Редкие Богослужебные тексты

СЛУЖБА
святым мученицам Елене и Центолле, иже в Бургосе, Испанским
НА ВЕЛИЦЕЙ ВЕЧЕРНИ
На Господи, воззвах: стихиры, глас 4:
Ка=плями кро=вными обагри=вшися, / возсия=ла еси, яко солнце, / и отгнала еси, всехва=льная Елено, безбожия тьму благодатию, и ве=рныя просветила еси, / чту=щия твоя до=блественныя подвиги // и память светоно=сную и всеспасит=ельную.
Христа Спаса всем сердцем возлюби=вши / и свещу= твою светло украси=вши, / доброде=тельми просия=ла еси, славная Елено. / Те=мже возшла еси в Небесный Чертог / и, венец страдания прии=мши, / от бед изба=ви нас, // соверша=ющих память твою.
Постом украси=вши чистоту душевную, / лучами страда=ния просвеща=еши ве=рныя, / страстоте=рпице святая Елено. / Тем твой святы=й и светоносный день / верою соверша=юще, благоче=стно вопием: / яко иму=щая дерзновение ко Господу, // моли спастися всем нам.
Богому=дрыя Елено и Центолло всечестныя, / двоице Божественная, / возсия=вше, яко звезды многосве=тлыя, тварь просвещаете / подвиг сия=ньми и чудес светлостьми=, / днесь всесвяще=нную память вашу соверша=юще, // с веселием покланя=емся ра=це мощей ваших.
Слава, глас 1:
Зако=нно за Христа пострада=вше, / преблаже=нныя Елено и Центолло, / обогати=стеся венцем нетленным истинно, / сла=вныя исповедницы Христовы, // и Царство Небесное, и Божественное наслаждение прия=сте.
И ныне, Догматик, глас тойже: Всемирную славу:
Вход. Прокимен дне и чтения.
Пророчества Исаиина чтение (глава 43):
Тако глаголет Господь: вси языцы собрашася вкупе и соберутся князи от них. Кто возвестит сия в них или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину; будите Ми свидетели, и Аз Свидетель, глаголет Господь Бог, и Отрок, Егоже избрах, да познаете и веруете Ми, и разумеете, яко Аз есмь: прежде Мене не бысть ин бог, и по Мне не будет. Аз есмь Бог, и несть разве Мене спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляяй; сотворю, и кто отвратит то? Сице глаголет Господь Бог, избавляяй вас Святый Израилев.
Премудрости Соломони чтение (глава 3):
Праведных души в руце Божией, и не прикоснется их мука; непщевани быша во очесех безумных умрети, и вменися озлобление исход их, и еже от нас шествие — сокрушение; они же суть в мире. Ибо пред лицем человеческим аще и муку приимут, упование их безсмертия исполнено; и, вмале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему; яко благодать и милость в преподобных Его, и посещение во избранных Его.
Премудрости Соломони чтение (главы 5 и 6):
Праведницы во веки живут, и в Господе мзда их, и попечение их у Вышняго: сего ради приимут царствие благолепия и венец доброты от руки Господни, зане десницею покрыет я и мышцею защитит их. Приимет всеоружие — рвение Свое, и вооружит тварь в месть врагом. Облечется в броня правды и возложит шлем — суд нелицемерен. Приимет щит непобедимый — преподобие. Поострит же напрасный гнев во оружие; споборет же с Ним мир на безумныя. Пойдут праволучныя стрелы молниины, и, яко от благокругла лука облаков, на намерение полетят. И от каменометныя ярости исполнь падут грады; вознегодует на них вода морская, реки же потопят я нагло. Сопротив станет им дух силы, и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте; навыкните, судии концев земли. Внушите, держащии множества и гордящиися от народов языков: яко дана от Господа держава вам, и сила от Вышняго.

