Редкие Богослужебные тексты

Творение Серафима Ксенопулоса, епископа Аргиропольского (☦1894)

Молитвами святых отец наших.
Царю́ Небе́сный.
Трисвятое. Пресвята́я Тро́ице: О́тче наш:
Ами́нь. Го́споди, поми́луй, 12.
Слава, и ныне:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

И псалом 142:
Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.
Слава, и ныне: Аллилу́иа, трижды.

Бог Господь и тропарь, глас 4
Вси иерарха в песнех ныне восхвалим, славна и всеми почитаема присно, всех православных похвалу, Спиридона, и возопиим к нему сицевая, зовуще: от напастей, отче, всяческих, бед и печалей, нас свобождай рабов твоих всегда, твою икону любо́вию лобызающих.
Слава и ныне:
Не умолчи́м никогда́, Богоро́дице, си́лы Твоя́ глаго́лати, недосто́йнии: а́ще бо Ты́ не бы предстоя́ла моля́щи, кто́ бы на́с избaвил от толи́ких бе́д, кто́ же бы сохрани́л до ны́не свобо́дны? Не отсту́пим, Влады́чице, от Тебе́: Твоя́ бо рабы́ спаса́еши при́сно от вся́ких лю́тых.

Таже псалом 50–ый:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.

Песнь 1
Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Блаженне святителю, молим тя, заступниче велий, всем любовию даруй нам, твою, отче, скорую молитву образ Божественный твой лобызающим.

Поют, Спиридоне, тя вси полки и лик благочестия держащихся, чудне, весь: Творец бо Бог, отче, и Владыка, тя достодолжно прослави, блаженнейше.

Ты Свет невещественный на небесех со Ангелы зриши, услаждаяйся, отче, им, тем и нас сим светом просвети всех, о Спиридоне, твоими молитвами.

Богородичен: Беды, искушеньми же полн есмь аз, к Тебе прибегая, разрешения сих прошу, о спаси мя, Дево Преблагая, и ниспосли ми щедроты Твоя, молю.

Песнь 3
Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Из гроба мертвую, о Спиридоне, воззвал еси, тем и мене прегрешении умерша воззови, вопию тебе.

Твое почитание, меры не имать, блаженнейше, ты бо молитвенник, отче, наш усердный, честь и всем вспоможение.

Печали всякия, бед и недугов различных же, о Спиридоне, молитвами твоими, свободи мя, молюся ти.

Богородичен: На Тя упование имам всегда, о Владычице, и возвожу Ти в веселии, Царице, и душу и помышление.

От всяких бед и от печалей различных нас свободи всех, тепле память твою творящих, отче блаженнейше, скорбящим помощниче, Спиридоне.

Призри благосердием, всепетая Богородице, на мое лютое телесе озлобление, и исцели души моея болезнь.

Седален, глас 2:
Молитву усердну Богу и предстательство, молю, Спиридоне, принеси, свяще́ннейше, да подаст тобою нам, верным всем, грехов оставление, и от бед всяких нас да свободит, святителю славный и заступниче.

Песнь 4
Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Солнце ты многосветлое, и отцев хвало, Спиридоне, отче наш, тем, святителю, тя чтущия озари молитв твоих сиянии.

Предстоя, о святителю, вечному престолу Цареву, чтущих тя и поющих от бед всяческих ограждай твоими молитвами.

Яко змия, блаженнейше, в злато претворил еси, тем и мя от зол претвори к покаянию, Спиридоне славнейший, молюся ти.

Богородичен: От скорбей, обдержащих мя, свободи, молюся Ти, Дево Чистая, на Тя бо упование возлагаю, Мати Милосердая.

Песнь 5
Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Страсти исцели и тех мглы мя свободи, молю, светлым осиянием моле́ний твоих, и ко святому житию, отче, направи мя.

Славнейший ты врач и избавитель бед всяческих, о Спиридоне, показался еси, тем исцели твоими, отче, мя молитвами.

Зол мя свободи, к тебе, отче всеблаженнейше, с благоговением прибегшаго, и свободи печали всякия, молюся ти.

Богородичен: Чистая, подай нам, рабам Твоим, спасение, и свободи печали лютыя к Богу ходатайствы Твоими и молитвами.

Песнь 6
Ирмос: Моли́тву пролию́ ко Го́споду, и Тому́ возвещу́ печа́ли моя́, я́ко зол душа́ моя́ испо́лнися, и живо́т мой а́ду прибли́жися, и молю́ся я́ко Ио́на: от тли, Бо́же, возведи́ мя.

Движения умертвив плотския вси, воскрешал еси умершия, отче, словом божественным своим, всеславне, темже воздвигни страстьми умервщленную душу мою и оживи, Спиридоне, твоими молитвами.

Грехов зело обдержит мя море, и волнуется бед буря прекрепкая, и к глубине низвлачит мя погибели, неисцельных страстей ветр противный,
смиренно молю тя укроти, Спиридоне, сие треволнение.

Предстателю всех скорбящих, блаженне, оскверненную сластьми мою душу омый, молю, умиления банею и очищающих слез, и избави мя от муки адския, прошу, Спиридоне, твоими молитвами.

Богородичен: Болезни вси, Всеблагая, Тя молю, отгони от мя и немощи, Мати, и исцеление даруй ми, Дево, и совершенно, Владычице, здравие,
надежду имам бо на Тя: исцели мя Твоими молитвами.

От всяких бед и от печалей различных нас свободи всех, тепле память твою творящих, отче блаженнейше, скорбящим помощниче, Спиридоне.

Чистая, Яже сло́вом Слово неизреченно в последняя дни рождшая,/ моли, яко имущая Матернее дерзновение.

Кондак, гл. 6:
Предстательство еси́ благочестивых всех непобедимое, моление ко Творцу непостыдное, не презри убо благочестивых глас молебный, но явися милостив, Спиридоне отче помощниче, тепло ти вопиющим: ускори убо, всеблаженне, и потщи́ся Христа умолити еже ущедрити ныне нас, Богоносе, чтущих тя.

Стихира, гл. 6:
Досточудне, отче наш, имяше остров Керкира тя богатство многое, озаряющее лучами светлыми град и, отче, остров сей, тем и мир Керкире даруй, да тобою исполнится всех победительных и врагов низложит оружием, о богославне блаженнейше, исполни милости всех нас, тя поющих, отче всеславнеший, моли о нас всегда, о Спиридоне, всех Господа, да тобою спасемся.

Песнь 7
Ирмос: Отроцы евре́йстии в пещи́ попра́ша пламе́нь дерзнове́нно и на ро́су огнь преложи́ша, вопию́ще: благослове́н еси́, Го́споди Бо́же, во ве́ки.

Отче, тя хвалящих спасай всех преподобне Спиридоне всеблаженне, и рабов твоих светом Божественным присно световоди, поющих тя, молитвами твоими.

Всех нас избави, Спиридоне, искушения диаволя, тя молим, помышлений лукавых, скорбей и печалей, яко тобой спасаеми, воспеваем тя по долгу.

Яко отец всех в скорби сущих, утиши моя душевныя болезни, и страстей свободи всех и бед, и напастей, и обстояний злых, молю, молитвами твоими.

Богородичен: Злобу в душе своей имея, и безместныя обычаи и страсти, к Твоему милосердию се притекаю: о мя спаси, Всепетая, Тя молю, Благая Мати.

Песнь 8
Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

Всяких недугов, бед и болезней лютых, тя врача, Спиридоне, аз знаю, тем печали всякия, отче, мя избави.

Скверн обдержащих, о Спиридоне блаженне, свобождай вся рабы твоя, отче, подавая им разрешение и помощь.

О Спиридоне, яко молитвенник велий, не престай о рабех твоих, отче, Богу возносити молитвы, да спасет нас.

Богородичен: Отроковице, жалкого мя неисцельных свободи всех болезней, да славлю Тя, Благая Мати, в веселии во веки.

Песнь 9
Ирмо́с: Вои́стину Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Прибегших любовию, святе Спиридоне, под кров твой, бед свободи, и избави их от неисцельных страстей твоими молитвами.

Тя славящих и чтущих, отче Спиридоне, ты не престай ограждати, ти молимся, и избавляти от бед твоими молитвами.

Прибегшим всем ти верным, отче Спиридоне, ты свободитель в Керкире тогда сим быв, и ныне мя свободи, молюся, бед всяческих.

Богородичен: Спасения, Марие, Дево Преблагая, Тя вси пристанище ведуще, молимся: всех свободи нас недуг Твоими молитвами.

Достойно есть и величальны:
Радуйся, врачу всех скорый больных, Тримифу́нта сла́во, и недужных всех врачевство, и отцев доброто, и похвало всех, отче, блаженне Спиридоне, тя поем сладостно.

Спиридо́не отче, ныне о нас помолися верных, и о мне, прегрешном, молю, да грехов от Бога оставление приемше, любовию тебя поем, отче, радостно.

Спиридоне отче, Бога моли от недугов многих свободити, мудре, всех нас, от скорбей, напастей, и прочих обстояний, да Бога, отче, всех, прославим в веселии.

Спиридоне отче, ты просвети от грехов слепыя очеса души моея, светом да исполнюсь молитвами твоими, и адовых мучений горьких избави мя.

Вся Ангелов воинства, Предтече Господень, апостолов двоенадесятице, святии вси с Богородицею, сотворите молитву, во еже спастися нам.

Трисвятое по Отче наш, и тропари сия покаянныя, глас 6:

Помилуй нас, Господи, помилуй нас;/ всякаго бо ответа недоумеюще,/ сию Ти молитву яко Владыце, грешнии приносим:/ помилуй нас.

Слава: Господи, помилуй нас,/ на Тя бо уповахом;/ не прогневайся на ны зело,/ ниже помяни беззаконий наших,/ но призри и ныне яко благоутробен, и избави ны от враг наших; / Ты бо еси Бог наш, и мы людие Твои,// вси дела руку Твоею, и имя Твое призываем.

И ныне: Милосердия двери отверзи нам,/ благословенная Богородице,/ надеющиися на Тя да не погибнем,/ но да избавимся Тобою от бед:// Ты бо еси спасение рода христианскаго.

Посем сей тропарь, глас 1:
Собо́ра Пе́рваго показа́лся еси́ побо́рник и чудотво́рец,/ Богоно́се Спиридо́не, о́тче наш./ Те́мже ме́ртву ты во гро́бе возгласи́в,/ и змию́ в зла́то претвори́л еси́,/ и внегда́ пе́ти тебе́ святы́я моли́твы/ А́нгелы, сослужа́щия тебе́, имел еси́, свяще́ннейший./ Сла́ва Да́вшему тебе́ кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния.

На целование образа, глас 2:
Честен сотвори́л еси сосуд, Духа, отче, Свята, себе́, очи́стивый душу свою, Богом помаза́ние прия́л еси ты, показався, святителю, молитвенник теплый верных всех, тя хвалящих, отче блаженнейше, и архиерей благонравный, отче Богоносе всехвальне, темже молися о поющих тя.

Текст на церковно-славянском: disk.yandex.ru/i/UKr-uShnKSL7Uw