Редкие Богослужебные тексты

Служба воспроизводится по изданию: Служба Пресвятой Богородице, иконы ради Ея Иерусалимския. Издание Крестовоздвиженского Иерусалимского ставропигиального монастыря, 2002.

На малой вечерни
На Господи, воззвах: стихиры, глас 4:
Иерусалимския иконы Твоея подобие, / сияющее светом благодатным, / изволением Твоим от России послася нам семо, / Госпоже Всеблагая, / во святый храм Покрова Твоего. / Сего ради обители сея иночествующим радости о сем исполняеми, / празднуем Тебе светло днесь, / и благодарственное пение приносим, / милосердие Твое величающе.

Иерусалимский образ Твой, Владычице, / источник показася чудес, / являющь Божественная Твоя величия. / Темже благоволением Твоим приявше святую икону Твою, / притекаем к ней яко ко благоотишному пристанищу, / и во храм Твой яко спасительный ковчег, / в немже спасаемся от треволнения страстей, / благодатию Твоею, Пречистая, / и рождшагося от Тебе Спаса душ наших.

Егда наста время освящения / Иерусалимския иконы Твоея, Богородице, / и прорече благочестивый муж о имущей возсияти от нея благодати чудес, / тогда не умедли исполнитися проречение, / притекавшии бо с верою к честному образу Твоему / приимаху недугов исцеление, / от злых духов освобождение / и неудержимаго устремления огня возбранение / державною силою и милостию Твоею.

О премилосердная Владычице, / предстояще со умилением благодати причастней иконе Твоей, / из глубины души взываем Ти: / не престай милость Твою являти нам, / храни выну обитель сию, / избави ны от бед и нужд душевных и телесных, / и молися к Сыну Твоему и Богу, / да простит прегрешения наша / и сподобит Царствия Небеснаго.

Слава, и ныне, глас 2:
Кто сия, проницающая аки утро, / сияющая яко солнце благодатию? / Сия есть Пресвятая Матерь Света и Царица Небесе и земли. / Сия Радость всех скорбящих / и Путеводительница к горнему Иерусалиму рабов Своих, / Сия Иерусалимским образом Своим / восхоте прийти к нам на помощь и спасение наше. / Тоя молитвами, Христе Боже наш, / щедроты Твоя даруй нам, / и помилуй нас, яко Благ и Человеколюбец.
На стиховне стихиры, глас 2.
Подобен: Доме Евфрафов:
Якоже жаждущии / на воду стекаются, / стецемся и мы, вернии, / во храм Богоматере / почтити икону Ея.
Стих: Лицу Твоему помолятся богатии людстии.
Помяни, о Всеблагая, / Тя с верою призывающия, / Дево Богородице, / и любовию притекающия / к иконе святей Твоей.
Стих: Слыши, дщи, и виждь, и приклони ухо Твое.
Празднующе ныне / Твоему честному образу, / молим Тя, Владычице: / сотвори ны достойны / лика празднующих на Небеси.
Слава, и ныне, глас 8:
Яко венцем пресветлым, / Иерусалимским образом Твоим, Богородице, / церковь Покрова Твоего обложися, / и светится радующеся, / и вопиет Тебе, Благословенная, недостойными усты нашими: / радуйся, диадимо честная и венче Божественныя славы: / радуйся, освящение и утешение рабов Твоих, / икону Твою с благоговением лобызающих.
Тропарь, глас 1:
Возсия нам яко солнце светозарное, / Твоя, Владычице, благодати причастная икона, / к нейже мы умильно взирающе, / величаем Твое к нам Матернее благоутробие, / и купно от Тебе рождшагося Бога славим, / спасающаго Тобою души наша.

На велицей вечерни
На Господи, воззвах: стихиры, глас 6 на 8:
Се храм исполнен славы! / Радуйтеся, людие, и веселитеся: / сияет бо к нам светом благодатным / образ Света Присносущнаго / и Его Безневестныя Девы Матери, / имже озаряющеся, / благодарственно воспеваем: / слава в вышних Богу, / яко не остави нас сирых, / но призре на ны свыше дарованием храму сему / священнаго сокровища / во освящение и спасение душ наших.

