равноап. Кирилл, учитель Словенский

Святые Кирилл и Мефодий

Кирилл (в мире Константин) и Мефодий родились в Македонии в городе Солуни. Мефодий после окончания образования поступил на военную службу и был правителем одной славянской области. Вскоре, однако, он решил оставить светский образ жизни и принял монашество в обители на горе Олимп. Константин с детства высказывал удивительные способности и получил превосходное образование вместе с малолетним императором Михаилом 3-им при царском дворе, где их учил знаменитый Фотий, впоследствии патриарх Константинопольский. После окончания образования, Константин мог иметь блестящие успехи в свете, но сердце его пламенело любовью к Богу, и блага мира его не прельщали. Некоторое время он преподавал в главном константинопольском училище любимую свою науку — философию, но вскоре оставил Константинополь и поселился в монастыре с братом своим Мефодием. Здесь они вместе подвизались в посте и молитве, пока Промысл Божий не вызвал их на дело проповеди славянским племенам.

Для нас, русских, достойно примечания, что перед этим призванием Господь привел великих братьев быть в пределах нашей страны. В 858 г. хозары, кавказское племя, кочевавшее на юго-востоке нынешней России, просили у императора Михаила проповедников веры. По поручению патриарха Фотия, святые братья прибыли в Херсон. Здесь они жили около двух лет, изучая хозарский язык и открыли мощи священномученика Климента, епископа Римского, сосланного сюда в конце первого века.

Первым из славянских народов, обратившихся к христианству, были болгары. В Константинополе находилась в виде заложницы сестра болгарского князя Богориса (Бориса). Она приняла крещение с именем Феодоры и была воспитана в духе святой веры. Около 860-го года она возвратилась в Болгарию и стала склонять своего брата к принятию христианства. Борис крестился, приняв имя Михаил. Святые Кирилл и Мефодий были в этой стране и своей проповедью много способствовали утверждению в ней христианства. Из Болгарии христианская вера распространилась в соседнюю с ней Сербию.

После того, как были просвещены Болгария и Сербия, в Константинополь явились послы от моравского князя Ростислава с такой просьбой: «Народ наш исповедует христианскую веру, но у нас нет учителей, которые могли бы объяснить нам веру на нашем родном языке. Пришлите нам таких учителей.» Император и патриарх обрадовались и, призвав святых солунских братьев, предложили им идти к моравам. Для большего успеха проповеди, святой Кирилл почитал необходимым перевести на славянский язык священные и богослужебные книги, ибо «проповедовать только устно, по словам святого Кирилла, все равно, что писать на песке.» Но прежде перевода нужно было еще изобрести славянские буквы и составить славянскую азбуку. К этим великим трудам святой Кирилл, по примеру апостолов, готовился молитвой и сорокадневным постом. Как только азбука была готова, святой Кирилл перевел на славянский язык избранные места из Евангелия и Апостола. Некоторые летописцы сообщают, что первые слова, писанные на славянском языке, были слова апостола Евангелиста Иоанна: «Вначале бе (было) Слово, и Слово бе к Богу, и Бог бе Слово.»

В 863-ом году святые братья отправились в Моравию со своими учениками Гораздом, Климентом, Саввой, Наумом и другими. Совершение богослужения и чтение Евангелия на славянском языке скоро привлекли к ним сердца моравов и дали им перевес над немецкими проповедниками. Этим успехам завидовали немецкие и латинские проповедники и всячески противодействовали святым братьям. Они распространяли в народе мнение, что слово Божие можно читать только на трех языках, на которых была сделана надпись на кресте Господнем, а именно: на еврейском, греческом и латинском, называли Кирилла и Мефодия еретиками за то, что святые братья проповедовали на славянском языке и, наконец, принесли на них жалобу папе Николаю.Папа пожелал видеть славянских благовестников. Уважая папу, как одного из патриархов, и надеясь найти у него помощь для своего святого дела, святые братья отправились в Рим. Они несли с собой часть мощей равноапостольного Климента, папы Римского, и переведенные ими священные книги. Папа Николай 1-й, не дождавшись их скончался. Преемник его папа Адриан, желавший умиротворения Церкви, принял святых проповедников с великим почетом. Он вышел к ним навстречу за город, сопровождаемый духовенством и множеством народа, принял от них святые мощи и с благоговением положил их в церковь святого Климента, а книги, переведенные на славянский язык, освятил на престоле древнейшей римской базилики, называемой Марии Большой. Вскоре по прибытии в Рим, Кирилл опасно занемог. Он завещал продолжение великого дела своему брату и мирно скончался (14 февраля 869 г.).

