Мульткалендарь 1 февраля. Преподобный Макарий Великий, Египетский.

<p id="eow-description" class="">Макарий Великий, Египетский
Святитель Марк, архиепископ Ефесский
Блаженный Феодор, Новгородский

Тропарь преподобного Макария Великого
глас 1
Пустынный житель, и во плоти Ангел,/ и чудотворец явился еси, богоносе отче наш Макарие,/ постом, бдением, молитвою Небесная дарования приим,/ исцеляеши недужныя и души верою приходящих ти./ Слава Давшему тебе крепость,/ слава Венчавшему тя,// слава Действующему тобою всем исцеления.
Кондак преподобного Макария Великого
глас 1
Блаженную жизнь скончав в житии с мученическими лики,/ в земли кротких достойно водворяешися, богоносне Макарие,/ и пустыню, якоже град, населив, благодать приял еси от Бога чудес,// темже тя почитаем.

Тропарь святителя Марка Эфесского
глас 8
Православия наставниче, новшеств противоборниче,/ степень веры, Церкве светильниче,/ учителей Богодухновенная печате, Марко всемудре,/ писании твоими вся просветил еси, цевнице духовная,// моли Христа Бога спастися душам нашим.
Кондак святителя Марка Эфесского
глас 8
Иоанна Евгеника: Богословов Богомудрая писания,/ яко Богоглагольник истинен, прием в сердцы,/ исхождение Духа Святаго возвестил еси, яко должно есть, приснохвальне,/ и всесвятый запечатлел еси Символ,/ сего ради поем:// радуйся, Марко Богоглаголиве.

Тропарь блаженного Феодора Христа ради юродивого, Новгородского
глас 8
Иже на земли Христа ради волею в буйство преложився,/ мира сего красоты отнюд возненавидел еси/ и, плотская играния увядив постом и жаждею и на земли леганием,/ от зноя же и студени, от дождя и снега/ и от прочил воздушныя тягости никогдаже уклонился еси,/ душу же очистил еси добродетельми, яко злато в горниле,/ отче преблаженне Феодоре,/ и ныне на Небесех предстойши Престолу Пресвятыя Троицы,/ но яко имея дерзновение многое,/ моли Христа Бога спастися душам нашим.
Кондак блаженного Феодора Христа ради юродивого, Новгородского
глас 8
Вышния красоты желая,/ нижния сладости и телесная одеяния тощно оставил еси/ и нестяжание паче суетнаго мира возлюбил еси,/ ангельское житие проходя, скончался еси, Феодоре блаженне,/ с нимиже Христа Бога моли непрестанно о всех нас.</p>