Редкие Богослужебные тексты

СЛУЖБА ПРЕПОДОБНОЙ ГЕНОВЕФЕ (ЖЕНЕВЬЕВЕ) ПАРИЖСКОЙ
(3/16 января)

ВЕ́ЧЕР

Стихи́ры преподобныя, глас 4:
Подо́бен: Дал есть знамение.

Госпо́дь нам, ве́рным, да́л есть чу́дно зна́мение:/ Генове́фу честну́ю,/ Жених́а Мы́сленнаго неве́сту,/ дев води́тельницу,/ царе́й и князе́й сове́тницу,/ гра́да своего́ покрови́тельницу кре́пкую,/ я́же моли́твами свои́ми,/ от враго́в свобожда́ет// и мо́ра лю́таго избавля́ет.

Похва́лим, ве́рнии,/ Генове́фу чу́дную,/ от младе́нства бо во́лею Христу́ Сло́ву обручи́лася еси́,/ и в храм Госпо́день приве́дшися,/ Тому́ посвяти́лася еси́/ и во вся дни жи́зни своея́// уго́дница Тому́ бы́ти потща́лася еси́.

Прииди́те, вси ве́рнии,/ честну́ю де́ву воспои́м,/ та бо виде́ния божестве́нная зря́щи/ и пророче́ства глаго́лющи,/ со дерзнове́нием люде́й увещева́ на враги́ иноплеменны́я, град обдержа́щия,/ крепи́тися и мужа́тися,/ до́ндеже ея́ моли́твами// отступи́ полк вра́жеский.

Слава, глас 6:
Прииди́те, святолю́бцы,/ Генове́фу восхва́лим, Ду́ха орга́н,/ благословя́ще я́ко о́браз благоче́стия/ ди́вную цели́тельницу душ и теле́с на́ших./ И венцы́ благоглаго́ливыми увенча́им ю́,/ предста́тельницу на́шу,/ свети́льник све́тлый Фра́нции,/ глас рече́ний Боже́ственных ясне́йший,/ зри́тельницу виде́ний Богому́друю,/ уго́дницу Пречи́стыя Богома́тере,/ и та́ко то́й возопии́м:/ р́адуйся, а́гнице непоро́чная;/ ра́дуйся, к Богопозна́нию нас приводя́щая;/ ра́дуйся, Пари́жа похвале́ние;/ ра́дуйся всея́ Га́ллии украше́ние,// и христиа́н всех че́ствование.

И ныне Препразднства, глас 4:
О, преславнаго чудесе́!/ И́же Ду́хом Святы́м креща́яй и огне́м/ на Иорда́н гряде́т крести́тися от Иоа́нна:/ Бог не наг, ниже́ Челове́к прост,/ но во двою́ естеству́,/ Еди́н тойжде Сын Единоро́дный,/ ища́й у́бо Креще́ния я́ко Челове́к от сме́ртнаго,/ взима́я же я́ко Бог грех ми́ра// и подая́ всем ве́лию ми́лость.

Проки́мен дне́. Све́те Ти́хий.

НА СТИХОВНЕ СТИХИ́РЫ, ГЛАС 6:
Подобен: Тридне́вен:

Се Просвеще́ние ве́рных,/ се Очище́ние на́ше/ вни́ти хо́щет во струи́ ре́чныя,/ я́ко да скве́рну отмы́ет зло́бы челове́ческия// и обнови́т сокруше́нныя ны.

Стих: Сего́ ра́ди помяну́х Тя/ от земли́ Иорда́нски и Ермонии́мски.

Я́ко ви́де Тя гряду́ща Предте́ча Твой, Го́споди,/ и прося́ща крести́тися от него́,/ со стра́хом вопия́ше:/ Бо́же мой, Соде́телю мой,// ка́ко Тя крещу́, Нескве́рнаго?

Стих: Ви́деша Тя во́ды, Бо́же,/ ви́деша Тя во́ды и убоя́шася.

Сни́демся, ве́рнии, у́мне ко Иорда́нским струя́м,/ я́ко да чу́до ве́лие ви́дим я́ве:/ Зижди́тель бо всех яви́ся зрим// и крести́тися прише́л есть.

Слава, глас 2:

Cи́ла де́монская изнемо́же,/ лесть диа́вольская упраздни́ся./ Во́инства Ати́ллы отступи́ша./ Бу́йство фра́нков в кро́тость обрати́ся,/ и Крест многоце́нный просла́вися,/ Хло́двигу в купе́ль благода́тну вше́дшу,/ Христо́м победи́вшу Генове́фы пропове́данием,/ мы же ча́да ея́ по ве́ре, я́ко до́лжно,// в пе́снех при́сно сла́вим ю́.

