ЛѢТОПИСЬ ПО ИПАТЬЕВСКОМУ СПИСКУ. …
ВЪ ЛѢТО. ҂s҃ . т҃ . о҃ И ИЗГНАША ВАРѦГЫ ЗА МОРЄ. И НЄ ДАША ИМЪ ДАНИ. И ПОЧАША САМИ В СОБѢ ВОЛОДѢТИ. И НЄ БѢ В НИХЪ ПРАВДЫ. И ВЪСТА РОДЪ НА РОДЪ. И БЫША ОУСОБИЦѢ В НИХЪ. И ВОЄВАТИ САМИ НА СѦ ПОЧАША. И РКОША ПОИЩЕМЪ САМИ В СОБѢ КНѦЗѦ. ИЖЕ БЫ ВОЛОДѢЛЪ НАМИ И РѦДИЛЪ. ПО РѦДУ ПО ПРАВУ. ИДОША ЗА МОРЕ КЪ ВАРѦГОМЪ. КЪ РУСИ. СЇЦЄ БО ЗВАХУТЬ. ТЫ ВАРѦГЫ РУСЬ. ѨКО СЕ ДРУЗИИ ЗОВУТСѦ СВЕЄ. ДРУЗИИ ЖЕ ОУРМАНИ. АНЬГЛѦНЕ. ИНѢИ И ГОТЕ. ТАКО И СИ РКОША. РУСЬ. ЧЮДЬ. СЛОВЕНѢ. КРИВИЧИ. И ВСѦ ЗЕМЛѦ НАША ВЕЛИКА. И ѠБИЛНА. А НАРѦДА ВЪ НЕИ НѢТЪ. ДА ПОИДЕТЕ КНѦЖИТЬ И ВОЛОДѢТЬ НАМИ. И ИЗЪБРАШАСѦ. ТРИЄ БРАТА. СЪ РОДЫ СВОИМИ. И ПОѦША ПО СОБѢ ВСЮ РУСЬ. И ПРИДОША КЪ СЛОВѢНОМЪ ПѢРВѢЄ. И СРУБИША ГОРОДЪ ЛАДОГУ. И СѢДЕ СТАРѢИШИИ В ЛАДОЗѢ РЮРИКЪ. А ДРУГИИ СИНЄОУСЪ НА БѢЛѢѠЗЕРѢ. А ТРЕТѢИ ТРУВОРЪ ВЪ ИЗБОРЬСЦѢ. И Ѿ ТѢХЪ ВАРѦГЪ. ПРОЗВАСѦ РУСКАѦ ЗЕМЛѦ. …