Храм "Казанской" иконы Божией Матери дер. Степы

Во имя Отца, и Сына, и Святаго Духа, Аминь.

Молитва предначинательная
Господи Иисусе Христе, Сыне Божий, молитв ради Пречистыя Твоея Матере и всех святых, помилуй нас. Аминь.
Слава Тебе, Боже наш, слава Тебе.

Молитва Святому Духу
Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Трисвятое
Святый Боже, Святый Крепкий, Святый Безсмертный, помилуй нас. (Трижды).
Слава Отцу и Сыну и Святому Духу, и ныне и присно и во веки веков. Аминь.
Молитва ко Пресвятой Троице
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды). Слава, и ныне.
Молитва Господня
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи помилуй 12 раз.
Приидите, поклонимся Цареви нашему Богу. (Поклон)
Приидите, поклонимся и припадем Христу, Цареви нашему Богу. (Поклон)
Приидите, поклонимся и припадем Самому Христу, Цареви и Богу нашему. (Поклон)

Псалом 83
Коль возлюбленна селения Твоя, Господи сил! Желает и скончавается душа моя во дворы Господни, сердце мое и плоть моя возрадовастася о Бозе живе. Ибо птица обрете себе храмину, и горлица гнездо себе, идеже положит птенцы своя, олтари Твоя, Господи сил, Царю мой и Боже мой. Блажени живущии в дому Твоем, в веки веков восхвалят Тя. Блажен муж, eмуже есть заступление eго у Тебе; восхождения в сердце своем положи, во юдоль плачевную, в место еже положи, ибо благословение даст законополагаяй. Пойдут от силы в силу: явится Бог богов в Сионе. Господи Боже сил, услыши молитву мою, внуши, Боже Иаковль. Защитниче наш, виждь, Боже, и призри на лице христа Твоего. Яко лучше день един во дворех Твоих паче тысящ: изволих приметатися в дому Бога моего паче, неже жити ми в селениих грешничих. Яко милость и истину любит Господь, Бог благодать и славу даст, Господь не лишит благих ходящих незлобием. Господи Боже сил, Блажен человек уповаяй на Тя.
Слава, и ныне: Аллилуия. (Трижды)

Господу помолимся, Господи помилуй.
МОЛИТВА ПЕРВАЯ

Владыко Господи Боже наш, Ты бо рекл еси через Давида царя: «Аще не Господь созиждет дом, всуе трудишася зиждущии». Господи Боже и Спасителю наш, верою объемлем в душах наших и сердцах Тобою реченная, припадаем благости Твоей: помози нам, грешным, сие дело возведения храма, нами начинаемое, о Тебе Самом совершити.
Господи Боже наш, решив устроить храм имени Своему на земли, Ты рекл еси некогда Давиду царю: «Понеже взыде на сердце твое еже создати храм имени Моему, добре сотворил еси, яко бысть на сердце твоем. Обаче ты не созиждеши храма, разве сын твой, иже изыде из чресл твоих, той созиждет храм имени Моему». Ей, Владыко Господи Боже наш, едине Сердцеведче, Ты не Давида царя избрал еси для устроения храма, но Соломона, сына его. Сам и ныне умилостивись над нами грешными и недостойными рабами Твоими и даруй нам благодать Твою устроить храм имени Твоему. Ибо кто достойне сие совершати возможет, аще не Ты Сам, всемогий Господи, устроителей достойными сотвориши.
Ведуем и сие милосердию Твоему исповедуем, яко недостойны есмы ради грехов и безчисленных прегрешений наших к толикому святому делу приступити. Но ведуем воистину и веруем от всего сердца и усты исповедуем, яко силен еси нас удостоити и даровати благодать устроить храм Твой, не бо в правдах наших изливаем молитвы наша пред лицем Твоим, но в щедротах Твоих многих.
Буди Сам устроителем храма сего и вразуми нас во еже ведети, како и что творити, дабы созидающе дом Твой, ниже оставляли есмы в забвении домы и сердец наших, памятуя, яко Церковь не токмо стены, но и люди, являющие Тело Христово, а не вразумляющихся и вносящих раскольные мысли отведи от нас, верных Твоим заповедям огради от общения с поступающими так.
Даруй нам силы быть достойными членами Тела Твоего молитвами Пречистыя Твоея Матери Богородицы и Приснодевы Марии, Царя Давида, Пророка Предтечи и Крестителя Твоего Иоанна, Андре́я Первозва́ннаго, всея́ Ру́сския земли́ апо́стола, пе́рваго ева́нгельским благове́стием сию́ огласи́вшаго и на холма́х Днепро́вских и Дви́нских благода́ть предзре́вшаго, я́же оби́льно доны́не сия́ет луча́ми Креста́, огражда́ющаго всю зе́млю нашу, святой мученицы Татианы, новомучеников и исповедников в земле нашей просиявших, да почту́тся по достоя́нию с му́дрыми де́вами во бра́чнем черто́зе Небе́снаго Жениха́ святы́я де́вы и жены́ земли́ нашей Евфроси́ния —По́лоцкое сия́ние, Евпра́ксия, Харити́на, Софи́я, Иулиани́я, Валенти́на и Мане́фа страда́лицы, еле́ем ве́ры и благоче́стия свети́льники своя́ украси́вшия и нам ко спасе́нию пути́ указу́ющия, святи́телие По́лотстии: Ми́но, Диони́сие и Симео́не, во епи́скопстве до́бре подвиза́вшиися и ве́ру Правосла́вную в па́стве свое́й утверди́вшии и всех святых Твоих.
Тем же молим Твою благость, сотвори с нами по велицей милости Твоей, яко да возможем непоколеблемо пети же и исповедатися Тебе, во всех и от всех славимому Богу, безначальному Отцу, со единородным Твоим Сыном, и всесвятым, и благим, и животворящим Твоим Духом, ныне, и присно, и во веки веков. Аминь.