И ны́не Препразднства, глас 5:

На Иорда́нскую реку́ Христо́с Бог наш прихо́дит ко Креще́нию,/ очи́стити хотя́ ны от беззако́ний на́ших Свои́м явле́нием,// я́ко Еди́н Благ и Человеколю́бец.

Тропарь, глас 1:
Я́ко па́стырие, ста́да па́сшии,/ Христа́ Спа́са на́шего иногда́ ви́деша,/ та́ко и ты, де́во преподо́бная,/ я́ко па́стырь чи́стый се́рдцем,/ поклони́лася еси́ Вели́кому Па́стырю слове́сных ове́ц./ Тем изба́ви нас от волко́в, и́же прихо́дят во оде́ждах о́вчих е́же пожре́ти ны,/ и любо́вию твое́ю/ доведи́ ны до мест зла́чных Ца́рствия Небе́снаго,// всеблаже́нная ма́ти Генове́фо.

Ин тропарь еллинский, глас 1:
Возлюби́вши всем се́рдцем от младе́нства всех Го́спода/ да́же до седи́н, Генове́фо,/ соблюла́ еси́ ты любо́вь сию́ горя́щую/ и па́че преумно́жила еси́,/ в добре́ преуспева́ющи зело́,/ те́м твори́ла еси́, ма́ти, ты чудеса́ многообра́зная преесте́ственно,/ мно́жества направля́ющи ко све́ту,// и с ли́ком деви́ческим чи́стым Неве́стник обрела́ еси́ неве́щественный.

Ин тропа́рь, глас 4:
Защи́тнице христиа́н благода́тная,/ изде́тска храм Бо́жий возлюби́вшая,/ де́вство свое́ Христа́ ра́ди соблю́дшая,/ град Пари́ж от ва́рваров моли́твою дре́вле спа́сшая,/ и в но́вая времена́ правосла́вным та́мо споспешеству́ющая:/ ны́не же на Небесе́х Го́сподеви предстои́ши,/ свята́я ма́ти Генове́фо,/ не забу́ди предста́тельствовати те́пле о всех// чту́щих святу́ю па́мять твою́.

Ин тропа́рь, глас 5:
Пла́менная ве́ры и́стинныя провозве́стница/ и гра́да твоего́ засту́пница еси́,/ о свята́я ма́ти Генове́фо,/ изба́ви ны от паде́ний грехо́вных,/ и потре́бная блага́я ниспосли́, и гла́дныя напита́й,/ и Го́спода моли́ непреста́нно// о спасе́нии душ на́ших.

Слава, и ныне, глас 4:

Гото́вися, Завуло́не,/ и красу́йся, Неффали́ме,/ Иорда́не реко́, ста́ни,/ подыми́, взыгра́я, крести́тися гряду́ща Влады́ку,/ Весели́ся, Ада́ме с прама́терию,/ не кры́йта себе́, я́коже в раи́ пре́жде,/ и́бо, на́ги ви́дев вы, яви́ся,/ да облече́т в пе́рвую оде́жду:// Христо́с яви́ся, всю тварь хотя́ обнови́ти.

НА У́ТРЕНЕ

По 1-м стихосло́вии седа́лен, глас 3:

Неопи́сан Сый Божество́м, опи́сан ве́щию теле́сною,/ хо́щет приити́ вода́ми Иорда́нскими крести́тися,/ Сего́ чистото́ю мы́сленною прии́мем:/ всем бо соде́лати обновле́ние хо́щет./ К Нему́же возопии́м со стра́хом:/ сла́ва, Христе́, явле́нию Твоему́.

Слава и ныне, глас тойже:

Я́вльшуся Тебе́ во, Иорда́не, Спа́се, в вода́х крести́тися пло́тию,/ А́нгельская во́инства ужаса́хуся, зря́ще рабу́ предстоя́ща Влады́ку тва́ри:/ свы́ше пропове́да Тя Оте́ц Пребезнача́льный./ Те́мже с весе́лием вопие́м Ти:/ сла́ва Бо́гу крести́вшемуся.

По 2-м стихосло́вии седа́лен, глас 5

Единоче́стное Сло́во Отцу́ и Ду́ху,/ воплоще́нно за милосе́рдие и креща́емо,/ А́нгельстии ли́цы ви́дяще, трепета́ху,/ и Иорда́нская река́, устыде́вшися и убоя́вшися, возврати́ся вспять,/ нас возводя́ к высоте́ спасе́ния, страстьми́ истле́вшия.

