Редкие Богослужебные тексты

Служба святителю Павлину Милостивому, епископу Ноланскому (†431), составленная святым священномучеником Петром Григорьевым (†1937, память 10 (23) сентября), воспроизводится по изданию: «Вестник русского христианского движения», № 3-4 (132) за 1980 г. (стр. 7 – 17). Исследователи предполагают, что эту службу и акафист святителю Павлину свщмч. Петр написал для свщмч. Павлина (Крошечкина), архиеп. Могилевского (†1937), под омофором которого св. Петр служил в 1921 – 1926 гг. Святитель Павлин был Небесным покровителем в постриге архипастыря-новомученика. «Когда читаешь службу св. Павлину Ноланскому, написанную прот. Григорием Петровым (на самом деле свящ. Петром Григорьевым — u.), ясно видишь духовный облик архиепископа Павлина, всей своей жизнью подражавшего житию своего ангела. Его твердость, глубокий ум, большая культура и активность — образец для подражания» (Н. Шеметов).
Служба святителю Павлину, епископу Ноланскому
На велицей вечерни
На Господи воззвах: стихиры на 8, глас 6:
Днесь торжествуют мира концы,/ празнующе память святителя великаго, / и радуется вся вселенная, / величающи Павлина божественнаго // яко образ совершеннаго на земли жития.
Многоводная реко, / чудес волнами шумящая / и милости струи источающая, / явился еси, Павлине. / Крепка, паче смерти, любовь твоя / и яснее солнца твое милосердие, // тем же, лучами твоими озаряеми, радуемся.
Авзония, славнаго ритора, учениче, / славу и премудрость мира/ отвергл еси / и в горах Пиренейских/ уединился еси, / глубину мудрости своея/ Христу посвятив, / темже писании твоими укрепляема, // Церковь радуется.
Сокровище века златаго церковнаго / был еси, святителю. / В творении песней духовных потрудися / и множество благолепных икон написа. / Провидя же издалече духом веры / грядущую ересь иконоборную, / почитати святыя образы и мощи// всех поучаше.
Глас 8:
Аще и умре святитель Павлин, / обаче любы его во веки не отпадет, / почерпайте вси изобильно/ милости его, вопиюще:/ Прииди к нам от небесных высот, / посети наши скорби/ данною ти от Господа благодатию, / миром и радостию/ и умилением обогащая, // и научи в терпении тебе подражати.
Слава, глас той же:
Аще кто хочет быти болий, / да будет всем слуга, — / глагола Христос,/ учеником ноги омывая. / Тако и Павлин верным проповедует, / той бо первее/ все имение бедным расточи, / с супругою глад и лишения терпя, / напоследок же и себе в рабство преда, / воистину возлюбив своих до конца, /Ты же, Господи, //вразуми нас его добродетелем подражати.
И ныне, догматик.
Паремии святителя.

На литии стихиры, глас 5:
Яко звон колокольный, / из глубины первых веков / богословский глас твой/ Истину проповедует, святителю,/ еяже до днесь хранит нерушимо / Православная Церковь Христова. / Мы же с тобою/ в вере утверждаемы, // Христу благодарение возносим.
В скудости ропщуще,/ воззрим, яко святитель волею обнища; / ищуще ясти изобилия, / воспомним, яко угодник Божий/ и последний свой хлеб раздаяше;/ страшащеся скорбей и бед,/ не забудем, /яко сей сам себе/ отдаде в рабство, / душу свою положив за други, / и обители вечныя у Христа обретый.// Святителю истинный, слава тебе!
Слава, глас тойже:
Что есть сильнее любве? / Сие слово утвердил еси, святителю, / сам возжелав пострадати,/ да страждующим свободу даруеши;/ горького плена не убоялся еси, / душу за овцы своя положив, / ныне со Христом пребываеши// во Свете Невечернем.
И ныне, Богородичен.

