Редкие Богослужебные тексты

Служба преподобному и Богоносному отцу нашему, ГАВРИИЛУ ИВЕРСКОМУ,
Самтаврийскому

Вечер
На Господи, воззвах стихиры, глас 1.
Подобен: О дивное чудо:
О дивное чудо!/ Ми=ра себе удали=вый/днесь в концех земли прославляется/и просветитель оте=честву своему бывает:/ веселися, Иве=рие,/ Богородичен уде=ле,/ возопием, вернии,/ Гаврии=ла Богому=драго иму=ще ходатая:\ преподобне отче, радуйся,/ моли благоутробнаго Господа/ Церкви дарова=ти мир\ и ве=лию милость.
Твоя хвалят добродетели/ правосла=внии людие,/ Богоно=се Гаврииле,/ смире=ние и милосе=рдие,/ и любве= Боже=ственныя блиста=ние,/ и терпе=ния столп неколе=блен./ Тем, припа=дающе ко образу твоему, просим:/ предста=тельствуй, святче, за ны,\ моли Христа Бога,/ да избавит от бед\и оста=вит беззакония наша.
Радосте сподви=жников,/ Православия утвержде=ние,/ избра=нный служи=телю Святы=я Троицы,/ Ангелов дру=же,/ от земных в Небе=сный Вертоград возше=дый,/ и та=мо, яко цвет, вкорени=выйся,\ ныне Садоде=лателя блага=го умоли/ окропити ро=сою благодати и ны,\ угле=бшия в собла=знах и бе=дствиих.

Ины, глас 4.
Подобен: Яко добля:
Яко Евангелия истинный послу=шатель,/ Гаврииле преподобне,/ и заповедей Христовых усердный де=латель,/ своих воль хотения оставив,/ крепко на страсти ополчи=лся еси/ и прият от Бога разсужде=ния венец./ Егоже моли/ победы на сопроти=внаго даровати\ ве=рою совершающим память твою.
Да=ры Уте=шителя/ бу=ими притворе=нии/ в се=рдцы своем потаи=вый,/ и на камени ве=ры утвержде=н,/ вся безбожных шата=ния попра=л еси,/ Спаса Христа пропове=дуя имя./ Сего ради Ангелов ли=кове/ и православных собра=ния\ ныне тя хвалят любо=вию, ра=дующеся.
Светел лице=м,/ ра=дуяся о Ду=се Святе,/ милостию к себе привлека=ше/ ближних и дальних,/ овому воумле=нии, овому обличе=нии,/ вся всем соде=лався, отче преми=рне,/ темже и ныне к тебе притека=ющия/ и на заступление твое упова=ющия\ поможе=нием не оста=ви, святе.
Слава, глас 6:
Взе=мше свире=ли мы=сленныя,/ взыгра=ем пра=зднственная,/ благослови=м Христа, Бога на=шего,/ яви=вшаго такова=го печа=льника/ оте=честву своему,/ лю=дем уде=ла избра=ннаго,/в па=стырех ди=внаго./ Тому хвале=бная да вознесем:/ты еси и=ноком ра=дование/ и вели=чие Картли=,/ и чудес исто=чник,\ и великий нам помощник и заступник.
Вход. Прокимен дне. И чтения три.
На стиховне стихиры, глас 5.
Подобен: Радуйся, живоносный Кресте:
Радуйся, сокро=вищнице богоугоднаго нрава,/ ризою смирения покрове=нная,/ в нейже яспис и топа=зий сияют,/ кротость и долготерпе=ние твоя,/ и адама=нт веры пра=выя,/ би=сер бде=ния и трезве=ния,/ и маргарит молитвы непреста=нныя/ в зла=те любве и ми=лости./ Вся сия ныне Богу яви=вшу,/ воспевают ча=дца церко=вная, взыва=юще:/не престай, уго=дниче Христов, моля=ся\ еже спасти=ся душам нашим.
Стих: Честна пред Господем\ смерть преподобных Его.
Радуйся, яко голубь чистый,/ девством и целомудрием убеле=нный,/ бла=гостию богоподобною воскриле=нный,/ досточе=стне отче Гаврииле,/ ты бо, плотския страсти умертвив,/ разум в послушание Христово пленил еси;/ темже, венец хвалений/ любовию сплетающе,/ немолчно воспеваем ти:/ радуйся, радосте наша,\ молися о чтущих тя.
Стих: Блажен муж, бояйся Господа\ в заповедех Его восхощет зело.
Радуйся, убо=гим и сирым утеше=ние,/ нищим и болящим по=моще,/ ско=рбным отра=до,/ сущим в бедах прибе=жище,/ о гре=шных благое хода=тайство;/ сего ради Всеми=лостивому/ возлю=блен соделавыйся/ и дерзновением обогатився к Нему,/ ныне непрестанно моли/ нас от пучины страстей\ к Пристани Вышней упра=вити, отче.