Господу помолимся, Господи помилуй.
МОЛИТВА ВТОРАЯ.
Господи Иисусе Христе, Сыне Бога Живаго, Спасителю мира, основавый Церковь Твою на камени веры, да не одолеют Ю врата адовы. Тебе молимся и Тебе просим: благослови ныне начинание сердец и рук наших — восстановление храма в честь и славу Твою и Всех Святых Твоих.
Ведаем, Господи, яко Ты еси Бог Предвечный и Вездесущий, и несть Тебе потребно для жилища ни едино же место на земли. Но тако же ведаем, яко прежде живоносных Страданий Своих благоизволил в горнице Сионской установить спасительное Таинство Пречистых Тела и Крови Твоих, кое и нам заповедал совершати.
И ныне благоволи, Владыко, молитвами Всех Святых Твоих, в деревне сей — Степы — от недостойных рук наших возтавитися благолепному храму ради спасения многих. Да и в нем до скончания мира сего славится Пречестное и Великолепое Имя Пресвятые и Живоначальныя Троицы-Отца, и Сына и Святаго Духа. Аминь.

Господу помолимся, Господи помилуй.
МОЛИТВА ТРЕТЬЯ.
Господи Иисусе Христе, Сыне Божий, Ты бо рекл если пречистыми усты Твоими: «Аминь глаголю вам, яко аще два от вас совещавается на земли о всяцей вещи, еяже аще просита, будет има от Отца Моего, Иже на небесех: идеже бо еста два или трие собрани во имя Мое, ту есмь Аз посреде их». (Мф. 18, 19-20).
Непреложны словеса Твоя, Господи, милосердие Твое безприкладно и человеколюбию Твоему несть конца. Сего ради молим Тя: даруй нам, рабом твоим, согласившимся просить Тя о восстановлении храма Казанской иконы Божией Матери, исполнения нашего прошения.
Господи Боже Спасителю наш, сердцем сокрушенным к Тебе припадая, просим Тя: убери все преграды на пути восстановления и Сам возстави храм сей во славу имени Твоего пречестнаго. Сего ради к Тебе прибегаем, яко Ты еси Бог наш и разве Тебе иного не вемы.
Но обаче не якоже мы хотим, но якоже Ты. Да будет воля Твоя во веки веков. Аминь.

Господу помолимся, Господи помилуй
Молитва четвертая
Господи Боже наш, иже общия сия и согласная даровавый нам молитвы, иже двема или трем согласующимся о имени Твоем прошения подати обещавый, Сам и ныне прошения рабов Твоих (имена) к восстановлению храма в честь Святаго и Животворящего Твоего Духа, исполни. Иже Ты, Господи, альфа и омега, начало и конец, иже искони всяческая созда, буди начало, умножение и совершение делу сему, ктиторов же и делателей благослови, и дела рук их поспеши, и вся потребная к сооружению и совершению храма сего Твоим Божественным промыслом изобильно умножи. Яко да будет храм сей совершен и полн Твоея славы, и в нем прославится Твое пресвятое и великое имя со Отцем и Святым Духом, ныне и присно, и во веки веков. Аминь.

Господу помолимся, Господи помилуй
Молитва ко Пресвятой Богородице
О Пресвятая Госпоже Владычице Богородице! Со страхом, верою и любовию припадающе пред честною иконою Твоею, молим Тя: не отврати лица твоего от прибегающих к Тебе, умоли, милосердная Мати, Сына Твоего и Бога нашего, Господа Иисуса Христа, да сохранит мирну страну нашу, Церковь Свою святую да незыблемо соблюдет от неверия, ересей и раскола. Не имамы бо иныя помощи, не имамы бо иныя надежды, разве Тебе, Пречистая Дево: Ты бо еси всесильная христиан помощница и заступница. Избави всех с верою тебе молящихся от падений греховных, от навета злых человек, от искушений, скорбей, бед и напрасныя смерти: даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси благодарне воспевающе величия Твоя, сподобимся Небесного Царствия и тамо со всеми святыми прославим пречестное и великолепое имя Отца и Сына и Святаго Духа. Аминь.

Молимся о спасении создателей, благотворителей, украсителей храма сего рабов Божьих: (список имен - Григория, Василия, Петра...) По мере наших сил, мы поминаем о здравии всех наших благотворителей, а также тех, за кого они просят молиться. Возможно делать пожертвования для молитвы об усопших ближних.

Окончание молитв
Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу. И ныне и присно и во веки веков. Аминь.
Господи, помилуй. (Трижды)
Господи, Иисусе Христе, Сыне Божий, молитв ради Пречистыя Твоея Матере, преподобных и богоносных отец наших и всех святых помилуй нас. Аминь.

Акафист Казанской иконе Пресвятой Богородицы