Адрес электронной почты
Пароль
Я забыл свой пароль!
Входя при помощи этих кнопок, вы подтверждаете согласие с правилами
Имя
Адрес электронной почты
Пароль
Регистрируясь при помощи этих кнопок, вы подтверждаете согласие с правилами
Сообщество

Редкие Богослужебные тексты

Полная служба преподобному Порфирию Кавсокаливиту (перевод с греческого)

СЛУЖБА ПРЕПОДОБНОМУ ПОРФИРИЮ КАВСОКАЛИВИТУ
(19 ноября/2 декабря)

НА МА́ЛОЙ ВЕЧЕ́РНЕ
На Го́споди, воззва́х: стихи́ры, глас 1:

Друго́в возлю́бленных мно́жества,/ прииди́те, стеце́мся,/ во е́же спра́зднствовати па́мять/ свяще́ннаго Порфи́рия,/ сокруши́в бо де́монския стре́лы го́рькия,/ побе́ды вене́ц прия́т,/ чистоты́ и Боже́ственнаго послуша́ния,// и непобе́днаго смире́ния.

Иере́ев яви́лся еси́ удобре́ние,/ мона́хов похвале́ние,/ ве́рных предста́тельство,/ преподо́бне Порфи́рие, спаси́ ны,/ к тебе́ прибега́ющия,/ я́ко мно́го дерзнове́ние к Бо́гу// хода́тайствуеши, свяще́ннейший.

Уте́шителя был еси́ вмести́лище одушевле́нное,/ дароно́сец вели́кий и сла́вный прозорли́вец,/ неизрече́нныя та́йны ты взыску́я/ и возвеща́я свои́ми чудесы́,/ я́ко Христо́во благоуха́ние и сла́ва// обита́ет во святы́х Его́.

А́ттику защити́ всю же, и Е́вбею,/ свою́ оби́тель и ста́до, и уго́дники сея́,/ осла́бу подая́ от злых,/ напа́стей же и скорбе́й,/ подава́я всем здра́вие и преспе́яние,// и благода́ть Спа́са на́шего.

Слава, глас 5:
Прииди́те, празднолю́бцев сосло́вие,/ в духо́вныя гу́сли игра́юще/ прозорли́вца Порфи́рия воспои́м./ Сей бо возведе́н бысть та́инственными виде́нии/ и Рая́ вкуси́ наслажде́ния./ Равноа́нгелен в телеси́ показа́ся,/ во мрак Бо́жий всели́ся, Богови́ден быв,/ вои́стинну и́мже Святы́й Дух глаго́ла./ И ны́не мо́лится, предстоя́ Го́споду,// о всех нас, чту́щих всечестно́е успе́ние его́.

И ныне, глас тойже. Богородичен:
Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу// и прибе́жище душ на́ших.

НА СТИХОВНЕ СТИХИРЫ, ГЛАС 2:
Подобен: Доме Ефратов.
Ра́дуйся, по́стников Боже́ственный прозорли́вче/ и правосла́вных похвало́,// исто́чниче чуде́с, отче Порфи́рие блаже́нне.

Стих: Честна́ пред Го́сподем/ сме́рть преподо́бных его́.
Весь в моли́тве и бде́нии был еси́,/ во смиреному́дрии служи́тилей мно́жества,// ве́рою прибега́ющих ти.

Стих: Блаже́н му́ж боя́йся Го́спода,/ в за́поведех его́ восхо́щет зело́.
Вострепета́ о тебе́ Па́тмос святы́й// от Иоа́нна ви́девый тя Боже́ственное зря́ща Открове́ние.

Слава, глас тойже. Троичен:
Благода́ти насы́тився/ Тро́йческой Еди́ницы,/ Богови́дец бысть в Све́те Нетва́рном// Порфи́рий Боже́ственный.

И ныне, глас тойже. Богородичен:
Благода́тию Твое́ю стра́жда в Кавсокаливи́и,/ Порфи́рий, Де́во, прозорли́вец показа́лся есть// и таи́нник прозре́ния.

НА ВЕЛИЦЕЙ ВЕЧЕРНЕ
На Го́споди, воззва́х: стихи́ры, глас 4:

Елла́ды празднолю́бцы,/ земли́ вся́кия Богому́дрии,/ соше́дшеся днесь восхва́лим/ Боже́ственна вои́стинну Порфи́рия,/ житие́м равноа́нгельна,/ и и́стинно прозорли́вца,/ правосла́вных красоту́ и похвале́ние,/ Тро́ицы таи́нника,/ благода́тию, смире́нием порабоще́на,// Уте́шителя обогати́вшася.

В Афи́нех процве́л еси́,/ я́коже цвет мироуха́нен,/ и мно́жества возвесели́л еси́/ услажде́нием сло́ва твоего́ простоты́/ и Боже́ственною кро́тостию умиря́я ду́ши/ ко приста́нищу благоути́шну,/ направля́еши вся во Христо́ву святу́ю Це́рковь,/ иде́же есть спасе́ние// и Рая́ наслажде́ние.

Я́ко звезда́ пресве́тла/ из Евбе́и возсия́л еси́,/ просвеща́я всю подсо́лнечную дарова́ний осия́нии/ и вся све́тлостию твоего́ свята́го жития́,/ преподо́бных, Порфи́рие, удобре́ние,/ любви́ воплоще́нием был еси́// и проще́ния о́браз всем, терпе́ния и простоты́.