Станем вси благоговейно, / и со страхом воспоим величия Божия Матере: / Та бо Храм одушевленный и Престол Небес пространнейший явися / Сопревечнаго Отцу Слова. / Та возрасти нам Древо Жизни, / всех Жизнь во утробе нося, / Тоя обновишася дольняя, / и процвете языков пустыня безплодная, / Тою украшается девственных лик, / и славится обитель сия, / озаряющеся благодатию от светозарныя иконы Ея / во освящение и спасение душ наших.
Кто Сия, превыше Херувимов / и славнейшая Серафимов, / песнопения нашего виновная? / Сия Матерь Господа Небесных сил, / даровавшая Свой святый лучезарный образ / со Превечным на руках Младенцем, / Создателем всея твари, / во отраду скорбящим и от злых духов томимым, / во освящение и спасение душ наших. / Хвалим тя, ските преподобнаго Нила Сорскаго, / яко освященными руками постника твоего / даровася нам благодати причастный образ Богоматере. / Сего ради светло ныне торжествуем, веселимся и радуемся, / во псалмех и песнех духовно празднующе / и благодарственно воспевающе / Благоизволившую чудотворною иконою Своею зде пребывати / во освящение и спасение душ наших.

Ины стихиры, глас 4.
Подобен: Яко добля:

Пред Твоею, Богородице, иконою ликовствующе, / прославляем Тя раболепно, / и чествуем, и поклоняемся, и молим Тебе по Бозе, / да мир умириши в Православии, / царския скиптры утвердиши, / и спасеши от всех зол рабы Твоя, / Едина Чистая и Благословенная.
Блажим Тя, о Дево Всепетая, / во святем Твоем храме сем, / иконы бо Твоея благодатию озаряеми, / славословие Тебе приносим, / егоже не отрини, Владычице, / но яко кадило благоухания приими, / и яко жертву непорочную, / Едина Чистая и Благословенная.
Под кров Твой, Всецарице, прибегаем, / и ко Твоему святому образу припадающе, молим Тя: / призри на ны, грешныя рабы Своя, / и из Тебе рождшагося Христа Бога нашего моли, / да препояшет нас с высоты Силою Своею, / еже творити всегда волю Его святую, / спасая души наша Твоим предстательством, / Едина Чистая и Благословенная.

От востока возсия нам вера Православная, / от востока и образ Заступницы Усердныя православных, / яко луча пресветлая явися России, / и пришествием оттуду во обитель сию нас озари, / егоже ныне обстояще, о братие, / упразднимся от суетных помышлений, / и возведем око умное к сиянию Света Присносущнаго, / да достойно совершаем празднственная Матери Света, / Яже есть Едина Чистая и Благословенная.
Слава, и ныне, глас 8:
Кто не удивится, Богоизбранная Дево, / Твоему о нас всеблагому смотрению? / Кто не воспоет еже к нам Твое Матернее Благоутробие? / Се нам изволением Твоим даровася чудотворный образ Твой, / имже украшается храм сей и процветает обитель сия. / Тем бо подаеши благодать Свою Богодейственно, / целительну душам и телесем и веселящую сердце, печалью сокрушенное. / О воистину Миро излиянное Имя Твое, Владычице, / благовоние издающее всей твари! / Темже Ти взываем: / радуйся, земнородных радосте, / радуйся, упование верных, / прибежище и спасение душ наших.
На литии стихиры, глас 2:
Киими воспоим устнами Твою неизреченную славу, / Богопрославленная Богородице Дево, / ангелы немолчно славимая и человеки непрестанно блажимая, / Небесе и земли благоговейное удивление. / Церкве Христовы велелепное хваление, / преисполненная всякия святыни, / человеколюбия неизследимая бездно, / дарований и чудес реко приснотекущая. / милосердно назирающая мир / и о спасении всех пекущаяся: / Иерусалимскою иконою Своею восхотевшая зде пребывати, / да тою освящаеши нас, / подающи мир и велию милость.
Глас 4:
Да каплют сладость облацы, / да источают веселие холми Горы Афонския, / срадующеся с нами о велицей милости Твоей, Преблагословенная, / чудо бо зримо есть Владычице, / яко прежде пустыня обнажена благолепия, / ныне Твоим присещением место славно, / и обитель зде яко град красен является, / и храм Покрова Твоего присносветел, / в немже Божественное сокровище, / Иерусалимская икона Твоя, показуется, / ея же мы зряще благолепие, благоговейно покланяемся / и прилежно молим Тя, Госпоже Всеблагая: / не престай миловати рабы Твоя, / покрывающи ны от всяких бед / Твоим всемощным предстательством.
Глас 6:
Сей день Матере Живота, / радуйтеся сынове Света, / образ Ея, светящийся благодатию, почитающии / и его ради светло празднующии, / и воспойте днешния радости виновней, / радостным сердцем вопиюще к Ней: / радуйся, обрадованная Мати Христа Бога нашего, / радуйся, вместилище Неизреченнаго Света, / солнечных лучей светлейшее: / радуйся, Радосте и Спасение душ наших.
Днесь в честнем Твоем храме / святый образ Твой обстоим, Богородице, / егоже даровала еси обители сей / в державный покров Твой и помощь, и в присное нам утешение, / яко да зряще его раби Твои, к любви Божественней распалаемся, / и надежду имамы известну, / яко не оскудеет от места сего благодать Сына Твоего и Бога / и Твое Матернее Благоутробие, / спасающее в мире души наша.
Слава, и ныне, глас 8:
Первее написавшейся Твоей, Богомати, иконе / Евангельских таин благовестником, / и к Тебе, Царице, принесенней, / да усвоиши ту и сильну соделаеши / спасти чествующия Тя, Всеблаженная, / и порадовалася еси, яко сущи милостива, / спасения нашего Содетельница, / яко уста и глас иконе бывши, / и на ту зрящи, глаголала еси со властию: / с сим образом благодать Моя и сила, / и мы истинно веруем, яко се рекла еси Госпоже, / сим образом с нами еси. / Темже со благоговением предстояще, / покланяемся Тебе раби Твои: / посети ны Твоими Матерними щедротами.

