Редкие Богослужебные тексты

Иерей: Благослове́н Бог наш всегда́, ны́не и при́сно, и во ве́ки веко́в.
Лик: Ами́нь. Царю́ Небе́сный:
Таже чтец: Трисвятое. Пресвята́я Тро́ице: О́тче наш:
Возглас: Я́ко Твое́ есть Ца́рство:
Чтец: Ами́нь. Го́споди, поми́луй, 12.
Слава, и ныне:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
И псалом 142:
Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Слава, и ныне: Аллилу́иа, трижды.

И Бог Господь: по гласу тропаря,
глас 4:
Бог Госпо́дь и яви́ся нам,/ благослове́н Гряды́й во и́мя Госпо́дне.
Стих 1: Испове́дайтеся Го́сподеви, я́ко благ, я́ко в век ми́лость Его́.
Стих 2: Обыше́дше обыдо́ша мя и и́менем Госпо́дним противля́хся им.
Стих 3: Не умру́, но жив бу́ду и пове́м дела́ Госпо́дня.
Стих 4: Ка́мень, его́же небрего́ша зи́ждущии, сей бысть во главу́ у́гла, от Го́спода бысть сей и есть ди́вен во очесе́х на́ших.

Тропа́рь, глас 4:
Святителю Христо́ву Некта́рию,/ дарми́ небе́сными просла́вленну,/ припаде́м, вопию́ще из глубины́ души́:/ свя́те Некта́рие, правосла́вных засту́пниче,/ вся́каго нас свободи́ обстоя́ния и озлобле́ния,/ и искуше́ний, и неду́гов лю́тых,// прибега́ющих, о́тче, под кров твой.

Слава, глас 4:
Я́ко прия́вый от Бо́га власть е́же цели́ти стра́шныя неду́ги/ притека́ющих, о́тче, к моща́м твои́м,/ исцели́, мо́лимся, лю́те скорбя́щия/ от неду́гов и страда́ний и го́рьких боле́зней,// и в ми́ре сохрани́ нас моли́твами твои́ми, Некта́рие преподо́бне.

И ныне, Богородичен, глас то́йже:
Не умолчи́м никогда́, Богоро́дице,/ си́лы Твоя́ глаго́лати, недосто́йнии:/ а́ще бо Ты́ не бы предстоя́ла моля́щи,/ кто́ бы на́с избaвил от толи́ких бе́д,/ кто́ же бы сохрани́л до ны́не свобо́дны?/ Не отсту́пим, Влады́чице, от Тебе́:// Твоя́ бо рабы́ спаса́еши при́сно от вся́ких лю́тых.

Таже псалом 50–ый:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.

По сем канон моле́бный, глас 8

Песнь 1
Ирмос: Во́ду проше́д, яко сушу,/ и еги́петскаго зла избежа́в,/ изра́ильтянин вопия́ше:// Изба́вителю и Богу нашему пои́м.
Ура́нен зло́бою де́монскою, твоему́ заступле́нию прибега́ю, вопия́: умири́, о́тче, живо́т мой, и здра́вие душе́ мое́й и те́лу моему да́руй моли́твами твои́ми.
Свя́то соверши́в жизнь свою́, при́сно освяща́еши и избавля́еши от вся́кия зло́бы, Некта́рие о́тче Богоно́се, приступа́ющих к моща́м твои́м.
Чуде́с си́лы я́ко де́я, исцели́, о́тче, не́мощи боле́зненныя, по́мощь твою́ взыску́ющих, чудотво́рче святи́телю Некта́рие.
Богородичен: Я́ко Ма́терь Бо́га Милосе́рднаго, Благолюби́вая Отрокови́це, милосе́рдие Твое́ изле́й на мя и вре́да мя вся́каго, и неи́стовства змии́наго изба́ви.

Песнь 3
Ирмос: Небе́снаго кру́га Верхотво́рче Го́споди,/ и Це́ркве Зижди́телю,/ Ты́ мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.
От неду́гов вся́ких и лю́тых печа́лей, и поноше́ний па́губных и наве́тов началозло́бнаго врага́, я́ко сострада́телен иера́рх, невреди́мы сохраня́й тя почита́ющия.
Некта́р невеще́ственный и Боже́ственный Благода́ти Боже́ственныя, ея́же от Бо́га прия́л еси́, при́сно то́чит глава́ твоя́ боже́ственная и страсте́й печа́ль прогоня́ет, свя́те, от душ на́ших.
В боле́знех и труде́х, и угнета́ющих мя я́звах, о́тче, жи́знь свою́ соверша́я, к тебе́ прибего́х: не пре́зри у́бо мя, но посеще́нием твои́м обдержа́щих мя зол свободи́.
Богородичен: Прибе́жище мíра и утвержде́ние тве́рдое, Благода́тная Де́во, прибега́ющих под кров Твой, от многоплете́нных собла́знов льсти́ваго зми́я огради́ и соблюди́.

