Св.преп.бл. князь Олег Брянский

Месяца сентября в 20-й день
ПРЕПОДОБНОМУ ОТЦУ НАШЕМУ
БЛАГОВЕРНОМУ КНЯЗЮ ОЛЕГУ БРЯНСКОМУ,
ВО ИНОЦЕХ ВАСИЛИЮ

НА ВЕЛИЦЕЙ ВЕЧЕРНИ
На Господи, воззвах, глас 2.
Приидите, православнии собори, / восхвалим теплаго заступника Брянския земли, / преподобнаго благовернаго князя Олега, / измлада Христа Бога возлюбившаго, / делы веры заповеди Его исполнившаго, / монашеское житие в пределех Брянских насадившаго / и нам образ добродетели явившаго, / празднственно почитающим святую память его.
Род правых благословится, / темже и мы величаем преподобнаго князя Олега, / той бо произыде от благочестиваго корене Черниговских князей: / Николы Святоши преподобнаго, князя Игоря страстотерпца, / мученика Михаила и благовернаго Романа, / сродник быв преподобныя Евфросинии Суздальския, / с нимиже молится о душах наших.
Егда прииде погибель Русския Земли / и грех наших ради полчища поганых и зловерных разоряху ю, / тогда паче видимых на невидимыя враги изшел еси, / и на молитвенней страже Отечества твоего стал еси, / благоверне княже Олеже, / воздея преподобнеи руце к Богу, / Единому спасти могущему православно призывающих Его.
Первее в смиреннем сердце обитель Богу сотворивый, / преподобне княже Олеже, / последи обитель первоверховных апостол / во граде Брянске воздвигл еси, / идеже добре во иноческих подвизех потрудився, / нам мощи твоя святыя оставил еси, / душею же во обителех Отца Небеснаго ныне ликовствуя, / поминай верою и любовию воспевающия тя.
Богомудрый Петро-Павловския обители первоздателю, / багряницу княжескую на власяницу иноческую вольне пременивый, / меч духовный не без ума носил еси, / Православие утверждая и душевредная посекая, / ближним же и братии по образу Христову служил еси, / темже не престай присно покрывати / град Брянск и обитель твою.

Слава, глас 8.
Подобен: О преславнаго чудесе:
О душевнаго благомощия / и ума непоколебима! Како славу мира сего презрев, / узким путем Христу последова!. / Утверждение веры Православныя / и монахов учитель изящный, / преподобный князь Олег ныне прославляется, / егоже Бог дарова нам в скорбех помощника, / яко Благоутробен.
И ныне, праздника.
Вход. Прокимен дне. Чтения три преподобническая.

На литии глас 2:
Приидите, Брянстии народи, / во обитель преподобнаго князя Олега, / в день праздника его веселящеся, / у чудотворнаго гроба его / духовный составим лик, глаголюще: / радуйся, похвало наше и упование, / и земли нашея жертва Богу благоуханная, / моли в мире пребывати всем, / православно чтущим святую память твою.
Благоверия образ, / в княжении милосердаго начальника, / вдов и сирот предстателя, / нищих питателя и скорбных утешителя, / иноков правило и целомудрия забрало, / душ и телес врача, / Богомудраго Олега воспоем, / той бо таланты Богоданныя добре умножив, / в радость Господа своего вниде / и дерзновенно молится о душах наших.

Слава глас 8:
На земли живя, выну к Небесным взирал еси, / Олеже Богоблаженне, / ныне же с Горних высот призри на ны, / любовию тя призывающия, / православным христианом споборствуй, / воинству нашему победы на супостаты испроси, / град Брянск и обитель твою присно покрый, / молитвенниче наш усердный и скорый помощниче.
И ныне, праздника.

На стиховне глас 4:
Мирския суеты Христа ради отрешився, / первую в земли Брянстей обитель монахов устроил еси, святе Олеже, / во имя первоверховных апостол, / яко камень краеугольный веры православныя, / на немже доныне утверждающеся, / козни вражия заступлением твоим побеждаем.
Стих:Честна пред Господем / смерть преподобных Его.
Мощи твоя честныя, преподобне княже Олеже, / в годину безбожных гонений / под спудом от поругания сохрани, / ныне же паки на свещнице обители твоея / яви нам чудес Бог, / освящая и озаряя благодатною помощию / верою к ним притекающих.
Стих: Блажен муж, бояйся Господа, / в заповедех Его восхощет зело.
От юности стяжав разум Богопросвещенный / чтением Божественных словес и житий отеческих, / навыкл еси подражати святых подвигом, / учение правды яко питие, / делание же заповедей яко пищу духовную имея, / темже Безсмертныя Трапезы ныне наслаждаешися.
Слава, святаго, глас 6:
Славу мира сего тленнаго / непреложно отвергнув, / о спасении Богом врученных ти людей / в келлии монашестей сердцем отечески болезновал еси, / молитвою теплою милость Божию призывая, / всем был еси вся, подобно Павлу апостолу, / ближних тяготы нося и не себе угождая, / темже достойно прославляешися, Олеже приснопамятне.
И ныне, праздника.

Тропарь глас 8:
От юности возлюбив Христа всем сердцем, преподобне, / славу земную, яко преходящу оставил еси, / и царство земное в ничтоже вменив, / лику иноков радостно сопричтился еси, / и труды многими град Брянск аки солнце пресветло озарил еси; / тем, быв Троицы вселение, / моли, княже Олеже, Христа Бога \ спастися душам нашим.
НА УТРЕНИ
По 1-м стихословии седален, глас 7:
Виноград, благодатию Божиею насажденный, / честныя мощи твоя, преподобне княже Олеже, явишася/ и оплот обители огражденный, / да в делании заповедей подвизаемся по образу твоему. / Мы же, нерадивии, кий ответ дадим Господу о плодех? / Молися о нас, да покаяние слезное принесше, / дерзновение получим в день Страшнаго Испытания.
Слава и ныне, праздника.
По 2-м стихословии седален, глас 8:
Течение земное добре скончав, / веру соблюл еси непорочну, отче Олеже, / темже прослави тя Бог в чудесех, / Егоже моли даровати нам грехов прощение, / воинству нашему на враги победы, / плененным свобождение, миру умирение / и Церквам в Православии соединение.
Слава и ныне, праздника.
Величание: Ублажаем тя, / преподобне княже Олеже, / и чтим святую память твою, / наставниче монахов / и собеседниче Ангелов.

Псалом избранный:
1 лик: Блажен муж, бояйся Господа, сильно на земли будет семя его.
2 лик: Закон Бога в сердце его и не запнутся стопы его.
1 лик: Постави его господина дому своему и князя всему стяжанию своему.
2 лик: Божии державнии земли зело вознесошася.
1 лик: О, Господи, аз раб Твой.
2 лик: Сохрани душу мою, яко преподобен есмь.
1 лик: Покрых постом душу мою.
2 лик: Изсше яко скудель крепость моя.
1 лик: Аз к Богу воззвах, и заутра, и полудне.
2 лик: Слезами моими постелю мою омочу.
1 лик: Восхвалятся преподобнии во славе, и возрадуются на ложах своих.
2 лик: Честна пред Господом смерть преподобных Его.
1 лик: Хранит Господь души преподобных Своих.
2 лик: Хвалите Господа, князие, пойте Господеви, преподобнии Его.
По полиелеи седален, глас 4:
Красуйся и ликуй, Брянская земле, / и да играют чада твоя в тебе, / светло торжествующе память преподобнаго князя Олега, / общаго нашего отца и молебника, / всех бо притекающих к нему утешает / и в православном благочестии утверждает.
Слава и ныне, праздника.
Степенна, 1-й антифон 4-го гласа.
Прокимен, глас 4: Честна пред Господем / смерть преподобных Его. Стих: Что воздам Господеви о всех, яже воздаде ми?
Всякое дыхание.
Евангелие от Матфея, зачало 43.
По 50-м псалме стихира, глас 6:
Яко добраго древа князей Русских благий плод, / преподобне княже Олеже, / стопам святых сродник твоих последовал еси, / в княжении благоверие соблюдая, / во иночестве добродетельми благородие души являя, / сего ради, яко имаши дерзновение ко Христу Богу, / моли даровати Отечеству нашему мир / и душам нашим велию милость.

Канон глас 4.
егоже краегранесие: Заступника земли Брянския верою чтим.
Песнь 1
Моря чермную пучину / невлажными стопами, / древний пешествовав Израиль, / крестообразныма Моисеовыма рукама, / Амаликову силу в пустыни победил есть.
Заступника теплаго Брянския земли, / князей похвалу и монахов удобрение, / преподобнаго Олега воспоим, /той бо силою Креста / страсти и безплотныя враги победил есть.
Ангельски на земли пожил еси, княже Олеже, / благаго корене князей Черниговских доброплодная отрасль быв, / и яко воевода Небеснаго Царя, / Отечество наше ныне ограждаеши.
Смирению Царя царствующих подражая, / власть и честь, славу и богатство Христа ради во уметы вменил еси / и слезами постническими велиарову гордыню потопил еси.
Богородичен: Твоего Печерскаго образа в пределы Брянския пренесение / и родителя своего от слепоты исцеление зря, / князь Олег воспеваше благодать Твою, Пречистая.
Песнь 3
Веселится о Тебе Церковь Твоя, Христе, зовущи: / Ты моя крепость, Господи, / и прибежище, и утверждение.
Утвердил еси землю и люди твоя в вере православной, / преподобне Олеже, / княжением Богозаконным и подвиги монашескими.
Первую в земли Брянстей обитель во имя первоверховных апостол основал еси, святе Олеже, / яко камень краеугольный веры.
Нивы новонасажденныя делатель усердный явился еси, / Богорачительный княже, / мы же ныне славныя плоды трудов твоих пожинаем.
Богородичен: Источник исцелений близ Свены реки открыся — / чудотворная икона Богоматере, / Еяже благодатию укрепляемь, / князь Олег мир конечне оставил есть.
Седален, глас 8:
Смиренномудренно царства земнаго удалився, / во иноцех тезоимением царским наречен был еси, княже Олеже, / во знамение уготованнаго ти Небеснаго Царства, / идеже ныне, яко царское священие, / возвещаеши Христа Бога, / призвавшаго тя в чудный Свой Свет.
Слава и ныне, праздника.

Песнь 4
Вознесена Тя видевши Церковь на Кресте, / Солнце Праведное, / ста в чине своем, достойно взывающи: слава силе Твоей, Господи.
Крест свой взем, себе и мира отверглся еси, / преподобне Олеже, / и вся козни вражия силою возлюбившаго тя Христа победил еси.
Агарян древле и зловерных нахождению / паче меча молитвою противостал еси, / и ныне Отечество наше от сих заступлением твоим избави.
Земля Брянская красуется древом, / питающим нас и покрывающим,— / Олегом Богомудрым.
Богородичен: Егда иноцы созданныя тобою, княже Олеже, обители апостолов / принесоша от Киева икону Пречистыя, / тогда сила Ея в чудесех явися.

Песнь 5
Ты, Господи, мой Свет, / в мир пришел еси, / Свет Святый, обращаяй из мрачна неведения / верою воспевающия Тя.
Мечем Божиим обоюдоострым именуем тя, / яко душевредная посекаеши, / в княжении — благоверием, / во иночестве — преподобием.
Лице твое в час кончины просветися, Богоблаженне Олеже, / и яко благий раб и верный / в радость Господа твоего вшел еси.
Избавляеши от бед в нощи греховной блуждающих, / Неба церковнаго кроткая звездо, / и к Свету Невечернему наставляеши, / Олеже Богоносне.
Богородичен: Благословенная Владычице, / просвети нас светом Сына Твоего, / якоже древле очи Благовернаго князя Романа.

Песнь 6
Пожру Ти со гласом хваления, Господи, / Церковь вопиет Ти, / от бесовския крове очищшися, / ради милости из ребр Твоих истекшею Кровию.
Русская Церковь днесь всех созывает к похвале угодника Христова, / преподобнаго князя Олега, / от земли Брянския Отечеству нашему возсиявшаго.
Явился еси, преподобне Олеже, / Православныя веры правило, монахов образ, / людем предстатель теплый, / граду и обители твоей ограждение.
Небесное наследие и чудес благодать, / возмездие трудов твоих от Бога приял еси, святе Олеже, / темже не престай милостивно посещати тя почитающия.
Богородичен: Свенския иконы Богоматере явление чудное видев, / купно со отцем своим, освященным собором и всеми людьми / князь Олег благодарение Богу возсылаше.

Кондак, глас 2:
Заступниче теплый Брянския земли, / преподобне княже Олеже, / купно со святыми сродники твоими / Престолу Божию ныне предстоя, / молитвами твоими Православие утверди, / ереси и расколы разори, / Отечеству нашему мир / и душам нашим полезная испроси.
Икос:
Отверзи честная уста твоя, Олеже благородне, / и тайно глаголи во ушеса сердец наших, /како трудом равноапостольнаго Владимира ревнуя, / обитель первоверховных апостол во граде Брянске основал еси, / како подобно Николе Святоше и Игорю Страстотерпцу мира отверглся еси, / како, последуя прадеду Михаилу, безкровное мученичество в монашеских подвизех восприял еси / и благочестие родителя твоего наследовал еси. / О цвете прекрасный древа великаго Русских князей! / Молитвами твоими Православие утверди, / ереси и расколы разори, / Отечеству нашему мир / и душам нашим полезная испроси.
Песнь 7
В пещи Авраамстии отроцы персидстей, / любовию благочестия паче, / нежели пламенем опаляеми взываху: / благословен еси в храме славы Твоея, Господи.
Княжение, и род, и богатство оставив, подвизался еси боголепно в монашестем чине, отче Олеже, / тем и ныне с преподобных лики радуешися.
Избавитися езера огненнаго / моли Человеколюбца Бога / всем, почитающим любовию святую память твою, / преподобне княже Олеже, / и добродетелем твоим подражающим.
Якоже злато огнем, / душу и тело искусив воздержанием, / вниманием, и молитвою, и сердечным безмолвием, / в порфире чистоты над страстьми царствовал еси.
Богородичен: Вся, елика виде исцеленныма очима князь Роман, / окрестныя земли обители Твоей, Владычице, дарова, / сын же его себе самаго / в жертву Сыну Твоему принесе.
Песнь 8
Руце распростер Даниил, / львов зияния в рове затче: / огненную же силу угасиша, / добродетелию препоясавшееся, / благоченстия рачители отроцы, взывающее: благословите вся дела Господня, Господа.
Елико велик в православном княжении был еси, / толико в монашестем делании смирил еси себе, преподобне Олеже, / темже и Бог тя превознесе и дарова ти чудес благодать; / сего ради благословим о тебе Господа во веки.
Ревность велию показал еси ко благочестию, / преизряден быв образ людем и учеником твоим, / от младенства бо воспитався в законе Господни, / чрез все житие волю Божию исполнити тщашеся.
Одеяния худость не омрачи девственныя красоты души твоея, Богоблаженне Олеже, / бдением же душевнеи твои очи просветися, / и труды тяжкими плоть твою духу покорил еси.
Богородичен: Юже древле избрала еси гору в пределех Брянских во обитель иноком / и образом Твоим Свенским освятила еси, Пренепорочная, / невредиму сохрани, / да воспевается в ней имя Сына Твоего во веки.

Песнь 9
Камень нерукосечный / от несекомыя горы, Тебе, Дево, / краеугольный отсечеся, / Христос, совокупивый разстоящаяся естества, / тем, веселящееся, Тя, Богородице, величаем.
Чаянием будущих благ веселяся, / тесным и скорбным путем идяше, / воздержанием и кротостию, смирением же и послушанием / лику святых присвоился еси, / с ними же тя величаем.
Трудолюбное по Бозе житие от юности возлюбив, / преподобне княже Олеже, / в меру возраста Христова достигл еси, / и яко класс зрелый в Небесныя житницы пожался еси.
Имамы святыя мощи твоя, Богоносне отче Олеже, / яко ограду тверду граду Брянску и обители твоей, / и сокровище неистощимое исцелений душам и телесем, / темже тя величаем.
Богородичен: Мати Божия Пречистая, / молит Тя преподобный князь Олег со всеми святыми сродники нашими, / спаси землю Русскую и верныя люди Твоя утеши, / да Тя вси величаем.
Светилен:
Утреневав к Богу присно, / тьмы вечныя избегл еси, преподобне княже Олеже, / сего ради в час кончины лице твое просветися, / и мощи твоя честныя доныне сияют нетлением и чудесы.
Слава, и ныне, праздника.
На хвалитех, глас 5:
Церкве Христовы похвала высокая, / града Брянска стена необоримая, / державы Русския Божественное утверждение, / преподобный князь Олег ныне прославляется; / той бо делы веры Православныя / на свещнице княжения возсия, / совершен же хотя быти, / себе и мира отвергся / и благочестием Царствие Небесное наследова.
Хвала Богу благодействующу,— глаголаше, святе Олеже, / на смертном одре возлежа,— / зрю уже брег моря житейскаго, / имже доселе ношашеся моя утлая ладия. / Лице же твое радостию небесною просветися, / и скорбь учеников утешением сим растворися. / Мы же, очима веры зряще нетленную красоту души твоея, / похвальная ти воспеваем.
Блажен град твой, / блаженна и обитель, созданная тобою, / идеже подвизатися изволил еси, / Богоносне отче Олеже, / и по смерти мощи твоя святыя оставил еси, / к нимже припадающе, усердно молим тя: / не отступай от нас духом, / побори борющия ны видимыя и невидимыя враги, / да присно о тебе Бога хвалим.
Слава, глас 6.
Подобен: Все отложше:
Яко заря утренняя, в дебрех Брянских возсиял еси, / преподобне Олеже, / князей Российских украшение, / евангельски два поприща скончал еси; / в княжении — благоверием, / во иночестве — преподобием, / темже и сугубый венец / от Господа восприял еси, / Ему же тепле молишися / о душах наших.
И ныне, праздника.

НА ЛИТУРГИИ
Прокимен, глас 5: Блажен муж, бояйся Господа, в заповедех Его восхощет зело. Стих: Сильно на земли будет семя его, род правых благословится.
Апостол к Галатом, зачало 213. Аллилуиа, глас 8
Стих: Терпя потерпех Господа, и внят ми, и услыша молитву мою.
Стих: Божии державнии земли зело вознесошася. Евангелие от Матфея, зачало 81.
Причастен: В память вечную будет праведник: