Молитвы Святым

О святая Екатерино, дево и мученице, истинная Христова невесто! Молим тя чрез особливую благодать, еюже предвари тя Жених твой, Сладчайший Иисус: якоже посрамивши прелести мучителя, мудростию твоею пятьдесят витий победила еси и, напоивши их Небесным учением, к свету истинныя веры наставила еси, тако испроси и нам оную Божию мудрость, да и мы, расторгнувше вся козни адскаго мучителя и презрев мира и плоти соблазны, достойны явимся Божественныя славы и к разширению святыя нашея православныя веры сосуды достойны соделаемся, и с тобою в Небесной скинии Господа и Владыку нашего Иисуса Христа хвалим и прославляем во вся веки. Аминь.

Тропарь великомученицы Екатерины глас 4
Добродетельми, яко лучами солнечными,/ просветила еси неверныя мудрецы,/ и, якоже пресветлая луна ходящим в нощи,/ неверия тьму отгнала еси/ и царицу уверила еси,/ вкупе же и мучителя обличила еси,/ богозванная невесто, блаженная Екатерино,/ желанием востекла еси в Небесный чертог/ к прекрасному Жениху Христу,/ и от Него царским венцем венчалася еси:/ Емуже, со Ангелы предстоящи,/ за ны молися,// творящия пречестную память твою.

Ин кондак великомученицы Екатерины глас 3
Витийствующи днесь, Екатерина мученица/ и витиям обличи умовредную ересь,/ Ангел бо с Небесе к той прийде, силу от Вышняго принесе,/ юже приемши, мужески рече:/ Христос есть мучеником похвала.

Кондак великомученицы Екатерины глас 2
Лик честный Божественне, мучениколюбцы,/ воздвигните ныне,/ почитающе всемудрую Екатерину,/ сия бо в тризнищи Христа проповеда и змия попра,// риторов разумы укротивши.