Молимся вместе

КОНДАК 1.
Избранной от всех родов земных в пречистый храм Спасов,/ Церкве Христовы пребожественному украшению/ и всего мира предивному Покрову и радованию,/ благодарственная воссылаем Ти раби Твои, Богородице./ Ты бо плод жизни вечныя миру израстившая,/ земли же Галицтей Лик Твой благодатный во граде Теребовле на радость велию явившая,/ Едина воистину Богородица и всем верным Предстательница
позналася еси,/ да зовем Ти:/
Радуйся, Пречистая Дево Марие,/ земли Галицкия премилосердная Покровительнице.

ИКОС 1.
Ангелов множество на небеси и человеческий род на земли, духовно совокупльшеся, Пречистей и Нескверней Деве Марии песнь хвалебную радостно приносят: О Тебе радуется, Благодатная, всякая тварь, Ангельский собор и человеческий род. Мы же, знамение образа Своего нам даровавшей и землю Галицкую сим благословившей, яко Кивоту Священному Новаго Завета, умильно вопием:
Радуйся, Престоле Огнезрачнаго Божества;
Радуйся, Таиннице воплощения Божественнаго Естества.
Радуйся, Отца Небеснаго непостижимое благоволение;
Радуйся, Сына Божия предивное Воплощение.
Радуйся, Духа Святаго пребожественное Святилище;
Радуйся, Невместимаго Вместилище.
Радуйся, Грозд Божественный миру возрастившая;
Радуйся, плод греховный праматере Евы истребившая.
Радуйся, Пречистая Дево Марие, земли Галицкия премилосердная покровительнице.

КОНДАК 2.
Видяще Тя, Премилосердная Мати, яко облако божественное над Скинией Завета, омофор Свой Честный над миром распростершую, и во всех концах земли Церковь Божию украсившую — раеви уподобляющи, и Свою любовь Матернюю на помощь и утешение верным простирающую, радующеся, вопием о Тебе Богу: Аллилуиа.

ИКОС 2.
Разумом суемудренным в неведении судеб Божиих шатающиися, недоумеюще, суесловят: како убо Дева родила еси, и Дева пребыла еси, Богородице? Мы же, евангельскому благовестию верою внемлюще, исповедуем: Бог идеже хощет, побеждается естества чин. Тако паче слова и разума, от Божественнаго Духа, волею же Отчею, Сын Божий от Неискусомужныя Девы, нас ради, неизреченно воплотися: Юже, яко
Богоневестную Матерь, православно величаем:
Радуйся, Божественнаго Агнца Пренепорочная Мати;
Радуйся, Виновнице дарования миру спасительныя благодати.
Радуйся, Горо тучная и несекомая;
Радуйся, Чаше, даров Духа Святаго преисполненная.
Радуйся, яко Тобою благоволение Божие познахом;
Радуйся, яко Тобою любовь Сына Божия стяжахом.
Радуйся, Облако, божественною манною мир усладившее;
Радуйся, Источниче, питием безсмертия нас оживотворивший.
Радуйся, Пречистая Дево Марие, земли Галицкия премилосердная покровительнице.

КОНДАК 3.
Cилою Духа Святаго облагодатствованная и божественныя любве преисполненная, яко крин неувядаемыя райския красоты миру позналася еси, Богородице. Кто исповесть милосердия Твоего бездну? Ты бо, превыше всех Небесных и земных превозносимая, милость Твою нам явила еси и землю Галицкую пречудною иконою Твоею Теребовлянскою облагодатствовала еси, Пречистая, да уразумеем, яко не оставит нас Господь
молитв Твоих ради, внегда вопити нам к Нему чистым сердцем: Аллилуиа.

