Редкие Богослужебные тексты

сщмч. Иоанну Царскосельскому.
Тропарь Глас 4-й:
Молебствие о умирении междоусо=бныя бра=ни,/со Крестным ходом соверша=я/ от безбожник убие=н был еси=,/ священномучениче Иоанне;/ не преста=й и ныне моли=тися за ны,/ да сохранит Господь Церковь Русскую и страну нашу/ от сете=й раздора и мяте=жа диа=вольскаго/ и спасе=т души наша,/ яко Милосерд.
Кондак, глас 8-й:
Яко первому=ченика Це=ркве Ру=сския/ ублажа=ем тя, священному=чениче Иоанне,/ па=стыря Села Царскаго,/ кро=вию своею вселенную всю извести=вшаго / о начале гонений лютых и жестоких,/ в нихже велий сонм новому=ченик просия=,/ и=миже д=ивно просла=вися Дом Господень,/ Ему=же святы=ня подобает в долготу= дний.
Служба священномученику Иоанну Царскосельскому
Великая вечерня:
Господи воззвах : глас 1
Радуйся, прехвальне священномучениче Иоанне, / Христу последовав, отечество свое преславное оставив, / яко Авраам пришлец в зе=млех новых был, ветхаго человека совлеклся еси, / Америки просветитель явился еси,/ со усердием о стаде Христове молись, /единонравный апостолом ходатай о душах наших.
Радуйся, Иоанне всехвальне, / подвиги апостол явив, / терпение и любовь к пастве своей показав, / Богу истинному во смирении и послушании послужив, / камень веры Истинныя во Америце утвердив, / молитвами твоими, Церковь сохрани в мире и спаси души наша.
Радуйся, священномучениче Иоанне, /возвращся во отечество свое/ веру Христову поругаему обрел еси,/ со властию от Бога тебе данною,/ ругатели безбожныя обличив, / о еже избавити люди от междоусобныя брани взывал еси,/ себе самаго в жертву живую/ Богу принесл еси./И ныне Христу, святе, молися// даровати людем российским мир и велию милость.
Церкве Российския славо/ и Отечества нашего украшение,/ священномучениче Иоанне,/ властию от Бога тебе данною,/ ругатели безбожныя обличил еси,/ и, яко волки лютыя, от стада Христова отгнал еси,/ диавола посрамил еси,/ кровь же твоя, яко Авелева, от земли= вопиет. / Сего ради ходатай на Небеси о нас верен буди,/ и моли спастися душам нашим.
Слава, глас 5
Радуйся, Церковь Русская и Царское Село,/ ликуй земле Америка и град Чикаго,/ веселися и ты Эстонская земле=./ Благословение имущи, священномученика Иоанна,/ Патриарха Тихона сподвижника,/ вернаго и праведнаго служителя Господня,/ ревностнаго учителя и защитника Правды Божия,/ просветителя пребывающих во тьме,/ утешителя плачущих, / наставника заблуждших,/ истиннаго пастыря стада Христова,/ молитвенника о мире всего мира и спасении душ наших.
И ныне, Богородичен: Всемирную славу:
Прокимен дне. И чтения три.
Притчей чтение:Память праведнаго с похвалами…
Притчей чтение:Уста праведнаго каплютъ премудрость…
Премудрости Соломоновы чтение:Праведник, аще постигнет скончатися…
На литии стихира храма и стихиры глас 4
Священномучениче Иоанне, /вере Православней вся ны наставивый,/ словом и делом защищая стадо свое,/ даже до пролития крове. / О сем же и мы чада твоя сущи/ благодарно с тобой вопием, / Слава Христу Богу нашему, /даровавшему ти венец мученический/ и нам, тобою наставляемым, велию милость.
Дивному во святых Своих,/ Богу и Владыце живота,/ пение и исповедание прино=сиши, Иоанне, непрестанно, / в триех Лицех познаваемому, / в Существе же Едином проповеданому,/ храм Божий в души твоей воздвигшему, / и светом Своим Присносущным осиявшему тя, / тобою же и нас просвещающему.