Слава и ныне, глас тойже:

Собезнача́льное Сло́во Отцу́ и Ду́ху,/ вообра́жься за милосе́рдие ны́не в чужде́е,/ крести́тися нас ра́ди уже́ гряде́т,/ усря́щем Его́ мы́слию чи́стою:/ благослове́н еси́,– вопиюще,– Христе́ Спа́се Благоде́телю,/ освяти́ти нас приходя́й.

Кано́ны два: предпра́зднства со ирмосо́м на 8, и преподобныя на 4.

Канон предпра́зднства, глас 4
Его́же краегране́сие по алфави́ту. Ио́сиф

Песнь 1
Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери/ и явлю́ся, све́тло торжеству́я,// и воспою́, ра́дуяся, Тоя́ чудеса́.
Бе́здны повеле́нием сотвори́в, Человеколю́бче,/ И́же зе́млю на вода́х пове́сивый, Го́споди,/ смиря́яся, предгряде́ши крести́тися ре́чными струя́ми,/ омыва́я мя от скве́рных страсте́й.
Хоте́нием обнища́л еси́,/ самово́льно обнища́вшаго злы́ми дея́ньми мене́ обогаща́я, Христе́,/ и к вода́м предгряде́ши Иорда́нским, Креще́ния прося́, Безгре́шный.
Обветша́вший прегреше́ньми мир обновля́я, Человеколю́бче,/ стра́нно поро́ждение гряде́ши сотвори́ти водо́ю и Ду́хом челове́ком./ Те́мже Твое́ сла́вим явле́ние.
Дави́д, Боже́ственным Ду́хом провозглаша́я, веща́ше:/ что ти есть мо́ре, я́ко побе́гло еси́?/ И ты же, я́ко возврати́лся еси́, Иорда́не,/ Христа́ ви́дев, на́га стоя́ща в тебе́?

Ин канон преподобныя Геновефы, глас 2

Песнь 1
Ирмос: Пои́м Го́сподеви песнь но́вую:/ стра́шно бо чу́до,/ я́ко Де́ва породи́ Бо́га вочелове́чшася// и по рождестве́ па́ки Де́ва пребы́сть.
Пеньми и песньим духовными Господеви воспоим, милостию бо Своею даровал есть Геновефу: граду Парижу заступницу, нам же помощницу скорую.
Имела еси, мати блаженная, к посту и воздержанию ревность велию, и к стяжанию добродетелей прилежание всеусердное, и девство хранящи, Бога Единаго зело возлюбила еси.
Геновефу восхвалим, поборницу крепкую, яже со дерзновением приступи к царю о еже свободити и не губити верных.
Богородичен: Вернии, песнь нову Деве воспоим, рождшей нам Бога Воплощенна, грядущаго креститися от Иоанна на Иордан.

Песнь 3
Ирмос: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.
Возвесели́ся, пусты́ня жа́ждущая, челове́ческое естество́ все:/ се вода́ явля́ется жи́зненная, напая́ющи тя новора́сленною благода́тию,/ Христо́с, всех обновле́ние.
Взыска́ти мя, ра́зумом заблу́ждшаго, предгряде́ши на во́ды, Христе́,/ в ня́же вшед, потопля́еши моя прегреше́ния/ и из глубины́ возво́диши мя вся́кия зло́бы, я́ко Благоутро́бен.
Со́лнце, зре́ти Тя иму́щее, Сло́ве, обнаже́на, сокрыва́ет зари́:/ гряде́ши бо обнаже́на мя ле́стию змии́ною/ честны́м Креще́нием во оде́жду облещи́ спаси́тельную.

Ин канон
Ирмос: Утверди́ся се́рдце мое́ в Го́споде,/ вознесе́ся рог мой в Бо́зе мое́м,/ я́ко роди́лся еси́ на земли́// и спасл еси́ заблу́ждшаго.
Святитель Герман узре в тебе любовь твою ко Господу, и благослови тя, и увеща тя девство твое Тому соблюдати непорочно.
Бывшу ти, мати, отроковица в малех летех, душа твоя светом Благодати Божественныя возсия, якоже узрети сия святым и горе духом вознестися.
Нантерра́ благословен еси, яко тамо родися ты, мати блаженная, и Париж град, яко тамо пребывала еси и по смерти твоея пребываеши до ныне; сего ради превозносят тя, о Геновефо.
Богородичен: Утверди на камени веры сердца наша, Мати Христа Бога нашего, Егоже Иоанн уготовляет во Иордане креститися спасения ради нашего.

