Православная молитва - Православная книга

9 июня (по старому стилю 27 мая)

Память святых угодников Божиих:
праведного Иоанна Русского, исповедника; святителей Московских Киприана, Фотия и Ионы (перенесение мощей); преподобного Нила Столобенского; мученицы Феодоры девы, Александрийской, и мученика Дидима воина; священномученика Ферапонта, епископа Сардийского; преподобного Ферапонта, Белоезерского, Можайского; преподобного Ферапонта Монзенского.

Поздравляем именинников!

Тропарь, глас 4 (праведному Иоанну Русскому, исповеднику):
На Небеси предстоя Святей Троице, праведне блаженне Иоанне, земный Ангеле, Божий человече, с безплотными лики славословиши любовь неизреченную, в Церкви первородных со святыми водворяяся, о нас, сущих на земли, возносиши молитвы к Содетелю всех и Спасу, да подаст мир всему миру, Церквам на земли благостояние и соединение всех, чтущих Сына Божия, во плоти пришедша, во Святем Теле Христа Иисуса, еже есть Церковь Бога Живаго, во спасение рода человеческаго.

Кондак, глас 4 (праведному Иоанну Русскому, исповеднику):
Евангельския любве служителя, правды Божия ревнителя, чистоты душевныя и телесныя хранителя, веру Христову исповедавша в страданиих, праведнаго Иоанна ублажаем и почитаем днесь и, житием его назидающеся, поем: радуйся, молитвенниче наш, от Бога прославленный.

Тропарь, глас 8 (святителям Киприану, Фотию и Ионе, митрополитам Московским, чудотворцам):
Яко светлаго Солнца светозарныя звезды, Троическим Светом озяряете сердца верных, пренесением честных мощей ваших. Троицы сосуди явистеся чистии вашим житием, и научисте люди твердо вере Христове, и скверну отошлете вашими святыми заповедьми, и упасесте добре Христово стадо, порученное вам, богомудре Киприане со славным Фотием и со Ионою твердым, молитеся Христу Богу, да спасет души наша.

Кондак, глас 8 (святителям Киприану, Фотию и Ионе, митрополитам Московским, чудотворцам):
Яко трие велиции светила явистеся, озаряюще всю подсолнечную Богоданною вам благодатию чудес, и просветисте молитвами своими верных сердца, вашу память чтущих честнаго пренесения. И Владыку Христа, всех Творца, молите стране нашей на враги победу подати, яко имуще дерзновение, и нам просите велия милости, вопиющим к вам: радуйтеся, поборницы по Христове Церкви и многочестная светила, святителие славнии.

Тропарь, глас 4 (преподобному Нилу Столобенскому):
Яко светильник всесветел явился еси во острове Селигера езера, преподобне отче Ниле; ты бо Крест Христов от юности своея на рамо взем, усердно Тому последовал еси, чистотою Богови приближився, отонудуже и чудес дарованием обогатился еси. Тем и мы, притекающе к раце мощей твоих, умильно глаголем: отче преподобне, моли Христа Бога спастися душам нашим.

Кондак, глас 8 (преподобному Нилу Столобенскому):
Отечества, преподобне, удалився, в пустыню вселился еси, и на остров Селигера езера возшед, жестоко житие показал еси, и многих добродетельми удивив, дарования чудес от Христа приял еси. Поминай нас, чтущих память твою, да зовем ти: радуйся, Ниле, отче наш.

Тропарь, глас 4 (преподобному Ферапонту Белоезерскому, Можайскому, Лужецкому):
Житием чистым просветився, в молитвах и постех пустыни явился еси доброе прозябение и, духовному твоему учителю последствуя, ум свой к Небесным управль, стаду твоему наставник был еси, тем тя молим, отче Ферапонте: моли Христа Бога спастися душам нашим.

Кондак, глас 8 (преподобному Ферапонту Белоезерскому, Можайскому, Лужецкому):
Христовым желанием распалився, страсти плотския воздержанием оттряс, постническое стяжав жительство, преподобне; сего ради Господь труды твоя видев, даром чудес обогати тя, источаеши бо исцеления и молишися о нас к Богу, мы же, радующеся, вопием ти: радуйся, Ферапонте, отче наш.

Тропарь, глас 8 (преподобному Ферапонту Монзенскому, Галичскому):
Любовию Христовою, богомудре, просветився, добродетельми Василию блаженному подражал еси, всякое же наслаждение плотское возненавидев и в пустыню вселився, тамо вельми подвизался еси, в жизни сей временней плоть умерщвляя свою в пениих и во бдениих, и в пощениих; темже и Христос даром чудес обогати тя. Но поминай убо нас, чтущих пресветлую память твою, преподобне отче Ферапонте, и моли Христа Бога спастися душам нашим.

Кондак, глас 8 (преподобному Ферапонту Монзенскому, Галичскому):
Возложив себе Богу от юности, преподобне, Того паче всех возлюбив, и Тому от всея души любовию последовал еси, тленная и красная мира нивочтоже вменив, в пустыню вселився, в нейже добре подвизался еси противу невидимых врагов козней и, яко светозарное солнце, в концех Галическия земли возсиял еси, отонудуже, веселяся, прешел еси к Небесным обителем, и ныне со Ангелы Владычню Престолу предстоя, поминай нас, чтущих память твою, да зовем ти: радуйся, Ферапонте, отче наш.

Православная книга почтой pravmolitva.ru