Редкие Богослужебные тексты

Служба прпп. Варсонуфию и Иоанну,
совершаемая февруариа 6-го.
Творения Герасима, монаха микраяннанита
(малого скита св. Анны) .

На ма́лей вече́рни

На Го́споди воззва́х ста́вим стихо́в 6 и пое́м стихи́ры, глас 1.
Подо́бен: Небе́сных чино́в:

Ди́вное сопряже́ние по́стников Христо́вых, зве́зды всесве́тлыя преподо́бных доброде́телей, вели́каго Варсону́фия в пе́снех свяще́нных восхва́лим со Иоа́нном, благода́ть от него́ проро́ческую прия́вшим Ду́хом Боже́ственным.
Светоза́рнейший све́щник боже́ственнаго по́двига, с Небесе́ стяжа́вый благода́ть бога́тную, ве́лий Варсону́фий мона́шеския ли́ки увеща́ет лу́чшим ревнова́ти сло́вом су́щественным: прииди́те у́бо вси притеце́м к нему.
Паракли́та прия́телище чисте́йшее, проро́чески ви́дящее и я́сно провещавающее всем нам хотя́щая бы́ти, своею мудростию Иоа́нн преподо́бный к жи́зни наставля́ет Небе́сней.
Яко а́нгельскаго подо́бник жития́ све́тлостию, о́браз и столп и подо́бие Бо́жие вои́стинну, всеблаже́нне Варсону́фие, Иоа́нна преподо́бнаго, яко ученика́ боже́ственнаго, име́л еси: те́мже вас согла́сно ублажа́ем.

Слава, глас 4.
По́стническими боре́нии в му́дрости всю веще́ственную тяготу́ отри́нувше, невеще́ственныя благода́ти вмести́лища бы́сте, преподо́бнии отцы́, па́че естества́ бо пожи́сте, и пачеесте́ственно просла́вистеся неоску́дным дая́нием Уте́шителя: оба́че, о Варсону=фие и Иоа́нне, А́нгелом равноче́стнии и преподо́бных нача́тки, с ни́ми моли́те о душа́х на́ших.

И ны́не, Богоро́дичен:
Днесь Свяще́нная Ма́ти, и святи́лища вы́шши, во святи́лище прии́де, я́вльшая ми́ру Законода́вца, и зако́на Творца́, Его́же на ру́це прие́м ста́рец Симео̂н, ра́дуяся, взыва́ше: ны́́не отпуща́еши раба́ Твоего́, яко ви́дех Тя, Спа́са душ на́ших.

На стиховне, глас 2.
Подо́бен: Доме Евфрафов:

Ра́дуйся, по́стников дво́ице свята́я, со Варсону́фием боже́ственный Иоа́нне, Тро́ицы служи́телие.

Стих: Восхва́лятся преподо́бнии во сла́ве и возра́дуются на ло́жах свои́х.
Уста́ вои́стинну Бо́жии проро́чески яви́лся еси, неоску́дно источа́я уче́ние боже́ственное, всеблаже́нне Варсону́фие.

Стих: Воспо́йте Го́сподеви песнь но́ву, хвале́ние Его в Це́ркви преподо́бных.
Таи́нник богови́дный Варсону́фия яви́лся еси, богому́дре Иоа́нне, и мона́шествующих о́браз де́лом и сло́вом, преподо́бне.

Сла́ва, Тро́ичен:
Осия́ние от Тебе́, Трисо́лнечное Божество́, дво́ица преподо́бных све́тло восприя́вши, яко свети́льник ми́ру показа=ся.

И ны́не, Богоро́дичен:
Еди́на Бо́га неизрече́нно ро́ждшая, Чи́стая Дево Ма́ти, Ада́ма кля́тву разруши́ла еси рождество́м Твои́м.

Ны́не отпуща́еши, Трисвято́е.
Тропа́рь, глас 5.

Отпу́ст.

На вели́цей вече́рни

Благослови́вшу иере́ю, входно́е и Блаже́н муж.
На Го́споди воззва́х ста́вим стихо́в 6 и пое́м стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́ увязе́м богоно́сную двоицу, еди́ным мудрова́нием просия́вшую в равноа́нгельнем жи́тельстве, вели́каго Варсонуфия богоглаго́ливаго, с ни́мже и Иоа́нна богоприя́тнаго? Во пло́ти безпло́тнии и бога́тством боже́ственных дарова́ний препросла́вленнии, всем просят у Христа́ ве́лию ми́лость.

Ки́ими благостру=йными пе́ньми возсла́вим богоно́сныя: Варсонуфия богови́днаго и Иоа́нна преподо́бнаго? Ти=и бо Паракли́та свещено́сцы суть, о́в яко во уче́ниих исто́чник богото́чный, о́в же во проро́честве уста́ богодохнове́нная, жития́ свята́го о́трасли цвету́щия, плодонося́щия доброде́телей боже́ственных гро=здия на весе́лие душа́м на́шим.

Ки́ими сладкозву́чными гла=сы восхва́лим богоно́сныя? Наставля́ют бо ны словесы́ богому́дрыми и де́лы ко преспе́янию спаси́тельному, яко пло́ти и ми́ра кроме́ жи́тельствоваша и боже́ственнаго осия́ния от Исто́чника Трисве́тлаго испо́лнишася, со Варсонуфием и Иоа́нна чу́днаго почтим, боже́ственных служи́телей Спа́са душ на́ших.

