Святые

Канон преподобномучеником. Глас 4-й.

Песнь 1-я.

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама/ Амаликову силу в пустыни победил есть.

Агнче Непорочне, Слове Божий,/ отверзи ми устне недостойнии,/ да возмогу воспети новыя преподобномученики Твоя,/ Серафима и Феогноста всехвальныя.

Были есте пустыннаго Кызылжарского урочища/ на горах Тяньшанских жителие/ и Небеснаго Царствия наследницы страданием вашим явилися есте./ Темже Христу Богу представ, радуяся, воспели есте:/ славно бо прославися.

Делателие блаженнии бывше заповедей Господних,/ Пресвятому Духу селения достославная себе устроиша/ и Ангелов явилися есте собеседницы/ и человеков наставницы,/ поюще Богови: славно бо прославися.

Богородичен: Всечистая Богородительнице, Дево Владычице Всепетая,/ моли Егоже родила еси, Бога и Царя нашего,/ да милостив будет нам в день Судный.

Песнь 3-я.

Ирмос: Не мудростию, и силою, и богатством хвалимся,/ но Тобою Отчею Ипостасною Мудростию Христе;/ несть бо Свят, паче Тебе, Человеколюбче.

Сокрушенною совестию Богу угодивше,/ сокрушисте вражия величания, блаженнии,/ в Небесная селения мучением вашим внидосте,/ радуяся вопиюще:/ несть Свят и несть праведен, паче Тебе Господи, Человеколюбче.

Отец лжи и человекоубийца искони диавол/ наведе на вы лукавых человек разбойническим нашествием,/ вы же преподобнии,/ первее слез ваших теченми фараона мысленнаго победивше,/ последи же и в ковных потоцех ваших того сокрушили есте,/ Избавителю и Богу нашему вопия:/ несть Свят и несть праведен, паче Тебе Господи, Человеколюбче.

Иногда преподобнии отцы в Синаи и Раифе/ избиени быша от неверных,/ выже прехвальнии, в последняя сия времена/ от безбожных разбойнически умерщвлены за Христа./ Тем радуетеся с постники Христовыми и мученики, поюще:/ несть Свят и несть праведен, паче Тебе Господи, Человеколюбче.

Богородичен: Неизреченно родила еси Отчее Слово Ипостасное,/ Егоже моли Богородице Пречистая,/ избавити от бед и скорбей рабы Твоя,/ верою и любовию Тя призывающия.

Седален. Глас 4-й.

Яко пришельцы явльшеся/ и присельницы на земли,/ кущи поткоша в горней Кызылжарской пустыне/ преподобнии Серафиме и Феогносте/ постнически подвизастеся/ и добродетелей духоносными одеждами украсистеся,/ сообразни бывше Христовым страстем./ Сего ради претерпесте мученическое заколение.

Слава, и ныне, Богородичен, Глас тойже:

Милосердия сущи источниче,/ не лиши и нас милости Твоея, Богородительнице,/ но присно о нас Владыку всех и Господа моли:/ свободити нас от врагов, борющих ны,/ в православнем благочестии утвердити/ и пристанища небурного спасения достигнути.

Песнь 4-я.

Ирмос: Вознесена Тя видевши Церковь на Кресте,/ Солнце праведное,/ ста в чине своем/ достойно взывающи:/ слава силе Твоей, Господи.

От юности утреневав Христу, Солнцу правды,/ тьмы избегли есте телесных страстей воздержанием,/ и умную чистоту безстрастием стяжав,/ Духа Святаго вместилища благоуханные явилися есте,/ Имже в сердцах ваших пели есте:/ слава силе Твоей, Господи.

Воздержания в житии вашем восприяв правило,/ яко безплотныя во плоти явилися есте,/ смирение и кротость, и молитву неоскудную/ и стояние всенощное, и веру истинную,/ и любовь нелицемерную исправили есте, блаженнии./ Темже мученически от земли к небеси прешедше,/ со Ангелы водворяетеся, воспевая:/ слава силе Твоей, Господи.

Божественныя Святаго Духа зари разумно приемля,/ Трисиянного и Трисолнечнаго Божества обители были есте чистии,/ всеблаженнии Серафиме и Феогносте, преподобнии./ Ангелы споспешники имея,/ и путь мученический, вводящий к Божественному покою, прошедше,/ радостно воспевали есте:/ слава силе Твоей, Господи.

Богородичен: Обновляет человеческий род Превечнаго Света Ангел,/ явлься от Девы, и человек быв./ Тому вернии возопиим:/ слава силе Твоей, Господи.

Песнь 5-я.

Ирмос: Ты Господи мой, Свет/ в мир пришел еси,/ Свет святый, обращаяй из мрачна неведения/ верою воспевающия Тя.

Христову Престолу во славе ныне предстояще,/ венценоснии страстотерпцы,/ светоносную нам зарю/ и духовную благодать с Небесе низпошлите/ благоприятными вашими, преподобномученицы, молитвами.

Идеже мучеников собори,/ идеже всех святых святое упокоися множество,/ идеже праведных дуси и Церковь перворожденных,/ ныне на Небесех веселитеся воистинну, яко новомученицы/ преподобнии Серафиме и Феогносте./ Темже вси вас верою и любовию ублажаем.

Добрый жития подвиг ваш скончавше,/ и веру непорочну соблюдше,/ венцы нетленныя от Бога прияли есте, блаженнии./ И зерцалам разрешенным лицем к лицу Святую Троицу зрите/ Ейже со всеми святыми молитеся о чтущих память вашу, преподобномученицы.

Богородичен: Страстей моих утиши бурю,/ неусыпною твоею молитвою/ Дево Пречистая, молю Тя:/ и не даждь ми сном тяжким и греховным уснути.

Песнь 6-я.

Ирмос: Пожру Ти со гласом хваления Господи,/ Церковь вопиет Ти,/ от бесовския крови очищшися,/ ради милости от ребр Твоих/ истекшею кровию.

Во едино естество Божественныя Троицы веровав православно,/ Богодухновенными наставлении вашими в правоверии верных утверждая,/ наследия Небеснаго сподобилися есте,/ духоноснии отцы, Ангелов сослужителие,/ память вашу празднующих в мире и благочестии соблюдите.

Преподобномученицы Серафиме и Феогносте,/ от юности жалом любве Божия уязвишеся,/ уподобилися есте купцу, ищущему добраго бисера,/ и пчеле люботрудней,/ облетающей лугов множества пресладкаго ради меда благочестия/ и Христа Бога приимше в сердца ваша,/ приидосте к Свету незаходимому/ и сынове дне показастеся.

Священнопобедныя венцы, яко страдальцы Христовы приимше, преподобнии,/ приложилися есте от земли к миру нератному,/ и Свету и Животу истинному/ тем от соблазн житейских/ и страстей, стужающих ми, свободите мя/ и память вашу достойно воспети сподобите, блаженнии.

Богородичен: Унынием мя обдержима/ воздвигни к действу, Пречистая, Божественных деяний,/ укрепляющи мя на враги присно борющия мя люте/ и противными помышлении льстящия ми.

Кондак. Глас 2-й.

Благое иго Христово на себе восприимше,/ и легкое бремя Его любовию облобызавше,/ житием своим Агнца Божия проповедавше,/ за истину, радуяся, пострадали есте,/ и в покой Небесный прешедше,/ с лики святых престолу Божию предстоите,/ преподобномученицы Серафиме и Феогносте,/ граду Алма-Ате испросите мир/ и всем чтущим вас велию милость.

Икос. Глас 8-й.

Во страданиях веру Христову исповедавших/ преподобномучеников Серафима и Феогноста ублажаем и почитаем днесь, вернии,/ яко любве евангельския служителей,/ чистоты душевныя и телесныя хранителей,/ правды Божиея ревнителей,/ и житием сих и кончиною назидаеми, поим:/ радуйтеся молитвенницы наши и заступницы, от Бога прославленныя.

Песнь 7-я.

Ирмос: В пещи авраамстии отроцы персидстей,/ любовию благочестия паче,/ нежели пламенем опаляеми, взываху:/ благословен еси в храме славы Твоея, Господи.

Кровными теченми на земли/ и ран добротою удобряеми,/ Победотворцу и Подвигоположнику Христу на Небеси предстали есте,/ победы почести от Него приемлюще,/ преподобномученицы Серафиме и Феогносте,/ и Тому радостно воспели есте:/ благословен еси в храме славы Твоея, Господи.

Милосердия нас Божественнаго, преподобномученицы, сподобите,/ искушений и бед избавляя, верою и любовию вас почитающия/ и под кров молитв ваших приходящия,/ и Господеви поющия:/ благословен еси в храме славы Твоея, Господи.

Противу злобы гонящих вас, преподобнии,/ незлобивы и просты явилися есте,/ и крове пролиянием в кончине жития/ венцы нетления от Бога увенчаны есте,/ со инеми добровенчанны мученики Христовы поюще:/ благословен еси в храме славы Твоея, Господи.

Богородичен: Адамова Избавителя и всего человеча рода Спасителя/ Ты, Пресвятая Мати Дево, родила еси плотию,/ Иже прежде век Сый, рожден от Отца,/ Той дарует миру нетление и смерть упраздни,/ Ем cже вся тварь вопиет:/ благословен еси в храме славы Твоея, Господи.

Песнь 8-я.

Ирмос: Руце распростер Даниил,/ львов зияния в рове затче,/ огненную же силу угасиша,/ добродетелию препоясашеся,/ благочестия рачители/ отроцы взывающе:/ благословите вся дела Господня Господа.

Закону повинуяся Благодати Владычни,/ ваша преклонили есте выя монашествующих борению/ к незлобию достигли есте совершенному,/ преподобномученицы всеблаженнии,/ и пение Богу возсылати со Безплотными сподобилися есте:/ благословите вся дела Господня Господа.

