Редкие Богослужебные тексты

взято в ustavschik.livejournal.com/
Служба блаженному Августину, епископу Иппонскому
НА МАЛОЙ ВЕЧЕРНИ
Стихиры на Господи воззвах: на 4, глас 8:
Исправление добродетелей твоих, святе, / радости исполни вселенную всю, / ты бо талант, ти данный Господом, / сторицею приумножил еси / и многи люди во спасение управил еси; / темже Христа моли, / Августине блаженнейше, //да избавит нас от силы вражия.
От художества философии еллинския / и лжеплетений суемудрия еретическаго / обратився, к познанию Божественному, богомудре, / миру учитель мудрейший показался еси, / святителю Августине, // Божественным Крещением преславно изменився.
На священноначальство вшед, святителю Августине, / священнейший образ священноначальником показался еси:/ жизнь свою Христу, яко жертву непорочную принесл еси, / темже и на высокая / во премирная селения востекл еси. / Христа моли, Христу помолися, всемудре, // да спасет души наша.
Слава, глас 6:
Еллинския мудрости / премудро небрегл еси / и еретическаго суесловия избежав, / апостолов же Божественное учение, / Святым Духом вещаемо, / святителю Августине, / и огненными языки ясно изглашаемо / возвещал еси исповедание веры нашея / во Отца и Сына, и Святаго Духа / - Единаго Бога // в Троице прославляемаго.

И ныне: Богородичен:
Ум ангельский и человеческий / изъяснити не может/ неизъяснимаго и преславнаго таинства / рождества Твоего, Богородице. / Тобою бо Свободный естеством / образом раба нас ради обнищал есть / богатства благости Своея ради, / Ему же молися, Приснодево, // да спасет души наша.
НА ВЕЛИЦЕЙ ВЕЧЕРНИ
Стихиры на Господи воззвах: на 8, глас 8:

Во всю землю изыде вещание / богодарованных добродетелей твоих, / чудне Августине, / и благоухание словес твоих / вселенную всю осия, / ты бо аки звезда пресветлая / любовию возсиял еси, / небо церковное украшая, / на ея же сияние взирающее, / вернии веселия исполняются / и шествовати ко Иерусалиму Горнему научаются, / и твоими ходатайствы / козней вражиих избавляются. / Темже Христа моли, / дивный святителю, // да спасет души наша.
Дивно житие твое, / святе Августине, / купцу бо, драгих перлов взыскующу, / уподобился еси / и, велие сокровище правыя веры обрет, / лжемудрие еллинское / и прельщение еретическое отвергл еси / и всем сердцем Троице, / во Единице покланяемой, / прилепился еси, / Той же ныне молися // спастися душам нашим.
Велия благочестия столпа / яви тя миру чудес Бог, / святителю Августине, / ты бо отрады и упокоения / души своея взыскуя, / и правыя веры сокровище нелестное / обрел еси, / житием своим и словом / истину его запечатлев, / ересей же злокозненных терния, / всемудре, посекл еси, / и писаньми своими / верных усладил еси. / Христа моли, Христу помолися, всечудне, // да спасет души наша.
Отче всемудре, / богомудрствующих умов похвало, / святителю Августине, / лопата воистину богоделательная, / еюже пшеница Христова очищается, / и мерило, имже тяжкое и легкое учений благорассуждается; / выну взор ко Господу / горе устремленный имея, // моли спастися нам.
Дивно житие твое, / святе Августине, / в немже от тьмы нечестия / ко Свету истиному шествоваше, / души, во мрак заблуждений поползшияся, просвещающему, / ослепление же неведения исцеляющему / и к жизни нестареющейся путь озаряющему. / Ему же ныне молися // спастися душам нашим.
Ангелов лицы / и человек соборы удивишася, / славу Божию, тя облиставшую, зряще, / святителю славне Августине,/ ты бо в житии твоем / велиим поборником / веры, надежды и любве показался еси, / покаяния же и исправления / учителем дивным явился еси, / темже, престолу Пребожественныя Троицы предстоя, // моли спастися всем нам.
Слава, глас 6:
О святителю всеблаженне / отче Августине, / уста, божественныя гласы источающая / и от неоскудевающих источников / Премудрости Божественныя почерпающая, / сторицею талант, Богом данный ти, преумноживый, / правило, к добродетели правящее, / уме, зарею Пребожественныя Троицы просвещенный, / Ея же и непобедимь поборник явился еси;/ днесь Престолу Ея предстоя, / молися, молимся, // спастися душам нашим.
И ныне: Богородичен.