Кондак преподобныя Геновефы, глас 2:
Любовию ко Господу горящи,/ покой возненавидела еси,/ преподобная мати Геновефо,/ воздержанием душу свою просветивши,/ темже звери дикия силою твоею укрощала еси/ и молитвами твоими// вражия ополчения усмиряла еси.

Ин кондак, глас 3:
Дивящеся чистотой девства твоего/ и велии подвиги твоими,/ вопием к тебе, Геновефо:/ молитвами твоими/ от бед избави нас,/ обдержия ны в сия времена лютая:/ ереси бо мерзкия умножаются/ и души наша сокрушают,/ якоже нам сих с трудом избегнути,/ но прииди и помози нам,// о мати преподобная.

Ин кондак, глас 3:
Воспои́м засту́пницу небе́сную на́шу,/ наро́д Бо́жий во дни испыта́ний лю́тых сохра́ньшую,/ по́двигу бесстра́шныя Дево́ры поревнова́вшую,/ целому́дрие и му́жество святы́я Иуди́фи подража́вшую,/ гла́дных а́ки Ио́сиф напита́вшую,/ и ны́не све́том и́стины, озаря́ющую град свой/ и всех чту́щих тя и еди́ными усты́ вопию́щих:/ ра́дуйся, свята́я Генове́фо,/ гра́да Пари́жа благода́тный покро́в и храни́тельнице,// и за вся христиа́ны моля́щаяся.

Ин кондак еллинский, глас 4:
Свеща христосветлая явилася еси,/ приведшая ко Христу, Геновефо, души божественным житием твоим и словесы жизни,/ тем благодать прияла еси, и чудотворица показалася еси, всеблаженная,/ и дев божественных невестоводительница,// темже молися Иисусу о чтущих память твою.

Слава и ныне седален, Предпразднства, глас 8:
Лик проро́ческий, пропове́дуя, ра́дуется, Креще́ние Христо́во, живо́т источа́ющее./ Зове́т Иса́ия:/ почерпи́те во́ду чисти́тельную./ Пи́шет Богооте́ц:/ ка́ко от лица́ бежи́т мо́ре/ благоволе́нием спаса́ющаго Бо́га род челове́ческий?

Песнь 4
Ирмос: Неизсле́дный Бо́жий сове́т,/ е́же от Де́вы воплоще́ния Тебе́, Вы́шняго,/ проро́к Авваку́м усмотря́я, зовя́ще;// сла́ва си́ле Твое́й, Го́споди.
У́жасом содержи́тся не́бо и А́нгельская во́инства,/ раболе́пно Тя иду́ща, Христе́, к Твоему́ рабу́ ви́дяще и прося́ща Креще́ния.
Иоа́нне, взыгра́й, гряде́т бо всех избавляяй Госпо́дь/ преклони́тися руце́ твое́й смире́нно,/ я́ко да смире́ннаго мя Боже́ственным вознесе́т Креще́нием.
Преклони́в Небеса́, сшел еси́ в Де́ву, Человеколю́бче,/ и Иоа́нну прекланя́еши верх, прося́ Креще́ния./ Сла́ва мно́гому благоутро́бию Твоему́.
Разреша́я безме́рныя моя́, Сло́ве, плени́цы согреше́ний,/ на во́ды Иорда́нския тщи́шися приити́ и крести́тися, Влады́ко./ Сла́ва мно́гому благоутро́бию Твоему́.

Ин канон
Ирмос: Из горы́ ка́мень кроме́ руки́ отсе́клся еси́, Христе́,/ от Де́вы Ма́тере./ Те́мже проро́к, прови́дя, вопия́ше:/ во спасе́ние люде́й Твои́х прише́л еси́,// сла́ва си́ле Твое́й, Го́споди.
Дева пребыла еси во вся дни жизни твоея, мати преподобная, яко Жениху Небесному обещала еси; сего ради дарова ти Христос да́ры прозрения и пророчествия, да вопиют вси: слава силе Твоей, Господи!
Егда врагов ополчения обдержаша Париж, тогда людие малодушием уязвлении бежати восхотеша, но ты, блаженная дево, видении и словесы своими тех укрепляла еси, якоже варварам отступити.
Даже в мирная времена единоплеменником своим грядущая возвещала еси, Геновефо, но те укоривше подвиги твоя и словеса твоя в реце Сене потопити тя восхотеша, но святитель Герман издалеча огради тя.
Богородичен: Дева пребыла еси прежде Рождества Христова, Богородице, и в Рождестве Дева пребыла еси, и Приснодева во веки пребываеши. Темже вернии поклоняются Тобою Рождшемуся, вопиюще: слава силе Твоей, Господи!

