Редкие Богослужебные тексты

Акафист святому и великому Крестителю
Господа и Спасителя нашего Иисуса Христа
Иоанну Предтече

Творение Герасима Микроянаннита, монаха святыя Горы Афонския

Кондак, глас 8:
Я́ко Крести́теля Спа́сова и Боже́ственнаго Предте́чу,/ и А́нгелов всех избра́нна и бо́льша воспева́ем тя,/ блаже́нне Иоа́нне,/ но я́ко пропове́дник покая́ния великогла́сный/ све́том покая́ния озари́ нас, вопию́щих ти:// ра́дуйся, велича́йший Предте́че.

Икос 1:
А́нгел в мíре я́ко челове́ков всех бо́льший яви́лся еси́, Крести́телю Иоа́нне, и подае́ши всем нам оби́льную во всем по́мощь, те́мже вели́чию твоему́ дивя́щеся, вопие́м ти:
Ра́дуйся, и́мже Тро́ице та́йно науча́емся.
Ра́дуйся, и́мже сатана́ изгоня́ется.
Ра́дуйся, Заха́рии ра́дость премíрная.
Ра́дуйся, Елисаве́ты о́трасль Богодарова́нная.
Ра́дуйся, высото́ неудобозри́мая доброде́телей преесте́ственных.
Ра́дуйся, глубино́ многослову́щее дарова́ний Боже́ственных.
Ра́дуйся, я́ко еси́ святы́х верх.
Ра́дуйся, я́ко еси́ проро́ков красото́.
Ра́дуйся, Христо́в Проро́че и Предте́че.
Ра́дуйся, всех страсте́й вы́сший.
Ра́дуйся, и́мже Христо́с крести́ся.
Ра́дуйся, и́мже враг возненави́деся.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 2:
Ви́дев Заха́рия, Иоа́нне Проро́че, кажде́ние творя́й в це́ркви Госпо́дней А́нгела Бо́жия Гаврии́ла, от него́же рождеству́ твоему́ та́йно науча́ется, но не имы́й ве́ры пе́рвее, пото́м ре́к, вопия́ше: Аллилу́иа.

Икос 2:
Роди́вся от непло́дныя, Иоа́нн сла́внейший разреши́ безгла́сие о́тчее, и ра́дости всех в го́рней испо́лни, я́ко лу́чшаго провозве́стник, те́мже с Заха́риею тому́ вси вопия́ху такова́я:
Ра́дуйся, безгла́сия разреше́ние.
Ра́дуйся, печа́ли свобожде́ние.
Ра́дуйся, благ гряду́щих провозве́стниче.
Ра́дуйся, дарова́ний Боже́ственных испо́лненный.
Ра́дуйся, дре́во плодови́тое дохнове́ния Боже́ственнаго.
Ра́дуйся, фи́никс высокове́рхий благода́ти проро́ческия.
Ра́дуйся, я́ко про́йде пресла́вно от непло́дныя.
Ра́дуйся, я́ко испуща́еши пред про́чими свет жития́ свята́го.
Ра́дуйся, о́трасль Боже́ственныя бла́гости.
Ра́дуйся, сосу́де Бо́жия благосты́ни.
Ра́дуйся, Христо́ва Рождества́ провозве́стниче.
Ра́дуйся, мрак страсте́й отыма́яй.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 3:
Си́лою в пусты́ни свы́ше обле́клся еси́, от младе́нства посели́вся в той, я́ко убежа́л еси́ с ма́терию от и́родова стра́шнаго избие́ния, те́мже и любо́вию пел еси́ я́ко А́нгел Бо́гу, Проро́че: Аллилу́иа.

Икос 3:
В пусты́ню всели́вся от младе́нства, Проро́че, равноа́нгелен во всем показа́лся еси́, зако́на печа́ть и проро́ков, и нача́ток но́выя Христо́вы Благода́ти, те́мже я́коже А́нгела воспева́ем тя, любо́вию вопию́ще такова́я:
Ра́дуйся, ча́до пусты́ни.
Ра́дуйся, дру́же Госпо́день.
Ра́дуйся, проро́ков и зако́на запечатле́ние.
Ра́дуйся, даро́в Богода́нных сокро́вище.
Ра́дуйся, А́нгеле в телеси́, я́ко А́нгелов подража́тель.
Ра́дуйся, безпло́тный в по́двизех, я́ко Богому́дрый по́стник.
Ра́дуйся, я́ко Госпо́дню предрека́еши Благода́ть.
Ра́дуйся, я́ко бед отгоня́еши волне́ние.
Ра́дуйся, звездо́ Благода́ти велича́йшая.
Ра́дуйся, свети́ло Ду́ха пресве́тлое.
Ра́дуйся, Бо́жиих та́ин зри́телю.
Ра́дуйся, сла́вный Крести́телю и Богови́дче.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 4:
Житие́ свято́е проводя́ в пусты́не, Проро́че, преше́л еси́ естества́ преде́лы, акри́ды бо име́л еси́ и мед ди́вий я́ко пи́щу кре́пким мудрова́нием, сла́достию бо Боже́ственною пита́лся еси́, Бо́гу вопия́: Аллилу́иа.

Икос 4:
Во власы́ вельблу́жди обле́клся еси́, Проро́че, и в по́яс усме́н о чре́слах свои́х, и всем пропове́дал еси́, вопия́: пока́йтеся, Христо́с бо прибли́жися, жизнь всем да́руяй, те́мже тебе́ вси вопие́м сицева́я:
Ра́дуйся, пропове́дниче покая́ния.
Ра́дуйся, изба́вителю безу́мия.
Ра́дуйся, а́нгельскому житию́ подража́телю.
Ра́дуйся, гряду́щих разуме́ние образова́телю.
Ра́дуйся, ри́торе великогла́сный Ца́рствия Небе́снаго.
Ра́дуйся, язы́че Богодви́жимый неизрече́нных благ.
Ра́дуйся, и́же во чре́ве Христу́ поклони́выйся.
Ра́дуйся, и́же челове́ком Сего́ показа́вый.
Ра́дуйся, Христа́ богодохнове́нный орга́не.
Ра́дуйся, душ омыва́яй тиме́ние.
Ра́дуйся, проро́чество прия́вый от Бо́га.
Ра́дуйся, небе́сный наш покрови́телю.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 5:
Боже́ственное сло́во прия́л еси́ от Бо́га в пусты́ни и прише́л еси́ всем пропове́дуя креще́ние покая́ния, му́дре, в стране́ Иорда́нстей, и вси к тебе́ прихожда́ху и креща́хуся, вопию́ще: Аллилу́иа.

Икос 5:
Христа́ Спаси́теля лю́дем в пусты́ни показа́л еси́, Проро́че, вопия́: се, А́гнец Бо́жий, взе́мляй грехи́ мíра, те́мже зело́ высо́кое досто́инство твое́ воспева́юще, вопие́м ти сицева́я:
Ра́дуйся, невеще́ственный во всем.
Ра́дуйся, беспло́тный в поще́нии.
Ра́дуйся, та́ин Боже́ственных служи́телю.
Ра́дуйся, покая́ния свята́го учи́телю.
Ра́дуйся, пото́че прозра́чнейший щедро́т Боже́ственных.
Ра́дуйся, сосу́де златы́й доброде́телей по́стнических.
Ра́дуйся, я́ко предрека́еши лю́дем спасе́ние.
Ра́дуйся, я́ко подае́ши живоносное подая́ние.
Ра́дуйся, Христо́во пропове́давый воплоще́ние.
Ра́дуйся, лю́дем яви́вый грехо́в оставле́ние.
Ра́дуйся, све́та небе́снаго вмести́лище.
Ра́дуйся, всех дарова́ний сокро́вище.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 6:
Пропове́дник нам предпосла́лся еси́, я́ко глаго́лет проро́к, прише́ствия Спаси́теля, Его́же крестив теле́сне в Иорда́нских Боже́ственных вода́х, Иоа́нне, мно́гия Благода́ти сподо́бился еси́, вопия́: Аллилу́иа.

Икос 6:
Сия́я жи́тельством свои́м, подвиза́лся еси́ крести́ти Христа́ во Иорда́не, Проро́че, и глас услы́шал еси́ Оте́ч и я́ко го́лубя Ду́ха Свята́го уви́дел еси́, те́мже тебе́ вси вопие́м такова́я:
Ра́дуйся, зри́телю неви́димых.
Ра́дуйся, ви́дче стра́нных веще́й.
Ра́дуйся, крести́вый Христа́ в вода́х.
Ра́дуйся, просвети́вый нас Боже́ственными глаго́лы.
Ра́дуйся, я́ко глас услы́шал еси́ с небе́с О́тчий.
Ра́дуйся, я́ко сподо́бился еси́ зре́ния Богонача́льнаго.
Ра́дуйся, ви́девый Всесвята́го Ду́ха.
Ра́дуйся, потопи́вый па́губное тече́ние.
Ра́дуйся, зряй всем неви́димая.
Ра́дуйся, ви́дяй людем непости́жная.
Ра́дуйся, Проро́че, бо́льший всех.
Ра́дуйся, челове́ков от ран избавля́яй.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 7:
Ве́лий во святы́х, я́ко бо́льший всех челове́к в рожде́нных Иоа́нне, яви́лся еси́, о даро́в твои́х! Кто бо ины́й блаже́ннее яви́ся па́че тебе́, о всечу́дне? Христа́ бо крести́л еси́, вопия́: Аллилу́иа.

Икос 7:
Зако́на беду́ прие́мляй, облича́л еси́, Иоа́нне, И́рода законопресту́пное дея́ние, от него́же усе́чен бы́л еси́ во главу́, и к су́щим во а́де пропове́дник Христо́в и провозве́стник прите́кл еси́, Того́ гряду́ща пропове́дуя вопиющи́м:
Ра́дуйся, уста́ дерзнове́нная.
Ра́дуйся, о́ко сострада́тельное.
Ра́дуйся, обличи́вый И́рода беззако́ние.
Ра́дуйся, низложи́вый страсте́й те́рние.
Ра́дуйся, пропове́дниче и провозве́стниче Христа́ во а́де су́щим.
Ра́дуйся, цве́те благово́ннейший повеле́ний Бо́жиих.
Ра́дуйся, я́ко изсуша́еши тиме́ние греха́.
Ра́дуйся, я́ко явля́еши кре́пость безстра́стия.
Ра́дуйся, исто́чниче, исцеле́ния точа́щий.
Ра́дуйся, свеще́ нас просвеща́ющая.
Ра́дуйся, Христа́ ви́девый и крести́вый.
Ра́дуйся, вра́жию пре́лесть потреби́вый.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 8:
Стра́нен в мíре показа́лся еси́, Проро́че, и яви́лся еси́ премíрный вои́стинну: кто бо не диви́тся тебе́? Верху́ бо косну́лся еси́ Всецаря́, те́мже сия́нием твои́м ведо́ми, Христу́ вопие́м: Аллилу́иа.

Икос 8:
Весь осиява́емь, весь прославля́емь, я́ко Крести́тель Спа́сов сый, Иоа́нне чу́дне, ужаси́в всех вели́чествы твои́ми, и Благода́ть простера́еши незави́дную благогове́йно ти вопию́щим си́це:
Ра́дуйся, всесве́тлая звездо́ у́тренняя.
Ра́дуйся, свы́ше свет нося́й.
Ра́дуйся, воздержа́ния о́бразе богоподо́бный.
Ра́дуйся, безстра́стия раю́ богонасажде́нный.
Ра́дуйся, со́лнце многосве́тлое доброде́телей по́стнических.
Ра́дуйся, ни́во плодови́тая душепита́тельных благ.
Ра́дуйся, я́ко усе́чен был еси́ от И́рода во главу́.
Ра́дуйся, я́ко подае́ши ути́шное дунове́ние.
Ра́дуйся, ве́рных непоколеби́мое утвержде́ние.
Ра́дуйся, ра́досте на́ше и основа́ние.
Ра́дуйся, страсте́й отсека́яй возбеше́ние.
Ра́дуйся, душ исцеля́яй озлобле́ние.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 9:
Питию́ нечи́стому устремля́яся с вели́кими, И́род на дне рождества́ своего́ отсече́ главу́ твою́ гове́йную, не устыде́вся, Предте́че, – мы же чту́ще тя, Тро́ице ве́рно вопие́м: Аллилу́иа.