Возлюби́в Го́спода,/ смире́нно послужи́в Це́ркви, преподо́бне, от ю́ности/ и боля́щим дарова́л еси́ исцеле́ния в чудесе́х,/ Уте́шителя да́ры и разсужде́ние прия́л еси́, и прозре́ние,/ и благода́ть предви́дети/ бы́вшия и я́же подоба́ют ми́ру// на́ми непости́жная.

Во глубине́, Порфи́рие, Христо́ва смире́ния сшед,/ возне́слся еси́ к неизрече́нным/ Христо́вым Боже́ственным та́инам/ и си́ми наслади́лся еси́,/ и был еси́ зри́тель гряду́щих,/ огромле́н, я́ко Иоа́нн, на Па́тмосе,/ ви́дев открове́ния просвеще́нием Уте́шителя,// священнотаи́нниче преподо́бне.

В доброде́телей оде́явся порфи́ру, Порфи́рие,/ в ли́цех предстои́ши, я́ко равноа́нгелен/ Боже́ственных а́нгелов всесве́тел,/ и пое́ши ра́дуяся и воспева́еши на Небесе́х/ Трисо́лнечнаго Божества́ сла́ву приснотеку́щую,/ и Христа́ те́пле мо́лиши/ дарова́ти лю́дем// покая́ния наслажде́ние.

Слава, глас 6:
Днесь возсия́, я́ко звезда́ светоявле́нная,/ преподо́бнаго Порфи́рия всечестна́я па́мять/ сонм ве́рных озаря́ющая./ Прииди́те у́бо ве́рнии в Сиби́ри живу́щии/ свяще́нными похвала́ми сего́ почти́м, глаго́люще:/ ра́дуйся, в труде́х подвиза́выйся,/ и в побе́дех бы́вый дре́вних преподо́бных собесе́дник;/ ра́дуйся, пло́тию, я́ко А́нгел Бо́жий, служи́вый/ смире́ния оде́ждею покрыва́емый;/ ра́дуйся, светле́йший храм чистоты́ и бла́гости,/ и та́йнам Боже́ственным зна́нием науча́емый./ Моли́ у́бо о нас Го́спода// благоразу́мно чту́щих и воспева́ющих па́мять твою́.

И ныне, глас тойже. Богородичен:
Кто Тебе́ не ублажи́т, Пресвята́я Де́во?/ Кто ли не воспое́т Твоего́ Пречи́стаго Рождества́?/ Безле́тно бо от Отца́ возсия́вый Сын Единоро́дный,/ То́йже от Тебе́, Чи́стыя, про́йде,/ неизрече́нно вопло́щся:/ естество́м Бог Сый/ и естество́м быв Челове́к нас ра́ди;/ не во двою́ лицу́ разделя́емый,/ но во двою́ естеству́/ несли́тно познава́емый./ Того́ моли́, Чи́стая Всеблаже́нная,// поми́ловатися душа́м на́шим.

Проки́мен дне́. Све́те Ти́хий.
И ЧТЕНИЯ
Прему́дрости Соломо́новы чте́ние [Глава 3].
Пра́ведных же ду́ши в руце́ Бо́жией, и не прико́снется и́х му́ка. Непщева́ни бы́ша во о́чию безу́мных умре́ти, и вмени́ся озлобле́ние исхо́д и́х, и е́же от на́с ше́ствие сокруше́ние: они́ же су́ть въ ми́ре. И́бо пред лице́м челове́ческим а́ще и му́ку прии́мут, упова́ние и́х безсме́ртия испо́лнено: и вма́ле нака́зани бы́вше, вели́кими благоде́телствовани бу́дут, я́ко Бо́г искуси́ и́х и обре́те и́х досто́йны Себе́: я́ко зла́то в горни́ле искуси́ и́х, и я́ко всепло́дие же́ртвенное прия́т я́. И во вре́мя посеще́ния и́х возсия́ют, и я́ко и́скры по сте́блию потеку́т: су́дят язы́ком и облада́ют людьми́, и воцари́тся в ни́х Госпо́дь во ве́ки. Наде́ющиися На́нь уразуме́ютъ и́стину, и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

Прему́дрости Соломо́новы чте́ние [главы́ 5 и 6].
Пра́ведницы во ве́ки живу́т, и в Го́споде мзда́ и́х: и попече́ние и́х у Вы́шняго. Сего́ ра́ди прии́мут Ца́рствие благоле́пия, и вене́ц добро́ты от руки́ Госпо́дни: зане́ десни́цею покры́ет я́, и мы́шцею защити́т и́х. Прии́мет всеору́жие рве́ние свое́, и вооружи́т тва́рь в ме́сть враго́м. Облече́тся в броня́ пра́вды, и возложи́т шле́м, су́д нелицеме́рен. Прии́мет щи́т непобеди́мый преподо́бие. Поостри́т же напра́сный гне́в во ору́жие: спобо́рет же с ни́м ми́р на безу́мныя. По́йдут праволу́чныя стре́лы мо́лниины, и я́ко от благокру́гла лу́ка облако́в, на наме́рение полетя́т. И от каменоме́тныя я́рости испо́лнь паду́т гра́ды. Вознегоду́ет на ни́х вода́ морска́я, ре́ки же потопя́т я́ на́гло. Сопроти́в ста́нет и́м ду́х си́лы, и я́ко ви́хор разве́ет и́х, и опустоши́т всю́ зе́млю беззако́ние, и злоде́йство преврати́т престо́лы си́льных. Слы́шите у́бо ца́рие, и разуме́йте, навы́кните судии́ конце́в земли́. Внуши́те держа́щии мно́жества, и гордя́щиися о наро́дех язы́ков, я́ко дана́ е́сть от Го́спода держа́ва ва́м, и си́ла от Вы́шняго.