Песнь 5
Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя// мир подава́ющая.
Дале́че челове́чество от Бо́га бы́вшее, Сло́во Бо́жие, уще́дрив, Челове́к яви́ся,/ и Креще́нием Богоде́льным сие́ присвоя́ет боголе́пно,/ и к первообра́зному возво́дит достоя́нию.
Ме́ртвы бы́вшия ны преступле́ньми/ гряде́ши, Живода́вче Всеще́дрый, оживи́ти Иорда́нскими струя́ми./ Те́мже Твое́ сла́вим ве́рно ны́не явле́ние и неизрече́нную ми́лость.
Диви́тся вся́ка душа́, помышля́ющи Твое́, Сло́ве, стра́шное смотре́ние:/ ка́ко, назда́ти вся хотя́, гряде́ши вни́ти в ре́чныя струи́ обнаже́н,/ И́же све́том одева́яйся.

Ин канон
Ирмос: Угль Иса́ии проявле́йся,/ Со́лнце из де́вственныя утро́бы/ возсия́ во тьме заблу́ждшим,// Богоразу́мия просвеще́ние да́руя.
Святитель благослови тя девоводительница быти, Геновефо, темже сия верою и благоговением исполнила еси, мати, образ бывши девам.
Севэр и Геронтия, родители твои, яко благочестивии христиане в вере святей воспиташа тя; Герман же и Лупп, святители честнии, на подвиг благой благословиша тя.
Хилдерик с воины град твой обступи, всечестная, гладом изнуряемый, ты же со дерзновением в Труа стопы своя направила еси, и пшеницу принесла еси напитати во гладе сущих.
Богородичен: Во утробе Твоей девственней, яко в златой кадильнице, Слово Божие, яко угль возгореся; ныне же грядет на Иордан просветити нас Богоразумием.

Песнь 6
Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ приидите, рука́ми воспле́щим,// от Нея́ ро́ждшагося, Бо́га сла́вим.
И́же во тьме дре́вле седя́щии Свет прише́дш зря́ще, ра́дости испо́лнитеся:/ се яви́ся Госпо́дь, Иорда́нскими струя́ми оде́ян.
Ка́ко у́зрит Тя, иду́ща, Предте́ча, Спа́се,/ и прося́ща Боже́ственнаго Креще́ния?/ Ка́ко Тя во́ды прии́мут Иорда́нския,/ Во́ду су́щу оставле́ния?
Да кропя́т, веселя́щеся, о́блацы мы́сленное ра́дование:/ се прии́де крести́тися Госпо́дь,/ разоря́я те́мныя о́блаки серде́ц на́ших.

Ин канон
Ирмос: Е́же из глубины́ се́рдца,/ не пре́зри моле́ние рабо́в Твои́х, Го́споди:/ но я́ко проро́ка Ио́ну от ки́това чре́ва изве́л еси́,// и нас от у́мнаго зве́ря и душетли́тельнаго спаси́.
Не остави нас без ходатайства твоего, мати блаженная, и не престай за раб твоих молитися, дево, корабль бо душ наших море житейское потопи, и аще не поспешиши на помощь нам, зверь умный возможет поглотити нас.
Хвалу вознесем всечестней Геновефе, вопиюще из глубины сердец наших: о всесильная заступнице наша, огради нас молитвами твоими и моленьми, и Христа, Жениха твоего, умоли помиловати нас и спастися душам нашим.
Грядущая рекла еси людем, да покаются во грехах своих, и видения зрела еси, да Бога познают, мати, сего ради, тобою наставляемии, зверя умнаго избежаша.
Богородичен: Избавитель и Спаситель погибающих Иисус Христос грядет к потокам речным креститися и ногами Своими попрати главы душепагубнаго змия и спасти человечество от жала того ядовитаго, имже смерть постиже ны.