Слава, глас 8:
Днесь Церковь Иверская,/ Пресвятыя Богородицы сад,/ вопиет, зовущи:/ приидите, вернии, возвеселимся/ в памяти богокра=снаго Гавриила,/до=блестьми мя удобри=вшаго/ и сиянием души озари=вшаго,/ со равноапо=стольною Ниною ликовству=юще/ и богомудрым Иоанном со ученики/ и преподобных сонмом,/ и мученик богоприятным собранием,/ и благоверных воинством,/ диади=мою похвал/ да увязем его, взывающи:/ молим тя, чистейший отче:/ испроси душам нашим мир\ и велию милость.
Таже, Ныне отпущаеши.
По благослове=нии хлебов тропарь, глас 4:
Якоже Владыка Христос/ сокры= Божество Свое,/ в человечество Его облеки=й,/ и тем неизглаго=ланную славу Свою/ невидиму сотвори,/ такожде и ты/ юродства образом/ покрыл еси славу твою/ и зна=мением испове=дничества просиял еси,/ и пастырь душ явился еси,/ отче преподобне Гаврииле,/ моли Христа Бога\ поми=ловати души наша. ¬
Ин, глас 8:
Божественный гром, труба духовная,/ любве= велегласное проповедание,/ мученик подражателю/ и в напастех скорый помощниче,/ рода и=верскаго похвало=,/ преподобне отче Гаврииле,/ исповедниче и юро=де,\ моли Христа Бога помиловати души наша.

На утрени
На Бог Господь, тропарь святаго, дважды.¬
По 1-м стихословии седален, глас 5:
Под: Собезначальное Слово:
Знамением крестным и молитвою вражия искушения победив,/ постом и воздержанием Господеви благоугодил еси:/ темже чудес приял еси дар, всем исцеления подавая,/ верою притекающим к раце мощей твоих,/ Гаврииле преподобне;/ моли Христа Бога грехов оставление даровати/ чтущим любовию святую память твою.
Слава, и ныне, Богородичен:
Ужа=сно чудо зачатия,/ и несказа=нен образ Рождества в Тебе позна=ся, Приснодево Чистая,/ ужасает мой ум и удивляет помысл,/ слава Твоя, Богородице, во всех простре=ся ко спасению душ наших.¬
По 2-м стихословии седален, глас 4:
Под: Скоро предвари:
Праздности и веселий присно уклоняяся,/ честный отче наш Гаврииле,/ выну мечем молитвы вооружа=шеся на невидимыя враги,/ и на ложе твердом во вретище почивая,/ присно трудясь, день оный Суда помышляше,/ страхом Божиим ограждая душу/ и Творца всего сущаго непрестанно величая.
Слава, и ныне, Богородичен:
Обновила еси, Чистая, Божественным Рождеством Твоим/ истлевшее во страстех земнородных мертвенное существо/ и воздвигла еси вся от смерти к жизни нетления./ Темже Тя по долгу блажим вси, Дево препрославленная,/ якоже прорекла еси.

