Иерей читает молитву над коливом (ср.: Служебник, Чин благословения колива):
Вся соверши́вый сло́вом Твои́м, Го́споди, и повеле́вый земли́ многоразли́чныя прозяба́ти плоды́ в наслажде́ние и пи́щу на́шу, И́же се́менми три о́троки и Дании́ла, су́щия в Вавило́не, сластнопита́нных све́тльшия показа́вый! Сам, Всеблаги́й Царю́, и се́мена сия́ с разли́чными плоды́ благослови́ и от них вкуша́ющия освяти́, я́ко во сла́ву Твою́ и в честь свята́го великому́ченика Фео́дора Ти́рона сия́ предложи́шася от Твои́х рабо́в, и в па́мять во благочести́вой ве́ре сконча́вшихся. Пода́ждь же, Бла́же, благоукраси́вшим сия́ и па́мять соверша́ющим вся, я́же ко спасе́нию проше́ния, и ве́чных Твои́х благ наслажде́ние, моли́твами Пречи́стыя Влады́чицы на́шея Богоро́дицы и Присноде́вы Мари́и, и свята́го великому́ченика Фео́дора Ти́рона, его́же и па́мять соверша́ем, и всех святы́х Твои́х. Я́ко Ты еси благословля́яй и освяща́яй вся́ческая, Бо́же наш, и Тебе́ сла́ву возсыла́ем, Безнача́льному Отцу́, со Единоро́дным Твои́м Сы́ном, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Певцы: «Аминь». «Бу́ди имя Господне…» (трижды). [«Слава, и ныне».] Псалом 33-й: «Благословлю́ Господа…». Отпуст по обычаю.
Примечание. «И вхо́дим в трапе́зу, вкуша́ем же вина́ и еле́а, ра́ди свята́го. Сие́ прия́хом в Ла́вре преподо́бнаго отца́ на́шего Са́ввы, и кинови́и преподо́бнаго Вели́каго Евфи́мия: но не твори́м сего́ ны́не за че́стность дне, оба́че яди́м варе́ние с сли́вами без еле́а, и арме́а: произволя́ющии же ядя́т сухояде́ние, я́коже и в сре́ду» (Типикон, гл. 49, «В пяток вечера [1-й седмицы]»).