Редкие Богослужебные тексты

Св.мч.Маврикию Фивейскому и дружине его

Тропарь, Гл.4
Нечести́ваго царя/ поправ безбожное веле́ние,/ мучениче до́блественный,/ военача́льниче Маврикие,/ кровь невинных/ не пожерл еси бесово́м,/ кровь же свою / за Христа излиял еси,/ и дружину спострадати укрепил еси,/ по кончине же твоей/ многая чудеса явишася./ Сего ради молися,/ всим чтущим тя/ верными пребыти Христу// даже до смерти.

Кондак, гл. 3

Фиваидския страны произрастения,/ мученицы святии,/ честныя шесть тысящ и шестьсот,/ Маврикие, Кандиде, Экзюперие,/ Иннокентие, Виталие,/ Александре, Октавие,/ Урсусе, Викторе и инии/ единодушно пострадавшии,/ и венцы победныя стяжавшии,/ с легионы Ангельскими,/ молитеся за роди христианстии,/ противу невидимых враг/ мужески нам подвизатися// и спастися душам нашим.

Стихиры, глас 1, под.Всехвальнии мученицы

Всехвальнии мученицы,/ Фиваидская прозябения,/ земному царю честне воинствовавшии,/ обаче безбожная того веления поправшии,/ бесом пожрети не восхотевшии,/ и неповинне за Христа закланнии/ Тому молитеся// спастися всем чтущим вас.

Доблественнии страстотерпцы,/ лютым мучителем не противостасте,/ мечи и латы на земли повергше,/ и яко агнцы незлобивии / себе на заколение предасте,/ Истины ради,/ темже Христу молитеся,// всем нам в вере твердым пребывати.

Фивейстии мученицы,/ шесть тысящ шестьсот,/ воинскую крепость отложисте,/ смирения ради Христова,/ и исповеданием непорочным,/ в Небесныя кровы восшедше,/ чудесы верныя обогащаете,// и молитеся спастися нам.

Легионе добропобедный,/ славу земную/ славы ради Небесныя презревшии,/ легионы бесов низложшии,/ сонмы верных назидающии,/ с легионы Ангельскими,/ Христу молитеся// спастися душам нашим.

Глас 4, подобен: Яко добля

Ужасом многим/ одержими бяху зрящии,/ егда трие честнии мученицы,/ Феликс, Регула, Экзюперантий,/ усеченныя главы в руце прияша/ и из реки Аар изыдоша,/ ныне же на гербе града изображеннии/ в Царстве же вышнем вечнующии// молятся о чтущих страдания их.