По полиелеи седален, глас 7:
Господь наш Иисус Христос/ благослови тя на дела= ве=лия,/ челове=чим умом неудобопости=жная,/ и милостию Своею тя обогати=/ в веце сем малем и скороте=чнем,/ по преставлении же/ даром уще=дри тя/ дерзновенно хода=тайствовати о душах грешных./ Приими и ныне/ малое сие моление наше,/ любовию ти приносимое,/ и теплым предстательством твоим/ умоли Всеще=драго/ грехов и беззаконий/ нас избавити,\ Гаврииле преподобне.¬
Таже степенна, 1-й антифон 4-го гласа.¬
Прокимен, глас тойже: Честна пред Господем смерть преподобных Его.¬
Стих: Что воздам Господеви о всех, яже воздаде ми?¬
¬Евангелие от Матфея, зачало 43 (Мф 11:27-30).¬
По 50-м псалме стихира, глас 6:
Днесь, вернии, духовно торжествующе/ в наро=читем пра=зднице преподобнаго отца,/ и благочестно радующеся,/ тому тепле возопиим:/ радуйся, святый исповедниче/ и Христа ради юродиве,/ богодухновенне отче наш Гаврииле,/ радуйся, небесный человече/ и земный Ангеле:/ радуйся, многих на путь спасения наста=вивый:/ радуйся, верным похвало,/ Иверския и Русския земли утверждение:\ молися о душах наших.¬

