Редкие Богослужебные тексты

Месяца августа в 24-й день
Священномученика и равноапостольнаго Космы Этолийскаго
На Вечерни
На Господи воззвах: стихиры, глас 2.
Подобен: Киими:
Прииди=те, слове=снии собо=ри, общий праздник соста=вльше, в веселии прославим хода=тая всякаго благоустрое=ния челове=ком, Косму предивнаго, ко спасению путевождя= и наставника, де=лы и чудесы= просия=вшаго, и ради научения людей множества мудростию и словесы= божественными пома=заннаго, подвижников образ и во апо=столех священному=ченика.
Приидите, ве=рнии, Спасова уго=дника воспоим, безсре=бренником равносла=вна и равнопрему=дра апостолом, всех ве=дением истинным обогати=вшаго и нравы украси=вшаго, незави=стно учения своя в сердца всева=вшаго, его=же Христос увенча=, име=яй велию милость.
Приидите, благочестивых ли=цы, цве=ты похвалы избра=ннаго Христова служителя увенча=ем, светом Божественным блистающаго, иже притекающим благодать прещедрую изливает и болезни неисцельныя отгоняет, емуже Христос подаде= чудес дар, име=яй велию милость.
Ины стихиры, глас 4:
Айтолии отрасль, Церкве утверждение, и мудраго учителя в Дусе Божественнем, Евангелия проповедника, и житием честнаго, благопрозябшаго воистинну, плевелы же исторгшаго и души земледелавшаго во страсе Господни, блажим достойно, Косму великаго, празднолюбцы.
Во Афоне просиявша, и во граде Византии, учении и труды божественныя веры, Македонию же, святе, и Епир весь путем апостольским и острова протекл еси, любовию божественною просвещая и утверждая, Космо, верных составления.
Яко Павел божественный, Христово Евангелие концем проповедал еси, освященне, от Византии пришед, силою Духа, даже до Иллирика достигл еси, множества спасая словесы твоими, течение же твое удавлением скончал еси, мучением украсився, отче Космо равноапостольне.
Слава, глас 6:
Земны=х испытав непостоя=нство и крест Христов ева=нгельски на ра=мена подъя=в, апо=стольски слово благоче=стия всюду разсе=ял еси, благодать исцелений оби=льно подая=, и с премудрым Павлом вопия=л еси: возлюби=те Бога и обря=щете покой душа=м вашим, Емуже и ныне моли=ся за ны, мо=лим тя, му=чеников похвало=, я=ко име=яй дерзнове=ние ве=лие, и не преста=й заступа=ти верою и любовию к тебе притека=ющих и память твою честну=ю совершающих.
И ныне, Богородичен догматик, глас тойже:
Кто Тебе не ублажит, Пресвятая Дево? / Кто ли не воспоет Твоего Пречистаго Рождества? / безлетно бо от Отца Возсиявый Сын Единородный, / Тойже от Тебе, Чистыя, пройде, / неизреченно воплощься, / естеством Бог сый, / и естеством быв Человек нас ради, / не во двою лицу Разделяемый, / но во Двою Естеству / неслитно Познаваемый. / Того моли, Чистая, Всеблаженная, / помиловатися душам нашим.
Притчей чтение:
Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку, и блажен человек, иже пути моя сохранит. Исходи бо мои - исходи живота, и уготовляется хотение от Господа. Сего ради молю вас и предлагаю мой глас сыновом человеческим: яко аз, премудрость, устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая, яко истине поучится гортань мой, мерзки же предо мною устны лживыя. С правдою вси глаголы уст моих, ничтоже в них стропотно, ниже развращенно. Вся права суть разумевающим и проста обретающим разум. Научу бо вас истине, да будет о Господе надежда ваша, и исполнитеся Духа.
Пророчества Исаиина чтение:
Тако глаголет Господь: вси языцы собрашася вкупе, и соберутся князи от них, кто возвестит сия в них? Или, яже от начала, кто слышана сотворит вам? Да приведут свидетели своя и оправдятся, и да услышат, и да рекут истину. Будите Ми свидетели, и Аз Свидетель, глаголет Господь Бог, и отрок, егоже избрах, да познаете и веруете Ми, и разумеете, яко Аз есмь: прежде Мене не бысть ин бог и по Мне не будет. Аз есмь Бог, и несть, разве Мене, спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог. И еще от начала Аз есмь, и несть от рук Моих избавляяй: сотворю, и кто отвратит то? Сице глаголет Господь Бог, избавляяй вас Святый Израилев.
Премудрости Соломони чтение:
Праведных души в руце Божией, не прикоснется их мука. Непщевани быша во очесех безумных умрети, и вменися озлобление исход их, и еже от нас шествие сокрушение: они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию, потекут: судят языком, и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.
На литии стихиры, глас 1:
Что тя нарече=м, треблаже=нне? Му=ченика, яко за Христа Бога кровь свою излия=? Пропове=дника, силу бо Христова Царствия всем возгласи=? Апостола, слово бо Евангелия апо=стольски верным принесе=? Монаха, житие= бо свое, яко подвиго=м зерца=ло чисто предложи=? Свяще=нника, священноде=йствуя бо, сам себе, яко жертву чи=сту принесе= Господу твоему? Егоже усердно моли спасти=ся душа=м совершающих память твою.
Све=тлыя подвиги твоя, и=миже веры ради подвизался еси, кто испове=сть, священному=чениче всесла=вне? Вар бо и му=ки претерпе=л еси пропове=дания ради и Небе=сное наследие от Христа прия=л еси; сего ради мо=лим тя, всече=стне, яко дерзнове=ния стяжа=вшаго ко Господу испроси=ти мир душа=м нашим.
Апо=стольски течение свое сконча=л еси, по=двиги пе=рвее очи=стився и безстра=шием; сего ради чудес даром Христос тя обогати=, прославля=яй сла=вящих Его и чудеса ди=вная показу=яй святыми Своими. Те=мже и мы днесь к моще=м твоим благоче=стно припа=даем, целу=юще я=, вои=стинну бо исцеления неизреченная подае=ши, моля=ся прия=ти прегрешений оставле=ние и му=ки изба=витися тя почита=ющим.
Отче, и=же во=ды от нечи=стых в чи=стыя претвори= словом твоим и лю=ди жа=ждущия и стеня=щия напои=, ду=шу мою, преподо=бне, всю скве=рну и нечи=сту, чи=сту покажи= моли=твами твоими Богу, хотя=щему спасения души= вся=каго создания, да да=рует тобою мир ми=рови и душа=м нашим велию милость.
Слава, глас 6:
Днесь светло пра=зднующи равноапо=стольнаго Космы пра=здник, Церковь просвеща=ется; прииди=те у=бо, учи=теля нашего воспои=м, вопию=ще: радуйся, Божественным Светом осия=нный и благочестия словесы= всем взыску=ющим Истины принесы=й. Радуйся, апо=столом подража=телю ре=вностию и труды, тех путем проше=дый. Радуйся, Этолии о=трасле, Святоиме=нныя Горы= похвало= и всея= Це=ркве ве=лия красото. Радуйся, мучеником сострада=льче, священному=чениче му=дре; моли Христа Бога о душа=х наших.
И ныне, Богородичен:
Творец и Избавитель мой, Пречистая, Христос Господь, из Твоих ложесн прошед, в мя оболкийся, первыя клятвы Адама свободи. Темже Ти, Всечистая, яко Божии Матери же и Деве воистинну, вопием немолчно: радуйся ангельски, радуйся, Владычице, Предстательство и Покрове, и Спасение душ наших.
На стиховне стихиры, глас 4.
Подобен: Яко добля:
Яко до=бльственник непобеди=м, вся=кая умышле=ния вра=жия благодерзнове=нно изобличив и посрамив, от Бога крепость име=яй велию на сопроти=вныя, и Духа дарова=нии блиста=я, победы зна=мения на вся=цем месте воздвизал еси, отче, и по упокоении твоем венец приял еси.
Стих: Дивен Бог во святых Своих, Бог Израилев.
Боже=ственными уче=ньми зе=млю благоче=стно напои=, пресвяще=нне, вещая не то=кмо словесы=, но и доброде=тельми твоими, и кла=сы добропло=дныя возрасти, и яко же=ртва Влады=це благоприя=тна яви=ся.
Стих: Святым, иже суть на земли Его, удиви Господь вся хотения Своя в них.
Заповеди Христовы вся исполня=я, подви=жников похвало= и мучеников сла=во, богоуго=днаго жития= о=бразе и=стинный, Космо пребога=те, Троицы ревностный служи=тель показался еси, к Не=йже хода=тайствуй прегреше=ний оставление дарова=тиверою тя почита=ющим, и спасение, и велию милость.
Слава, глас 8:
Благочести=вых мно=жества наста=вника тя почитаем, Космо= прему=дре, тобою бо вои=стинну пра=во ходи=ти научи=хомся; блажен еси, яко, Христу порабо=тав, верных собор свяще=нными твоими уче=ньми Тому прине=сл еси, Ангелов собесе=дниче, апостолов соприча=стниче, мучеников сожи=телю и праведных, с ни=миже моли=ся Господеви, поми=ловатися душа=м нашим.
И ныне, Богородичен:
Безневестная Дево, Яже Бога неизреченно заченши плотию, Мати Бога Вышняго, Твоих рабов мольбы приими, Всенепорочная, всем подающи очищение прегрешений. Ныне наша моления приемлющи, моли спастися всем нам.

Тропарь, глас 4:
Пе=сньми похва=лим благосла=вно му=ченическим лико=м совоку=пльшагося, / священноде=теля и подвижника, Косму= преизя=щнаго, / соше=дшеся днесь в честне=й па=мяти его, / источает бо исцеле=ния верою притека=ющим, / дерзнове=ние име=яй ко Христу, яко апостолом сопричастник.
Ин тропaрь, глaс 3.
Подобен: Божественныя веры:
Боже=ственныя ве=ры уче=нием / Церковь украси=л еси, / ревни=тель апо=столом быв / и насади=тель Православия догма=тов, / му=ченически подвиги сконча=л еси, / Космо= пресла=вне, Христу Богу моли=ся / дарова=ти нам велию милость.
Ин тропaрь, глaс 1.
Подобен: Пустынный житель:
Этолии рождение, апостолом сотрудника, / Филофейския обители славу и Афона похвалу, / Косму равноапостольнаго, ве=рнии, яко пропове=дника веры му=драго / и яко ве=лия благочестия наставника, почтим, вопию=ще: / слава Давшему ти крепость, / слава Венчавшему тя, / слава Действующему тобою всем исцеления.
На утрени
По 1-м стихословии седален, глас 1.
Подобен: Гроб Твой, Спасе:
Веру Христову, яко оружие необоримое прие=м, на врага победи=тель явился еси, словесы= твоими, яко секи=рою, велиа=ровы ко=вы посек и ко=рени нечестия мече=м Духа.
Слава, и ныне, Богородичен:
Матерь Тя Божию ве=мы вси Деву воистинну, и по Рождестве я=вльшуюся, иже любовию прибегающии к Твоей благости: Тебе бо и=мамы, грешнии, предстательство, Тебе стяжа=хом в напа=стех спасение, Едину Всенепорочную.

По 2-м стихословии седален, глас 5.
Подобен: Собезначальное Слово:
Благочестия семя насеял еси, преподобне, во ушеса= челове=ческая, обилен клас пожа=в учений твоих, и яко приношение благоуго=дно Христу принесл еси, множество людей православных.
Слава, и ныне, Богородичен:
Радуйся, Две=ре Господня непроходимая: радуйся, Стено и Покрове притекающих к Тебе. Радуйся, Необуреваемое Пристанище, и Неискусобрачная, Рождшая плотию Творца Твоего и Бога: молящи не оскудевай о воспевающих, и кланяющихся Рождеству Твоему.

По полиелеи седален, глас 2.
Подобен: Явился еси днесь:
Све=тлыя подвиги твоя, богогла=се, собра=вшеся в пречестно=м храме твоем, пе=сньми прославляем и, любовию припа=дающе святым мощем твоим, бога=тное разрешение от всяких болезней и мук прие=млем.
Слава, и ныне, Богородичен:
Миру Спасение, Владычице, ро=ждши, спасение да=руй и=же сла=вящим Тя, Дево, вся бо Ти мо=щно пред Сыном Твоим, Егоже не преста=й моли=ти за вся рабы Твоя, да изба=вимся огня гееннскаго.
Степенна. Первый антифон 4-го гласа.
Прокимен, глас 4: Дивен Бог во святых Своих, Бог Израилев. Стих: Святым, иже суть на земли Его:
Всякое дыхание: Евангелие Матфея, зачало 36.
50-й псалом.
Слава: Учителя молитвами:
И ныне: Молитвами Богородицы:
Помилуй мя, Боже:

Стихира самогласна, глас 2:
Ум воспери=в к надми=рным и изде=тска в по=двизех и уче=ниих, яже по Бо=зе, пожив, от Афона устремился еси, яко други=й Нил, и жа=ждущия ду=ши бога=тно словесы= твоими напоив, плодоно=сны богове=дением показал еси, глас Владыки твоего услышав: вни=ди, ра=бе, в радость Господа своего.

Канон, глас 8
Песнь 1
Ирмос: Колесницегонителя:
Яко священник Господень законный, Бо=гу священнопослу=жил еси и, апостолом последователь быв, веры православныя изъясни=л еси догматы, словесы твоими вся к свету боговедения путево=дствуя.
Подвижником украшение и мучеником, священником похвала истинная и божественный гражданин яви=ся, и правило жития сугуботве=рдаго, богомудре.
Господа твоего крест понесл еси чрез все житие твое, темже, отче, чудеса твориши к тебе притекающим; сего ради и ныне молитвами твоими да возможем вре=да мучи=телева изба=витися.
Богородичен: Богородицу воистинну ве=мы Тя, и Защище=ние, и Предста=тельство стяжа=хом, и Избавление, Всепетая, крепкое Твое, всех бо Зиждителя и Господа яко Младенца плотию родила еси.
Песнь 3
Ирмос: Небеcнаго крyга:
Злосмра=дием страстей омраче=нный мой ум па=ки очи=стити Го=сподеви моли=ся, святче, и омыти светом Божественнаго ве=дения, да прославлю тя Просла=вльшаго.
Сердце чисто и разум богоуго=ден стяжа=в, ко Спасу воспери=лся еси, му=дре, и, яко священник преизя=щен, кровь твою принесл еси Ему, яко жертву непорочну.
Изсо=хшую мою душу плодоно=сну доброде=тельми покажи=, богоно=се, и=маши бо силу и по смерти чудеса твори=ти приступа=ющим к тебе верою и любовию.
Богородичен: Бурями страстей помраче=нный мой ум раче=нием Твоим, Богородице, озари=, све=тлостию Егоже родила еси, да Того славим и хвалим Тя, Пречистую.
Ин кондак, глас 3.
Подобен: Дева днесь:
Непоро=чно во Афоне пожив, / яко Моисей, Божественнаго явления сподо=бился еси, / сего ради дея=ньми и богогласными твоими, о=тче, словесы= / облиста=л еси Церковь, / за ню=же подвиза=вся, сугу=бым венце=м украси=лся еси.
Ин кондак, глас 4:
Яко светило новоявле=нное Церковь всю озаряеши евангельскими учении, Космо, Христовым апостолом равный. Сего ради Церковь достойно празднует память твою.
Седален, глaс 2.
Подобен: Явился еси днесь:
Реки изсушил еси нечестия, поже=рся во струях ре=чных, до=бльственниче, и яко венцено=сец восте=кл еси к вечным ски=ниям, всеприснопа=мятне.
Слава, и ныне, Богородичен: Яже Свет Незаходимый ро=ждшая, озари= помраче=нная очи души= моея= и мглу сердца моего отжени=, Владычице.
Песнь 4
Ирмос: Ты еси утверждение:
Да обря=щем пред Господем молитвами твоими милость, моли=ся, ми=лостиве отче, яко бога=т сый благодатным дерзновением.
Да прии=мем от Господа хода=тайством твоим, всеблаже=нне, прегрешений разрешение и тяжких мук избавление,— усердно просим тя.
Да сподобимся пред Господем,— припа=дая вопием ти, му=чениче Христов, —благоче=стно ста=ти и Чертог Его Небесных дости=гнути.
Богородичен: Милости ми Сына Твоего, Влады=чице, исхода=тайствуй, всеси=льным Твоим пред Ним заступле=нием.

Песнь 5
Ирмос: Вскую мя:
Ре=чная стремле=ния жертвою твоею, отче, освяти=шася, тридне=вствовавшему ти в них, яко во гробе Господь твой, Егоже не преста=й при=сно моли=ти, изба=витися нам вечных мук.
Разумом све=тлостию Тро=ичною просвеще=н, Троицу всем во Еди=нице ясно проповедал еси, Едино Существо в Трие=х Ли=цех, Отца, Сына и Божественнаго Духа.
Смра=да жития сего и суеты отврати=вся, ко Господу, отче, прите=кл еси, кровь твою за Христа проли=ти сподо=бився.
Богородичен: Яже Свет ро=ждшая Невечерний, просвети мя, помраче=ннаго, и душею и сердцем сквернаго, иныя бо разве Тебе теплыя Заступницы не и=мам, Неискусому=жная.

Песнь 6
Ирмос: Очисти мя, Спасе:
Ясным гла=сом и словесы= уверяя, блаженне, привел еси вся верныя к божественному ведению благочестия, пагубное неведение потребляя.
Богу послужив, себе сама=го Тому поже=рл еси, да живе=ши с Ним в безсмертнем Царствии Небеснем.
Монахом вождь, священником украшение и правило благочестия явился еси, егоже держа=щеся, на путь прелести да не уклонимся молитвами твоими.
Богородичен: Яко милостей Источник нескверный, Богородице, молим, Чистая, да обряще=м милость в День Суда и прегрешений оставление благоприятным заступлением Твоим.
Кондaк, глaс 4:
От Этолии прише=д, богоносе, / во Афоне монашески пожив, / славы Божия свидетель показался еси, / слово Истины всем возгласи=в, / и Христу привел еси людей множества, / яко апостолов подражатель, священномучениче, / даже до пролития кро=ве твоея=.
Икос:
Мучеников ле=поту, монашествующих славу, проповедника веры и служителя Слова, священников украшение и апостолов подражателя изряднейшаго, пе=сньми воспоем, вернии, и кри=ны похвалы увенчаем того святую главу, от нея=же исцеления точа=тся и благоче=стно припа=дающим многая бывают чудеса, ю=же верно лобыза=юще, тому глаголем: радуйся, нечестия корень посеки=й мечем словес твоих; радуйся, благочестия се=мена во ушеса= и сердца все=явый. Радуйся, веры проповедниче и Церкве сто=лпе неколебимый; радуйся, дерзновение имы=й ко Спасу Господу, яко апостолом последовал еси даже до пролития кро=ве твоея=.
Песнь 7
Ирмос: Отроцы еврейстии:
Ду=ши человеческия, всебла=женне, яко ры=барь мре=жами, рече=ньми твоими уловлял еси от глубины поги=бельныя.
Словесы= твоими, пра=ведниче, води=мии позна=ша Слово Отчее, Единаго от Троицы, безсеменно воплотившагося от кровей Чи=стыя, во е=же спасти=ся всем.
Израсти= светло Этолия мира всего украшение великое, иерея Божия, яко крин, мироуха=ние испущающаго верою к нему притекающим.
Богородичен: Радуйся, раб Твоих Спасение, Яже Господа плотию ро=ждшая, смиренно вопием Ти, страстей, Госпоже, избавля=еми, предста=тельствы Твоими.
Песнь 8
Ирмос: На горе Святей:
Священник множество и мученик хвалят тя, Космо= священнотаи=нниче, монахов же ли=цы тя славят, апостолом всемудраго равностоя=теля.
Жаждущая сердца словесы= Истины напои=, седмочи=сленных ради мук за Христа венец стяжав, Егоже не преста=й о нас молити.