Слава, глас той же:
Радуйся, преславне отче Иоанне,/ земли нарвския изрядный учителю, /Села Царского пресвитере/ и Церкви Российския первомучениче,/ благодать бо сугубая дадеся ти первым пострадати за Христа от безбожных./ Сего ради ныне дерзновение имаши усердно молитися за ны,/ не остави попечением своим паствы своея.
И ныне, Богородичен, глас тойже:
Радуйся, Пречистая Дево, / радуйся Богоневесто, радуйся, верных прибежище, / радуйся, святителей непрестанное пение, / радуйся, храмы Твоя воздвигнути даровавшая угоднику Твоему, / священномученику Иоанну, /егоже моления приемши, спаси благочестно поющия Тя.
Стихиры на стиховне, глас 8:
Приидите людие /, прославим священномученика Иоанна/просветителя и строителя Церкви Божия, / учителя и хранителя веры Христовы, / служителя Жертвы Бескровныя,/ истинного пастыря и наставника, / жизнь свою за Христа положившаго.
Стих: Священницы Твоя облекутся в правду/ и преподобнии Твои возрадуются.
Приидите, восхвалим священномученика Иоанна, /приведшаго в земли многобожия и ересей /к православной вере люди - паству свою, /словом и делом исповедавшаго Христа. / Темже, священномучениче, утверди веру нашу, да молитвами твоими Он Спасет души наша.
Стих: Честна пред Господем/ смерть преподобных Его.
Приидите, восхвалим священномученика Иоанна,/ Пастыря Церквей Российския и Американския, / Ты бо отче Иоанне, во всем Христу подражал еси, / стадо свое паствил еси, не яко наемник, но яко истинный пастырь Христов //и ревнитель о спасении душ наших.
Слава, глас 4:
Ангели страданием твоим дивляхуся,/ и Церковь Небесная радостно тя прият/ достохвальна священномученика Иоанна./ Ныне же, священныя руце твоя к Престолу Святыя Троицы простирая,/ моли о спасении благочестно славящих тя.
И ныне, Богородичен, глас тойже:
Призри на моления Твоих раб, Всенепорочная,/ и всякия скорби избави землю Русскую/ домом Твоим нареченную/ и кровьми новомученик освященную./ Да не постыдимся, Владычице Державная,/ Тя призывающии,/ Ты бо еси православных помощь,/ радость и покров/ и спасение душ наших.
УТРЕНЯ
По 1-м стихословии седален
Воплощение добродетели, ревностный учителю и защитниче Веры христианския, истинный пастырю стада своего, в Граде Небесном ныне пребывающий, священномучениче Иоанне, не престай молитися за ны.
Слава, и ныне.
О Всепетая Дево,/ Тя вемы Покров земли Русския/ Тебе бо, грешнии, имамы предстательство,/ Тебе стяжахом в напастех спасение,/ Едину Всенепорочную.
По 2-м стихословии седален
Ныне священномучениче Иоанне, венцем мученическим от Царя Славы, глава твоя украшается, и полки демонов в бессилии своем устрашаются. Негасимый бо свет славы твоея, просвещает Христос Бог и освящает, славящих Тя.
Слава, и ныне.
Молитвеннице теплая, Заступнице рода христианскаго,/ приими моления раб Твоих/ и осени Русь Православную покровом Твоея благости.
По полиелеи седален:
Воскликнем Богу гласом радования и прославим пресвитера Иоанна, священномученика Царскосельского и Чикагского, первомученика Церкви Российския, отца нашего достохвальнаго, ведшаго нас на путь спасения, достигшего Царя славы Христа, ныне Церковь Русская и Американская прославляет тя, молитвенника о душах наших.