Богородице параклис, со ирмосом на 6, и святому на 8.¬
Канон, глас 6
Песнь 1
Ирмос: Яко по суху пешешествовав Израиль/ по бездне стопами,/ гонителя фараона/ видя потопляема,\ Богу победную песнь поим, вопияше.¬
Раче=нием воспламене=н к вере чистей, и от дел любве усоверши=вый ю, святы=й ста=рче Гаврии=ле, наста=ви ны на путь благоде=лания.¬
Яко сосуд Свята=го Духа Господь тя нам низпосла=, ныне же благоуха=ния твоих молитв яко фимиам добрый вы=ну к Нему восходят.¬
Земли Иверския светило Щедрый тя показа=, многомудре; благодатию же от Него воспрятою осиява=еши паству твою, и мрак злоко=зненнаго расточаеши, и тмы недуг отгоня=еши.¬
Зане= даде=ся ти, свя=тче, свыше дерзнове=ние ходатайствовати о грешных, ныне моли свободити души наша горькия работы греху.
Ин, глас тойже:
Невече=рним светом блиста=еши, отче наш преблаже=нне, Божия крепости испо=лнь, темже моления наша приими и мир даруй верою притека=ющим ко святому образу твоему.¬
Не отри=ни ны, всехва=льне отче, со умилением к подо=бию зра=ка твоего припа=дающия, и теплое моление тебе возсыла=ющия, и усрами=вшияся беззако=ний своих, оба=че помилуй и укрепи, и Сокрушающаго брани умоли победу нам дарова=ти на демонския полки.¬
Богородичен: Всеблагая Влады=чице, Яже Преблага=го Бога плотию ро=ждши, озло=бленное страстьми= сердце мое очисти, да верою и любовию величаю Тя.¬
Песнь 3
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
От младе=нства образ смиренномудрия быв, удале=н безпечалия де=тищнаго, в возрасте юности твоея возжелел еси Богу житием иноческим послужити, отметая пло=тская вся попече=ния.
Восхоте=в погубити тя, льстивный зверь в ле=та отроческая во откровении тя боряше, ты же не устрашися свирепства его и во Христе возмогл еси немощна сотворити его. Тем и нас избави напастей лукаваго.
Дому отчу примета=яся, в нем соделался еси нищ и чужд, Распеншемуся за ны приседя и Того любовию укрепляемь, и крест взем, Сему послужил еси.
Егда страна Иверская богоборчества исполнися, тогда ты, ура=нен раче=нием го=рним, нача= неустанно храм Божий воздвиза=ти, егоже трикраты гонителие разрушаху, обаче ты, отче, помощию вышнею паки устроя=ше и паче преукраша=ше его.
Ин:
Свят, спаси=телен, че=стен образ твой, отче всехва=льне, в вере стоянию и служению Началопастырю в чаянии милости Его научаяй; тем, яко добр пастырь, овча=та твоя, напастей бед огради и тем безпорочен путь укажи, да в Небесную Ограду вселятся.
Заступи ны, преподобне, от прельщений мiра сего, и подаждь роду Иверскому силу супостат одолети, Церковь же мирну и непоколе=блему соблюди.
Богородичен: Услыша Ева праматерь: в печалех роди=ши чада. Ты же, Чистая Дево, услы=шавши: Господь с Тобою, радуйся, радованным гласом печаль праматере потребила еси.¬
Седален, глас 1:
