Редкие Богослужебные тексты

Иерей: Благослове́н Бог наш всегда́, ны́не и при́сно, и во ве́ки веко́в.
Лик: Ами́нь. Царю́ Небе́сный:
Таже чтец: Трисвятое. Пресвята́я Тро́ице: О́тче наш.
Возглас: Я́ко Твое́ есть Ца́рство:
Чтец: Ами́нь. Го́споди, поми́луй, 12.
Слава, и ныне:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

И псалом 142:
Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.
Слава, и ныне: Аллилу́иа, трижды.

И Бог Господь: по гласу тропаря, глас 4
Бог Госпо́дь и яви́ся нам,/ благослове́н Гряды́й во и́мя Госпо́дне.
Стих 1: Испове́дайтеся Го́сподеви, я́ко благ, я́ко в век ми́лость Его́.
Стих 2: Обыше́дше обыдо́ша мя и и́менем Госпо́дним противля́хся им.
Стих 3: Не умру́, но жив бу́ду и пове́м дела́ Госпо́дня.
Стих 4: Ка́мень, его́же небрего́ша зи́ждущии, сей бысть во главу́ у́гла, от Го́спода бысть сей и есть ди́вен во очесе́х на́ших.

Тропа́рь, глас 4:
Ныне рачителя поем исихазма/ и милосердия Божественна вкупе,/ Паисия отца всепреподобнаго,/ сей бо на Синае, и в Стомио, и Афоне,/ якоже бесплотный пожив, сосуд чист явися,/ сего же ради нам всем путевождь,// и теплый ходатай бывает ко Господу.

Слава, глас тойже:
Многую милость вси твою разумеем,/ и заступление твое присно знаем,/ сущии в море пагубных, блаженне, страстей,/ и многообразными искушеньми волнуеми,/ тя зовем, Паисие, отче наш, преподобне:/ скоро потщися нас от бед спасти// и приведи ко пристанищу тихому.

И ныне, Богородичен, глас то́йже:
Не умолчи́м никогда́, Богоро́дице,/ си́лы Твоя́ глаго́лати, недосто́йнии:/ а́ще бо Ты́ не бы предстоя́ла моля́щи,/ кто́ бы на́с избaвил от толи́ких бе́д,/ кто́ же бы сохрани́л до ны́не свобо́дны?/ Не отсту́пим, Влады́чице, от Тебе́:// Твоя́ бо рабы́ спаса́еши при́сно от вся́ких лю́тых.

Таже псалом 50–ый:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.

По сем канон моле́бный, глас 8
Преподо́бному Паисию Святогорцу
Творе́ние Афанасия Симонопетрита

Песнь 1
Ирмос: Во́ду проше́д, яко сушу,/ и еги́петскаго зла избежа́в,/ изра́ильтянин вопия́ше:// Изба́вителю и Богу на́шему пои́м.

Паисие отче, ты подражав на всякое время милосердию всех Царя, вся всем был еси премилосердно, тем предвари нас твоими молитвами.

Телес, отче, врач наших ты еси, и душ наших радость и пресладостный всем покой, в нуждех же заступник и помощник, и во бранех нам споборник державнейший.

Обдержимь нерадения моего дреманием многим, тем смущен вопию тебе, иский твою молитву недреманну: подай ми бдение, отче, возставив мя.

Богородичен: О Мати всех Спаса, Тебе молю: ты облаки мрачны искушений, печалей, бед скоро разреши и яко облак светел и ясен покрый нас, рабов Твоих.

Песнь 3
Ирмос: Небе́снаго кру́га Верхотво́рче Го́споди,/ и Це́ркве Зижди́телю,/ Ты́ мене́ утверди́ в любви́ Твое́й,/ жела́ний кра́ю,/ ве́рных утвержде́ние,// еди́не Человеколю́бче.

Просветил еси, отче, в посте труды многими Светом Благодатным ты сердце и ум усерднейше, сам свет бывая весь, тем от греховнаго мрака мя избави, отче, твоими молитвами.

Претерпел еси, отче, недуги ты в радости; мужества, терпения образ всем быв воистину, тем крепость даруй ми, ныне в болезни лежаща, в радость небесную обращая скорбь мою.

Землю небом соделав, горел еси духом ты, отче всеблаженне, в пресладком пребыв безмолвии, непостояннаго тем жития, о преславне, ты моего утиши треволнение.