Святой Мефодий исполнил завещание брата: возвратившись в Моравию уже в сане архиепископа, он трудился здесь 15 лет. Из Моравии христианство еще при жизни святого Мефодия проникло в Богемию. Богемский князь Боривой принял от него святое крещение. Его примеру последовала его супруга Людмила (ставшая потом мученицей) и многие другие. В середине 10-го века польский князь Мечислав женился на богемской княжне Домбровке, после чего он и его подданные приняли христианскую веру.

Впоследствии эти славянские народы усилиями латинских проповедников и немецких императоров были отторгнуты от Греческой церкви под власть Римского папы, за исключением сербов и болгар. Но у всех славян, несмотря на истекшие столетия, и до сих пор жива память о великих равноапостольных просветителях и той православной вере, которую они старались насадить среди них. Священная память святых Кирилла и Мефодия служит соединяющим звеном для всех славянских народов.

Тропарь равноапостольного Кирилла, учителя Словенского
глас 4
От пелен прилежно Премудрость сестру себе сотворив, Богогласе,/ пресветлую видев, яко девицу чисту,/ юже приемь, приведе,/ яко монисты златыми, сею украсив свою душу и ум,/ и обретеся яко другий Кирилл, блаженне,/ разумом и именем мудре.
Тропарь равноапостольных Мефодия и Кирилла
глас 4
Яко апостолом единонравнии/ и словенских стран учителие,/ Кирилле и Мефодие богомудрии,/ Владыку всех молите,/ вся языки словенския утвердити в Православии и единомыслии,// умирити мир и спасти души наша.
Кондак равноапостольного Кирилла, учителя Словенского
глас 2
Твердым и Богодохновенным учением/ просвещая мир пресветлыми зарями,/ обтече, яко молния вселенную, Кирилле блаженне,/ разсевая пресветлое Божие слово,/ на западе, и севере, и юзе, мир просвещая чудесы.
Кондак равноапостольных Мефодия и Кирилла
глас 3
Священную двоицу просветителей наших почтим,/ Божественных писаний преложением источник богопознания нам источивших,/ из негоже даже доднесь неоскудно почерпающе,/ ублажаем вас, Кирилле и Мефодие,/ Престолу Вышняго предстоящих// и тепле молящихся о душах наших.
Кондак на молебне равноапостольного Кирилла
глас 2
Твердаго и Богодохновеннаго учения/ просвещая мир пресветлыми зарями,/ обтече, яко молния, вселенную, Кирилле святе,/ разсевая Божие слово на западе, и севере, и юзе,/ мир просвещая учением, святе.
Ин кондак на молебне
глас 2
Пресветло житие возлюби, святе,/ зарями трисолнечными Божества освещаемь,/ прииде, яко молния, во всю вселенную,/ северную и южную земли просвещая,/ западным же свет незаходим явися./ Темже и ныне мрак греховный прогнав, святе,/ свыше испроси благодать духовную,/ имаши бо дерзновение к Богу.
Величание
Величаем вас,/ святии равноапостольнии Мефодие и Кирилле,/ вся словенския страны/ ученьми своими просветившия// и ко Христу приведшия.
Величание святым равноапостольным Мефодию и Кириллу, учителем словенским
Величаем вас,/ святии равноапостольнии Мефодие и Кирилле,/ вся словенския страны/ ученьми своими просветившия// и ко Христу приведшия.

Молитва святым равноапостольным Кириллу и Мефодию

О преславнии просветителие словенских язык, святии равноапостольнии Мефодие и Кирилле, ваших письмен и учений светом просветившеся и в вере Христовой наставльшеся, яко чада ко отцем, усердно ныне прибегаем и сокрушением сердечным молимся: аще и завет ваших не соблюдохом, о угождении бо Богу небрегохом и от братняго единомыслия в вере отпадохом, обаче якоже древле в земном житии вашем, сице и ныне грешных и недостойных не отвратите тщи, но, яко имуще велие ко Господу дерзновение, прилежно Того молите, да обратит нас в путь спасения, да умирит раздоры единоверных, да приведет к единомыслию отпавших и всех нас духом любве да соединит Единей Святей, Соборней и Апостольстей Церкви! Вемы бо, яко много может молитва праведных по благосердию Владыки. Не оставите убо нас, унылых и недостойных, чад ваших, ихже ради грехов паства ваша, враждою разделяема и соблазнами инославных прельщаема, умалися, овцы же словесныя, разрываемы, восхищаются волки губительными. Подаждьте убо нам молитвами вашими ревность Православия, яко да отеческая преда­ния добре сохраним, каноны церковные верно соблюдем, всяких лжеучений странных отбежим и, тако в житии богоугодном преспевающе, жизни райския на Небеси сподобимся, идеже купно с вами прославим в Троице Единаго Бога во веки веков. Аминь.