На стиховне стихиры, глас 2:
Днесь почитаем память/ в рабство предавшагося / и всего себя истощившаго страждущих ради, / днесь призываем в помощь// и по смерти бессмертнаго.
Стих: Честна пред Господем/ смерть преподобных Его.
Днесь святитель ризы епископства слагает, / и в рубище раба облекается, / и приносит новую жертву богоподобную, / себе отдает в тяжкое рабство, // даруя избавление сыну вдовицы.
Стих: Что воздам Господеви/ о всех, яже воздаде ми.
Днесь вопиет вдовица князю: / возьми свободнаго и отпусти раба, / верни мое чадо и поработи пастыря, / даждь ми сына и приими отца, / избави мя от сиротства/ и обогатися духовно, / яко предлагают ти// нетленный бисер Христов.
Слава, глас тойже:
Рабство твое, о Павлине, / свободы многим быть ходатайственно; / прозорливостию бо твоею вразумлен, / царь из плена отпускает// с тобою всех духовных чад твоих.
И ныне, Богородичен:
Мария Пресвятая, / от падений греховных сохрани нас, / Ты бо еси Голубица горелетная, // чада Свои под крыле собирающая.
Тропарь, глас 3:
Правило веры несокрушимыя / и образ милосердия Христова/ был еси, Павлине, / вся бо радости мира отринув, / за угнетенных в рабство предался еси. / Тем же любовию твоею озаряема, // вселенная славит тя.
Ин тропарь, глас 4:
Угодниче Божий милостивый, / святителю отче наш Павлине, / воистинну по самоизволению зрак раба приим / и тем Самому Христу последуя, / положил еси душу твою за люди твоя, и от злаго пленения тех избавил еси. / Свободи и нас молитвами твоими / от пленения страстей наших / научи нас милостивны к ближним своим быти, / да пребудет и к нам милостив Господь, / спасаяй души наша, яко благ и человеколюбец.

