благодатию, в нейже и явился еси подвиги твоими пресветлое целомудрия зерцало, прекрасный смиренномудрия образе, одушевленный терпения столпе, известное воздержания правило, истинный нестяжания и нищеты любителю и всесовершенный Христов угодниче, се мы, грешнии, смиренно припадая, молим тя: приими моления наша и вознеси я на жертвенник благоутробия Божия. Испроси нам предстательством твоим у Всемилостиваго Бога нашего мир миру, Церкви Святей утверждение, согласие в вере, преуспеяние во благочестии и добродетелех христианских, да достойны явимся щедрот и милостей благосердаго Бога; паству твою духовную непрестани управляти жезлом мудрости духовныя; подвизающимся помози, разслабленныя укрепи, падающия возстави, споспеши всем нам иго Христово в терпении и благодушии понести, и всех нас управити в мире и в покаянии скончати живот наш и со упованием спасения преселитися во блаженныя недра Авраамова, идеже ты радостно по трудех земных опочивавши, прославляя со всеми святыми Триипостаснаго Бога, Отца и Сына и Святаго Духа, в безконечныя веки веков. Аминь.</p>