Уче=ньми твоими божественными исполнена, Албания подвиги твоя превозносит и, ко всечестно=му твоему притека=ющи храму, Троицу, Иже тя просла=ви, славит разумно.
Богородичен: Евою от Еде=ма про=гнани бы=хом, Тобою же паки введо=хомся, тем Тя славим, Бога рождшую, Твоим бо заступлением прощение прегрешений да обря=щем, Богородице.
Песнь 9
Ирмос: Ужаснися, бояйся:
Сиянием Троицы душу просвети=в, му=ки дерзнове=нно Христова и=мене ради претерпе=ти сподо=бися, преславлне Космо, плоть твою во утверждение словес твоих страсте=м предав.
Страх Господень внутрь себе прии=м, досточу=дне, мудростию от Него обогати=ся, е=юже многих к Богове=дению приведе=, да чтут и славят Единаго Бога, Троицу во Еди=нице, Отца Безначальна, с Сыном и Духом Пресвятым.
Память учений твоих николи=же престае=т, всеблаженне, пострада=вый ради на Кресте дла=ни Распросте=ршаго, И=же тобою страждущим да=рует исцеления.
Богородичен: Купину древле Моисей узре=в, Богоневесто, огнем горя=щу и неопаля=ему, сказует Тя, Пренепорочная Госпоже Богородице Всеблагоприемная, мы же прославляем, Предстательницу Тя зря=ще к Сыну Твоему и Богу нашему.
Светилен
Подобен: Жены, услышите:
Крест Господа твоего на ра=мена взем, вся концы протекл еси, исцеления подавая, яко иерей преславный Божий, всемудре, и себе принесл еси яко жертву благоприя=тну, священноде=йственниче Господень.
Слaва, и ныне, Богородичен:
Марие Препрославленная, заступлением Твоим николи=же преста=ни моли=ти, Егоже родила еси, о рабе=х Твоих, славящих любовь Твою; мо=жеши бо, яко Владычица, ели=ка хо=щеши, сотворити.

На хвалитех стихиры, глас 1.
Подобен: Небесных чинов:
Богогла=сными твоими словесы= веру известил еси, отче, Светом Истины мглу льсти разгна=в и ко Христу дерзновение обре=т; не преста=й моли=тися о нас, память твою при=сно соверша=ющих.
Мощи твоя чудото=чныя иму=ще, яко вои=стинну сокровище чудес неоску=дно, ублажаем тя; спасай убо нас молитвами твоими от всякаго обстояния.
Радуйся и весели=ся, Церковь Христова, стяжа=вши украси=вшаго тя проповедию и словесы=, Косму пребожественнаго, верных украси=теля, священников славу, монахов же и мучеников похвалу.
Слава, глас 2:
Ревни=теля сосуда избра=ннаго, верховнаго апостола Павла, Косму равноапостольнаго воспоем; не даде= бо сна очи=ма своима=, ниже= ве=ждома дрема=ния, до=ндеже слово Евангелия верным возвести=, ду=ши же от глубины льсти изведе=, Светом Истины мрак бесовский разгна=в; егоже молитвами, Христе Боже, и наша ду=ши просвети=, ков вражиих избавляя.
И ныне, Богородичен:
Все упование мое на Тя возлагаю, Мати Божия, сохрани мя под кровом Своим.
Славословие великое и отпуст.
На Литургии
Блаженна святаго, песни 3-я и 6-я.
Прокимен, глaс 8: Во всю землю изыде вещание их и в концы вселенныя глаголы их. Стих: Небеса поведают славу Божию, творение же руку Его возвещает твердь.
Апостол, ко Ефесеом, зачaло 224, от полу.
Аллилyиа, глaс 2: Священницы Твои, Господи, облекутся правдою, и преподобнии Твои возрадуются. Стих: Блажен муж, бояйся Господа.
Евангелие от Матфeа, зачaло 34, от полу (10:1, 5-8), святым врачем.
Причaстен: В память вечную будет праведниик, от слуха зла не убоится.
Величание:
Радуйся, Апостолов подражателю, и Церкве учителю и светильниче, радуйся, благочестия Божественнаго насадителю и общниче мучеников, Космо равноангельне.