мч. Василию Мангазейскому. Стихиры.
На Господи, воззвах:
Глас 1, под. Всехвальнии мученицы
Всехвальне Василие,/ чистоту душевную,/ издетска притяжал еси,/ темже господину твоему/ верою и правдою служил еси/ обаче Небе́сному Царю́/ паче угождал еси// и за сие благочестно о Христе пострадал еси.
Всечестне Василие,/ не в безбожных языцех пожил еси,/ во Святей же Руси процвел еси,/ обаче от сребролю́бнаго врага́,/ мучения и смерть приял еси/ любве ради твоея ко Господу,/ сего ради со древними мученики// во Царствии достойно вчини́лся еси.
Преславне Василие,/ чистоту души и тела сохранший,/ и невинно о Христе пострадавший,/ благодать велию стяжал еси/ болящим различными недуги помогати / и во многия беды́ впадшия избавляти,/ иноро́дцы чудесы́ просвещати,// темже моли о всех чтущих память твою.
На стиховне, гл. 2, под. Доме Евфрафов
Дом душевный/ Христу предочи́стил еси/ сего ради, Васи́лие/ лютости мучителевой не убоявся,// мужески о Христе пострадал еси.
Храм твой телесный,/ от беззаконник разрушен быв,/ силою Божественною, Василие,/ от земных недр возвышается,// и чудесы́ дивными прославляется.
Храм Господень,/ честныя мощи твоя прият, Василие,/ души же верных/ добродетелем и чудесем твоим внимающе,// велию пользу улучают.