На литии стихиры, глас 3:
Венец победительный, / яко благоподвизаяйся приим, / во обители горния востекл еси, / темже Ангелов воинство возвеселил еси, / о единем кающемся ликовствующее, / и от Владыки всяческих слышиши: / прииди, рабе благий и верный, / ныне вниди в радость Господа твоего, // трудов воздаяние приемля.
Ум твой, святителю Августине, / верою удобренный, / светел явися, всеславне, / в телеси человека перстнаго и тленнаго, / премудре, нетлению научився / и страстей кроме явився, / светлости бесплотных сподобился еси, / с ними же ныне молися / Троице Пребожественней // спастися, молимся, душам нашим.
Блага мирская преходящая отринув, / святителю славне Августине, / пламень любве ко Господу вжегл еси / и с небесе сияние приял еси, / светом истины / сердце и душу твою просвещающее / и из устен твоих / токи наставлений живоносных изливающее, / и во ограду Небеснаго Царствия / путь указующее; // его же улучити нам молися, молим тя.
Слава: глас тойже:
Святителю отче Августине, / во всю землю изыде / вещание исправлений твоих, / ты бо плетения еретическия разорил еси / и стадо церковное мудре упасл еси; / темже в селениих горних/ мзду трудов твоих обрет / и дерзновение имуще ко Спасу, // моли спастися всем нам.
И ныне: Богородичен.

На стиховне стихиры, глас 5:
Огнь горящ на ереси / явился еси, блаженне, / света разумнаго блистание, / святительская красото, / жития христианскаго правило, / нам же заступник и помощник показался еси, // свобождая от губителя души наша.
Вертоград Христов дивный, / покаянием процветый / и плоды благочестия многия израстивый, / восхваляем тя всякия славы достойнейшаго, // святителю блаженне Августине.
Сладость богоразумия / из уст твоих священных излияся,/ всехвальне Августине, / еюже напояеми, // восхваляем тя любовию, всехвальне.
Слава: глас тойже:
Восхваляем тя, святителю Августине, / Церкве Христовы украшение, / яко учителя мудраго / и пастыря добраго, / кто бо веру твою видя, / надежде и любве не удивися; / не токмо бо словом научил еси / паче же исполнил еси. / И ныне, неувядаемым венцем увенчався, // моли о спасении душ наших.
И ныне: Богородичен
Тропарь, глас 4:
Сердцем всем Христу последуя, / святителю Августине,/ словом и житием своим / истину запечатлел еси / и ересей злочестивых / неленостный искоренитель явился еси; / темже молися выну / ко Святей Троице, // да спасет души наша.

НА УТРЕНИ
На Бог Господь: тропарь тойже.
По первом стихословии седален, глас 5:
Еретиков лаяния погребл еси, верныя же во благочестии утвердил еси, сего ради проповедника тя истины вси именуем, великаго учителя, святителя и угодника Христова.
Слава, и ныне: Богородичен:
Мати, Дево Безневестная, Пречистая, единое верным предстательство и покрове спасения, избавляй бед и скорбей всяческих на Тя упование возлагающих.

По втором стихословии седален, глас 5:
Преставление твое ко Христу достойно славяще и житие твое всехвальное вспоминающе, воспеваем Творца всяческих, ты бо благочестно Тому последовал еси, и воздержанием плотское мудрование увядил еси, сего ради со святыми во Царствии Отца Небеснаго водворяешися.
Слава, и ныне: Богородичен:
Богородице, Дево Всенепорочная, Пресущаго Бога плотию рождшая, молися Творцу всяческих с великим учителем и святителем Августином спастися нам, Тя славящим верою.

По полиелее седален, глас 4:
Чины воинств небесных чистым и святым житием твоим удивил еси, род же человеческий святительством твоим возвеселил еси, ты бо глубины боговедения прозрел еси и красноглаголанием пастве своей преподал еси, темже души многи от рвов заблуждений пагубных исхитил еси, великий учителю и святителю Августине, моли Христа Бога спастися нам, память твою светло торжествующим. (Дважды).
Слава, и ныне: Богородичен:
Всея вселенныя сокровище великое и радование воспоим, вернии, Деву днесь, Та бо со святителем Августином у Престола Небеснаго Царя молится спастися верою Ю ублажающим.
По 50 псалме стихира, глас 6:
Словес твоих божественная благодать / лествица восхода небеснаго нам бысть, / ты бо еси велий славный святитель / и Церкве Христовы богомудрый учитель; / житие твое преславно, Августине, / и успение со святыми. // Моли спастися душам нашим.

Канон, глас 6:

Песнь 1
Яко по суху пешешествовав Израиль, по бездне стопами, гонителя фараона видя потопляема, Богу победную песнь поим вопияше.
Приидите, вернии, препрославленную память святителя великаго и вселенныя учителя Августина блаженнейшаго согласно празднуим, еретиков посрамителя и покаяния проповедника.
Избран Господем быв служение святительское восприяти, в правоверии и любви божественней учении твоими премудрыми паству Христову упасл еси, святителю.
Премудрость Божественную свыше прияв, учение животворное источил еси, души, страстьми попаленныя, исцеляющее, святителю славне Августине.
Богородичен: Яко Вселенныя сокровище великое чтем Тя, Дево Пренепорочная, Ты бо миру от Троицы Единаго родила еси, Ему же молися, да спасет ны.

Песнь 3
Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Воспоим, вернии, днесь / пастыря и святителя / и вселенныя учителя, / правило веры и образ, // и Божественнаго Пастыреначальника подражателя.
Божиим изволением произбран быв, / святитель великий Церкве Христовы / явился еси, / бескровную Тайную Жертву / Агнцу Божию принося, // мира грехи на Ся вземлющему.
Сеяние молитвы слезныя / матере твоея святыя / явился еси / и плод сторичный / Творцу Господу верою принесл еси, // Августине славне.
Богородичен: Дверь Небесная / нам еси, Богородице, / еюже Царь славы к нам вниде, // Его же моли спастися нам.

Седален, глас 7:
Еретическая злокозненная шатания посрамил еси, Христову же Церковь верно управил еси, темже, в селениих горних водворяяся, блаженне, святе Августине, молися о душах наших.
Слава, и ныне: Богородичен:
Клятвы древния разорение и обетований Божиих всеспасительных исполнение, Богородице, явилася еси. Темже молися Рождшемуся от Тебе, да избавит ны от силы вражия.
Песнь 4
Христос моя сила, Бог и Господь, честная Церковь боголепно поет взывающи, от смысла чиста о Господе празднующи.
Непреоборимь явился еси, святителю Августине, по Бозе Вседержителе воинствуя и во всем веления Того исполняя.
Ограда твердая церковная явился еси, святе, словесы и делы исправляя правая, Августине, великий учителю.
Меч воистину божественный на ереси явился еси и гром, нечестивыя устрашаяй, души же верных словом истины укрепляеши, Августине.
Богородичен: О Благословенная, Чистая, молимтися: молися к Рождшемуся от Тебе, да избавит души наша от искушений и обстояний.

Песнь 5
Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Свещу пресветлу яви тя миру Христос, блаженне, светом неизреченным осияв и святительства правило всем показав.
Божественне дело Божие совершая и чистым умом прикасаяся чистейшим, непорочен обрелся еси, Богу службу творя; темже и нас словом твоим освяти и научи благая творити.
Прикровенное Закона Ветхаго пастве твоей уяснил еси, от Божественных сокровищ Духа сказуя, небоявленне Августине.
Богородичен: Тебе, Содетеля плотию рождшей и клятвы древния Разрешительнице, восклицающе молимся: спаси осуждения верою Тя блажащия.

Песнь 6
Житейское море воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Души, гладом тающия, напитал еси / и жаждущия веселия божественнаго исполнил еси, / проповедуя и вещая, // всехвальне Августине.
Медоточныя капли добродетели всякия / любомудренно собрал еси / и от них вселенную усладил еси, // отче блаженнейший.
Благодатию Божественною осиян быв, / худшая на лучшая пременил еси / и сокровище некрадомое обрел еси, // святителю всехвальне.
Богородичен: Слово Божественное / во чреве вмещшая / и миру всему Спасение рождшая, // не премолчи за ны моляся ко Господу.

Кондак, глас 4:
Церкве Вселенския столпе непоколебимый, / на недвижимем камени веры утвержденный, / веры православныя учителю неленостный / и покаяния проповедниче велегласный, / истины возвестителю, / прехвальне Августине, святителю Христов, // просвети ны учением твоим.
Икос:
Премудрости уста, целомудрия чаша, Православия учитель Августин блаженнейший всем сияет мысленне. Приидите, уподобимся того смирению, вере же и любви, имиже дом Божества показася, и в радости тако возопиим: радуйся, прехвальне Августине, святителю Христов, просвети ны учением твоим.

