Редкие Богослужебные тексты

Служба преподобному и богоносному отцу нашему
Иосифу Исихасту Афонскому
На велицей вечерни
На Господи воззвах: стихиры, глас 5:
От зла=ка божественнаго воспита=нный, / Иосифе старче, Афонская похвало=, / прелести духо=в лукавых избе=гнул еси, / на высоту доброде=телей ревностию возше=д, / дом Духа Святаго сердце свое устроил еси; / темже, Богородицею возлю=бленный, монахов правило, // молитвами твоими упра=ви нас на путь ми=рен.
Умныя молитвы учи=телю богому=дрый, / малое воинство духовное собрав, / ко Христу незаблу=дным путем привел еси, / души мно=гия в вере утвердил еси, / памяти Бо=жии непрестанной наставляя, / к терпению и упованию на Бога призывая, / Иосифе, горлице пустыннолюби=вая, // моли спасти=ся душа=м нашим.
Наста= днесь светоза=рное пра=зднество, / преподобнаго Иосифа память, / исихаста Афонскаго и пещерника, / ярче солнца просия=вшаго, / озаряет бо любовию чту=щия его / и молится ко Господу / мир ми=рови дарова==ти // и спасти=ся душа=м нашим.
Слава, глас 3:
От юности званию возлю=бльшаго тя Господа после=довал еси, / преподобне Иосифе, /благодать Божию стяжева=я, / на па=жити пусты=нныя востекл еси=, / брани вражеския не убоя=вся му=жественне, / бдениями всено=щными и молитвами / ум Христов стяжав и страсти чу=вственныя умертви=в, / во Обители Небесныя водвори=лся еси; / темже моли, отче, Подвигополо=жника нашего // дарова=ти нам велию милость.
И ныне, праздника или Богородичен.
Вход. Прокимен дня. Чтения преподобническая.
На стиховне стихиры, глас 6:
Преподобне отче, / во всю землю изы=де исправление веща=ний твоих, / цвет мона=шества бо в пусты=ни израстил еси= / и во оби=телех насадил еси; / Ангелов собесе=дниче, богом=дрый наставниче, // моли Бога о ча=дех твоих.
Стих: Честна пред Господем/ смерть преподобных Его.
Преподобне отче, / память смертную и молитву непрестанную, / яко богатство некрадомое, / паче всех сокровищ вожделети научал еси, / выну имея во уме и на усте=х: // Господи, Иисусе Христе, помилуй нас.
Стих: Блажен муж бояйся Господа,/ в заповедех Его восхощет зело.
Преподобне отче, / многоразли=чная действия благодати Божия уясни=в, / да=р утешения стяжал еси, / утвержда=я сердца прибегающих к тебе и воздвиза=я от мрака уныния, // темже и о нас, святче, помоли=ся.
Слава, глас тойже:
Монахов множества / наставника тя почитаем, старче наш Иосифе; / любовию бо Евангельскою ко Господу и ближнему горя=, / душу твою о ча=дех твоих полагал еси, / о спасении их и научении неустанное попечение явля=я; / заповедей Божиих усердный де=лателю, / земны=й Ангеле и небесный человече, отче преблаженне, / моли Владычицу нашу Пресвятую Деву Богородицу // светом Христовым просветити нас.
И ныне, праздника или Богородичен.
Тропарь, глас 1:
Пусты=ни Афо=нския цве=те благоуха=нный, / древним единонра=вный подви=жниче, / пла=менный ревни=телю молитвы непреста=нныя, / благодати истинный послу=шниче, / Господа всем сердцем возлюби=вый, / Иосифе преподобне, монахов наста=вниче, / моли Христа Бога, Спасителя душ наших // от сна лености воздви=гнути нас к покаянию.
На утрени
По 1-м стихословии седален, глас 5:
Богородицею при=сно утеша=емый, / в день честна=го Ея= Успения во Отечество Небесное отше=л еси, / от трудов иноческих упоко=ився, / славою нетленною от Господа Славы увенча=вся, / и мо=лишися непрестанно о душа=х наших.
