Редкие Богослужебные тексты

С Л У Ж Б А
новоявленным мученикам
Рафаилу архимандриту, Николаю иеродиакону
и девице-отроковице Ирине,
Митилинским (Лесбосским) чудотворцам.
День памяти —9.04 и Вторник Светлой седмицы
НА ВЕЛИЦЕЙ ВЕЧЕРНИ
Блажен муж:1-й антифон.
На Господи, воззвах:стихиры, глас 8.
Верою и любовию соше=дшеся, христоимени=тии лю=дие, / пе=сньми свяще=нными восхва=лим днесь / новоявле=нных мучеников и чудотво=рцев: / Рафаила Богому=драго и Николая досточу=днаго, / то=жде неодоле=нную во страда=ниих отрокови=цу Ирину всечестну=ю, / по=стников похвалу и исповедников велича=ние, // усердно моля=щихся о душа=х наших.
Честны=й и светоно=сный наста= праздник,/ радости и веселия испо=лнь; /темже, мучениколю=бцы, ублажи=м/ святы=я му=ченики Христовы:/ Рафаила, Николая и Ирину, / кре=постию своею несокруши=мою / вше=дшия в Небесный Чертог, // иде=же молятся о душа=х наших.
Духо=вне память вашу торжеству=юще / и святы=м моще=м вашим поклоня=ющеся,/ Единаго Бога в Троице славим, просла=вльшаго вы, и вопие=м: / о претве=рдии мученицы, / Рафаиле, Николае и Ирино, / не уста=ните посеща=ти ны // дивными ми=лостьми вашими.
Ины стихиры, глас 4:
Егда= уязви=лся еси желанием боже=ственным,/отче преподобне Рафаиле,/ и, взем крест твой, после=довал еси Влады=це Христу,/ тогда, всякая плотска=я мудрова=ния умертви=в,/ дерзнове=нно ко страда=нием ше=ствовал еси, / Причастием обожа=емь,/ и кротких землю наследова=л еси,/ ныне же, и неизрече=ннаго веселия наслажда=яся, // поминай нас, творя=щих всесвятую память твою.
Преблаженне отче Николае,/ ты от младе=нства Бога возлюби=л еси / и, яко служи=тель ве=рен / Того стопа=м последовал еси,/ усердно Божественная Его повеления исполняя, /и страда=ньми твоими жи=тельства со Ангелы сподо=бился еси;/ ныне же Христу моли=ся // о чту=щих любовию святую память твою.
Ирина чу=дная отрокови=ца, / Христова а=гница непоро=чная, / себе= саму=ю на посече=ние ме=чное приведе / и, яко благово=нное приноше=ние огне=м, Богу принесе=ся. / Тоя= у=бо ублажа=ем свяще=нное страдание, // пра=зднующе, мучениколю=бцы, днесь.
Слава, глас 8:
Ве=лие Божие дарова=ние даде=ся вам,/ всечестни=и Рафаиле, Николае и Ирино,/ всю бо зло=бу мучи=телей победи=ли есте=,/ нетле=нныя венцы= от руки= Вседержи=теля прие=мше, / те=мже ныне на земли= сия=ете славою и чудесы= приди=вными, / на Небеси= же Царю и Влады=це предстоите,/ моля=щеся пода=ти нам // мир и велию милость.
И ныне, Догматик, глас тойже: Царь Небесный:
Вход. Прокимен дне и чтения.
Пророчества Исаиина чтение(глава 43):
Тако глаголет Господь: вси языцы собрашася вкупе и соберутся князи от них. Кто возвестит сия в них или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину; будите Ми свидетели, и Аз Свидетель, глаголет Господь Бог, и Отрок, Егоже избрах, да познаете и веруете Ми, и разумеете, яко Аз есмь: прежде Мене не бысть ин бог, и по Мне не будет. Аз есмь Бог, и несть разве Мене спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляли; сотворю, и кто отвратит то? Сице глаголет Господь Бог, избавляяй вас Святый Израилев.
Премудрости Соломони чтение(глава 3):
Праведных души в руце Божией, и не прикоснется их мука; непщевани быша во очесех безумных умрети, и вменися озлобление исход их, и еже от нас шествие - сокрушение; они же суть в мире. Ибо пред лицем человеческим аще и муку приимут, упование их безсмертия исполнено; и, вмале наказани бывше,
великими благодетельствовани будут: яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему; яко благодать и милость в преподобных Его, и посещение во избранных Его.
Премудрости Соломони чтение (главы 5 и 6):
Праведницы во веки живут, о Господе мзда их, и попечение их у Вышняго: сего ради приимут царствие благолепия и венец доброты от руки Господни, зане десницею покрыет я и мышцею защитит их. Приимет всеоружие - рвение Свое, и вооружит тварь в месть врагом. Облечется в броня правды и возложит шлем - суд нелицемерен. Приимет щит непобедимый - преподобие. Поострит же напрасный гнев во оружие; споборет же с Ним мир на безумныя. Пойдут праволучныя стрелы молниины, и, яко от благокругла лука облаков, на намерение полетят. И от каменометныя ярости исполнь падут грады; вознегодует на них вода морская, реки же потопят я нагло. Сопротив станет им дух силы, и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте; навыкните, судии концев земли. Внушите, держащии множества и гордящиися от народов языков: яко дана от Господа держава вам, и сила от Вышняго.
На литии стихиры, глас 1:
Исцеле=ний во=ды/ ваша мощи притека=ющим источают всегда,/ мученицы сла=внии Рафаиле, Николае и Ирино, / и омывают страсти, и недуги врачуют, / и потопляют полки= демонския действом Святаго Духа./ Темже Господеви моли=теся дарова=ти душа=м нашим // мир и велию милость.
Слава, и ныне, Богородичен, глас тойже:
Свет от Света произы=де, / и в Твою девичу утробу неизреченно вни=де, / и плотию обложи=ся, / и недомыслено и несказанно / из Тебе Сын Твой, Христос Бог наш, роди=ся, / Егоже убо рождеством вся земля освяти=ся // и прелесть идольская разори=ся.
На стиховне стихиры, глас 2:
Сокруша=ему твоему телеси=, / радовался еси, мучениче сла=вне Рафаиле, / страда=ньми бо попрал еси главу вражию, /и сокруши=л еси нечестивых шатания, / и шествовал еси крепко стезею Небесною, // Владыце победоносец я=влься, всехвальне.
Стих: Святым, иже суть на земли Его, / удиви Господь вся хотения Своя в них.
Се=мя ева=нгельское, приле=жно все=янное, возде=лав / в чи=стей твоей души=, Николае преподобне, / сие= умно=жил еси боле==зньми страданий твоих / и, мудре положе=н в Небесных Жи=тницах,/ нетле=нное обрел еси наслажде=ние,/ егоже ныне насыща=яся, блаже=нне,/ твоими ко Христу хода=тайствы // спасай верно пою=щия тя.
Стих:Многи скорби праведным, / и от всех их избавит я Господь.
Любве= ради Христовы/ ме=чное усече=ние и огнь претерпе=вши, / от Царя и Владыки му=ченическим венце=м увенча=лася еси / и с лики святых в неизрече=нней славе / ныне предстои=ши Престолу Божию. / Поминай и нас, соверша=ющих святую память твою, // Ири=но добрая дево.
Слава, глас 6:
Кро=вию ка=плей терпели=внаго вашего страдания/ Спасу Христу предстали есте= яко жертва благово=нна, / чи=сто заколе=ние, благоприя=тен дар, / священное приноше=ние и посвяще=ние непорочно./ Те=мже моли=твами вашими, пресла=внии му=ченицы, / церковное исполне=ние в мире соблюди=те // и испроси=те нам велию милость.
И ныне, Богородичен, глас тойже:
Творец и Избавитель мой, Пречистая, / Христос Господь, из Твоих ложесн прошед, / в мя оболкийся, первыя клятвы Адама свободи. / Темже Ти, Всечистая, / яко Божии Матери же и Деве, / воистинну вопием немолчно: / радуйся, Ангельски, радуйся, Владычице, / предстательство и покрове, // и спасение душ наших.
Тропарь, глас 1:
Непоро=чное жи=тельство соблю=дше, / за Христом даже до страда=ний после=довали есте=, / Рафаиле Богомудре, и Николае блаженне, / и Ири=но де=во всечестна=я, / посреде же= мучений веру сохра=ньше, / неувяда=емыя венцы стяжа=ли есте=. / Сего ради яви= вас Господь лю=дем Своим / яко новых моли=твенников и чудотво=рцев, / исцеле=ния и милости источа=ющих // верою и любовию чту=щим вас.
НА УТРЕНИ
На Бог Господь: тропарь святых дважды. Слава, и ныне, Богородичен, глас 1:
Гавриилу вещавшу Тебе, Дево, радуйся, / со гласом воплощашеся всех Владыка, / в Тебе, святем кивоте, / якоже рече праведный Давид; / явилася еси ширшая Небес, / поносивши Зиждителя Твоего. / Слава Всельшемуся в Тя, / слава Прошедшему из Тебе, // слава
Свободившему нас Рождеством Твоим.
По 1–м стихословии седален, глас 2:
Кровь твою, яко алавастр мира, Христо=ви принесл еси, преподобне Рафаиле. Темже Преблаги=й и Великий Дарова=тель Бог в Небесныя Обители тя прия=, со духовными чады твоими, сего ради память твою верою почитаем, досточу=дне.
Слава, и ныне, глас тойже:
Едина истинная христиан Покрови=тельнице, / всяких лютых обстоя=ний, / бед и скорбей нас избави= / и молитвами Твоими спаси души наша.
По 2–м стихословии седален, глас 6:
Собо=ри верных вси, прииди=те, новоявле=нныя бо му=ченицы днесь созывают нас на трапе=зу духовную; со тща=нием, веселя=щеся, теце=м и память подвигов и сконча=ния их почти=м, сла=вяще тех, яко Божиих угодников и чудотворцев.
Слава, и ныне, глас тойже:
Устами и сердцем величаем Тя, / Дево Мати: / Ты же, ро=ждшая Бога, // не отри=ни нас от Твоего заступления.
Величание: Величаем вас, / страстотерпцы славнии Рафаиле, Николае и Ирино, / и чтим честная страдания ваша, //яже за Христа претерпели есте.
Псалом избранный: 1. Терпя потерпех Господа, и внят ми, и услыша молитву мою. 2. Бог нам Прибежище и Сила, Помощник в скорбех, обретших ны зело. 1. Многи скорби праведным и от всех их избавит я Господь.
2.Приведутся Царю девы, приведутся в веселии и радовании. 1. Искуси мя, Господи, и испытай мя, разжи утробы моя, и сердце мое. 2. Суди ми, Господи, яко аз незлобою моею ходих. 1. Девы да восхвалят имя Господне.2. Да не погубиши с нечестивыми душу мою. 1. Аз же незлобою моею ходих, избави мя, Господи, и помилуй мя. 2. Нога моя ста на правоте: в церквах благословлю Тя, Господи.
По полиелеи седален, глас 8:
Благода=тию Божественнаго Духа/ собрании днесь празднолю=бцы, / лик соста=вльше, поем песнь но=ву, / память сотворя=юще всехва=льных мучеников,/ Рафаила всечу=днаго и Николая Богоблаже=ннаго, / то=жде непобеди=мыя девы Ирины, /в ню=же соше=дшеся, Спаса величаем/ и торжества= вино=вником моле=бне рцем:/ моли=те, страстоно=сцы честни=и, / изба=витися вре=да вся=каго // любовию сла=вящим вас.
Слава, и ныне, Богородичен, глас тойже:
Тя Надежду, Прибе=жище и Предста=тельницу обре=тше, ве=рнии, / к Тебе притекаем и прилежно вопием: / помилуй, Богородице, на Тя упова=ющия / и прегрешений оставление нам испроси / молитвами Твоими, Пречистая.
Таже степенна, 1-й антифон, глас 4. Прокимен, глас 4: Святым, иже суть на земли Его, / удиви Господь вся хотения своя в них. Стих: Презрех Господа предо мною выну, / яко одесную мене есть, да не подвижуся. Всякое дыхание: Евангелие от Матфея, зачало 36.
По 50-м псалме стихира самогласна, глас 6:
Земля освяти=ся кровию всечестно=ю вашею,/ и челове=цы обогати=шася ди=вными чудесы=,/ исцеление почерпа=юще от мощей ваших,/ Богому=дрии уго=дницы Христо=ви,/ сла=внии Рафаиле и Николае, / и незлобивая деви=це Ирино, / моли=теся Го=сподеви, / Ему=же от юности прилепи=стеся, // спасти иже верою пою=щия вас.

Канон святым мучеником, глас 1:
Песнь 1
Твоя победительная десница / Боголепно в крепости прославися: / та бо, Безсмертне, / яко всемогущая, противныя сотре, / израильтяном / путь глубины новосоделавшая.
Му=ченицы богокра=снии, Царя Христа моли=те спасти=ся нам, светлый праздник ваш воспева=ющим, и Небе=снаго Царствия прича=стники бы=ти.