На стиховне стихиры, глас 6:
Владычице Всепетая, / святый храм Покрова Твоего якоже небо познавается, / в немже Иерусалимская икона Твоя, яко солнце светозарное, / лучи благодати испущающи, сердца рабов Твоих озаряет / и светолитием Твоего милосердия страстей мглу отгоняет, Дево, / не остави убо назирати достояние Твое, / и от всякаго зла покрывати ны, / верою и любовию Тебе величающия.
Стих: Помяну имя Твое во всяком роде и роде.
К тебе, Госпоже, живущей на Небеси, / Матери Бога нашего, / рабския очеса возводим, / и умильно взирающе на ангелов говейную икону Твою, вопием: / умилосердися, о Пречудная Всецарице, над недостойными рабы Твоими, / всех ущедри и утеши, / и даруй нам мир и спасение, / воспевающим Тя присно / и Твое Божественное Имя величающим.

Стих: Освятил есть селение Свое Вышний.
Ты еси по Бозе Богоневесто, / верным Заступница, / Ты страстей наших Целительница, / Ты страшная на враги Поборница рабом Твоим. / Темже Тя ныне пред Твоею иконою просим: / Сына Твоего и Бога моли / подати прощение грехом нашим, / освобождение от страстей губительных, от напастей и демонов злобы, / и необоримо от сих соблюди стадо Твое, / Тебе величающее.
Слава, и ныне, глас 4:
Да веселится пустыня Горы Афонския / и да цветет, яко крин, / слава Ливанова, дадеся ей и честь Кармилова. / Се бо в ней зрим вси славу Господню / и высоту Божия Матере, / в чудесех святых икон блистающую, / ихже не терпяще зрети ужасаются демони, / и бегают от человек, / жегоми суще невещественным огнем, / чудотворныя иконы осеняющим. / Мы же, благоговейно лобызающе / дарованный нам изволением Богоматере образ Ея пречестный, / со страхом и любовию Первообразней совершаем пение.