Богородичен: Матерь радости бывши, блаженство, сласть, радость же и веселие, Христа Бога Ты родила еси, тем, оскорбляемый, Ти прибегаю, моляся: утиши мя, Мати, предстательство теплое.

Услы́ши тя призывающих, Паи́сие Богоносе, исполняя милостивно сих прошения, яко име́яй ко Господу дерзнове́ние.

При́зри благосе́рдием, Всепе́тая Богоро́дице,/ на мое́ лю́тое телесе́ озлобле́ние,/ и исцели́ души́ моея́ боле́знь.

Седален, глас 2
Молитвенник теплый, отче, сый ко Господу, моления наша приими, блаженнейше, се бо молим тя: ограждай всегда нас, днем же и нощию, и не остави, отче, раб твоих ни зде, в сем веце, Паисие, ни в будущем.

Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,// и просла́вих Твое́ Божество́.

Нощь уныния горькаго сердце мое, отче, покры прескорбная, ты же светлое веселие абие явился еси, славнейше.

Исполняемся радости, припадающе верою честным мощем твоим, благодать бо точат Божию, тайно осеняющую верныя.

Падша мя к покаянию, отче всеблаженне, направи, тя молю, да твоими аз молитвами свобождуся злых моих обычаев.

Богородичен: Ты лучами безстрастия чист сосуд явившися, Всенепорчная, всех очисти нас рабов Твоих от плотския скверны и духовныя.

Песнь 5
Ирмос: Просвети́ на́с повеле́нии Твои́ми, Го́споди,/ и мы́шцею Твое́ю высо́кою// Тво́й ми́р пода́ждь на́м, Человеколю́бче.

Буди ми стена, о Паисие, спасения, ограждающи от всяких зол всегда, яко добрый мой предстатель, всеблаженнейше.

Гной моих страстей сердце, отче, ураняет мне, словеса же благодатная твоя подают, блаженный старче, исцеления.

Лень и суету аз стяжах в душе, Паисие, ты же ревность ми и крепость, отче, дай к любочестным воздвизая душу подвигам.

Богородичен: Сына Твоего на Судище Страшнем, Чистая, егда стану, одесныя Ты руки удержи мя и спаси Твоим ходатайством.

Песнь 6
Ирмос: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зо́л душа́ моя́ испо́лнися,/ и живо́т мо́й а́ду прибли́жися,/ и молю́ся я́ко Ио́на:// от тли́, Бо́же, возведи́ мя́.

Благосердия и любве Божественныя полн явился еси, отче блаженне, радости такожде и милости, славне, от страстей бо в пустыне очистився всяческих, милость стяжал еси зело, тем любве научи и мя истинней.

Безвестность ты возлюбил еси, отче, возненавидев зело славу мирскую, но Иже славы Владыка, блаженне, всем показа твое, отче, смирение, сего же каплю, тя молю, испусти мне твоими молитвами.

Теплейшая тя восхитиша, отче, любовь Божия, и тем воспеваеши Бога со Ангелы ныне, прошу тя: мя исхити́ попечения суетна, да чистым сердцем воспою, и прославлю Христа Вседержителя.

Богородичен: О божественый и воистинну сладкий раю́, благоуханный сосуде, мя страстей избави зловония, Мати, и добродетели славный яви сосуд, даров бо, Чистая, еси Ты источник, Благая Владычице.

Услыши нас тебе зовущих, Паисие блаженне, и прошения вси исполни наша, всеславнейший, ходатай бо дерзновенный пред Богом.

Чистая, Яже словом Слово неизреченно в последняя дни рождшая, моли, яко имущая Матернее дерзновение.

Кондак, глас 6
Ты терпя потерпел еси всех Господа,/ скончався в немощех, преподобне отче славнейше,/ покой обрет от болезни всякия,/ блажен врач показался еси,/ страсти лютыя душ же и телес исцеляя, Паисие,/ темже и изливаеши всем безмездное чудно исцеление,// и утешение, отче наш.

Прокимен, глaс 4: Честна пред Господем смерть преподобных Его.
Стих: Терпя́ потерпе́х Го́спода, и вня́т ми́.