Конда́к Предпразднства, глас 4
Во струя́х днесь Иорда́нских быв, Госпо́дь/ Иоа́нну вопие́т:/ не убо́йся крести́ти Мя,/ спасти́ бо приидо́х// Ада́ма первозда́ннаго.
И́кос:
Не истязу́ю тя, Крести́телю, преде́лы преходи́ти,/ не глаго́лю тебе:/ рцы Ми, я́же глаго́леши беззако́нным и учи́ши гре́шники./ То́чию крести́ Мя молча́ и ча́я, я́же от Креще́ния:/ прии́меши бо сего́ ра́ди досто́инство, е́же не бысть А́нгелом,/ и́бо всех проро́ков бо́льша тя сотворю́./ От о́ных у́бо ни еди́н я́ве Мя ви́де,/ но во о́бразех, и се́нех, и гада́ниих,/ ты же пред тобо́ю стоя́ща ви́дел еси́,/ спасти́ бо приидо́х Ада́ма первозда́нного.

Песнь 7
Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.
Сокруше́на мя прегреше́ньми и лежа́ща во тьме, Го́споди, преступле́ния,/ поми́ловав, уще́дрил еси́ за благосты́ню/ и в вода́х Иорда́нских, Влады́ко, гряде́ши крести́тися.
Что́ стра́нное сие́ виде́ние? – / возопи́ша А́нгельстии чи́ни:/ езе́ра и ре́ки сотвори́вый веле́нием Иорда́нскими струя́ми гряде́т оде́ятися,/ си́ми бо Ада́ма обновля́ет.
Высота́ неизрече́нна и глубина́ неизме́рна есть, Влады́ко, смотре́ния Твоего́,/ вся́ко преходя́ ума́ постиже́ние:/ ка́ко водо́ю и Всесвяты́м Ду́хом земны́я очища́еши?

Ин канон
Ирмос: Да пресла́вное рождество́ Твое́, Христе́, е́же от Де́вы,/ прообрази́ши я́ве,/ неопали́мы в пещи́ о́троки сохрани́л еси́,/ пе́сньми пою́щия Тебе́:// отце́в Бо́же, благослове́н еси́.
О святость твоя велия, всечестная! С высоты бо столпа своего преподобный Симеон виде тя Божественною Благодатию осененную и посла просити тя молитв о спасении души его.
Вся земля исполнися ведения о святости твоей и множества зрети тя притекоша и беседу с тобою имети; ты же, Геновефо, утешала еси приходящих к тебе и на путь правый наставляла еси; те же тобой наученнии, взываша: отцев Боже благословен еси.
В посте и подвиге любве ради ко Господу преуспевающи, сочетала еси к оным милостыню и милосердие ближняго ради, и тако скоро по лествице добродетелей горе́ взошла еси.
Богородичен: Христос Еммануил, с нами Бог, в пречистую утробу Девы вселися неизреченно и плоть от Нея прияв преславно, изыде еже спасти всех к Нему вопиющих: отцев Боже, благословен еси.

Песнь 8
Ирмос: О́троки благочести́выя в пещи́/ Рождество́ Богоро́дичо спасло́ есть,/тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.
Глас Роди́телев с высоты́ Сы́на свиде́тельствует Единосу́щна, входя́ща в во́ды/ и благослове́ние Твое́ сим предпосыла́юща, Благослове́нне Христе́,/ и Дух Тя Святы́й всем пропове́дует Бо́га воплоще́нна.
Лику́й, тва́ре, уви́девши Бо́жие свято́е явле́ние,/ А́нгели, по́йте,/ мо́ре, весели́ся, езе́ра и исто́чницы, взыгра́йте,/ и ре́ки, та́йно восплещи́те пе́сньми:/ предста́ благослове́ньми вас Христо́с просвеща́яй.
Пое́м Го́споду во хвале́нии, я́вльшемуся на вода́х,/ и сокруше́ние на́ше си́ми обно́вльшему,/ и главы́ сте́ршему неви́димых враго́в, и воззове́м:/ по́йте, дела́, Го́спода и превозноси́те Его́ во вся ве́ки.
О, чу́до чуде́с!/ Ка́ко, вся́кия тва́ри вы́шши, Бог наш зи́ждется/ и обновля́ется от Богороди́тельницы, и обновля́ет во́лею,/ и назида́ет нас водо́ю и Ду́ха обновле́нием чу́дным,/ Еди́ный Благоде́тель?