На утрени
По 1-й кафисме седален, глас 4:
Что воздадим Господеви, пречистый Свой и Его рождшия образ яко небесный дар нам ниспославшему? Наслаждающеся убо Того милосердия, гласы благодарения всеблагой Матери Его возшлем, вопиюще: слава Тебе, Владычице, и воплощшемуся из Тебе Христу Богу нашему, таковыя благодати нас сподобльшему.
Слава, и ныне, глас 5:
Что наречем храм Твой, Богородице, и в нем благодати причастную икону Твою? Пристанище ли духовное, или рай сладости небесныя, ходатайствен жизни некончаемыя? Вся бо имаши добрая, и молишися всегда Христу Богу о мире мира и спасении душ наших.
По 2-й кафисме седален, глас 3:
Божественными зарями просвети, и верою утверди, Всенепорочная Дево, поющих Тя умы, да вси любовию торжествуем, славяще во псалмех к нам образа Твоего пришествие, и Тя, яко Заступницу христиан, моляще спасти рабы Твоя от всякия беды, наставити на путь блаженныя жизни, и сохранити от хотящих погубити души наша.
Слава, и ныне, глас тойже:
Богородице Приснодево, ангелов Славо и земнородных Похвало, испроси Тебе воспевающим грехов всех прощение, буди милостива рабом Твоим, ко иконе Твоей притекающим, Ты бо еси Державный Покров верных и избавление от бед, Преблагословенная.
По полиелеи седален, глас 1:
Кое принесем песнохваление, или коими Тя венцы уверзем, Дево Чистая? Твоего бо Рождества таинство и ангельский лик воспети недоумеет: како Дева сущи, Матерь Богу возмогла еси быти, и паки Девою пребываеши? Но яко Благая, пение недостойных раб Твоих приими, Иерусалимскую икону Твою почитающих.
Слава, и ныне, глас тойже:
Блаженна еси в родех родов, Богоблаженная Дево Богородице, яко облак росоносный изволением Твоим послася нам, иже целебныя воды благодатно изливает, и сердца радости исполняет. Тем Тя славим, Сущую благих виновницу, и молимся Ти умиленно: Моли, Владычице, Христа Бога, да спасет Тобою души наша.
По 50-м псалме стихира, глас 6:
Да радуется с нами вышних ликостояние, / да веселится собор верных, / яко всех Зиждителя Матерь, / Царица сущи Небесе и земли, / яви нам Свое благоутробие пришествием чудесы, / прославленнаго образа Твоего, / подая благодатное освящение, / мир и велию милость.

Каноны Пресвятей Богородице иконы ради Ея
Глас 4
Песнь 1
Ирмос: Отверзу уста моя, / и наполнятся духа, / и слово отрыгну Царице Матери, / и явлюся светло торжествуя, / и воспою радуяся от иконы Тоя чудеса.
Припев: Ангели Богоматерь прославляют, / и мы днесь славословим, / чтуще Иерусалимскую икону Ея.
Сияние Славы Отчия, Сый от Света Свете Присносущный, озари, молю, ум и сердце мое, Иисусе, и наполни мя духа, да воспою радуяся Тебе рождшия чудеса.
Припев: Ангели дивятся величию Твоему, Всецарице, / и мы, бреннии, чудесем, / ихже иконою Твоею совершила еси.
Пою сердцем и усты не древнюю златую стамну, в нейже бе манна, но пою Деву Богородицу, носившую Христа во чреве, и славлю Тоя образа Богосовершенная чудеса.
Припев: Ангели радуются славе Твоей, Дево, / веселимся и мы, дольнии, / припадающе ко иконе Твоей.
Ты, по Соломону, Источник вертограда, и Кладязь Воды Живыя, истекающия от Ливана. О Мати Жениха Церкве! От иконы бо Твоея, Владычице, благодатныя струи на нас лиются.
Припев: Ангели на Небеси Тя, Богородице, воспевают, / и мы славим зде в дому Твоем, / лобызающе икону Твою.
Сердце наше привлекла еси, Дево Чистая, и тайным образа Твоего благолепием, и боголепна онаго чудесы, темже поюще молим Тя: и наши души благообразны соделай, Владычице.
Ин канон, глас 1.
Ирмос: Песнь победную:
Припев: Ангели ублажают милосердие Твое к людем, / благодарим Тя и мы, Мати Божия, / празднующе иконе Твоей.
Празднество совершающе днесь Иерусалимскому образу Твоему, Приснодево, благоговейно исповедуем, и любовию прославляем Твое еже к нам Матернее благосердие.
Припев: Ангели славят промышление Твое о верных, / и мы поем Тя, явльшуюся нам на помощь Своим образом.
Духовно веселящеся, благодарим Тя, Мати Божия, от России пришедшую чудотворною иконою Твоею, и пребывающую во храме Покрова Твоего, да будеши Покров наш Необоримый.
Припев: Величай, душе моя, / благодать оставившую верным / во святых иконах Своих.
Благословляюще промышление Твое о нас, молимтися прилежно: буди Присная Заступница обители сея, от всяких тяжких и лютых избавляющи рабы Твоя, и ко спасению наставляющи ны.
Припев: Величай, душе моя, / Прославившую благодатию чудес Иерусалимскую икону Свою.
Не престай, Госпоже Всеблагая, милостивным оком призирати на ны, и вся благопотребная ко общему житию ниспосылай нам, молящимся Тебе пред честным образом Твоим.
Ин канон, глас 8.
Ирмос: Воду прошед:
Припев: Величай, душе моя, / Всемилостивую Владычицу, / иконою Своею обитати зде восхотевшую.
Днесь празднует Тебе, Дево, обитель сия в наследии Твоем, и святый храм Покрова Твоего благоукрашенный светится, почитая честную икону Твою.
Припев: Величай, душе моя, / Преблагословенную Марию, / освящающую ко иконе Ея притекающих.
Срадуйтеся нам, все множество монашествующих на Афоне, во священном празднестве Богоматери, / вопиюще с нами: Попечительница наша Ты еси, Пречистая.
Слава: Светом Солнца Трисияннаго озаритися моли, Богородице, певцем Твоим, славящим торжество Твое и вопиющим: Промыслительница наша Ты еси, Пречистая.
И ныне: Сокровище священное благоволила еси, Владычице, даровати святому храму Твоему, светозарную икону Твою, многая знамения совершила еси.

Песнь 3
Ирмос: Твоя песнословцы, Богородице, / живый и независтный источниче, / лик себе совокупльшия духовно утверди, / и святым образом Твоим / Тя славящия освяти.
Припев: Ангели Богоматерь прославляют, / и мы днесь славословим, / чтуще Иерусалимскую икону Ея.
Якоже новая луна явися на Российстей тверди Твоя икона, озаряя сущия во мраке, и приводя ко свету Богоразумия и нас, озаряемых иконою Твоею, спаси от тьмы неразумия, молим Тя, и Твоя певцы вечныя славы сподоби.
Припев: Ангели дивятся величию Твоему, Всецарице, / и мы, бреннии, чудесем, / ихже иконою Твоею совершила еси.
Утверди, прослави, вознеси рог христиан православных, верных Помощнице: обитель сию, Россию и вся грады и страны в мире сохрани, и чтущия честный образ Твой венцев славы сподоби.
Припев: Ангели радуются славе Твоей, Дево, / веселимся и мы, дольнии, / припадающе ко иконе Твоей.
Расторгни пленицы наших грехопадений, избави от рова страстнаго жития, и даруй свободу рабом Твоим, Госпоже, да скончаем прочее живота нашего время в мире и покаянии, уповая наследити вечную славу.
Припев: Ангели на небеси Тя, Богородице, воспевают, / и мы славим зде в дому Твоем, / лобызающе икону Твою.
Поем и славим Твою, Богоневесто, неистощимую благодать, и пред иконою Твоею молящеся вопием: удиви благость Твою на нас в сей и будущей жизни, яко Едина по Бозе вся могущая.
Ин. Ирмос: Камень, егоже небрегоша:
Припев: Ангели ублажают милосердие Твое к людем, / благодарим Тя и мы, Мати Божия, / празднующе иконе Твоей.
Иерусалимскою иконою Твоею, с неюже благодати присущей быти рекла еси, Благодатная, в России благоизволила еси пребывати, благословения и благодати чудес сподобляющи с верою притекащих к Тебе.
Припев: Ангели славят промышление Твое о верных, / и мы поем Тя, явльшуюся нам на помощь Своим образом.
Иерусалимский образ Твой, Госпоже, списанный чтителем Твоим Нилом, тоюжде благодатию осенила еси, сего ради он яко спасительное сокровище, пристанище и успокоение в волнах скорбей и яко многоцелебный елей сердцу и души являет.
Припев: Величай, душе моя, / благодать оставившую верным / во святых иконах Своих.
Освящаемей честней иконе Твоей, Владычице, сподобися благоговейный служитель Твой знамения и от богоугоднаго раба проречения, и последи многая совершахуся благодатная действия от образа Твоего.
Припев: Величай, душе моя, / Прославившую благодатию чудес / Иерусалимскую икону Свою.
Божественных дарований и мы причастницы быти хотяще, Всеблагой Деве молитвы принесем: подает бо освящение и цельбы душам и телесем со благоговением лобызающим святую икону Ея.
Ин. Ирмос: Небеснаго круга Верхотворче:
Припев: Величай, душе моя, / Всемилостивую Владычицу, / иконою Своею обитати зде восхотевшую.
Крепость и утверждение, Благословенная, иночествующих Горы Твоея, явилася еси зде Иерусалимскою иконою Твоею, да будеши Заступнице Присная рабом Твоим.
Припев: Величай, душе моя, / Преблагословенную Марию, / освящающую ко иконе Ея всех притекающих.
Чистшая светлостей солнечных, Богомати Пречистая, благодатию Твоего образа, яко лучами солнечными, озаряеши стадо Твое, и согревавши сердца наша, тму страстную отгоняющи.
Слава: Трисолнечное Богоначалие воспоим, даровавшее верным теплую ходатаицу Приснодеву Богородицу, образом Своим осеняющую ны, грешныя рабы Своя.