Стихи́ры и́ны, глас 6.
Подо́бен: Все отло́жше:
Весь богодохнове́н и богоно́сен яви́лся еси, о́тче Варсонуфие, себе́ сама́го Творцу́ возложи́в и мно́гих боже́ственных дарова́ний прича́стник быв, плотско́е мудрова́ние умертви́вил еси, яко а́нгел в ми́ре пожи́в, блаже́нне: отону́ду мона́шествующих собо́ри тя, наста́вника богому́драго жития́ вы́шшаго стяжа́вше и о́браз непреле́стный, по до́лгу пра́зднуют святу́ю па́мять твою́.
Сосу́ди драгоце́ннии боже́ственнаго разуме́ния и язы́цы богому́дрии боже́ственных снисхождений показа́стеся, по́стником утвержде́ние, мона́шествующим свети́льницы, смиренному́дрия сокро́вища и разсужде́ния свети́ла неле́стная и незаходи́мая, всеблаже́нне Варсонуфие со Иоа́нном блаже́нным: те́мже чту́щия ваш светоно́сный пра́здник просвеще́ния испроите Свята́го Ду́ха.
И́менем свои́м изобрази́л еси благода́ть, е́юже обогати́лся еси, жития́ преподо́бием просвеща́ем, боже́ственных бо доброде́телей Варсонуфия преди=внаго подо́бник яви́лся еси богоприя́тный и таи́нник богодохнове́нный, с ним купножи́тельствовав, блаже́нне, с ни́мже и подвиза́лся еси, о́тче, по́двигом красне́йшим: и ны́не оба, в ра́дости наслажда́ющеся сла́вы несконча́емыя, нам испроси́те, мо́лимся, просвеще́ния Небе́снаго.

Сла́ва, глас 6.
Днесь яко двусве́тлии свети́льницы возсия́ша во святу́ю па́мять их Варсонуфий и Иоа́нн, богоно́снии отцы́: Трисо́лнечнаго бо Све́та доброде́тельнаго ра́ди жи́тельства заря́ми обогати́вшеся, та́инственно озаря́ют им вопию́щия: ра́дуйтеся, а́нгельски в ми́ре пожи́вшии и равноа́нгельныя че́сти и сла́вы све́тло сподо́бившиися; ра́дуйтеся, мона́шествующих наста́вницы ко мно́гому преспе́янию и путевожди́ спаси́тельнии, мно́го разсужде́ние иму=щии; ра́дуйтеся, жи́зни гряду́щия достоя́ние в нача́тке яви́вшии, ея́же ра́ди нас воздви́гните к ре́вности боже́ственней; отцы́ преподо́бнии, Пресвяте́й Тро́ице моли́теся поми́ловатися душа́м на́шим.

И ны́не, пра́здника:

Да отверзе́тся дверь небе́сная днесь: Безнача́льное бо Сло́во О́тчее, нача́ло прии́м под ле́ты, не отсту́пль Своего́ Божества́, от Де́вы яко Младе́нец четыредесятодне́вен, Ма́терию во́льне прино́сится в це́рковь зако́нную: и Сего́ на ру́ки прие́млет ста́рец, отпусти́, зовы́й, раба́, Влады́ко, яко ви́деста о́чи мои́ спасе́ние Твое́: прише́дый в мир спасти́ род челове́чь, Го́споди, Сла́ва Тебе́.

Вход. Све́те Ти́хий. Проки́мен дне. Чте́ния три.

Прему́дрости Соломо́новы чте́ние. (3:1)

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и еже от нас ше́ствие сокруше́ние: они же суть в ми́ре. Ибо пред лице́м челове́ческим аще и му́ку прии́мут, упова́ние их безсме́ртия испо́лнено: и вма́ле нака́зани бы́вше, вели́кими благоде́тельствовани бу́дут, яко Бог искуси́ их и обре́те их досто́йны себе́: яко зла́то в горни́ле искуси́ их, и яко всепло́дие же́ртвенное прия́т я. И во вре́мя посеще́ния их возсия́ют, и яко и́скры по сте́блию потеку́т: су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему, яко благода́ть и ми́лость в преподо́бных Его и посеще́ние во избра́нных Его.