АКАФИСТ СВЯТЫМ РАВНОАПОСТОЛЬНЫМ МЕФОДИЮ И КИРИЛЛУ, УЧИТЕЛЕМ СЛОВЕНСКИМ

Кондак 1

Избраннии от Царя сил Господа Иисуса во апостоли языком словенским, Мефодие и Кирилле богомудрии, песньми восхваляем вас, предстателей наших; вы же, яко имущии дерзновение ко Господу, от всяких нас напастей предстательством вашим свободите, зовущих: Радуйтеся, Мефодие и Кирилле, язык словенских апостоли и богомудрии учителие.
Икос 1

Ангелов Творец и Господь сил предустави вас быти просветители языком словенским; того ради и благодать Его бе с вами, ограждающи и укрепляющи вас во вся дни живота вашего юже помощницу себе имуще, славу Божию во градех и пустынех делы и словесы вещали есте всем. Темже и мы, яко отрасль язык, верою Христовою от вас просвещенных, воспеваем вам, глаголюще: Радуйтеся, радости Евангельския благовестителие; Радуйтеся, чудодейственныя благодати носителие. Радуйтеся, скорби многи за имя Господне приявшии; Радуйтеся, прелести мира сего отвергшии. Радуйтеся, издетска Богом благословеннии; Радуйтеся, венцы исповедническими от Него украшеннии. Радуйтеся, яко славу человеческую презревше, в пустыни Господа искали есте; Радуйтеся, яко волю Его сильным мира сего со многим дерзновением благовестили есте. Радуйтеся, сих ради от Владыки всех в рай светел приятии; Радуйтеся, пред Ним наши теплии ходатаи. Радуйтеся, яко вашими молитвами вере нашей утверждение имамы; Радуйтеся, яко предстательством вашим ересей одоление стяжахом. Радуйтеся, Мефодие и Кирилле, язык словенских апостоли и богомудрии учителие.
Кондак 2

Видев святый Кирилл, еще сый отрок, в нощи видение, яко избрати ему Софию деву сестру себе, родителем сия поведа. Тии же, разумевше зде волю Божию, во еже быти чаду их премудрости служителю, вельми о научении и наказании его пекошася, зряще же скорое его в разуме преспеяние, пояху Богу: Аллилуиа.
Икос 2

Разум недоразуменный и естество сущих испытуя, Кирилл в премудрости паче сверстник своих преспеваше и, еще отрок сый, прославися, и в палатех царских во образ благий юному сыну цареву водворен бе. Но, богатство и славу земную презрев и еже едино на потребу спасения ища, в пустыню вселися, да пощеньми и молитвами безстрастия достигнет. Сих же ради и Мефодий, воевода уже сый, отыде на гору Олимп, идеже яко инок Господу служаше. Темже научимся и мы искушения мира презирати, наипаче же Христу Богу угождати, угодники Его воспевающе сице: Радуйтеся, славою, яже от человек, не прельстившиися; Радуйтеся, пустынножительству крепце прилепившиися. Радуйтеся, яко Господь просвещал вы есть в сониих и видениих; Радуйтеся, яко и мудрость человеческая пособствова вам во спасение. Радуйтеся, яко Слово Божие и святых отец писания паче философии возлюбили есте; Радуйтеся, яко Господня закона не слышателие забытливи бысте, но творцы. Радуйтеся, яко козни диавольския, на пустынножители находящия, победили есте; Радуйтеся, яко сих ради дадеся вам власть над искушеньми и страстьми. Радуйтеся, яко подвизи ваша стяжаша вам венец живота; Радуйтеся, яко и ныне подвижником и постником пособницы есте. Радуйтеся, всем грешным пред Богом блазии заступницы; Радуйтеся, душ наших от лести сатанинския защитницы. Радуйтеся, Мефодие и Кирилле, язык Словенских апостоли и богомудрии учителие.
Кондак 3

Сила молений царевых понуди святаго Кирилла пустыню оставити служения ради пастырска в Цареграде, идеже славу Божию ученьми и делы вещаше и ересь иконоборную посрамляше. Темже и нас, о святый отче, в православии утверди, отпадшия же от истинныя веры единоплеменники наша к единоверию возврати, да вси словене едиными усты вопиют о просветителех своих Христу Богу: Аллилуиа.
Икос 3

Имея премудрости силу, потекл еси, святый Кирилле, с монахом Георгием ко агаряном стязания ради о вере, и от святаго Григория Богослова духовно просвещаем, премудрость тайны Святыя Троицы во мнозех подобиих показал еси, посрамляя нечестивых силою словес твоих. Тии же, завистию распаляеми, восхотеша зелием погубити тя, егоже вкушь, не претерпел еси вреда, но здрав прибыл еси ко святому Мефодию во обитель и с ним купно иноческия труды паки подъял еси, и просветися пустыня подвигов ваших светом. Темже и нас предстательством вашим просветите, любовию поющих: Радуйтеся, доброгласнии славы Божия кимвали; Радуйтеся, Церкве Его твердии столпи. Радуйтеся, тайну Троицы в подобиих проповедавшии; Радуйтеся, воплощение Бога Слова пред сарацины нетрепетно исповедавшии. Радуйтеся, еллинов и иудеев и варваров просветителие; Радуйтеся, Триединаго Божества благовестителие. Радуйтеся, яко вами посрамися лесть иконоборная; Радуйтеся, яко от вас увядает нечестие агарянское. Радуйтеся, яко истину Христову неведущии имут вы учители; Радуйтеся, яко искушаемии сомнением обретают вы в вере наставители. Радуйтеся, яко прогневавшии Господа имут вас пред Ним предстатели; Радуйтеся, яко угождающии Ему имеют вы покровители. Радуйтеся, Мефодие и Кирилле, язык словенских апостоли и богомудрии учителие.
Кондак 4