И ныне: Боголюбивый муж, благодатию просвещаемь, сказа будущая о Иерусалимстей иконе Твоей, Владычице, еже и бысть в прославление имене Твоего.
По 3-й песни седален:
Тя помощницу сильну и непобедиму ведуще, пред Иерусалимским образом предстоим, Богоневесто, и моление приносим от всея души, требующии всегда Твоея помощи: вонми, о Премилосердная Владычице, и подаждь душам нашим спасение и богатую Твою милость.
Слава, и ныне:
Исполнение Закона и пророков, Рождшая Христа Бога, исполни радости и веселия всех, чтущих святую икону Твою, Владычице, да Тя радостно воспоем, и любовию Имя Твое прославим, яко Ты еси Едина от всех родов избранная, благословенная и препрославленная.
Песнь 4
Ирмос: Седяй в славе / на Престоле Божества, / во облаце легце / прииде Иисус Пребожественный, / Нетленною Девою / спасает чтущия образ Тоя пречестный.
Припев: Ангели Богоматерь прославляют, / и мы днесь славословим, / чтуще Иерусалимскую икону Ея.
Зряще на Твою, Богородительнице, икону, молим Тя, яко Матерь Света Незаходимаго: отжени от нас мрак страстей Того светлостию, да просвещшеся воспоем: слава силе Твоей, Господи.
Припев: Ангели дивятся величию Твоему, Всецарице, / и мы, бреннии, чудесем, / ихже иконою Твоею совершила еси.
Ты тихое обуреваемым Пристанище, Ты Радость печалию погруженным, болящим Ты Исцеление и Покров всем, к Тебе прибегающим, Владычице, Едина Чистая и Благословенная.
Припев: Ангели радуются славе Твоей, Дево, / веселимся и мы, дольнии, / припадающе ко иконе Твоей.
Не надеемся на князи, ни на сыны человеческия: но все наше упование на Твоего Сына, Приснодево, возлагаем, и веруем непреложно, яко Той есть Спасение наше, и не постыдимся.
Припев: Ангели на небеси Тя, Богородице, воспевают, / и мы славим зде в дому Твоем, / лобызающе икону Твою.
Тя, Богоневесто, недостойнии раби славим, лобызающе бренными устнами образ Твой святый, и Тебе молимся со слезами, сохрани нас от лютых грехопадений, да избавимся от вечныя муки.
Ин. Ирмос: Духом провидя:
Припев: Ангели ублажают милосердие Твое к людем, / благодарим Тя и мы, Мати Божия, / празднующе иконе Твоей.
Видев достохвальный Нил благодатную силу, явленно пребывающую при святей иконе Твоей, глас, сказание, исцеление болезней, от огня спасение и иная чудеса, благодарственно взываше: слава, величие и честь Тебе, Приснодево Богородице.
Припев: Ангели славят промышление Твое о верных, / и мы поем Тя, явльшуюся нам на помощь Своим образом.
Восхищену бывшу в соннем видении верному рабу Твоему, Госпоже, во Афон, и путеводимому святолепным мужем, сподобися от Тебе прияти благодатное во образе манны укрепление, и услыша благую волю Твою о Пречестней иконе Твоей.
Припев: Величай, душе моя, / благодать оставившую верным / во святых иконах Своих.
Прославляем вкупе с Нилом и величаем Тя, Дево, Промыслительницу нашу, Попечительницу и Покровительницу, яко повелела еси чтителю Твоему чудотворный образ Твой послати семо во утешение наше и в Покров необоримый.
Припев: Величай, душе моя, / прославившую благодатию чудес / Иерусалимскую икону Свою.
Благодарение приносим и Тебе, преподобне Ниле Сорский, яко от честнаго скита твоего, чрез соименнаго тебе подражателя жития твоего, прияхом святую икону Богоматере, яковое сокровище послася семо аки в возмездие за изнесенное тобою отселе сокровище устава скитскаго.
Ин. Ирмос: Ты моя крепость:
