Редкие Богослужебные тексты

Бденная служба священномученику Платону составлена игуменом Нестором (Кумыш), клириком г. Сакт-Петербурга.
Служба новосвященномученику Платону, епископу Ревельскому
НА ВЕЛИЦЕЙ ВЕЧЕРНЕ
Блажен муж: 1-й антифон.
На Господи, воззвах: стихиры на 8, глас 4:
Истинную веру соблюл еси, и за Церковь Христову от безбожников смерть приял еси, ярости и злобе их предан был еси, от зверонравия их пострадал еси, но не отступил еси от Господа своего, священномучениче Платоне, молися за ны Христу Богу нашему, во еже и нам веру православную соблюсти неврежденно.
Горькия желчи страданий вкусил еси, ныне на небесех вечно радуешися, показал еси нам путь ко спасению, яко не блуждати нам широкими стезями плотоугодия, но шествовати скорбным путем к Царству Небесному.
Крест Христов житием своим прославил еси, святителю славный Платоне, не убоялся еси хулителей и гонителей истины Божия, паству свою не оставил еси, не устрашившись велений безбожных, на смерть свою яко на Пасху Господню шествовал еси, и нас утверди в любви Божией твоими к Богу молитвами.
Слава, глас 8:
О священномучениче Платоне! Промыслом Божиим во град Юрьев приведенный, и в темнице заключенный, посреде узников чистотою жития и веры сиявший, в подземелии убиенный, ныне на небесех царствующий, поминай стадо твое в терпении и лишениих сущее, во еже и нам Троицу Святую житием и верою прославити.
И ныне, Богородичен догматик.
Прокимен дне и чтения мученическая 3.
Пророчества Исаиина чтение.
Тако глаголет Господь: вси языцы собрашася вкупе, и соберутся князи от них, кто возвестит сия в них? Или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину. Будите Ми свидетели, и Аз Свидетель, глаголет Господь Бог, и отрок, егоже избрах, да познаете, и веруете Ми, и разумеете, яко Аз есмь; прежде Мене не бысть ин бог и по Мне не будет. Аз есмь Бог, и несть разве Мене, спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог. И еще от начала Аз есмь, и несть отъ рук Моих избавляяй; сотворю, и кто отвратит то? Сице глаголет Господь Бог, избавляяй вас святый Израилев.
Премудрости Соломоновы чтение.
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие сокрушение; они же суть в мире. Ибо пред лицем человеческим аще и муку приимут, упование их бессмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле искуси их и яко всеплодие жертвенное, прият я. И во время посещения их воссияют и, яко искры по стеблию, потекут: судят языком и обладают людьми, и воцарится Господь в них во веки. Надеющиися Нань разумеютъ истину и вернии в любви пребудут Ему, яко благодать и милость в преподобных Его и посещение во избранных Его.
Премудрости Соломоновы чтение.
Праведницы во веки живут, и в Господе мзда их, и попечение их у Вышняго. Сего ради приимут царствие благолепия и венец доброты от руки Господни, зане десницею покрыетъ я и мышцею защититъ ихъ. Прииметъ всеоружие рвение свое и вооружит тварь в месть врагом. Облечется в броня правды и возложит шлем суд нелицемерен. Приимет щит непобедимый преподобие, поострит же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им Дух силы и, яко вихор, развеет их. И опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиися о народех язык, яко дана есть от Господа держава вам и сила от Вышняго.
На литии стихиры, глас 5:
Святителей похвало и слава мучеников показался еси Платоне досточудне, крест бо Христов подвижнически восприяв, поприще мучения претекл еси, и со славою очищение самаго себе мученически совершив, яко чист сый Чистому предстоиши Христу, венценосче всеславный, со всеми новомученики Российскими веселяся, молися за нас ко Господу.
Глас 6:
Дом отчий оставил еси, святителю Платоне, во град Петров вселился еси, пастырь добрый показался еси, о спасении чад своих выну подвизаяся. Пред кончиною жития твоего паки в землю свою возвратился еси, и освятил еси ю кровию твоею честною, и ныне со всеми мученики во Царствии Небеснем прославляешися.
Столп церковный явился еси, в любви Божией до конца пребыл еси, аще и принуждаху тя мучителие от проповеди евангельской отказатися, обаче неустрашимо рекл еси им: дондеже язык мой свободен есть, непрестанно хвалу Богови возсылаю, ни во что же вменяя страх ваш.
Слава, глас 8:
Святитею Христов Платоне! Егда в темницу посажен был еси, искаше диавол погубити вся труды твоя, насылаше на тя трепет и ужас, ты же в борении сый низлагал еси того молитвою твоею, страсти Господни выну поминая, и непреткновенно достигл еси священных чертогов вечныя славы Божия.
И ныне, Богородичен.
На стиховне стихиры, глас 6:
Озарися град Юрьев светом подвига твоего, и возгреме отсюду проповедь христианская мученичеством твоим, страстотерпче Христов святителю Платоне, новомучениче Церкве Российския, от Господа прославленный, удостой и нас созерцания света невечерняго твоими ходатайствы.
Стих: Священницы Твои облекутся в правду и преподобнии Твои возрадуются.
Во граде Юрьеве, отонудуже воссия иногда эстам свет Православия, напоследок времен обновися проповедь Евангелия мученичеством твоим, страстотерпче Господень, и паки возгласися увещание Евангельское: не убойтеся убивающих телеса ваша и не могущих душе повредити, но убойтеся маловернаго отступления от камене Жизни.
Стих: Блажен муж бояйся Господа, в заповедех Его восхощет зело.
Прииде на землю чудскую весна благодати Божия во дни правления Ярослава Мудраго, во времена же хулителей нечестивых наста зима лютых гонений, но во мраце безбожия и злохуления светил еси народу Божию, священномучениче Платоне, светом веры твоея, новая звездо на тверди небесней.
Слава, глас 2:
Поучал еси паству твою, священномучениче Платоне, пребывати выну в молитве, непрестанно имети память Божию, всегда поучатися в страданиих Господних, претерпевати безропотно досаждения, и яко учитель на заколение веден был еси, показав пример стаду твоему, иерарше досточудне.
И ныне, Богородичен.
Тропарь священномученику Платону, глас 4:
Отечество твое оставил еси, и народу своему, в рассеянии сущему, послужити восхотел еси, храм в столице эстам православным воздвигл еси, последи же первым епископом земли твоея поставлен бысть, мученичеством ризы твоя архиерейския украсил еси, явив твердую и непоколебимую любовь ко Христу Богу нашему, Егоже моли спасти души наша.
И ныне, Богородичен.
НА УТРЕНИ
По 1-м стихословии седален, глас 4:
О новый угодниче Петроградский! Церковию Русскою воспитан был еси, укрепися духом древляго благочестия, напоен был еси водами богоугождения истиннаго, возгорелся еси огнем любви евангельстей, и сей пламень веры в земли Лифляндстей добре сохранил еси, научи и ны крепко блюсти Православие во вся дни живота нашего.
Слава и ныне, Богородичен:
Яко молитву неусыпающую, мольбу пребывающу имущи, Пречистая, ко Господу, напасти угаси, и волны укроти окаянныя моея души, и в скорби сущее сердце мое утеши, Отроковице, молю Тя, и облагодати ум мой, яко да достойно Тя прославлю.
По 2-м стихословии седален, глас 4:
О новый угодниче Церкве нашея! Прославляюще подвиг твой, приносим ти песни похвальныя, почитаем страдания твоя, избранник бо Господень явился еси, десницею Божиею венцем мученика украшен еси, яко агнец непорочен кровьми своими Церковь Христову украсил еси во спасение душ наших.
Слава и ныне, Богородичен:
Богородице Дево, моли Сына Твоего, волею пригвожденнаго на Кресте и воскресшаго из мертвых, Христа Бога нашего, спастися душам нашим.
По полиелее седален, глас 4:
О новый угодниче града Петрова! Во узилище сый, борением внутренним томим был еси, Гефсиманстей чаше приобщился еси, грехи своя голгофской горечию очистил еси, и страданием мученическим в Бозе сердце свое утвердил еси, ныне Пасху вечную торжествуеши на небесех, соделай и ны общники веселия твоего.
Слава и ныне, Богородичен:
Настави нас на путь покаяния, уклоняющихся всегда беспутием к заблуждению и преблагаго Бога прогневляющих, неискусобрачная Дево, Марие Чистая, Слову двере, Божие вселение, прибежище бо еси отчаянным и спасение душам человеческим.
Степенна 1-й антифон 4-го гласа.
Прокимен, глас 4-й: Честна пред Господем смерть преподобных Его.
Стих: Что воздам Господеви о всех, яже воздаде ми?
Всякое дыхание: Евангелие от Луки, зачало 67.
По 50-м псалме стихира, глас 6-й:
Храмоздатель славный явился еси, святителю Платоне, попечение велие о пастве эстонстей имея, не пренебрегл еси малым стадом сим, но яко матерь о чадех, тако о нем болезновал еси, и Братство Свято-Исидоровское со училищем устроил еси, споспешником и сомолитвенником великаго пастыря Кронштадтскаго имел еси, темже и ныне молися о малом стаде любовию почитающем тя.
Канон священномученику, глас 2:
Песнь 1
Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь славно бо прославися.
Настави мя, Господи Боже мой, да возмогу воспети благочестно угодника Твоего, Юрьевского мученика, и совершити память того неленостно, и благоговейно.
Нарекоша тя отъ купели именем апостола первоверховнаго. По имени твоему бысть и житие твое: повсюду бо среди эстов изыде проповедь от дел твоих, о первый иерарше Ревельский!
Храм священномученику Исидору в стольнем граде Российстем воздвигл еси, умножая труды твоя, в них же навыкл еси выну молитися небесному покровителю паствы твоея, той же приведе тя ко жребию своему, да постраждеши, якоже и он, даже до крове за имя Христово. Ныне молитеся ко Господу о стаде вашем, о священномученицы единомысленнии.
Богородичен: Воду слез очищающую, Пречистая, подаждь ми и, очистивши мя от беззаконий, чиста представи, Богородительнице, Сыну Твоему и Богу.
Песнь 3
Процвела есть пустыня, яко крин, Господи, языческая неплодящая, Церковь пришествием Твоим, в нейже утвердися мое сердце.
Во братстве, тобою созда=нном, обретаху помощь велию не токмо православнии, но и вси в нуждах и скорбех сущии. Явился еси новый заступник обидимых, Платоне боголюбиве, подражатель жития святителя Николая Мир Ликийских чудотворца.
Теплотою молитв твоих и веры твоея, отче Платоне, многия согрел еси, унылыя ободряя и расслабленныя укрепляя. Умягчи любовию и наша сердца, мразом века сего томимыя, твоими к Богу молитвами.
Ясный взор твой, любовь ко всем и чистота нрава твоего привлекоша к тебе чада церковная. Во страдании же твоем дивно прославися имя твое, отче Платоне, и ныне собрася окрест тебе паства новая твоя, ожидающи от тебе благословения святительскаго.
Богородичен: Избавляющаго человеки от насилия вражия, родила еси сильнаго Бога, Пречистая Дево Всенепорочная.
Седален, глас 4:
Яко агнец чистый пожерся, принесеся Слову Пастыреначальнику, мучениче всехвальный, темже торжествуем вси любовию святую память твою.
И ныне, Богородичен:
Прибежище и сило наша Богородице, державная помощь мира, молитвами твоими покрый рабы Твоя от всякия нужды, едина благословенная.
Песнь 4
Пришел еси от Девы не ходатай, ни Ангел, но Сам, Господи, воплощься, и спасл еси всего мя, человека. Тем зову Ти: слава силе Твоей, Господи.
Во епископы Ревельския бысть наречение твое, обаче умножися вскоре паства твоя, отче Платоне. Добре бо носил еси бремя служения архиерейскаго тяжкое, возложе=нное на тя Предстоятелем Церкве Российския.
Непрестанно помышляя о пастве твоей, панагию святительскую не тщетно носил еси, с неюже не расстался еси даже в мученичестве твоем, Платоне священномучениче.
Жезл архиерейский вручен бысть тебе не во дни мира, но мятежа кроваваго: посылаше тя святитель и исповедник Тихон во тьму кромешнюю на подвиг крестный. Но не убоялся еси тех злодейств и к пастве твоей со тщанием притекл еси.
Богородичен: Исцели души моея, Дево, язвы, осенением Твоим божественным, и ум мой просвети, омраченный леностию моею и злобою врага борца.
