Редкие Богослужебные тексты

СЛУЖБА
святой мученице Аполлонии,
диакониссе Александрийской
НА ВЕЧЕРНИ
На Господи, воззвах: стихиры, глас 4:
Яко благоразу=мная и избра=нная де=ва, / возжгла= еси в се=рдце твоем / лампа=ду огня= Боже=ственнаго, / еле=ем доброде=телей / путь ко спасе=нию преизоби=льно ороша=ющи / и душе=ю на Вы=шнее призва=ние / вы=ну отзыва=ющися. / Сего= ра=ди в Го=рний Черто=г / страда=ньми за Христа взошла= еси, / Спа=сова служи=тельнице, / Аполло=ние всечу=дная, / моли=ся грехо=в оставле=ние дарова=ти, // любо=вию пра=зднующим святу=ю па=мять твою=.
Показа=лася еси= посреде= мучи=телей, / а=ки в волце=х суро=вых а=гница нескве=рная, / сих зверови=дное нече=стие побежда=ющи, / и Христу яко благоприя=тный фимиа=м принесла=ся еси, / чрез огнь в Небесное Царство воспари=вши, / Аполло=ние ди=вная, // моли=твенице о душа=х наших.
Изря=дную уго=дницу Христову, / Це=ркве Александри=йския диакони=ссу усе=рдную, / пе=сньми достохва=льными почти=м, Аполло=нию ста=рицу прему=друю, / благода=ти испо=лненную / и боже=ственными сия=ньми преукраше=нную, // я=же мо=лится о душа=х наших.
Слава, глас тойже:
Безбо=жия о=гнь / крове=й проли=тем угаси=вши /, му=ченице добропобе=дная, / Христовы Церкве бога=тное украше=ние яви=лася еси / и всех сердца= возвесели=ла еси / благоче=стно почита=ющих, Аполло=ние славная, // свяще=нную память твою.

И ныне, Богородичен, глас тойже:
Огнь ро=ждши Нестерпи=мый, / попаля=ющ грехи= и ороша=ющ ве=рныя, / ве=щная безме=рных моих согреше=ний / молитвами Твоими попали=, Пренепоро=чная Чи=стая, / и росо=ю иста=явшую страстьми= ду=шу мою прохлади=, / я=ко да велегла=сно / Твою милость и силу велича=ю, раб Твой,// Марие Всепе=тая.
Или Крестобогородичен, глас тойже:
Не рыдай Мене, Мати, / зрящи на Древе повешена Твоего Сына и Бога, / на водах Повесившаго всю землю неодержимо / и всякое творение Создавшаго; / ибо воскресну и прославлюся, / и адова царствия сокрушу крепостию, / и погублю того силу, / и связанныя избавлю от злодейства его, яко Благоутробен, // и Отцу Моему приведу, яко Человеколюбец.
На стиховне, Слава святой, глас 1:
Плоть твою воздержа=нием увяди=вши, / терпе=нием муче=ний / врага= кова=рствия низложи=ла еси, / силу его немощну=ю победи=вши, / о Аполло=ние богоблаже=нная, / тем тя во о=гненнем страда=нии / венча= Иисус Человеколю=бец //и Спас душ наших.
Тропарь, глас 4:
Александри=йския Це=ркве похвалу=, / ста=рицу богоблаже=нную Аполло=нию / восхва=лим ныне в пе=снех, ве=рнии, / я=ко та любо=вию Боже=ственною разже=гши ду=шу свою, / во огнь ступи= дерзнове=нно, / мучи=телей посрами=вши, / и в Царствие Христово вни=де со сла=вою, // иде=же мо=лится о душа=х наших.

НА УТРЕНИ
Канон святыя, глас 2.
Песнь 1
Ирмос: Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, // яко прославися.
Мудрость словесе=м моим пода=ждь, Благи=й Господи, / страстоно=сицы Твоея= Аполло=нии мольба=ми / и сию= воспе=ти, Спа=се, сподо=би мя.
Возжела=вши Христо=вы красоты= и е=же со Христом бы=ти во ве=ки, / страда=нием сочта=лася еси= Ему, / Аполлоние богому=драя.
Я=ко о=гнь бы=сть ре=вность ве=ры твоея=, му=ченице Аполлоние, / е=юже неве=рных воста=ние попра=ла еси=,/ побе=ды вене=ц в муче=ниих обре=тши.
Богородичен: Святая Де=во, Ма=ти Христо=ва, / му=чеников Сла=во и всех святых Ра=досте, / с ни=ми моли= Сына Твоего уще=дрити и спасти= рабы Твоя.
Песнь 3
Ирмос: На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, // и несть праведен паче Тебе, Господи.
Зубо=в сокруше=ние и о=гненная стремле=ния / ю=ношески подъя=ла еси, ста=рице Аполло=ние, / си=лою Креста= укрепля=ема.
По=двигов ра=нами удобря=ющися, / ду=шу светле=йшу со=лнечнаго сия=ния соде=лала еси, / я=ко верная раба= Христова, страстоте=рпице доблему=драя.
Богородичен: Ангелов Удивле=ние, челове=ков Дерзнове=ние, Богородице, / моли= Сына Твоего спасти= непреста=нно Тя блажа=щия.
Седален, глас 4:
Уясни=вши житие= твое доброде=телей красота=ми, / служи=тельница Це=ркве Александри=йския нарекла=ся еси, Аполло=ние блаженная, / кро=вию же муче=ний себе= украси=вши, / Горе= к Невеще=ственным лико=м преста=вилася еси, / с ни=миже о нас Христа моли= // поми=ловати ду=ши наша.
Слава, и ныне, Богородичен, глас тойже:
Еди=на Пречистая Дево, / Яже Бога безсе=менно ро=ждшая, // моли= спасти=ся душа=м нашим.
Песнь 4
Ирмос: Пришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: // слава силе Твоей, Господи.
Луча=ми креста= сия=ющи, крепкоду=шная страстоте=рпице, / огненную му=ку претерпела еси, / прелести у=глие росо=ю любве= Христовы погаша=ющи.
Кротка= и незло=бива бы=вши, смиреному=дренна же и тиха=, / и любве= Боже=ственныя испо=лнена, / му=ченическия венцы= от Царя Небеснаго прия=ла еси.
Богородичен: Неве=сту Тя Безневе=стную испове=даем / и Чистое Селе=ние Спа=сово, Присноде=во Марие, / и Херуви=м Святейшую.
Песнь 5
Ирмос: Света Подателю и веков Творче, Господи, / во свете Твоих повелений настави нас; // разве бо Тебе иного бога не знаем.
Еди=наго Тя Господа, Иису=се, испове=давши, во огнь дерзнове=нно вхо=дит ста=рица благослове=нная, / страда=ние му=жески терпя=щи.
Богу себе от юности вручи=вши, умре=ти за Него не отве=рглася еси=, / повеле=ния Того послу=шающи и стопа=м спаси=тельным после=дующи.
Богородичен: Арха=нгельский глас вопием Ти: / радуйся, Благодатная, Господь с Тобою; / радуйся, Засту=пнице наша и скорая в беда=х Помо=щнице.
Песнь 6
Ирмос: В бездне греховней валяяся, / неизследную милосердия Твоего / призываю бездну: // от тли, Боже, мя возведи.
К бу=дущей сла=ве взира=ющи, доброразсу=дная, / маловре=менную презре=ла еси; /и ничто= возмо=же разлучи=ти тя от любве= Христовы: / ни жесто=кая бие=ния, ниже= зубо=в сокруше=ние, ни пла=мень огня, / ни= тле=нных сла=достей обеща=ние.
Де=вство твое непору=ганно Господь соблюде=, му=ченице Аполло=ние достохва=льная, / и преста=ви тя от земны=х скорбе=й к радости Небе=сней.
Ре=вностию по Бо=зе уя=звлена, неле=ностным де=ланием за=поведей Евангельских / благодать неоску=дную стяжа= / и огня= безбо=жных мучи=телей не убоя=ся.
Богородичен: Ми=лости Твоея=, Богородице, сподо=би мя, Преми=лостивнаго Спаса ро=ждшая, / Своею Кровию от смерти ве=чныя человеки изба=вльшаго.