Слава и ныне:
О Пречистая Дево, рождшая Бога Вечного Царя, с верою и любовию притекаем к Тебе и священномученику Иоанну. Молитеся Христу Богу о спасении душ наших.
Канон, глас 4.
Песнь 1
Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама/ Амаликову силу в пустыни победил есть.
Священство от архиерей прием, верный служитель Тела Христова был еси, ныне же предстоиши пред престолом Вседержителя, испы=танный и верный слуго= и друг Господень.
Руце твоя во гневе не простер, Святые Дары приносящия и усты твоими проповедавшими Евангелие Правды, проклятия на безбожныя не давый, Священномучениче Иоанне, во всем уподобился еси Христу, и ныне предстоиши у престола Царя славы, моляся о нас.
Верный вертоградарь вертограда Христова, семя жизни вечныя неустанно, со усердием на земли возращая, священномучениче Иоанне, мзду за труды твоя в жизни вечной из рук Спасителя получив ныне, со всеми святыми радуешися.
Богородичен: Приими песнь хвалебную от недостойных уст приносимую, препрославленная Мати Божия.
Песнь 3:
Веселится о Тебе Церковь Твоя, Христе, зовущи:/ Ты моя крепость, Господи,/и прибежище, и утверждение.
В землю нову, принесл еси Новый Завет, во Христе. Ко Христу многи привел еси уча и крестя их, во имя Отца и Сына и Святаго Духа.
Сеяв, яко сеятель, в земли плодоносней Северо - Американстей, веру православную Христову. Нивы многоплодныя тобою насажденныя, произросли суть ныне во вся концы земли.
Яко апостол Христов, проповедуя учение о спасении рода человеческого, прошел еси по Нову Свету, светом Евангелия вся просвещая.
Истину и красоту веры православныя усердно насаждая, посреде безбожия, ересей и раскола, учение Христово, славне Иоанне, в чистоте апостольстей и святых отцев преподал еси.
Богородичен: Тя Предстательницу, Пречистая Дево, молим:/ преложи нашу печаль на радость и скорби належащия избави, Заступнице Усердная наша.
Седален, глас 3:
Заветы исповедников и священномучеников Христовых восприем,/ душу твою за веру Православную положил еси, святе,/ еюже утверждается земля Русская./ Сего ради молися, священиомучениче Иоанне,/ любовию чтущим тя верными до конца Христу быти.
Слава, и ныне:
Не имамы инаго прибежища разве Тебе, Богородице,/ отечества нашего усердная Заступнице:/ всяк бо, почитаяй Тя, надежду обретает.
Песнь 4:
Вознесена Тя видевши Церковь на Кресте,/ Солнце Праведное,/ ста в чине своем,/ достойно взывающи:/ слава силе Твоей, Господи.
Воли Божией последовавый священномучениче Иоанне,/ землю Америки оставив к брегам Балтийским преплыв,/ в земли Эстонстей паству твою учил еси, Закону Господню,/ в Нарве граде, юныя и старыя любовию наставляя,/ не остави верных чад твоих, верно почитающих память твою.
Изрядная похвало града Нарвы, /мучениче и пастырю Иоанне, не забуди нас, почитающих память твою, /буди щит и ограждение древнему граду, в немже проповедал и учил. /Буди ходатай и помошник православным людем, прославляющим святую память твою.
Настоятельство приемля, в веси Силламяги, / ученик неложный Божия Матери явился еси, / пред иконою ея Казанской, безмездно послужив, люди, тамо живущия, закону Господню наставляя день и нощь. / Не остави и ныне тамо живущих, чтущих память твою.
Шествуя путем Господним к передугатованному страданию твоему, /пределы Эстляндии оставльша, во Отечество твое Господь тя возврати./ Царскосельским пастырем тя постави, верного служителя Своего.
Богородичен: Тя Предстательницу, Пречистая Дево, молим:/ преложи нашу печаль на радость и скорби належащия избави, Заступнице Усердная наша.