Песнь 5
Ходатай к Богу и человеком был еси, Христе Боже: Тобою бо, Владыко, к Светоначальнику, Отцу Твоему, от нощи неведения приведение имамы.
Презрев удобства мирския и прещения властей безбожных, единой совести святительской повинуяся, к пастве твоей в повозке скоро течаше и неленостно пешешествовал еси, Платоне, архиерею истинный, взыскуя чада твоя в годину лютых испытаний.
Разорители церквей Божиих, хулители веры православныя не устрашиша тя, Платоне священномучениче, но оплевал еси тех угрозы.
Тщетна бысть ярость зверя, не приведе тя оная в трепет и страх. Посрамил еси суетную силу сопротивника в мучении твоем, архипастырь доблестный, и предстал еси Христу в веселии и радовании.
Богородичен: Едину отъ всех родов избра Тя Господь, Богородице, из Тебе воплотися, обожив человечество.
Песнь 6
Во глубине греховней содержимь есмь, Спасе, и в пучине житейской обуреваемь, но якоже Иону от зверя, и мене от страстей возведи и спаси мя.
В темнице быв, претерпел еси поношения и уничижения, принуждаху тя невернии отрещися от проповеди евангельстей. Но пребыл еси до конца верен Христу Богу, священномучениче Платоне, укрепляя твердым стоянием твоим прочих узников Юрьевских.
Креста силу уразумел еси, сего ради легкаго жития никогдаже искал еси, святителю Платоне, со всеми Новомученики Российскими молися о нас, да познаем и мы спасительную силу Креста Господня, возлюбивше долготерпение Христа Бога нашего.
Откры тебе Господь тайну вольнаго распятия Своего и вкусил еси благодати Креста, сего ради не любил еси покоя в жизни твоей, отче Платоне, неустанно труждаяся ради Церкве Христовой, ожидая упокоения в Царствии Небеснем.
Богородичен: Тя, Предстательницу, вернии, и стену вси стяжахом, во глубине злых и молве скорбей присно бедствующих, Богородице, едина земных прибежище.
Кондак, глас 3:
Ведый твое измлада благое изволение Всеведец Бог, приведе тя во град стольный святыя Руси, воспита в тебе велию и чистую любовь к Церкви Христовой, в годину лютых гонений вручи тебе всю паству земли Прибалтийския, ейже до пролития крове служил еси, священномучениче Платоне, поминай насъ верою чтущих тя.
Икос:
Ангелов Творец и всея вселенныя Создатель постави тя Ангелом Церкви Эстонския во времена гонений лютых, святителю Платоне, ты бо первенствуеши посреде иерархов эстляндских. Сего ради вопием ти таковая: Радуйся, просветителю эстов, апостолом единонравный; радуйся, святителю, Богом и народом твоим избранный; радуйся, добрый пастырю словесных овец; радуйся, душу свою положивый за чада твоя; радуйся, от безбожных убиенный; радуйся, телесем в Ревеле почивающий и душею на небесех царствующий; радуйся, дерзновенный о нас к Богу молитвенниче; радуйся, священномучеником рукоположенный; радуйся, и сам в чине мученическом прославленный; радуйся, твердый воителю за паству твою; радуйся, путем архиерейским безбоязненно шествовавый; радуйся святителю Платоне, Церкве нашея похвало и украшение.
Песнь 7
Богопротивное веление беззаконнующаго мучителя высок пламень вознесло есть. Христос же простре богочестивым отроком росу духовную, Сый благословен и препрославлен.
Апостольской жизни поревновавый, апостольский конец жития твоего приял еси, отче Платоне, и ныне наслаждаешися со апостолы жизни бесконечныя, молися Христу Богу о чтущих память твою.
Приобщи и нас, грешных, вере твоей, священномучениче Платоне, укрепи стопы наша на пути жизни христианской, соделай нас неколеблемы от ветр нечестия, и научи нас Троицу Святую любити паче живота своего.
Взираем на подвиг твой, Платоне мучениче, прославляем Бога нашего, давшего нам новаго ходатая, наставника и руководителя душ наших.
Богородичен: Милостива мне буди, Дево, и уязвлена мя оружием греха врачеством Твоея молитвы исцели, благословен, зовущи, Плод чрева Твоего.