НА УТРЕНИ
По 1-м стихословии седален, глас 1:
Славу святых воспевати дерзаю / и добродетелем тех, увы, не подражаю, / но ты, угодниче предивный, / преобрази и просвети жизнь мою.
Слава, и ныне:
Владычице и Мати моя Пресвятая, / мене, грешнаго сына, / от вечныя погибели спаси.
По 2-м стихословии седален, глас 4:
Будут имущии жен, яко не имущия, / глаголет апостол, / сие слово в тебе утвердися, / святителю, темже ублажающе высоту жития твоего, / вопием ти: дух целомудрия подаждь нам.
Слава, и ныне:
Чистая Дево, очисти сердца наша / и возвыси умы, / омрачении смрадом страстей.
По полиелее седален, глас 2:
Благодатный угодниче Божий, / научи нас за други душу полагати, / гонений и уз не боятися, но дело Божие / трезвенно совершати.
Слава, и ныне:
Воздвигни мой ум, Обрадованная, к Небесному Царю, / да плотское мудрование отложив, / горе сердце мое вознесу.
КАНОН, глас 3.
Песнь 1.
Воды древле / манием Божественным / во едино сонмище совокупивый / и разделивый море Израильтеским людем, / Сей Бог наш / препрославлен есть. / Тому Единому поим, яко прославися.
Яко же ты сам потрудился еси / в писании песен духовных, / тако и ныне нас умудри / воспети твои подвиги, святителю.
В житии своем соблюл еси верность Господеви, / рабства и нищеты не убояся, / темже, святе, у Него испроси умножити и нам веру, / да не смущается сердце наше.
Ослабеваем дерзновением, / упования твердаго не имамы, / на твое же взирающе дивное житие, угодниче Божий, / духом обновляемся.
Богородичен: Владычице мира, святых Благая Собеседнице, / возглаголи сердцам нашим утешение.
Песнь 3.
Иже от несущих вся Приведый, / Словом созидаемая, / совершаемая Духом, / Вседержителю Вышний, / в любви Твоей утверди мене.
Купно со святителем Павлином / да почтется и супруга его Тарасия, / яко великая жена христианская, / обратившая мужа своего ко спасению.
Не имея чад своих, / воспитал еси убогих и сирот, блаженне; / научи и нас о бесприютных детех пещися // и разумети скорби их.
Посмеяния друзей не убоялся еси, / тя за отречение/ от мнимых утех мирских поносивших, / укрепи и нас без смущения // спасительное дело Христово совершати.
Богородичен: Молитвами безсеменно Рждшия Тя, Спасе, / даруй рабу Твоему / слово Твое и страх Твой,// да спасуся.
Седален, глас 7:
Странноприимец был еси, святителю, / воззри убо и на мя обнищавшаго, / сокровище добродетелей расточившаго, / и моли Господа прияти мя милостивно в Вечныя кровы, / утомленнаго странствием земным.
Слава и ныне:
Радуйся, Лествице, Иже Иаков виде, / к Небесному Отцу нас приводящая, / Богомати Пречистая.
Песнь 4.
Положил еси к нам твердую любовь, Господи, / Единороднаго бо Твоего Сына за ны на смерть дал еси. / Темже Ти зовем, благодаряще: / слава силе Твоей, Господи.
Хочет враг нас, яко пшеницу, христиан разсеяти, / но ты, добрый делателю Христов, / собери в небесныя житницы наследие твое.
Яко же во дни пленения и прочих бед / был еси утешитель паствы твоея, / сице и нас, печалию помраченных, / просвети надеждою на Бога.
Превыше Иова возсиял еси нищетою добровольною, / он бо и на гноище свободен пребысть, / ты же волею рабство приял еси, / да Христа приобщаеши навеки.
Богородичен: Возсиявшая миру Великое Солнце Христа, / сподоби нас, Владычице, / животворящих и безсмертных лучей Его.
Песнь 5.
К Тебе утреннюю, всех Творцу, / преимущему всяк ум мирови, / зане свет повеления Твоя, / в нихже настави мя.
Многажды отдавал еси бедным / последний хлеб из дому твоего; / научи и нас в сем ти подражати.
Не восхотел еси уделу счастливых придатися, но, памятуя скорби убогих страдальцев, / сих участь предпочел еси: / рабство и нищету.
В письмах поучал еси пламенно / о пользе молитвы за усопших, / ныне помолимся, святителю, / о скончавшихся близких наших.
Богородичен: О Светоносная Дево! В час исхода моего / отверзи ми двери Небеснаго Царства, / да идеже Господь мой, тамо и аз, / слуга неключимый, вселюся.
Песнь 6.
Бездна последняя грехов обыде мя, / и исчезает дух мой; / но прострый, Владыко, высокую Твою мышцу, / яко Петра, мя, Управителю, спаси.
Ты еси супружества о Господе венец, / ты и отречения монашескаго образ, / темже и монаси, и мирстии / чтим твою память с любовию.
Кто тя достойно воспоет,/ дивный Павлине? / Не обретаем ангельских гласов,// да восхвалим человека небеснаго.
Ныне совершил еси подвиг твой / и зриши Бога; / очисти и наши сердца,// да убежим от нощи сомнений и неверия.
Богородичен: Владычице мира, / ослабшую душу мою//
к деланию заповедей Сына Твоего умудри.
Кондак, глас 8:
Возвещаше усердно,/ яко много может ходатайство святых за мир, / ныне слова сии делом явил еси, / великий угодниче Божий; /темже возвесели сердца зовущих: // радуйся, Павлине, святителю милостивый.
Икос:
Ангел-утешитель скорбящих и немощных кроткий, / к Небесем путеводитель был еси в житии твоем, святителю, / душу свою за спасение в бедах сущих/ положил еси; темже ароматом добродетелей твоих / услаждаеми, величаем тя хвалебно: / радуйся, благоуханное миро смирения, / радуйся, добрыми делы своими Бога прославивый, / радуйся, любовию скорбных согреваяй, / радуйся, образе христоподражательнаго жития, / радуйся, Павлине, святителю милостивый.
Песнь 7.
Якоже древле / благочестивыя три отроки оросил еси / в пламени халдейстем, / светлым Божества огнем / и нас озари, / благословен еси, взывающия, / Боже отец наших.
Виноградарь был еси, отче, искусен; темже твоими молитвами яви мя / яко цвет благоуханен, / насажден в садех рая пресветлаго.
Обрет Сокровище нетленное Христа, / первее в горы уединился еси; / вразуми и нас молитву любити и выну быть с Богом возжелати.
Вся познания мирская и мудрость твою Господу посвятил еси, / научи и нас вся дарования своя / во славу Его единаго обращати.
Богородичен: Владычице, Надеждо ненадежных, / не даждь до конца погибнути ленивому рабу Твоему, / но силою благодатною исцели / разслабление воли моея.
Песнь 8.
Нестерпимому огню соединившеся, / Богочестия предстояще, юноши, / пламенем же невреждени, / Божественную песнь пояху: / благословите, вся дела Господня, Господа / и превозносите во вся веки.
Среди нашествия варварскаго и нестроений / извел еси корабль паствы твоея / в тишину Христову, / тако и с нами сотвори.
Умоли Христа Бога о Церкви, / ересьми, неверием и распрями обуреваемой, / даждь пастырем силу и мудрость / право правити слово Господней истины.
Вопиют к тебе священных соборы / и монашествующих полки: / на твердом камени веры Христовой / утверди сердца, тьмою бед устрашенная.
Богородичен: Светоносным омофором Твоим, Пречистая, / Церковь Сына Твоего / всегда охраняй от искушений и бед.
Песнь 9.
Новое чудо и Боголепное: / девическую бо дверь затворенную / яве проходит Господь, / наг во входе, / и плотоносец явися во исходе Бог, / и пребывает дверь затворена. / Сию неизреченно / яко Богоматерь, величаем.
Ты еси чистоты светильник / и воистину друг Божий, / исторгни нас из блата страстей / и сладостию духовною напитай.
Ты еси врач согрешающим, / ты еси пастырь премудрый, / управи наше мятежное житие / ко обители святыни и покоя вечнаго.
Многажды восхвалял еси / тайну Святыя Евхаристии, / пробуди в суетных душах наших / Святаго Причастия жажду.
Богородичен: Преблагословенная, Чистая, / пребуди со мною на всяк день же и час, / да радостен буду и не впаду в сети / отчаяния и нечестия.