На стиховне стихиры, глас 1:
Зарею просвеща=ема Трисо=лнечнаго Божества, / Елено преблаже=нная, / веру Христову дерзнове=нно испове=дала еси / и, страда=льческим просве=щся венце=м, / с пострада=вшею с тобою Центоллою лику=еши на Небесе=х, // с не=юже моли= спасти=ся нам.
Стих: Святым, иже суть на земли Его, / удиви Господь вся хотения своя в них.
Глаго=лом внима=ющи сла=дким, / достосла=вная матро=но Еле=но, / Боже=ственнаго и Всесвята=го Духа, / горесть всяку плотски=х страстей оста=вила еси / и сме=ртию к безсме=ртней сла=ве возшла= еси, // Христа моля=щи всем дарова=ти ве=лию милость.
Стих: Многи скорби праведным, / и от всех их избавит я Господь.
Яко река= спасения, яко источник жив, / святы=я Елены ковче=г мощей показа=ся, / темже прииди=те, вернее, / почерпем в неду=зех исцеления / и радость, яже в скорби, // молитвами страстоте=рпицы Господней.
Слава, глас 4:
Дво=ицу мучениц, ве=рнии, днесь в пе=снех свяще=нных возвели=чим, / яко лесть идольскую низложи=ша, / многобо=жия огнь испепели=ша и демоны посрами=ша; / мучи=телей же ярости не устраши=шася, / меча= убо и пло=ти терзаний не убоя=шася, / до=блественно подвиза=вшеся, / Елена славная с честною Центоллою, // мученик слава, ку=пно и похвала.
И ныне, Богородичен, глас тойже:
Призри на моления Твоих раб, Всенепорочная, / утоляющи лютая на ны востания, / всякия скорби нас изменяющи. / Тя бо Едину, твердое и известное Утверждение имамы, / и Твое предстательство стяжахом, / да не постыдимся, Владычице, Тя призывающии, / потщися на умоление Тебе верно вопиющих: / радуйся, Владычице, всех Помоще, // Радосте и Покрове, и Спасение душ наших.
Тропарь, глас 4:
Во страда=льчестве твоем до=бре подвиза=лася еси, / достоблаже=нная му=ченице Елено, / за Троицу усече=ние ме=чное прия=ла еси со сла=вною Центоллою, / и по смерти нас освяща=еши чудес точе=ньми. / Те=мже твою святую память поем, / верою притека=юще к честны=м моще=м твоим, / да изба=вимся неду=гов душевных // и чудес благодать почерпе=м.
НА УТРЕНИ
По 1-м стихословии седален, глас 1:
Уязвися, Владыко, любовию Твоею сладкою Елена премудрая / и горькую язв болезнь претерпевает, Слове Божий, / темже к неболезненному преставляется наслаждению, / яко нескверна и нетленна. / Тоя= молитвами да=руй всем, Христе, велию милость.
Слава, и ныне, глас тойже:
Едина истинная христиан Покровительнице, / всяких лютых обстояний, / бед и скорбей нас избави / и молитвами Твоими спаси души наша.
По 2-м стихословии седален, глас 2:
До=бре испове=давши Христово имя пред враги= беззако=ннующими, / законно пострадала еси Его ради, честна=я Елено, / и ныне мо=лишися всем дарова=ти велию милость.
Слава, и ныне, глас тойже:
Устами и сердцем величаем Тя, / Матерь Божию: / Ты же, ро=ждшая Бога, / не отри=ни нас от Твоего заступления.
По полиелее седален, глас 4:
Оде=ждами светло украшена священных и чу=дных подвиг твоих, / к Нетленному Сего возшла еси Чертогу, / и красоты= Христовы наслаждаешися, / облече=на в порфиру мученических крове=й своих, / Елено добропобедная. / Но моли= спасти=ся нам от вся=кия ну=жды, // любовию поющим тя.
Слава, и ныне, Богородичен:
Проро=цы Тя предвозвести=ша, / апо=столи пропове=даша, / мученицы просла=виша, / святителие ублажи=ша, / темже и мы с ними Богородицу Тя испове=дающе, / благочестно в песнех величаем.
