прп. игум. Сергий Радонежский

Преподобный Сергий родился в селе Варницы, под Ростовом, 3 мая 1314 года в семье благочестивых и знатных бояр Кирилла и Марии. Господь предызбрал его еще от чрева матери. В Житии Преподобного Сергия повествуется о том, что за Божественной литургией еще до рождения сына праведная Мария и молящиеся слышали троекратное восклицание младенца: перед чтением Святого Евангелия, во время Херувимской песни и когда священник произнес: "Святая святым". Бог даровал преподобным Кириллу и Марии сына, которого назвали Варфоломеем. С первых дней жизни младенец всех удивил постничеством, по средам и пятницам он не принимал молока матери, в другие дни, если Мария употребляла в пищу мясо, младенец также отказывался от молока матери. Заметив это, Мария вовсе отказалась от мясной пищи. В семилетнем возрасте Варфоломея отдали учиться вместе с двумя его братьями - старшим Стефаном и младшим Петром. Братья его учились успешно, но Варфоломей отставал в учении, хотя учитель и помногу занимался с ним. Родители бранили ребенка, учитель наказывал, а товарищи насмехались над его несмысленностью. Тогда Варфоломей со слезами взмолился к Господу о даровании ему книжного разумения. Однажды отец послал Варфоломея за лошадьми в поле. По дороге он встретил посланного Богом Ангела в иноческом образе: стоял старец под дубом среди поля и совершал молитву. Варфоломей приблизился к нему и, преклонившись, стал ждать окончания молитвы старца. Тот благословил отрока, поцеловал и спросил, чего он желает. Варфоломей ответил: "Всей душой я желаю научиться грамоте, Отче святой, помолись за меня Богу, чтобы Он помог мне познать грамоту". Инок исполнил просьбу Варфоломея, вознес свою молитву к Богу и, благословляя отрока, сказал ему: "Отныне Бог дает тебе, дитя мое, уразуметь грамоту, ты превзойдешь своих братьев и сверстников". При этом старец достал сосуд и дал Варфоломею частицу просфоры: "Возьми, чадо, и съешь, - сказал он. - Это дается тебе в знамение благодати Божией и для разумения Святого Писания". Старец хотел удалиться, но Варфоломей просил его посетить дом родителей. Родители с честью встретили гостя и предложили угощение. Старец ответил, что прежде следует вкусить пищи духовной, и велел их сыну читать Псалтирь. Варфоломей стал стройно читать, и родители удивились совершившейся перемене с сыном. Прощаясь, старец пророчески предсказал о Преподобном Сергии: "Велик будет ваш сын пред Богом и людьми. Он станет избранной обителью Святого Духа". С тех пор святой отрок без труда читал и понимал содержание книг. С особым усердием он стал углубляться в молитву, не пропуская ни одного Богослужения. Уже в детстве он наложил на себя строгий пост, ничего не ел по средам и пятницам, а в другие дни питался только хлебом и водой.

Около 1328 года родители Преподобного Сергия переселились из Ростова в Радонеж. Когда их старшие сыновья женились, Кирилл и Мария незадолго до смерти приняли схиму в Хотьковском монастыре Покрова Пресвятой Богородицы, неподалеку от Радонежа. Впоследствии овдовевший старший брат Стефан также принял иночество в этом монастыре. Похоронив родителей, Варфоломей вместе с братом Стефаном удалился для пустынножительства в лес (в 12 верстах от Радонежа). Сначала они поставили келлию, а потом небольшую церковь, и, с благословения митрополита Феогноста, она была освящена во Имя Пресвятой Троицы. Но вскоре, не выдержав трудностей жизни в пустынном месте, Стефан оставил брата и перешел в Московский Богоявленский монастырь (где сблизился с иноком Алексием, впоследствии митрополитом Московским, память 12 февраля).

Варфоломей же 7 октября 1337 года принял пострижение в монашество от игумена Митрофана с именем святого мученика Сергия (память 7 октября) и положил начало новому жительству во славу Живоначальной Троицы. Претерпевая искушения и страхования бесовские, Преподобный восходил от силы в силу. Постепенно он стал известен другим инокам, искавшим его руководства. Преподобный Сергий всех принимал с любовью, и вскоре в маленькой обители составилось братство из двенадцати иноков. Их опытный духовный наставник отличался редким трудолюбием. Своими руками он построил несколько келлий, носил воду, рубил дрова, выпекал хлеб, шил одежду, готовил пищу для братии и смиренно выполнял другие работы. Тяжелый труд Преподобный Сергий соединил с молитвой, бдением и постом. Братия удивлялась, что при таком суровом подвиге здоровье их наставника не только не ухудшалось, но еще более укреплялось. Не без труда иноки умолили Преподобного Сергия принять игуменство над обителью. В 1354 году епископ Волынский Афанасий посвятил Преподобного во иеромонаха и возвел в сан игумена. По-прежнему в обители строго выполнялись иноческие послушания. С увеличением монастыря росли и его нужды. Нередко иноки питались скудной пищей, но по молитвам Преподобного Сергия неизвестные люди приносили все необходимое.

Слава о подвигах Преподобного Сергия стала известна в Константинополе, и Патриарх Филофей прислал Преподобному крест, параман и схиму, в благословение на новые подвиги, Благословенную грамоту, советовал избраннику Божию устроить общежительный монастырь. С патриаршим посланием Преподобный отправился к святителю Алексию и получил от него совет ввести строгое общежитие. Иноки стали роптать на строгость устава, и Преподобный вынужден был покинуть обитель. На реке Киржач он основал обитель в честь Благовещения Пресвятой Богородицы. Порядок в прежней обители стал быстро приходить в упадок, и оставшиеся иноки обратились к святителю Алексию, чтобы он возвратил святого.

Преподобный Сергий беспрекословно повиновался святителю, оставив игуменом Киржачского монастыря своего ученика, преподобного Романа.

Еще при жизни Преподобный Сергий удостоился благодатного дара чудотворений. Он воскресил отрока, когда отчаявшийся отец считал единственного сына навсегда потерянным. Слава о чудесах, совершенных Преподобным Сергием, стала быстро распространяться, и к нему начали приводить больных как из окрестных селений, так и из отдаленных мест. И никто не покидал Преподобного, не получив исцелений недугов и назидательных советов. Все прославляли Преподобного Сергия и благоговейно почитали наравне с древними святыми отцами. Но людская слава не прельщала великого подвижника, и он по-прежнему оставался образцом иноческого смирения.