Богородичен: Стена необоримая и Покров всемощный Российстим новомучеником явилася еси, Пресвятая Дево,/ темже Тя величаем.
Песнь 5
Ты, Господи, мой Свет,/ в мир пришел еси,/ Свет Святый, обращаяй из мрачна неведения/ верою воспевающия Тя.
Во отечестве своем веру Христову поругаему обрел еси отче Иоанне, Ты молился еси о людех Твоих погибающих, верный делатель сый верторграда Христова: «призри Господи с Небесе ныне и посети Виноград Твой, его же насади Десница Твоя и прослави славою Твоею».
Веру свою не токмо бдением и постом показавый, но желаяй мира, заповедь Христа: Блажении Миротворцы, яко тии Бога узрят - даже до смерти мученическия исполнил еси, поношения и смерть приял еси, за многосрадальныя чада страны твоея. Ныне зриши Бога и Творца всяческих.
Первый в чине пресвитерстем новомучеников ты явился еси Иоанне пресвитере, во Америце прежде престолу Божию предстоявый, Яко лютых безбожников в Царском Селе обличителя, венча тя Господь венцем мученическим. В славе и мужестве пред мучители дивнаго, сего ради заступи нас.
Пророку Захарии уподобился еси отче Иоанне, ибо из рода священническаго произсшел еси, усердно и смиренно Воле Божией повинуяся. подобно пророку смерти предан был еси, иереское служение исполняя.
Богородичен: Иже от Девы неизреченно рождейся, Господи,/ сохрани молитвами Ея Церковь Твою,/ Тебе славящую православными гласы.
Песнь 6
Пожру Ти со гласом хваления, Господи,/ Церковь вопиет Ти,/ от бесовския крове очищшися/ ради милости от ребр Твоих/ истекшею Кровию.
Мира Евангелие проповедал еси, о гонимых пред гонитtли предстательствуя, к житию праведному сих призывая: Блаженни миротворцы, яко тии сынове Божии нарекутся.
Свет добродетелей твоих ослепляет всех избравших тьму. На смерть предаша тя, свет Христов в тебе сиявший угасити хотяще. Ныне же предстоиши, священномучениче Иоанне, в свете негасимом славы Божия, просвещающим мир.
Авелю кроткому уподобился еси, незлобиве Иоанне, братоубийство и ненависть в народе своем всем сердцем желая истребити. О мире к законопреступным взывая: не проливайте крови неповинныя! Те же, Каинову убийству поревновавше, тебе связавше, тайно изведше убиша.
Безчеловечные мучители тебе на смерть ведша, избиша тя и ругахуся ти. Мы же видяще в тебе Агнца Божия на заколение приведена, вопием: избави нас, священномучениче Иоанне, от козней и наветов дивольских.
Якоже первомученик Церкви Христовой архидиакон Стефан, ты, Иоанне, добропобедный мучениче, полк новомученический Церкви Российския возглавил еси. Подобно Стефану изведен бысть вне града и тамо биен быв, убиваем, молился еси о убивающих тя: не ведят бо что творят, остави им Господи, грех их.
Молился еси о мучителех своих, Христу подражая, священномучениче Иоанне: Господи прости им согрешения их, не ведают бо что творят,- призывая милостиваго Бога.
Богородичен:Поем Тя, Предстательнице теплая и Заступнице христиан, Богородице Всепетая,/ яко со всеми святыми молиши Сына Твоего и Бога нашего/ обрести нам велию милость.
Кондак, глас 8
Ревностно пастырское служение свое исполняяй, / ты яко жертву благоприятную / душу свою Богу принесл еси, / моли Христа Бога, отче Иоанне, / мир миру даровати // и душам нашим велию милость.
