Редкие Богослужебные тексты

Иануария десятаго дне
Память преп. отца нашего Дометиана, еп. Мелитинскаго
ВЕЧЕР
Блажен муж: на Господи, воззвах, стихиры три, глас 1, зри Минею.
И=ны стихиры, глас 8.
Подобен: О преславнаго чудесе!
Святыя Троицы явление на Иордане/ светло празднующе,/ совокупим и радование/ в памяти богоноснаго отца,/ мудростию и постничеством/ на небосклоне Церковном издревле сияющаго,/ и согласно ему возопиим:/ угодниче Христов,/ вонми гласу моления нашего/ и исполни приносимая ти прошения\ во спасение душ наших.
Не жертвою, но милованием,/ рекл еси, богоглаголиве Дометиане,/ Отеческое Царствие наследуется,/ Слово бо Отчее, Господь Иисус,/ Сын возлюбленный,/ благоутробия ради/ во спасение наше страсть претерпе./ Тако ти учащу, отче,/ молитвою теплою твоею/ наша сердца умягчи\ и приклони нас к милости.
Духодвижимая гусль Небесных пений,/ грешным нам зовеши ясно:/ братие, облечемся в чистоту,/ яко да, облекше душу свою/ во одеяние светлое,/ сподобимся Божия трапезы,/ и не осуждены будем./ Сих словес твоих/ исполнения достигнути/ чтущим тя помози,\ чистейший отче.
Слава, глас 4.
По кончине супружницы твоея/ отче преподобне,/ Богу весь возложился еси,/ мироотречное восприяв житие,/ егоже венцем украсился еси,/ еже есть смиренномудрие сердца./ Тем укрощения и умирения/ благодатный дар приим,/ силою Вышнею действуя,/ огнепоклонников неистовство угасил еси./ Сего ради Церковь Христова/ яко миротворца тя воспевает./ Моли умирити и спасти\ души наша.
Вход. Прокимен дне. Чтения 3.
На стиховне, глас 5.
Подобен: Радуйся:
Тихое любомудрие словес твоих/ бури страстей и вражды угаси,/ отче предивный Дометиане,/ от Кротчайшаго Спаса нашего/ измлада восприим кротостную премудрость,/ яже настави тя/ на стези праведныя,/ сими же вшед на широту Небесную,/ ныне призри на ны, в немощи сущия,/ тя воспевающия,/ и к покаянию и страху Божию\ стези наша управи.
Стих: Честна пред Господем/ смерть преподобных Его.
Руце твоя, отче Дометиане/ не токмо на молитве воздева=ше, / но к нищим и стра=нным/ мно=жицею простира=ше,/ ущедряя, ми=луя и заступая./ Тем и Всемилостивый/ простре к тебе руце Своя/ и возведе на высоту добродетелей./ Многи труды твои,/ велия дарования,\ моли спастися душам нашим.
Стих: Блажен муж, бояйся Господа,/ в заповедех Его восхощет Его.
Ангела мира, согласия вестника,/ отче премирне Дометиане,/ и Апостольским трудом сопричастника,/ и к разсуждению путевожда=,/ и проповедателя Евангелия велегласна/ Церковь тя воспевает./ Ты бо, деянием,/ благоговением и смирением/ к Богу путь указуеши нам./ Моли тя славящим и почитающим/ причастники сих сотворитися\ и светом просветитися Божества.
Слава, глас 4:
Отне=леже святый апостол Петр/ плащаницу велию узре,/ с Небес низпущаему,/ проповедь Евангелия/ в четыре концы земли пронесеся,/ ты же отче Дометиане,/ благодати апостольския причастниче,/ проповедаше Православие велегласно,/ еретическия волки/ от овец Христовых отгоняя./ Тем и нас, присно претыкающихся,/ обаче веры правыя крепце держащияся,\ во ограду Небесную упаси.
Тропарь, глас 4.
Подобен: Вознесыйся на Крест:
Яко чи=ст и просвеще=ния Боже=ственнаго испо=лнь,/ в пастырское вручился еси попечение/ а=гнцем Христа Бога,/ отче преподо=бне./ Темже постничеством/ и многоразличными чудесы=/ святительскую твою багряницу украси=в,/ Це=ркве, Дометиа=не, яви=ся украси=тель,\ о сей предста=тельствуя.
Слава, и ныне, праздника.
НА УТРЕНИ
На Бог Господь: тропарь празднику дважды. Слава, святому. И ныне, празднику.
По 1-м стихологии седален, глас 3.
Подобен: Дева днесь:
Церковь днесь светло ликовствует/ и сердца радостию исполняет,/ Ангелы память праведнаго славословят,/ вернии заступника и молитвенника своего величают./ Праздник бо прииде\ Дометиана, епископа Мелитинскаго.
По 2-м стихологии седален, глас 4.