Слава, и ныне, праздника или Богородичен:
Обнови=ла еси, Чистая, / Божественным Рождеством Твоим / истле=вшее страстьми= земноро=дных ме=ртвенное существо / и воздви=гла еси вся от смерти к Жизни Нетленней; / темже Тя по до=лгу ублажаем, Дево Препросла=вленная, / я=коже прорекла еси=.
По 2-м стихословии седален, глас 5:
Слезами по=стническими зе=млю Афонскую ороси=, / кровь даде= и Духа прия=, / преподобным сопричи=слися и праведным. / Мира ми=рови у Господа испроси, отче Иосифе, / и поми=ловати души наша.
Слава, и ныне, праздника или Богородичен:
Наста=ви ны на путь покаяния, / уклоня=ющихся к злым безпу=тием / и Пребла=гаго прогне=вавших Господа, / Неискусобра=чная, Преблагослове=нная Марие, / Прибежище отча=янных человек / и Божие Обиталище.
По полиелее седален, глас 1:
Преподо=бнаго отца нашего Иосифа, / в после=дния дни на Горе Афо=нстей явле=ннаго, / мона=шествующим на пути к соверше=нству и обо=жению / преди=внаго свети=льника, / мирским благочестия солнца незаходи=маго / и всем истинно пути= Божия и=щущим путевождя=, / возблагодари=вше Триипоста=снаго Творца и Бога нашего / и Заступницу рода челове=ческаго, / Пресвятую Владычицу Богородицу, / со умилением сердечным / пением и пе=сньми духовными почтим.
Слава и ныне праздника или Богородичен:
Помышле=ния нечи=ста и устна= льсти=ва, / дела= же моя вся оскверне=нна: / и что сотворю? Ка=ко усря=щу Судию=? / Влады=чице Дево, моли Сына Твоего, / и Зиждителя, и Господа, / яко да в покаянии прии=мет дух мой, / яко Един Благоутробен.
По 50-м псалме стихира, глас 6:
Днесь празднует обитель Ватопе=дская, / иму=щи в себе мощи преподо=бнаго Иосифа, / радуется земля Аризо=нская, / честно=ю главо=ю преподо=бнаго освяща=емая, / лику=ет Святая гора Афо=нская, / радуются мона=шествующих собо=ри, / и вси лю=дие христоимени=тии / вопию=т ко Господу: / слава Тебе, показа=вшему нам моли=твенника чу=днаго! / Слава Тебе, дарова=вшему нам предста=теля пред Престолом Твоим, / дерзнове=нно прося=щаго о душа=х наших.
Канон преподобнаго, глас 8.
Песнь 1
Воду прошед яко сушу, / и египетскаго зла избежав, / израильтянин вопияше: / Избавителю и Богу нашему поим.
Слово ми пода=ждь, Сло=ве Божий, во отверзе=ние недостойных уст моих, / и очисти сердце мое, / яко да возмогу по достоянию воспети преподобнаго Твоего.
От юности Христа возжеле=в, блаже=нне, / посреде= мирска=го мяте=жа постом и бде=нием плоть духови порабо=тил еси и молитвами всено=щными ду=шу свою предочи=стил еси.
Плотски=я страсти умертви=в воздержа=нием, / совесть имел еси бла=гу, / око серде=чное вы=ну к Богу устремле=нное, / Той=же, внят молитве твоей, прему=дре, / с преподо=бными сочета= тя.
Жилами подвигов твоих духа лености умертви=л еси, блаженне, / бдением трезвенным и молитвою сети диаволи растерзав;/ час смертный вы=ну помышляя, / на Промысл Божий упование возложил еси.
Богородичен: Страсти плоти моея= / и ума моего двиза=ния неподо=бныя угаси==, / молю Тя, Пречистая Дево, / и испра=ви мя, заблу=ждшаго умом.
Песнь 3
Ты еси утверждение, / притекающих к Тебе Господи, / Ты еси Свет омраченных, / и поет Тя дух мой.
Добраго би=сера взыску=я, отче, / на Горе Афо=нстей приста=нище обре=те, / зе=млю о=ныя по=ты и слезами удобря=я, / древо добродетели чу=дное возрасти=.
Труды= великими на высоту духовную возшел еси, / Бисер Драгоценный Христа в сердце содержа=, о ча=дех же твоих попече=ние прилага=я / и о всем мире, преподо=бне.
Весь прилежа= Вседержи=телю, / всея= бесо=вския злобы избе=гл еси; / высото=ю смирения украша=емь, / велехва=льнаго на зе=млю низве=ргл еси/ изря=дными де=лы твоими, богоизбра=нне.
Умною молитвою сердце очистил еси, / любовию божественною возгоре=вся, досточу=дне Иосифе, / Господа Иисуса Христа самовидцем соде=лался еси, / в терпении Крестом Его укрепляемь.
Богородичен: В ложесна= Твоя, Всенепорочная, / Зиждитель всели=ся, / воплоти=вся благодея=ния дарова=ти роду человеческому.
Седален, глас 4:
Преподобне отче Иосифе, / Господу свято послужи=в, / от пусты=ннических трудо=в / в день Успения Пречи=стыя Девы упоко=ился еси; / оба=че достойных учени=к возрасти=в, / яко заква=ску благода=тную во обители Афо=нския тех всели=л еси=, / истинное монашеское жи=тельство на Горе Святей возроди=в; / и ныне внуки и правнуки своими духовными сию= наполня=еши / и я=коже новый Иисус Нави=н / в новую Богом обетова=нную землю управля=еши; / нам же, недостойным вселе=ния в оную, / молитвами твоими спасти=ся помози=.
Слава и ныне, праздника или Богородичен:
Стена Непобедимая христианом еси, Богородице Дево: / к Тебе бо прибега=юще, невреди=ми пребываем, / и па=ки согреша=юще, / и=мамы Тя Молитвенницу. / Тем, благодаря=ще, вопием Ти: / радуйся, Благодатная, Господь с Тобою.
Песнь 4
Услышах Господи / смотрения Твоего таинство, / разумех дела Твоя, / и прославив Твое Божество.
Сна не дав очи=ма свои=ма / и ве=ждома своима дремания, место Господне обрел еси, / безмолвия прозябе=ние кра=снейшее, отче Иосифе.
Сердце твое яко скрижа=ль очище=нна Святаго Духа бысть, иде=же, преподобне, безстрастие совершенное написа=ся, вера же и любы= нелицеме=рна.
Бог, во святых почива=яй, / в сердце твоем обита=ти изво=ливый, / богословия духодви=жимый орган показа= тя, блаженне.
Яко еле=нь на источники водны=я, / ум твой к Богу устреми=ся, пресла=вне, и, благостию Творца изумле=нный, / созерцания плод стори=чный пожа=.
Богородичен: Нива духовная явилася еси, Присноде=во,/ из бра=зды клас изнесшая, / всю тварь питающий, всяческих Бога.
Песнь 5
Утренююще вопием Ти / Господи, спаси ны: / Ты бо еси Бог наш, / разве Тебе иного не вемы.
Высо=кий умом и житием быв, преподо=бне, / ко Уму Высоча=йшему устреми=лся еси, Света Незаходи=маго луче=ю соде=явся.
Любосла=стная двиза=ния плоти презре=в, /тесноту==== уединения возлюби=, / терпением лишений пустыннических смирения дости=же и сладости Небесныя вкуси=, пребога=те.
Воздержанием крайним украси=вся, / образ бысть учеником твоим. / Егда= же покая=ния сугу=баго ради в пещере затвори=ся, преподобне, / ангельскаго Причастия сподо=бися.
Многоболе=зненныя страсти врачу=еши / приступающих к тебе, о=тче предивне: / благодать бо прии=м от Господа / недуги душевныя исцеля=ти.
Богородичен: Исцели недугующаго ума моего омрачение, / Врача рождшая Христа, / Всенепорочная Владычице.
