Редкие Богослужебные тексты

Служба святому Геннадию, архиепископу Новгородскому
Печатается по материалам архива Свято-Троицкого монастыря (Джорданвилль, США).
Иже во святых отца нашего Геннадия, архиепископа Новгородскаго, во Святой Руси жидовскую прелесть попалившаго и поем купно с великомученицею Варварою.
ВЕЧЕР: Блажен муж, на "Господи, воззвах" глас 8.
Истинным избранием Божиим/ жезл святаго служения восприим/ добре люди твоя управил еси,/ ихже светом Священных Писаний просветив,/ благочестия ревнитель явился еси,/ темже и вопием ти похвальная,/ святителю Христов блаженне Геннадие,/ моли Христа Бога о спасении душ наших.
Истинным учением Христовым/ души гладныя напитал еси/ и во тьму и сень смертную ереси впадшия/ к свету заповедей Божиих возвратил еси,/ Церкве Русския красная похвало/ и земли Новгородския славное удобрение,/ Геннадие, святителю блаженне,/ молитвенниче о душах наших.
Истинною любовию исполнен,/ святителю Божий Геннадие,/ посреде лжебратий и отступников тайных,/ яко шипок благоуханен, в тернии процвел еси/ и ругателей нечестивых посрамил еси,/ пребыл еси верен даже до смерти,/ сего ради приемлеши венец жизни/ и молишися о душах наших.
СЛАВА, глас 6
Веру правую во оболгании зря/ и святыню Господню в поругании,/ ревностию Божественною препоясан,/ стал еси пред нечестивыми в дерзновении мнозе,/ якоже Илия на Кармил и яко Владыка твой на Голгофу,/ ты на горнее седалище возшел еси/ и врага невидимаго поразил еси,/ аще и торжества Истины на земли не узрел еси,/ но труды и страдании твоими Церковь украсися,/ в ней же и нам подаждь неотпадно пребыти/ и с тобою прославити в вышних Господа.
НА СТИХОВНЕ, глас 3 (или на литии).
Паки сбирается нечестивое соборище/ на Господа, и на Христа Его, и на Церковь Его/древним богоотступником подражающе,/ смерти Безгрешнаго паки ругающеся,/ но, яко же тает воск от лица огня,/ тако исчезает от слышания словес твоих,/ богомудре святителю Геннадие,/ воеводо Господень изрядный.
Паки сонмище богопротивное,/ хранящее суетная и ложная,/ совещает злая на Невесту Господню/ и прельщает маловерныя воскресению не веровати,/ и Святым Таинам ругатися,/ и учение Христово хулити,/ но на камени исповедания твоего,/яко волна свирепеющая, разбивается,/ пенящися всеми срамотами своими,/ и величие духа твоего неволею показующи,/ богомудре святителю Геннадие,/ воеводо Господень непобедимый.
Паки ученик неверный/ иудеем Христа предает/ и многое множество тайных отступник приводит./ Оле рыдания, оле посрамления!/ Оле безумия нечестивых,/ ведущих Христа и к ереси жидовствующих приложившихся,/ но на страже поставлен Божественней/ о стаде Господнем словеснем/ от юга пришедшаго Бога/ и спасение наше устроившаго проповедал еси,/ богомудре святителю Геннадие,/ воеводо Господень преславный.
СЛАВА, глас 4
Посрамляется днесь сонмище лукавнующих/ в памяти твоей, досточудне,/ вернии же ликуют в веселии/ и играюще славят Господа,/ таковаго предстателя нам даровавшаго,/ и учителя, и пастыря, и исповедника неколебимаго,/ духом века сего не прельщеннаго,/ но за истину добльствовавшаго волею/ и венцем небесным от Владыки увязеннаго.
ТРОПАРЬ, глас 5
Уподобился еси древним отцем,/ святителю отче Геннадие,/ священныя книги собрав и еретики посрамив,/ ревность по Бозе показуя, паству оградил еси,/ моли и ныне Христа Бога/ мир Церкви даровати/ и спастися душам нашим.
НА УТРЕНЕ:
Канон глас 4.
ПЕСНЬ 1. Ирмос: Тристаты крепкия рождейся от Девы, безстрастия во глубине души тричастное потопи молюся, да Тебе яко в тимпане во умерщвлении телесе победное воспою пение.
Слово даруй мне, Спасе Всесильне, воспети дивнаго угодника Твоего, добрым подвигом подвизавшагося и венцем победным ныне светло украшеннаго.
Ополчишася всадники, и тристаты, и все воинство фараона мысленнаго на Невесту Христову, гнав постиже и раздели достояние Господне, якоже корысти, обаче словом твоим, святителю Геннадие, яко пучиною покрыл еси их и погрязоша во глубине, яко камень.
Тобою, святителю, яко десницею Своею, стерл есть Господь сопротивных, ты же ныне прославлен еси в крепости, и в славе небесной ликуеши, и сущих во обстояниих на земли призираеши.
Богородичен: Имуще Тя, Дево, скорую Заступницу и прибежище немощных, лукаваго не устрашимся, злочестивых шатания да избегнем, и небесных сокровищ прияти вседушно уповаем.