Прему́дрости Соломо́новы чте́ние (7:7):
Пра́ведник, аще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ лет исчита́ется. Седи́на же есть му́дрость челове́ком, и во́зраст ста́рости – житие́ нескве́рное. Благоуго́ден Бо́гови быв, возлю́блен бысть, и живы́й посреде́ гре́шник, преста́влен бысть. Восхище́н бысть, да не зло́ба изме́нит ра́зума его или лесть прельсти́т ду́шу его. Раче́ние бо зло́бы помрача́ет до́брая и паре́ние по́хоти пременя́ет ум незло́бив. Сконча́вся вма́ле, испо́лни ле́та до́лга, уго́дна бо бе Го́сподеви душа́ его, сего́ ра́ди потща́ся от среды́ лука́вствия. Лю́дие же ви́девше, и не разуме́вше, ниже́ поло́жше в помышле́нии таково́е, яко благода́ть и ми́лость в преподо́бных Его и посеще́ние во избра́нных Его.
Прему́дрости Соломо́новы чте́ние (5:15):
Пра́ведницы во ве́ки живу́т, и в Го́споде мзда их, и попече́ние их у Вы́шняго. Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я и мы́шцею защити́т их. Прии́мет всеору́жие рве́ние свое́ и вооружи́т тварь в месть враго́м. Облече́тся в броня́ пра́вды и возложи́т шлем - суд нелицеме́рен. Прии́мет щит непобеди́мый – преподо́бие, поостри́т же напра́сный гнев во ору́жие, спобо́рет же с ним мир на безу́мныя. По́йдут праволу́чныя стре́лы мо́лниины и, яко от благокру́гла лу́ка облако́в, на наме́рение полетя́т. И, от каменоме́тныя я́рости испо́лнь, паду́т гра́ды. Вознегоду́ет на них вода́ морска́я, ре́ки же потопя́т я на́гло. Сопроти́в ста́нет им дух си́лы, и яко ви́хор разве́ет их, и опустоши́т всю зе́млю си́льных. Слы́шите убо, ца́рие, и разуме̂йте, навы́кните, судии́ конце́в земли́. Внуши́те, держа́щии мно́жества и гордя́щиися о наро́дех язы́к. яко дана́ есть от Го́спода держа́ва вам и си́ла от Вы́шняго.

На лити́и стихи́ры самогла́сны, глас 1.
Узы мирски́я отве́ргше, Христу́ присво́истеся по́стническим жи́тельством, отцы́́ преподо́бнии, и единому́дрени су́ще во всех, и ра́вных трудо́в ревни́телие и де́лателие, ра́вныя благода́́ти сподо́бистеся, равноче́стно просла́вившеся. Бога́тным бо обои́́м благода́́ть даде́ся достоя́нием боже́ственныя любве́: но о Варсонуфие богому́дре и Иоа́нне богонра́вне, в сою́зе любве́ и нас сохрани́те, прося́ще нам ве́лию ми́лость.
Глас 2.
От Еги́пта, яко звезда́ всесве́тлая, Варсонуфие о́тче, возше́л еси и в Палести́не просия́л еси чи́стым жи́тельством твои́м, всех озаря́я све́тлостию Сло́ва, и богому́дрыя удивляя́ неоску́дным в тебе́ боже́ственным дарова́нием: сокро́вище бо духо́вное стяжа́л еси, преподо́бне, и мона́хом му́дрый наста́вник явися, яко во всех де́телен: отону́ду обре́л еси Иоа́нна, жития́ твоего́ преподо́бнаго подо́бника и о́бщника благода́ти: с ни́мже всегда́ моли́ся о душа́х на́ших.
Глас 3.
Преподо́бных оте́ц богови́дное сопряже́ние, Варсонуфия, вели́каго ста́рца и Иоа́нна, ста́рца друга́го согла́сно почти́м: по́стническим бо житие́м а́нгели во пло́ти яви́шася, яко возвы́шени ду́хом и боготворя́щаго да́ра бога́тно сподо́бишася: ов бо сло́вом благода́ти апо́стольскую явля́ет власть, ов же прови́дческим зре́нием предзри́т гряду́щая, яко проро́к боже́ственный: и оба, чудотворя́ще о Христе́, мо́лятся о душа́х на́ших.
Глас 4.
Яко стра́ннии и прише́льцы в ми́ре показа́стеся, ева́нгельски себе́ саме́х отве́ргшеся, отцы́ преподо́бнии, и очище́нием соверше́нным и молча́нием и безмо́лвием, та́инственных зре́ний и неизрече́нных та́ин вои́стинну сподо́бистеся, во мрак бо невхо́дный вше́дше в Ду́се, Бо́гу сраствори́стеся, чудоде́йственне обожи́вшеся, и боже́ственныя сла́вы зна́мения всем яви́вше, свет во тьме яви́стеся и заблу́ждшим путевожди́ ко спасе́нию: но о Варсонуфие и Иоа́нне, неприкрове́нно зря́ще, и́хже о́бразы пре́жде стяжа́сте, моли́теся и нам улучи́ти блаже́нства Бо́жия.
Сла́ва, глас то́йже:
А́нгельски пожи́вше, по́стническаго жи́тельства провозве́стницы и яви́телие показа́стеся, отцы́ богоно́снии: яко бо де́лавше до́бре, му́дро у́чите, спаси́тельная иму́ще во и́стиннем разсужде́нии и во све́те благода́ти, Варсонуфие преподо́бне со Иоа́нном, прося́щии всем просвеще́ния и прегреше́ний оставле́ния.
И ны́не. Пра́здника.
Зижди́тель небесе́ и земли́ на рука́х ноша́шеся, святы́м Симео́ном ста́рцем днесь: той бо Ду́хом Святы́м глаго́лаше: ны́не свободи́хся, ви́дех бо Спа́са моего́.

На стихо́вне стихи́ры, глас 5. Ра́дуйся, по́стников.

Ра́дуйся, преподо́бных дво́ице, доброде́телей чи́стое вмести́лище, зве́зды световодя́щия, безстра́стия свяще́ние и жития́ боже́ственнаго све́тлости, му́дре Варсонуфие, по́стников нача́ток, и Иоа́нне, проро́чества испо́лнь Боже́ственнаго Ду́ха, гу́сли благозву́чныя, свети́льницы разсужде́ния, прему́дрости сокро́вища, по́стническаго жи́тельства богоно́снии учи́телие, Христа́ моли́те дарова́ти душа́м на́шим ве́лию ми́лость.