Светилен:
Яко светило неугасаемое / и по смерти показался еси, святителю, / благоуханием мощей твоих целебных / и красотою великих чудес.
Слава, и ныне:
Спаси, Христе Боже, люди Твоя, / и страну нашу осени тишиною, / за молитвы Матере Твоея / и блаженнаго Павлина Милостиваго.

НА ХВАЛИТЕХ
стихиры, глас 4:
Тако вопиет святитель верным: / дерзайте, чада моя, / аще и далече в Риме почиваю, / но духом неразлучен есмь с любящими мя / и призывающих с верою зрю, // и непрестанно молюся о душах ваших.

Глас 8:
Святителю отче Павлине, / яко же Илиа возносимый, / даде благодать свою Елисеови, / сице да опочиет и на нас / твоя неисчерпаемая сила духовная, // усердно славящих память твою.
Слава, глас тойже:
Яко человек, ароматы носяй, / сам благоухания исполняется, / тако, святителю отче Павлине, / с тобою молитвенно соединившеся, / да исполнимся твоих добродетелей миром // и наслаждение вечное унаследуем.
И ныне.
Явилася еси Купина Пламенеющая, / с человеки соединившая огнь Божества, / страсти наша очищающая / и пламень Божественнаго умиления изливающая. / Темже Тя вси роди ублажаем, // Всеблаженная.