Ин канон
Ирмос: Свобо́дна у́бо тварь познава́ется/ и сы́нове све́та, пре́жде омраче́ннии,/ еди́н сте́нет тьмы предста́тель./ Ны́не да благослови́т усе́рдно Вино́внаго// пре́жде окая́нное язы́ков всенасле́дие.
Любовию сердечною к Создателю пламенеющи яко столп огнен посреде тьмы мiра сего вела еси людей пустынею к земле рая обетованней, идеже радуются с тобою и со святыми, Геновефо преблагая.
Добродетельми яко всеоружием Божественным присно вооружившися, стрелы князя тьмы отражала еси, о всечестная, и злобу того победивши, в бегство обратила еси, и стоиши не убоявшися злобы его.
Святитель Мартин, епископ Турский, сретил еси душу твою чистую в обителех небесных, мати; привела бо еси дев, тебе ввереных, ко гробу его, благодатию Божиею осененному, да почтут память его.
Богородичен: Разделивый Бог между́ светом и между́ тьмою, и сотворивый человека, взем персть от земли, от Девы родивыйся ко Иордану грядет ныне спасти осужденных и во тьме и сени смертней сидящих.

Песнь 9
Ирмос: Всяк земноро́дный/ да взыгра́ется, Ду́хом просвеща́емь,/ да торжествуе́т же безпло́тных умо́в естество́,/ почита́ющее свяще́нное торжество́ Богома́тере/ и да вопие́т:/ ра́дуйся, Всеблаже́нная// Богоро́дице, Чи́стая Присноде́во.
Се А́гнец взе́мляй прегреше́ния челове́чества,/ прии́де и предста́ к рабу́, прося́ Креще́ния,/ раболе́пно предстои́т свободи́ти ища́й порабоще́нныя ны от льсти́ваго/ и добро́ту пе́рвую погу́бльшия.
Яви́ся я́вственно Бог, воплоща́емь за бла́гость,/ и Иорда́нскими оде́ятися гряде́т вода́ми, одева́яй Не́бо о́блаки вои́стинну:/ Сего́ вси ны́не предпра́зднуим честно́е ра́достию явле́ние.
Взыгра́й ра́достно и предугото́вися подъя́ти во́ду теку́щую, о Иорда́не, в ве́чную жизнь;/ ре́ки, лику́йте, ви́дяще ны́не пи́щнаго Пото́ка,/ во струи́ Иорда́нския входя́ща и зло́бы излия́ние изсуша́юща.
Озари́ся нам день спаси́тельный, в нощи́ лю́тых всегда́ спя́щим,/ и́бо предста́ Христо́с Госпо́дь, пра́вды Со́лнце сый и разумева́емый,/ подклони́ти главу́ Свою́ рабу́ и пло́тию крести́тися во́лею.
Ужаса́ются Херуви́ми и все Небе́сное естество́, Всенепоро́чная,/ па́че постиже́ния Честна́го Твоего́ Рождества́,/ уподо́бльшагося нам за благоутро́бие неизглаго́ланное и кре́щшагося пло́тию,/ Его́же Боже́ственное вси явле́ние пра́зднуем ны́не, ра́дующеся.

Ин канон
Ирмос: Преесте́ственно пло́тию Заче́ншую во чре́ве/ от Отца́ безле́тно предвозсия́вшее Сло́во/ в пе́снех немо́лчных// велича́ем, ве́рнии.
Апостоли святии Петр и Павел сретили еста в раю тя, Геновефо, ты бо святую память их почитающи, царя увещевала еси в их честь храм воздвигнути.
Весь род христианский воспевает Геновефу блаженную, почитаяй и царицу святую Клотильду: вкупе бо франков язычников ко Христу Слову обратили еста.
Всечестную Геновефу возвеличим, благочестивую угодницу Слова Отчего, яже силою Того непрестанно множество знамений и чудес сотворила еси.
Припадем вси в покаянии и помолимся блаженней Геновефе, матери нашей и покровительнице, да умолит Пресвятую Троицу отпустити нам прегрешения наша и простити неправды наша.
Богородичен: Воспоем, вернии, ныне песни духовнии, величающе паче ума Рождшую Слово Божие, Егоже Безначальный Отец раждает вечно.

Свети́лен:
Радуется Геновефа на небесех, сочетавающися с ликом жен святых, тамо сущих; Деворе бо, Иудифи и Есфири в дерзновении подражала еси, женам же преподобным в пустыне жившим в благочестии; сего ради потщимся и восхвалим ю́.

Слава и ныне, Предпразднства:
Вифлее́м оста́вивше, пресла́вное чу́до, ко Иорда́ну теце́м душе́ю те́плою/ и та́мо у́зрим стра́шное та́инство:/ боголе́пно бо предста́, обнажи́вся, Христо́с мой,/ одева́я мя во о́дежду Небе́снаго Ца́рствия.