Припев: Величай, душе моя, / Всемилостивую Владычицу, / иконою Своею обитати зде восхотевшую.
Ты еси Помощница христиан, Богоневесто, Ты еси Покров и Утешение наше, темже молим Тя: помощь Твою ниспосылай с верою Тебе призывающим.
Припев: Величай, душе моя, / Преблагословенную Марию, / освящающую ко иконе Ея притекающих.
Ты еси Упование концев земли, Дево, и Предстательнице верных, яже Бога плотию неизреченно рождши: Ты мольбами Твоими свобождай ны от всяких лютых.
Слава: Ты еси девства похвала, Богородице, Ты еси спасения нашего главизна, Единаго от Троицы воплотившая на спасение наше, Ты убо очисти поющих Тя пред иконою Твоею, Благословенная.
И ныне: Ты еси, Всецарице, ангелов Радость и человеком Прибежище, и к Тебе притекаем во всякой нужде: Покровом Твоим невреждены нас соблюди от стрел врага борителя.
Песнь 5
Ирмос: Ужасошася всяческая / о Божественней благости Твоей: / Ты бо Неискусобрачная Дево, / во храме Покрова Твоего явилася еси Иерусалимскою иконою, / да с верою молящимся внемлеши, / мир и спасение подавающи.
Припев: Ангели Богоматерь прославляют, / и мы днесь славословим, / чтуще Иерусалимскую икону Ея.
Неисповедимое благодеяний Море вемы Тя, Богородице, паче бо ума и слова Ты прославилася еси оными, тем ныне в песнех Тя славим благодарственно.
Припев: Ангели дивятся величию Твоему, Всецарице, / и мы, бреннии, чудесем, / ихже иконою Твоею совершила еси.
Дивный во святых Своих Бог, Тобою без сравнения дивен показася, Дево, яко во утробе Твоей вместитися благоволи, и сотвори Тя славнейшую Серафимов.
Припев: Ангели радуются славе Твоей, Дево, / веселимся и мы, дольнии, / припадающе ко иконе Твоей.
Мати Царя Небеснаго, яко Всебогатая Дароподательница, ниспосли нам Божественную милость от Источника Благодати Сына Твоего, Тя в сем празднице Твоем величающим.
Припев: Ангели на небеси Тя, Богородице, воспевают, / и мы славим зде в дому Твоем, / лобызающе икону Твою.
Надеждо верных и Избавление, Владычице, храни от всякия беды рабы Твоя, и от всех недугов исцели верою покланяющихся Иерусалимстей иконе Твоей.
Ин. Ирмос: Той мир подаждь:
Припев: Ангели ублажают милосердие Твое к людем, / благодарим Тя и мы, Мати Божия, / празднующе иконе Твоей.
Благоговеющий к повелению Твоему служитель Твой, Госпоже, провождая семо икону Твою, вопияше Ти со слезами: виждь, Владычице, исполнение воли Твоея: благоволи удостоити мя спасаемых части, Матерски о сем умоляющи Твоего Сына и всех Творца.
Припев: Ангели славят промышление Твое о верных, / и мы поем Тя, / явльшуюся нам на помощь Своим образом.
Приимше от раба Твоего благодатию сияющий образ Твой, Чистая, прияхом той аки от Твоих рук в благословение созидавшемуся тогда храму Покрова Твоего, и с явлением иконы и украситель Дома Твоего явися, емуже подала еси благопоспешение.
Припев: Величай, душе моя, / благодать оставившую верным / во святых иконах Своих.
Отъяла еси пришествием во обитель святаго образа Твоего, Всеблагая Дево, от рабов Твоих уныние и окружавшия нас преграды, и вместо сих радость и благоденствие стаду Твоему даровала еси, слава Твоему о нас смотрению.
Припев: Величай, душе моя, / Прославившую благодатию чудес / Иерусалимскую икону Свою.
В знамение Покрова Богоматере облагодатствованный образ Ея имуще, возложим упование наше на Ню, не предающеся малодушию в скорбех: Царице бо небесе и земли необоримая есть нам Защита.