Таже степенна, 1-й антифон, глас 4.
Прокимен, глас 4: Святым, иже суть на земли Его, / удиви Господь вся хотения своя в них.
Стих: Презрех Господа предо мною выну, / яко одесную мене есть, да не подвижуся.
Всякое дыхание: Евангелие от Матфея, зачало 36.
По 50-м псалме стихира самогласна, глас 6:
От источник спасения / поче=рпши присножи=вотно исцеле=ние, / распали=лася еси жаждею мучения / и, ускори=вши, потекла= еси, / и, пив=ши, стала еси, Елено всечестная, / упоко=ившися желанием любве= крайния, / и ныне ра=дуешися в Небесных Кро=вех, // моля=щися при=сно о чтущих тя.
Канон, глас 2.
Песнь 1
Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, // яко прославися.
Любовию Христовою распала=ема, му=ченице Елено, мирское отве=ргла еси омрачение, Небе=сному же те=пле, всеблаже=нная, прибли=жися Свету Невещественному.
Род презре=вши и ю=же от богатства светлость, честна=я Елено, всех вместо Христа стяжа=ла еси.
Добро=ты возжела=в Владыка всех краснейшаго твоего сердца=, Елено всехва=льная, Небесных Чертогов сподо=би тя.
Богородичен: Светлыми лучами Твоего Сына, Богородице, просвети= омраченную мою душу, страстей смущение отжени=, Твоими, Чистая, хода=тайствы.
Песнь 3
На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, // и несть праведен паче Тебе, Господи
Любве= ради Зижди=теля, о страстоте=рпицы, всю мирску=ю лесть истинно презре=вше, Еди=наго возжела=сте Христа, взыва=юще: несть свят, якоже Бог наш.
Просве=щся Тро=ичным сия=нием, мучениц до=блее сопряже=ние, идольское разруши= омрачение, Христу взывая: несть свят, якоже Бог наш.
Мрачному не принесла= еси демону жертвы, непобедимая мученице Елено; жизноно=сную бо смерть возлюби=ла еси за благочестие прия=ти.
Богородичен: Прогоня=ющее Оружие грехи= и страсти души= моея= бу=ди, Дево, и покажи= мя, якоже други=й рай, безнаве=тен и соблюде=н Тобою и принося=щий цве=ты Духа.
Седален, глас 3:
Муками, требога=тыя святы=я мученицы, / сокровище на Небесе=х и ве=чнующую славу обрето=сте, /я=сно Богу прибли=зившеся, // иде=же моли=теся о воспева=ющих вас.
Слава, и ныне, Богородичен:
Пречи=стеи Твои ру=це, Дево Мати, просте=рши, / покры=й упова=ющия на Тя и к Сыну Твоему зову=щия: // всем пода=ждь, Христе, Твоя милости.
Песнь 4
Пришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: // слава силе Твоей, Господи.
Возжела=вши Христовы красоты= и Сего любо=вию снеда=ема, страданием сочета=лася еси Ему, Елено Богомудрая и всеславная.
Пода=ждь ми просвещение и мир, Елено достославная, реша=щи моли=твами твоими многомяте=жное смущение.
Украси=стеся, мученицы, и све=тло просла=вистеся, Христа Господа всячески возлюби=вше, Егоже уя=звлены любо=вию, претерпе=сте страстей нашествия кре=пце.
Богородичен: Возсия= из утробы Твоея=, Отрокови=це Неискусобра=чная, Отчее Сияние Христос, и просвети= вселенную, распи=наемь, и бесо=вскую тьму потреби=.
Песнь 5
Света Подателю и веков Творче, Господи, / во свете Твоих повелений настави нас; // разве бо Тебе иного бога не знаем.
Му=жеским помыслом на суди=щи Христа, славная Елено, испове=дуеши, Бога воплоще=нна, и, мече=м во главу усе=чена, лику=еши с мученики.