Восхва́лятся преподо́бнии во сла́ве и возра́дуются на ло́жах свои́х.
Ра́дуйтеся, преподо́бных дво́ице, А́нгелом подража́телие и единонра́внии, в ми́ре пожи́вшии душе́ю богоприя́тною, в созву́чии боже́ственных восхожде́ний, в по́стничестве ра́внии и житие́м равностоя́телие, небе́сных озаре́ний испо́лнении, яко очи́стивше ду́шу и помышле́ние, преподо́бне Варсонуфие, Христо́в дру́же и́скренний, и Иоа́нне богому́дрый, таи́нниче благода́ти святы́й, всегда́ моли́те душа́м на́шим дарова́ти ве́лию ми́лость.

Стих: Воспо́йте Го́сподеви пе́снь но́ву, хвале́ние Его в це́ркви преподо́бных.
Ра́дуйся, преподо́бнии отцы, наста́вницы мона́хов де́тельнейшии, всем му́дре жития́ подвижническаго о́браз изъясни́вшии, нрав боже́ственный и преспе́яние вся́кое, и́мже душа́ восхо́дит на лу́чшая, и пре́лести явле́ние отвраща́ется; преподо́бне Варсонуфие, отце́в украше́ние, и Иоа́нне всеблаже́нне, мона́хов пра́вило, Христа́ моли́те дарова́ти душа́м на́шим ве́лию ми́лость.

Сла́ва, Глас 8.
Кто досто́йно воспое́т в по́стничестве жи́тельство и бога́тство дарова́ний ва́ших, Варсонуфие и Иоа́нне блаже́ннии, яко бо А́нгели на земли́ с пло́тию яви́стеся, умертви́вше яже суть веще́ственная со страстьми́ и похотьми́, и животворя́щим де́йствованием возде́лавше цве́ты, благоуха́ние источа́ете нетле́ния душа́м на́шим; и ны́не со А́нгелы спребыва́юще, моли́те дарова́ти нам ве́лию ми́лость.
И ны́не. Пра́здника:
Иже на Херуви́мех носи́мый и пева́емый от Серафи́м, днесь в Боже́ственное святи́лище по зако́ну приноси́м, на ста́рческих яко на престо́ле седи́т рука́х и от Ио́сифа прие́млет да́ры боголе́пно, яко супру́г го́рличищ, нескве́рную Це́рковь и от язы́к новоизбра́нныя лю́ди, голуби́на же два птенца́, яко Нача́льник Ве́тхаго же и Но́ваго. Еже к Нему́ обеща́ния Симео́н коне́ц прие́м, благословя́ Де́ву Мари́ю Богоро́дицу, страсте́й о́бразы иже из Нея́ провозгласи́ и от Него́ проша́ше отпуще́ния, вопия́: ны́́не отпусти́ мя, Влады́ко, я́коже пре́жде возвести́ ми, яко ви́дех Тя, Первове́чнаго Све́та и Спа́са Го́спода христоимени́тым лю́дем.

Ны́не отпуща́еши, Трисвято́е.
Тропа́рь, глас 5. Собезнача́льное Сло́во.

Равноа́нгельное житие́ пожи́вше, Варсонуфие о́тче со Иоа́нном вку́пе, по́стничества зве́зды све́тлыя яви́стеся и мона́хом путевожди́ на лу́чшую стезю́, яко Све́та Боже́ственнаго испо́лненнии, молите непреста́нно спасти́ся душа́м на́шим.

Сла́ва, и ны́не: Пра́здника, глас 1.
Ра́дуйся, Благода́тная Богоро́дице Де́во, из Нея́же возсия́ Со́лнце Пра́вды Христо́с Бог наш, просвеща́яй су́щия во тьме: весели́ся и ты, ста́рче пра́ведный, прие́мый во объя́тия Свободи́теля душ на́ших, да́рующаго нам воскресе́ние.
Отпуст.

На у́трени
По 1 стихосло́вии седа́лен, глас 1.

Подо́бен: Гроб Твой, Спа́се:

Яко две у́мныя зве́зды небосве́тлыя возсиява́ете нам та́инственная светозаре́ния, богому́дре Варсонуфие и Иоа́нне преподо́бне, и облиста́ете Трисо́лнечнаго Свети́ла Свет Незаходи́мый све́тлую ва́шу па́мять ра́достно соверша́ющим.

Сла́ва и ны́не, Богоро́дичен:
Во объя́тиих Симео́них носи́тися изво́лил еси, Иже всех Творе́ц, во́лею младе́нствовав, и нося́й Тя ра́довашеся ста́рец и вопия́ше: ны́не отпуща́еши раба́ Твоего́, Ще́дре, яко ви́дех Тя, воплоти́вшагося непрело́жно в назда́ние ми́ра.

По 2 стихосло́вии седа́лен, глас 3.
Подо́бен: Боже́ственныя ве́ры:

Ве́лий яви́лся еси в по́двизе и сла́вный де́лом и сло́вом, Варсонуфие, отце́в украше́ние, и проро́чества прия́л еси дарова́ние, о Иоа́нне, помышле́ния очи́стив, но моли́те, отцы́ богоблаже́ннии, дарова́ти нам ве́лию ми́лость.