Спаси́ от вся́каго вре́да и печа́ли, святи́телю,/ ве́рою к заступле́нию твоему́ прибега́ющих// и тя чту́щих, Некта́рие Богоно́се.
При́зри благосе́рдием, Всепе́тая Богоро́дице,/ на мое́ лю́тое телесе́ озлобле́ние,// и исцели́ души́ моея́ боле́знь.

Седа́лен, глас 2:
Исто́чник оби́льный исцеле́ний в Ду́се яви́ся, му́дре, ра́ка моще́й твои́х,/ исцеля́ет бо стра́ждущия,/ и здра́вие и кре́пость да́рует// притека́ющим ве́рою те́плою, Некта́рие о́тче свяще́ннейше.

Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,// и просла́вих Твое́ Божество́.
Оби́тель твою́, Некта́рие, от вся́каго зла льсти́ваго противобо́рца нескве́рну сохраня́й твое́ю Благода́тию.
Немощны́х прибегающих, о́тче, отвсю́ду к святе́й оби́тели твое́й исцеле́ния сподо́би, и от ско́рби сих изба́ви.
Кре́пость пода́й и исцеле́ние душе́ и те́лу, Некта́рие, и прегреше́ний свобожде́ние всеце́ло тя блажа́щим.
Богородичен: Напра́ви мя, Всепе́тая, к покая́ния стезе́ спаси́тельной, и страсте́й мои́х игра́ния умертви́ в коне́ц и потреби́.

Песнь 5
Ирмос: Просвети́ на́с повеле́нии Твои́ми, Го́споди,/ и мы́шцею Твое́ю высо́кою// Тво́й ми́р пода́ждь на́м, Человеколю́бче.
Обре́те тя Э́гина засту́пника те́плаго, сего́ ра́ди Благода́тию твое́ю при́сно спаса́ется и свобожда́ется от вся́кия печа́ли.
Ти́хое житие́ соверши́ти и безмяте́жное от вся́каго наве́та вра́жия сподо́би нас, о́тче, моли́твами твои́ми.
Вели́ка храни́теля и заступника, о́тче преподо́бне, иму́щи тя оби́тель твоя́ честна́я хва́лится ско́рым заступле́нием твои́м.
Богородичен: Нескве́рная Чи́стая, Ма́ти Бо́жия Неискусому́жная, упова́ющих на хода́тайство Твое при́сно, от вся́каго вре́да сохрани́ невреди́мы.

Песнь 6
Ирмос: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зо́л душа́ моя́ испо́лнися,/ и живо́т мо́й а́ду прибли́жися,/ и молю́ся я́ко Ио́на:// от тли́, Бо́же, возведи́ мя́.
Теле́с и душ боле́зни умири́, Некта́рие о́тче, на твое́ заступле́ние упова́ющих и сердца́ на́ша ра́дости испо́лни и печа́ли лю́тыя от нас мглу́ разори́.
Изба́вити нападе́ний вся́ческих и собла́знов губи́тельных врага́, и нужд, и тесноты́ мно́гия Всеще́дрое Сло́во моли́, Некта́рие чудотво́рче, прибега́ющих ве́рою к покро́ву твоему́.
Свы́ше я́ко сострада́телен призира́ти и непреста́нно заступа́ти не преста́й свяще́нную обите́ль твою́, Богоно́се, иму́щуя я́ко вели́кое сокро́вище, Некта́рие чудотво́рче, ра́ку святы́х моще́й твои́х.
Богородичен: Спаси́теля и Свободи́теля челове́ков, Человеколю́бца Ро́ждшая Сло́во, спаси́ мя, Отрокови́це, предста́тельством Твои́м от муче́ния зла́го лука́ваго, и вжили́ ду́шу мою́ к преуспея́нию жития́ лучшаго.

Спаси́ от вся́каго вре́да и печа́ли, святи́телю,/ ве́рою к заступле́нию твоему́ прибега́ющих// и тя чту́щих, Некта́рие Богоно́се.
Чи́стая, Я́же сло́вом Сло́во неизрече́нно в после́дняя дни ро́ждшая,/ моли́, я́ко иму́щая Ма́тернее дерзнове́ние.

Кондак, глас 2:
Па́дших исправле́ние был еси́/ и коле́блющихся, Некта́рие, утвержде́ние/ в после́дняя времена́ от Го́спода просла́вленный,/ но всегда́ и нас в жи́зни сей от напа́стей свы́ше спаса́й,/ оставле́ние прегреше́ний, и утвержде́ние, и спасе́ние// прося́ у Бо́га, святи́телю, душа́м на́шим.

Прокимен, глaс 4: Свяще́нницы Твои́ облеку́тся пра́вдою,/ и преподо́бнии Твои́ возра́дуются.

Стих: Честна́ пред Го́сподем смерть преподо́бных Его́.

Евангелие от Иоанна, зачaло 36 (10:9-16)
Рече́ Госпо́дь ко прише́дшым к Нему́ иуде́ем: Аз есмь дверь, Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т, Аз приидо́х, да живо́т и́мут и ли́шше и́мут. Аз есмь па́стырь до́брый, па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о о́вцах. Аз есмь па́стырь до́брый, и зна́ю Моя́, и зна́ют Мя́ Моя́. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет еди́но ста́до, и един Па́стырь.

Слава: Моли́твами святителя Твоего́…

И ныне: Моли́твами Богоро́дицы…

Стих: Поми́луй мя Бо́же,/ по вели́цей ми́лости Твое́й,/ и по мно́жеству щедро́т Твои́х,// очи́сти беззако́ние мое́.

Стихира, глас 6:
Но́вая звезда́ яви́лся еси́ Це́ркве Христо́вой,/ в после́дняя времена́ жития́ чистото́ю возсия́вый, преподо́бне,/ у́мными сия́ньми в тебе́ дарова́ний озаря́я ду́ши на́ша/ и исцеле́ний луча́ми свобожда́я всегда́/ от бесо́вскаго омраче́ния и неду́гов мра́ка,/ те́мже вопие́м тебе́:/ не преста́й избавля́ти нас от поноше́ний искуси́теля// и вся́кия печа́ли.

Песнь 7
Ирмос: От Иуде́и доше́дше о́троцы,/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.
От скорбе́й разли́чных, напа́стей, и бед, и обстоя́ний, и за́висти и зло́бы челове́к злонра́вных невреди́мы сохрани́ тя чту́щих при́сно, Некта́рие всеблаже́нне.
Исцеля́я непреста́нно лю́тыя не́мощи, о́тче Некта́рие, ве́рою притека́ющих боже́ственным моще́м твои́м, помо́щник при́сно гото́вый в после́дняя времена́ благочести́вым явился еси.
Дарова́ние Боже́ственное яви́лся еси́ и вене́ц нов, о́тче Некта́рие, о́строву Эги́не, и́же при́сно прибега́ет к ходатайству твоему́, свя́те, и от благоволения твоего́ пожина́ет заступле́ние.
Богородичен: На стезю́ за́поведей от Тебе́ Воплоще́ннаго, Отрокови́це, напра́ви мя, от врат грехо́вных возводя́щи, Де́во, влече́ние се́рдца моего́, да пою́ Тя при́сно, спасе́н сый Твое́ю Благода́тию.

Песнь 8
Ирмос: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся́ ве́ки.
Пото́к зло́бы потопля́ющ, о́тче, се́рдца моего́ бразды́ в коне́ц изсуши́ си́лою Боже́ственных моли́тв твои́х.
Не́мощей тя врача́ позна́вше, прибега́ем к моща́м твои́м боже́ственным, да свободи́мся от язв боле́зненных.
Покрыва́й непреста́нно оби́тель твою́ чи́стую и огражда́й ю́ твои́м хода́тайством, святи́телю о́тче, посыла́я оте́ческие дары́ твои́.
Богородичен: Исцели́, Отрокови́це, немощству́ющую ду́шу мою́, от зло́бнаго досажде́ния змии́наго, и озари́ мя све́том безстра́стия.

Песнь 9
Ирмос: Вои́стинну Богоро́дицу/ Тя́ испове́дуем, спасе́ннии Тобо́ю, Де́во Чи́стая,// с безпло́тными ли́ки Тя́ велича́юще.
От неи́стовства, врага́ незри́маго и в жи́зни от злых бед нас свободи́ прибега́ющих, о́тче, под кров твой.
От боле́зни душе́вныя мя и язв теле́сных, о́тче, изба́ви от Бо́га ти да́нною оби́льною Благода́тию.
О благогове́йной оби́тели твое́й и Э́гине помоли́ся Христу́ Человеколю́бцу, и о всех наро́дах христиа́нских, о́тче Некта́рие.
Богородичен: Воспева́ем Благода́ть Твою́, Благода́тная, Ты бо непреста́нно, яко Ма́терь Благолюби́вая, покрыва́еши, и пита́еши и согрева́еши нас всегда́.