Икос 9:
Струя́ми крове́й твои́х Це́рковь Христо́ва омочи́вши багряни́цу Свою́, прославля́ет Жениха́ Христа́ и тя, я́ко дру́га Того́ Богопочте́ннаго почита́ет, Боже́ственный Предте́че, и по до́лгу вопие́т ти:
Ра́дуйся, до́ме Уте́шителя.
Ра́дуйся, Предте́че Госпо́день.
Ра́дуйся, мирохрани́тельнице чистоты́ мироуха́нная.
Ра́дуйся, благоче́стия свети́льниче присносве́тлый.
Ра́дуйся, дру́же ближа́йший Всецаря́ Христа́.
Ра́дуйся, сто́лпе неподви́жный богому́драго наро́да.
Ра́дуйся, Иорда́нскую освяти́вый страну́.
Ра́дуйся, Воплоще́ннаго возвели́чивый сла́ву.
Ра́дуйся, о́бразе А́нгелом гове́йный.
Ра́дуйся, кре́пкий де́монов противобо́рниче.
Ра́дуйся, Христо́ву Бла́гость являя́й.
Ра́дуйся, ра́дость нам неконча́емую нося́й.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 10:
Оберну́вше боже́ственное и всесвято́е те́ло твое́, свяще́ннии ученицы́ твои́ положи́ша во гроб е́, воспева́юще боже́ственныя твоя́ подвиги́, великоимени́те Предте́че, и Спаси́телю вопия́ху: Аллилу́иа.

Икос 10:
Святу́ю твою́ главу́, я́ко святы́ню Боже́ственную и Ду́ха свято́е обита́лище я́вльшуюся из недр земны́х, обыма́юще, ве́рно лобыза́ем, освяще́ние прие́млюще от нея́, и ве́рно вопие́м:
Ра́дуйся, Госпо́день помо́щниче.
Ра́дуйся, ве́лий наш предста́телю.
Ра́дуйся, святы́х всех бо́льший.
Ра́дуйся, преподо́бных отце́в предводи́телю.
Ра́дуйся, горо́ и́стиннейшая де́вства благогове́йнаго.
Ра́дуйся, цевни́це Богодви́жимая, веселя́щая ве́рных.
Ра́дуйся, я́ко направля́еши ко стезе́ покая́ния.
Ра́дуйся, я́ко изсуша́еши му́тныя вся́ струи́.
Ра́дуйся, ве́рных честно́е ра́дование.
Ра́дуйся, Боже́ственное на́ше услажде́ние.
Ра́дуйся, чи́стых по́стников основа́ние.
Ра́дуйся, напе́рсников твои́х наста́вниче.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 11:
Высо́кое житие́ име́я от утро́бы ма́терни, Иоа́нне освяще́нне, ужаси́л еси́ высото́ю твое́ю зря́щих тя я́коже А́нгела с пло́тию живу́ща, те́мже Бо́гу вси́ вопия́ху: Аллилу́иа.