Однажды святитель Стефан, епископ Пермский (память 27 апреля), глубоко почитавший Преподобного, направлялся из своей епархии в Москву. Дорога пролегала в восьми верстах от Сергиева монастыря. Предполагая посетить монастырь на обратном пути, святитель остановился и, прочитав молитву, поклонился Преподобному Сергию со словами: "Мир тебе, духовный брат". В это время Преподобный Сергий сидел вместе с братией за трапезой. В ответ на благословение святителя Преподобный Сергий встал, прочитал молитву и послал ответное благословение святителю. Некоторые из учеников, удивленные необычайным поступком Преподобного, поспешили к указанному месту и, догнав святителя, убедились в истинности видения.

Постепенно иноки становились свидетелями и других подобных явлений. Однажды во время литургии Преподобному сослужил Ангел Господень, но по смирению своему Преподобный Сергий запретил кому-либо рассказывать об этом до конца его жизни на земле.

Тесные узы духовной дружбы и братской любви связывали Преподобного Сергия со святителем Алексием. Святитель на склоне лет призвал к себе Преподобного и просил принять Русскую митрополию, но блаженный Сергий по смирению отказался от первосвятительства.

Русская земля в то время страдала от татарского ига. Великий князь Димитрий Иоаннович Донской, собрав войско, пришел в обитель Преподобного Сергия испросить благословения на предстоявшее сражение. В помощь великому князю Преподобный благословил двух иноков своей обители: схимонаха Андрея (Ослябю) и схимонаха Александра (Пересвета), и предсказал победу князю Димитрию. Пророчество Преподобного Сергия исполнилось: 8 сентября 1380 года, в день праздника Рождества Пресвятой Богородицы, русские воины одержали полную победу над татарскими полчищами на Куликовом поле, положив начало освобождения Русской земли от татарского ига. Во время сражения Преподобный Сергий вместе с братией стоял на молитве и просил Бога о даровании победы русскому воинству.

За ангельскую жизнь Преподобный Сергий удостоился от Бога небесного видения. Однажды ночью авва Сергий читал правило перед иконой Пресвятой Богородицы. Окончив чтение канона Божией Матери, он присел отдохнуть, но вдруг сказал своему ученику, преподобному Михею (память 6 мая), что их ожидает чудесное посещение. Через мгновение явилась Божия Матерь в сопровождении святых апостолов Петра и Иоанна Богослова. От необыкновенно яркого света Преподобный Сергий пал ниц, но Пресвятая Богородица прикоснулась к нему руками и, благословляя, обещала всегда покровительствовать святой обители его.

Достигнув глубокой старости, Преподобный, за полгода прозрев свою кончину, призвал к себе братию и благословил на игуменство опытного в духовной жизни и послушании ученика, преподобного Никона (память 17 ноября). В безмолвном уединении Преподобный преставился к Богу 25 сентября 1392 года. Накануне великий угодник Божий в последний раз призвал братию и обратился со словами завещания: "Внимайте себе, братие. Прежде имейте страх Божий, чистоту душевную и любовь нелицемерную..."

Тропарь общий преподобным Сергию и Никону
глас 8
Яко трисветлаго солнца светозарный звезды,/ Троическим светом озаряете сердца верных,/ сосуда Света Пресвятыя Троицы явльшеся,/ и предивным вашим житием иноком бысте твердии законоположителие/ и церквам благолепие, и благоверным, и святителем, и всем людем,/ вся бо демонския скверны отгнавше отсюду/ вашими чистыми учении и делы,/ добре упасосте стадо, собранное вами,/ но и ныне молим вас:/ посещайте чад своих, яко имущий дерзновение ко Святей Троице,/ Богомудре Сергие с чудным учеником своим Никоном,/ и молите Христа Бога, да спасет души наша.

Тропарь преподобнаго Сергия
глас 8
От юности восприял еси Христа в души твоей, преподобне,/ и паче всего вожделел еси мирскаго мятежа уклонитися,/ мужески в пустыню вселился еси/ и чада послушания в ней, плоды смирения, возрастил еси./ Тем быв Троице вселение,/ чудесы твоими всех просветил еси, приходящих к тебе верою,/ и исцеления всем подай обильно./ Отче наш Сергие, моли Христа Бога, да спасет души наша.

5 июля (Обретение честных мощей)
Тропарь преподобного Сергия
глас 8
От юности восприял еси Христа в души твоей, преподобне,/ и паче всего вожделел еси мирскаго мятежа уклонитися:/ мужески в пустыню вселился еси/ и чада послушания в ней, плоды смирения, возрастил еси./ Тем, быв Троице вселение,/ чудесы твоими всех просветил еси, приходящих к тебе верою,/ и исцеления всем подая обильно.// Отче наш Сергие, моли Христа Бога, да спасет души наша.

Кондак преподобного Сергия
глас 8
Днесь, яко солнце пресветло, возсиявше от земли,/ честныя мощи твоя нетленны обретошася,/ яко благоуханный цвет, множеством чудес сияюще,/ и всем верным источающе различная исцеления,/ и веселяще избранное твое стадо,/ еже мудре собрав, добре паствил еси./ О нихже и ныне Троице предстоиши, моляся,/ и воинству победительная на враги даровати,// да вси вопием ти: радуйся, Сергие богомудре.

Ин тропарь преподобного Сергия, игумена Радонежского
глас 4
Днесь пресветло красуется царствующий град Москва,/ яко светолучными зарями, молниями чудес твоих осияемь,/ всю вселенную созывает/ похвалити тя, Богомудре Сергие;/ пречестная же и славная обитель твоя,/ юже во Имя Святыя Троицы многими труды твоими создал еси, отче,/ имущи в себе стада ученик твоих,/ веселия и радости исполняется./ Мы же, празднующе преславное обретение честных мощей твоих, в земли сокровенных,/ яко цвет благоуханен и кадило благовонно,/любезно я лобызающе, различная исцеления приемлем/ и твоими молитвами грехов прощения сподобляемся,/ отче преподобне Сергие,/ моли Святую Троицу/ спасти души наша.

Ин кондак преподобного Сергия, игумена Радонежского
глас 8
Взирающе на предлежащий честный твой гроб,/ в немже скрыся, яко многоценное сокровище, святое трудолюбное твое тело чистоты,/ мы, чада твоя суще жалостная,/ в удивлении един со единем вещающе, вопием:/ отче наш Сергие, моли Святую Троицу/ и нам спастися, твоим чадом.

25 сентября (Преставление)
Тропарь преподобного Сергия
глас 4
Иже добродетелей подвижник,/ яко истинный воин Христа Бога,/ на страсти вельми подвизался еси в жизни временней,/ в пениих, бдениих же и пощениих образ быв твоим учеником,/ темже и вселися в тя Пресвятый Дух,/ Егоже действием светло украшен еси;/ но, яко имея дерзновение ко Святей Троице,/ поминай стадо, еже собрал еси, мудрe,/ и не забуди, якоже обещался еси,/ посещая чад твоих,// Сергие, преподобне отче наш.

