Редкие Богослужебные тексты

Геновефе (Женевьеве) Парижской прп.

Новый тропарь (июнь 2008 г.), гл.5

Пламенная веры истинныя провозвестница/ и града твоего заступница еси,/ о святая мати Геновефо,/ защити ны от падений греховных,/ и потребная блага земная ниспосли,/ гладныя напитай/ и Господа неустанно моли// о спасении душ наших.

Иной тропарь, гл.4
Защитнице благодатная,/ паству твою в Нантерии/ от нападений вражиих/ и обстояний бедственных сохраньшая,/ град Париж от варваров спасшая,/ святая мати Геновефо,/ ныне на Небесех,/ по кончине твоея сущи,/ не забуди предстательствовати/ о всех чтущих// святую память твою.

Кондак, гл.3
Воспоим заступницу небесную нашу,/ народ Божий во дни испытаний лютых сохраньшую,/ подвигу бесстрашныя Деворы поревновавшую,/ целомудрию и мужеству святой Иудифии последовавшую,/ аки Иосиф гладных напитавшую,/ и ныне светом истины,/ озаряющую град свой/ и всех чтущих ея/ и едиными усты вопиющих:/ Радуйся, святая Геновефо,/ града Парижа/ и всего рода христианскаго// благодатная хранительнице и покровительнице!

Молитва ко святей преподобной и богоносной матери нашей Женивьевы (Геновефы) Парижской.

О святая преподобная и богоносная мати наша Женивьева, преславнаго града Парижа и всех, с любовию на всяцем месте и во всякой стране христианской чтущих тя благоадатная заступнице и покровительнице!
Прибегая ныне к заступничеству твоему усердно просим тя: сохрани ото всякаго зла и всякия скорби и напасти град, яко во дни земнаго жития твоего сохранила еси его от нашествия варваров, и ныне сохрани град сей и вся люди, в нем верою живущия, от глада, хлада, болезней, нашествия иноплеменников и междоусобныя брани.
О святая мати Женивьево, молитвы твоима покрый всех гостей града, всех иноплеменников, в нем сущих, всех иностранных работников, дабы смогли и они обрести полноту и радость жития, согласно благой воле Бога Всевышняго. Сотвори молитвы твоя за всех страждущих во граде сем, за лишенных крова, работы, за сущих во обстояниях тяжких, за пребывающих в отчаянии и тревоге о днях грядущих.
Ей, святая мати наша Женивьево, ниспошли благословение Божие всем в радости сущим, упроси Творца нашего даровати помощь благодатную семьям нашим, чадом, старцем и старицам, да сподобит всех нас Милосердный наш Господь во всяк день и час жития нашего в мире и славословии Божием пребывати. К предстательству и заступничеству твоему прибегая, угоднице Христова, усердно просим тя: приклони Милосердие Божие, к нашей Святей Церкви, к архипастырям, пресвитером, монашествующим и миряном, яко ты еси всеблагая заступнице наша пред Престолом Всесвятыя и Нераздельныя Троицы.
Вознеси молитвы твоя, о святая мати, за всех умерших в надежде всеобщего воскресения, да простит им Господь вся согрешения их, вольная и невольная. О святая Женивьево, ты во дни земнаго жития твоего возвратила еси многочисленных грешников на путь спасения, сице молим тя: испроси у Иисуса Христа, Господа и Спасителя нашего, прощения всех наших прегрешений, яже от юности до настоящего дня и часа согрешихом. Умоли Господа нашего исполнити вся просьбы наша и молитвами твоими сподоби ны славословити купно с тобою Всесвятаго Господа и Бога нашего, Отца и Сына и Святаго Духа и ныне и присно и во веки веков. Аминь.