Ин кондак, глас 8
Яко первому=ченика Це=ркве Ру=сския/ ублажа=ем тя, священному=чениче Иоанне,/ па=стыря Села Царскаго,/ кро=вию своею вселенную всю извести=вшаго / о начале гонений лютых и жестоких,/ в нихже велий сонм Новому=ченик просия=,/ и=миже д=ивно просла=вися Дом Господень,/ Ему=же святы=ня подобает в долготу= дний.
Икос:
Неустанно в трудах своих веру православную в землех Америки утверждая священномучениче Иоанне, и в отечестве своем по возвращении твоем деяния добрые непрестанно творя, молитву принесл еси Богу за мир небесный, и за сие от безбожных пострадал еси. Мы же овцы паствы твоея, просвещенные словом и делом твоим, благодарственно взываем Радуйся, священномучениче Иоанне, пастырь добрый стада Христова!
Песнь 7
В пещи авраамстии отроцы персидстей,/ любовию благочестия паче,/ нежели пламенем, опаляеми, взываху:/ благословен еси в храме славы Твоея, Господи.
Иерархов Тихона и Рафаила и с ними же священномучеников Александра и Алексия, Север Америки просветивших, прославим, с ними ныне и ты, священномучениче Иоанне, предстоиши у престола Царя Славы, веру Христову православную в Новом Свете утвердивый.
Духовное достояние твое, Отче Иоанне, с нами согласно молится, о Церкви Святей в Земли Новей созданней, подвигом и жертвою святых ея.
Якорь истины и чистоты веры православныя, пастве своей подал еси, спасая их в буре богопротивных учений.
Храм святый во имя Отца и Сына и Святого Духа, Троице святой в Чикаго со святителем Тихоном ты воздвигл еси, и тобою хвалится земля Американская, прославляет тя и земля Русская яко истинного пастыря и апостола Христова.
Богородичен: Яже паче ума и естества Бога рождши, Неискусомужная Марие,/ чтущия Тя от враг видимых и невидимых избави,/ Ты бо еси земли отцев наших Держава необоримая.
Песнь 8
Руце распростер, Даниил/ львов зияния в рове затче;/ огненную же силу угасиша,/ добродетелию препоясавшеся,/ благочестия рачители отроцы, взывающе:/ благословите, вся дела Господня, Господа.
Воздвигнув яко Соломон, дом молитвы, Господу нашему, священномучениче Иоанне, Богу взывал благословите, вся дела Господня Господа.
От юности твоея Богу последовал еси, священномучениче Иоанне, орудием Божией правды был еси, образ Божий в себе показав, непрестанно Господу воспевал, благословите, вся дела Господня Господа.
Отца, и Сына, и Духа Святаго, Бога Едина, в триех лицах познаваемаго - Троице послужив, священномучениче Иоанне, истинного Бога проповедал еси, за Негоже и смерть приял еси. Мы же с тобою вопием, благословите, вся дела Господня Господа.
Богородичен: Христа зрящи умерщвляема, Многопетая Владычице,/ и, видящи исполнение Симеонова проречения, слезящи, взываше:/ благословен еси, Боже, во веки.
Песнь 9
Камень нерукосечный/ от Несекомыя Горы, Тебе, Дево,/ краеугольный отсечеся,/ Христос, совокупивый разстоящаяся естества./ Тем, веселящеся, Тя, Богородице, величаем.
К божественней преложился еси ныне радости, к райстей широте пространней, к мысленным и премирным обителем, идеже мучеников чинове, идеже есть глас чист празднующих, Иоанне добропобедный, темже тя вси величаем.
Поюще песнь хвалебную, с лики Ангельскими, священномучениче Иоанне, испроси и нам, грешным, немолчными усты и чистым сердцем с ними Христа славити.
Отпадших от веры православныя и спасительныя, на путь истинный наставляяй и суетные шатания языков лживых истребляяй, священномучениче Иоанне, сохрани паству твою от ересей, раскола и нестроений.