ИКОС 3.
Имущи Матернюю любовь к людем, юже в горестех голгофских с Сыном Твоим, на Кресте страждущим, миру простерла еси, и с Ним мир возлюбила еси, не престай, Пречистая, теплотою любве Твоея, яко Мати всех, в скорбех и печалех, и напастех житейских сущих, умоляти Всещедраго Бога, да дарует земли нашей мир и безмятежие, Церкви же Святей непоколебимое благостояние, да от всех зол Тобою избавляеми,
вопием Ти ангельски:
Радуйся, Церкви Христовой лоно непорочныя чистоты;
Радуйся, Воплощение Божественныя красоты.
Радуйся, всех небесных радосте и удивление;
Радуйся, всех земнородных надежде и от зол избавление.
Радуйся, о благостоянии Церкве Православныя неустанная попечительнице;
Радуйся, усердная пред Богом о нас Молитвеннице.
Радуйся, вся печали мира в молитвах собирающая;
Радуйся, в скорбех и отчаянии сущих благою надеждою укрепляющая.
Радуйся, Пречистая Дево Марие, земли Галицкия премилосердная покровительнице.

КОНДАК 4.
Бурею нашествия иноплеменник лютых земля Галицкая поколебася, егда Гирей злочестивый, яко змий адский, устремися огнем и мечем народы наша поработити: веру святую Православную попрати, юноши и девы рабски пленити, чада же несведущия от отцев отъяти, и яко враги нечестивыя противу земли отеческия тех соделати. Ты же, Всемилостивая Мати, пречудною яже во граде Теребовле иконою Твоею сего
устрашила еси, и воины земли нашея на враги воздвигла еси, да спасаемии Тобою, во веки воспоем Богу: Аллилуиа.

ИКОС 4.
Слышаще о Твоем, Богомати, предстательстве, людие земли Галицкия веселишася: пречудным бо Твоим образом от предел их нападения врагов отражала еси, стрелы их огненныя на них же возвращающи, во еже устрашитися тем, и в бегство обратитися, да познают, коль силен Покров Твой святый, имже отцы наши с верою побеждаша всяческая. Мы же, в подвизе веры их до ныне спасаеми, благодарно вопием Ти,
Пречистая:
Радуйся, Надеждо наша и в бедах Утешительнице;
Радуйся, земли нашея от всех врагов Избавительнице.
Радуйся, Материнскими руками Твоими верныя от зол и напастей ограждающая;
Радуйся, любовию сердца Твоего в горестех житейских нас согревающая.
Радуйся, во дни и в нощи омофором Твоим нас покрывающая;
Радуйся, в земных испытаниих путь спасения нам озаряющая.
Радуйся, пресвятою иконою Твоею любовь Твою к нам явившая;
Радуйся, торжество любви и милосердия Божия миру открывшая.
Радуйся, Пречистая Дево Марие, земли Галицкия премилосердная покровительнице.

КОНДАК 5.
Боготечная звезда явися икона Твоя святая, Преблагословенная Мати, путь спасения верным озаряющая. К ней бо князи и воини, иерарси, иноцы и людие мирстии в дни лихолетий верою прилепляхуся, и яко Давид Голиафа, нашествия агарянская побеждаша, благочестием же веры Православныя землю отеческую в вертоград Божий украшающе, в нем бо из рода в род воспевается песнь Богови: Аллилуиа.

ИКОС 5.
Видевше людие галицтии Лика Твоего, Пречистая, пречудная явления, и в нем Твой благодатный Покров и от врагов избавление, якоже младенец Предтеча во утробе матере своея, радостно верою взыграша и, со умилением припадающе, возопиша: призри на моление раб Твоих, Всенепорочная, утоляющи на нас лютая востания, да не постыдимся, Владычице, Тя призывающе, потщися на умоление Тебе верно вопиющих:
Радуйся, милости сокровище многоценное;
Радуйся, кающихся грешников утешение непостыдное.
Радуйся, преблагая Мати сиротствующих;
Радуйся, скорая Предстательнице бедствующих.
Радуйся, вдов и немощных щедрая Кормилице;
Радуйся, в недузех и в пленении страждущих всеблагая Посетительнице.
Радуйся, путешествующим и по морю плавающим скорая Помощнице;
Радуйся, по воздуху летающих незримая от гибельных бед Избавительнице.
Радуйся, Пречистая Дево Марие, земли Галицкия премилосердная покровительнице.

