Молитвы пред и по чтении Евангелия

Молитва пред чтением Евангелия
(молитва, которая помещена в конце 11-й кафизмы)

Возсия́й в сердца́х на́ших, Человеколю́бче Го́споди, Твоего́ Богове́дения нетле́нный све́т, и мы́сленная на́ша отве́рзи о́чи во Ева́нгельских Твои́х пропове́даний разуме́ние, вложи́ в на́с и блаже́нных Твои́х за́поведей стра́х, да плотски́я по́хоти вся́ попра́вше, духо́вное жи́тельство про́йдем, вся́, я́же ко благоугожде́нию Твоему́ и му́дрствующе и де́юще. Ты́ бо еси́ просвеще́ние ду́ш и теле́с на́ших, Христе́ Бо́же, и Тебе́ сла́ву возсыла́ем, со Безнача́льным Твои́м Отце́м и Всесвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

Молитва святителя Иоанна Златоуста пред слушанием или чтением Священного Писания

Помни совет святителя Иоанна Златоуста: когда сядешь читать Священное Писание, то прежде помолись Богу, чтобы Он отверз твои очи сердечные.

Молись так: Господи, Иисусе Христе, отверзи мои очи сердечные услышати слово Твое и разумети и творити волю Твою, яко пришлец есмь на земли: не скрый от мене заповедей Твоих, но открой очи мои, да разумею чудеса от закона Твоего — скажи мне безвестная и тайная премудрости Твоея. На Тя уповаю, Боже мой, да ми просветиши ум и смысл светом разума Твоего, не токмо чести написанная, но и творити я, да не в грех себе святых жития и словеса прочитаем, но в обновление, и просвещение, и в святыню, и в спасение души, и в наследие жизни вечныя. Яко Ты еси просвещаяй лежащих во тьме, и от Тебе есть всякое даяние благо, и всяк дар совершен. Аминь.

Молитва Святителя Игнатия Брянчанинова

Спаси, Господи, и помилуй рабов Твоих (имена) словами Божественнаго Евангелия, чтомыми о спасении рабов Твоих. Попали, Господи, терние всех наших согрешений, и да вселится в нас благодать Твоя, опаляющая, очищающая, освящающая всего человека во имя Отца и Сына и Святаго Духа. Аминь

Молитва

Господи, просвети очи мои сердечные светом разума Святого Евангелия Твоего.

Молитва по чтении Евангелия

Господи, Иисусе Христе Боже мой, словесами Божественного Евангелия Твоего излей благодать Твою на сердца сих рабов Твоих (имена) ко истреблению страстей и грехов их, и даруй им силу ко исправлению во Имя Отца и Сына и Святого Духа. Аминь.

Иная молитва по чтении Евангелия

Слава Тебе, Господи Царю, Сыне Бога живаго, сподобивый мя недостойнаго Божественная Твоя словеса и глас Святаго Евангелия Твоего слышати; сим убо владычним Твоим гласом, укрепи мя в покаянии настоящия сея жизни прейти нощь, от всякаго избавляя мя навета и злобы видимых и невидимых враг: Ты бо еси един сильный, и царствуяй во веки. Аминь.

Утр. -
Евангелие от Иоанна, зачало 67
(Ин., 67 зач., XXI, 15-25)