Кто изрече=т мно=гая дарова=ния, я=же Христос подаде= вам, страда=льцы всесла=внии? Те=мже облиста=ете чудесы=, яко светильницы досточу=днии.
Всю надежду и мысль, блаженнии, к Богу име=юще, о временных и тленных отню=д небрегли= есте=, сего ради и венцы от Госпо=да увенча=лися есте=.
Богородичен: Ку=ю Ти досто=йную песнь наше принесе=т неможе=ние? То=чию обра=довательную, е=йже нас Гавриил Архангел тайно научи=: радуйся, Богородице Дево, Благодатная Марие, Господь с Тобою.
Песнь 3
Едине ведый человеческаго существа немощь / и милостивно в не воображся, / препояши мя с высоты силою, / еже вопити Тебе, Святый, / одушевленный храме / неизреченныя славы Твоея, Человеколюбче.
В по=стничестве до=бре пожи=в, мучения за Христа претерпел еси, Рафаиле Богомудре, и испо=лнился еси Боже=ственнаго Света, в не=мже ныне наслажда=ешися веселя=ся.
Начало доброде=тельнаго твоего жития=, страх Господень, от ю=ности прия=л еси, Нико=лае богому=дре, и сей наста=ви тя к пути= пра=вому, и=мже ше=ствуя, во дворы= Господни вше=л еси.
Ди=вным обре=тением мощей ваших, сла=внии, просла=вися честна=я Церковь, иму=щая в себе благода=ти сокровище неоску=дное и пречу=дное.
Богородичен: Ума пресу=щественна ви=дети, я=коже мо=щно, сподо=блься Гаврии=л, Дево Всенепоро=чная, радостный Тебе глас принесе=, Слова зача=тие я=вственне возвеща=ющий и неизреченное Рождество пропове=дающий.
Седален, глас 1:
Тече=ние истинное соверши=вше, всехва=льнии Рафаиле, Нико=лае и Ири=но, мучи=телей крепость победи=ли есте=, венцы Небе=сныя стяжа=вше и Ангелом соприча=стницы показа=вшеся.
Слава, и ныне, Богородичен:
Покров Твой, Дево Богородице, простри= над смире=нными воспева=тели Твоими и сохрани нас от бед и скорбе=й, Ма=тернюю любовь нам, недостойным, излива=ющи.
Песнь 4.
Гору Тя благодатию Божиею приосененную, / прозорливыма Аввакум / усмотрив очима, / из Тебе изыти Израилеву провозглашаше Святому, / во Спасение наше / и обновление.
Зе=млю, я=ко тле=ния жили=ще, оста=вив, свя=те Рафаиле, Преми=рнаго Царства дости=гл еси, лю=тая страда=ния претерпев, и с ли=ки Безпло=тных в Черто=зе Сла=вы неизрече=нныя водвори=лся еси.
Иисуса, Влады=ки твоего, за=поведем Животворным после=дуя и Того яко Подвигополо=ника име=я, ду=шу твою о ста=де твоем положи=л еси, же=ртва всеосвяще=нная Бо=гови яви=вся.
Ле=потою доброде=телей просвеща=ема, от крове=й багряни=цею украси=лася еси червле=ною, Ири=но му=драя де=во, Креста победу и силу воспева=ющи и со Христом ца=рствовати сподобля=ющися.
Богородичен: Святых Святая Богородице Пренепоро=чная, Ча=яние язы=ков и Спасение верных, из Тебе= возсия= Изба=витель, и Жизнода=вец, и Господь, Его=же моли= спасти=ся рабо=м Твоим.
Песнь 5
Просветивый сиянием пришествия Твоего, Христе, / и осветивый Крестом Твоим / мира концы, / сердца просвети / светом Твоего Богоразумия, / православно поющих Тя.
Благоуха=ет ра=ка благослове=нная, му=ченицы добропобе=днии, иде=же свяще=ннии мощи ва=ша почива=ют, исцеле=ния источающия тре=бующим утешения вашего.
Неду=ги и я=звы душе=вныя и теле=сныя врачу=ете, страстоте=рпцы Боголю=бнии, прошения многая предваря=юще и всех во скорбе=х су=щих ми=луете.
Жела=ние души= моея= ве=дуще, чудотво=рцы благосе=рдии, моли=теся Го=сподеви дарова=ти ми разреше=ние грехо=в и вся=каго прошения еже во бла=го исполнение.
Богородичен: Веселя=тся Небе=сныя Силы, зря=ще Тя, Влады=чице, ку=пно же и челове=ков собо=ри ра=дуются, тем=же научи= ны, немощны=я и непотре=бныя, сла=ву Тебе возноси=ти.
Песнь 6
Обыде нас последняя бездна, / несть избавляяй, / вменихомся / яко овцы заколения, / спаси люди Твоя, Боже наш, / Ты бо крепость немощствующих и исправление.
В ри=зу спасе=ния облече= вы Господь, тле=ннаго жития= одея=ние раздра=в, ныне же Того моли=те, да одежду брачную да=рует нам, стра=стьми одержимым, да не отпадем Чертога бра=чнаго по вели=цей Его милости.
Прешли= есте= от страда=ния к славе Небесней, пребога=тии, жизнь временную презре=вше, Вечную же улучи=вше, и ныне ще=дрою помощию вашею не оставля=ете ны.
Побе=ду даде= вы Господь, мученицы преизя=щнии, и венцы= неувяда=емыя; мыже от неисчерпа=емого исто=чника чуде=с ваших утешение почерпа=ем.
Богородичен: Умерщвле=н бысть враг Живоно=сным Твоим Пло=дом, Богоблагода=тная, и по=пран бысть ад, и и=же во у=зах свободи=шася, аз же вопию=: стра=сти разруши=, Преми=лостивая, сердца моего.
Кондак, глас 1:
Яко сокро=вище многоце=нное / и исто=чник чудес неоскудева=емый, / яви=шася нам мо=щи ваша свяще=нныя,/ неду=гом исцеления подаю=ще/ и благодать Божественную притека=ющим к ним явля=юще, / да верою и любовию зове=м вам радостно: / мученицы всесла=внии и достоблаже=ннии, // моли=те Христа Бога о душа=х наших.
Икос:
Прему=дростию и ра=зумом укра=шен, / Рафаи=ле преподо=бне, / му=жеским и тве=рдым смыслом сия=я,/ благ, и кроток, и ми=лостив был еси/ и вруче=нныя ти лю=ди добре= упа=сл еси, / от ага=рянскаго же наше=ствия/ непра=ведное заколе=ние / с духо=вными ча=ды твоими претерпе=л еси, / те=мже и венец нетленный прия=л еси; / сего ради вопие=м ти://моли Христа Бога о душа=х наших.
Песнь 7
Тебе умную, Богородице, пещь / разсмотряем, вернии, / якоже бо отроки спасе три Превозносимый, / мир обнови, / во чреве Твоем всецел, / хвальный отцев Бог и препрославлен.
Житию твоему, Рафаиле всечу=дне, кто не удиви=тся, собрал бо еси, я=коже пчела благоразу=мная, множество цветови=дных доброде=телей, в ни=хже, красу=яся, нас облагоуха=еши.
Ду=шу кроткую и сердечную чистоту стяжа=в, восше=л еси к по=двигом усе=рдно, Единому Христу жизнь и сердце преда=в, Нико=лае треблаже=нне, темже о нас Влады=це помоли=ся.
Потекла еси, после=дующи стопа=м Христовым Божественным, и о=бщница показа=лася еси Стра=стей Его и Царствия, Ири=но всесла=вная, за любовь твою изря=дно увенча=нная.
Богородичен: Новый Адам от чистых кровей Твоих Преве=чный Бог бысть вои=стинну, Егоже ныне моли, Всечи=стая, обетша=вшаго мя обнови=ти, зову=ща: Хва=льный отце=в Бог и Препросла=влен.
Песнь 8
Впещи отроцы Израилевы, / якоже в горниле, / добротою благочестия чистее злата блещахуся, глаголюще: / благословите, вся дела Господня, Господа, / пойте и превозносите во вся веки.
Крепость и силу во Христе полагая, лютую мук пучину преплы=в, Вы=шняго приста=нища дости=же, Рафаиле всече=стне, весь укра=шен Духа Пресвята=го да=ры.
Ты злобу гоня=щих и мучения учи=теля твоего не возмо=гл еси зре=ти, Николае преподо=бне, ду=шу в ру=це Христовы преда=л еси, тле=нных тене=т свободи=вся и Жизни Нестаре=ющей удосто=ився.
То=ки кровей твоих многобо=жия пламень угаси=ша и демонскую лесть потреби=ша, чудеса= же твои, Ирино достохва=льная, не оскудевают; не оста=ви нас предста=тельством твоим.
Богородичен: Чертог Светови=дный, из него=же всех Влады=ка, яко Жених произы=де Христос, воспои=м вси, вопию=ще: вся дела Господня Господа пойте и превозносите во вся веки.