Песнь 8
Пещь иногда огненная в Вавилоне. действа разделяше Божиим велением, халдеи опаляющая, верныя же орошающая, поющия: благословите вся дела Господня, Господа.
Бысть вера твоя, святителю Платоне, оплот крепок. Пребыл еси в жительстве евангельстем вся дни живота твоего, и во времена смуты велия апостольски учил еси хранити чистоту сердечную, блюсти незлобие душевное, Богу молитися на всякий час и к сущим в бедах сострадание имети.
Дивна проповедь твоя, незыблемо упование твое, твердо веровал еси, святителю Платоне, яко благочестие на земли никогдаже исчезнет.
Созерцал еси последняя яко настоящая, дадеся тебе зоркость орляя во святительской хиротонии, и прозревал еси, яко Истина распространятися имать на земли до скончания века.
Богородичен: Избави мя страстей нашествия, Владычице, и борющия мя враги ныне преобори, утверди мя на камени Божия воли, душу мою просвети, двере божественнаго Света.
Песнь 9
Безначальна Родителя Сын, Бог и Господь, воплощься от Девы нам явися, омраченная просветити, собрати расточенная. Тем Всепетую Богородицу величаем.
Ангелом Церкве Эстонския поставлен бысть, явился еси новый мученик Церкве Российския, святителю Платоне, молися непрестанно Христу Богу нашему, во еже преодолевати нам соблазны разделения и братолюбие выну сохраняти.
Яко пастырь стада Христова, пример нам показал еси, о страстотерпче чудный! Смертию твоею прославил еси Троицу Нераздельную. С собором святых совокупле=нный, и нас единомыслены соблюди во еже пребывати нам стадом единым, во еже купно приносити нам Богу жертву хваления.
Ты в житии своем Богу угодил еси, Платоне приснопамятне, сего ради приведе тя Господь к страдальчеству за веру православную, сего ради сопричисли тя к сонму Новомученик Российских, сего ради сотвори тя ходатая за новособранную паству Свою.
Богородичен: Землю убо мглою, небо же облаки одеваяй Господь, в плоть мертвенную из кровей Твоих, Дево, одеяся, во одежду славы бессмертия одевая человеки.
Светилен:
Во святителех и мученицех просияв священне, верен явился еси пастырь, Христову испивше чашу. Тем во обоих благоугодив Христу, Тому молися о всех нас с горними силами, во свете ныне водворяяся.
Слава и ныне, Богородичен:
Архангела Гавриила глас восприимше рцем: радуйся, Мати Божия, Яже Жизнодавца Христа миру рождшая.

На хвалитех стихиры, глас 8:
Аще и в стольнем граде служил еси, Платоне трудолюбиве, но не утаися от сродник твоих вера чудная твоя: достже бо свет добрых дел твоих до отчизны твоея, и тамо избран бысть во архиерея, и новым служением Богу угодил еси, следуя стопам Христа Подвигоположника.
О священномучениче Платоне! Усердный насадителю Православия среди эстов явился еси, неустанно трудился еси ради Церкве Христовой, не покладая рук своих, святитель народа Божия став, ожиданий его не посрамил еси, укрепляя в вере новых чад твоих, покоя не давал еси плоти твоея, просвещая, утешая и укрепляя паству свою во времена мятежа страшнаго.
Крест Господа своего на рамо взем и Ангельскому житию поревновал еси, своего Владыки странствованию подражая, Егоже заповедем хранитель был еси истинный, священне архиерею Платоне преблаженне.
Приидите, боголюбивии вси, Православием одеяннии, чистыми сердцы и светлыми душами память почтим священномученика Платона, иже молится присно о нас ко Господу.
Слава, глас 6:
Крепчае адаманта вера твоя показася, священномучениче Платоне, сего ради и поставлен бысть на высоту церковную в годину тяжких испытаний, из темницы Юрьевския на мученичество веден был еси, утверждая кровию своею новорсобранную паству свою.
И ныне, Богородичен:
Никтоже притекаяй к Тебе посрамлен от Тебе исходит, Пречистая Богородице Дево, но просит благодати и приемлет дарование к полезному прошению.
НА ЛИТУРГИИ
служба священномученику.