Во вре́мя о́но, яви́ся Иису́с ученико́м Свои́м, воста́в от ме́ртвых. И глаго́ла Си́мону Петру́: Си́моне Ио́нин, лю́биши ли Мя па́че сих? Глаго́ла Ему́: ей, Го́споди, Ты ве́си, я́ко люблю́ Тя. Глаго́ла ему́: паси́ а́гнцы Моя́. Глаго́ла ему́ па́ки второ́е: Си́моне Ио́нин, лю́биши ли Мя? Глаго́ла ему́: ей, Го́споди, Ты ве́си, я́ко люблю́ Тя. Глаго́ла ему́: паси́ о́вцы Моя́. Глаго́ла ему́ тре́тие: Си́моне Ио́нин, лю́биши ли Мя? Оскорбе́ же Петр, я́ко рече́ ему́ тре́тие, лю́биши ли Мя; и глаго́ла Ему́: Го́споди, Ты вся ве́си, Ты ве́си, я́ко люблю́ Тя. Глаго́ла ему́ Иису́с: паси́ о́вцы Моя́. Ами́нь, ами́нь, глаго́лю тебе́, егда́ бе юн, поя́сашеся сам, и хожда́ше, а́може хотя́ше, егда́ же состаре́ешися и возде́жеши ру́це твои́, и ин тя поя́шет, и веде́т, а́може не хо́щеши. Сие́ же рече́, назна́менуя, ко́ею сме́ртию просла́вит Бо́га. И сия́ рек, глаго́ла ему́: иди́ по Мне. Обра́щься же Петр, ви́де ученика́, его́же любля́ше Иису́с, во след иду́ща, и́же и возлеже́ на ве́чери на пе́рси Его́, и рече́: Го́споди, кто есть предая́й Тя? Сего́ ви́дев Петр, глаго́ла Иису́сови: Го́споди, сей же что? Глаго́ла ему́ Иису́с: а́ще хощу́, да той пребыва́ет, до́ндеже прииду́, что к тебе́? Ты по Мне гряди́. Изы́де же сло́во се в бра́тию, я́ко учени́к той не у́мрет, и не рече́ ему́ Иису́с, я́ко не у́мрет, но а́ще хощу́ тому́ пребыва́ти, до́ндеже прииду́, что к тебе́? Сей есть учени́к свиде́тельствуяй о сих, и́же и написа́ сия́, и вем, я́ко и́стинно есть свиде́тельство его́. Суть же и и́на мно́га, я́же сотвори́ Иису́с, я́же а́ще по еди́ному пи́сана быва́ют, ни самому́ мню всему́ ми́ру вмести́ти пи́шемых книг. Ами́нь.

Лит. -
Деяния святых Апостол, зачало 25
(Деян., 25 зач., X, 21-33)

Во дни о́ны, соше́д Петр к муже́м по́сланным к нему́ от Корни́лиа, рече́: се аз есмь, его́же и́щете. Ка́я есть вина́, ея́же ра́ди приидо́сте? Они́ же реко́ша: Корни́лий со́тник, муж пра́веден и боя́йся Бо́га, свиде́тельствован от всего́ язы́ка Иуде́йска, увеще́н есть от А́нгела свя́та призва́ти тя в дом свой и слы́шати глаго́лы от тебе́. Призва́в же их учреди́: нау́трие же Петр воста́в и́де с ни́ми, и не́цыи от бра́тий, и́же от Иоппи́и, идо́ша с ним. И нау́трие внидо́ша в Кесари́ю. Корни́лий же бе ча́я их, созва́в сро́дники своя́ и любе́зныя дру́ги. Я́коже бысть вни́ти Петру́, сре́те его́ Корни́лий, и пад на но́гу его́ поклони́ся. Петр же воздви́же его́, глаго́ля: воста́ни, и аз сам челове́к есмь. И с ним бесе́дуя, вни́де и обре́те собра́вшыяся мно́ги. Рече́ же к ним: вы ве́сте, я́ко не ле́по есть му́жу Иуде́анину прилепля́тися или́ приходи́ти ко иноплеме́ннику, и мне Бог показа́ ни еди́наго скве́рна или́ нечи́ста глаго́лати челове́ка. Те́мже и без сумне́ния приидо́х призва́н: вопроша́ю вы у́бо, ко́им сло́вом посла́сте по мене́? И Корни́лий рече́: от четве́ртаго дне да́же до сего́ часа́ бех постя́ся и в девя́тый час моля́ся в дому́ мое́м, и се муж ста пре́до мно́ю во оде́жде све́тле и рече́: Корни́лие, услы́шана бысть моли́тва твоя́, и ми́лостыни твоя́ помяну́шася пред Бо́гом. Посли́ у́бо во Иоппи́ю и призови́ Си́мона, и́же нарица́ется Петр, сей стра́нствует в дому́ Си́мона усмаря́ близ мо́ря, и́же прише́д возглаго́лет тебе́. А́бие у́бо посла́х к тебе́, ты же до́бре сотвори́л еси́ прише́д. Ны́не у́бо вси мы пред Бо́гом предстои́м слы́шати вся повеле́нная тебе́ от Бо́га.

Евангелие от Иоанна, зачало 25
(Ин., 25 зач., VII, 1-13)

Во вре́мя о́но, хожда́ше Иису́с по сих в Галиле́и, не хотя́ше бо во Иуде́и ходи́ти, я́ко иска́ху Его́ иуде́е уби́ти. Бе же близ пра́здник иуде́йский, потче́ние се́ни. Ре́ша у́бо к Нему́ бра́тия Его́: прейди́ отсю́ду, и иди́ во Иуде́ю, да и ученицы́ Твои́ ви́дят дела́ Твоя́, я́же твори́ши. Никто́же бо вта́йне ничесо́же твори́т, и и́щет сам я́ве бы́ти, а́ще сия́ твори́ши, яви́ Себе́ ми́рови. Ни бра́тия бо Его́ ве́роваху в Него́. Глаго́ла у́бо им Иису́с: вре́мя Мое́ не у прии́де, вре́мя же ва́ше всегда́ гото́во есть. Не мо́жет мир ненави́дети вас, Мене́ же ненави́дит, я́ко Аз свиде́тельствую о нем, я́ко дела́ Его́ зла суть. Вы взы́дите в пра́здник сей, Аз не взы́ду в пра́здник сей, я́ко вре́мя Мое́ не у испо́лнися. Сия́ рек им, оста́ в Галиле́и. Егда́ же взыдо́ша бра́тия Его́ в пра́здник, тогда́ и Сам взы́де, не я́ве, но я́ко тай. Жи́дове же иска́ху Его́ в пра́здник и глаго́лаху: где есть Он? И ро́пот мног бе о Нем в наро́дех, о́вии глаго́лаху, я́ко благ есть. Ини́и же глаго́лаху: ни, но льстит наро́ды. Ни кото́рый же у́бо я́ве глаго́лаше о Нем, стра́ха ра́ди иуде́йскаго.

Ап.:
Соборное послание Иоаннова первое, зачало 68
(1 Ин., 68 зач., I, 1-7)

Е́же бе испе́рва, е́же слы́шахом, е́же ви́дехом очи́ма на́шима, е́же узре́хом, и ру́ки на́ша осяза́ша, о Словеси́ Живо́тнем. И Живо́т яви́ся, и ви́дехом, и свиде́тельствуем, и возвеща́ем вам Живо́т ве́чный, И́же бе у Отца́, и яви́ся нам. Е́же ви́дехом и слы́шахом, пове́даем вам, да и вы обще́ние и́мате с на́ми: обще́ние же на́ше со Отце́м и с Сы́ном Его́ Иису́сом Христо́м. И сия́ пи́шем вам, да ра́дость ва́ша бу́дет испо́лнена. И сие́ есть обетова́ние, е́же слы́шахом от Него́, и пове́даем вам, я́ко Бог Свет есть, и тмы в Нем несть ни еди́ныя. А́ще рече́м, я́ко обще́ние и́мамы с Ним, и во тме хо́дим, лжем и не твори́м и́стины. А́ще ли же во све́те хо́дим, я́коже Сам Той есть во све́те, обще́ние и́мамы друг ко дру́гу, и кровь Иису́са Христа́ Сы́на Его́ очища́ет нас от вся́каго греха́.

Евангелие от Иоанна, зачало 61
(Ин., 61 зач., XIX, 25-27; XXI, 24-25)

Во вре́мя о́но, стоя́ху при кресте́ Иису́сове Ма́ти Его́ и сестра́ Ма́тере Его́ Мари́а Клео́пова и Мари́а Магдали́на. Иису́с же ви́дев Ма́терь и ученика́ стоя́ща, его́же любля́ше, глаго́ла Ма́тери Свое́й: Же́но, се сын Твой. Пото́м глаго́ла ученику́: се Ма́ти твоя́. И от того́ часа́ поя́т Ю́ учени́к во своя́си. Сей есть учени́к свиде́тельствуяй о сих, и́же и написа́ сия́, и вем, я́ко и́стинно есть свиде́тельство его́. Суть же и и́на мно́га, я́же сотвори́ Иису́с, я́же а́ще бы по еди́ному пи́сана быва́ют, ни самому́ мню всему́ ми́ру вмести́ти пи́шемых книг. Ами́нь.

azbyka.ru/biblia/