Икос 11:
Трепе́щут де́монов полки́ оби́льныя твоея́ благода́ти, великоимени́те Проро́че, ве́рнии же ра́дуются о тебе́, чу́дныя по́мощи твоея́ благода́ть всегда́ плодя́ще, те́мже благогове́йно ти взыва́ем сицева́я:
Ра́дуйся, ве́лий в предста́телех.
Ра́дуйся, изба́вителю в бедах сущим.
Ра́дуйся, дарова́ний бога́тых сокро́вище.
Ра́дуйся, милосе́рдия Боже́ственнаго излия́ние.
Ра́дуйся, трубо́ великогла́сная щедро́т Боже́ственных.
Ра́дуйся, приста́нище непоколеби́мое душа́м в ско́рбех су́щим.
Ра́дуйся, я́ко источа́еши сла́дость спасе́ния.
Ра́дуйся, я́ко сокруша́еши мглу́ нераде́ния.
Ра́дуйся, сла́дости и Благода́ти испо́лненный.
Ра́дуйся, неусы́пный наш назира́телю.
Ра́дуйся, и́мже сатана́ го́рько вопие́т.
Ра́дуйся, и́мже Спаси́тель нас спаса́ет.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 12:
Благода́ти но́выя пропове́дниче, Предте́че Иоа́нне, облагода́ти сердца́ на́ша, тя бо предста́теля и помо́щника и ко Христу́ моли́твенника те́плаго и́мамы, всесвя́те, и тебе́ притека́юще вопие́м: Аллилу́иа.

Икос 12:
Воспева́юще тебе́ пе́сни, Предте́че Иоа́нне, воспева́ем и сла́ву твою́ вели́кую, ве́лий бо пред Бо́гом, я́ко рече́ А́нгел, был еси́, те́мже от вели́кия благода́ти твоея́ пода́й нам ти сице вопию́щим:
Ра́дуйся, бо́льший всех святы́х.
Ра́дуйся, А́нгелов ничесо́же ме́ньший.
Ра́дуйся, апо́столов честно́е избра́ние.
Ра́дуйся, скорбя́щих душ утеше́ние.
Ра́дуйся, стено́ необори́мая Це́ркве Христо́вы.
Ра́дуйся, мечу́ посека́яй вся́кое неи́стовство вра́жие.
Ра́дуйся, пророкому́чениче Предте́че Иоа́нне.
Ра́дуйся, Христопропове́дниче Ду́ха в си́ле.
Ра́дуйся, сия́ние души́ моея́ и услажде́ние.
Ра́дуйся, сла́досте ума́ моего́ и утвержде́ние.
Ра́дуйся, и́мже на спасе́ние упова́ю.
Ра́дуйся, и́мже жизнь мою́ устроя́ю.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак 13:
О, Проро́че Госпо́день, великоимени́тый пропове́дниче, святы́х всех бо́льший, приими́ от усте́н сту́дных, я́ко приноше́ние и благово́нный фимиа́м, сию́ похвалу́ мою́ и помози́ ми, да вопию́: Аллилу́иа.
Этот конда́к читается трижды, затем 1-й и́кос и 1-й конда́к.

Икос 1:
А́нгел в мíре я́ко челове́ков всех бо́льший яви́лся еси́, Крести́телю Иоа́нне, и подае́ши всем нам оби́льную во всем по́мощь, те́мже вели́чию твоему́ дивя́щеся, вопие́м ти:
Ра́дуйся, и́мже Тро́ице та́йно науча́емся.
Ра́дуйся, и́мже сатана́ изгоня́ется.
Ра́дуйся, Заха́рии ра́дость премíрная.
Ра́дуйся, Елисаве́ты о́трасль Богодарова́нная.
Ра́дуйся, высото́ неудобозри́мая доброде́телей преесте́ственных.
Ра́дуйся, глубино́ многослову́щее дарова́ний Боже́ственных.
Ра́дуйся, я́ко еси́ святы́х верх.
Ра́дуйся, я́ко еси́ проро́ков красото́.
Ра́дуйся, Христо́в Проро́че и Предте́че.
Ра́дуйся, всех страсте́й вы́сший.
Ра́дуйся, и́мже Христо́с крести́ся.
Ра́дуйся, и́мже враг возненави́деся.
Ра́дуйся, вели́кий Иоа́нне, Проро́че, Предте́че и Крести́телю Госпо́день.

Кондак, глас 8:
Я́ко Крести́теля Спа́сова и Боже́ственнаго Предте́чу,/ и А́нгелов всех избра́нна и бо́льша воспева́ем тя,/ блаже́нне Иоа́нне,/ но я́ко пропове́дник покая́ния великогла́сный/ све́том покая́ния озари́ нас, вопию́щих ти:// ра́дуйся, велича́йший Предте́че.