Кондак, глас 2:
Му=ченическим венце=м увязе=нная, / Престолу Влады=чнему предстоя=щи / и Небе=сными блиста=нии сия=ющи, / моли=ся о память твою пою=щих, страстоте=рпице Аполлоние, // спасти= и просвети=ти ду=ши на=ша.

Песнь 7
Ирмос: Да преславное рождество Твое, Христе, / еже от Девы прообразиши яве, / неопалимы в пещи отроки сохранил еси, / песньми поющыя Тебе: // отцев, Боже, благословен еси.
Яко а=гница на же=ртву ведо=ма, славная, / ничто=же глаго=лаше, Влады=це твоему подо=бящися, / Егоже ради и сме=рти не убоя=лася еси.
Разгара=хуся я=ростию мучи=телие, / зря=ще тя непрекло=нну и повеле=ния Госпо=дня храня=щу, / огнь разложи=ша, устраши=ти тя хотя=ще, / но посрами=ла еси дерзость их, прии=мши му=ки во=лею.
Богородичен: Преесте=ственно Созда=теля от утро=бы Твоея=, Де=во, роди=ти сподо=билася еси, / земны=я назида=ющи, пою=щия ве=рою: / отцев Боже, Благословен еси.
Песнь 8
Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: // благословите, вся дела Господня, Господа.
Му=ченица я=вльшися, Го=рняя недомы=сленно насле=довала еси, / та=може Создателю пение прино=сиши: / благослови=те, вся дела= Госпо=дня, Господа.
Одожде=нии Боже=ственными угаси=ла еси многобо=жия пещь, / разже=гшися Боже=ственною любо=вию прера=достно, / и ныне, Аполлоние всеславная, вопие=ши: / благословите, вся дела Господня, Господа.
Просве=щшися заре=ю Тро=ическою, / тьму пре=лести отгна=ла еси, ма=ти, и Света Незаходи=маго прича=стница показа=лася еси, песнопою=щи: / благословите, вся дела Господня, Господа.
Богородичен: Слово Отца Небе=снаго Единосу=щное, / Ада=мово Избавле=ние от крове=й Твоих Девственных воплоти=ся, Пречи=стая, / Ему=же благода=рственне зове=м: / благословите, вся дела Господня, Господа.
Песнь 9
Ирмос: Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: // тем всепетую Богородицу величаем.
Целому=дрием украша=ема и ми=рностию ду=ха, / ра=ны крепкому=дренно претерпе=ла еси, / дух твой в ру=це Отца Небеснаго предаю=щи.
Звезда= све=тла возсия=ла еси в мире, / сиянием священным разум наш озаря=ющи, Аполлоние богокра=сная, / те=мже тя верно ублажа=ем.
Огне=м Божия любве= пламене=ющи, огнь гони=телей смертию твоею попра=ла еси= и расто=ргла еси= у=зы зми=я прего=рдаго, / ста=рице смиреннонра=вная.
Богородичен: Велича=юще Тя со всеми Ангелы и святыми, Влады=чице, вопие=м: / радуйся, Спасение всех человеком / и мучеником преудобре=нное Венча=ние.

Светилен:
Трисия=нному Све=ту ныне предстоя=щи / и в неизрече=нней радости со всеми святы=ми пребыва=ющи, / Аполло=ние всечу=дная, помяни= всех нас, / память твою светоно=сную соверша=ющих.
Слава, и ныне, Богородичен:
Зарю пресве=тлую, явля=ющую нам Солнце Незаходи=мое, ве=мы, Тя, Пресвята=я Дево Богоро=дице. / Сего ради мо=лим Тя: я=ко Ма=ти Све=та су=щи, / просвети= нас Све=том Сына Твоего, Христа Бога нашего.
На хвалитех, Слава, глас 1:
Муче=ний о=гнь / Духа Свята=го росо=ю угаси=ла еси, / ста=рице Аполло=ние, / и к Све=ту преста=вилася еси / Боже=ственному и Невеще=ственному, / по кончи=не же ка=пли исцеле=ний источа=еши, / Го=сподеви моля=щися // о е=же уста=вити разжже=ние страсте=й наших.
И ныне, Богородичен, глас тойже:
Молитвы раб Твоих приими=, Богоро=дице, / и изба=ви нас от вся=кия беды=, // я=ко ро=ждшая Христа Спаса, Изба=вителя душ наших.