НА ХВАЛИ́ТЕХ СТИХИ́РЫ, ГЛАС 6:
Подобен: А́нгельския:
Престо́л Не́бо име́я, Влады́ка/ прии́де на зе́млю, вопло́щся от Де́вы,/ и, на Иорда́не предста́в,/ очище́ния всех про́сит от Иоа́нна,/ Оте́чествия земли́ всея́, Тому́ пое́м:// благослове́н явле́йся, Бо́же наш, сла́ва Тебе́.
Приспе́ Христо́с ко струя́м Иорда́нским,// Креще́ния прося́, очища́яй грехи́./ Вся земля́ да игра́ет,/ Небеса́ да веселя́тся./ Ра́дуйся, язы́ческая Це́рковь, Царю́ уневе́стившися,/ ве́рно возопи́й:// благослове́н явле́йся, Бо́же наш, сла́ва Тебе́.
Го́ры сла́дость весе́лия да ка́плют,/ рука́ми та́инственно ны́не восплещи́те, язы́цы,/ пусты́ня да процвете́т./ Иорда́не, подыми́, гряди́, Крести́телю, та́инству Изба́вителя послужи́, ра́дуяся./ Лю́дие, воспои́м:// благослове́н явле́йся, Бо́же наш, сла́ва Тебе́.
Свет из Све́та пре́жде лет возсия́вый,/ в нощи́ седя́щим яви́ся/ и тьму греха́ очи́сти и просвети́./ Лику́й, Ада́ме, и весели́ся, Е́во,/ избавле́ние, Христо́с, прии́де./ Дави́де, возопи́й:// благослове́н, явле́йся, Бо́же наш, сла́ва Тебе́.

Слава, глас 5:
Веселися и радуйся, Париже, светлый граде!/ Днесь бо память че́ствуется блаженныя Геновефы,/ твоея покровительницы,/ единонравныя преподобным женам древле бывшим,/ Евангелия проповедницы,/ зрительницы видений Божественных,/ святителей послушницы,/ дерзновенныя твоея поборницы и ходатаицы,/ прозорливицы, грядущая глаголавшия,/ матери нищих и дев заступницы!/ И почитая ю,/ вкупе с нами возопий: Христе Боже,/ молитвами святыя Твоея// утверди Церковь Твою в мире.

И ныне, глас 6, Предпразднства:
Зако́на Испо́лнитель по пло́ти быв,/ прии́де Христо́с,/ нача́ток спасе́ния на Иорда́н соверши́ти, я́ко Благосе́рд,/ и Крести́телю подклоня́ет верх, ве́рно вопию́щу:/ лю́дие, зове́м:// благослове́н явле́йся, Бо́же наш, сла́ва Тебе́.

НА СТИХОВНЕ СТИХИ́РЫ, ГЛАС 2:
Подобен: До́ме Евра́фов:
Престо́л От Вифлее́ма/ на Иорда́н пре́йдем,/ та́мо бо Свет/ су́щим во тьме// озаря́ти уже́ начина́ет.
Стих: Сего́ ра́ди помяну́х Тя/ от земли́ Иорда́нски и Ермонии́мски.
Земля́ Завуло́ня,/ су́щии обо́нпол Иорда́на,/ услы́шите:/ приближа́ется Христо́с,// Спасе́ние, Свет и Избавле́ние.
Стих: Ви́деша Тя во́ды, Бо́же,/ ви́деша Тя во́ды и у́бояшася.
Угото́ви и ты,/ Иорда́не, струи́,/ огне́м бо Креща́яй/ приближа́ется обнови́ти// сокруше́нное созда́ние.

Слава, и ныне, глас 2:
Яви́ся сла́вы/ О́тчее Сия́ние/ во струя́х Иорда́нских,/ Креще́нием очища́я// скве́рну душ на́ших.

НА ЛИТУРГИ́И
Блаже́нны от кано́на пе́рваго песнь 3-я и втора́го кано́на песнь 6-я.
Проки́мен, глас 4: Дивен Бог во святых Своих,/ Бог Израилев.
Стих: В церквах благословите Бога, Господа от источник Израилевых.
Апо́стол к Гала́том, зача́ло 208 («Бра́тие, пре́жде прише́ствия ве́ры…»).
Ева́нгелие от Матфея, зача́ло 104 («Рече́ Госпо́дь при́тчу сию́: уподо́бися Ца́рствие Небе́сное десяти́м де́вам…»).
Прича́стен: В па́мять ве́чную бу́дет пра́ведник,/ от слу́ха зла не убои́тся. Аллилу́иа (три́жды).