Подобен: Удивися Иосиф:
Умилосердися о нас, отче святый Дометиане,/ укроти гордыни высокая дмения,/ и самолюбия рог сокруши,/и направи нас, во страстех влающихся,/ ко смиренномудрию и зрению грехов своих,/ заступниче наш и молитвенниче,\ и причастниче Божия благодати.
Величание:
Ублажаем тя,/ преподобне отче Дометиане,/ и чтим святую память твою,/ наставниче монахов\ и собеседниче Ангелов.
По полиелеи седален, глас 5:
Пастырскою свирелию/ львы словесныя укротил еси/ и во овчата кроткая сих претворил еси,/ образ быв терпения и мужества./ Тем, яко паству твою иногда/ добре упасл еси,/ нас управи со страхом и трепетом/ спасение содевати/ и якоже прежде о чадех твоих духовных,/ о нас Христу Богу молися\ и испроси нам велию милость.
Слава, и ныне, глас 5.
Подобен: Собезначальное Слово:
Иорданскими струями обложся,/ Иже светом преславно одеваяйся,/ в нихже Адамово естество оновил еси,/ сокрушшеся злым преслушанием, Слове Божий./ Темже Тя восхвалем и святое Твое вси славословим явление.
Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфея, зачало 43.
По 50-м псалме стихира, глас 6:
Приидите днесь,/ вземше роги мысленныя,/ вострубим славу/ угодника Христова,/ силою бо Господнею/ гордость халдейскую посрами/ и вавилонское дмение низложи,/ яко да веры истинныя возсияет величие./ В празднице летнем его/ светло да возвеселимся,/ добродетели прославляюще/ возлюбившаго Бога и упасшаго агнцы Его,/ и согласно возопиим:/ отче приснопеваемый Дометиане,/ нас, монахи и бельцы,/ ихже собрал еси зде в памяти твоей,\ собери и в Царствии Небеснем.
Кондак, глас 3:
Духа Свята=го быв сосу=д,/ на высоте= просия=л еси Христо=вы Це=ркве,/ благода=тию святи=тельства бо укра=шен вся=чески,/ доброде=тели ради/ гове=ин показа=лся еси,/ Дометиане треблаже=нне,\ архиере=ев удобре=ние.
Икос:
Ангельским, и богоугодным, и благочестным нравом преудобрен, всеусердно служению Богу и Церкви Его предался еси,/ вся отребив яже долу влекущая,/ и пастве твоей помощник в скорбех и обстояниих сотворился еси,/ тем от нас приими хвалы таковая: Радуйся, рода благочестиваго прекрасная отрасле; радуйся, милосердия и благотворения образе. Радуйся, реко мира златоструйная, радуйся, кладезю божественных учений. Радуйся, ересей посечение; радуйся, хулителей изобличение. Радуйся, Святыя Троицы поборниче; радуйся, Правыя веры страже неусыпный. Радуйся, преподобне Дометиане.
Светилен, глас 2:
Неизреченная и неописанная зря блистания Божия красоты,/ светел умом сотворился еси,/ темже нашея тьмы просвещения испроси, отче Дометиане премудре.
На хвалитех, глас 4.
Подобен: Яко добля:
Многа, святе, быша шествия твоя/ из Мелитины в Царский град,/ сеяшеся всюду слово твое,/ от запада дойде до востока,/ благочестию научахуся/ и к Православию обращахуся/ злочестивых сердца/ мановением Владыки всех,\ Дометиане преславне.
Яко раба Царя Небеснаго/ и самодержца земнаго друга/ с песньми и тимпаны погребоша/ чудотворящее тело твое./ Тем, яко собеседника Ангелом/ и молитвы делателя неусыпнаго/ молим заступати нас от находящих зол/ у Господа Христа\ в двух естествах неслитно познаваемаго.
От царицы градов/ в град епископства твоего,/ отче досточестне,/ принесоша мощи твоя,/ с лики поющими и свещами,/ удивляющеся богоугодному жительству твоему/ и зовуще согласно:/ дивен еси во святых Твоих, Боже!\ Господи, слава Тебе.
Слава, глас 8:
Взявшим воям византийским/ на халдеи одоление,/ со амвона рекл еси,/ златословесный Дометиане:/ во всяцей победе/ Господу слава подобает,/ юже да воздадим трубы вещественными и смыслы!/ Сию славу сподоби и в веце будущем/ вкупе с тобою Богу воспевати,/ в странствии же нашем земнем/ буди нам печальник, и заступник,\ и ходатай о душах наших.
НА ЛИТУРГИИ
Блаженны от канона праздника, и святаго песнь 6-я. Прокимен, глас 7: Честна пред Господем/смерть преподобных Его. Стих: Что воздам Господеви о всех,/ яже воздаде ми? Апостол к Галатом, зачало 213. Аллилуиа: Блажен муж, бояйся Господа,/ в заповедех Его восхощет зело=. Стих: Сильно на земли будет семя его. Евангелие от Луки, зачало 24. Причастен: В память вечную будет праведник: