Редкие Богослужебные тексты

https://dkhl.livejournal.com/12383.html?utm_source=nc&ila;_campaign=notif... Марта в 22-й день
Преподобноисповедницы Софии Киевския,
На Велицей Вечерни

На Господи, воззвах: стихиры, глас 8

Подобен: О, преславнаго чудесе:

О, преславнаго чудесе! Новоявленная звезда днесь на тверди церковней показалася еси, богоблаженная исповеднице Софие, Свету Великому предстоящи присно, и невечерняго Божества сияньми всегда просвещаема и обожаема, верою память твою божественную совершающих просвети, молящися непрестанно о всех нас.

О, преславнаго чудесе! Ангельскому житию подражающи, Христу от юности себе уневестила еси, преподобная мати Софие, и во дни гонения безбожнаго Троицу Святую небоязненно исповедала еси. Темже и венец сугуб Благодетель тебе дарова, к Немуже возшла еси, украшена светло, яко подвижница всехвальная, и яко исповедница непобедимая.

О, преславнаго чудесе! Богомудрая исповеднице Софие, мироносицы восприемши чин, мужемудренно Христу последовала еси, и страдания за имя Его претерпела еси. Темже безсмертныя трапезы и жизни вечныя во Царствии Божии ныне наслаждаешися. Сего блаженства сопричастники и ны сотвори, мати преподобная, многомилостивым ходатайством твоим ко Владыце.

О, преславнаго чудесе! Тебе, досточудная мати Софие, дадеся благодать не точию во Христа веровати, но и по Нем страдати, верным образ подающи, да последуем стопам твоим, имиже немокренно пучину скорбей прошла еси и со дерзновенным исповеданием во врата небесныя востекла еси.

О, преславнаго чудесе! Сердцем верующи в правду, усты Христа Бога исповедала еси во спасение, всечестная мати Софие. Заточения, изгнания и многоразличныя страдания ради сладчайшаго Христа сладце претерпела еси. Темже тепле Богу молися, во еже утвердити Русь святую во Православии до скончания века.

О, преславнаго чудесе! Веры бронею, и щитом благодати, и креста копием вооружившися, сопротивным силам непобедима пребыла еси, и яко божественная храборница, демонския ополчения победивши, со Ангелы ныне ликуеши, Софие достославная, верныя же заступаеши и ко спасению наставляеши, усердно призываемая.

Слава, глас 6:

Воистину апостольский глагол исполнися на тебе, преподобноисповеднице Софие, яко ни скорбь, ни теснота, ни гонение, ни глад, ни нагота, ниже беда, ни меч, не возмогоша разлучити тя от любве Христовы.

И ныне, Богородичен догмат, глас тойже.

Вход. Прокимен дне. И чтения.

Пророчества Исаиина чтение:

Тако глаголет Господь: вси языцы собрашася вкупе, и соберутся князи от них. Кто возвестит сия в них? Или, яже от начала, кто слышана сотворит вам? Да приведут свидетели своя, и оправдятся, и да услышат, и да рекут истину. Будите Ми свидетели, и Аз Свидетель, глаголет Господь Бог, и отрок, егоже избрах. Да познаете и веруете Ми и разумеете, яко Аз есмь, прежде Мене не бысть ин Бог, и по Мне не будет. Аз есмь Бог, и несть, разве Мене, спасаяй. Аз возвестих и спасох, уничижих и не бе в вас чуждий. Вы Мне свидетели, и Аз Господь Бог, и еще от начала Аз есмь, и несть от рук Моих избавляяй. Сотворю, и кто отвратит то? Сице глаголет Господь Бог, избавляяй вас Святый Израилев.

Премудрости Соломоновы чтение:

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.

Премудрости Соломоновы чтение:

Праведницы во веки живут, и в Господе мзда их, и попечение их у Вышняго. Сего ради приимут Царствие благолепия, и венец доброты от руки Господни, зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый, преподобие. Поострит же напрасный гнев во оружие: споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им Дух Силы, и яко вихор развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества, и гордящиися о народех язык, яко дана есть от Господа держава вам, и сила от Вышняго.