Кондак преподобного Сергия
глас 8
Христовою любовию уязвився, преподобне,/ и Tому невозвратным желанием последовав,/ всякое наслаждение плотское возненавидел еси/ и, яко солнце, Отечеству твоему возсиял еси;/ тем и Христос даром чудес обогати тя./ Поминай нас, чтущих пресветлую память твою, да зовем ти:// радуйся, Сергие богомудре.

Ин тропарь преподобного Сергия Радонежского
глас 8
В чистоте жития источник слез твоих, исповедания трудовныя поты совокупил еси, и купель духовную источил еси, священный Сергие, преподобне, омывавши сугубстве творящим любовию па­мять твою скверны обоямы душевныя и телесныя. Сих ради, чада твоя суще, вопием ти: моли, отче, Святую Троицу о душах наших.

Ин кондак преподобного Сергия Радонежского
глас 8
Яко безплотным равножитель всех преподобных превозшел еси постническими труды и бдении молитвенными, мудре Сергие, тем восприял еси от Бога исцелити недуги и прогонити бесы и того ради вопием ти: радуйся, отче преподобне Сергие.

Молитва первая преподобному Сергию Радонежскому

О священная главо, преподобне и богоносне отче наш Сергие, молитвою твоею, и верою и любовию, яже к Богу, и чистотою сердца, еще на земли во обитель Пресвятыя Троицы душу твою устроивый, и ангельскаго общения и Пресвятыя Богородицы посещения сподобивыйся, и дар чудодейственныя благодати приемый, по отшествии же твоем от земных наипаче к Богу приближивыйся, и небесныя силы приобщивыйся, но и от нас духом любве своея не отступивый, и честныя твоя мощи, яко сосуд благодати полный и преизливающийся, нам оставивый! Велия имея дерзновение ко Всемилостивому Владыце, моли спасти рабы Его, сущей в тебе благодати Его верующия и к тебе с любовию притекающия. Испроси нам от великодаровитаго Бога нашего всякий дар, всем и коемуждо благопотребен, веры непорочны соблюдение, градов наших утверждение, мира умирение, от глада и пагубы избавление, от нашествия иноплеменных сохранение, скорбящим — утешение, недугующим — исце­ление, падшим — возставление, заблудшим — на путь истины и спасения возвращение, подвизающимся — укрепление, благоделаю­щим — в делах благих преспеяние и благословение, младенцем — воспитание, юным — наставление, неведущим — вразумление, сиротам и вдовицам — заступление, отходящим от сего временного жития к вечному — благое уготовление и напутствие, отшедшим — блаженное упокоение, и вся мы споспешествующими твоими молитвами сподоби в день Страшнаго суда шуия части избавитися, десныя же страны общники быти и блаженный оный глас Владыки Христа услышати: приидите, благословеннии Отца Моего, наследуйте уготованное вам Царствие от сложения мира. Аминь.

Молитва вторая преподобному Сергию Радонежскому

О священная главо, преподобне отче, преблаженне авво Сергие великий! Не забуди убогих своих до конца, но поминай нас во святых своих и благоприятных молитвах к Богу. Помяни стадо свое, еже сам упасл еси, и не забуди посещати чад своих. Моли за ны, отче священный, за дети своя духовныя, яко имея дерзновение к Небесному Царю, не премолчи за ны ко Господу и не презри нас, верою и любовию чтущих тя. Поминай нас, недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо и телом преставился еси от нас, но и по смерти жив сый пребывавши. Не отступай от нас духом, сохраняя нас от стрел вражиих, и всякия прелести бесовския, и козней диавольских, пасты­рю наш добрый; аще бо и мощей твоих рака пред очима нашима видима есть всегда, но святая твоя душа со Ангельскими воинствы, со безплотными лики, с Небесными силами, у Престола Вседержителя предстоящи, достойно веселится. Ведуще бо тя воистинну и по смерти жива суща, тебе припадаем и тебе молимся, еже молитися о нас Всемилостивому Богу о пользе душ наших, и испросити время на покаяние, и о невозбранном преитии от земли на небо, мытарств же горьких, бесов, воздушных князей и вечныя муки избавитися, и Небесному Царствию наследником быти со всеми праведными, от века угодившими Господу нашему Иисусу Христу, Емуже подобает всякая слава, честь и поклонение со Безначальным Его Отцем и с Пресвятым, и Благим, и Животворящим Его Духом, ныне и присно и во веки веков. Аминь.

Молитва третия преподобному Сергию Радонежскому

О Небеснаго гражданине Иерусалима, преподобне отче Сергие! Воззри на нас милостиво и к земли приверженных возведи к высоте небесней. Ты горе на небеси; мы на земли низу, удалены от тебе не только местом, елико грехами своими и беззакониями; но к тебе, яко нам сродному, прибегаем и взываем: настави нас ходити путем твоим, вразуми и руководствуй. Свойственно есть тебе, отче наш, благоутробие и человеколюбие: на земли живущу, не о своем токмо спасении бысть тебе попечение, но и о всех к тебе притекающих наставления твоя быша тростию книжника скорописца, на сердце каждаго глаголы жизни начертавающего. Не телесныя токмо врачевал еси болезни, но паче душевных врач изящный явился еси; и вся твоя святая жизнь бысть зерцалом всякия добродетели. Аще толик был еси, святче Божий, на земли, колик ныне еси на небеси! Ты днесь предстоиши Престолу Света Непреступнаго и в Нем, яко в зерцале, зриши вся наша нужды и прошения; ты водворяешися со Ангелы о едином грешнице кающемся радующимися. И человеколюбие Божие есть, неистощимо, и твое к Нему дерзновение много, не престани о нас вопия ко Господу. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Аще бо и недостойни есмы толикаго отца и ходатая, но ты, быв подражатель человеколюбия Божия, сотвори нам достойны чрез обращение от злых дел к благому житию. Вся богопросвещенная Россия, твоими чудесы исполненная и милостями облагодетельствованная, исповедует тя быти своего покровителя и заступника. Яви древния милости твоя и ихже отцем спомоществовал еси, не отрини и нас, чад их, стопами их к тебе шествующих. Веруем, яко духом нам соприсутствуеши. Идеже бо есть Господь, якоже слово Его учит нас, тамо и слуга Его будет. Ты верный еси раб Господень, и Богу везде сущу, ты в Нем еси, и Он в тебе есть, паче же и телом с нами еси. Се нетленныя и живоносныя твоя мощи, яко сокровище безценное, вручи нам чудес Бог. Предстояще им, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременну в нуждах наших помощь. Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. Паству же твою духовную, тобою собранную, не престани управляти жезлом духовныя мудро­сти, подвизающимся помози, разслабленных возстави, споспеши иго Христово нести во благодушии и терпении и всех нас управи в мире и покаянии скончати живот наш и преселитися со упованием в блаженная недра Авраамова, идеже ты радостно во трудех и подвизех ныне почиваеши, прославляя со всеми святыми Бога, в Троице славимаго, Отца, и Сына, и Святаго Духа. Аминь.

КАНОН НА ОБРЕТЕНИЕ МОЩЕЙ ПРЕПОДОБНАГО СЕРГИЯ, ИГУМЕНА РАДОНЕЖСКАГО

глас 4
Песнь 1

Ирмос: Пределил есть пучину чермную Бог, фараона погрузивый в ней, провед Моисея немокренно в пустыню и одождив манну в снедь людем израилевым, яко силен.
Припев: Преподобне отче наш Сергие, моли Бога о нас.
Светом Твоего трисолнечнаго Божества, Содетелю мой, просвети помраченныя очи души моея, молю Ти ся, и очисти сердце мое, да возмогу пети обретение честных мощей преподобнаго Сергия, Твоего рачителя.
Даждь ми слово, Слове Божий, во отверзение уст моих, и уясни ми язык, Милостиве, и не поминай грехов моих множества, да, Твоею благодатию наставляемь, возмогу пети преподобнаго Твоего Сергия.
Якоже во чреве матерни проглашением Троицу проповедал еси, тако и Та прослави тя: како на многа лета сокровены землею честныя мощи твоя нетленны обретошася, благоухания вкупе же и чудес верных исполняюще.
Богородичен: Пречистая Владычице, Небесных сил превышшая, порождшая Спаса, всех Содетеля, единосущна Отцу и Духу, даждь нам слово, Препетая, яко да возможем пети Тя, сущую Заступницу рода нашего.
Песнь 3

Ирмос: Да не хвалится мудр, хваляйся, но о сем, еже разумевати, яко несть свят, яко Бог наш, возносяй рог наш, даяй крепость царем нашим.
Припев: Преподобне отче наш Сергие, моли Бога о нас.
Креста Господня силою укрепляяся, страсти душевныя и плотское мудрование духу покорил еси, и сего ради Духу Пресвятому прекрасная обитель быв и нераздельныя Троицы избранно покоище.
Житием твоим, еже в мире сем, образ быв всем, от души Христу поработившимся, чистотою же, яко солнце, просиял еси и сего ради стократное воздание от руку Вседержителя приял еси, Богомудре Сергие. Темже тя радостно ублажаем.
Приидите, снидемся в настоящее ныне торжество, узрим, и радости исполнимся, и Христа да прославим, тако прославляюща Его прославляющих, и нам стену необориму и чудес подателя даровавшаго, Богоблаженнаго Сергия.
Богородичен: Благодарение, вкупе же и пение, Богомати, радуйся, приносим Ти, яко родила еси плотию Бога Вседержителя, твердую Предстательницу Тебе христианом даровавшаго.
Седален, глас 8

Житейское море преплыл еси многим воздержанием и пристал еси в тихое пристанище, в Небесныя обители, яко звезда светозарна, сияеши и, яко солнце незаходимое, молниями чудес твоих вселенную всю просвещаеши и озаряеши стада ученик твоих, всем верным даруеши грехов прощение, и жития исправление, и еже на сопротивныя одоление, яко да, радостно обстояще честную и многоцелебную раку, любезно лобызаем святыя мощи твоя и, яко отцу чадолюбиву, вопием ти: Богомудре и преблаженне отче Сергие, моли Святую Троицу, Ейже в житии сем поработал еси, грехов оставление даровати чтущим любовию обретение честных мощей твоих.
Песнь 4

Ирмос: Небеса добродетель Твоя покрыла есть, и земля исполнися славы Твоея, Христе. Темже верно вопием: слава силе Твоей, Господи.
Припев: Преподобне отче наш Сергие, моли Бога о нас.
От утробы матерни Богу прилепился еси, блаженне отче Сергие, и зачало мудрости—страх Божий в сердцы твоем имел еси, корень и основание всех благих, нищету духовную возлюбив. Сего ради Владыка Христос чудесы обогатил тя есть.
Яко крин благовонный, от земных недр издашася честныя мощи твоя, преблаженне Сергие, и, яко сокровище, чудес зарю испущают, веселяще духовная чада твоя.
Днесь радуется царствующий град Москва, и веселия исполняется вся вселенная, честная же обитель твоя, Богоблаженне Сергие, хвалящися, украшается, имеющи в себе честныя мощи твоя, яко сокровище неоскудное и пречудное.
Богородичен: Дево Господоименитая и Царице всея твари, многими пророки пронареченная, рождшая Царя Небесных сил, даждь, Госпоже, победу на враги воинству нашему и Царствия Небеснаго всех нас сподоби молитвами Твоими.
Песнь 5

Ирмос: Часть моя еси, Господи, и слава лица моего: Ты бо мя из тьмы неведения един избавил еси Богоразумием. И Тебе молюся, Христе: даруй рабу Твоему мир, яко Человеколюбец.
Припев: Преподобне отче наш Сергие, моли Бога о нас.
Яже в Троице Бога нашего Святая Церковь и дивная вправду светло красуется, всенародное множество духовне радуется, зряще тя, Богомудре Сергие, рукама архиерея Божия честно вземлема и на плещу священных носима.
Посещения ради Богоматере радости исполнився, свет был еси стаду твоему и наставник новому Израилю, преводя нас, отче, от земли к Небесным обителем, идеже ныне наслаждаешися неизреченныя светлости.
Матерня утроба освятися честным зачатием твоим, славный же град Ростов просветися рождеством твоим, великая же твоя и многославная обитель прославися подвиги твоими, вся же вселенная наполнися чудес твоих, преподобне отче Сергие.
Богородичен: Мати Божия Пречистая, твердая Заступнице на Тя надеющимся, покрове и страж граду нашему, и необоримая стено святей обители сей, и оружие спасения отечеству нашему, спаси всех, благочестно покланяющихся святому образу Твоему.
Песнь 6

Ирмос: Да не погрузит мене буря водная, ниже пожрет мене глубина, отвержен бо есмь во глубины сердца морскаго зол моих. Тем зову, яко Иона: да взыдет от тли зол живот мой к Тебе, Боже.
Припев: Преподобне отче наш Сергие, моли Бога о нас.
От младаго возраста, отче Сергие, Христа возлюбив и Сего живоносным стопам последуя, мира всего избегл еси и достигл еси в незаходимый свет разума, идеже ныне дерзновенно Святей Троице предстоиши, Юже о всех нас умоли.
Удивишася во плоти житию твоему Безплотнии чинове, и устрашишася бесовская полчища от Бога данныя тебе на них победы; мы же прославляем тя, преподобне Сергие, обстояще раку честных мощей твоих, и величаем Христа, чудесы тя прославльшаго.
Иже любовию и чистою верою чтущим честное и славное обретение святых мощей твоих и празднующим светло священную память твою, отче преблаженне Сергие, молитвами твоими всем полезная испроси.
Богородичен: Без семене во чреве Твоем заченши Творца всех и Спасителя, Богомати Владычице, и рождши плотию Христа Бога, Егоже молитвами Твоими милостива нам сотвори, и да сподобимся вси явления Его и Царствия.
Кондак, глас 8