Песнь 7
Росодательну убо пещь содела ангел преподобным отроком, халдеи же опаляющее веление Божие, мучителя увеща вопити: благословен еси Боже отец наших.
Премудрости светлостьми осиян, темиже паству твою облистал еси и пети Творцу всех подвигл еси: благословен еси, Боже отец наших.
Ум во глубины непостижныя вперив и бисер разума многоценный стяжав, мир премудростию исполнил еси, взывая: благословен еси, Боже отец наших.
Гордаго силу пресекл еси, блаже, смирением твоим, к Богу разумом чистым возносимый, Ему же пети научил еси: благословен еси, Боже отец наших.
Богородичен: Купину Тя огнегорящую Господь Моисею в Синаи древле прообразова, Ты бо огнь Божества невещественнаго прияла еси, мира спасения начало устроивши. Молися ко Святей Троице спасение нам даровати, мир и велию милость.

Песнь 8
Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.
Богоприятен святитель показался еси, отче Августине, Духом Божественным паству твою просвещаяй, да взывают вси: благословите вся дела Господня Господа.
Сердца, недугом ереси пагубныя уязвленная, благодатными словес твоих лечбами уврачевал еси, сего ради тая благодарне воспеша: благословите вся дела Господня Господа.
Праведниче, якоже финикс в дому Господни, отче, процвел еси и правды плоды принесл еси, имиже тя чтущии питаются, восклицающе: благословите вся дела Господня Господа.
Богородичен: Глаголом благодатных устен Твоих последующе, ублажаем Тя, Присноблаженную и взываем: благословите вся дела Господня Господа.

Песнь 9
Бога человеком невозможно видети, на Негоже не смеют чини ангельстии взирати; Тобою же, Всечистая явися человеком Слово воплощенно, Егоже величающе, с небесными вои Тя ублажаем.
Слава твоя, святе, во веки пребывает и память со всеми праведными, с ними же и нам вселитися моли, Августине, великий молитвенниче.
Зарю Утешителеву, блаженне, приял еси, тою ны облистая и словом Божественным питая; воистину бо источника непрестанна благодать миру тя показа, Августине, во веки.
Яко солнце светозарное миру память твоя возсия, отче Августине, в пристанище немятежное небесное световодящи верою тя восхваляющия.
Богородичен: Отроковице Пречудная, прежде век Сущаго приявшая, за крайнее благосердие Свое нам уподобившееся, и миру Спасение рождшая, спаси ны, верою Тя блажащия.

Светилен:
Истины ведения ревнителю, святе Августине, ереси всегорькия мечем уст твоих посекл еси и, ныне на Небесех Престолу Троицы Святыя предстоя, прилежно о нас молися, верою и любовию память твою совершающих.
Слава, и ныне: Богородичен:
Премудрость Ипостасную, Слово Пресущее и Врача всех рождшая, Всечистая Дево, душ наших струпы страстныя исцели и неврежденны от всякаго находа вражия Тя молящих сохрани, Заступнице Усердная.

На хвалитех стихиры, глас 8:
О всехвальне святителю Августине, / людей желания скорогибнущая уставивый / и на путь правый тех приведый, / в селениих Небесных вселился еси; / со всеми святыми / о нас ко Святей Троице молися, / да светом Истины // осияет души наша. (Дважды).

О блаженне отче Августине, / таинник Небесных изряднейший, / свеще воистину миру негасимая, / светом Божественных учений сияющая, / и огнь, ереси попаляяй;/ Троице ныне со апостольским ликом и пророческим, / мучеников, исповедников / и всех праведных предстоя, / поминай ны, // верою твою память совершающих.

О богомудренный учителю Августине, / словеса твоя отеческая, / яко сокровище велие, / нам оставил еси, / души богатящее / и разум во правомыслии соблюдающее; / и пастыря тя добра / миру яви тя чудес Бог, / Емуже молися о нас, // тя верою ублажающих.

Слава, глас тойже:
Троицы Непостижныя / проповедник явился еси: /Отца - Перваго Ума / и всяческих Виновника возвестил еси, / Слово Родителево, / вкупе же и Духа Святаго песнопел еси; / молися Пребожественней Троице, / во Единице покланяемой, // улучити нам обители Горния.
И ныне: Богородичен.

Молитва
блаженному Августину, епископу Иппонийскому

О преславный святителю Христов, Церкве Вселенския похвало, учителю богомудрый, Православия наставниче и покаяния проповедниче, блаженне Августине! Призри с высоты Горния на ны, недостойныя, твоея помощи и милосердия ищущия. Умоли Владыку всяческих, Емуже на земли всем житием твоим послужил еси, да дарует нам веру православную хранити и делы любве и милосердия ю запечатлевати, во благих же начинаниих грешным молитвенником твоим да споспешествует. Защити ны от злобных навет вражиих и ходатайством твоим Небесное Царствие улучити нам помози, идеже ты ныне в незаходимей сияеши славе пред лицем Всемилосерднаго Бога, в Троице покланяемаго и славимаго во вся веки веков. Аминь.