Святыя мощи твоя яко источник чудес неисчерпаемый народу Божию позна=шася, и кладязь цели=телен душевных и телесных недуг, и зна=мение оставления многих согрешений наших, та=же сокровище благодати Духа Святаго. Течем убо с весе=лием во обитель Самтавро, идеже ты, исповедниче и Христа ради юродиве Гаврииле, почива=еши, и всяк к тебе с верою приходя=й и помазание елеем от лампады твоея прияв, акибы от тебе сама=го благословение прие=млет и здравие души и тела обретает. Темже немолчно зовем ти: моли Милостиваго Бога грехов оставление даровати чтущим любовию святую память твою.
Слава и ныне, глас тойже:
Предстательнице верных, Богороди=тельнице,/ скорбящих Радосте и плачущих великое Утешение,/ от чрева Твоего, Дево, всесвятаго преестественно Рождшагося непрестанно моли с Гавриилом преблаженным / в час испытания избавити нас лютаго осуждения.
Песнь 4
Ирмос: Христос моя сила,/ Бог и Господь, честная Церковь/ Боголепно поет взывающи,\ от смысла чиста о Господе празднующи.
Велия беззакония и гонения богоборцы храмам и верным учиня=ху, и мнози жития и=ноческаго отрицахуся, ты же тесны врата и узкий путь избрав, неуклонно веру правую исповедаше.¬
Нечестию безбожия умно=жившуся, богоразумне, ты веледушно претерпеваше изсяка=ние любве=, поношения смиренно приемля, в возрасте юнем мужемудрие показу=я.
Пострижения монашескаго сподобився и имя святаго Гавриила Афонскаго восприят, тому подвиги подражал еси, с ним же вкупе и уте=шителие рода Иверскаго ныне показу=етеся.
Священства сан восприим, веру пра=вую пропове=даше, род же свой, в пучи=ну язычества погружаемый, окормляя, в заповедех Божественнаго Евангелия наставляше.¬
Ин:
Благий рабе и верный, делателю винограда Христова, бодренно претерпевый тяготу дне и умноживый талант свой, со юроды вчинился еси и от Всещедраго сподобился еси радости и блаженства неизреченных.
Старче богоглаго=ливе, ты словесы божественными нече=стие властителей богоборных облича=ше, и тем Православия рог возвы=сил еси, и Церковь Иверскую возвеличил еси.
Богородичен: Ты еси, Пречистая Богородице, Прибежище нам и Утверждение, моли Сына Твоего и Бога нашего подати нам спасение и грехов оставление.
Песнь 5
Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Поругания от безбожных претерпевая, в Вифанию Иверскую, Бетания нарица=емую, притекл еси, иде=же чудотворцы Георгий и Иоанн подвизахуся. Тии к доброслужению тя наставиша, ты же, в познании укреплен, благословение и разумение таин Божиих улучил еси.
Всем сердцем нас ради Распятаго возлюбив, поклонения твари паче Творца и поношения имени Божия не терпя, на богоборцы не обинуяся дерзнул еси и образ идольский и богоненавистнический поже=гл еси.
Стал еси пред идолослужители, доблему=дро глаголя: не подобает тру=пию величание таковое, но Единому Христу точию, воскресшу из мертвых. Сего ради истяза=ху тело твое, и в темницу тя заключи=ша.
Ни мучителей суровство=, ни гонения, ни страх смертный разлучити тя любве Божия не возмогоша, но уязвен весь и острупле=н, яко злато в горниле очистил еси душу свою во испытаниих тяжких.