Достойно есть и величания, глас 2:
Благоче́стия но́вый огнь и Це́ркве све́тлое свети́ло,/ те́плое заступле́ние и нази́рателя Эги́ны,// Некта́рия боже́ственнаго пе́сньми почти́м.
Ра́дуйся, новотеку́щий исто́чниче,/ нектароподо́бныя даро́в боже́ственных струи́/ наводня́яй боже́ственными вода́ми// Це́рковь Христо́ву, о́тче Некта́рие.
Возсия́в на высоте́ доброде́телей/ в после́дняя времена́, я́коже свети́льник богосве́тлый,/ у́мно просвеща́еши ве́рных помышле́ния// чистото́ю жития́ твоего́, о́тче Некта́рие.
Ра́дуйся скорбя́щим вспоможе́ние,/ и от де́монов скоре́йший врачу́;/ ра́дуйся, страсте́й и неду́гов цели́телю,// притека́ющим, о́тче, к святы́м моща́м твои́м.
Ра́дуйся, Эги́ны сокро́вище,/ и правосла́вных засту́пниче и помо́щниче;/ ра́дуйся, Елла́ды украше́ние но́вое, Некта́рие всеблаже́нне,// утвержде́ние на́ше.
Хода́тайством оте́ческим/ честну́ю оби́тель твою́ сохрани́ невре́дну, Некта́рие о́тче,/ и испо́лни проше́ния// благоприя́тно соверша́ющих боже́ственную па́мять твою́.
Вся А́нгелов во́инства,/ Предте́че Госпо́день,/ апо́столов двоенадеся́тице,/ святи́и вси с Богоро́дицею,// сотвори́те моли́тву, во е́же спасти́ся нам.

Трисвятое по Отче наш.
И тропари сия, глас 6:
Поми́луй нас, Го́споди, поми́луй нас;/ вся́каго бо отве́та недоуме́юще,/ сию́ Ти моли́тву я́ко Влады́це,// гре́шнии прино́сим: поми́луй нас.

Слава:
Го́споди, поми́луй нас,/ на Тя бо упова́хом;/ не прогне́вайся на ны зело́,/ ниже́ помяни́ беззако́ний на́ших,/ но при́зри и ны́не я́ко благоутро́бен,/ и изба́ви ны от враг на́ших;/ Ты бо еси́ Бог наш,/ и мы лю́дие Твои́,/ вси дела́ руку́ Твое́ю,// и и́мя Твое́ призыва́ем.

И ныне:
Милосе́рдия две́ри отве́рзи нам,/ благослове́нная Богоро́дице,/ наде́ющиися на Тя да не поги́бнем,/ но да изба́вимся Тобо́ю от бед:/ Ты бо еси́ спасе́ние// ро́да христиа́нскаго.

Тропа́рь, глас 1:
Сили́врии о́трасль и Эги́ны храни́теля,/ в после́дняя ле́та я́вльшагося,/ доброде́тели дру́га и́скренняго,/ Некта́рия почти́м, ве́рнии,/ я́ко боже́ственнаго служи́теля Христо́ва:/ то́чит бо цельбы́ многоразли́чныя благоче́стно вопию́щим:/ сла́ва Просла́вльшему тя Христу́,/ сла́ва Да́вшему ти чуде́с благода́ть,// сла́ва Де́йствующему тобо́ю всем исцеле́ния.

Ин тропарь, глас тойже:
Сили́врии о́трасль и Восто́ка похвале́ние,/ Правосла́вия столп и Эги́ны утвержде́ние,/ Некта́рия воспои́м, ве́рнии,/ я́ко некта́р бо источи́ся нам от исто́чников спаси́тельных новоявле́нно,/ напая́ющ вопияю́щия:/ сла́ва Просла́вльшему тя Христу́,/ сла́ва Увенча́вшему тя//, сла́ва в после́дняя времена́ све́тло тя Освяти́вшему.

Ектения и отпуст посем поем, глас 2:
Вся́кому засту́пник и храни́тель,/ и те́плое предста́тельство и покро́в бу́ди, Некта́рие,/ прибега́ющим ти, о́тче, ве́рою,/ и боже́ственныя твоя́ мо́щи лобыза́ющим,/ я́же Христо́с просла́ви чуде́с дорова́нием,/ свобожда́я от искуше́ний боле́зненных/ и мир всем подава́я// и прегреше́ний свы́ше проще́ние.

И Богородичен, глас 8:
Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

Глас 2:
Все упова́ние мое́ на Тя возлага́ю, Ма́ти Бо́жия,// сохрани́ мя под кро́вом Твои́м.
Иерей: Моли́твами святы́х оте́ц на́ших, Го́споди, Иису́се Христе́ Бо́же, поми́луй и спаси́ нас. Ами́нь.

Двустишие:
Некта́рие, пода́й ми от страсте́й свобожде́ние,
Гера́симу, поспеша́ющему к по́мощи твое́й.

Ссылка на PDF: disk.yandex.ru/i/sTLsNzb8H37PPA