Пострадав законно на земли,/ за Пострадавшаго спасения ради нашего Господа Иисуса/ Небесный обрели есте покой, преподобнии, со святыми,/ и сопричастницы веселия и радости Ангельстия явилися есте, поюще:/ благословите вся дела Господня Господа.

С мученики Христовы сочетаеми/ и с лики преподобных вчиняеми, достославнии,/ непрестанно песнь хвалебную возсылаете Церкви Зиждителю/ и молитеся Человеколюбцу Христу о нас восхваляющих вас и глаголющих:/ благословите вся дела Господня Господа.

Богородичен: Воплощается безплотный прежде,/ и Содетель зиждется из Тебе, Всенепорочная,/ и в пречистая ложесна Твоя вшед Непостижимый,/ описанием плотским хотя объятися./ Темже вси Тя благословим, Марие Богоневесто.

Песнь 9-я.

Ирмос: Камень нерукосечный/ от несекомыя горы Тебе, Дево,/ краеугольный отсечеся,/ Христос, совокупивый разстоящаяся естества,/ Тем веселящися Тя, Богородице, величаем.

Предстатели за нас изрядны ко Пресвятей Троице/ вемы вы, преподобномученицы,/ еще бо на земли суще, дерзновенно за люди Богу молилися есте./ Ныне же сугубую восприявше благодать,/ с ликостоянии святых воспеваете песнь Трисвятую/ и просите нам к жизни временней и вечней полезная./ Темже вы по долгу величаем и ублажаем, приснопамятныя.

О пречудныя и кроткия страстотерпцы Христовы,/ небесную славу восприимши/ земных нас не оставляете,/ просяще нам у Бога милость и благодать,/ утверждая нас в вере, надежде и любве/ и достойно христианскаго звания ходити научаете./ Темже вы по долгу величаем и ублажаем, богоблаженныя.

Духа Святаго селения преукрашенная были есте, преподобномученицы,/ чистоту сердечную и телесную опасно храня даже до смерти,/ веру непорочну в страдании вашем, яко злато в горниле очистиша,/ яко соуз совершенства любовь христианскую/ в житии вашем и даже до днесь всем являете,/ якоже Христос повеле./ Темже вы по долгу величаем и ублажаем, всеблаженныя.

Богородичен: Свет рождшая безлетный, возсиявый от Отца,/ просвети мою, Отроковице Марие, душу и ум,/ далече от мене отгоняющи тьму, Дево, страстей:/ да Тя непрестанно ублажаю, Присноблаженную.

Светилен. Глас 8-й.

Священная и Богомудрая двоица преподобных отец и пречудная,/ на земли целомудренно и праведно пожившая, Христу работая,/ слез теченми в безмолвии пустыни постнически испытавшеся,/ верою твер дою, надеждою несумненною и любовию истинною вооружившеся,/ кровь свою пролияли есте./ Светом Пресвятыя Троицы просвещаеми,/ и с лики святых светозарному Тоя престолу предстоите./ Темже чтуще честная подвиги и страдания ваша,/ любовию вопием: радуйтеся преподобномученицы Серафиме и Феогносте,/ молитвенницы наши и заступницы, от Бога прославленныя.

Слава, и ныне, Богородичен:

Лучезарный облак сущим во тьме греховней Ты еси Богомати Пречистая,/ из Тебе бо пройде Христос Бог, Солнце Правды,/ и озари всю тварь Боговедением./ Темже молися о всех омраченных Светодавцу Спасу, Сыну Твоему.

Молитва

О, Богоблаженная двоице друзей Христовых, преподобнии страстотерпцы Серафиме и Феогносте! Казахстанския страны светильницы достопочтенныя, града Алма-Аты защитницы и покровителие Богодарованные, православных всех неусыпныя наставницы! На небеси Богопросвещенными душами вашими престолу Божию предстоящии, на земли же мученически за Христа пострадавшими телесы вашими на горах Заилийских почивающия и различная дарования духовная всем с верою и любовию к вам приходящим источающия! Милостивым призрением благосердия вашего призрите на люди, святую память вашу почитающия, на месте исповеднических подвигов и преподобнических трудов ваших святый гроб ваш обстоящия и теплаго вашего ко Господу ходатайства во обдержащих нуждах просящия. Вси бо мы по множеству грехов наших не дерзаем возвести на Небо очес наших, долу поникших, вы же, яко стяжавшии дерзновение ко Господу и ныне со Ангелы Ему предстоящии, принесите о нас благоуханные молитвы ваша, во еже избавитися нам от глада, потопа, труса, огня, меча, нашествия иноплеменник и междоусобныя брани, от всякия скорби, зол и болезни душевныя и телесныя от людей и диавола по грехам нашим бывающия. Да сих избежавше, Господу усердно работающе, молитвами вашими и теплым предстательством внидем в нескончаемый покой Царства Небеснаго и тамо с вами и лики всех святых прославим Великое Имя Святыя Троицы, Отца и Сына и Духа Святаго во веки веков. Аминь.