Песнь 9
Образ чистаго рождества Твоего, / огнепалимая купина / показа неопальная; / и ныне на нас / напастей свирепеющую угасити, молимся, пещь, / да Тя, Богородице, / непрестанно величаем.
Неми=лостивно твою главу враг сокруши=, отче Рафаиле, ю=же Бог в Высоча=йших венце=м победи=тельным увенча=, вене=чниче многострада=льне, сла=во мучеников и преподобных.
Еже за Него страда=ти Спас ти дарова=, Нико=лае, яко труды= по=стническия терпели=вно поне=сл еси, и на убива=ющих претве=рдо тя укрепи=.
Во Свет Боже=ственныя Троицы с веселием преше=дши, Ангельским Во=инством ныне сра=дуешися, пречу=дная дево Ирино, с ни=миже непреста=нно мо=ли спасти=ся пою=щим тя.
Богородичен: Всечи=стая Дево, Неве=сто Неневе=стная, па=че со=лнца возсия=ла еси=, всем чудо преесте=ственно Непостижи=маго Рождества= Твоего дарова=вши; тем Тя вси величаем.
Светилен:
Све=том Преве=чнаго сия=ния озари=вшеся, Рафаиле, Николае, Ирино со при=сными страстоте=рпцы, Христу после=довали есте= и, Того благодатию просвети=вшеся, исто=чник чудес и ми=лостей яви=лися есте=; сего ради мо=лим вы: моли=теся ко Господу спасти и просвети=ти ду=ши наша.
Слава, и ныне, Богородичен:
Зарю Пресветлую, явля=ющую нам Солнце Незаходимое, ве=мы Тя, Пресвятая Дево Богородице, и молим Ти ся: Ма=ти Света су=щи, просвети= нас Светом Сына Твоего.
На хвалитех стихиры святаго, глас 1:
Приидите, Безплотных лицы, / во плоти сущим спразднуйте нам / в честней памяти страстотерпцев: / сии= бо тело немощное носяще, / яко безплотнии, Христа ради подвизашася, / о лютых муках неради=вше, / с нимиже молитеся, // о еже спастися нам.
Яко звезды днесь пресветлыя, / от земных недр возсияли есте / и Церковь Божию украси=ли есте,/сиянием Божественных дарований просветивше /души верою и любовию песносло=вящих вас, страстоносцы всечестнии,/ огнепальная страстей наших стремления ороша=ете есте=// Божественными вашими молитвами.
Яко свещницы на престоле, возсияли есте, / святии мученицы и чудотворцы,/ и, яко многоцве=тие благово=нное, израсли есте,/ темже неоскудно потоцы людей православных / притекают к раце ваших святых мощей, // просяще мирови мира и велия милости.
Слава, глас 8:
Богоносных мучеников / Рафаила, Николая и Ирины / всечестную память ныне празднующе, вернии, / научимся, их вере и житию, / истинному поклонению и служению Пресвятей Троице, / их же дерзновенным предстоянием да сподобимся // восприяти богатыя Ея милости и щедроты.
И ныне, глас тойже:
Владычице, приими молитвы раб Твоих / и избави нас // от всякия нужды и печали.
Славословие великое и отпуст.
НА ЛИТУРГИИ
Блаженны от канона песнь 3-я и 6-я. Прокимен, глас 4: Святым, иже суть на земли Его, / удиви Господь вся хотения своя в них. Стих: Презрех Господа предо мною выну, / яко одесную мене есть, да не подвижуся. Апостол к Галатом, зачало 214. Аллилуиа, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь. Евангелие от Иоанна, зачало 51. Причастен: Радуйтеся, праведнии, о Господе, правым подобает похвала.
МОЛИТВА
О, святии и неодоленнии страстоносцы Спасовы, Рафаиле, Николае и Ирино, верность Христу Богу даже до смерти свидетельствовавшии и венец жизни от Него приявшии!
К вам смиренно припадаем и усердно молимся: явите нам, грешным, любовь вашу и многомощное ваше заступление. Испросите предстательством вашим, Богоблаженнии, у Всемилостивого Бога нашего вся яже на пользу душам и телесем нашим, согрешений наших прощение, любовь нелицемерную, болезней и скорбей избавление, ревность о спасение нашем, да благодатию Его Божественною соблюдаеми и спасаеми, славу, благодарение и поклонение возсылаем Отцу и Сыну и Святому Духу, ныне и присно, и во веки веков. Аминь.