На литии стихиры, глас 2:

Киими похвальными песньми воспоим преподобную Софию, Ангелом сопричастницу и мужественную исповедницу, та бо всех нас научает скорбей безропотному терпению и вольному крестоношению, и молится о нас ко Спасу душ наших.

Киими достойными словесы похвалим подвиги исповедницы: в скорбех терпение, во искушениих крепость, в бедах упование, в молитве Богу предстояние, и ту величающе, в Православии утвердимся, прославляюще Господа Человеколюбца.

Киими похвальными венцы венчаем достославную Софию, от юности мира лукаваго отвергшуюся, и ко Христу всем сердцем прилепившуюся, и Его ради любве судилища беззаконныя претерпевшую, богомудрую исповедницу и дивную молитвенницу, и сию ублажающе, Господу поклонимся, Дивному во святых Своих.

Слава, глас 4:

Днесь торжествует священный град Киев, днесь радуется Русь святая, днесь веселится боголюбцев множество: новая бо преподобноисповедница София не уклонися скорби, не убояся темницы и изгнания, и вся сия Христа ради претерпевши, ныне Престолу Божию предстоит и молит Триединаго Бога о спасении душ наших.

И ныне, Богородичен: Призри на моления:

На стиховне стихиры, глас 4:

Преподобная мати Софие, ты Христу Богу во смирении и кротости послуживши, многих ко спасению наставила еси. Сего ради во время лютаго гонения крепость и силу от Господа прияла еси, во еже победити видимыя и невидимыя враги, и венцем исповедничества увенчалася еси.

Стих: Дивен Бог во святых Своих, Бог Израилев.

Преподобная мати Софие, с любовию ублажаем тя, Евангелия истинную исповедницу, Православия ревнительницу, воздержания учительницу, Ангелом собеседницу, благоуханием жития своего злосмрадие безбожия потребившую и от Господа воздаяние восприимшую.

Стих: Приведутся Царю девы в веселии и радовании.

Преподобная мати Софие, ты во след Христа Бога радостно рекла еси, ибо сладость любве Его душу твою надеждею впери и красота милости Его сердце твое услади испити по Нему чашу страданий. Темже в чертозе Безсмертнаго Жениха твоего с мудрыми девами ныне водворяешися и молишися о душах наших.

Слава, глас 3:

Душу связавши любовию Христовою, исповеднице всечестная, тленная же и временная забвением преминула еси, постнически первее страсти умертвивши, страдальчески второе безбожных посрамила еси. Темже и Зиждителя сугубу дерзновению сподобилася еси, всехвальная, моли Христа Бога согрешений оставление даровати чтущим любовию святую память твою.

И ныне, Богородичен: Без семене от Божественнаго Духа:

Тропарь, глас 5:

От юности Христу уневестилася еси, / добродетельми преславно сияющи, / преподобная мати наша Софие, / премудрая наставнице инокинем явилася еси, / и пред богоборцы дерзновенно Христа исповедала еси. / Темже в вечней славе ныне пребываеши, / Владыце всех молися, мир Церкви даровати / и душам нашим велию милость.

На Утрени

По 1-м стихословии седален, глас 3:

Кто не подивится благоразумию твоему, досточудная мати Софие, яко Господу неотступно последующи, о спасении души твоея умоляющи, крепость на гонители Церкве Христовы обрела еси. Темже днесь празднующе всечестную память твою, прославляем Бога, святыя Своя прославляющаго.

Слава, и ныне, Богородичен: Тя, ходатайствовавшую спасение рода нашего, воспеваем, Богородице Дево, плотию бо от Тебе восприятою Сын Твой и Бог наш, Крестом восприим страсть, избави нас от тли, яко Человеколюбец.