Прему́дрости Соломо́новы чте́ние [главы́ 4 и 5].
Пра́ведник же а́ще пости́гнет сконча́тися, в поко́и бу́дет: ста́рость бо честна́ не многоле́тна, ниже́ в числе́ ле́т изчита́ется: седи́на же е́сть му́дрость челове́ком, и во́зраст ста́рости житие́ нескве́рно. Благоуго́ден Богови быв, возлю́блен бы́сть, и живы́й посреде́ гре́шных преста́влен бысть: восхище́н бысть, да не зло́ба измени́т ра́зум его́, или́ ле́сть прельсти́т ду́шу его́. Раче́ние бо зло́бы помрача́ет до́брая, и паре́ние по́хоти пременя́ет у́м незло́бив. Сконча́вся вма́ле испо́лни ле́та до́лга: уго́дна бо бе Го́сподеви душа́ его́, сего́ ра́ди потща́ся от среды́ лука́вствия: лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

НА ЛИТИ́И СТИХИ́РЫ
ГЛАС 1:
Преподо́бне о́тче Порфи́рие,/ мно́го дерзнове́ние име́я ко Христу́ Бо́гу,/ Его́же изде́тска вседу́шно возлюби́л еси́,/ и я́ко свеща́ Его́ ра́ди поще́нием раста́ялся еси́,/ сию́ оби́тель твою́,/ ю́же труда́ми мно́гими и по́ты воздви́гл еси́,/ сохрани́, я́ко А́нгел, от враг и бед./ И нас в ней тружда́ющихся соблюди́/ в любви́ и терпе́нии,/ да бу́дем еди́но/ согла́сно моли́тве твое́й/ пре́жде успе́ния твоего́ на Афо́не./ Помяни́, о́тче, земна́го зде жития́ твоего́/ и покажи́ нас, чад твои́х,/ насле́дники доброде́телей/ и блаже́нного конца́ твоего́,/ да тя, я́ко предста́теля/ и благоде́теля на́шего// при́сно велича́ем.
ГЛАС 2:
Преподо́бным возсия́вый жи́тельством,/ Богода́нных дея́ний о́браз,/ и вои́стинну мона́хов о́браз показа́лся еси́, о́тче преподо́бне./ Христа́ ра́ди бо подвиза́выйся,/ сподо́бился еси́ Боже́ственнаго венца́./ И на высоту́ умозри́тельную у́м возве́д/ Богозре́ния таи́нник бы́л еси́, и А́нгелов сограждани́н./ И о́ко Боже́ственное показа́лся еси́,/ та́йная челове́ком прозре́нием/ вся́ пока́зовал еси́, изумля́я всех./ Те́мже благода́тию/ и доброде́тельми твои́ми дивля́хуся./ Но, о́тче му́дре Порфи́рие,// моли́ся о чту́щих тя́.
ГЛАС 3:
Светозаре́нием Ду́ха та́йно просвеща́емь,/ разуме́ний Боже́ственных,/ и́стинный прозорли́вец бы́л еси́, Порфи́рие./ Поще́ний бо по́двиги ре́вностию вся́ превосше́д,/ высоту́ неудобовосходи́мую доброде́телей дости́гл еси́./ Мно́жайшие же дарова́ния,/ я́ко стяжа́л еси́ Ду́хом/ тре́бующим чудесми́ подае́ши да́ры мно́гия./ И житие́м твои́м вся́ науча́я,/ призыва́еши си́х к покая́нию./ Но, я́ко оте́ц благосе́рдый, преподо́бне,// моли́ спасти́ся душа́м прибега́ющих дерзнове́нием твои́м.
ГЛАС 4:
По́стнических боре́ний твои́х, му́дре,/ побе́ду и Боже́ственную сла́ву,/ ю́же прия́л еси́ ты́, я́ко мзду́,/ кто́ мо́жет изрещи́ словесы́ иногда́/ и восхвали́ти, треблаже́нне?/ Те́мже тя́ чти́м вси́,/ я́же твое́ю оплодоноси́вшеся благода́тию/ и прии́мше мно́гажды/ по́мощь тобо́ю, сла́вне./ И ны́не на Небесе́х ра́дуяся,// моли́ся Христу́ Бо́гу о душа́х на́ших.

Слава, глас 2:
Я́коже еле́нь жа́ждяй, преподо́бне о́тче,/ потща́лся еси́ изде́тска к исто́чником духо́вным/ пусты́ни Афо́нстей./ И живо́ю водо́ю испо́лнився се́рдцем,/ ра́дость благода́ти источи́л еси́ челове́ком./ Дарова́ния прия́л еси́ Небе́сныя,/ науча́я послуша́нию и смире́нию,/ хра́м вои́стинну показа́лся еси́ Ду́ха./ И ны́не Христа́ непреста́нно моли́ о нас,// соверша́ющих ве́рно всепра́зднственную па́мять твою́.
И ныне, глас тойже. Богородичен:
Все упова́ние мое́ на Тя́ возлага́ю,/ Ма́ти Бо́жия,// сохрани́ мя под кро́вом Твои́м.

