Редкие Богослужебные тексты

СЛУЖБА
святой деве-мученице Луки=и
НА ВЕЧЕРНИ
На Господи, воззвах: стихиры, глас 1:
Девства добро=тами украше=на, / нетленно соблюла еси тело Христу, Жениху твоему, / Луки=е дево всечестная, / и просвещена мученическими блиста=ньми, / вселилася еси в чертог Божественный. / Темже твое всемирное совершаем торжество, // Спаса величающе, Тя славою увенча=вшаго.
Тече=ньми страда=льческих крове=й / обагри=в твою священную одежду, Луки=е, / возшла еси, радуяся, в Небесный храм, / яви=тися Богу нашему, / подающему венцы страда=вшим. / Того прилежно моли= // низпослати нам велию милость.
Житие твое равноангельно, / мучение же преславно, / имже сподобилася еси со Ангелы ликовати в радости, / чудесы Божественными землю озаряющи, / дево честная Лукие. / Тем твоими молитвами проси // даровати нам велию милость.
Светло во страдании твоем возсия=ла еси, страстотерпице,/ от кровей твоих преиспещре=на, / и, яко красная голубица, к Небеси возлетела еси, Лукие, // темже молися всегда о любовию чтущих тя.
Слава, глас тойже:
Со Ангельскими чи=нми сочета=лася еси, славная, / мир оставльши и Христа возжеле=вши, / Лукие дево всечестная, // испроси нам велия милости.
И ныне, Богородичен, догматик, глас тойже: Всемирную славу:

На стиховне стихиры, глас 2.
Подобен: Доме Евфрафов:
Дом Духа Божественнаго, / исполненный чистоты и правды, / явилася еси, Лукие прехва=льная, / сосуде честнаго девства, // и веры утверждение.
Стих: Святым, иже суть на земли Его, / удиви Господь вся хотения своя в них.
Царство Небесное, / славная дево Лукие, / наследила еси страданием, / и Небесный чертог воисти=нну, // и свет незаходи=мый.
Стих: Многи скорби праведным, / и от всех их избавит я Господь.
Богом призва=нная, / мученице Лукие славная, / девство свое и веру чистую / на алтарь Христов принесла еси. // Темже ныне радуешися.
Слава, глас тойже:
Услыши наша моления, / Лукие всечудная дево, / любовию к тебе прибегающих, / и сердечная подавай прошения // чтущим святую память твою.
И ныне, Богородичен, глас и подобен тойже:
Пресвятая Мати Божия, / с лики дев святых / молися из Тебе Воплощенному, / Солнцу Правды, Господу, // спасти и просветити души наша.
Тропарь, глас 4:
Подвигом, мученице, добрым подвизавшися / и светлыя венцы приимши, / Свету предстоиши Трисо=лнечному, / просвещаема причастием невещественныя радости, / Лукие дево всечестная, / Того сияньми // просвети души наша.

НА УТРЕНИ
По стихословии седален, глас 6:
Светлый твой, мученице Лукие, праздник / вся созва радостно на трапезу днесь, / предложив страданий твоих боре=ния, мужество и мучи=телем противление, / имиже насыщшеся, верою тя и любовию ублажаем.
Слава, и ныне, Богородичен:
Труждает мя буря греховная / и возмущение безместных помышлений: / умилосердися, Всенепорочная, / и руку помощи, яко Милосердная, простри ми, / да величаю Тя, спасаемый.
Величание:
Величаем тя, / страстотерпице святая Лукие, / и чтим честная страдания твоя, // яже за Христа претерпела еси.
По полиелеи седален, глас 8:
Воспеваем житие твое всечудное / и чтим в Горняя преселение твое праведное, / лобызаем честныя мощи твоя, / токи чудес нам источающия, / и празднуем радостно память твою, // мученице Лукие добропобедная.
Слава, и ныне, Богородичен, глас тойже:
Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси // молитвами Твоими, Пречистая.
Таже степенна, 1-й антифон, глас 4.
Прокимен, глас 4: Святым, иже суть на земли Его, / удиви Господь вся хотения своя в них. Стих: Презрех Господа предо мною выну, / яко одесную мене есть, да не подвижуся.Евангелие от Матфея, зачало 36.
По 50-м псалме стихира самогласна, глас 6:
Троическим Светом озаряема, / со Ангелы ныне ликуеши, / предстоя Престолу всех Царя / и почесть приемля трудов своих, Лукие предивная, / Егоже присно моли // о чтущих святую память твою, преблаженная.
Канон святыя мученицы, глас 6:
Песнь 1
Яко по суху, пешешествовав Израиль / по бездне стопами, / гонителя фараона / видя потопляема, / Богу / победную песнь // поим, вопияше.
Песнь хвалебную, Богу содействующу, приношу ти, Лукие честная: / от избытка бо сердца глаголют уста и тщатся на славословие твое.
Мученическими озаре=на светлостьми=, / чистому предстоиши Жениху твоему, Лукие славная, / душетле=нных прегрешений просящи избавитися хвалящим тя.
Невеста Христова, Божественною благостию украсилася еси, и девства добро=тами, / и Божественными кровьми честна=го мучения, / сугубыми венцы венчаема, Лукие славная.
Богородичен: Боголепное селение, Чистая, Ты была еси, / Небес простра=ннейшее и чистейшее, Богородице Дево Марие, / и ныне о Тебе радуется девственный лик.
Песнь 3
Несть свят, / якоже Ты, / Господи Боже мой, / вознесый рог верных Твоих, Блаже, / и утвердивый нас на камени // исповедания Твоего.
Светом Пресущественным просвеще=нна, Лукие чудная, / воспламенилася еси любовию Божественною и явилася еси заря пресветлая, / облистающая безбожия нощь.
Плоть покорила еси Христу, мученица славная Лукие, / и жизни нетленныя сподобилася еси, блаженная дево.
Падеся мучитель под нозе твои, всеславная, / низложе=н быв твоим терпением, Лукие всечестная.
Богородичен: Якоже неистощи=мое сокровище дарований Тя имуще, Владычице, / независтныя дары от Тебе чудес вси приемлем.
Седален, глас 2:
Вольными твоими стремленьми / возшла еси ко страданию, волею Христу подражающи / и победивши светло тьмы миродержца, / венценосица явилася еси, Лукие Богоприятная. / Поминай нас любовию чтущих святую память твою.
Слава, и ныне, глас тойже:
Упование христиан, Пресвятая Дево, / Егоже родила еси Бога, паче ума же и слова, / непрестанно моли с вышними Силами подати оставление грехов наших всех / и исправление жития верою и любовию присно Тя славящим.
Песнь 4
Христос моя сила, / Бог и Господь, / честная Церковь / Боголепно поет, взывающи, // от смысла чиста о Господе празднующи.
Блистают мученицы светозарныя мощи светом исцелений, верою к сим притекающим, / благодать бо приимь от источников Спасовых, / Того вольней страсти поревновавше.
Исцеление тя даде всем верным Владыка Христос, Лукие добропобедная, / и твоими Божественными молитвами целиши страсти душ наших.
Силою Христа от Девы Марии возсиявшаго, / девы юныя свирепство льстиваго змия попирают / и посрамляют того безумие и немощную дерзость.
Богородичен: Свет рождшая, тьму разруши многих моих прегрешений Твоею зарею, Пренепорочная Владычице, / Яже Солнце правды верным возсиявшая.
Песнь 5
Божиим светом Твоим, Блаже, / утреннюющих Ти души / любовию озари, молюся, / Тя ведети, Слове Божий, / истиннаго Бога, // от мрака греховнаго взывающа.
Потоки кровей твоих миро исцеления всем источают / и отгоняют смрад недугов и скорбей.
Свещу душевную елеем добродетелей разумно украсивши, Лукие славная, / огнем страдания возжегла еси ю. / Темже в чертог Божественный достигла еси.
Потекла еси, последуя Христовым стопам Божественным, / и общница показалася еси Страстей Того и Царствия, всеславная, / за любовь твою изрядно венчава=ема.
Богородичен: Божественным сиянием Твоим, Благая, / просвети омраченную душу мою и к спасения стези направи, / Едина Спаса Христа рождшая.
Песнь 6
Житейское море, / воздвизаемое зря / напастей бурею, / к тихому пристанищу Твоему притек, вопию Ти: // возведи от тли живот мой, Многомилостиве.
Столп добродетелей непреклонен, и благочестия жилище ты была еси, / и мужества, и целомудрия приятелище, Лукие всехвальная.
Сладости Небесныя и пресветлыя радости исполнена еси, предстоя Христу, / Духом Святым и страдании очищенна, мученице достохвальная Лукие, / молись за люди твоя.
Богородичен: Архангельский глас вопием Ти: Радуйся, Благодатная, Господь с Тобою; / радуйся, Благословенная, Заступница наша и скорая в бедах Помощница.
Кондак, глас 6:
Добродетельным житием на земли просиявшую / и на Небесех со Ангелы ныне ликующую, / деву всечудную и мученицу неодоленную, / сугубым венцем исповедничества и целомудрия увенчaнную, / Лукию воспоим вернии, / сия бо подает исцеления, // чтущим любовию святую память ея.
Песнь 7
Росодательну убо пещь содела Ангел / преподобным отроком, / халдеи же опаляющее веление Божие мучителя увеща вопити: // благословен еси, Боже отец наших.
Непобедимым дерзновением и доблим умом, страстотерпице Лукие, / стала еси пред судищем, воплощение Спасово велегласно проповедуя / излиявшаго Себе даже до рабия образа, Избавителя нашего.
Имела еси Бога помощника во твоих подвизех и защищающа, всемудрая, / сего ради венчавшися, мучителя победила еси, вопиющи: / благословен еси, Боже отец наших.
Светом Небеснаго просвещения озаряема, победоносная мученице Лукие, / воспевающия тя ныне просвещаеши, песнопоющия: / благословен еси, Боже отец наших.
Богородичен: Во тьме неразумия мя пребывающаго, просвети Светом Неприступным Сына Твоего, Пречистая, / и настави верно взывати Ему благочестно: / благословен еси, Боже отец наших.
Песнь 8
Из пламене преподобным росу источил еси, / и праведнаго жертву с водою попалил еси: / вся бо твориши, Христе, токмо еже хотети. // Тя превозносим во вся веки.
Преестественными ряснами и красною одеждею украшена, яко царева дщерь, / во славе Христовой предстоиши, Лукие, взывающи: / Тя превозносим во вся веки.
Двери райския тебе отверз, приемлет тя Христос, Лукие всемудрая, / и в чертог Небесный вводит тя, / и царствия причастницу являет яко сообщницу Его страстей. / Емуже вопием: Тя превозносим во вся веки.
Просвещена сиянием чистоты и обагрении кровными испещренна, / предстоиши, Лукие девице, Христу Богу нашему, вопиюще со всеми святыми: / Тя превозносим во вся веки.
Богородичен: Яже Владыку всех плотию рождшая, насилия страстей избави мя, Отроковице, / и Творцу всяческих усвой любовию, поющаго во вся веки.
Песнь 9
Бога / человеком не возможно видети, / на Него же не смеют чини Ангельстии взирати; / Тобою же, Всечистая, явися человеком / Слово воплощенно, / Его же величающе, // с Небесными вои Тя ублажаем.
Чиста= жертва принеслася еси Христу Богу нашему, / и приношение пресве=тло, / и яко благовонный фимиам, Лукие Богомудрая.
Всю тя освяти Избавитель Господь, Лукие честная, / всею крепостию Сего от души возлюбившу.
Смотряя свыше, чудяшеся лик Ангельский терпению твоему, славная дево Лукие, / како безплотныя враги с плотию побеждала еси благодатию Христовою.
Совокупльшися с лики Безплотных и с мученическими соборы, прехвальная Лукие, / о нас всех Бога моли.
Богородичен: Мысленно Твоим стопам прикасаяся, Всенепорочная, молю Тя: / пение мое приими и от бед избави мя, молитвами Твоими, Дево Марие, / да любовию Тя величаю.
Светилен:
Предстоящи ныне Трисиянному Великому Свету / и пребывающи в неизреченней светлости со всеми святыми, / добрая мученице Лукие, помяни всех нас, / память твою светоно=сно совершающих.
Слава, и ныне, Богородичен:
Света Превечнаго родила еси нам, Христа, Бога нашего, Пречистая Дево, / избавльшаго весь мир от лести диавола. / Темже молим Тя: не престай молящи, / да подаст нам милость Свою в День Судный.
На хвалитех стихиры, глас 4:
Невесту нетленную, / украшеную Духом Святым, тя ведяще, / совершаем память твою святую, / мученице страстотерпице, / и, покланяющеся благочестно мощем твоим, / исцеление почерпаем от страстей наших всегда, / Лукие дево всехвальная, // верою тя почитающе.
Дар принесла еси, твоих удов терзания, / Христу-Жениху твоему, всечестная. / Темже, чертогов тя пресветлых сподобив, / просвещает светом Божественныя славы Пресущный, / Емуже радующися предстоиши, / о нас прилежно моли, // верно славящих твоя, Лукие, страдания.
Память всесвященную честнаго твоего страдания совершающе, / Лукие мученице всехвальная, / славим во гласех непрестанных / даровавшаго терпение тебе твердое, / и победоносну тя показавшаго, // Иисуса Человеколюбца, и Спаса душ наших.
Глаголом внимающи сладким, / достославная Лукие, / Божественнаго и Всесвятаго Духа, / горесть всяку плотских страстей оставила еси / и смертию к безсмертней славе преминула еси, // Христа молящи всем даровати велию милость.
Слава, глас 8:
Уязвися, Христе, любовию твоею сладкою Лукия премудрая / и страдания славно претерпевает, Слове Божий, / темже к неболезненному преставляется наслаждению, / яко нескверна и нетленна. // Тоя молитвами даруй всем, Господи, велию милость.
И ныне, глас тойже:
Владычице, приими молитвы раб Твоих / и избави нас // от всякия нужды и печали.

НА ЛИТУРГИИ
Прокимен, глас 4: Святым, иже суть на земли Его, / удиви Господь вся хотения своя в них. Стих: Предзрех Господа предо мною выну, / яко одесную мене есть, да не подвижуся.
Апостол к Галатом, зачало 214.
Аллилуиа, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь.
Евангелие от Иоанна, зачало 51.
Причастен: Радуйтеся, праведнии, о Господе, правым подобает похвала.
МОЛИТВА
О, достохвальная и премудрая мученице Христова Лукие! Ныне почитающе святую память твою, к тебе мы, грешнии и недостойнии, усердно прибегаем и во умилении сердец наших молимся. Ты от младенства своего паче всех благ земных Сладчайшаго Господа Иисуса Христа возлюбила еси и Тому чрез все житие верно последовала еси, Божественною благодатию душу свою питающи. Испроси убо и нам благодать просвещающую нас, да ею осеняеми, в вере и благочестии, в подвизех целомудрия и любви преуспевати будем и Христу в ближних Его служити неленостно потщимся. Моли убо Спаса нашего да сподобит и нас странствие наше земное непреткновенно совершити, и в мире и покаянии житие наше проводити, да тако на земли поживше, вечныя и блаженныя жизни на небеси сподобимся и тамо с тобою и со всеми святыми вкупе восхвалим Троицу Единосущную и Нераздельную, и воспоем Едино Божество и Царство, Отца и Сына и Святаго Духа во веки веков. Аминь.