Слава Тебе, Боже наш, слава Тебе.
Пресвятая Богородице, спаси нас.
Святи мученицы, младенцы Вифлеемстии, молите Бога о нас.
Преподобне отче Давиде, моли Бога о нас.

Прокимен, глас 6:
Хвалите, отроцы, Господа,/ хвалите Имя Господне.
Стих: Вселяя неплодовь в дом, матерь, о чадех веселящуся.
Тропарь, глас 1
Болезньми святых, имиже о Тебе пострадаша, / умолен буди, Господи, / и вся наша болезни исцели, / Человеколюбче, молимся.
Кондак, глас 6
В Вифлееме рождшуся Царю, волсви от Персиды с дары приходят,/ звездою свыше наставляеми,/ но Ирод смущается и пожинает младенцы, яко пшеницу,/ и рыдает себе,/ яко держава его вскоре разорится.
Кондак, глас 4
Звезда волхвы посла к Рождшемуся,/ и Ирод неправедное воинство посла люто,// убити мня во яслех яко Младенца лежаща.
Слава, и ныне:
Не имамы иныя помощи…, не имамы иныя надежды, разве Тебе, Владычице, Ты нам помози, на Тебе надеемся и Тобою хвалимся: Твои бо есмы раби, да не постыдимся.
Ектения с дополнительным прошением:
Призри, Владыко Человеколюбче, милостивным Ти оком на рабы Твоя все зде предстоящия и молящияся и услыши моления наша, с верою приносимая, яко Сам рекл еси: вся елика молящеся просите, веруйте, яко приимете, и будет вам, и паки: просите и дастся вам. Сего же ради и мы, аще и недостойни, уповающе на милость Твою, просим: подаждь благость Твою рабом Твоим:

И исполни благая желания наша, мирно же и тихо в здравии и долгоденствии вся дни наша соблюди: рцем вси: скоро услыши и милостивно помилуй.

МОЛИТВА ЖЕНЕ, ЕГДА ИЗВЕРЖЕТ МЛАДЕНЦА

Владыко Господи Боже наш, рождейся от Святыя Богородицы, и Приснодевы Марии, и во яслех яко младенец возлегий, сам рабы твоя сия днесь сущия во гресех, во убийство впадшия волею или неволею и зачатое в них извергшия, помилуй по велицей Твоей милости: и прости их вольная и невольная прегрешения: и сохрани от всякаго диавольскаго кознодействия, и скверну очисти, болезни исцели, здравие и благомощие телесам и душам их, Человеколюбче, даруй, и Ангелы светлыми сия соблюди от всякаго нашествия невидимых демонов. Ей, Господи, от недуга и ослабления: и очисти их от телесныя скверны, и различных им находящих стужений утробных, и изведи их многою Твоею милостию, во смиренных их телесах. И возстави их от одров, аще лежат, яко во гресех родихомся и в беззакониих, и сквернави вси есмы пред Тобою, Господи; и со страхом вопием и глаголем: призри с небесе, и виждь немощь нас осужденных и прости рабом твоим сим (имя рек), сущим во гресех, убийству впадшим волею или неволею, и в них зачатое извергшим. И всех обретающихся и прикоснувшихся им, по велицей Твоей милости, яко Благ и Человеколюбец Бог помилуй и прости, яко Ты един имаши власть оставляти грехи и беззакония, молитвами Пречистыя Твоея Матере, и всех святых. Яко подобает Тебе всякая слава, честь и поклонение, со Отцем, и Святым Духом, ныне и присно, и во веки веков, аминь.

Величание. Отпуст.