Сла́ва и ны́не, Богоро́дичен:

Ра́дуяся, во объя́тия прия́т, яко младе́нца, всех Зижди́теля, Симео́н яко жда́ше со стра́хом: и Анна богоглаго́ливая принесе́ испове́дание Тому́ и хвалу́: и́хже моли́твами, Ще́дре, низпосли́ нам то́ки ми́лости Твоея́, яко Благоутро́бен.

По полиеле́и седа́лен, глас 4.
Подо́бен: Вознесы́йся на крест:

Богоно́сных оте́ц сопряже́ние, Варсонуфий, служи́тель Христо́в, и Иоа́нн, тому́ единоду́шен, всем предлага́ют честны́я книги своея́ словеса́, яко сла́дость небе́сную и жи́зни боже́ственную ма́нну: да насы́тимся вси от нея, яко да страсте́й го́речь изве́ргнем.
Сла́ва, и ны́не, Богоро́дичен:
Иже в зако́не и проро́цех глаго́лавый зако́нным веле́нием во́льно подклоня́ется и ко хра́му прино́сится, яко младе́нец, Его́же Симео́н во объя́тиих объе́млет, и разреше́ние плотско́е от Него́ прия́т. О, покланя́ющеся ве́рно, рцем, сла́ва бла́гости Твое́й, Ще́дре.

Таже степе́нна, 1 антифо́н 4-го гла́са.
Проки́мен: Восхва́лятся преподо́бнии во сла́ве и возра́дуются на ло́жах свои́х.
Стих: Воспо́йте Го́сподеви песнь но́ву, хвала́ Его пребыва́ет во ве́ки.
Ева́нгелие преподо́бническое.
50 псало́м.
Сла́ва: Моли́твами преподо́бных:
И ны́не: Моли́твами Богоро́дицы:
Стихи́ра самогла́сна, глас 6.
Стих: Поми́луй мя, Бо́же:
Яже в ми́ре кра́сным умертви́вшеся, все́ю душе́ю Живода́вцу Сло́ву после́довасте, отцы́ всеблаже́ннии, и жи́зни яже в Нем блага́я сокро́виществовавше, ко прича́стию тем сердца́ на́ша обраща́ете, Ду́хом Святы́м провеща́юще уче́ний боже́ственныя глаго́лы: в ни́хже, мо́лимся, сердца́ на́ша утверди́те, Варсонуфие и Иоа́нне, яко да жи́зни ве́чныя улучи́м.

Та́же кано́ны пра́здника и преподо́бных.
Кано́н Сре́тения, его́же краегране́сие: Христа́ ра́достне ста́рец объе́млет. Творе́ние Космы́ мона́ха.
И преподо́бных, Его́же краегране́сие: Варсонуфию и Иоа́нну хвала́. Гера́сима.

Песнь 1.
Пра́здника: Ирмо́с: Су́шу глубороди́тельную:
Преподо́бных: Глас 8.

Ирмо́с: Колесницегони́теля фарао́на погрузи́, чудотворя́й иногда́ Моисе́йский жезл, крестообра́зно порази́в и раздели́в мо́ре: Исра́иля же беглеца́ пешехо́дца спасе́, песнь Бо́гови воспева́юща.

Моли́твами, Го́споди, Варсонуфия преподо́бнаго и Иоа́нна, чистым житием своим Тя просла́вльших, ум мой световоди́ и пода́ждь ми сло́во, Сло́ве Бо́жий Преблаги́й, воспе́ти их по́двиги.

Возложи́выйся всеце́ло, блаже́нне, на помощь Всеви́дца Бо́га и Неизреченною Того́ любо́вию уя́звлен, Ему после́довал еси несумне́нно по́стническими по́двиги, о́тче свяще́нне Варсонуфие.
Си́лою Боже́ственною держа́вно укрепля́ем, совле́клся еси тве́рдо, о́тче Иоа́нне, на по́двиги по́стническия и боре́ния, и те́ми потреби́л еси, смири́вый ся о Го́споде, о́ко врага́ вы́сящееся.
Богоро́дичен:
Вопло́щшагося от чи́стых крове́й Твои́х, пре́жде безпло́тнаго, Богонача́льное Сло́во О́тчее и сопресто́льное неизрече́нно родила́ еси, Богоро́дице Де́во, сугу́ба естество́м су́щаго, еди́ну же Ипоста́сь нося́щаго.

Песнь 3.
Пра́здника: Ирмо́с: Утверждение на Тя надеющихся:
Преподо́бных:
Ирмо́с: Утвержде́й в нача́ле небеса́ ра́зумом, и зе́млю на вода́х основа́вый, на ка́мени мя, Христе́, за́поведей Твои́х утверди́, яко несть свят паче Тебе́, Еди́не Человеколю́бче.
Невозвра́тным помыслом прему́дро Еги́пет, зе́млю, возрасти́вшую тя, оста́вив, Варсонуфие предивне, в Палести́ну прите́кл еси, к Го́рнему Сио́ну, преподо́бне.
Зако́ном Бо́жиим покоря́яся, вся́кое попече́ние о яже в ми́ре, Иоа́нне, отри́нул еси, и безмо́лвно Христу́ рабо́тати прише́д, от вся́каго соводворе́ния с челове́ки удали́лся еси.
Иже преподо́бных доброде́телей тайново́дцы и наста́вницы и му́дрии мона́хом путевожди́, да восхва́лятся вку́пе ве́лий Варсонуфий и Иоа́нн а́бие, тому таи́нник и совсельник.
Богоро́дичен:
Пачеесте́ственно Творца́ и Царя́ всех восприи́мшая и ро́ждшая, Де́во, кля́тву Ада́мову в коне́ц потреби́ла еси и благослове́ние всем и нетле́ние источи́ла еси.