Днесь, яко солнце пресветло, возсиявше от земли, честныя мощи твоя нетленны обретошася, яко благоуханный цвет, множеством чудес сияюще, и всем верным источающе различная исцеления, и веселяще избранное твое стадо, еже мудре собрав, добре паствил еси. О нихже и ныне Троице предстоиши, моляся, и воинству победительная на враги даровати, да вси вопием ти: радуйся, Сергие Богомудре.
Икос

Сущая в мире преобидев, премирная и нетленная селения, отче Богомудре, стяжал еси и, независтными дарми от Вседержительныя десницы по числу добродетелей обогатився и венцем почести, яко победитель, венчався, чудесы всех обогащаеши, поющих ти сице: радуйся, Богоблаженне Сергие. Радуйся, иже прежде рождения твоего трикраты проглашением прославивый Святую Троицу. Радуйся, яко от младенства твоего избранный сосуд быв Пресвятому Духу. Радуйся, мирскую красоту и славу, яко уметы, вменил еси. Радуйся, яко вселивыйся в пустыню. Радуйся, яко град, сию сотворил еси. Радуйся, яко в ней храм пречестен в похвалу Святыя Троицы воздвигнувый. Радуйся, яко славну и превелику обитель в славу Божию создал еси. Радуйся, яко в ней множества монашествующих собрав, Господеви привел еси. Радуйся, яко милостиваго посещения Богоматере сподобился еси, Тоя бо во плоти, яко Ангел, послужив. Радуйся, яко Господеви молишися о чтущих обретение честных мощей твоих. Радуйся, народу нашему оружие спасения и победитель на враги, егоже соблюдай выну и здрава и весела, да вси твое обретение светло празднуем, радостно вопиюще: радуйся, Сергие Богомудре.
Песнь 7

Ирмос: Не предаждь нас до конца Имене Твоего ради, и не разори завета Твоего, и не отстави милости Твоея от нас, Господи Боже отец наших, препетый во веки.
Припев: Преподобне отче наш Сергие, моли Бога о нас.
Божиим хранением соблюдено бысть честное тело твое, Богомудре Сергие, многими леты землею покровено, цело и ничимже вредимо изыде. Мы же, чада твоя, сие зряще, радостно вопием: благословен Бог отец наших.
Веселия ризою облечеся, радости венцем венчася честная глава твоя, светло вниде в Небесный чертог Царя Христа, почесть приемля трудов твоих, поя Господеви: благословен Бог отец наших.
Светлым житием твоим сияя, чудне Сергие, в жизни сей, безплотных чины достигл еси, ныне же с ними ликуеши у престола всех Бога, проси грехов оставление даровати совершающим любовию память обретения честных мощей твоих.
Богородичен: Простри моление, Пречистая Дево Владычице, к рождшемуся из Тебе Богу нашему, и Тобою Адама наздавшему, и наше естество обновившу, да вси вопием Ти: благословен, Пречистая, Плод чрева Твоего.
Песнь 8

Ирмос: Всяческая, Владыко, премудростию Твоею составил еси, земли же паки утвердил еси, якоже веси, дно, основанием водрузивый на водах безмерных. Тем вси вопием, воспевающе: благословите, дела Господня, непрестанно Господа.
Припев: Преподобне отче наш Сергие, моли Бога о нас.
Веселится днесь Церковь Божия, яко царскою порфирою одевающися, честная же обитель твоя, Богоблаженне отче Сергие, яко многоценно сокровище, имущи честное тело твое, различна исцеления подавающе всем, верно поющим: благословите, вся дела Господня, непрестанно Господа.
Светом небесным просвещается храм Божий, и в нем благочестивых собори радуются, видяще тя, Богоблаженне отче Сергие, архиерейскима рукама носима и от всех верных покланяема, Христу вопиющих: благословите, вся дела Господня, непрестанно Господа.
С Небесными воинствы ныне Троице предстоя и с лики всех святых водворяяся, верно почитающим память твою грехов прощение испроси, и светло празднующим обретение честных мощей твоих спасение нам даруй, да, радующеся, поем: благословите, вся дела Господня, непрестанно Господа.
Богородичен: Превечный во чреве Твоем, Дево Чистая, зачинается и совершенный Бог, иже из Тебе, Неискусобрачныя Отроковицы, Младенец плотию родився, совершен Бог и Человек человеки видится, сопрестолен сый Отцу и Духу: Егоже превозносим во веки.
Песнь 9

Ирмос: Моисей на горе неопалимую купину виде, Иосиф в вертепе неизреченное рождество слыша, Нескверная Дево, Безмужная Мати, песньми Тя, Богородице, величаем.
Припев: Преподобне отче наш Сергие, моли Бога о нас.
Взятся к высоте Небесней добродетельми, Богомудре отче Сергие, и в веселии сердца предстоиши престолу Святыя Троицы, не забуди чад твоих, совершенно здравие и дивну победу даруй на враги воинству нашему, да вси тя песньми непрестанно величаем.
Преславная память твоя, Богоносе, паче луч солнечных верныя просвещает, благочестно тя почитающия, и верою и любовию покланяющияся раце честных мощей твоих, и в песнех поющия тя, Богомудре Сергие.
Рукою моею недостойною и любовию сердечною приносимое тебе малое моление приими, Богоблаженне отче Сергие, душам нашим спасение, и телесем здравие, и миру смирение молитвами твоими даруй, да тя множае в песнех величаем.
Богородичен: О Дево Владычице Всепетая, Мати Христа Бога нашего, спаси вся, на Тя надеющияся, и к Твоему заступлению притекающия, и благочестно Тя, сущую Богородицу, в песнех величающия.
Светилен

Днесь сошедшеся, Небесная со земными радуются, и верных совокупления со священными, вкупе же и монахи, веселия духовнаго и даров чудес твоих исполняются, преподобне Сергие, в твое обретение, славяще Господа.

АКАФИСТ ПРЕПОДОБНОМУ СЕРГИЮ РАДОНЕЖСКОМУ

Кондак 1

Возбранный от Царя сил, Господа Иисуса, данный России воеводо и чудотворче предивный, преподобне отче Сергие! Прославляюще мы прославльшаго тя славы Господа, благодарственное пение воспеваем ти, ибо молитвами твоими от нашествия иноплеменник и скорбных обстояний нас присно избавляеши, яко имея дерзновение ко Господу, от всяких нас бед свободи, да зовем ти:
Радуйся, Сергие, скорый помощниче и преславный чудотворче.
Икос 1

Ангелов Творец, предуведевый, по самовластному чистаго сердца твоего изволению, всеусердствующее Его воли исполнение, еще во чреве матерни трикратным возглашением, показа тя миру истиннаго служителя быти Святыя Троицы и научи всех вопити тебе сице:
Радуйся, прежде век, яко имаши верный раб Христов быти, предусмотренный; радуйся, во оноже время во блаженное и небесное жилище предуставленный.
Радуйся, от чрева матерня на службу Небеснаго Царя, яко воин, хотящий верен Ему быти, призванный; радуйся, яко благодатию Божиею оправданный.
Радуйся, не точию России, но и всей вселенней прославленный; радуйся, трикратным твоим во чреве возглашением родителей и всех слышащих удививый.
Радуйся, по рождении своем постное иноческое житие показавый; радуйся, от сосца матерня воздержание чудное явивый.
Радуйся, яко в среду и пяток млека никакоже вкусивый; радуйся, родителей благих добрый и избранный плоде.
Радуйся, радости скорбящим и милости с верою у тебе просящим подателю; радуйся, печалей злых во всяких приключениих отгонителю.
Радуйся, Сергие, скорый помощниче и преславный чудотворче.
Кондак 2

Видящи вся Россия и иныя страны данною тебе, преподобне отче Сергие, благодатию Божиею, с верою к святым твоим мощем приходящим, и скорое вспоможение, и присное преславное чудес творение, удивляются. И мы вси, веселящеся, яко имеем таковаго милостиваго помощника, Прославльшаго тя прославляюще и тя, благаго раба и вернаго слугу Господня, восхваляюще, вопием Ему: Аллилуиа.
Икос 2

Разум, еще сущу ти во чреве матерни, Святую Троицу прославити Иисус Христос даровавый, и веру крепкую, надежду несумненную, любовь истинную к Нему имети утвердивый, сподоби тя во имя Святыя Троицы преславный храм и обитель чудную устроити, и во ону множество инок собрати. Сего ради вернии научишася воспевати тебе тако:
Радуйся, честное Пресвятыя Троицы носило и похваление; радуйся, добре стадо, тобою собранное, во спасение наставляяй.
Радуйся, честный образе агнцем и пастырем; радуйся, правило веры и образе кротости духовныя.
Радуйся, святыням чистое и непорочное жилище; радуйся, еще при жизни сподобивыйся видети Пресвятую Богородицу со двема апостолома.
Радуйся, удостоивыйся во время совершения литургии сослужения ангельскаго; радуйся, во святую литургию в благодати Божией весь, аки во огни, стоящий.
Радуйся, оным Божественным огнем, в потир вшедым, причастивыйся; радуйся, достоин бывый ангельскаго собеседования.
Радуйся, преисполненный всякия благостыни; радуйся, чистоты душевныя и телесныя усердный хранителю.
Радуйся, Сергие, скорый помощниче и преславный чудотворче.
Кондак 3

Силою, данною ти свыше, будущая, яко настоящая, созерцая, возвещал еси и великому князю Димитрию о победе многочисленных прегордых агарян, хотящих Россию огнем и мечем опустошити, прорекл еси, и от своего иноческаго лика двух монахов на противных в помощь дал еси, и молитвою твоею святою к Богу вопия, на агаряны победу сотворил еси. За еже тя прославляюще и о таковой же твоей на сопротивных православному воинству помощи просяще, Богу вопием: Аллилуиа.
Икос 3

Имуще помышление родителие твои и людие о трикратном твоем во чреве матернем в церкви глашении и удивльшеся, разумеша нечто преславное и чудное быти: и по сих уведевше твое радостное рождение, радовахуся и радостная тебе приношаху, глаголюще:
Радуйся, отроча добродушевное и благонадежное; радуйся, детище, всякия благодати Божия исполненное.
Радуйся, пречудное в младенчестве постничество нам являяй; радуйся, оным многих приводяй во удивление и увеселяяй.
Радуйся, яко с тобою всегда бе благодать Господня; радуйся, от юности твоея всем сердцем и мыслию Бога возлюбивый.
Радуйся, кротость, смирение и бдение имевый; радуйся, вся мира сего красная, яко скоро исчезающая, презревый.
Радуйся, вся плотския похоти Бога ради умертвивый; радуйся, многообразныя козни лукаваго силою Божиею победивый.
Радуйся, многия люди от греховнаго пути ко Господу обративый и спасый; радуйся, яко тобою сладостей духовных исполняемся.
Радуйся, Сергие, скорый помощниче и преславный чудотворче.
Кондак 4

Бури жития мира сего, присно внутренними и внешними злострадании волнующагося, преподобне отче Сергие, избавився, пришел еси во пристанище немятежное небесное, на места злачна и прохладна, идеже потоцы сладости неисповедимыя, пища славы Божия нетленная, пения и гласы празднующих. Тамо почиваеши и веселишися, со всеми ангельскими силами поя Богу: Аллилуиа.
Икос 4

Слышаша, преподобне отче Сергие, ближнии и дальнии ангелоподобное твое житие и благодати чудес струю выну текущую, яко молитвою твоею прокаженнии очищаются, слепии прозирают, хромии ходят и разноообразных недуг с верою притекающии здравие улучают, сих избавльшеся, вопияху к тебе таковая:
Радуйся, мироварнице, на вся недуги врачевание подавающая; радуйся, безмездно паче естества врачу скоромилостивый.
Радуйся, милости превеликия и скорбным сострадания сокровище; радуйся, всеусерднаго о людех промышления приятелище.
Радуйся, душу свою за человеки положити готовый; радуйся, увеселение и отрада к тебе прибегающим.
Радуйся, мертвеца преславно молитвою твоею ожививый; радуйся, оскудение монастырское в пищи исполнивый.
Радуйся, в сусе месте поток водный тещи у Бога испросивый; радуйся, яко таяжде вода, молитвою твоею исцеляющи недуги, чудодействует.
Радуйся, чудес пучино, Богом излиянная; радуйся, желаемых благ пришедшим к тебе подателю.
Радуйся, Сергие, скорый помощниче и преславный чудотворче.
Кондак 5

Боготечная пресветлая звезда явился еси, преподобне отче Сергие, небо церковное украшаяй и всех блудящих по морю страстнаго жития сего данною тебе от Солнца Правды Христа Иисуса, истиннаго Бога, благодатию озаряяй, мрак печалей и мглу всяких недуг и скорбей прогоняяй, наставляеши всех к тебе с верою притекающих на путь спасенный, к вечному Небесному Отечеству ведущий, поющих Богу: Аллилуиа.
Икос 5

Видев преподобный Сергий, яко в мире сем всяческая суета и тлению причастна, потщася вседушно Превечному Богу благоугодити, и воистину не вотще потрудися: премени бо тленная на нетленная, наипаче же предстояния сподобися у страшнаго Престола Владычня в славе вечней. Темже вопием ему:
Радуйся, яко идеже Христос в телеси, таможде и ты пребываеши; радуйся, тамо, яко в зерцале, в Бозе вся Ему любезная созерцаеши.
Радуйся, яко созерцая в Нем молящихся ти о помощи, молитвою твоею им полезная ходатайствуеши; радуйся, скорый помощниче призывающим тя во бранех православным.
Радуйся, молитвою твоею Российстей стране победы на противныя подаваяй; радуйся, скорбящим скоропредстательный утешителю.
Радуйся, немощей телесных и душевных немздоприемный исцелителю; радуйся, многая чудеса благодатию Духа Святаго содеваяй.
Радуйся, хромым хождение и слепым прозрение подаваяй; радуйся, грозд винный, питающий нас и веселящий.
Радуйся, розго Христа лозы истинныя, мног плод в пособие православным творящая; радуйся, благий рабе и верный, и добрый делателю винограда Христова.
Радуйся, Сергие, скорый помощниче и преславный чудотворче.
Кондак 6

Проповедует держава Российская, богомудре Сергие, труды твоя и болезни, бдение же и сухоядение, ради душевнаго твоего спасения подъятыя, егоже ради прослави тя Господь славою Своею Божественною. Темже, яко рай насажденный, в Церкви явился еси, имущи древо жизни Самаго Господа, от Негоже вкусившии вся скоро гибнущая в мире сем презирают и радостно в прекрасный виноград вышний входят, идеже ты, предстоя Ему, вопиеши: Аллилуиа.
Икос 6

Возсия Церкви и стране нашей Российстей просвещение совершенных твоих добродетелей, преподобне отче Сергие, о нихже благодаряще Отца Небеснаго, давшаго тебе толикую благодать величия Своего, к тебе, яко к теплому о нас молитвеннику, радостная воспеваем тако:
Радуйся, ангельское житие нам являяй; радуйся, страсти греховныя уставляяй.
Радуйся, образе истиннаго смирения; радуйся, зерцало совершеннаго терпения.
Радуйся, наставниче великий спасению; радуйся, приводяй грешных ко исправлению.
Радуйся, известный исполнителю заповедей Христовых; радуйся, душ немощных исцеление.
Радуйся, милостыню творити научаяй; радуйся, ризы и брашна немощным подавати повелеваяй.
Радуйся, пустынниче, мирскую честь и богатство возненавидевый; радуйся, постниче, от юности Богу послуживый.
Радуйся, Сергие, скорый помощниче и преславный чудотворче.
Кондак 7

Хотя избран дом Духу Святому себе сотворити, потщался еси тесным и прискорбным путем, ведущим в жизнь вечную, взем на рамо свое Крест Христов, шествовати, еже благодатию Божиею от юности твоея непорочно в творениих заповедей Господних совершив, достигл еси уготованнаго тебе в небесном всевеселом пребывании воздаяния, и тамо благодарственно поеши Богу: Аллилуиа.
Икос 7

Новую благодать показа всех Творец и Владыка тебе, богомудре Сергие: аще бо и умерл еси на земли плотию, но душею в вышнем селении всегда жив сый, многая и преславная чудеса в мире живущим людем действуеши, и теплым твоим ходатайством пособствуеши, вопиющим к тебе таковая:
Радуйся, девственниче душею и телом; радуйся, иноком наставниче предивный.
Радуйся, душ наших радование; радуйся, быстрое нищим услышание.
Радуйся, скорбящим приятное попечение; радуйся, чистоты усердный хранителю.
Радуйся, ненадежным надеяние; радуйся, всея России увеселение.
Радуйся, древо чудоточное рая Иисусова; радуйся, крине райскаго прозябения.
Радуйся, миро Христова благоухания; радуйся, яко тобою приносится радование.
Радуйся, Сергие, скорый помощниче и преславный чудотворче.
Кондак 8

Странное и преславное чудо является притекающим к тебе, богомудре Сергие: ибо данною тебе Божиею благодатию с верою просящим немедленно от всяких многообразных телесных и душевных скорбей исцеляеши, от бед избавляеши, от напастей охраняеши, и всем всяко благополезное прошение исполняеши, и вопиеши Богу: Аллилуиа.
Икос 8

Весь еси, преподобне отче Сергие, в вышних, но и нижних не оставляеши: присно со Христом Царем Вечным царствуеши и нас, грешных и недостойных, пред Ним воспоминаеши, моляся о спасении нашем. Темже от усердия нашего вопием к тебе сице:
Радуйся, оставльший имение и возлюбивый нищету Христову; радуйся, достигший к неистощимому богатству.
Радуйся, Духу Святому подклонивыйся со всяким смирением; радуйся, воине Христов непобедимый явльшийся.
Радуйся, крилома богомыслия сети вражия сокрушивый; радуйся, смирением возвышаемый, в вечныя кровы возлетевый.
Радуйся, просвещенный внутрь благодатию; радуйся, истребивый страстей мглу душевредную.
Радуйся, в подвизех дневных и нощных течение совершивый; радуйся, в невечернем дни Царствия Божия присно почиваяй.
Радуйся, тамо снедения пищи разумныя сподобльшийся; радуйся, яко того блаженства от Бога вечно удостоивыйся.
Радуйся, Сергие, скорый помощниче и преславный чудотворче.
Кондак 9

Всякое естество ангельское удивися великому свыше тебе дарованию, яко на земли невещественное житие показал еси, и во плоти, аки безплотен, явился еси. Сего ради многих чудес творения от Господа прием, чистою и боголюбезною душею твоею Того благостию к Небесным причтен еси силам, в Небесех ныне поеши всесильному Богу: Аллилуиа.
Икос 9

Витии многовещаннии недоумеют достойно славити тя, достойный всякия славы, славне преподобне отче Сергие, ибо пачеестественная многая преславная чудодействия, еще жив сущь, показал еси, но и по смерти тая благодатию Божиею творити не престаеши. Мы же, любовию понуждаеми, дерзаем пети тебе сице:
Радуйся, земный ангеле и небесный человече; радуйся, во плоти живый духовно, на земли небесно.
Радуйся, в человечестве пребываяй ангельски, в мире премирно; радуйся, душевныма твоима очима выну Господа созерцавый.
Радуйся, пред лицем Божиим, яко раб пред Господем, ходивый; радуйся, пред Оным, яко сын пред Отцем, яко ученик пред Учителем, шествовавый.
Радуйся, яко воин пред Воеводою готов сый вся повеленная Им творити; радуйся, добрый стада своего иночествующих наставниче и правителю.
Радуйся, шествовавый от силы в силу, дондеже явися тебе Бог богов в Сионе; радуйся, Единаго Господа возлюбивый и к Нему очеса своя выну имевый.
Радуйся, во вся дни живота своего Его искавый и в Нем намерение полагавый; радуйся, ничесого на Небеси и на земли, разве Христа Иисуса, видети желавый.
Радуйся, Сергие, скорый помощниче и преславный чудотворче.
Кондак 10

Спасти хотя душу твою, в юности возраста своего отреклся еси воли своея и во знамение отсечения ея постригл еси власы главы своея, и был еси монах, покоривый себе воли Божией и начальником, от Него поставленным, ихже веления тако слушал еси, яко Самаго Господа, никогда же прекословя, но слову веления исполнением дела отвещавая. Всяческая же приключения благодарно, яко верный раб, от Господа приимал еси, Емуже на Небесех предстоя, ныне вопиеши: Аллилуиа.
Икос 10

Стена еси всем человеком, к заступлению твоему прибегающим, преподобне богомудре Сергие. Темже и нам, к тебе приходящим и милостиваго твоего во всяких нуждах заступления у Царя Небеснаго просящим, буди стена крепкая и ограждение непреоборимое, от всяких нас бед и напастей застеняя и ограждая, за еже мы вопием тебе таковая:
Радуйся, воине Царя Небеснаго, не обязавыйся куплями житейскими, да Ему угоден будеши; радуйся, не восхотевый двема господинома, Богу и миру, работати, но Единому Богу точию.
Радуйся, от юности на тело свое, на мир сей и диавола вооруживыйся; радуйся, постом, поклоны, стоянием на молитве, бдением умертвивый плоть свою.
Радуйся, умертвивый оную прежде, нежели она жива страстем бяше; радуйся, мертву содеявый гортань противу приимания сластей.
Радуйся, мертв сотворивый язык противу глаголания скверных, клеветных и ложных; радуйся, мертвы устроивый ушеса противу слышания душевредных.
Радуйся, мертвы содеявый руце противу грабления и всяких зол творения; радуйся, мертво сотворивый чрево противу объядения и пиянства.
Радуйся, мертва соделавый трудами чресла своя противу нечистоты; радуйся, мертвы сотворивый нозе противу течения в путь грешников и на совет нечестивых.
Радуйся, Сергие, скорый помощниче и преславный чудотворче.
Кондак 11

Пение благодарственное благотворителю Христу Иисусу, тя, преподобне отче, прославляюще, вси православнии взывают, яко даровал ти многих чудес силу творения: слепыя просвещати, прокаженныя очищати, больныя врачевати, бесныя от демонскаго дручения свобождати, толико сильне, якоже и не у приведенным к тебе бывшим бесным, еще на пути демони от них отбегаху и ктому не возвращахуся, боящеся в тебе силы Божия, юже выну в Небесех прославляя, вопиеши Богу: Аллилуиа.
Икос 11

Светозарное светило в православной Российстей державе и во всей вселенней благодатию немерцающаго Солнца, Христа Иисуса, просвещающею возсиявшее, зрим тя, богомудре отче: с невещественными бо в вышних предстоя Престолу Троицы Пресвятыя, радости превеликия исполнен еси и Божественными лучами Трисолнечнаго Света осияваемь, облистаеши верныя, вопиющия к тебе таковая:
Радуйся, возшедый на гору превысоку добродетелей Божественных; радуйся, яко от тоя удобь возшел еси на гору небесную.
Радуйся, яко от обители земныя во обитель небесную водворился еси; радуйся, яко восходя тамо душею, нам мощи твоя святыя оставил еси.
Радуйся, яко мощи твоя исцелевают всякия скорби и болезни; радуйся, яко мощей твоих демони трепещут.
Радуйся, яко твоя мощи комуждо в приключшихся печалех бывают увеселение; радуйся, душею востекий в Сион Горний к Царю Небесному.
Радуйся, яко тамо предстоя, о всех к Нему тепле ходатайствуеши; радуйся, яко благоутробие Его о всех чтущих память твою умилостивляеши.
Радуйся, стране нашей на противных победу молитвою твоею содеваеши; радуйся, всем верным всякое прошение во их пользу исполняеши.
Радуйся, Сергие, скорый помощниче и преславный чудотворче.
Кондак 12

Благодать, данную ти от Бога, сведуще, тебе, приснаго нашего милостиваго отца, прилежно просим: пролей ныне теплую твою молитву о нас, грешных, ко Господу, яко да презрев вся наша согрешения, дарует победы на враги, яко царю Константину на Максентиа, яко Давиду на Голиафа; державу Российскую да укрепит, Церковь Свою Святую от распрей и расколов непозыблему да сохранит, обилие всяких плодов земли да дарует и вся православныя христианы да спасет и помилует, чесого от Него твоими молитвами улучити ожидающе, вопием Ему: Аллилуиа.
Икос 12

Поюще дивнаго во святых Своих Царя Небеснаго, прославльшаго тя, вернаго Своего раба, преподобнаго отца Сергия, милостивое твое, скорое нам во всяких нуждах и печалех поможение прославляем, ибо в тебе в Троице прославляемый Бог наш преславным многим чудодействием дивно прославися, о чесом удивляющеся вопием к тебе сице:
Радуйся, великославный Российский наш заступниче, отче Сергие; радуйся, совершенный в добродетелех человече.
Радуйся, дивный подражателю совершенства Отца нашего Небеснаго; радуйся, преблагий и добрый наставниче иноков.
Радуйся, образе пустынножителей и устроителю общаго жития; радуйся, всех православных скорый помощниче и заступниче.
Радуйся, Царя Небеснаго и Бога известный умилостивителю; радуйся, многажды заступлением твоим прошения предваряяй.
Радуйся, покрове, Богом зданный, имже покрываются мнози; радуйся, ленивых подвигнувый твоими христоподражательными нравы.
Радуйся, доброзрачное света евангельскаго всесветлое сияние; радуйся, Трисолнечнаго Святыя Троицы света выну просвещающее озарение.
Радуйся, Сергие, скорый помощниче и преславный чудотворче.
Кондак 13

О чудотворче преславный и заступниче всем нам во всяких бедах и скорбех скорый и пречудный, богомудре отче Сергие! Нынешнее наше приими приношение и богоприятным твоим ходатайством умоли Господа сил силу свыше православному нашему воинству на сопротивныя подати, и нам всем, Того благодатию очистившимся, от геены избавитися, и грядущая в Небесех благая улучити, вопиющим Ему: Аллилуиа.
Этот кондак читается трижды, затем 1й икос «Ангелов Творец…» и 1й кондак «Возбранный от Царя сил…».