Редкие Богослужебные тексты

Служба Преподобному и Богоносному отцу нашему Лаврентию,
схиархимандриту и Чудотворцу Черниговскому

НА ВЕЛИЦЕЙ ВЕЧЕРНИ
Блажен муж: первый антифон.
На Господи, воззвах: стихиры на 8, глас 8:
Радуйся и веселися, Святая Церковь Православная, о тебе бо рече Господь: созижду Церковь Мою, и врата адова не одолеют ю: сия Церковь есть Бога жива, столп и утверждение истины: се бо новая звезда на тверди небесней явися, преподобный и богоносный отец наш Лаврентий, утверждая ны в Правоверии отцев наших, волны ересей и расколов бурю разгоняя и указуя путь во спасение душ наших. (дважды)
Радуйся, богоспасаемый граде Чернигове, многими бо святыми издревле прославлен бысть, и ныне новый чудотворец богоблаженный Лаврентий дивно является, темже ему с любовию зовем: радуйся, страны Русския похвало и утверждение; радуйся, града Чернигова славо и украшение, верным людем любовию послуживый и нетленными мощами с нами пребываяй, духом Престолу Владычню предстояй, молися еже умирити мир и даровати душам нашим велию милость. (дважды)

Радуйтеся, христоименитии людие, и торжествуйте, яко дивен Бог во святых Своих, яви Церкви Православней новое знамение Своего благоволения прославлением великаго аввы Лаврентия, иже ангельски на земли пожив, со безплотными водворися на небеси, славословити непрестанно Пресвятую Троицу, и молится еже разгнати мрак ересей и расколов и сохранити Едину, Святую, Соборную и Апостольскую Церковь во спасение душ наших.

Небо и земля радуются и веселятся, се бо Ангел во плоти, небесный человек, богомудрый пастырь Лаврентий, с лики Небесных Сил Бога славословит и о верных тепле молится, да и мы сердца в горний мир присно возводяще, Ангели храними и молитвами святых укрепляеми в добрем делании, совершивше многотрудный путь жития временнаго, достойни будем воспевати Пресвятую Троицу во вся веки.

Ликовствуйте, иноцы и вси вернии, молитвою и постом Богу благоугождающии, яко игумен наш всеблаженный Лаврентий во обители Отца Небеснаго вселися, во еже собрати тамо вся любящия Бога, ихже на земли, яко птица птенцы своя под криле собираше; молися, святе, помиловати души наша.

Богомудре отче Лаврентие, Бога дивно песнословив, лики иноческия собра и настави славити Господа не точию гласы, но и добрыми делы благочестия, темже в вечных обителех с горними чинми Творца всяческих славословиши; молися о чтущих память твою, во еже с тобою прославити Бога во Царствии Небеснем.

Слава, глас 6:
Иго Христово, благое и легкое, радостно и усердно понесл еси, воли своея совлекся, сосуд чистоты быв, добродетелей сокровище, с преподобными преподобен явився, христианския кончины честныя достоин быв, добродетельное житие сконча, еже бысть тебе прехождение от трудов к покою вечному, идеже, венец славы от Царя Славы Христа восприяв, молися, боголюбиве Лаврентие, о чтущих любовию память твою, от душетленнаго зла избавитися и спастися душам нашим.

И ныне, Богородичен Догматик, глас 6:
Кто Тебе не ублажит, Пресвятая:
Вход. Прокимен дне и чтение три преподобническая.

Премудрости Соломоновы чтение (главы 5 и 6):
Праведницы же во веки живут, / и во Господе мзда их, и попечение их у Вышняго. / Сего ради приимут царствие благолепия / и венец доброты от руки Господни, / яко десницею покрыет их и мышцею защитит их. / Приимет всеоружие рвение свое / и вооружит тварь в месть врагом. / Облечется в броня правды / и возложит шлем суд нелицемерен. / Приимет щит непобедимый преподобие, / поострит же напрасный гнев во оружие, / споборет же с ним мир на безумныя. / Пойдут праволучныя стрелы молниины, / и яко от благокругла лука облаков, на намерение полетят: / и от каменометныя ярости исполнь падут грады: / вознегодует на них вода морская, / реки же потопят нагло. / Сопротив станет им дух силы, / и яко вихор развеет их, и опустошит всю землю беззаконие, / и злодейство прекратит престолы сильных. / Слышите, убо, царие, и разумейте: / навыкните, судии концев земли, / внушите, содержащии множества и гордящиися о народех языков: / яко дана есть от Господа держава вам / и сила от Вышняго.