Ин. Ирмос: Просвети нас:
Припев: Величай, душе моя, / Всемилостивую Владычицу, / иконою Своею обитати зде восхотевшую.
Просвети ны, Светоносная Марие, смиренныя рабы Твоя светом Божественнаго Лица Твоего, Егоже подобие ныне обстоим и покланяемся, славяще благость Твою.
Припев: Величай, душе моя, / Преблагословенную Марию, / освящающую ко иконе Ея притекающих.
Духовно днесь веселимся, благодаряще Тя, Владычице, пред святым образом Твоим; от него бо, яко от живоноснаго источника, источавши радость нам, освящение и здравие.
Слава: Тя, обрадованная, Ходатаицу благоприятну ко Пресвятей Троице предлагаем, грешнии, прошения наша пред иконою Твоею Иерусалимскою возмещающе.
И ныне: Едина паче всех святых имущая дерзновение, Богородице, моли Сына Твоего о всех нас, да не помянет грехов наших, прилежно молим Тя.
Песнь 6
Ирмос: Божественное сие и всечестное / совершающе празднество / иконы ради Богоматере, / приидите руками восплещим, / от Нея рождшагося Бога славим.
Припев: Ангели Богоматерь прославляют, / и мы днесь славословим, / чтуще Иерусалимскую икону Ея.
Торжествующе ныне во храме Твоем, Пречистая, и Твоему припадающе честному образу, молим Тя умиленно: сотвори нас достойны быти лика празднующих, в торжестве избранных Сына Твоего.
Припев: Ангели дивятся величию Твоему, Всецарице, / и мы, брении, чудесем, / ихже иконою Твоею совершила еси.
Да рыдают демони, жегоми суще невещественным огнем от святыя иконы Девы Чистыя, и да бежат от человек в бездну, им уготованную: мы же веселящеся в песнех Препетую величаем.
Припев: Ангели радуются славе Твоей, Дево, / веселимся и мы, дольнии, / припадающе ко иконе Твоей.
Всецелебный Источниче, Богородице, зноем страстей палимую душу мою напой благодатными струями Сына Твоего, и услади горесть сердца моего зрением образа Твоего.
Припев: Ангели на небеси Тя, Богородице, воспевают, / и мы славим зде в дому Твоем, / лобызающе икону Твою.
Слово Отчее рождшая, избави от безсловесия раба Твоего, и даруй ми, Благословенная, струи слезныя, да не постигнет мя плач неутешимый.
Ин. Ирмос: Пророка Иону подражая:
Припев: Ангели ублажают милосердие Твое к людем, / благодарим Тя и мы, Мати Божия, / празднующе иконе Твоей.
Якоже солнечными лучами паче просвещается: сице и днешнее торжество светозарнейшее является, озаряемое благодатными лучами иконы Твоея, Богорадованная, и всех нас радости исполняет.
Припев: Ангели славят промышление Твое о верных, / и мы поем Тя, явльшуюся нам на помощь Своим образом.
Якоже две маслины и два свещника, иже во откровении Иоанна, стоят пред Сыном Твоим и Тобою, Дево, праведнии родители Твои, ихже подобие на иконе Твоей веселит ны, убелажающия тех с Тобою.
Припев: Величай, душе моя, / благодать оставившую верным / во святых иконах Своих.
Якоже зритель чудес от святаго образа Твоего виде благодать Твою, целящую болезни и утешающую в скорбех: тако и нашим недугом подаждь цельбу и в скорбех утешение, Богоблагодатная.
Припев: Величай, душе моя / Прославившую благодатию чудес / Иерусалимскую икону Свою.
Якоже раб твой Нил сподобися зрети при иконе Твоей силу, спасающую от огня: тако и ныне, Госпоже, благодатию, присущею образу Твоему, храни храм сей и обитель от запаления и иных бед.
Ин. Ирмос: Молитву пролию ко Господу:
Припев: Величай, душе моя, / Всемилостивую Владычицу, / иконою Своею обитати зде восхотевшую.
Призри, Дево, на Твоя недостойныя рабы, обстоящия Иерусалимскую икону Твою в Церкви Покрова Твоего и молебно возвещающия Ти печали своя: от тли греховныя, Нетленная, возведи ны.
Припев: Величай, душе моя, / Преблагословенную Марию, / освящающую ко иконе Ея притекающих.
Священное сокровище и неотъемлемое изволением Твоим имамы, грешнии, Иерусалимский образ Твой, Богоневесто, и Держимаго Тобою Вседержителя, у Негоже испроси нам силу благое исправляти.
Слава: Неисповедима сила Твоя и слава, Богородице: всяка душа верных Тобою хвалится и спасение получити уповает, яко Тя со святыми Иоакимом и