НА СТИХОВНЕ СТИХИРЫ, ГЛАС 5:
Подобен: Ра́дуйся по́стников.

Ра́дуйся, мона́хов добро́то,/ иере́ев многоглаго́ливая че́стность,/ Це́ркви похвала́, пречи́стый у́м,/ безстра́стия таи́нник изя́щнейший,/ кро́тости о́браз, смире́ния селе́ние,/ и рачи́тель моли́твы неи́стовейший,/ свя́тости о́браз чу́дный,/ цвет ра́йский и ши́пок чистоты́,/ Христо́ву Це́рковь благово́нствующъ, Порфи́рие./ Христа́ умоли́ душа́м на́шим// дарова́ти ве́лию ми́лость.

Стих: Честна́ пред Го́сподем/ сме́рть преподо́бных его́.
Ра́дуйся, свяще́нное главо́,/ о́строва Евбе́и прозябе́ние свяще́ннейшее,/ любви́, и проще́ния, и ми́лости исто́чник,/ Уте́шителя до́м святе́йший,/ свети́ло, подсо́лнечную просвеща́ющее чудесы́,/ заблу́ждших путево́ждь ко Го́споду,/ прозре́ния высокопа́рный бе́ркут,/ свети́льник всесве́тлый Боже́ственнаго осия́ния,/ неизрече́нная озаря́яй,/ открыва́яй та́йны./ Христа́ умоли́ душа́м на́шим// дарова́ти ве́лию ми́лость.

Стих: Блаже́н му́ж боя́йся Го́спода,/ в за́поведех его́ восхо́щет зело́.
Ве́сь освяти́лся еси́ Христу́,/ и изде́тска на Афо́не пострада́л еси́,/ собесе́дник А́нгелов,/ живы́й на земли́ бы́в,/ и Уте́шителя сосу́д,/ де́монов противобо́рник,/ и́хже де́рзости разори́л еси,/ и неду́гов цели́тель безукори́зненный,/ исцеля́яй вся́ку стра́сть, Порфи́рие./ О́браз Христо́в одушевле́нный,/ Небе́сный челове́к, мо́ре милосе́рдия,/ гре́шных прибе́жище./ Моли́, о́тче, душа́м на́шим// дарова́ти ве́лию ми́лость.

Слава, глас 6:
Преподо́бных добро́ту,/ по́стников сла́ву,/ исто́чник чуде́с,/ ко Христу́ моле́бника неусы́пнаго,/ соше́дшеся, о пра́зднолю́бцы,/ ра́достным се́рдцем воспои́м, глаго́люще:/ ра́дуйся, трудя́щихся в мíре пра́вило/ и путево́ждь жития́ благоиску́снейший;/ ра́дуйся, звезда́ светле́йшая/ доброде́телей сия́ньми просвеща́ющая вся́;/ ра́дуйся, погружа́ющихся приста́нище, и предста́тельство,/ и оте́ц все́х си́рых./ Ты те́мже у́бо, о Порфи́рие,/ непреста́нно моли́ Христа́ Бо́га/ об огра́де твое́й то́й,/ и все́х на́с,// твое́ чту́щих честно́е успе́ние.

И ныне, глас тойже. Богородичен:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы// поми́ловати ду́ши на́ша.

Тропарь, глас 1:
Евбе́и прозябе́ние, вселе́нныя украше́ние,/ Богосло́вия таи́нника,/ и Христо́ва дру́га и́стиннаго, Порфи́рия, почти́м, ве́рнии,/ испо́лнена даро́в изде́тска,/ бесны́я бо свобожда́ет/ и неду́жныя исцеля́ет, ве́рою зову́ща:/ сла́ва Да́вшему тебе́ кре́пость,/ сла́ва Освяти́вшему тя,// сла́ва Де́йствующему тобо́ю всем исцеле́ния.

Слава и ныне, глас тойже:
Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка,/ в Тебе́, святе́м киво́те,/ я́коже рече́ пра́ведный Дави́д;/ яви́лася еси́ ши́ршая Небе́с,/ поноси́вши Зижди́теля Твоего́./ Сла́ва Все́льшемуся в Тя,/ сла́ва Проше́дшему из Тебе́,// слава Свободи́вшему нас Рождество́м Твои́м.

НА У́ТРЕНЕ

По 1-м стихосло́вии седа́лен, глас 1:
Подобен: Гроб Твой, Спа́се.
Дарова́ния прии́м на Афо́не, о́тче,/ я́ко звезда́ све́тлая показа́лся еси́ мíру,/ просвеща́я словесы́ твои́ми и воображе́нием твои́м,/ чудесми́ же Це́рковь прославля́я и та́йны открыва́я челове́ком,/ те́мже тя сла́вим.

Слава и ныне, Богоро́дичен тойже:
Де́во, та́инственный кри́н ра́йский,/ А́нгелов ра́дость, дарова́ний сокро́вище,/ Христу́ при́сно моли́ся прегреше́ний оставле́ние пода́ти, Всечи́стая,/ чту́щим досто́йно и почита́ющим сла́вного Порфи́рия,/ Христа́ возлю́бльшаго.

