Редкие Богослужебные тексты

На Господи воззвах
Глас 6, подобен Все отложше
Что сия пречудная сокровища/ в кн+изе тайней, +явленной в вид+ении:/ блист+ающии к+амения драгоц+еннии/ и преиз+ящная украш+ения нерукотвор+енная?/ Вопрошает жена, спасения ищущая,/ и ясно Свыше извещ+ается,/ яко се суть писания, Богом данная,/ святителем Игнатием/ в Д+усе Св+яте начерт+анная,/ и яко чтение си+е/ есть т+ое спасительное делание,// +еже спасение ея сод+елает.
Кто по досто+янию восхвалит тя,/ богомудре отче, пречестный Игнатие,/ яко в скудная яв+ився времена,/ вся отеческая изъяснил еси писания;/ богоотст+упничество обличил еси,/ едину Истинную веру проповедуя/ и путь спасения премудро указ+уя,/ и мн+огая грядущая прор+екл еси,/ печ+альник сый России и мон+ашества./ Сего ради наставляй и нас,/ чтущих тя и вн+емлющих уч+ением твоим,/ разум+ети заповеди Божия,// и запов+еданная исполн+яти.
О св+ята л+еторасль бол+ярина Бренк+а,/ Вел+икаго Князя Димитрия сподв+ижника,/ на земл+и чудотв+орцев Волог+одстих процв+етший,/ об+еты и молитвами родительскими освящ+енный!/ Во свят+ей купели нареч+енный именем/ преподобнаго Димитрия Прилуцкаго,/ собес+едника святаго Сергия,/ ты вельм+и дост+оин подражатель сим отцем явился еси,/ и обители тог+ожде Сергия премудрый настоятель,/ сего ради, со святыми Русския земли// молися о душах наших.
Глас 6, подобен Отчаянная
Пятьдесятницы/ огненным крещением/ родися Церковь Божия/ Соборная и Апостольская;/ аще же еретицы и раскольницы/ многи церкви глаголют быти,/ дерзостно предирающе/ хитон Господень,/ в гордыни безумней/ с собою/ в муку вечную/ соблазненных ими влача,/ но со всеми Святыми Отцы/ святитель Кавказский Игнатий/ Едину Церковь проповеда спасительную,/ яко хулителей и злодеев// онех льстецов изобличив.
Довляше/ и единою/ слышати нам/ заповеди Божия,/ обаче выну согрешающе,/ выну и врачевства требуем,/ еже/ подается обильно/ в учениих Святых Отцев,/ иже провозвестиша / яко провидцы/ благочестия умаление,/ писаньми неразумие/ немощных просветиша/ диавола посрамивше// и вся лжеучители.
Творения/ сонмов чудных Отцев,/ в разная времена/ явленных,/ во едино совокупи/ изъяснением тех учения,/ зело добре,/ Игнатий святитель новый,/ пиша/ купно же и держа/ веления сих,/ ихже и молитвенников/ всемощных ко Господу/ всем показует,/ с ними же и сам молится/ о пастве// с пастыри.
Слава, глас той же
Древняя проречения,/ яже о скудости духовней,/ яже о немощи лика монашескаго,/ огненных крил не им+ущаго,/ ныне зрим воистину исполн+яющаяся,/ обаче не скорбит+е,/ отцы и братие,/ се нам утешение,/ се нам воззвание,/ се нам указание явственнейшее/ пути спасительнаго,/ словеса Игнатия, великаго святителя,// и молитвенника о душах наших.
На стиховне:
Слава, гл. 3
Помышл+яху суббот хран+ителие,/ яко несть ин+аго подвига,/ разве телес+е истощ+ания,/ в пост+ех, бдениих, коленопреклон+ениих,/ сего ради тя прельщ+ена быти мняху,/ ты же, отче, ясно научал еси,/ яко не благовол+ит Господь о всесожж+ении,// токмо сердца сокруш+енна и смиренна не уничижит.
По 50-м псалме, стихира, гл.
Богомудре отче Игнатие,/ мира суету и прелесть/ всяческую,/ яко пагубну изобличил еси,/ совершенному житию/ люди научив,/ и ангельскаго Богозрения,/ сопричастник явился еси,/ и светильник новосветлый/ Российския земли,/ житием/ и ученьми сияяй,/ но всех нас поминай,/ совершающих священную память твою,/ должно бо есть чадом твоим/ ходити в твоих учениих,/ темже тя на помощь призываем,/ просяще тобою прияти свет// разума спасительнаго.
Стихира на литии, гл. 1
Приидите, вси благоч+естия рач+итилие/ и угодник Божиих подраж+ателие/ днесь бо Собор святых Московских прославл+яется,/ и вси людие Росс+ийстии радуются/ о пресл+авных вел+ичиих Бога нашего,/ в доброде=телех подвижников явля=емых:/ святителей и иереев,/ преподобных и праведных,/благоверных Царей, Князей и Княгинь,/Христа ради юродивых,/ и предивнаго новаго сонма,/ от безбожник пострада=вших мученик,/их же молитвами, Христе,/ первопресто=льный град Москву/ и всю землю Русскую/ утверди во благоче=стии,/ от навет безбожных враг защити// и спаси души наша.