По 2-м стихословии седален, глас 4:

В нощи гонений на Церковь Христову твердым исповеданием веры свеща негасимая явилася еси, предивная мати Софие, и день грядущаго спасения Отечеству нашему возвестила еси. Темже тя похвалами славными величаем.

Слава, и ныне, Богородичен: Покрый нас всемощным покровом Твоим, Всемилостивая Владычице Богородице, защити нас от всяких сетей вражиих, дадеся бо Ти благодатная сила, яко Рождшей Владыку Христа и Спаса душ наших.

Величание: Величаем тя, преподобноисповеднице Софие, и чтим святую память твою, ты бо молиши за нас Христа Бога нашего.

Псалом избранный: 1. Терпя потерпех Господа, и внят ми, и ус-лыша молитву мою. 2. Постави на камени нозе мои и исправи стопы моя. 1. Неправду возненавидех и омерзих, закон же Твой возлюбих. 2. Утрудихся воздыханием моим, измыю на всяку нощь ложе мое, слезами моими постелю мою омочу. 1. Исповемся Тебе в правости сердца, внегда научити ми ся судьбам правды Твоея. 2. Избави мя от гонящих мя, яко укрепишася паче мене. 1. Изведи из темницы душу мою, исповедатися имени Твоему. 2. Бог мой еси Ты, и исповемся Тебе всем сердцем моим. 1. Благо есть исповедатися Господеви, и пети имени Твоему, Вышний. 2. Исповемся Тебе в век, яко сотворил еси, и терплю имя Твое, яко благо пред преподобными Твоими.

По полиелеи седален, глас 1:

Просияла еси ангельским житием твоим, богомудрая мати Софие, украшающися красотою нрава, воздержанием и милосердием, поучающи духовныя сестры твоя словесы душеспасительными, делом же словесы утверждающи, многих ко спасению привела еси и Христа Бога пред отступники мужественно исповедала еси, Емуже прилежно молися даровати душам нашим велию милость.

Слава, и ныне, Богородичен: О, Державная Всецарице, преподобных Надеждо, мучеников Крепосте, Ангелов Славо, человеков Покрове и всего мира Всемощная Заступнице, избави Церковь всякаго злаго обстояния, Едина Чистая и Благословенная.

Степенна, 1-й антифон 4-го гласа. Прокимен, глас 4: Дивен Бог во святых Своих, / Бог Израилев. Стих: В церквах благословите Бога, Господа от источник Израилевых. Всякое дыхание: Евангелие от Матфея, зачало 104.

По 50-м псалме стихира, глас 6:

Преподобная мати Софие, ты Христу последовала еси, не токмо на Фаворе во славе с Ним быти желающи, но и на Голгофу верно возшедшая, яко невеста кроткая и обручница Христова, ныне же с лики новомучеников и исповедников Престолу Господню предстоиши и славиши Превечнаго Бога.

Канон, глас 8

Песнь 1

Ирмос: Поим Господеви, / проведшему люди Своя сквозе Чермное море, / яко един славно прославися.

Кое достойное пение, Христе мой, аз грешный принесу угоднице Твоей, како воспою подвиги ея, аще не Ты Сам, Слове Божий, даруеши ми слово умилительное.

Поборнице славы Христовой, подаждь ми благодать и просвещение восхвалити радостно твое, мати Софие, светоносное торжество.

Вертограда старчества Оптины пустыни любительнице, мати всечестная, во юности дивнаго предсказания тамо сподобилася еси во еже наставницею монахинь тебе быти.

Богородичен: Удивила еси воистинну на мне Владычице, благодеяния Твоя, Отроковице, и милости Твоя. Темже славлю Тя, и воспеваю, и почитаю многое и безмерное смотрение Твое.

Песнь 3

Ирмос: Ты еси Утверждение / притекающих к Тебе, Господи, / Ты еси Свет омраченных / и поет Тя дух мой.

В тяжком недузе Тайныя Вечери причастившися, от одра смертнаго силою Божественною возставлена бысть, преподобная, и яко наперсница любве Христовы, навеки девственною чистотою Ему уневестилася еси.

Яко горлица пустыннолюбная, тихое пристанище для подвигов иноческих избрала еси, мати славная, и свою обитель Пречистей Владычице, Отраде и Утешению всех скорбящих посвятила еси.

Аки сладкое млеко, учение богомудрых старцев Оптинских привши, исполнена была еси вышния премудрости, и якоже венец на главе царстей, тако почи Дух Святый на тебе, всеблаженная.

Богородичен: Утешение в скорбех вем, и отраду в напастех Тя знаю, Богомати, и всесовершенное сокрушение смерти, и реку живота неисчерпаемую, и всех, сущих в бедах, скорое и быстрое заступление.

Седален, глас 4:

Подвигом добрым подвизавшаяся, преподобноисповеднице Софие, к покаянию и добродетельному житию подвигни нас, да и мы твоими молитвами сподобимся прославляти Господа во Царствии Его.

Слава, и ныне, Богородичен:

Единая истинная христаин Покровительнице, всяких лютых обстояний, бед и скорбей нас избави, и молитвами Твоими спаси души наша.

Песнь 4

Ирмос: Услышах, Господи, / смотрения Твоего таинство, / разумех дела Твоя / и прославих Твое Божество.

Видевше ангелоподобное твое житие, мати всехвальная, многия девы восхотеша уневеститися Христу и во иночестем чине Ему усердно послужити.

Богомудренными словесы неустанно поучала еси сестер своих духовных, мати Софие, благоговейно заповеди Божии хранити и усердно творити волю Господню.

Обитель твоя, мати благосердая, врачебница духовная бысть всем ураненным грехом, обильно бо им елей милости Христовой чрез тя подадеся, струпы же грешников, благодатию Божиею исцеляхуся и славися всеми Человеколюбец Господь.

Богородичен: Буря мя одержит напастей, Владычице, и скорбных треволнения погружают, но, предваривши, руку ми даждь помощи, теплое заступление и предстательство Твое.

Песнь 5

Ирмос: Утренююще, вопием Ти: / Господи, спаси ны, / Ты бо еси Бог наш, / разве Тебе иного не вемы.

Божиим изволением игуменский жезл с трепетом приемши, мати досточудная, новому смотрению Господню о тебе повинувшися, града Киева достигла еси во еже прилежно Богоматери во святей Ея обители Покровстей.

Образ была еси словесному твоему стаду, мати всечестная, делы благими, смирением и любовию возвышающися и кротостию привлекающи, и терпением утверждающи инокинь пребывати неуклонными в любви к Богу.

Егда нашествие иноплеменных Господь попусти и земля отечества нашего кровию обагрися, тогда ты, мати милосердная, яко свеща пресветлая, милостынями и щедротами просияла еси, преподобныя великия княгини Анастасии заповеди исполняющи.

Богородичен: Где прочее увем заступление и камо прибегну? Где же и спасуся? Кую теплую обрящу помощь, скорбьми житейскими и бурями колеблем? На Тя Едину уповаю, и Тебе ради дерзаю, и Тобою хвалюся, и притекаю к покрову Твоему, спаси мя, Мати Дево Чистая.

Песнь 6

Ирмос: Ризу мне подаждь светлу, / одеяйся светом, яко ризою, / Многомилостиве, Христе Боже наш.

Скорбию великою обдержима была еси, мати святая, егда узрела еси ослепление народа нашего, отрекшагося от Царя Небеснаго, такожде же и земнаго, иже бысть ктитор обители Покровския.

Егда потопом безбожия объято бысть Отечество наше, тогда ты, мати предивная, ладию обители твоея добре управила еси, истинному Кормчему Христу Богу вручивши.

Егда безумнии власть в Церкви восхитити потщашася, и злохудожная деяния своя обновления благая нарекоша, тогда ты, мати боголюбивая, тем не покорилася еси и из обители богопротивниками изгнана бысть.

Богородичен: Скорбных наведения обуревают смиренную мою душу, и напастей облацы мое покрывают сердце, Богоневестная: но, Свет рождшая Божественный и Превечный, возсияй ми свет радостный.

Кондак, глас 4:

Яко крин благоуханный / посреде пустыни безбожия, / в земнем Отечестве твоем процвела еси, / преподобная мати наша Софие, / и подвиги воздержания исповеданием веры украсивши, / востекла еси к Небесному Жениху Христу, / Иже увенча тя красотою славы нетленныя.

Икос: Како воспоим тя, Церкве Христовой похвалу, достоблаженная преподобноисповеднице Софие, от млада Богом избранную, преподобие непоколебимым исповеданием запечатлевшую и сего ради в вечныя кровы сладчайшаго Жениха Христа вшедшую, Иже увенча тя красотою славы нетленныя.

Песнь 7

Ирмос: Отроцы еврейстии в пещи / попраша пламень дерзновенно / и на росу огнь преложиша, вопиюще: / благословен еси, Господи Боже, во веки.

Во Ирпенстей веси с духовными сестрами жительствовала еси, мати боголюбезная, иноческия подвиги тайно совершающи, и всю себе в руце Божии предающи, яко жертву непорочную.

Трикраты Господь искушаше твою любовь к Нему, мати блаженная, третицею попуская тебе судилища беззаконныя и узы темничныя, да якоже Свою возлюбленную невесту сопричастницею Своих страстей соделает тя.

Серафимскою любовию к Богу пламенеющи, вся лютыя страдания в радость брачнаго пира вменяющи, мати преподобная, взывала еси Христу: Сладчайший Женише, навеки Тя люблю крепкою, яко смерть, любовию.

Богородичен: Кий Тебе дар принесу благодарения, за ихже насладихся, Твоих дарований, и Твоея безмерныя благостыни? Темже славословлю, песнословлю и величаю Твою неизреченную ко мне милость.

Песнь 8

Ирмос: Седмерицею пещь / халдейский мучитель / богочестивым неистовно разжже, / силою же лучшею спасены сия видев, / Творцу и Избавителю вопияше: / отроцы, благословите, / священницы, воспойте, / людие, превозносите во вся веки.

Дерзновенно, мати всечестная, исповедала еси Господа пред отступники и гонители, на неправеднем судищи телом стоящи, душею же чистою присно предстояла еси Христу, Праведному Судии мира всего.

Мудрости никогдаже одолеет злоба, сие слово на тебе, мати премудрая, исполнися, благодушно бо жребий изгнания прияла еси, Христа Бога, не имущаго где главу подклонити, сердечныма очима созерцающи.

Во изгнании тако глаголала еси, мати благая: идеже Бог, тамо и отечество мое, странствование же ми тамо, идеже бы Бог не обретался, обаче стопы моя направи по словеси Твоему, Владыко Всесвятый.

Богородичен: Обстояния, и скорби, и нужды обретоша мя, Чистая, и напасти житейския, и искушения отовсюду мя обыдоша: но предстани ми и заступи мя крепким Твоим покровом.

Песнь 9

Ирмос: Ужасеся о сем Небо / и земли удивишася концы, / яко Бог явися человеком плотски / и чрево Твое бысть пространнейшее Небес / Тем Тя, Богородицу, / Ангелов и человек чиноначалия величают.

Божественная Владыки голубице, крилы златовидными преподобия и исповедания возлетела еси в Небесныя чертоги, мати славная, и ныне царствуеши со Христом, Безсмертным твоим Женихом, в неизреченней радости и веселии.

Терние земных страданий твоих, мати добропобедная, в благоуханный цвет вечныя славы претворися, и ризы скорби твоея порфирою дщери Царевы просияша во обителех Отца Небеснаго, идеже поминай нас, преподобная.