Ин:
Осиял еси всю Иверию, преблаженне отче, бу=ими притворе=ньми зло обличая, многия к Солнцу Правды обращая, потребляя дела тьмы началозлобника врага.¬
Просвещает вся притекающия к тебе, яко светило, празнственная память твоя, богоугодне, в ней же Спаса моли, милостию да призрит на род наш и оградит от тяжких бед и обстояний.
Богородичен: Бога, Егоже родила еси, Пречистая Марие, моли, рабом Твоим подати прегрешений оставление.

Песнь 6
Ирмос: Житейское море/ воздвизаемое зря напастей бурею,/ к тихому пристанищу Твоему притек, вопию Ти:/ возведи от тли живот мой,\ Многомилостиве.
¬Иже яря=ся, тя погубити жела=ху, тщи и не=мощни обрето=шася, яко Камень и Утверждение верным тя смерти изба=ви, безбожных же поруга=ния твоего крепкоду=шия поколеба=ти не возмого=ша.
Тщанием Патриарха свобождение паче ча=яния улучив, воздавая хваления Благоутро=бному, паки в Сиони ты обратися. Обаче и тамо отто=ргну тя враг служения Божия, ко=зньми нечестивых князей мирских; темже нищ и бездо=мок бе лета многа, при гробех привитая, зной и лютыя сту=дени претерпева=я, благословенне отче.¬
Беззакония не терпя и к ближним любовию пламенея, обличаше в безбожии иверский род свой, да не взыдет нань гнев Господень. Моли Христа Бога, отче милостиве, о спасении нас грешных, и о еже избавити ны вражиих напастей и междоусобныя брани.¬
Ин:
Хвалы и песньми да возвеличим пастыря, чудотворении Церковь удобри=вшаго, иверийцем звезду путеводную, любовию ко Вседержителю страну свою озарившую.
Припаде=м кротостию ко преподобному Гавриилу, Иверии наставнику, верою и любовию его славяще и моляще испросити нам покаяние и исправление.
Богородичен: Ныне к Тебе прибегаю, Пречистая, спаси мя молитвами Твоими и соблюди: елика бо хощеши, можеши, яко Мати Всемогущаго.¬
Кондак, глас 4:
Непости=жна есть милость/ Егоже благодатию/ создание обоже=но зрим вси,/ ты же, блаженне отче,/ воистинну образ и подобие Творца явился еси,/ темже славим тя,/ хвалы достойна суща,/ яко бяше на земли/ правды глас и голубь чистоты,/ в чуднем смирении жительствовав,/ лирою мудрости/ и органом любве звяца=ше,/ ныне же на Небеси/ предстательствуеши о спасении нашем,\ ходатаю благодати Божия.
Икос:
Милостию нас ради Распятаго от младых ногтей возлюбив и Тому всеусердно последовав, первее в дому твоем странен соделася, по=слежде миру буй сотворися, да Христа приобрящеши, алча, жажда= и скитаяся, горькая поношений премля, имя же сладчайшее Иисусово выну в сердцы имея. Ныне хвалим тя по достоянию, словеса твоя поминающе и дивя=щеся житию ангельскому твоему. Темже и нас в покаянии и угождении Вышнему, отче, настави и умоли о спасении нашем,\ ходатаю благодати Божия.
Песнь 7
Ирмос: Росодательну убо пещь содела Ангел/ преподобным отроком,/ халдеи же опаляющее/ веление Божие мучителя увеща вопити:\ благословен еси, Боже отец наших.¬
Кротостную твою премудрость и алкание Всецарю послужити Патриарх Ефрем зря, паки ко алтарю тя призывает, и, Таин Христовых приобщив, во святую обитель Самтавро посыла=ет, идеже ты, Новаго Иерусалима жителю, в кущице птичей у купины святыя Нины, Просветительницы всея Иверии, вселился еси, и со благоговением приношению Жертвы бескровныя и проповеди Царствия паки ся предал еси.¬
Преше=дшу ти в столп Мириана царя, той кресты и иконы, в пе=рсти обре=тенными, усе=рдно благоукраша=ше, чернори=зиц чудотворе=нии вразумля=я, козни враг невидимых облича=я, к непрестанней молитве путеводя=. ¬
Крест юродства и старчества Христа ради на рамо взем, мудрейший отче, яко буй и безумен мiру вменися, поругания от священник и мiрских приимая. Ныне же сокровище Церкве Иверския познава=ешися, славящих тя благодатию во спасение исполня=ющее.
Ин.
Во граде Тифлисстем, яко в пустыни, Гавриил досточе=стный, люди своя обличая и путеводя, взем меч духовный, иже есть глагол Божий, злочестивыя посече=, и крепость их сокруши= силою Славнаго по вселенней.
Паче чудес твоих без числа изумляют ум исповедание твое и любы яже к Богу и ближнему, преподобне, яко безбожию умножа=ющуся, ты в богомыслии и богоразумии преспева=ше, дом ся желанен Пресвятей Троице сотворив, отче.
Богородичен: Богородице Дево, рождшая Слово паче слова, Зиждителя Своего, Того моли со святым Гавриилом, помиловати души наша. ¬
Песнь 8
Ирмос: Из пламене преподобным росу источил еси/ и праведнаго жертву водою попалил еси:/ вся бо твориши, Христе, токмо еже хотети,\ Тя превозносим во вся веки.¬
¬Давидски сердцем сокрушенным и смиренным взываше: аз есмь червь, а не человек, поношение человеков и уничижение людей. Ныне же прежде смирением покровенныя добродетели и святость твоя всем несумненны зрятся.¬
Выну в скорбех, блаженне, в памяти непрестанней Страшнаго онаго дня воздаяния, слезами весь омывашеся, плачем радостотворным древним отцем подражая. ¬
О чудотворче и старче наш богодухновенный, мудростию и ведением от Святаго Духа обогащенный, ты приял еси дар грядущая зрети и талант благостыни и милости. ¬
Тайная яко вьяве зряше, честный отче, и истину о будущем возвещаше. Ныне же помози нам укрепити мудростию сердца, во еже трезвитися и пути и=стиннаго не отступи=ти.¬

Ин:
Благохвалений венцем да увязем богоглаголиваго Гавриила, вретищем буйства благодати свет потаившаго, печальника всем и помощника, скорбящим скорое утешение.¬
Паче солнца возсия, богогласе слово твое, егда веру Тройческую возвещаше, имже тучи греховныя расточишася, радость светлую нам подающе. Мы же, дела твоя поминающе, преподобне, в напастех и скорбех просим помощи твоея.¬
Богородичен: Спасения Ходатаица нам явилася еси, Богородице, рождшая Спаса и Владыку всех: темже молим Тя, спасения сподоби всех песнословящих Тя верно во вся веки.¬
Песнь 9
Ирмос: Бога/ человеком невозможно видети,/ на Негоже не смеют чини ангельстии взирати:/ Тобою же, Всечистая, явися человеком/ Слово воплощенно:/ Егоже величающе,\ с небесными вои Тя ублажаем.¬
В неду=зе зле=м, угодниче Иисусов, твердо претерпеваше боле=ния лю=тая, в Дусе же час кончины предзря= и пред иконою святителя Николая Чудотворца о благословении народа и отечества своего помоли=вся, в мире юдоль земную оставил еси.¬
Богу Всесильному душу вперил еси, собору святых вчинился еси; темже мощи твоя в рогозине, якоже древних отцев, в Самтаврийстей обители погребаются, и абие река исцелений, источник чудес неисчерпаемых содеваются.
Благочестивии и маловернии, ленивии и усерднии возжелевают сосуду с твоею кровию прикоснутися, милости у тебе, отче, требующе; всех же мольбы приимая, щедро радостию озаря=еши.
Видевше мнози священнослужителие исцеления от гроба твоего, ныне вкупе с паствою величают тя яко святаго великаго, новаго чудотворца, и выну память твою почитают.¬
Ин:
Восхвалим днесь православных Иверии путевожда, добродетелей столпа, преподобнаго и Христа ради юродиваго Гавриила, на негоже воздвиженныя козни вражия Царюющий низложи, Имеяй велию милость.¬
Приидите, восторжествуим в памяти богокраснаго Гавриила, теплаго молитвенника, нерадивых и в напастех сущих заступника, вопиюще: того молитвами, Боже, помилуй нас!¬
Богородичен: Единаго от Святыя Троицы, Слова и Сына родила еси, Дево Пречистая, Егоже с преподобными и праведными моли о рабех Твоих, верою просящих грехов прощения.¬
Светилен, глас 2:
Светильника земли Иверстей тя Трисолнечный Царь показа, пресиянный отче, от Него же и благодать восприял еси еже врага попаляти, верных же богоразумием озаряти.¬
Слава, и ныне:
По Бозе упование имуще на Тя, Пречистая Богородице, молим Ти ся: Рождшагося из Тебе умоли даровати мир вселенней и велию милость.

На хвалитех стихиры, глас 8:
Днесь Церковь Иверская/ память твою празднует,/ Богоносе Гаврииле чудотворче,/ и восхваляет добродетели твоя,/ со Ангелы Божественный тайнозрителю,/ разумеяй сокрове=нная и неизрече=нная,/ благости пучино,/ отче иноку=ющих и радование,/ наставниче в неверии заблуждших./ Старче наш благий,/ испроси нам доблести свыше\ и на супостата одоления.
Якоже иногда= Креститель Христов Иоанн,/ добрый делателю нивы Господни,/ ты проповедаше покаяние,/ и яко пророк Давид/ ру=це всено=щно в молитве воздева=ше,/ темже в милосердие и терпение облече=н,/ Спасу нашему угоди=л еси/ и ку=пно со всеми святыми/ радость непрестаю=щую улучи=л еси,/ ныне же, в Кровех Небесных им сликовству=я,/преподобне старче Гаврииле,/ не преста=й моляся о нас,\ соверша=ющих всекра=сную память твою.

…и возлюбленному ученику подражая, громогласно возвещаше: братие, любите друг друга…
Вся сия помози нам, мудрейший отче, хранити.

Слава, глас тойже:
Цве=ты хвале=ний пе=сненных/ от недостойных усте=н вознесе=нных ти,/ милостиво приими=, преподобне,/ и Избавителя усе=рдно моли,/ в кни=зех живо=тных нам написатися/ и по кончине светлый лик твой/ сподо=битися зрети,/ в Стра=шный же оный Час/ одесну=ю Владыки ста=ти/ и в Царствии Ве=чнем, Нетле=ннем/ вкупе с тобою и всеми святыми/ радостию немо=лчно воспевати:\ Троице Святая, слава Тебе!

И ныне, глас тойже:¬
Владычице, приими= молитвы раб Твоих/ и избави нас\ от всякия ну=жды и печа=ли.
¬