КОНДАК 6.
Проповедует и славословит Церковь Христова предивныя чудеса милосердия Твоего, Пренепорочная Мати, их же на род христианский чрез святыя иконы Твоя благодатно изливавши. Воистинну, якоже прорекла еси, от восток солнца до запад ублажают Тя вси роди, Матерь Божию, Честнейшую Херувим и Славнейшую без сравнения Серафим, исповедуют, и Твоему милосердию припадающе, всерадостно вопиют Богу:
Аллилуиа.

ИКОС 6.
Возсия Свет Живота вечнаго от пречистый утробы Твоея, Богородице, и всю вселенную обожи, Тебе же, Матерь Свою Преблагословенную, верным Своим Заступницу усердную дарова, да якоже Его, всех Спаса, руками Своими от бурь мира сего ограждала еси, оградиши мир и Церковь Святую от всех бед и обстояний. Тако видяще Тя, Лику Твоему сему, егоже на радость нам даровала еси, яко Самей Ти с нами сущей,
поклоняющеся, воспеваем сладостно таинство Твое:
Радуйся, суд правды вечныя нам открывающая;
Радуйся, разум и совесть нашу Боговедением просвещающая.
Радуйся, облекшая род человеческий порфирою Божества;
Радуйся, отверзшая мирови наследие вечнаго Небеснаго торжества.
Радуйся, воли нашея светлое изъявление;
Радуйся, душ наших от сетей диавола избавление.
Радуйся, Обрадованная, Тобою бо Господь Сил с нами;
Радуйся, Священное прибежище спасительныя отрады.
Радуйся, Пречистая Дево Марие, земли Галицкия премилосердная покровительнице.

КОНДАК 7.
Хотяще всячески благочестие веры Православныя в народех наших истребити, орды нечестивии паки зверски устремляхуся землю Галицкую поработити, наипаче же Лик Твой Пречистый, чрез негоже народы наша благодатно в единомыслии веры укрепляшася — врагов побеждаша, зломысляху осквернити. Да не коснется Сего рука скверных, архипастырь и людие Православнии из града Теребовли Лик Твой благодатный, во псалмех духовных, во град Львов принесоша, воздающе хвалу Богу: Аллилуиа.

ИКОС 7.
Новая знамения, яко лоза медоточная, в пределех Львовских источашася от святыя иконы Твоея, Богомати, на всех притекавших к Тебе с верою: слепым бо прозрение, хромым хождение, печальным утешение и во всяких злостраданиих надежда утешная и стена необоримая народу нашему явилася еси, Всеблагая. Юже, благодатных даров Святаго Духа преисполненную, со умилением чтуще, благодарне приносим Ти сия похвалы:
Радуйся, Кивоте Господень, вознесенный к Горнему Престолу;
Радуйся, научившая нас поклонятися в Троице Единому Богу.
Радуйся, молитвы родителей о чадех своих во благо исполняющая;
Радуйся, благое попечение чад о родителех своих освящающая.
Радуйся, боголюбивых матерей Славо и дев Красото;
Радуйся, юношей благонравных достойная Похвало.
Радуйся, воинов и вождей наших — Знамение мира непобедимое;
Радуйся, трудолюбивых земледельцев изобилие неистощимое.
Радуйся, Пречистая Дево Марие, земли Галицкия премилосердная покровительнице.

КОНДАК 8.
Странное и преславное на Тебе явися, Богородице: не токмо бо Дева пребыла еси и Бога во плоти родила еси, но яко в благодати неоскудевающая, в вещественных образах Твоих силы и действия Святаго Духа на верныя люди непрестанно изливаются и радость спасения возвещают. Тако о Тебе радость спасения имуще, в нейже скорби наша и печали растворяются и всякия козни вражия побеждаются, всехвально приносим песнь Богу: Аллилуиа.

ИКОС 8.
Всем, в скорбех и печалех житейских обуреваемым, воистину источник благодатныя отрады явися святая икона Твоя, Предивная Марие, — небесе и земли неувядаемыя красоты и чистоты Лилие. Всяк бо, иже с верою к ней приходит, теплотою Матерния любве Твоея согревается, сердцем и душею Богу прилепляется, жизни вечныя сподобляется. Сего ради со умилением приносим Ти таковая:
Радуйся, Деннице красоты непостижимыя;
Радуйся, Теплото любве неутасимыя.
Радуйся, славная пред Богом о нас Заступнице;
Радуйся, предивная во спасении Споручнице.
Радуйся, многих во гресех заблудших спасающая;
Радуйся, кающихся грешников от челюстей ада избавляющая.
Радуйся, в бедах и напастех незримая Предстательнице;
Радуйся, от врагов видимых и невидимых, и смерти лютыя скорая Избавительнице.
Радуйся, Пречистая Дево Марие, земли Галицкия премилосердная покровительнице.

КОНДАК 9.
Вся концы земли, яко солнце светоносное, благодатным явлением чудотворных икон Твоих, в вере просветила еси, и любовь Матери Господа
Сил ко всем людем явила еси, Богородице. Сице бо Церковь Вселенская именем Твоим красуяся, яко всемирную славу, от человек прозябшую,
и Владыку рождшую, Тя, Пречистую Деву — веры утверждение, воспевающе, приносит Богу ангельское пение: Аллилуиа.

ИКОС 9.
Витийство боговещанных пророческих речений видим ныне о Тебе, на родех наших сбывшееся, Богородице, яко от дний крещения народа нашего, земля наша, домом Твоим святым пронареченная, плод дивный Церкви Небесней произрасте: равноапостоли и святители, мученицы же и исповедницы, в дивном подвизе преподобнии и праведнии, в нем же не постыдимся во веки. Тем же, благодатное тысящелетие
Евангельскаго просвещения народов наших всеправославно празднующе, приносим Ти сия благодарственныя похвалы:
Радуйся, Главизно нашего спасения;
Радуйся, Славо пророческаго исполнения.
Радуйся, Селения Христова чистейшая Палато;
Радуйся, Святыя Руси пресветлая Отрадо.
Радуйся, Всепетая Мати, яко чад Своих нас возлюбившая;
Радуйся, образом Твоим благодатным нас благословившая.
Радуйся, градов Теребовли и Львова Похвало предивная;
Радуйся, земли нашея Надеждо непостыдная.
Радуйся, Пречистая Дево Марие, земли Галицкия премилосердная покровительнице.

КОНДАК 10.
Спасти хотя Человеколюбец Господь роды родов наших от мрака греховнаго и нечестия языческаго, благоизволи воздвигнута в земли нашей светило светозарное — благовернаго Владимира, да евангельским светом просветит, порфирою Крещения облагодатствует и печатаю Святаго Духа в союз любве народы наша соединит, и яко возлюбленное достояние Свое — землю нашу в дом Твой, Пречистая, устроити благоизволи,
юже, яко Эдем лучезарный, чудодейственными иконами Своими украсила еси, нас же, яко чад Своих, возлюбила еси, Богомати, да Тобою от зол всяческих избавляеми, верно вопием Богу: Аллилуиа.

ИКОС 10.
Стена и непобедимое ограждение явися святая икона Твоя Теребовлянская в земли Галицтей, Пречистая Дево Марие, в дни страшных нашествий иноплеменников нечестивых, жаждавших град и люди поработити, иже Самую Тя, яко Стража грозна и неприступна, на стенах града увидевше, посрамлены в бегство обратишася. Оттоле и доныне надежду несокрушимую и силу необоримую в святей иконе Твоей имамы,
яко Матери Божией, Тебе с нами сущей, сыновнею любовию всерадостно вопием:
Радуйся, Источниче всех наших радостей;
Радуйся, Ковчеже, преисполненный небесныя благости.
Радуйся, Печате чистоты Божественныя;
Радуйся, Венче красоты небесныя.
Радуйся, Радуго, всеми Небесными дарами дивно блистающая;
Радуйся, Молние, всяку силу вражию от верных отражающая.
Радуйся, храмов Православных и земли нашея Божественное украшение;
Радуйся, подвига веры народов наших благодатное утверждение.
Радуйся, Пречистая Дево Марие, земли Галицкия премилосердная покровительнице.

КОНДАК 11.
Пение всеумиленное приими от нас, Всеблагая Мати, яко святую икону Твою на радость и духовное утешение нам даровала еси, и божественным Покровом Своим народы наши от бед ограждавши, Матерне нас милуеши. Не остави, Пречистая, всех надежду на Тя имущих, ниже отвратися убогих слез и воздыханий в молитвах Тя призывающих, но вознеси о нас теплую молитву к Богу, да, грех ради наших, не отвратит Лица Своего от нас, егда вопием Ему: Аллилуиа.
ИКОС 11.
Светом немеркнущия славы украсися земля наша явлением чудных икон Твоих, Пречистая Мати, и из рода в род прославлено буди Пресвятое имя Твое в народе нашем, егоже возлюбила еси, и яко клас многоплоден земли нашея, сонмы угодников Божиих Церкви Небесней привела еси. Мы же, подражая вере их, с любовию покланяемся Пречистому образу Твоему и Пресладкому Младенцу, Превечному и Незаходимому Свету Христу, Им же спасла еси от лютых зол и тления смерти все естество человеческое, и вопием:
Радуйся, Заре Света Незаходимаго;
Радуйся, Мати Царя и Господа Непобедимаго.
Радуйся, Звездо, Церкве Православныя немеркнущее украшение;
Радуйся, всех родов наших Похвало и Утверждение.
Радуйся, мира всего вожделенная Помощнице;
Радуйся, любви и милосердия неисчерпаемый Источниче.
Радуйся, от Ангел воспеваемая и возвеличенная на небеси;
Радуйся, верными сыновне возлюбленная и хвалимая на земли.
Радуйся, Пречистая Дево Марие, земли Галицкия премилосердная покровительнице.

КОНДАК 12.
Благодать Твою всемощную излей на сыны и дщери земли Галицкия, Пречистая Дево Марие, и дней мирных испроси народу нашему, якоже
иногда в Кане Галилейстей у сына Сына и Бога Твоего, вина не имевшим, испросила еси, да благочестием веры отцов наших в мире и
благоденствии во славу Божию поживем, Ликом Твоим благодатным от враг видимых и невидимых всегда избавляеми, благодарне вопиюще
победную песнь: Аллилуиа.

ИКОС 12.
Поюще таинства сего величие, в немже дивно прославляется бездна милосердия Твоего; Мати Божия, яко пророк Давид пред сенным
Ковчегом, всерадостно пред Ликом Твоим припадающе, единеми усты, и единем сердцем взываем Ти, Пречистая: во дни живота нашего не
остави нас, в час же кончины нашея неотлучно пребуди с нами, да юдоль смертную негиблемо прейдем, и Тобою Царствие Небесное
унаследуем, идеже, яко на земли, такожде и на небеси, вопием Ти радостно:
Радуйся, Церкве Небесныя непостижимая Красото;
Радуйся, Церкве земныя непостыдная Похвало.
Радуйся, Божественный Покрове душ наших;
Радуйся, Избавительнице от демонских напастей.
Радуйся, Милостивая, любве и правды неисчерпаемая Глубино;
Радуйся, подвижников чистоты девства Твоего небесная Порфиро.
Радуйся, всемирное чудо — Ангелом и человеком удивление;
Радуйся, рода человеческаго от ада и смерти избавление.
Радуйся, знамение чистоты девства воздвигшая;
Радуйся, Рождеством Твоим род человеческий возвеличившая.
Радуйся, Царя Небеснаго Мати, и мира всего Владычице;
Радуйся, в день Страшнаго Суда Христова наша верная Спасительнице.
Радуйся, Пречистая Дево Марие, земли Галицкия премилосердная покровительнице.