Премудрости Соломоновы чтение (глава 3):
Праведных же души в руце Божией, / и не прикоснется их мука. / Непщевани быша во очесех безумных умрети, / и вменися озлобление исход их. / И еже от нас шествие сокрушение: / они же суть в мире. / Ибо пред лицем человеческим аще и муку приимут, / упование их безсмертия исполнено. / И вмале наказани, бывше, великими благодетельствовани будут. / Яко Бог искуси я / и обрете их достойны Себе. / Яко злато в горниле, искуси их, и яко всеплодие жертвенное прият я. / И во время посещения их возсияют, / и яко искры по стеблию потекут. / Судят языком и обладают людьми, / и воцарится Господь в них во веки. / Надеющиися Нань уразумеют истину, / и вернии в любви пребудут Ему: / яко благодать и милость в преподобных Его / и посещение во избранных Его.
Премудрости Соломоновы чтение (глава 4):
Праведник аще постигнет скончатися, в покои будет. / Старость бо честна не многолетна. Седина же есть мудрость человеком, / и возраст старости — житие нескверное. / Благоугоден Богови быв, возлюблен бысть / и живый посреде грешник преставлен бысть. / Восхищен бысть, да не злоба изменит разум его, / или лесть прельстит душу его. / Рачение бо злобы помрачает добрая, / и парение похоти пременяет ум незлобив. / Скончався вмале, исполни лета долга, / угодна бо бе Господеви душа его, / сего ради потщася от среды лукавствия: / людие же видевше и не разумевше, / ниже положше в промышлении таковое, / яко благодать и милость в преподобных Его / и посещение во избранных Его.

На литии
стихиры, глас 1:
Приидите, боголюбцы вернии, ублажим наставника добраго преподобнаго Лаврентия, егоже память светло празднуем, ревнующе вере и житию богоугодному, просяще его молитвы и заступления о стране Российстей, даровати мир и велию милость душам нашим.

Приидите, священномонаси и иноцы, и вси вернии соберитеся, чтуще память пастыря добраго Лаврентия, иже душу полагаше за овцы своя, и навыкнем житию праведному, пекущеся о ближних своих; той бо собира, взыскуя расточенныя и заблудшия, наставляя вся во спасение, Пастыреначальнику Христу в оный день тех представит, глаголя: се аз и дети, яже ми дал еси, Боже.
Приидите, вси вернии, сошедшеся во обитель Пресвятыя Троицы, чтуще велия подвижника благочестия Лаврентия, и прославим новаго светильника Церкве Православныя, иже на свещнице церковней верою и любовию горя, согревает всех притекающих к раце мощей его и указует путь во спасение душ наших.

Слава, глас 8:
Сей день, егоже сотвори Господь, воньже наста велие и священное торжество, возрадуемся вси и возвеселимся, яко новый молитвенник и предстатель пред Богом явися, богоблаженный авва Лаврентий, иже всем вся быв, и всех любовию объемля, помощь благодатную просящим дарует, утверждая в Законе Божии и праведнем житии, и молится во еже помиловати души наша.

И ныне, Богородичен, глас той же:
Пресвятая Владычице Богородице, молитвами Твоими, матернее дерзновение имущи, помози верным преплыти волнующееся житейское море и вселитися во обители Царствия Христова.

На стиховне
стихиры, глас 5:
Радуйся, Преподобне отче Лаврентие, яко житие твое славно и успение со святыми, от смерти избавлен быв, живот вечный наследова, телом нетленным с нами пребывая и вся любовию согревая: молися о чтущих святую память твою, предстоя Престолу Пресвятыя Троицы.