Бурю различных бед и зол, на языки словенския находящую, предстательством вашим разорите, преподобнии, яко служений многих жребий прияли есте, и во апостольстем бо лице, и в преподобных сонме, и во учителей чести, и во исповедников воинстве вчини вас Господь, да вси словене вопиют Ему о вас: Аллилуиа.
Икос 4

Слыша царь Козареск, яко истинная вера в стране еллинов исповедуется, испроси себе от царя Византийска учителей православия. Сей же умоли святых Кирилла и Мефодия оставити пустыню и плыти понтом Евксинским к козаром. К нимже пришедше, святая братия обратиша сердца их ко Христу и спасительное Крещение преподаша им. С темиже и мы прославим равноапостольных братий, глаголюще: Радуйтеся, не убоявшиися снити ко варваром с Евангельским благовестием; Радуйтеся, озарившии море славным своим тамо шествием. Радуйтеся, яко святаго апостола Климента нетленныя мощи от вас обретены быша; Радуйтеся, яко того помощию нечестие козарско от вас посрамися. Радуйтеся, яко свет Христов стране полуночной преподали есте; Радуйтеся, яко праведности вашея слава во вся концы земли распростреся. Радуйтеся, Церкве Христовы предстательство и утверждение; Радуйтеся, от ересей и расколов наше крепкое ограждение. Радуйтеся, от агарян и иудей приявшии за Христа укорение; Радуйтеся, от мощей мученика снискавшии благословение. Радуйтеся, почитанию угодников благим образом жития вашего нас научившии; Радуйтеся, и сами, яко угодницы Божии, от всех православных исповедуемии. Радуйтеся, Мефодие и Кирилле, язык словенских апостоли и богомудрии учителие.
Кондак 5

Боготечная звезда явися вам святаго Климета нетленное тело, восплыв на волнах понта Евксинскаго, на егоже дне от семисот лет сокрыто лежаше. Вам же явил е есть творяй чудеса Господь в знамение трудов апостольских и скорбей исповеднических ваших. Еже разумевше, возописте Богу: Аллилуиа.
Икос 5

Видевше святая братия соплеменныя им словены истинную веру исповедующа, слово же Божие своим им языком чести не ведуща, потщашася Божественныя книги на язык словенск прелагати, да вси людие на сроднем им языце единаго всех Господа прославят; темже и мы прославим Господа о святителех наших, имже возопиим: Радуйтеся, подателие Христова света народом иноплеменным; Радуйтеся, просветителие словен, вам соплеменных. Радуйтеся, делателие винограда Христова; Радуйтеся, пастырие добрии стада Иисусова. Радуйтеся, слова Божия вернии толковницы; Радуйтеся, наши блазии и кротцыи учителие. Радуйтеся, мир Христов с собою всюду пронесшии; Радуйтеся, мир весь светом учений ваших просветившии. Радуйтеся, и ныне приемлющии моления нас грешных; Радуйтеся, и ныне посылающии утешение печальным. Радуйтеся, всех, за истину угнетенных, прибежище; Радуйтеся, Духа Святаго пречестное жилище. Радуйтеся, Мефодие и Кирилле, язык словенских апостоли и богомудрии учителие.
Кондак 6

Проповедницы богоноснии бывше, святая братия во страны словенския идоша просветити новокрещенныя люди Христовым учением. Тии же, узревше вас, яко ангелов светлых, спасение благовестити грядущих, яко пастырей добрых, душу свою за овцы полагающих, возопиша прославляющему святыя Своя Богу: Аллилуиа.
Икос 6