Песнь 6
Молитву пролию ко Господу, / и Тому возвещу печали моя: / яко зол душа моя исполнися, / и живот мой аду приближися: / и молюся яко Иона, / от тли Боже возведи мя.
В ру=це возлю=бльшаго тя Господа / всеконечне вда=вся, прехва=льне, / даров благодатных и любве= Божественныя сосуд преди=вный явился еси.
Крепостию духа твоего, отче, / силу вражию победив, / в терпении величайшем пребывая, / венец победный приял еси.
Лукавый умертви=ся змий священными твоими молитвами, богоблаженне, / от егоже злобы разрешаются / иже помощи от тебе прося=ии, / угодник бо Божий явился еси верен.
Ученицы= твои, преподобне, / яко древа=, насажде=нная при исхо=дищех вод, / то=ки живоносных молитв твоих напоя=емы, / послушанием яко кри=ни райския процвето=ша.
Богородичен: Господь, Пречистая, от области нас льсти=ваго хода=тайством Твоим ны изба=ви: / темже Тя ныне по долгу / ро=дове родов ублажаем.
Кондак, глас 8:
Вы=шния доброде=тели стяжав, / образ был еси ученико=м твоим / воздержа=ния, смирения и послуша=ния, / и, яко пастырь, стаду своему предходя=, / добре ше=ствовати путем жестоким пусты=ннаго жития тех управил еси; / темже ублажаем тя, Иосифе преподобне, /и молимся: моли Христа Бога прощение дарова=ти // чтущим любовию святую память твою.
Икос:
Избра=нный Господом Иисусом, подобно древним подви=жником пожи=л еси, / от моря мира сего бушующаго на Гору Святую возше=д / и Девою Богородицею с возлю=бленными чадами Ея= вмене=н, / Духом Животворящим очище=н соде=лался еси, / и тако от тлена греховнаго и пристра=стнаго изба=влен, / братию смиренному=дренную и самоотве=рженную воспита=л еси, / даже до смерти теле=сныя твоея= попече=ние о ученице=х не оставив. / Ныне же о Господе утешаяся, / со Ангелы и святыми блаже=нствуеши и слы=шиши: / радуйся, Исихасте великий Иосифе, / новый афонский пустынниче и монахом наставниче, /моли Христа Бога прощение дарова=ти // чтущим любовию святую память твою.
Песнь 7
От Иудеи дошедше отроцы / в Вавилоне иногда, / верою Троическую пламень пещный попраша, / поюще: отцев наших Боже благословен еси.
Пастырь незаблу=дный овца=м словесным в житии твоем, богому=дре, показался еси; темже, у Престола Господня со Ангелы предстоя, любовию/ чтущих память твою ко Пристанищу Небесному окорми=.

Умом светови=дным к Царю све=тов прилепился еси, / вся красная мира нивочто=же вмени=в; / Влады=це твоему Христу подражая, крест на рамо взем, / власть над страстьми= и похотьми=, и над демоны от Него восприял еси, преподобне.
Плотию обложе=н, отче, / яко безпло=тен на земли= пожил еси, / имея поспешеству=ющую ти Божию силу, /и на духо=в злобы поднебе=сных безстрашно ополчался еси.
Проше=д подвиги постническия, боголюби=ве, умом крепким и смирением великим ум прего=рдый победил еси; доброде=тельми многими украшен, / плоды чудесными в духе процвел еси.
Богородичен: Ново Отроча= ро=ждши, Пребезнача=льное Слово, / обетша=вшия ны грехом / обновила еси, Дево, / и пе=ти укрепи=ла еси: / отец наших Боже благословен еси.
Песнь 8
Богоглаголивии отроцы в пещи, / со огнем пламень попирающе пояху: / благословите дела Господня Господа.
Невозвра=тно шествовав, досточу=дне, / стезя=ми, ведущими к Небеси=, / от путей, во зло направленных, до конца ангельски уклони=лся еси.
Ко стяжанию благодати живоно=сной устремляяся, преподобне, / дерзновение ко Спасу велие стяжал еси и бразды сердечныя ученик твоих словом и молитвою напоил еси.
Столп добродетели, постников украшение быв, отче Иосифе, / всем притекающим к покрову твоему старец богомудрый показался еси, / изнемогающим утешение подавая и врачевание духовное.
Богородичен: Вода еси Неисчерпаемая, Дево, / от Нея=же вси пию=ще, благодати исполняемся, / душею и телом освящаеми.
Песнь 9
Устрашися всяк слух / неизреченна Божия снисхождения, / яко Вышний волею сниде даже и до плоти, / от девического чрева быв Человек: / темже Пречистую Богородицу вернии величаем.
Господу и Божии Матери усердно поработав, / на па=стбища ту=чная блаженств Небесных востекл еси, / в день славнаго Успения Царицы Небесныя / кончины ми=рныя и непосты=дныя сподо=бився, преподобне.
Во успении твоем чад духовных не оставил еси, /свя=те Иосифе, писа=ньми твоими, яко Духа глаго=лы, умудря=еши, наипа=че же молитвою у Престола Владычня сердца чтущих память твою укрепля=еши.
Богома=тере избра=нный ученич=е, / ду=ши яко в зерца=ле некоем ви=дя ясне=йше, / всем вся был еси; и по смерти не оста=ви любящих тя.
Яко пречу=дное солнце великими подвиги твоими возсия=л еси нам, / озарив вся земны=я концы; / тем же вопием ти: / молися ко Господу просвети=ти наша помышления, отче преподобне.
Богородичен: Пречистая Дево, / нечистое сердце мое, / присно преступле=ньми и житейскими молвами отягченное, / к покаянию напра=ви и не оста=ви мене враго=м бы=ти в радость, / яко да славлю Тя и любовию пою, Препетая.
Светилен:
Воистинну звезда путево=дная явился еси, Иосифе преподобне, /на Горе Святей подвиза=ющимся, / и всем взыску=ющим истаннаго жития= монашескаго, / светлостию своею озаря=ющая спаси=тельныя стези, / и=миже ходи=ти помози= почитающим святую память твою.
Слава, и ныне, праздника или Богородичен:
Тя песньми немолчными ублажаем, Дево, / яко от Троицы Единаго родила еси и мо=лишися непрестанно о уповающих на помощь Твою.
На хвалитех стихиры, глас 1:
Преподобных великих отце=в, / отче Иосифе, стопа=м последовал еси, / яко безплотен во пло=ти пожив, / сладкая мира сего презре=в и многим образ доброде=телей яви=вся;/ темже, воздержанием, любомудрием и молитвою Царствие Небесное стяжа=вый, // моли спасти=ся душа=м нашим.
Яко Ангел на земли показа=ся, / преподобне Иосифе, / во бдении, молитве и памяти смертней прилежно подвиза=яся; / и яко цве=ты преблагоуха=нныя ученики твоя возрастив, / от трудов постнических в мире почил еси; / моли Человеколюбца Господа Иисуса / спасти=ся душам нашим.
Превеликими доброде=тельми твоими, угодниче Христов, / пустыннолю=бцев афо=нских удиви=л еси /и мно=гия под кров свой, яко птенцы, собрал еси, / к па=жити созерцаний божественных приве=д; / темже моли спастися душам нашим.
Слава, глас 6:
Богоно=се преблаже=нне Иосифе, / вся плотска=я мудрования ду=хови повину=в, / яко злато, в горниле искуше=нное, сия=я,/ прия=телище Духа Пресвятаго яви=лся еси / и мона=шествующия уче=нии твоими, / яко лествицею Небовосхо=дною, / на высоту добродетелей возве=л еси. / Поминай нас, чтущих память твою, присно священную, / и моли спастися душам нашим.
И ныне, Богородичен:
Владычице, приими= молитву раб Твоих, / и избави нас / от всякия нужды и печали.
Славословие великое. И отпуст.
На Литургии служба вся преподобническая.