Стих: Честна пред Господем смерть преподобных Его.
Радуйся, богоносне Лаврентие, воистинну пред Господем блаженна кончина твоя, яко сердце твое бе храм Духа Святаго, руце прогонясте враги и супостаты и люди верныя благословлясте к молитве, нозе ходисте стезями заповедей Божиих; молися, святе, избавити ны смерти лютыя и сподобити живота вечнаго.
Стих: Восхвалятся преподобныя во славе, и возрадуются на ложах своих.
Радуйся, блаженне Лаврентие, Святаго Духа избранный сосуде, телом с нами пребывая, духом Престолу Божию предстоя, о Дусе Божии свидетельствуеши, в Церкви Христовой вся освящающем, Егоже моли спасти и помиловати души наша.

Слава, глас 8:
Отче боголюбиве Лаврентие, Господу всего себе отдавый, иго Его благое на себе вземый и ближним любовию послуживый, о святей Руси молитвенник усердный бысть, помози молитвами твоими верным в добрем исповедании и добрых делех пребыти, и в день Страшный услышати глас Христа Бога: приидите, благословеннии Отца Моего, и наследуйте Царствие Небесное, уготованное вам от создания мира.
И ныне, Богородичен, глас той же:
Мати Божия, Пресвятая Дево Богородице, преподобнаго Лаврентия на духовныя подвиги во граде Чернигове во обители Троице-Ильинстей благословившая, сподоби ны Твоего благословения и утешения и благодатныя помощи, да Твоим предстательством Сын Твой и Бог наш явит нам на Страшнем Суде милосердие.
Тропарь, глас 4:
От юности Христа возлюбил еси и Тому тесным путем последовал еси, сосуд избран Святаго Духа быв, дар чудотворения и прозрения восприим: сего ради в невечернем свете Пресвятыя Троицы радуяся, поминай чад твоих, Лаврентие преподобне, отче наш.
Ин тропарь глас 8
Днесь светло красуется град Чернигов, и торжествует обитель Пресвятыя Троицы, в ней бо молитвою и постом пребывая, иночествующим и верным людям велий наставниче и скорый помощниче, и избранник пречудный Царицы Небесныя явился еси, яко звезда лучезарная в стране Российстей, преподобне отче наш Лаврентие, моли Человеколюбца Бога спасти души наша.

НА УТРЕНИ
По 1-й кафисме седален, глас 5:
Храм Божий, отче Лаврентие, зело возлюбил еси, службы по уставу совершая и чинно пением их украшая, и себе храм украшен содела: научи ны покаянием очиститися, да храм Святаго Духа будем и вселимся в Царствие Небесное. (дважды)
Слава, и ныне, Богородичен, глас тойже:
Всемилостивая Царице Небесная, три дни Сына Твоего искавшая, и в храме Его обретшая, преподобнаго Лаврентия призвавшая в дому Пресвятыя Троицы славити Тя, идеже Твоя чудотворная икона бе, Всепетая: помози и нам храм яко небо возлюбити, и Господа не точию устнами, но и сердцем славословите достойно ко спасению душ наших.
По 2-й кафисме седален, глас 4:
Дивно Бога воспевая, житием нескверным благоухая, отче Лаврентие, хвалебныя лики, Господа славящия, устроив, своя таланты зело умножив, в радость Господа своего вшел еси: сия радости не лиши и ны, священную твою память светло празднующих. (дважды)

Слава, и ныне, Богородичен, глас тойже:
К кому возопиим, Владычице, к кому притецем в горестех и напастех, аще не к Тебе, всех скорбящих радосте и утешение, Ты наша нужды, скорби и болезни мнози веси, о Благая, поспеши на помощь пред Твоею иконою во обители Троице-Ильинстей молящимся, и даруй нечаянную радость душам нашим.

Величание общее преподобному
Ублажаем тя, / преподобне отче Лаврентие, / и чтем святую память твою, / наставниче монахов и собеседниче Ангелов.
По полиелеи седален, глас 1:
В вере, надежде и любви непрестанно Пресвятей Троице работая, и сими добродетельми храм пречестен себе устроив, во дворех заповедей Господних пребывая, пещеру ископав, воздержанием, постом и молитвою плоть и страсти умертвил еси и душу твою добродетельми оживил еси: помози нам, святе Лаврентие, покаянием очиститися и спастися душам нашим.
Слава, и ныне, Богородичен, глас тойже:
Царице, Царя царствующих Мати, Пресвятая Дево Владычице, на спасения стези настави ны и сподоби принести плоды достойны покаяния, во еже вместо грехов и страстей гнездящихся, воцаритися Христу Царю Славы, да явимся наследники Царствия Его во веки.

Прокимен, глас 4: Честна пред Господем смерть преподобных Его.
Стих: Что воздам Господеви о всех, яже воздаде ми?

Евангелие от Матфея, зачало 43.

По 50-м псалме стихира, глас 6:
Образ быв верным словом, житием, любовию, духом, верою и чистотою, преподобне Лаврентие, и богоносец молитвою Иисусовою, всех любовию согреваше и прошения коегождо исполняше: сего ради имамы тя правило веры Православныя, Церкве Христовы защитниче и победоносче, верных хранителю от богомерзких враг видимых и невидимых, благочестия поборниче, церковнаго устава исполнителю, и онаго нарушителей строгий наказателю; учителю чистоты душевныя и телесныя, богомудрый наставниче и молитвенниче изрядный, молися ко Господу во еже спасти души наша.
Канон Преподобнаго и Богоноснаго отца нашего Лаврентия, глас 8, на 8,
егоже краегранесие: Лаврентия венцами из лавров увенчаем.

Песнь 1
Ирмос: Воду прошед, яко сушу…
Припев: Преподобне отче Лаврентие, моли Бога о нас.
Любовию Богу от юности пламенея, труды послушания и молитвенныя подвиги совершая, хваление песненное от Господа стяжав, житием девственным Тому неоскверненно благоугодил еси и достойно поработал еси.
Ангельское житие возлюбив, мир и дом отчий веси Карыльския оставил еси, во обитель святителя Николая в Рыхлы вшел еси, идеже послушанием в посте и молитве страх Божий стяжал еси.
Велия твоя труды восхвали архиепископ Антоний, провидев тя, Лаврентие, сосуд избран Пресвятыя Животворящия Троицы, в Чернигов тя призва во обитель на службу Богу и ближним.
Богородичен: Царице Небесная, Лаврентия благословившая на утешение верным и в Чернигов его приведшая, моли Сына Твоего, Христа Бога нашего, спастися нам.

Песнь 3
Ирмос: Небеснаго круга…
От юности молитве Иисусове навыкнувый и иных той научивый, яко именем Господа Иисуса Христа враги души и плоти побеждаемы будут, моли Человеколюбца Христа, да наследуем спасение и помиловани будем Его милосердием.
На поклонении святых мест горы Афонстей и града Иерусалима быв, о благодати сих святынь верным рече, нас же всею душею поклонятися Богу в Троице Единому и чтити Царицу Небесную научаеши.
Лице твое, преподобне Лаврентие, светом невещественным сияше, любовь и радость верным даруя, тем же Благодатию Святаго Духа вси вернии к тебе притекаху, утешения и радости исполняющеся.
Богородичен: Узкий и тернистый путь жития шествовати, беды и скорби до конца претерпевати, рабу Своему помогаше, Благаго Царя Благая Мати, Госпоже Владычице: и мы, все упование на Тя возлагаем, под кровом милосердия Твоего спасающеся.
Ин кондак глас 4
Возсиял еси, яко светильник лучезарный услыша глас Царицы Небесныя, и последовав невозвратно зову Ея. Пришел в обитель Пресвятыя Троицы, идеже Владычицы Богородицы чудотворная икона, целомудренно собрав стадо словесных овец. Не забуди и нас, последовавших ти, и да избавит Господь геенны вечныя, совершающих святую память твою, преподобне отче наш Лаврентие.
Седален, глас 4:
Возсия яко светильник светозарный, услышав глас Царицы Небесныя, и последовав невозвратно зову Ея, прииде во обитель Пресвятыя Троицы, идеже Владычицы Богородицы чудотворная икона, и собра стадо словесных овец. Не забуди последовавшия ти, и молися Господу помиловати ны от наветов вражиих и избавити геенны вечныя души наша, совершающих святую память твою, Лаврентие преподобне отче наш.
Слава, и ныне, Богородичен, глас 2-ой:
Пресвятая Владычице Богородице, во время безбожнаго гонения преподобнаго Лаврентия Твоим омофором покрывающи, хранила еси его на пользу веры и Церкве Православныя. Мы же на Тя все упование возлагаем, Тебе зовуще: Мати Божия, сохрани Святую Русь под кровом Твоим.

Песнь 4
Ирмос: Услышах, Господи…
Яко пророк, будущая прозрев, брань велию, гонение и мучение предсказал еси, яко за неверие и отступление от Бога поругани быша святыни, таже и победу над враги благочестия и открытие церквей на покаяние людей Святыя Руси предвозвестил еси, сам церкви и обители обновляя, иночествующих собрал и наставил еси.
Велия радость о возвращении многоцелебных мощей святителя Феодосия во граде Чернигове бысть, егда преподобный Лаврентий вкупе с сестрами святыя обители и верными нощию во сретение изыде, воскресша Христа воспевая.
Егда во обитель Пресвятыя Троицы преселися еси, тогда кончину свою прорекл еси, яко пожити тебе, Лаврентие треблаженне, зде осмь лет; и Бога Животворящаго в Троице Пресвятей житием святым, Отца и Сына и Святаго Духа прославил еси.
Богородичен:. О Всечестнейшая Игумения обителей иноческих Пресвятая Богородице, сохрани обители и церкви и спаси души наша.
Песнь 5
Ирмос: Просвети нас повелении…
Церкви Христовой со страхом Божиим и любовию послужил еси, священнодействуя и таинства совершая, и возбраняя сокращати службы церковныя, преподобными и богоносными отцами установленныя; Ангели сослужащии ти имел еси; молитвы благовонное кадило вознося и руце непорочнеи Господеви возвышая, амалика мысленнаго победил еси.
Ангелом житием богоугодным поревновав, светильник полон добрых дел имел еси: любы, радость, мир, долготерпение, благость, милосердие, веру, кротость, воздержание, сего ради с мудрыми девами Христос тя срете.
Мир душевный и премудрость стяжав, множество верных себе привлекл еси, спасатися им поспешествуя, отче Лаврентие, велий наставник богомудрия был еси, всех любовию объемля, и никтоже от тебе не услышан отыде.
Богородичен: Иаков Тя лествицу виде, Богородице: Тобою Бог на земли нам явися, и вернии на небо Тобою восходят, аще с верою и любовию Тя, Госпоже, призывают, якоже преподобный Лаврентий, достойне Тя воспевая, в небесныя обители вниде.

Песнь 6
Ирмос: Молитву пролию ко Господу…
В скорбех и болезнех сущия к тебе, праведне Лаврентие, верою прихождаху, яко врач душ и телес был еси, скорбящия утешая, заблудшия вразумляя и недужныя именем Христовым врачуя.
Зла всяческих удалятися верным наказуя и непрестанно молитися Богови повелевая, добрый делатель винограда Христова быв, яко лоза плодовита и финикс процвел еси в радость Господа Твоего внити сподобяся.
Любы и усердие к службе Божией и уставу церковному являя и заповедуя хранити и соблюдати я, в сем подражал еси отцем древним Феодору Студиту и Савве Освященному, да всесвятое имя Пресвятыя Троицы достойно вкупе со Ангелы восхваляется.
Богородичен: Архангел Гавриил радость от Бога с небесе принесе Ти, Благодатная, яже бысть радость небесным, и земным, и преисподним; еяже не лиши ны, молитвами Твоими и преподобнаго Лаврентия, Радосте всех радостей, Пресвятая Богородице, да спасшеся возрадуемся во Царствии Небеснем.

Кондак, глас 4:
Мир оставив, чистоту ангельскую стяжал еси и ближним любовию послужил еси, отче наш Лаврентие, помощь благодатную с верою приходящим обильно даруя; темже в премирная селения достойно вселився, плотию с нами пребываеши, ны в православней вере отец наших утверждая, душею светозарною Подателю мира Царю царствующих моляся даровати Православней Церкви мир и душам нашим велию милость.

Икос:
Ангел во плоти и человек небесный быв, святе, обеты ангельскаго образа ревностно исполнил еси, чистотою душевною божественно вооружився, и непрестанныя молитвы яко копие взяв крепко, дальняя же яко настоящая зря, и дар чудотворения приходящим с верою к тебе даруя, явился еси пастырь добрый словесных овец; добродетельми яко колесницею на небо возшел еси, идеже неизреченныя радости наслаждаешися. Молися с Богородицею и всеми святыми даровати нам мир и велию милость.

Песнь 7
Ирмос: От Иудеи дошедше отроцы…
Во храме Божии, яко на небеси пред Господем пребывая, лик Безплотных Сил и всех святых слышати сподобился еси, святе Лаврентие, и сему подражати дерзая, лики иноческия научил еси всепетое имя Пресвятыя Троицы славословити: отец наших Боже, благословен еси.
От смерти вечныя многия грешницы отвратив, наставил еси тех на покаяние, отступницы к богопознанию привел еси, неверы в веру обратил еси и заблуждающим путь истины в Православней Церкви указал еси, да вси вкупе спасшияся тобою вопиют: отец наших Боже, благословен еси.
Богородичен: Царице Небесная, не остави нас, грешных, да поем и глаголем Сыну Твоему и Богу нашему со Отцем и Святым Духом: отец наших Боже, благословен еси.

Песнь 8
Ирмос: Царя Небеснаго…
Был еси кающимся отец чадолюбивый, преподобный отче Лаврентие, наставляя на правую стезю и шествовати по словеси глаголов живота вечнаго, посту и непрестанной молитве, добрым делом и закону Бога Жива научая, Егоже поют Ангели и люди превозносят во веки.
Времена будущая предвозвещая, поучал еси верных, да уповают на Господа и Пресвятую Богородицу выну, ибо не оставит Господь благочестивыя поющия Его во веки.
Богородичен: На Тя все упование возлагая, Мати Божия и Заступнице усердная рода христианскаго, преподобный Лаврентий молит Сына Твоего и Бога нашего, внегда приидет час Суда Страшнаго даровати нам милосердие Свое, да хвалим и превозносим Троицу Пресвятую и Тя, Деву Марию, Пречистую Матерь во веки.
Песнь 9
Ирмос: Воистину Богородицу Тя исповедуем…
Житие чистое во благочестии провождая, Церковь Божию яко Царство Небесное любя, на всяк день причастник был еси Пречистых Тела и Крове Христовых, в праздник Крещения Его, душею предстал еси престолу Пресвятыя Троицы, свет Богоявления узрев.
Агнца Божия Спасителя мира возлюбив, и Ему последователь быв, возшел еси в небесныя обители, прославляя Его со Отцем и Святым Духом, и моляся о чтущих тя.
Милосердия Своего и велия радости сподоби ны Бог, егда обретошася честныя твоя и чудотворящия мощи, и правовернии людие глаголаху: сей день, егоже сотвори Господь, и благочестне покланяхуся, лобызающе я.
Богородичен: Милосердия двери, Всемилостивая Госпоже, Благодатная Владычице, отверзи роду христианскому и вознеси наша молитвы с аввою Лаврентием Пресвятей Троице, Отцу, и Сыну, и Святому Духу, Единому Богу, о спасении душ наших.

Светилен:
Светильник велий быв, святе Лаврентие, не токмо бо на Руси просветися свет добрых дел твоих, но и во всех концех земли просия святое житие твое и златословесная вещания твоя проидоша, и вернии прославляху Отца Небеснаго, даровавшаго нам неизреченную радость во обретении многоцелебнаго источника честных мощей твоих. (дважды)
Слава, и ныне, Богородичен:
Богородице, всех Царице, православных похвало, еретиков шатания разори, лжеименнаго разума расколы угаси, и лица их посрами, не кланяющихся, ниже чтущих, Пречистая, честный образ Твой и святых угодников Сына Твоего Христа Бога нашего, Иже претерпевших до конца вселит во обители Отца Своего Небеснаго и Дух Святый осияет я.
Всякое дыхание…
На хвалитех
стихиры на 4, глас 3:
Блажен еси и добро ти есть, святе Лаврентие преподобне, светом Божества просвещен: нищету духа возлюбив, огнь искушений победив, и пещь страстей угасив, о всем мире Милостивому Богу моляшеся и миротворец бысть: и ныне в небесных обителех радуяся, молися о чтущих любовию память твою, от всякаго злаго обстояния избавити и помиловати души наша.

Ничтоже разлучит тя, треблаженне Лаврентие, от любве Божия, яко правды ради гоним от безбожных властителей быв, поношения и ругательства претерпел еси, и всяк зол глагол слышав; за исповедание Христос Бог исповеда тя пред Отцем Своим, и Святый Дух тя освяти; темже твоими молитвами утверди ны во благочестии, и молися да сохранит Господь Церковь Православную во век века, яже есть столп и утверждение Истины, яко чада, ею наставляеми, сподобимся живота вечнаго.

Радуйся и веселися, всеблаженне Лаврентие, добродетельми яко миром благоухаяй, мзда твоя велия на небесех, и сияеши во Царствии Небеснем яко свет: подвигом бо добрым подвизался еси, течение совершив, и веру сохранив, и приим от Бога венец правды. Мы же, твоим заветом вернии, похвальными песньми ублажаем тя и величаем, ты же молися Пресвятей Троице в мире избавити ны вражия хитрости и коварства, и душам нашим даровати велию милость.
Глас 8:
О всечестне и священне Лаврентие, заповеди Христа Царя царствующих исполнив, узким и тесным путем шествоваше, в посте и молитве пребывая, крестом и смирением лукаваго победив; темже Владыку всея твари и Содетеля моли, во еже обновити нам в себе образ Божий покаянием, явитися победители греха и темных сил мировластителей тмы века сего, в правоверии и благочестии, чистоте и святости, в законе истины и правде пожити и сподобитися вкупе с тобою и всеми святыми Царствия Небеснаго.

Слава, глас 6:
Возвеличим днесь песньми велия угодника Спаса Христа Бога, чудотворца известнаго и молитвенника славна, иже Пресвятую Троицу славя, Матерь Божию Царицу Небесную величая, и вся святыя с собою на молитву о мире подвизая, добрыми делы благочестия, постом и молитвою яко солнце просия, егоже Церкви Своей Христос даде, указуя истину веры православныя. . Радуйся, отче наш, преподобне Лаврентие, неба церковнаго звездо светлая, радуйся, Святыя Руси похвало святая, радуйся, болящих и скорбящих скорый ходатаю и милостивый утешителю, радуйся, теплый молитвенниче о душах наших.

И ныне, Богородичен, глас тойже:
Архангела Гавриила гласом воззовем Деве Марии Богородице, вернии: радуйся, Благодатная, радуйся, Невесто Отца Небеснаго, радуйся, Сына Божия Мати, радуйся, Юже осени Дух Святый. Радуйся, Обрадованная Воскресением Спаса всех Христа и Жизнодавца и Бога, радуйся, Честнейшая Херувим, радуйся, славнейшая Серафим, радуйся, Преблагословенная, Господь с Тобою и Тобою с нами.

Славословие великое, и отпуст
На Литургии
Блаженны, от канона святаго песнь 3 и 6.