По 2-м стихосло́вии седа́лен, глас 5:
Подобен: Собезноча́льное Сло́во.
Мiрски́х преподо́бных удобре́ние,/ расточа́яй Афо́нскую ро́су в единомы́слие, му́дре,/ служи́л еси́ смире́нно боля́щим, преподо́бне./ Чудеса́ же соверша́я, показа́лся еси́ цели́тель безукори́зненный неду́гов./ Равноа́нгелен в мíре был еси́, о́тче, рачи́тель Христо́в.

Слава и ныне, Богоро́дичен тойже:
Всечи́стая Де́во, Ма́ти Бо́га на́шего,/ от злых и боле́зней разреше́ние души́/ в стра́сти прося́й/ Порфи́рия моли́твами пода́ждь, Влады́чице./ Моли́ся же Сы́ну Твоему́/ покланя́ющихся Тебе́ ве́рно покры́ти от вся́ких бед/ и да́ти Твои́ми моли́твами/ Твои́м рабо́м получи́ти, Де́во, Рая́ кра́снаго.

По полиле́и седа́лен, глас 4:
Подобен: Яви́лся еси́ днесь.

По́стников, Порфи́рие, всех соверше́нство в мíре яви́лся еси́,/ живо́т равноа́нгельный живы́й,/ те́мже пое́м, всечу́дне,/ любо́вь твою́ и кра́йнее смире́ние.

Слава и ныне, Богоро́дичен тойже:
Моли́твами, Го́споди,/ Чи́стой Твоея́ Матери и раба́ Твоего́ Порфи́рия смире́ннаго,/ пода́ждь все́м наслажде́ние Небе́снаго, Христе́, Ца́рствия Твоего́.
Степе́нна, 1-й антифо́н 4-го гла́са: От ю́ности моея́.
Проки́мен, глас 4: Честна́ пред Го́сподем// смерть преподо́бных Его́.
Стих: Что возда́м Го́сподеви о всех, я́же воздаде́ ми?
Вся́кое дыха́ние.
Ева́нгелие от Матфе́я, зача́ло 43.

По 50-м псалме стихира, глас 6:
На земли́ отве́ргнувся кра́снаго,/ Небе́сная, Порфи́рие, прия́л еси́/ от Христа́ Бо́га,/ я́ко дар честны́й боле́зней твои́х,/ я́ко чи́стая се́рдцем и смире́нием мно́гим, му́дре,/ жи́тельствовал еси́ вои́стину,/ и подража́тель святы́м был еси́./ Кро́тостию же твое́ю мно́гих/ напра́вил еси́ ко Христу́,/ в Не́мже и ты, я́ко со́лнце возсия́л еси́/ к сла́ве Бо́жией,// тя све́тло просла́вившаго.

Канон, глас 4
Творе́ние Ева́нгелово, его́же краегране́сие:
Порфи́рия, воспою́ похвалу́ преподо́бных.

Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́, ра́дуяся, Тоя́ чудеса́.
Уте́шителю, да́руй прему́дрости сло́во и благода́ти/ воспе́ти Порфи́рия, Евбе́и прозябе́ние,/ подвиза́вшася в Кавсокаливи́и/ и благода́ть прие́мша прозре́ния.
Преподо́бно пожи́л еси́ в пусты́ни Афо́нстей,/ повину́яся ста́рцем с ра́достию и почита́яй,/ смире́ние прии́м в се́рдце,/ и благода́тью Ду́ха испо́лнен и осене́н.
Ши́пок благово́ннейший яви́лся еси́ вои́стинну/ благода́ти разсе́ящъ арома́ты небе́сныя ве́рным,/ кро́стость и беззло́бство,/ любы́, смире́ние, с простото́ю.
Богородичен: Уясня́вши вся́ческая, Де́во Ма́ти, Рожде́нием Твоим/ тлю потребля́ющи грехи, Чи́стая,/ и подаю́щая ра́дость Небе́сную,/ те́мже, ра́дующеся вси пое́м Тя.

Песнь 3
Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ ли́к себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.
Был еси́ храм Уте́шителя и свиде́тель благода́ти Его́,/ неду́ги исцеля́я, предглаго́ля бу́дущая, изгоняя же и де́монов/ твои́ми моли́твами, преподо́бнейше.
Струя́ми слез твои́х, треблаже́нне,/ во всено́щных твои́х моли́твах/ князе́й согреше́ния отмы́л еси́, всепреподо́бне,/ тишину́ дарова́в многострада́льным лю́дем на́шим.
И́овово показа́л еси́, блаже́нне, в труде́х твои́х терпе́ние неду́гов разли́чных твои́х,/ и́ны же исцеля́я, николи́же иска́л еси́ неду́гов свои́х исцеле́ние.
Богородичен: Всех Спас и Засту́пник,/ сме́ртную плоть прие́м от чи́стых крове́й Твоих,/ мiр изба́ви,/ Цари́цу Небе́сную испове́дуя Тя, Пречи́стая.

Седа́лен, глас 4:
Подобен: Вознесы́йся на Крест во́лею.
Пусты́ни страда́лец верх,/ мiрски́х преподо́бных наста́вник,/ и иере́ев о́браз ве́рный,/ и путево́ждь яви́лся еси, свяще́ннейший,/ и равноа́нгелен вои́стинну,/ исцеле́ний струя́ же, дарова́ний сокро́вище./ И ны́не предстои́ши Христу́ на Небесе́х,/ моля́ся, о́тче,/ о душа́х на́ших.