В Горнем Иерусалиме, граде прекраснем, мати многострадальная, разум твой выну просвещается Светом Невечерним и сердце наслаждается вечною любовию, и в единении с Богом ты присно пребываеши.

Богородичен: В песнех благодарных славословлю, и почитаю безмерную милость, и многую силу Твою пред всеми исповедую, и благодеяния Твоя, яже излияла еси на мя, проповедую, величаю душею же и сердцем, и мыслию, и языком всегда.

Светилен:

Преподобноисповеднице Софие, славна память твоя, воистинну бо на тебе исполнися глагол Духа: в память вечную будет праведник. Темже и нас, совершающих память твою с любовию, спасай от всяких бед и обстояний.

Слава, и ныне, Богородичен: Радуйся, Богородице Дево, Владычице Державная, Светодавца миру рождшая, радуйся, похвало всея вселенныя, радуйся, Пречистая Мати Божия Благословенная.

На хвалитех стихиры, глас 4:

Преподобная мати наша Софие, ты иго Христово благое добре понесла еси, ризу души своея исткавши светлейшу паче риз земных, и слезным бисером скорбей ю украсивши. Ныне же Господь отъят всяку слезу от очию твоею. Моли Его, всеблаженная, спастися душам нашим.

Боголюбивая мати наша Софие, ты на земли алкала еси и жаждала еси правды Божия, обаче в Небеснем Царствии ныне насытилася еси, настави бо тя Агнец Божий на животныя источники вод и плодами древа жизни ныне насыщаешися. Моли Его, всехвальная, спастися душам нашим.

Богомудрая мати наша Софие, ты равноангельное житие поживши, покорила еси тело и душу твою духови, и яко злато в горниле испыта тя Христос Бог и обрете тя достойну Себе, и яко всеплодие жертвенное прият тя. Моли Его, досточудная, спастися душам нашим.

Слава, глас 8:

Торжество днесь преподобноисповедницы Софии празднующе, приидите, вернии, воспоем подвиги и труды ея, и к раце мощей ея припадающе, усердно воззовем: буди теплая ходатаица о нас пред Господем, просящи Православней вере утверждения, Отечеству нашему благостояния и всем людем велия милости.

И ныне, Богородичен, глас тойже: Владычице, приими молитвы раб Твоих и избави ны от всякия нужды и печали.

Славословие великое и отпуст.

На Литургии

Блаженны от канона, песни 3-я и 6-я. Прокимен, глас 4: Боже, дщери царей в чести Твоей. Стих: Приведутся Царю девы вслед Ея. Апостол: 1-е послание Петрово, зачало 59 от полу. Аллилуиа, глас 1: Искренния Ея приведутся Тебе. Стих: Приведутся в веселии и радовании, введутся в храм Царев. Евангелие от Матфея, зачало 104. Причастен: В память вечную:

Молитва

О, преподобная и досточудная мати наша Софие, исповеднице всехвальная! Во время гонения безбожнаго ничтоже возможе разлучити тя от любве Христовы: ты бо темничныя узы мужественно претерпевающи, от сокровищницы души твоея спасительное исповедание Православныя веры изнесла еси и образ терпения и непостыднаго упования явила еси. Ныне убо призри на нас, недостойных чад твоих, умиленною душею и сокрушенным сердцем тя в молитве призывающих. Умоли Господа Сил, да утвердит Церковь Свою непоколебиму в мире сем многомятежнем и лукавом, обитель же твою сохранит во благочестии и святости, нам же неослабное терпение даже до конца жития нашего дарует. Буди всем нам благосердая мати и теплая молитвенница, научи нас всегда творити волю Божию и хранити заповеди Его, укрепи нас, малодушных, да и мы всегда и всюду противостанем духу безбожия и льсти. Егда же найдет на ны испытания час, распали любовию Христовою сердца наша и помози незыблему соблюсти веру Православную, да купно с тобою прославим имя Пресвятыя Троицы, Отца и Сына и Святаго Духа во веки веков. Аминь.