ПЕСНЬ 3. Ирмос: Лук сильных изнеможе, и немощствующии препоясашася силою, сего ради утвердися в Господе сердце мое.
Укрепишася отметницы нечестивии зело у престолов церковных и в чертозех царских, и в гордыни своей высокая и хульная глаголаша, ты же, святителю, словом твоим утверждение во Господе верным подаеши.
Изнеможе лук злоначальнаго, и тул льстиваго истощися в конец, тебе же силою Господь препояса на враги Своя, даде тебе молящуся молитву, аки огнь, сопротивныя опаляющ, и благослови лета праведнаго угодника Своего.
Снизшедшаго с Небесе и возшедшаго воспроповедал еси, отче Геннадие, Иже имать судити концем земным в правде, аще и неведом час пришествия Его, темже и лет на осьмую тысячу Пасхалию исчисляеши, святителю, яко да не престанет служение Истины до пришествия Христова.
Богородичен: Неплодствие духовное наше разреши, Дево, и неведения мрак отжени от сердец страстьми обуреваемых, яко да принесем благочестия плод неистленный.
СЕДАЛЕН, глас 4
В немощи человечестей Державствующему поползнувшуся и козньми льщения запятому, дерзость вражию добльственне отразил еси и Царю наставник ко спасению явился еси, Геннадие мудре, и тако спасеся Русь Святая, скиптром и жезлом архиерейским укрепляема, темже и ныне о нас молися, святителю, оставление нам грехов даровати, и мучительства горькаго от беззаконных властехитителей находящаго люди твоя ныне избавити.
СЛАВА, седален мученицы, И НЫНЕ: Богородичен его.
ПЕСНЬ 4. Ирмос: Любве ради, Щедре, Твоего образа на Кресте Твоем стал еси, и растаяшася языцы, Ты бо еси, Человеколюбче, крепость моя и хваление.
От юга пришедшаго и от Святыя Девы воплощшагося Бога исповедал еси пред верными и неверными, овех убо укрепляя, овех же мечем слова Божия посецая яко к смерти падших и болезнующих неисцельне.
На Божественней стражи о стаде овец Христовых стал еси, дондеже нечестивых посрамление узрел еси, святителю, паству твою призирая, принося во брани укрепльшему тя Богу хваление.
Оле лукавствия нечестивых, яве убо благочествующе, тайне же жидовствующе, всяку святыню церковную ругании укоряюще, слузи сотворишася демоном, но якоже воск от лица огня, словесы твоими, отче, растаявахуся.
Богородичен: Ускори на помощь люте нам напастьми погружаемым, Чистая Мати Господня, нечестивых шатания низложи, поющия же Тя заступи.
ПЕСНЬ 5. Ирмос: Просвещение Твое, Господи, низпосли нам и от мглы прегрешений разреши ны, Блаже, Твой мир даруяй.
От нощи утренева дух твой ко Господу о вере, поругаемой богохульством лютым, темже и Писаний Божественных полный свод списал еси, Богомудре, имже вся Русь просветившися, благодарственная тебе воспевает.
Росою словес твоих исцеление недугующим ересию и ум иждившим подаеши, святителю, земля же нечестивых падеся, не исповедующих Трисиятельнаго Богоначальнаго Света и отмещщухся воплощения Единороднаго.
Воистинну паче мертвых воскресения велие и преславнейшее чудо есть, еже умершему зловерием хульньм паки на благочестие прейти и ко благохвалению обратитися, о тебе же, отче, сотворшем преславная, возвеселишася сущии на земли.
Богородичен: Света никтоже узрит, отметаяйся иконы Твоея поклонения, чести же образу не воздавый, како от первообразныя светлости осияние прияти возможет.
ПЕСНЬ 6. Ирмос: Приидох во глубины морския и потопила мя есть буря многих грехов: но яко Бог из глубины возведи живот мой, Многомилостиве.
Глубиною злобы и пучиною хуления поглощену зря Церковь Русскую, возопил еси всем сердцем твоим ко Господу, и паче надежды услышан был еси, отче, темже и ныне прибегаем к молитве твоей.
Низшел еси разумением твоим до самыя бездны тайных начинаний вражеских, да из истления возведеши души заблудшия, оле неистовства богопротивных!
Хранящии суетная и ложная Милостиваго и Праведнаго оставиша Господа, и на чтущия Того всею злобою языка льстиваго вооружишася, ты же, святителю, во гласе хваления и исповедания истинную жертву жря, козни тех до конца низложил еси.
Богородичен: Не отврати лица Твоего от нас, Владычице, но призри милостивно на согрешшия люди Твоя, аще бо и падаем множицею лютыми грехи, но милости Твоея присно взыскуем и Тебе, яко Богородицу и Заступницу теплую славим.
КОНДАК, глас 4
Яко незлобивых наставника кроткаго/ и лживых обличителя дерзновеннаго/ Церковь почитает тя, святителю Геннадие,/ темже и вопием к тебе с любовию:/ смирения нам даруй и дух умиления/ и во исповедании правом/ соблюди неврежденны души наша.
ИКОС. Придите, правды Божия алкателие, и небесных взыскателие, возвеселимся в памяти предстателя нашего крепкаго Геннадия, и наказанию его внемлем: яко львы рыкающи и еретицы, ищущии, кого поглотити, первее к нерадивым и ленивым приражаются и сокровенная и студныя дела нераскаянных удобь отпущают и разрешают, к себе же самем тем привязующе узами греховными, темже и припадем к пастырю доброму, яко да исходатайствует нам от Господа сердце люботрудное во взыскание небесных и во исповедании правем соблюдает неврежденны души наша.
ПЕСНЬ 7. Ирмос: Авраамстии иногда в Вавилоне отроцы пещный пламень попраша песньми взывающе: отец наших Боже, благословен еси.
Христоубийц прельщение и неистовство во дни твоя пещи огненней уподобися, ныне же седмерицею на Церковь твою воспламенеся, ускори нам в помощь, святителю, да взываем с тобою: отец наших Боже, благословен еси.
Яко Даниил в рове львинем посреде отступник тайных ходя, тех уста лукавая заградил еси, отче Геннадие, темже ныне ко свету изшед невечернему воспеваеши: отец наших Боже, благословен еси.
Пламень разженный безумия и буесловия человеча преложил еси на росу духовную Православия, и взывати научил еси: отец наших Боже, благословен еси.
Богородичен: Тя, Пречистую Владычицу, яко чаяние пророк древних исполнившую, песньми немолчными воспеваем: воистинну Бога плотию одеявшая и человеком Того даровавшая, благословенна еси.
ПЕСНЬ 8. Ирмос: Избавителю всех Всесильне, посреде пламени благочествовавшая, снизшед оросил еси, и научил еси пети: вся дела благословите, пойте Господа.
Татем и разбойником приступившим, на нетленное богатство мысленное благочестия догматов возбесившимся, прещением запретил еси, святителю, верныя же научил еси пети: вся дела благословите, пойте Господа.
Аще не у прииде Мессия Истинный, всуе ожидаете Того, врази и преступницы во гресех своих пребудете, дондеже пришед во огнь вас отслет несветимый, нам же не возбраните взывати присно: вся дела благословите, пойте Господа.
Богородичен: Принеси, о Благая молитвы ко Господу, смолебника приими и угодника Твоего Геннадия, иже любовию Твоею подвигся, научает и нас благословити и пети Тя во вся веки.
ПЕСНЬ 9. Ирмос: Ева убо недугом преслушания клятву вселила есть, Ты же, Дево Богородице, прозябением чревоношения мирови благословение процвела еси, тем Тя вси величаем.
Во гресех своих никакоже да умрем, клятвы Евины наследницы, аще верою теплою и усердием всяческим Иже от тебе, святителю, Проповеданнаго приимем и Тому Единому поработаем, яко Избавителю и Просветителю и Помощнику крепку, и Мздовоздаятелю праведному, бездну щедрот имущему.
Предстатель теплый буди о нас, Геннадие, стадо твое от волков, губящих е, огради, паче же словом Божественным напитай души гладныя, да тя вси величаем.
Троичен: Иже Божество Едино ведети мнящий, Тройческаго же богочестия отвергающийся, не в небесных, но в преисподнейших земли отца себе обрет, иже ни едину тварь сотвори, ни роди, точию всякую лжу от утробы изведе своея и всыновление свое дарова благоволившим к неправде.
Богородичен: Светом Сына Твоего души наша просвети и помыслы осияй, Благая Владычице, да чистым сердцем и мыслию высокою Тя вси величаем.
Светилен: Днесь, великий Новограде, просветися, восплещи песньми духовными в памяти председателя твоего Геннадия в лике возсиявша святителей твоих, в нихже тебе похвала и утверждение.
НА ХВАЛИТЕХ, глас 4.
Хвалите Господа на силах Его,/Хвалите во угоднице Его чудеса Его,/ како противу сонма лукавнующих добре стояше,/ яко камень морский противу вод многих,/ и нам наследие благое оставил есть/ догматов отеческих богатство многоценное/ в просвещение и спасение душ наших.
Хвалите Господа во гласе трубнем,/ Восхвалите в песнех благодарственных/ святителя Господня Геннадия,/ иже полный свод Писаний Божественных/ даровал есть в назидание людем своим,/ во отгнание клевет и злохулений еретических,/ в просвещение и спасение душ наших.
Хвалите Господа в тимпане и лице,/ Воспойте же ныне и угодника Его,/ святителя Геннадия мудраго,/ похвалу пресветлую земли Новгородския/ и всея России наставника и предстателя,/ люди своя во благочестии укрепляюща/ и козни вражеския прозревати научающа/ в просвещение и спасение душ наших.
Хвалите Господа в кимвалех доброгласных/ и в светлыя дни Пасхальныя,/ егда всякое дыхание хвалит Содетеля,/ и угодника Его Геннадия помяните, людие,/ на осьмое тысячелетие Пасхалию нам составльшаго,/ темже и предания о ней держимся крепко,/ и летосчисления церковнаго,/ времена и лета в Своей, а не в нашей власти Положившаго/ славяще непрестанно/ в просвещение и спасение душ наших.