Слава и ныне, Богоро́дичен, глас тойже:
К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны́ милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи́,/ Тя́ бо и еди́ну наде́жду и́мамы.

Песнь 4
Ирмо́с: Седя́й в сла́ве/ на Престо́ле Божества́,/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:// сла́ва, Христе́, си́ле Твое́й.
Неду́гов врачбы́ тмори́чныя, преподо́бне,/ в Малака́се, иде́же оби́тель твоя́,/ успева́ющи пропове́дуют велегла́сно Боже́ственный дар,/ и́же прия́л еси́ смире́нием украша́емь.
Безстра́стия яви́лся еси́ дом, и чистоты́ сокро́вище,/ те́мже иску́сство Богосло́вию водвори́в,/ открове́ния Боже́ственныя искуше́нием прия́л еси́,/ возвыша́яйся к Небесным, преподо́бне.
Честну́ю главу́ твою́ Свет покрыва́ше Нетва́рный,/ па́че све́та со́лнечнаго сия́ние подая́й тебе́, блаже́нне,/ и Богосло́ва творя́й тя Богоноуче́нна,/ и дая́й тебе́ прозре́ние и предви́дение.
Богородичен: Я́ко исто́чник благода́ти Боже́ственной,/ и я́ко руно́ Богоро́сное,/ Бо́жией ма́нны сосу́д,/ Небе́снаго мv́ра алава́стр,/ и я́ко ми́лости исто́чник, Тя сла́вим,/ Неискусобра́чная, Ма́ти Де́во, Богоневе́сто.

Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты́ бо, Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ все́м, воспева́ющим Тя́,// ми́р подава́ющая.
От бед изба́ви нас, и от неду́гов исцели́, преподо́бне Порфи́рие,/ и пода́ждь благослове́ние твое́ Боже́ственное,/ е́же освяти́ти ны и всех обрести́ на Небесе́х прегреше́ний оставле́ние/ и Ра́йское наслажде́ние.
Све́тлаго ко́рене отрасль, Евбе́и прозябе́ние, преподо́бне,/ цвет благора́сленный яви́лся еси́,/ и Спа́су возложи́вся от де́тства, красота́ яви́лся еси́ преподо́бных,/ ста́рец похвале́ние, и А́нгелов собесе́дник.
Диви́шася А́нгели ви́дяще тя, всечу́дне,/ по среда́м Небе́сным обоходя́ще,/ еще́ нося́щаго хра́мину пло́ти, виде́ния зря́щаго стра́нныя, неизрече́нныя слы́шащаго,/ лю́дем непости́жныя.
Богородичен: Сло́во, Всенепоро́чная, челове́к посети́,/ пло́ть прие́м от Твои́х крове́й,/ и разруши́в сме́рти истле́ние,/ живо́т дарова́ нам/ и Боже́ственнаго Ца́рствия насле́дники показа́.

Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,// от Нея́ ро́ждшагося Бо́га сла́вим.
Спа́са всех возлюби́л еси́ все́ю твое́ю душе́ю, свяще́ннейший,/ и послужи́л еси́ Ему́ си́лою благода́ти/ в смире́нии, о́тче, и в простоте́.
Ви́дя неизрече́нная, преподо́бне,/ дарова́нием прозорли́вым и предви́денным по́льзу творя́щая предглаго́лал еси́,/ и приступа́ющих вся́ во Христе́ утвержда́л еси́.
Спасти́ всех моли́ Спа́са Христа́ и Бо́га на́шего лю́бящих тя,/ и оби́тель твою́ спаси́ от сете́й, о́тче, ратобо́рца.
Богородичен: Се, раби́ Твои́, Владычице,/ в ско́бех и труде́х воздыха́юще Тебе́ мо́лимся:/ Порфи́рия моле́ньми, Чи́стая, от злых и боле́зней пода́ждь избавле́ние.

Кондак, глас 8:
Уте́шителя храм святе́йший,/ и Пречи́стыя Богоро́дицы возлю́бленнейшаго,/ воспои́м Порфи́рия от се́рдца./ Лю́бит бо и исцеля́ет вся,/ и храни́т, и мо́лится, я́ко да пости́гнем обоже́ние, те́мже вопие́м:// ра́дуйся, о́тче Порфи́рие.

Икос
А́нгел любви́ Божие́й к лю́дем, Порфи́рие блаже́нне, яви́лся еси́, возста́вивый мона́хов добро́ту, и иере́ев честно́е украше́ние, мíру послужи́л еси́, зову́щу тебе такова́я: ра́дуйся, оте́ц си́рых и стра́нных; ра́дуйся, звезда́ и́стинных па́стырей; ра́дуйся земны́х святы́х украше́ние; ра́дуйся преподо́бных всех красота́; ра́дуйся, цве́те благово́ннейший Рая́ та́инственнаго; ра́дуйся, све́те свяще́ннейший Не́ба духо́внаго; ра́дуйся, я́ко еси́ цели́тель неду́гов; ра́ду йся, я́ко яви́лся еси́ рачи́тель догма́тов; ра́дуйся, Бо́жиих та́ин таи́нник; ра́дуйся, и́мже укрепля́ется ве́ра; ра́дуйся, све́тлый Це́ркви свети́льниче; ра́луйся, ра́досте та́йн Небе́сная; ра́дуйся, о́тче Порфи́рие.

Песнь 7
Ирмо́с: Не послужи́ша тва́ри Богому́дрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бо́г, благослове́н еси́.
Кто боре́ния и побе́дная твоя́ чу́дная воспое́т!/ Вве́ргл еси́ пло́ти пост и поще́ние кра́йнее, всепреподо́бне,/ и но́щь и день серде́чно пита́л еси́ моли́тву Госпо́дню, о́тче.
Неду́гов, преподо́бне, неизце́льных врач и страсе́й душе́вных яви́лся еси́,/ от Бо́га подая́ чудесы своя́ дале́че сый благослове́нии твои́ми,/ прозре́ние име́я для разсужде́ния соверше́нна.
Жела́нием Христа́ уязви́ся се́рдце твое́ Ду́ха Благода́тию,/ те́мже прише́л еси́, му́дре, в пусты́ню Афо́нскую,/ да соедини́шися с Ним, моля́ся де́нно и но́щно, треблаже́нне,/ и живы́й в смире́нии.
Богородичен: Вы́шняго Бо́га прия́ла еси́ во утро́бе Твое́й Сло́ва Пречи́стая Де́во,/ без тле́ния Ро́ждшая в челове́честве./ Те́мже, Влады́чица, досто́йно ублажа́ем Тя и вси кла́няемся.

Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю́ воздвиза́ет пе́ти Тебе́:/ Го́спода по́йте дела́// и превозноси́те Его́ во вся́ ве́ки.
Вы́шнее души́ о́ко име́я, гряду́щее Царствие ожида́я,/ и вся земна́я я́ко уме́ты вменя́я,/ ко Спа́су тща́лся еси́, подвиза́яся получи́ти Его́ Боже́ственной любви́/ и бы́ти снеде́н любо́вию Его́, о́тче.
Cта́рцев ста́рец показа́лся еси́/ ты́сящ духо́вный оте́ц и сове́тник,/ селе́ние Ду́ха и сокро́вище благода́ти,/ исто́чник чуде́с, преподо́бне, излива́яй исцеле́ния,/ та́йны пока́зовал еси́ лю́дем, и прозре́нием удивл́ял еси́ всех.
Во мрак Бо́жий вше́л еси́/ поще́нием и смире́нием очи́стився, му́дре,/ сия́ние прие́мля,/ и просвеща́емь;/ и лю́дем неизрече́нныя и чу́ждая зря,/ Боже́ственным измене́нием пожи́л еси́./ Те́мже тя, блаже́нне, дивя́щеся воспева́ем.
Богородичен: Возвесели́ла еси́ мiр, Богоро́дице,/ мv́ром де́вства Твоего́ ума́стивши,/ и Ши́пок ро́ждши благово́нный, Го́спода,/ вселе́нную всю облагоуха́ла еси́./ Те́мже Тя, ра́дующеся, Отрокови́це, вси воспева́ем,/ прося́ще Твоя́ моли́твы.

Песнь 9
Ирмо́с: Вся́к земноро́дный/ да взыгра́ется, Ду́хом просвеща́ем,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.
Возсия́в я́ко звезда́, просвети́л еси́ вся свя́тостию,/ и чудесми́ свои́ми Це́рковь вои́стинну просла́вил еси́./ И оби́тель твою́, преподо́бне, я́сно воздви́гл еси́,/ я́ко но́вую Силоа́мову благода́ти купе́ль,/ неду́ги исцеля́яй.
Оа́зис кра́сный и вертогра́д благода́ти бесе́да твоя́,/ веселя́щая ве́рных и к оби́телем Боже́ственным воздвиза́ющая,/ боя́зней скорбь потребля́ющая,/ подаю́щая дерзнове́ние и исполне́ние к подвиго́м и побе́дем, Порфи́рие.
Пе́сньми свяще́нными, Порфи́рие, похва́лим преподо́бную па́мять твою́,/ да́руй, мо́лим, мир всем и покая́ние, и ра́йскаго прича́стия/ моли́твами святы́ми твои́ми ко Спа́су,/ и пода́ждь, преподо́бне, благослове́ние, пото́к Боже́ственной благода́ти.
Богородичен: Пе́сни Тебе́, Чи́стая, Де́во Богоневе́сто, вси прино́сим,/ я́ко удосто́ила еси́ чествова́ти па́мять Бо́жьего раба́ Сы́на Твоего́, Всенепоро́чная,/ и́же сра́дуется А́нгелом и песнь неконча́емую возсыла́ет ко Христу́ Бо́гу на́шему.

Седа́лен:
Подобен: Жены́, услы́шите.
Возлюби́л еси́ смире́ние и подвиза́лся еси́ послуша́нием,/ те́мже испо́лнился еси́ даро́в Ду́ха, блаже́нне,/ мно́гих чуде́с же исто́чник был еси́ исцеле́ний не́мощным, преподо́бне,/ твою́ по́мощь взыска́ющим./ Те́мже, воспева́ем тя, о́тче.

Богородичен:
Де́во, Ма́ти Христа́,/ поми́луй чту́щих Тя моли́твами Порфи́рия раба́ ве́рнаго Госпо́дня./ Язы́к наш сохрани́ от бед и зол,/ покая́ние подаю́ща и мир во всем,/ мо́лим Тя, Де́во.

