Мульткалендарь 16 января 2017г. Пророк Малахия, из 12-ти малых.

Пророк Малахия, из 12-ти малых.
Мученик Гордий.
Священномученик Василий Холмогоров.

Кондак пророка Малахии
глас 4
Пророчества дарованием богатея, пророче,/ Христово предвозвестил еси пришествие яве и мирови спасение,// Егоже сиянием мир просветися.
Ин кондак пророку Малахии
глас 8 Подобен: Избранной:
Яко Ангел послужил еси, всеблаженне, / и сподобися преди будущая вещати,/ Господне бо вочеловечение всем уяснил еси,/ темже вопием ти: / радуйся, пророче Божий Малахие, приснопамятне.

Тропарь мученика Гордия
глас 4
Мученик Твой, Господи, Гордий,/ во страдании своем венец прият нетленный от Тебе, Бога нашего:/ имеяй бо крепость Твою,/ мучителей низложи,/ сокруши и демонов немощныя дерзости./ Того молитвами// спаси души наша.
Кондак мученика Гордия
глас 8
Твоя поты, преславне, всю землю напоиша,/ и честными кровьми, Гордие, мир весь возвеселил еси./ Молитвами твоими, Богомудре,/ спасай вся, верою тя воспевающия и ублажающия,// вопиющия песнь достойную, всехвальне, яко многострадалец.
Ин кондак мученику Гордию
глас 4, подобен: Явился еси днесь:
Всею любовию днесь Церковь твою память совершает, Гордие, / восхваляющи тайно, / яко по той пострадал еси, / мучеником доброто / и всем верным во Христа похвало.

Тропарь священномученику Василию Холмогорову
глас 3
Церкве Русския столпе непоколебимый,/ благочестия правило,/ жития евангельскаго образе,/ священномучениче Василие,/ Христа ради пострадавый даже до крове,/ Егоже моли усердно,/ яко Начальника и Совершителя спасения,/ Русь Святую утвердити в Православии// до скончания века.
Ин тропарь священномученику Василию Холмогорову
глас 4
Церкве Российския славо/ и отечества нашего украшение,/ священномучениче Василие,/ властию от Бога тебе данною,/ ругатели безбожныя обличал еси,/ и, яко волки лютыя, от стада твоего отгнал еси/ и диавола посрамил еси,/ кровь же твоя, яко Авелева,/ от земли нашея вопиет немолчно./ Сего ради ходатай на Небеси о нас верен буди/ и моли спастися душам нашим.</p>