Возсиявшей в Моравии заре истинныя веры, испросиша князи словенстии от царя Византийскаго во страны своя учители и утвердители людем. Сих же моления услышавше, святии Мефодий и Кирилл во страны словенския подвигошася, проповедающе Евангелие Царствия Божия словенским народом. Еже уведевше, возрадовашася словене и, отвсюду ко святым братиям притекающе, закону Божию поучахуся, Господа славяще и просветители своя хваляще, с нимиже и мы вкупе воспоим Мефодия и Кирилла, взывающе: Радуйтеся, апостоли наши богоглаголивии; Радуйтеся, учителие наши благодатнии. Радуйтеся, исповедницы наши, многое дерзновение имущии; Радуйтеся, пустынницы наши преподобнии. Радуйтеся, молитвенницы наши теплии; Радуйтеся, чудотворцы наши светлии. Радуйтеся, славити Бога всеми языки завещавшии; Радуйтеся, триязычную ересь добльственно обличившии. Радуйтеся, словеном в год скорби утешение; Радуйтеся, во обстояниих тяжких надеждо их и заступление. Радуйтеся, приносящии ко Владыце всех наши покаянныя молитвы; Радуйтеся, и сами о нас к Нему выну молящиися. Радуйтеся, Мефодие и Кирилле, язык словенских апостоли и богомудрии учителие.
Кондак 7

Хотяще изгнати вы из стран словенских, священницы латинстии оклеветаша вы пред епископом Римским. Егда же сей с мощми святаго Климента пришедших вас узре и правоверие ваше и доброе житие уведе, абие посрами клеветавшия на вы корыстолюбцы, вас же именем Христовым благослови, поя Богу: Аллилуиа.
Икос 7

Дивнии апостоли явишася святая братия, не имуще покоя в трудех своих: святый бо Кирилл от подвигов многих изнемог, скоро по пришествии в Рим живот свой сконча. Святый же Мефодий ревностию брата своего укреплен и от папы Адриана благодатию архиерейскою почтен, к подвигом новым в Моравию и Паннонию возвратися, идеже труды множайшия понесе; имже дивящеся, воспоим святую братию, зовуще: Радуйтеся, добрии слузи Христовы; Радуйтеся, яко даже до смерти верни истине пребыли есте. Радуйтеся, Господеви, а не человеком угождавшии; Радуйтеся, имене Его ради поношения от человек приявшии. Радуйтеся, чрез все житие на ниве Господней потрудившиися; Радуйтеся, и по смерти от паствы своея любовию не отлучившиися. Радуйтеся, свет миру и соль земли бывшии; Радуйтеся, яко светильник, горяй во тьме, языком светившии. Радуйтеся, яко град верху горы, от верных и неверных не утаивыйся; Радуйтеся, заповеди Господни сотворшии и иных научившии. Радуйтеся, сего ради велии во Царствии Божием нареченнии; Радуйтеся, на земли в Церкви Господней прославленнии. Радуйтеся, Мефодие и Кирилле, язык словенских апостоли и богомудрии учителие.
Кондак 8

Странно преставление святаго Кирилла всем явися, не о жизни бо временней помышляше, но Господа о новопросвещенных им церквах моляше, да утвердит я в Православии и от триязычныя ереси и прочих напастей и бед оградит я, святаго же Мефодия увещаваше, глаголя: “Се, брате, супруга волов бяхове, едину бразду тяжуща, и аз на лесе падаю, течение скончав; ты же любиши святую гору вельми, не мози убо горы ради оставити учения языков словенских”. Темже, толицей ревности святых братий дивящеся, воспоим Богу: Аллилуиа.
Икос 8

Весь предан быв душею же и телом заветам брата своего, святый Мефодий не убояся прещений княжеских, ни клевет от иереев латинских, ни заточения темнична, но вся сия, яко доблий воин Христов, претерпевая, не преста языки словенския и паству свою добре правити и просвещати, дондеже в старости опочи и к святому Кириллу во блаженную обитель райскую преставися. К ним же мы воспоим тепле: Радуйтеся, венцем терпения на земли венчаннии; Радуйтеся, светом вечным на небеси осияннии. Радуйтеся, подвижницы, нищии духом, яко ваше есть Царствие Небесное; Радуйтеся, плакавшии много, яко обильно утешистеся. Радуйтеся, кротцыи, яко наследисте во Христе земли словенския; Радуйтеся, алкавшии и жаждавшии правды, яко насытистеся в селениих небесных. Радуйтеся, милостивии, яко не сами токмо помиловани есте, но и иным милости от Бога ходатаи бысте; Радуйтеся, чистии сердцем, яко днесь Бога лицем к лицу зристе. Радуйтеся, миротворцы человеком бывшии, яко сынове Божии нарекостеся; Радуйтеся, изгнаннии правды ради, яко ваше есть Царствие Божие. Радуйтеся, яко возненавидени бысте от человек и гонение и клеветы прияли бысте Христа ради; Радуйтеся и веселитеся, яко мзда ваша многа на небесех. Радуйтеся, Мефодие и Кирилле, язык словенских апостоли и богомудрии учителие.
Кондак 9

Всякия козни, на страны словенския находящия, бодро разоряли есте, преподобнии, темже и ныне не оставите нас, смиренных и грешных, но вся словены в Православии и единомыслии утвердите, да вси едиными усты и единым сердцем вопиют прославившему вас Богу: Аллилуиа.
Икос 9

Вития многовещанныя, яко рыбы безгласны, зрим о вас, преподобнии, недоумеют бо, како и в пустыни духом витали есте, и посреде человек неусыпными подвиги подвизастеся. Мы же, радующеся, яко таковые имамы учители и молитвенники, прославляем вас, глаголюще: Радуйтеся, истинныя веры исповедницы; Радуйтеся, Царствия Божия наследницы. Радуйтеся, ереси иконоборныя обличителие; Радуйтеся, иудейства посрамителие. Радуйтеся, триязычную ересь поправшии; Радуйтеся, словеном двери Царствия Небеснаго отверзшии. Радуйтеся, воини Христови, еще в житии от Него славою венчаннии; Радуйтеся, и в славе своей дух смиренномудрия соблюдшии. Радуйтеся, злая, яко Исаия и Иеремия, от единоплеменных за благая приявшии; Радуйтеся, яко Даниил и Есфирь, за язык свой ходатайствовавшии. Радуйтеся, со всеми святыми немерцающим светом осияваемии; Радуйтеся, со всеми угодники Божии о нас грешных Господу молящиися. Радуйтеся, Мефодие и Кирилле, язык словенских апостоли и богомудрии учителие.
Кондак 10

Спасти хотя новое стадо Христово от волков мысленных, святый Мефодий на одре смертном ученики своя вельми моляще твердо стояти во истинней вере, ниже козней вражеских устрашатися, но и в скорбех и напастех за вся благодарити Бога, поюще: Аллилуиа.
Икос 10

Стена есте всем, о православии трудящимся, и заступление к вам с верою притекающим, Meфодие и Кирилле богомудрии, ибо небесе и земли Творец избра вас быти на земли ловцы человеком, послежде же на небесех к лику апостол сопричте. Темже и нам умолите благодати Его даром податися, умиленно вопиющим таковая: Радуйтеся, добродетельми, яко виссоном, украшеннии; Радуйтеся, в премудрости с Соломоном сравнившиися. Радуйтеся, воздержанием и молитвою великим Антонию и Пахомию уподобльшиися; Радуйтеся, яко Великий Василий и Иоанн Златоустый, силою слова одареннии. Радуйтеся, яко целомудрием Иосифу подобни бысте; Радуйтеся, терпению Иовлему подражавшии. Радуйтеся, незлобием царю и пророку Давиду соревновавшии; Радуйтеся, ревностию по вере Илии уподобившиися. Радуйтеся, яко, подобно Павлу и Иоанну Богослову, Христа Бога возлюбили есте; Радуйтеся, яко Даниил и трие отроцы, мужественно Бога прославившии. Радуйтеся, яко ангелом и святым Божиим сожительствуете; Радуйтеся, яко и мы грешнии имя ваше с верою призываем. Радуйтеся, Мефодие и Кирилле, язык словенских апостоли и богомудрии учителие.
Кондак 11

Пение благодарное приносяще ко Господу, предстателие нам грешным вас даровавшему, со умилением молим вы, святии учителие наши, не возгнушатися нас лености ради нашея, ниже отступити от нас тяжких ради беззаконий наших, но милосердие от Господа всем испросити, вопиющим Ему о вас: Аллилуиа.
Икос 11

Светозарную апостол словенских двоицу восхваляюще, вернии, устранимся своих распрей и раздоров, паче же разделений в вере, единение же духа в союзе мира блюдуще, воспоим святых учителей тако: Радуйтеся, громогласныя трубы Евангельскаго благовестия; Радуйтеся, гусли сладкозвучныя проповеди спасения. Радуйтеся, крепцыи правды насадителие; Радуйтеся, непоколебимии неправды истребителие. Радуйтеся, радости податели всем бывшии; Радуйтеся, скорбей нападения отвсюду восприявшии. Радуйтеся, мзды и воздаяний трудом своим от человек не искавшии; Радуйтеся, о неблагодарных людех Богу молившиися. Радуйтеся, ангел Божиих и святых Его подвиги и добродетельми своими радовавшии; Радуйтеся, радости вечныя купно с ними во обителех блаженных наслажденнии. Радуйтеся, звезды, светом истины сияющия; Радуйтеся, сами добродетелей ваших светом осияннии. Радуйтеся, Мефодие и Кирилле, язык словенских апостоли и богомудрии учителие.
Кондак 12

Благодать единения и мира испросите нам, преподобнии, и мир во всем мире до конца мирскаго жития вашего благовестившии, яко да и мы, от всех расколов и искушений свобождшеся, в мире воспоим, яко други, вас возлюбившему единому миротворцу всех Господу: Аллилуиа.
Икос 12

Поюще ваше дивное житие на земли и славу, яже на небеси, помышляюще, смиренно молим вас, святии учителие, силу свыше православным христианом на враги невидимыя и видимыя даровавшия, и народы словенския в единение веры приведшия, вси воспевают, верно взывающе: Радуйтеся, православия твердое ограждение; Радуйтеся, неверия живое обличение. Радуйтеся, исхождение Духа Святаго от Отца точию, яко отдревле прияхом, исповедавшии; Радуйтеся, службу Божию совершати комуждо своим еси языком завещавщии. Радуйтеся, праведных в праведности утверждение; Радуйтеся, и беззаконных к закону обращение. Радуйтеся, яко вами и мы во исполнение Церкве внидохом; Радуйтеся, яко вами слово Божие на сроднем нам языке достиже. Радуйтеся, яко молитвами вашими, аки забралом крепким, от врагов наших ограждаемся; Радуйтеся, яко предстательством вашим вечныя жизни сподобляемся. Радуйтеся, всем словеном пастырие и отцы, ихже ради есмы вси братие; Радуйтеся, яко вас ради братия суще по плоти и по духу братия Христу сотворихомся. Радуйтеся, Мефодие и Кирилле, язык словенских апостоли и богомудрии учителие.
Кондак 13

О пречуднии и предивнии язык словенских учителие, святии равноапостольнии Мефодие и Кирилле, нынешнее приемше моление наше, вся словены от находящих им зол и бед свободите, в мире и единении соблюдите и к Царствию Небесному предстательством вашим приведите всех, во умилении о вас поющих Богу: Аллилуиа.
(Этот кондак читается трижды, затем икос 1 и кондак 1)

КАНОН РАВНОАПОСТОЛЬНАГО КИРИЛЛА

глас 4
Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.
К чаши премудрости Божественная твоя уста приложив, напитася спасительнаго пития, разумом свет являя языком, и секира, посекающая неприязненну всяку лесть.
Просветив тя, яко светило, Светодавец Христос Бог наш всему мирови яви тя учителя и посла учити темныя Книгами Законоучными языки западныя.
Святый Дух от пучины извлече Божиим словом всему миру учителя благоверия, мудре, драгий бисер, Божия закона Книгами, блаженне, языки освяти.
Богородичен: Красный ум преиме Небесным силам, Божий бо Твой бысть храм душевный, егда во чреве понесла еси Бога нашего Дева, горо пресвятая.
Песнь 3

Ирмос: С высоты снизшел еси волею на землю превышше всякаго начала, и смиренное вознесл еси из ада преисподняго естество человеческое: несть бо свят, паче Тебе, Человеколюбче.
Словом и сердцем и языком Христа, Сына Божия, проповеда, премудрость же и силу и Слово воплощшееся, блаженне, струями приточными посрамив триязычники.
Цевница приточна свята воистину явися, блаженне Кирилле, глас нам спасения святым звуком духовным бряцая прекрасно, лесть прогнал еси.
О уме огненный, о доброгласна трубо, о славию песнивый, о ластовице златоглаголивая, о языче слаждший меда в притчах, Кирилле премудре, всех нас помяни.
Богородичен: Советом Отчим Безначальный Сын яко Слово в ложесна Твоя осенением Святаго Духа, Богородице, вселися и плотию родися из Тебе, спасая души наша.
Седален, глас 8

Яко заря, просветив всю землю, еретики гониши, взыскан на востоце и западе и севере и юзе: триязычники исправляеши, проповедая странам, языки своими им глаголя и Книги предая. Рима же дошед, ту тело свое положи, блаженне, в руце Господни душу свою предав: благоверия учителю, моли Христа Бога грехов оставление подати чтущим любовию святую твою память.
Песнь 4

Ирмос: Седяй в славе на престоле Божества во облаце легце, прииде Иисус Пребожественный, Нетленною Дланию, и спасе зовущия: слава, Христе, силе Твоей.
Другий Авраам преселением, блаженне, был еси от отечества, желанием Премудрости большия, яко златыми монисты украсился еси, лучами пресветлыми зело облистаяся.
Копием словес твоих яко Замврия пронзил еси, Мадианстей ереси приложившася горько, телеснаго образа отметающихся явившагося во плоти Иисуса.
Равносущную проповедал еси Святаго Духа силу Отцу и Сыну Трисолнечнаго Света, Имже Божии бываем по поданию сынове Свету и истин наследницы.
Богородичен: Избавльшеся перваго осуждения Адамова Тобою, Девице, обретохом радость неизглаголанную, благословение бо всем родила еси, Сына Божия в наш образ.
Песнь 5

Ирмос: Ныне возстану,— пророчески рече Бог, ныне прославлюся, ныне вознесуся, падшаго прием от Девы, и к Свету Умному возносяй Моего Божества.
Мастию своею украсившуся тебе, блаженне, добре, благодать излияся во устнах твоих, духовномудре, и нечествующих глубину изсуши наводнену словесы твоими.
Стояше крепко, пособствуя по вере, мудре, льсти претыкания посекая словом твоим, равняя верным Божественную стезю, наставляя во град Христов послушливыя.
Преплывающе дивно бездну твоим словом и притчами, Кирилле блаженне, от зимы мразныя благою верою в тишину Вышних обителей вшел еси.
Богородичен: Спасая человеки, Отцеви равен Сын Человек бывает: из Тебе, Пречистая, плоть прием и земная Богови сотворив и Небесному Царствию человеки соделал есть.
Песнь 6

Ирмос: Приидох в глубины морския, и потопила мя есть буря многих грехов: но яко Бог из глубины возведи живот мой, Многомилостиве.
Сонм мертвится, приложившся Агаряном, яко змии живущим, в притчах твоих Трисолнечнаго и Единаго Божества силою убо изнемогая.
Яко избранна стрела явися еретиком врагом, ятая в теле святем, якоже пророчески пишется, хранящаяся Божеством и состреляющая враги.
Возлюбив из млада Премудрость, сестру себе приял ю еси и, умудрився Богом, блаженне, явился еси философ.
Богородичен: Иезекииль Тя врата виде, имиже пройде Един Бог Вышний, ложесна святая Твоя прошед плотию, Пречистая, и не отверста оставил есть их.
Кондак, глас 2.

Твердым и Богодохновенным учением просвещая мир пресветлыми зарями, обтече, яко молния вселенную, Кирилле блаженне, разсевая пресветлое Божие слово, на западе, и севере, и юзе, мир просвещая чудесы.
Икос

Пресветлое житие возлюбив, мудре, зарями Трисолнечнаго Божества освещен, проиде, яко молния, вселенную, северную и южную просветив страну, западным же свет незаходим возсия. Темже и мне, мрак греховный прогнав, блаженне, свыше испроси послати благодать духовную: имаши бо дерзновение к Богу непрестанно молитися за вся.
Песнь 7

Ирмос: Не послужиша твари Богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог благословен еси.
Словесными пищальми, блаженне, призывая овцы в ограды святыя, мудрыми притчами, красотою и сластию словес твоих.
Не устрашися, учителю, воински един внити в полк жидовский, всех же народ их столп мудростию разверзе, яко и Он Ханаанский пророческими притчами.
Тебе дарова источника знаменана всем правей вере, блаженне, воды сладоточныя напаяюща всегда сыны благоверия и исполняюща, яко реку, течением Церковь Господню.
Богородичен: Небес ширшую содея Бог, Браконеискусная, в ложесна Твоя вселився, Пречистая, темже молю Ти ся стужающа мя прегрешения избави широтою покаяния моего.
Песнь 8

Ирмос: Отроки благочестивыя в пещи, Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.
К Свету преложився, свет явися внятию еже от Бога, о философе, ин бо обретеся Павел добродетельми, претек всю землю в языцех, солнца светлее сияя, словом учения твоего вопия: Господа пойте, дела, и превозносите Его во вся веки.
Якоже преторжеся сонм еврейский остротою словес твоих, блаженне, в градех Северских в Козарех приложися к тебе. Ты бо множество посече, учителю святый, яко Голиафа Давид, в поганех.
Велика тя оплота и твердь земля Паннонская имущи, блаженне, заблуждения еретическая рушит Книгами и триязычников, крепко научена тобою, темже тя, учителя мудраго, поминающе присно, Христа прославляем.
Богородичен: Книгами учений святых пророк, Дево, Богородицу Тя верою проповедаем, Ты бо роди Отроча, Ветхаго деньми, яко нова Человека, темже Тя, Пресвятая, поем и превозносим.
Песнь 9

Ирмос: Ева убо недугом преслушания клятву вселила есть: Ты же, Дево Богородице, прозябением чревоношения мирови благословение процвела еси, тем Тя вси величаем.
Яко светило, тя честно Христос возложи, блещущася в концах, мудре, в венци церковнем, Егоже ради до смерти подвизася, умножая верных воспитание разумом и говением.
Павлу Божественному ученик был еси, егоже детели последуя, проиде до край западных, слово разсевая в языцех (в Каоне), и в Риме дух свой в руце Богу своему предаде.
Яко солнце на земли возсия, учителю, всюду притчами, лучами Богогласия, просвещая, поющия тя верою и о раце стоящих твоего тела, помяни, блаженне, своя ученики.
Богородичен: Лучами Твоего света, Пречистая, душу мою ныне просвети лежащу в рове гибельнем, воздвигни, враги сокрушающи, оскорбляюща присно души моей и на грехи мя побуждающа.
Светилен

Яко светильника тя Христос мирови показа и учителя вселенней, преблаженне Кирилле, Солунская отрасле, тем и нам, поминающим честную твою память, от Него просим милость.