НА ХВАЛИТЕХ СТИХИРЫ, ГЛАС 8:
Подобен: О, пресла́внаго чудесе́.
О, пресла́внаго чудесе́!/ О́трок на Афо́не сый,/ Велиа́рово шата́ние/ му́жески низложи́л еси́/ и венцы́ восприя́л еси́./ О́трок сый,/ ста́рцев ра́зум показа́л еси́,/ А́нгелов житию́, о́тче, подража́я./ Те́мже дарова́ния,/ я́ко порфи́ру прия́л еси́ духо́вную,/ преподо́бне Порфи́рие,// Боголюбе́знейше.

О, пресла́внаго чудесе́!/ Челове́ком та́йная/ прозре́нием изоблича́л еси́,/ и прозорли́вец был еси́/ гряду́щих, всепреподо́бне./ Чудотворе́ний мно́жеством/ удивля́л еси́,/ и пре́лесть де́монскую разреша́л еси́,/ неду́ги же исцеля́я,/ боля́щим был еси́ прибе́жище,/ преклоне́нным утвержде́ние,// досточу́дне.

О, пресла́внаго чудесе́!/ Ка́ко сы́на гро́мова/ на высоту́ возше́л еси́,/ и открове́ния того́ дости́гл еси́?/ Херуви́мския/ вкуси́л еси́ прему́дрости,/ cвященноде́йствуя смире́нию,/ Боже́ственныя прия́л еси́ ты/ посеще́ния, преподо́бне,/ светови́дно сия́я на сме́ртном одре́ твое́м,// преблаже́нне.

О, пресла́внаго чудесе́!/ Та́ин Христо́вых/ пресла́вно причасти́лся еси́ ты,/ а́ще и обрета́яся/ от хра́ма дале́че, преподо́бне,/ рука́ми А́нгелов вои́стинну прии́м в себе́/ Боже́ственный у́гль, свяще́ннейший./ Те́мже удиви́шася/ су́щие тогда́ с тобо́ю та́инству,/ Боже́ственному обще́нию твоему́,// Бо́га сла́вяще.

Слава, глас 5:
Преподо́бне о́тче,/ Боже́ственное зва́ние прии́м,/ твое́ житие́ в по́двизех и пла́чех соверши́л еси́,/ взира́я на оте́чествие го́рнее./ И смире́нием мно́гим вознесы́йся,/ дарова́ний вкуси́л еси́ мно́жество,/ стра́сти и неду́ги исцеля́я,/ проро́ческия открове́ния прия́л еси́,/ и прозре́нием та́йны показу́я я́сно,/ всех удивля́л еси́./ Но, о Порфи́рие, преподо́бных похвало́,/ и святы́х сожи́телю,/ с ни́ми Христу помоли́ся// поми́ловати ду́ши на́ша.

И ныне, глас тойже. Богородичен:
Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу// и прибе́жище душ на́ших.

На литургии
Блаже́нны от кано́на свята́го, пе́сни 3-я и 6-я.
Проки́мен, глас 7: Честна́ пред Го́сподем сме́рть преподо́бных Его́. Стих: Что возда́м Го́сподеви о всех, я́же воздаде́ ми?
Апо́стол к Евре́ем, зача́ло 335 («Бра́тие, повину́йтеся наста́вником ва́шим…»).
Аллилу́ия, глас 6: Блаже́н муж, бояйся Го́спода, в за́поведех Его́ восхо́щет зело́. Стих: Пра́вда его́ пребыва́ет во век ве́ка: ро́г его́ вознесе́тся в сла́ве.
Ева́нгелие от Луки́, зача́ло 24.
Прича́стен: В па́мять ве́чную бу́дет пра́ведник.

Скачать службу: yadi.sk/i/u0mwaebQ71u2yA (pdf)
yadi.sk/i/vzFw6N0mhYK09w (docx)

19 февраля 2020 в 19:23

Спаси Господи за участие. Может у Вас ещё что-то есть?

20 февраля 2020 в 07:45

Мария Сергеевна, сейчас заканчиваю переводить акафист преподобному Порфирию.
Ещё есть греческий канон преподобному Серафиму Саровскому переведённый на церковно-славянский (службу планирую доперевести) и есть служба преподобному Стилиану Пафлогонскому, но она составная, то есть она состоит из часте...

Развернуть

20 февраля 2020 в 08:16

Господь есть Свет! Суд же состоит в том, что Свет пришел в мир; но люди более возлюбили тьму, нежели Свет, потому что дела их были злы; ибо всякий, делающий злое, ненавидит Свет и не идет к Свету, чтобы не обличились дела его, потому что они злы, а поступающий по правде идет к Свету, дабы явны бы...

Развернуть

18 октября 2020 в 14:13
Георгий# 20 февраля 2020 в 07:45

Мария Сергеевна, сейчас заканчиваю переводить акафист преподобному Порфирию.
Ещё есть греческий канон преподобному Серафиму Саровскому переведённый на церковно-славянский (службу планирую доперевести) и есть служба преподобному Стилиану Пафлогонскому, но она составная, то есть она состоит из часте...

Развернуть

Георгий, прп. Стилиану есть служба хорошая. по-моему я её здесь выкладывала. тоже перевод с греческогою. Косьме Этолийскому у нас только тропарь, и кажется не один. А вот службу было б очень инетресно. И Нилу Мироточивому тоже.

в ответ на комментарий

Комментарий появится на сайте после подтверждения вашей электронной почты.

С правилами ознакомлен

Защита от спама: