Молитва ко Пресвятой Богородице (в среду), преподобного иеросхимонаха Нила Сорского

Богородице, Ты еси упование мое, Ты ми еси Стена и благонадежное пристанище и спасительное прибежище, утомляемому страстей нахождением. Спаси мя от всех враг моих, гонящих душу мою и ловящих ю различными искушении: на пути бо сем, по нему же хожду, многия сети скрыша ми; многия соблазны, многия неудобства, многая прелести, многия немощи, душевныя и телесныя, уловляют мя в падения греховныя. И уже аз, окаянный, впадох в сети вражия, и связан, и держим есмь ими: и что сотворю, отчаянный аз, недоумею. Аще бо восхощу покаятися, нечувствием и ожесточением одержим есмь; аще же плакати понуждаюся, не имам сокрушения сердечнаго и слез ни поне единыя капли. Увы окаянства моего! Увы бедности моей! Увы лишения моего! К кому убо прибегну повинный аз? Токмо к Тебе, Благоутробная Мати Господа и Спаса нашего, ненадежных Надеждо, Стено и Покрове к Тебе притекающих! Не отрини убо мене блуднаго, не возгнушайся мене сквернаго: Тебе бо едину в жизни моей стяжах утеху, Дево Марие Богородице, и к Тебе единей во всякой нужде прибегаю со дерзновением: не остави убо мене в жизни сей и во время смерти моея, предстани в помощь. Помощнице моя, да узрят Тя вси врази мои и постыдятся, Тобою побежденнии, Владычице, Ходатаице спасения моего. Аминь.

Молитва (в среду) Архангелу Рафаилу

О, святый великий архангеле Рафаиле, Престолу Божию предстояй! Ты, благодатию от всемогущаго Врача душ и телес наших тебе данною, праведнаго мужа Товита от слепоты телесныя исцелил еси, и сына его Товию, спутешествуя ему, от злаго духа сохранил еси. Всеусердно молю тя, буди мне путеводитель в жизни моей, сохрани от всех видимых и невидимых враг, исцели душевныя и телесныя болезни моя, управи жизнь мою к покаянию во гресех и ко творению добрых дел. О, святый великий Рафаиле архангеле! Услыши молящегося тебе и сподоби в здешней и будущей жизни благодарити и славити общаго Создателя нашего в бесконечные веки веков. Аминь.

Молитва князьям Борису и Глебу, во святом Крещении Роману и Давиду

Тропарь, глас 2

Правди́вая страстоте́рпца/ и и́стинная Ева́нгелия Христо́ва послу́шателя,/ целому́дренный Рома́не с незло́бивым Дави́дом,/ не сопроти́в ста́ста врагу́ су́щу бра́ту,/ убива́ющему телеса́ ва́ша,/ душа́м же косну́тися не могу́щу./ Да пла́чется у́бо злый властолю́бец,/ вы же ра́дующеся с ли́ки А́нгельскими,/ предстоя́ще Святе́й Тро́ице,/ моли́теся о держа́ве сро́дников ва́ших, богоуго́дней бы́ти,\ и сыново́м Росси́йским спасти́ся.

Ин тропарь, глас 4

Яко плодови́та виногра́да, о́трасли доброде́телей су́ще,/ Небе́сный дождь Христо́в прия́сте,/ источа́юще оте́честву своему́ струю́ Правосла́вия,/ Бори́се пречу́дне с до́блим Гле́бом,/ вку́пе моли́теся Го́сподеви сохрани́ти град и лю́ди,/ и на враги́ посо́бствовати,\ и ду́шам на́шим дарова́ти ве́лию ми́лость.

Ин тропарь, глас 4

Му́ченическою кро́вию порфи́ру окропи́вше све́тло,/ укра́шени предстои́те, страда́льцы сла́внии, Царю́ Безсме́ртному,/ и, венцы́ сла́вы от Него́ прии́мше,/ моли́теся стране́ на́шей пода́ти на враги́ одоле́ние\ и душа́м на́шим ве́лию ми́лость.

Ин тропарь перенесению мощей, глас 4

Днесь церко́вная расширя́ются не́дра,/ прие́млющи бога́тство Бо́жия благода́ти,/ веселя́тся ру́сстии собо́ри,/ ви́дяще пресла́вная чудеса́,/ я́же твори́те приходя́щим к вам ве́рою,/ святи́и чудотво́рцы Бори́се и Гле́бе,\ моли́те Христа́ Бо́га, да спасе́т ду́ши на́ша.

Ин тропарь перенесению мощей, глас 2

Пречестни́и, и целому́дреннии, и незло́бивии страстоте́рпцы,/ Рома́не сла́вный и Дави́де чу́дный,/ и́го бо Госпо́дне ева́нгельски на ра́мо взе́мше,/ после́довасте Христу́/ и, крест Его́, я́ко ски́петр, в руку́ иму́ще,/ врага́ бра́та и зла́го властолю́бца соодоле́сте,/ и той ны́не в гее́нне му́чится,/ вы же ра́дуетеся, с ли́ки а́нгельскими предстоя́ще Святе́й Тро́ице,/ моли́теся о держа́ве сро́дник ва́ших, благоуго́дней бы́ти,\ и сыново́м ру́сским спасти́ся.

Ин тропарь перенесению мощей, глас 4

Му́ченицы Госпо́дни спа́сшиися,/ пресла́внии блаже́ннии кня́зи Бори́се и Гле́бе,/ тружда́ющимся бы́стрии помо́щницы,/ неду́жным цели́тели,/ вы бо боле́зни врачу́ете/ притека́ющих в це́рковь с ве́рою./ Те́мже и мы мо́лимся:/ от бед изба́вите нас,\ чту́щих с любо́вию пренесе́ние моще́й ва́ших.

Ин тропарь перенесению мощей, глас 8

Днесь вся́кая душа́ ве́рных весели́тся,/ в пренесе́ние честны́х моще́й ва́ших, Бори́се и Гле́бе,/ слепы́я просвеща́ете, немы́м уста́ отверза́ете и печа́льныя утеша́ете,/ прия́ли бо есте́ от Христа́ Бо́га благода́ть исцеле́ний,\ моли́теся о душа́х на́ших.

Кондак, глас 3

Возсия́ днесь пресла́вная па́мять ва́ша,/ благоро́днии страстоте́рпцы Христо́вы, Рома́не и Дави́де,/ созыва́ющи нас к похвале́нию Христа́ Бо́га на́шего./ Тем притека́юще к ра́це моще́й ва́ших,/ исцеле́ния дар прие́млем моли́твами ва́шими, святи́и:\ вы бо боже́ственнии врачеве́ есте́.

Ин кондак, глас 8

А́ще и убие́ни бы́сте и во гробе́х положе́ни,/ но на Вы́шнее Ца́рство преидо́сте,/ о́ваго бо ко́пии насу́нуша,/ друга́го же, я́ко а́гнца незло́бива, ноже́м заре́заша,/ тем и кровь ва́ша бысть исцеле́ние ми́ру,\ ве́рою призыва́ющим вас, святи́и, на по́мощь.

Ин кондак перенесению мощей, глас 4

Яви́ся днесь в стране́ Ру́сстей/ благода́ть исцеле́ния всем,/ к вам, блаже́ннии, приходя́щим и вопию́щим:\ ра́дуйтеся, засту́пницы те́плии.

Ин кондак перенесению мощей, глас 3

Прииди́те, вси ру́сстии собо́ри,/ чудотво́рцев и му́чеников Бори́са и Гле́ба восхва́лим,/ зако́нно бо пострада́вше,/ победи́сте сопроти́внаго врага́,/ тем святы́м заступле́нием кня́зи ру́сстии враги́ побежда́ют,/ тем па́мять е́ю ве́село и любо́вию похва́лим, вопию́ще:/ за ны моли́те Святу́ю Тро́ицу,\ умири́ти мир и спасти́ ду́ши на́ша.

Ин кондак перенесению мощей, глас 4

От гро́ба зна́мения показа́сте во стране́ Ру́сстей,/ яви́ся днесь благода́ть исцеле́ния/ всем, к вам, страстоте́рпцы, притека́ющим с ве́рою,/ Бори́се сла́вный со Гле́бом чу́дным./ Кре́пцы ве́рою, добропобе́днии му́ченицы, за Христа́ подъе́мше разли́чныя му́ки,/ и на мно́га ле́та сокрове́ни бы́ша ва́ши святи́и мо́щи,/ ны́не же явля́етеся от земли́,/ возсия́вше луча́ми, я́ко бога́тство многоце́нно,/ и в це́рковь Бо́жию че́стно носи́ми, архиере́й Бо́жиих дла́ньми./ Те́мже вопие́м вам:\ ра́дуйтеся, кня́зи, ру́сстии засту́пницы.

Молитва первая

О дво́ице свяще́нная, бра́тие прекра́сная, до́блии страстоте́рпцы Бори́се и Гле́бе, от ю́ности Христу́ ве́рою, чи́стотою и любо́вию послужи́вшии, и кровми́ свои́ми, я́ко багряни́цею укра́сившиися и ны́не со Христо́м ца́рствующии, не забу́дите и нас су́щих на земли́, но я́ко те́плии засту́пницы, ва́шим си́льным хода́тайством пред Христо́м Бо́гом, сохрани́те ю́ных во святе́й ве́ре и чистоте́ неврежде́нными от вся́каго прило́га неве́рия и нечистоты́, огради́те всех нас от вся́кия ско́рби, озлобле́ний и напра́сныя сме́рти, укроти́те вся́кую вражду́ и зло́бу, де́йством воздвиза́емую от бли́жних и чу́ждых. Мо́лим вас, христолюби́вии страстоте́рпцы, испроси́те у Великодарови́таго Влады́ки всем нам оставле́ние прегреше́ний на́ших, единомы́слие и здра́вие, избавле́ние от наше́ствия иноплеме́нных, междоусо́бныя бра́ни, я́звы и гла́да. Снабдева́йте свои́м заступле́нием всех чту́щих святу́ю па́мять ва́шу во ве́ки веко́в. Ами́нь.

Молитва вторая

О дво́ице свяще́нная, страстоте́рпцы Бори́се и Гле́бе! Не забу́дите нас, раб Бо́жиих (имена), но я́ко засту́пницы, ва́шим си́льным хода́тайством пред Христо́м Бо́гом нас поми́луйте; от нечистоты́ сохрани́те, от ско́рби, озлобле́ний и внеза́пный сме́рти изба́вите. Испроси́те у Великодарови́таго Влады́ки нам оставле́ние прегреше́ний на́ших, единомы́слие и здра́вие. Снабдева́йте заступле́нием ва́шим прихо́д сей, дом (святы́й храм) сей и вся чту́щия святу́ю па́мять ва́шу во ве́ки веко́в. Ами́нь.