Седа́лен, глас 4. Ско́ро предвари́:
Житие́м единосе́льницы, в согла́сии душе́внем, му́дре Варсонуфие и Иоа́нне сла́вне, всем о=бщницы бывше, яви́стеся мона́шествующим небосве́тлии столпи́, наставля́юще их на зе́млю кро́тких: сего́ ра́ди ва́шу па́мять све́тло пра́зднуем.
Сла́ва и ны́не, Богоро́дичен:
Ко хра́му принесе́ся от Де́вы Ма́тери яко Младе́нец Госпо́дь, Зако́н да́вый Моисе́ови, обновля́яй челове́ка, Его́же во объя́тиих Симео́н яко прия́т, ма́нию Того́ ра́дуяся, пло́тию разреши́ся и потече́ су́щим во аде разреше́ния провозве́стник.

Песнь 4.
Пра́здника: Ирмо́с: Покры небеса доброде́тель Твоя, Христе:
Преподо́бных:
Ирмо́с: Ты моя Кре́пость, Го́споди, Ты моя и Си́ла, Ты мой Бог, Ты мое Ра́дование, не оста́вль не́дра О́тча, и на́шу нищету́ посети́в: тем с проро́ком Авваку́мом зову́ Ти: си́ле Твое́й Сла́ва, Человеколю́бче.

Стра́хом Бо́жиим от младе́нства утвержда́ем, мудрому Марке́ллу, преподо́бне, в послушание вдался еси и покори́л пло́ти все удобострастие душевною чистотою: отону́ду Велиа́ра сокруши́л еси си́лу, блаженне Варсонуфие, ору́жием ве́ры.

Жития́ ме́ру душе́вною разумением Небесным сверши́л еси, Иоа́нне ста́рче, ра́вную вели́кому Варсонуфию свяще́нному. Те́мже други́й ста́рец му́дрый во всех яви́лся еси и наста́вник по Бо́зе, вдохнове́нием Боже́ственным провозвеща́я яве хотя́щая бы́ти.

О да́нныя вам благода́ти бога́тныя! Изве́ством жи́тельства, преподо́бнии, чудеса́ источа́ете ве́рным и исполня́ете всех спаси́тельная проше́ния, яко проро́цы Бо́жии, Варсонуфие о́тче и му́дре Иоа́нне блаже́нне.
Ми́ра всего удали́вся, Варсонуфие, испо́лнился еси боже́ственных просвеще́ний и озаря́еши верныя све́том уче́ний: темже мона́хов и свяще́нник собо́ры приходя́щих к тебе́, яко му́дрый наста́вник, направля́еши на стезю́ спаси́тельную.
Богоро́дичен:
Без се́мене, кроме́ истле́ния, па́че помышле́ния, оба́че Бо́жиим Ду́хом зачала́ еси О́́тчее Сло́во Соесте́ственное, от Твои́х крове́й плоть прия́вшее, и разреши́вшее тле́ние сме́ртное, и исто́чник нетле́ния пою́щим Тя, Отрокови́це, источи́вшее.
Песнь 5. Ирмо́с: Яко ви́де Иса́иа:
И Преподо́бных:
Ирмо́с: Вску́ю мя отри́нул еси от лица́ Твоего́, Све́те незаходи́мый, и покры́ла мя есть чужда́я тьма окая́ннаго? Но обрати́ мя, и к све́ту за́поведей Твои́х пути́ моя напра́ви, молю́ся.

Нра́вом тих и богови́ден в житии́ быв, сло́во спасе́ния и живота́ увеща́ния источа́л еси от уст твои́х, му́дростию тебе́ да́нною, Варсонуфие, о́тче блаже́нне.
Стопа́м преподо́бным Варсонуфия богому́драго после́дуя, тому́, Иоа́нне, подо́бник и единонра́вен яви́лся еси. Те́мже нестаре́емаго живота́ сподо́бившеся, зрите́ добро́ту неизрече́нную.
Яко служи́тели боже́ственныя и во пло́ти А́нгелы прия́т от Бо́га по́сланныя преподо́бный Сери́д и те́плым се́рдцем вам служа́ше во всех, богоно́снии, ра́зумом ва́шим наказу́ем.
Богоро́дичен:
Неискусому́жно ро́ждшая Зижди́теля всех и Го́спода, яви́лася еси превы́шшая А́нгел и всея́ тва́ри, Обра́дованная, еди́на Де́во Богоро́дице, и Ада́ма па́дшаго возвы́сившая.

Песнь 6. Ирмо́с: Возопи́ ти, ви́дя ста́рец:
Преподо́бных:
Ирмо́с: Очи́сти мя, Спа́се, мно́га бо беззако́ния моя, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.

Умертви́вше пло́ти тле́нныя мудрова́ние, плоды ве́чнаго живота, му́дре Варсонуфие со Иоа́нном, возрасти́сте оби́льно.
Вода́ми та́инственными испо́лнени су́ще, преподо́бнии, прозяба́ете оби́льно уче́ния богодохнове́нная, му́дре Варсонуфие со Иоа́нном, ду́ши на́ша напоя́ющая.
Сопряже́ние боже́ственное, мона́хом учи́тели, вели́кий в по́стницех Варсонуфий и Иоа́нн, ему купножи́тель, да просла́вятся в пе́снех.
Богоро́дичен:
А́нгелов Ра́дость и лю́дем Помо́щница Ты еси, Де́во Чи́стая, из Тебе бо Бо́г воплотися. Сего́ ра́ди мо́лим Тя. Помози́ прибега́ющим к покро́ву Твоему́.

Кондак пра́здника, глас 1.
Утро́бу Деви́чу освяти́вый Рождество́м Твои́м, и ру́це Симео́не благослови́вый, я́коже подоба́ше, предвари́в, и ны́не спасл еси нас, Христе́ Бо́же, но умири́ во бра́нех жи́тельство, и укрепи́ лю́ди, и́хже возлюби́л еси, Еди́не Человеколю́бче.

Кондак, глас 3.
Подо́бен: Де́ва днесь:
Дво́ица богодохнове́нная богоно́сных оте́ц доброде́телей благода́ть тайново́дствуют всем, вели́кий Варсонуфий, ста́рец сый, други́й же Иоа́нн преподо́бный. Тех восхва́лим согла́сно, яко Тро́ицы Боже́ственныя служи́телие.

И́кос:
От Еги́пта, му́дре Варсонуфие, я́коже со́лнце ве́лие возсия́л еси и све́тлыми лучами доброде́телей твои́х ди́вных светово́диши всегда́ мона́шествующих ли́ки; в Палести́не же житие́м по́стническим, в согла́сии боже́ственных восхожде́ний, А́нгел в телеси́ и пресла́вная гусль Вы́шния му́дрости яви́лся еси, и преподо́бнаго Иоа́нна обре́л еси, яко друга́го проро́ка, ди́вно просла́вльшагося проро́ческим да́ром Уте́шителевым. Те́мже вас вку́пе почита́ем, яко провеща́телей доброде́тельнаго жития́, и наказа́телей преподо́бных, и неле́стных нам путеводи́телей и наста́вников, и Тро́ицы Боже́ственныя служи́телей.

Синакса́рий.
6-го сего месяца память преподобнаго Варсонуфия Великаго старца и преподобнаго Иоа́нна, пророка именуемаго, ученика святаго Варсонуфия:
Ихже святыми молитвами, Христе Боже, помилуй и спаси нас. Аминь.

Песнь 7. Ирмо́с: Тебе́ во огни́ ороси́вшаго:
Преподо́бных:
Ирмо́с: Бо́жия снизхожде́ния огнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, яко во цве́тнице лику́юще, поя́ху: благослове́н еси Бо́же оте́ц на́ших.
Кре́пость и си́лу, и просвеще́ние же и боже́ственный ра́зум нам всем подае́т уче́ния ва́шего, блаже́ннии, сви́ток богоначерта́нный, зову́щим: Благослове́н Бог оте́ц на́ших.
Ума́ твоего́ зре́ние очи́стив, чу=дне Варсонуфие, неизрече́нно зрел и созерца́л еси боже́ственная виде́ния и весь свет быв, взыва́ше: Благослове́н Бог оте́ц на́ших.
Ум свой просвети́в осия́нием Паракли́та, прови́дети и провозвести=ти сподо́бился еси гряду́щая, преподо́бне, и яко проро́к богоглаго́ливый воспеваше: Благослове́н Бог отец на́ших.
Богоро́дичен:
Пло́ти подо́бием неопи́санно, Отрокови́це, родила́ еси Пребоже́ственное Сло́во, спребывающее с нами ми́лости ра́ди, те́мже пло́ти моея́ стра́сти исцели́ и безстра́стия све́том ум мой озари́.

Песнь 8.
Ирмо́с: Нестерпи́мому огню́ соедини́вшеся:
Преподо́бных:
Ирмо́с: Седмери́цею пещь Халде́йский мучи́тель Богочести́вым неи́стовно разжже́, си́лою же лу́чшею спасе́ны сия ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся ве́ки.

Зна́нием соверше́нным, преподо́бне, и све́том Ду́ха просвеще́н, усе́рднейшим по́двигом твои́м свети́льник небосве́тлый и мона́хом учи́тель и наста́вник, о Варсонуфие, яви́лся еси, ве́рою вопию́щим: свяще́нницы, воспо́йте, лю́дие благослови́те во вся ве́ки.
В по́двизе единому́дрении и сла́вою равноче́стнии и чудесы́ и мно́гими дарова́нии та́кожде соприча́стницы, всеблаже́нне Варсонуфие со Иоа́нном, яви́стеся всем, вку́пе вопию́ще: свяще́нницы, благослови́те, лю́дие, превозноси́те Христа́ во ве́ки.
О кре́пости душ, немощству́ющих прило́ги змии́ными, пече=теся, блаже́ннии, оба́че и теле́сне стра́ждущих не оставляете, скорое воистинну исцеле́ние приносяще; прикосновшиися же к мощам ва́шим и одея́нием си́лу и благослове́ние обрета́ют.
Богоро́дичен:
А́нгельстии Чи́ни сла́ву Твою́ почита́ют и Безпло́тнии Ли́цы великоле́пие Твое́ велича́ют, Чи́стая, Бо́гом возвели́ченная, челове́цы же вси от Тебе́ бы́вшее ми́ру спасе́ние воспева́ют, Де́во: кля́твы убо рождество́м Твои́м Ада́ма изба́вила еси.

Песнь 9.
Велича́ния, пое́мые на пе́сни сей. Глас 3.
Непости́жно есть соверши́вшееся о тебе́ и а́нгелом и челове́ком, Матероде́во Чи́стая.
Рука́ми объе́млет ста́рец Симео́н зако́на Творца́ и Влады́ку вся́ческих.
Восхоте́в Соде́тель, да спасе́т Ада́ма, в ложесна́ Твоя́ всели́ся, Де́вы чи́стыя.
Весь род челове́ческий ублажа́ет Тя, Чи́стая, и сла́вит Тя ве́рно, яко Ма́терь Бо́жию.
Прииди́те, ви́дите Христа́, Влады́ку вся́ческих, Его́же Симео́н днесь прино́сит в храм.
Призира́еши на зе́млю и твори́ши ю трясти́ся, и ка́ко ста́рец согбе́нный рука́ма объе́млет тя?
Пожи́л еси ле́та, Симео́не, до́ндеже узре́л еси Христа́, и вопия́ше к Нему́: ны́не отпуще́ния прошу́.
Клеще́ та́инственная, яже угль Христа́ нося́щая во чре́ве, ты еси, Мариа́м.
Во́лею вочелове́чился еси, пребезнача́льный Бо́же, и ко хра́му прино́сишися четыредесятодне́вен.
Соше́дша с небесе́ Влады́ку вся́ческих, прия́т Его Симео́н свяще́нник.
Просвети́ мою ду́шу, и свет чу́вственный пода́ждь, яко да ви́жду чи́сто и возвещу́ Бо́га.
Матероде́во Чи́стая, что прино́сиши ко хра́му отроча́ мла́до, предава́я на ру́ки Симео́ни.
Ны́не разреше́ния прошу́ от Тебе́, Соде́телю, яко ви́дех тя, Христе́, све́те мой спаси́тельный.
Его же го́рнии служи́тели со тре́петом мо́лят, до́лу ны́не Симео́н рука́ми объе́млет.
Сла́ва: Естество́м Еди́нице, Ли́цы же Тро́ице, сохрани́ рабы́ твоя́, ве́рующия в Тя.
И ны́не:Богоро́дице, упова́ние всех христиа́н, покры́й, огради́, сохрани́ упова́ющия на Тя.
Ирмо́с: В законе сени и Писаний:
Преподо́бных:
Ирмо́с: Ужасе́ся о сем не́бо, и земли́ удиви́шася концы́, яко Бог яви́ся челове́ком пло́тски, и чре́во Твое́ бысть простра́ннейшее небе́с. Тем Тя Богоро́дицу, а́нгелов и челове́к чинонача́лия велича́ют.
Прему́дростию осиява́яй духо́вною и мно́гим разсужде́нием укра́шен пресла́вно, о́тче Варсонуфие свяще́нне, всем подае́ши, преподо́бне, спаси́тельная дая́ния всегда́, твоя́ бо боже́ственная словеса́, яко ма́нна душепита́тельная, ра́зум наш укрепляют.
Ти́ну пе́рстную отря́с небе́сным мудрова́нием, преподо́бне, а́нгельским пожи́л еси в ми́ре жи́тельством, и учени́к и совсе́льник Варсонуфия свяще́ннаго был еси, Иоа́нне, с ни́мже Вы́шния сла́вы улучи́л еси све́тлость.
Вели́ких сподо́бистеся воздая́ний, яко вели́кими на земли́ по́двиги мы́слию тве́рдою подвизастеся, богому́дре Варсонуфие со Иоа́нном благосла́вным; сего́ ра́ди вас велича́ем, изба́вите ны от бед и прило́га вра́жия.
Свети́льницы Восто́ка Невеще́ственнаго, страсте́й мглу отгоня́ющии све́тлыми ва́шими моле́ньми к Бо́гу, о ве́лий Варсонуфие со Иоа́нном ди́вным, не пре=зрите нас, но ко стяжа́нию стра́ха Бо́жия на́ше разуме́ние воздви́гните.
Богоро́дичен:
Ум мой, лука́вством до́лу па́дший, Богоро́дице, возвы=шен покажи́ любо́вию те́плою и к де́ланию доброде́телей воздви́гни небрегу́щее всегда́ се́рдце мое, молю́ся, и спаси́ мя, Де́во, от работы греховныя.

Свети́лен:
Дво́ицу пречестну́ю по́стников почти́м, доброде́тельных трудо́в наста́вников и свети́льников, вели́каго Варсонуфия, мона́хов предъизя́щнаго, и Иоа́нна преподо́бнаго, тому́ таи́нника до́бляго и в по́двизех сотру́дника.
И пра́здника:
Во объя́тиих прия́т Симео́н пра́ведный в хра́ме Спаси́теля яко во́лею Младе́нца и испове́да Бо́га и всех Го́спода, разреше́ния прося́ плотска́го, сла́вя младе́нствующее Сло́во.