КОНДАК 13.
О, Всепетая Мати, всех Небесных и земных Похвале и спасительная Надеждо, приими от нас сия благодарственныя похвалы, за яже Лик Твой
Святый, с Пречистым Богомладенцем на руку Твоею, нам на радость, врагом же на посрамление даровала еси, да в скорбех и печалех, и
напастех житейских сие спасительное прибежище имамы, Церкве утверждение, земли же нашея от врагов избавление, и благословение о Тебе
вопиющих Богу: Аллилуиа.
Сей кондак глаголется трижды. И паки икос 1-й и кондак 1-й.
МОЛИТВА
Пресвятей Владычице нашей Богородице пред чудотворным образом Ея Теребовлянским

О, Всемирная Похвало, спасительная радосте и прибежище нам грешным, Преблагословенная Дево Марие! Именем Твоим, Пречистая, Силы
Небесныя у Престола Царя Славы славословя, хвалятся, мы же, в юдоли греха и смерти живущий, и лукавством духа злобы поднебесныя в сети греховныя уловляеми суще, милосердием Твоим утешаемся, к Лику Твоему, благодатными дарами Святаго Духа преисполненному, и землю галицкую облагодатствовавшему, припадающе, молимся. Призри, о Всеблагая, на нас, в скорбех и напастех многих обуреваемых, и не отрини убогих молитв и слезных воздыханий наших, но, яко усердная Заступница рода христианскаго, не престай молити Сына Твоего и Бога нашего, да незыблемо утвердит и укрепит Церковь Свою Святую во спасение всех людей, и не престает изливати Духом Святым милость Свою на вся Православныя христианы, с верою и любовию к Лику Твоему святому припадающия, и Твоего Матерняго предстательства ищущия, да не постыдимся, ниже умалени будем, на Тя упование возлагающе.
О, Мати Божая, и Надеждо наша непостыдная, якоже во дни отец наших знамением Лика Твоего сего землю Галицкую от враг нечестивых
сохраняла еси, тако и ныне в евангельстей Истине нас просвети и утверди, и от всех, мыслящих нам злая, нас избави, да достойни будем пира
веры Православныя, союзом любви Христовой, народы наши благодатно связующим, к наследию вечных благ приуготовляеми.
Еще молим Тя, Премилосердная, посети и утеши щедротами Твоими всех к образу Твоему припадающих и молящихся: иерархов и пастырей
Церкве Христовы благодатными дарами Святаго Духа снабди, и в окормлении словеснаго стада Христова богомудренно утверди, иноки и вся
нищия духом в терпении утеши и ободри, в болезнех и злых обстояниих сущих посети, юныя уцеломудри, младенцы воспитай, воины оружием мира утверди, и всех труждающихся и обремененных земных и небесных благ исполни, град наш и люди миром огради и в благочестии веры Православныя облагодати; страну же нашу и народы мира от междоусобий и всемирнаго истребления сохрани, наипаче же в братолюбии утверди и всем вся ко спасению даруй.
Помози нам, Всеблагая, волю Божию исполняти и дыханием любви Его присно воспламенятися, да молитвами и щедротами милосердия
Твоего от всех зол избавляеми, во всяком благочестии и чистоте, возвеличим Трисвятое Имя Бога нашего: Отца, и Сына, и Святаго Духа, во веки веков. Аминь!