Путь всея земли скончав, отче Иоанне, Небеснаго Иерусалима достигл еси, ныне прославляют тя земныя грады, Село Царское и град Чикаго, в них же семя жизни вечныя насадил еси.
Богородичен: Иконами твоими, Пречистая, благословление на землю нашу низпо=слано бысть. О пресвятая Богородица Дева, благодарственно вопием ти, сохрани нас невещественным покровом твоим.
На хвалитех стихиры, глас 8
Под.: О преславнаго чудесе.
Ныне Чикаго и Царское село,/ радуются, яко священномученик Иоанн, венцем мученическим венчается от Царя славы Христа Бога нашего, Ему же до крови и смерти той послужи. Моли Христа Бога, земле Российкой, и Отечеству твоему спастися.
Верный делатель винограда Христова был еси, священномучениче Иоанне, кровию своею, яко водою напоил еси его. Ныне же, напояеши виноградник сей, молитвами твоими.
О священномучениче Иоанне, кому уподобился еси? Авелю, яко незлобив бе, Аврааму, яко Господу последовал еси отечество свое оставив, Соломону, яко воздвл еси храм Господень, Моисею, яко провел еси паству свою сквозь пустыню страстей, Ною, яко сохранил еси народ свой от потопа греха, Мироносицам, яко не отреклся еси от Христа, первомученику Стефану, яко немолчно славил еси Христа. О священномучениче Иоанне, моли о нас, празднующих святую память твою.
О священномучениче Иоанне,/ свещниче Христов, просветивый всех, /река, напоившая нас верой и доброделанием,/ агнец Божий безвинно пострадавый и на заколение отведенный,/ камень веры Христовой,/ проповедник и учитель истины Божией,/ пастырь добрый, за паству даже до смерти пострадавый./моли Христа спастися душам нашим.
Пеньми и песньми духовными прославляем тя, священномучениче Иоанне, яко столп крепкий и учитель веры христовой в землях Северо-Американских и Среднего Запада явился еси, живот твой за люди отечествия твоего положивый, и венец мученический приемый, молися о нас, духовных чадех своих.
Слава, глас той же:
Ликуй ныне мученическое воинство, блаженнаго проповедника и священномученика Иоанна Царскосельского и Чикагского восхвалим - предстоит бо ныне пред престолом славы Божия. Молися за ны Христу Бессмертному Царю о оставлении прегрешений наших, испроси у Него нам велию милость.
И ныне:
О мати Божия, Господа нашего Иисуса Христа, Мучеников похвало и преподобных радование. Молимся Тебе, со священномучеником Иоанном о спасении душ наших.
НА ЛИТУРГИИ
Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми.
Апостол к Римляном, зачало 99 (гл. 8:28-39). Аллилуйя, глас 6: Священницы Твои облекутся в правду, и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело.
Евангелие от Луки, зачало 106 (гл. 21:12-19).
Причастен: В память вечную будет праведник:
МОЛИТВА
О избранниче и угодниче Христов, священномучениче Иоанне Царскосельский и Чикагский, Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! Ты во время гонения безбожнаго от сокровищницы души твоея спасительное исповедание Православныя веры изнесл еси, и людем верным пастырь добрый явился еси, душу твою за Христа и Его овцы полагая и лютыя волки далече отгоняя. Ныне убо призри на нас, недостойных чад твоих, умиленною душею и сокрушенным сердцем тя призывающих. Умоли Господа Бога, да простит согрешения наша и избавит от адовых уз и вечнаго мучения. Утверди нас в вере святой, научи нас всегда творити волю Божию и хранити заповеди церковныя. Буди пастырем нашим - правило веры, воином - вождь духовный, болящим - врач изрядный, печальным - утешитель, гонимым - заступник, юным - наставник, всем же благосердый отец и теплый молитвенник, яко да молитвами твоими соблюдется в Православии Святая Русь и непрестанно славится в ней имя Пресвятыя Троицы, Отца и Сына и Святаго Духа во веки веков. Аминь.