Евангелие от Матфeа, зачaло 43 (11:27-30).
Вся́ мне́ предана́ су́ть Отце́м мои́м: и никто́же зна́ет Сы́на, то́кмо Оте́ц: ни Отца́ кто́ зна́ет, то́кмо Сы́н, и ему́же а́ще во́лит Сы́н откры́ти. Прииди́те ко мне́ вси́ тружда́ющиися и обремене́ннии, и а́з упоко́ю вы́: возми́те и́го мое́ на себе́ и научи́теся от мене́, я́ко кро́ток е́смь и смире́н се́рдцем: и обря́щете поко́й душа́м ва́шым: и́го бо мое́ благо, и бре́мя мое́ легко́ е́сть.

Слава: Моли́твами преподо́бнаго Твоего́…
И ныне: Моли́твами Богоро́дицы…
Стих: Поми́луй мя Бо́же,/ по вели́цей ми́лости Твое́й,/ и по мно́жеству щедро́т Твои́х,// очи́сти беззако́ние мое́.

Стихира, глас 6
Весь недоумением содержимь велиим ныне,/ и долу впад, Паисие,/ в пропасть неразумия, отче, лютаго,/ тя молю, путь укажи мне восхождения,/ и даруй лествицу, к свету прямо мя возводящую,/ и вкупе с ней терпение,/ веру и надежду на Господа,/ яко, преподобне, возшед на высоту любве,// буду причастник небесныя, всеблаженне, радости.

Песнь 7
Ирмос: От Иуде́и доше́дше о́троцы,/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Вся ми злая, блаженне, и тесная, болезненная воистинну, дерзая же на силу твоих, отче, молений, к твоему покровительству притекох, ты бо чудный, отче, всем помощник.

Тя пристанище тихое вси стяжаша в житейских нуждех, Паисие: старцев жезл, преподобне, довольство же убогих ты воистину был еси, всех ненадежных надежда, плачущим же радость.

От недугов недужных свободи, о блаженне отче Паисие, от каркиновы избави боли, и свет незрячим подавай, и безгласным речь, и исполу мертвых спасай от смерти, всеблаженне.

Богородичен: Ум и сердце, и душу воздвизаю к Тебе, мирови Помощнице, и верою зову Ти: от бед многообразных обдержащих мя, Чистая, избави Твоими молитвами к Богу, Мати Дево.

Песнь 8
Ирмос: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся́ ве́ки.

Ангелом равным своим просияв житием ты умозреньми и деяньми, о премудре, светиши монахом, Паисие, во веки.

Якоже Спаса молиши, отче, о людех, стани ныне, о Паисие, моляся о еже от всяческих врагов нас во веки свобождати.

Юныя, отче, ты православную веру утверди́ всех соблюдати добле, молим, к Богу и Владыке молитвами твоими.

Богородичен: Чистая Дево, елика аще хощеши, можеши, всех Царя рождшая, о Мати, темже Тя поем, нам всем мужество дающу.

Песнь 9
Ирмос: Вои́стинну Богоро́дицу/ Тя́ испове́дуем, спасе́ннии Тобо́ю, Де́во Чи́стая,// с безпло́тными ли́ки Тя́ велича́юще.

Се ныне, окаянный, улучих от Бога помощи, егда икону твою, о Паисие, облобызал бех, блаженне отче преславнейше.

Твое, блаженне, имя, кто призовет ныне, и того прошения к Богу не абие, отче славне, предал еси?

К Создателю имея яко дерзновение, моли о мире всем, отче всеблаженне, непоколебимый подати свыше мир всем нам.

Богородичен: Кончаю мое моление, Дево всеблагая, темже сподоби мя пети, Владычице, и ублажати Тя, Мати Бога Непорочная.

Достойно есть и тропари сия:

Радуйся рачителю тишины и благоутробия Господня, любве бо весь Божия исполнен, Христу и людем, отче, предал еси себе, преподобне славнейше.

Радуйся, Паисие, отче наш, милости ко всем неисчерпаемая реко́, радуйся, врачу́ наш телес и душ, блаженне, молитвенник теплейший всегда ко Господу.

Желанная ве́сна в зиме́ грехов, блаженне, явился еси, теплую всем бо нам подаеши, отче, радость и надежду, тем радуйся, поем ти, отче Паисие.

Отче всеблаженне, Деву ты зрев многажды, вопил еси Пречистей: о Тя молю, Мати Всеблагая, Марие Всецарице, Твой мир Ты кровом крыл покрый, Благодатная.

Лицем к лицу ныне, отче, ты зря краснаго добротою паче всех человек Бога и всех Спаса, Христа, Егоже, отче, моли нам даровати грехов прощение.

Приими молитвы, отче, тебе молящихся у гроба твоего, от концев земли верою пришедших и болезни и печали отложших, преподобне отче Паисие.

Пения обитель твоя тебе возсылает, отче, величающи присно тя, вместо дарований великих и безмерных, тобою ей богатно данных, Паисие.

Двоице святая, святии отцы, Арсение отче и Паисие святе, от бед верою просящих избавите нас, молим, ко Господу ходатаи всеблаженнии.

Вся Ангелов во́инства, Предтече Господень, Апостолов двоенадесятице, святии вси с Богородицею сотворите молитву, во еже спастися нaм.

Трисвятое по Отче наш, и тропари сия покаянныя, глас 6:
Помилуй нас, Господи, помилуй нас;/ всякаго бо ответа недоумеюще,/ сию Ти молитву яко Владыце, грешнии приносим:/ помилуй нас.

Слава: Господи, помилуй нас,/ на Тя бо уповахом;/ не прогневайся на ны зело,/ ниже помяни беззаконий наших,/ но призри и ныне яко благоутробен, и избави ны от враг наших; / Ты бо еси Бог наш, и мы людие Твои,// вси дела руку Твоею, и имя Твое призываем.

И ныне: Милосердия двери отверзи нам,/ благословенная Богородице,/ надеющиися на Тя да не погибнем,/ но да избавимся Тобою от бед:// Ты бо еси спасение рода христианскаго.

Ектения и тропарь сей на целование образа, глас 2
Потщися явитися нам в воздыханиих и в слезах/ ищущим тепло, святе Паисие, хадатайство твое,/ и подай исцеление душевное и телесное,/ всякое же помышление демонское сокруши,/ да благодарственным сердцем тя почитаем, отче Паисие,// и тя Прославльшаго славим.

И Богородичен, глас 8:
Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

Глас 2:
Все упова́ние мое́ на Тя возлага́ю, Ма́ти Бо́жия,// сохрани́ мя под кро́вом Твои́м.
Иерей: Моли́твами святы́х оте́ц на́ших, Го́споди, Иису́се Христе́ Бо́же нас, поми́луй и спаси́ нас. Ами́нь.

Молитва
О святы́й преподóбный и богоно́сный о́тче на́ш Паи́сие, возлю́бленный на́ш покрови́телю и богому́дрый наста́вниче, ле́ствицею доброде́телей от земли́ в Небе́сное Ца́рство восшéдый и благода́ть прия́вый во е́же хода́тайствовати о на́с пред Престо́лом Всеми́лостиваго Го́спода на́шего. Мо́лим тя́ отврати́ти ны́ от пути́ грехо́внаго и научи́ти ны́ Го́сподеви соверше́нны плоды́ покая́ния и обновлéния во Христе́ ду́ш на́ших приноси́ти.
Ты́, святы́й о́тче, во дни́ жития́ земна́го мно́зи тя́жки боле́зни и неду́ги неисцéльныя уврачева́вый и ду́ши грехми́ и скорбми́ стра́ждущих исцели́вый, ны́не предстоя́ Бо́гу, Того́ милосе́рдие к на́м приклони́, да твоего́ предста́тельства ра́ди любо́вию чту́щих святу́ю па́мять твою́ исцели́т, да́рует кре́пость во искуше́ниих, му́жество в борьбе́ с ду́хом зло́бы, и́щущим вéчней поги́бели на́шей, да да́рует на́м проще́ние все́х на́ших грехо́в, и́хже от ю́ности на́шея да́же до настоя́щаго дне́ по́мыслом, сло́вом и де́лом соверши́хом, да научи́т ны́, я́же на́м подоба́ет твори́ти, я́ко да вы́ну Ему́ и бли́жним с любо́вию и смире́нием послу́жим.
Е́й, о́тче святы́й, наста́ви на́с, во о́браз жития́ твоего́, и́же любве́ и милосе́рдия испо́лнено бы́сть, у́з грехо́внаго жи́тельства разреши́вшеся, к Небе́сным Чертогам взы́ти, идéже да восхва́лим Всемилосéрднаго Триипоста́снаго Го́спода на́шего во ве́ки веко́в. Ами́нь.

Текст на церковно-славянском: disk.yandex.ru/d/dwIri3e5JKJXiA