Яко тепла ревность веры твоея=, мученице Елено, е=юже попра=ла еси неверных настоя=ние и победу пожа=ла еси страдания.
Зако=нно за Христа пострада=вше, сла=вныя Елено и Центолло, обогати=стеся венце=м нетле=нным истинно и Царствие Небесное, и Божественное наслаждение прия=сте.
Богородичен: Закона Исполнение, вы=сшая Херувим, родила еси Божия Слова воплоще=на, Сына Единородна, Его=же о рабе=х Твоих умоли=.
Песнь 6
В бездне греховней валяяся, / неизследную милосердия Твоего / призываю бездну: // от тли, Боже, мя возведи.
Му=жественное в же=нстей пло=ти души= мудрова=ние нося=щи, славная мученице, о телеси= своем и смерти нерадила еси.
Скверная уста= мучителей и горды=ню пребеззако=нных загради,= Богому=драя Елено, Духом Святым, венец нетле=нный от Христа восприимши.
Яко кри=ны в ве=рте страдальцев, процвето=ша пресла=вныя Елена и Центолла и Церковь воня=ми мучений за Христа облагово=ниша Духа благодатию.
Богородичен: Милости Твоея=, Богородице, сподо=би мя, Преми=лостиваго Слова ро=ждшая, Своею Кровию от тли человеки изба=вльшаго.
Кондак, глас 4:
Всечестну=ю Елену со славною Центоллою, / страстотерпиц всехва=льную дво=ицу, почтим: / ты=я бо пребеззако=нных козноде=йства посрами=ша силою Распе=ншагося; / сего ради яви=шася му=чеников слава, // нам же похвала и утверждение.
Песнь 7
Да преславное рождество Твое, Христе, / еже от Девы прообразиши яве, / неопалимы в пещи отроки сохранил еси, // песньми поющыя Тебе: / отцев, Боже, благословен еси.
Злочести=ваго мучи=теля, жре=ти и=долом глухим повелева=ющаго, оплева=сте, му=ченицы, вопию=ще: отцев Боже, благословен еси.
Просвеще=нныя умом Богонача=льными заря=ми, мглу идольскую очерни=сте, всехва=льныя, поюще: отцев Боже, благословен еси.
Разумом Боже=ственным обогаще=на, Елено чу=дная, вся нече=стивых ко=зни посрами=ла еси, пою=щи: отцев, Боже, благослове=н еси.
Богородичен: Тьмою лютою жития= объят быв, соскорбя=щаго и сболе=знующаго не обрето=х: Твоею, Дево, све=тлостию разреши= тму прегрешений и озари= пе=ти Тебе, Благослове=нная, Я=же Бога пло=тию ро=ждшая.
Песнь 8
Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: // благословите, вся дела Господня, Господа.
Невеще=ственным раче=нием укрепле=на, те=ло предала= еси на смерть, Елено честная, и Царствие Горнее насле=довала еси, и присно воспеваеши: благословите, вся дела Господня, Господа.
На лесть и скверну, якоже на зверя, подвигом вооружи=вшися, мученице, победы венце=м увязо=ся, зову=щи: благословите, вся дела Господня, Господа.
Не душетле=нную смерть прия=, Елено преди=вная, но нестаре=ющую Жизнь обре=те благодерзнове=нно вы=и под меч преклоне=нием, хвалу вознося=щи: благословите, вся дела Господня, Господа.
Богородичен: Спасение во гресе=х погибающим ро=ждшая, Богородице, на покая=ния стезю= настави мя и славы присносу=щныя покажи= мя прича=стника.
Песнь 9
Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: // тем всепетую Богородицу величаем.
Души= твоея= свещу= вже=гши, му=ченице, еле=ем крове=й твоих, вошла еси, ра=дующися, в Неве=стник Христов с мудрыми девами, с ни=миже, Елено, поминай всех, верою хва=лящих тя.
Посреде= мучи=телей яви=стеся аки посреде= волко=в, а=гницы нескве=рныя, сих зверови=дное побежда=юще, и Христу яко жертва благоприя=тная принесо=стеся.
Соверша=ющих любовию память твою, мученице Елено, не оста=ви предста=тельствы твоими и от всяких бед спаси=.
Богородичен: Нам, поющим Тя и верою сла=вящим, и божественному Твоему покро=ву присно притекающим, подаждь с Небесе= разрешение лю=тых страсте=й, Богоневесто, и му=ки и суда =изба=ви.
Светилен:
Предстоя=щи ныне Трисия=нному Великому Свету со всеми святыми, добропобедная мученице Елено, помяни= всех нас, память твою светоно=сно соверша=ющих.
Слава, и ныне, Богородичен:
Света Превечнаго родила еси нам, Христа Бога нашего, Пречистая Дево, изба=вльшаго весь мир от лести диаволи. Темже молим Тя: не преста=й моля=щи, да подаст нам милость Свою в День Судный.
На хвалитех стихиры, глас 2:
Мучение всечу=дно Христу принесла еси, Елено славная, / шатания безбожная силою крестною низложи=вши. / Темже Христова Церковь память твою светоносную празднует, // ра=дующися и веселя=щися.
Елены страданию и Центоллы противле=нию / блаже=ннии ли=цы А=нгельстии удиви=шася, / к=ако врага неви=димаго злохи=трая сплете=ния разори=вше, / победы венцы от Христа Живоно=сца // богатно прия=ша.
Мечем скончава=еми, / идольское неи=стовство посеко=сте / и, свещу= неуга=сшу душе=вную соблю=дше, / в Чертог Небесный внидо=сте, / страстоно=сицы честны=я Елено и Центолло, / демонов же полки страда=льчески победи=сте // и ныне мо=литеся о душа=х наших.
Слава, глас 8:
Торже=ствует Церковь Твоя, Христе, со=нмом мученик пречу=дных/ украше=нная, / живот свой земны=й Тебе преда=вших / и от Тебе Живот Ве=чный получивших; / тех молитвами, Долготерпели=ве Человеколю=бче Господи, // в Православии нас сохрани до скончания века.
И ныне, глас тойже:
Влады=чице, приими= молитвы раб Твоих / и изба=ви нас от всяки=я нужды и печали, / Ты бо еси Оружие наше и Стена, и Заступница, /и к Тебе прибегаем, // да изба=виши нас от врагов наших.
НА ЛИТУРГИИ
Блаженны от канона, песнь 3-я и 6-я.
Прокимен, глас 4: Святым, иже суть на земли Его, / удиви Господь вся хотения своя в них.
Стих: Презрех Господа предо мною выну, / яко одесную мене есть, да не подвижуся.
Апостол к Галатом, зачало 214.
Аллилуиа, глас 4: Воззваша праведнии, и Господь услыша их, и от всех скорбей их избави их.
Стих: Многи скорби праведным, и от всех их избавит я Господь.
Евангелие от Иоанна, зачало 51.
Причастен: Радуйтеся, праведнии, о Господе, правым подобает похвала.
МОЛИТВА
О, прехвальная мученице Христова Елено. Тебе припадаем и молимся: даждь нам быть причастником любве твоея к Богу и ближнему, еюже при жизни святая твоя душа преисполнена бысть. Озари нас истиною, просвети ум и сердце светом Божественнаго учения, научи нас тебе подражати верно, Бога и ближняго нашего любити и заповеди Господа совершати, да чада света явимся воистину. Призри благоутробно на всякую душу верных твоих почитателей, милости и помощи твоея ищущих. Буди всем нам в болезнех целительница, в скорбех утешительница, в печалех посетительница, в бедах и нуждах помощница, в час же смертный милостивая покровительница и защитительница и всем вся прошения ко благу исполни. Да при помощи молитв твоих даждь нам спасение вечное получити и Царствие Христово унаследовати, славящедивнаго во святых Своих Бога, Отца и Сына и Святаго Духа во веки веков. Аминь.