Редкие Богослужебные тексты

Сентября 20 дня преставление преподобнаго отца нашего
МАКАРИЯ ОПТИНСКАГО

На «Господи, воззвах», глас 1.
Подобен: Небесных чинов:

Цве=ты писа=ний оте=ческих облета=я,/ якоже птене=ц гнезда= Паи=сиева,/ Мака=рие свя=те,/ те=ми зове=ши к Богу всех нас,/ су=щих в бурях страстей и искуше=ний,\ и избавля=еши моли=твами твоими.

Свяще=нныя оде=жды красоту/ ми=лостию соде=лал еси= светле=йшу,/ утеша=я скорбя=щия,/ уны=лыя воздвиза=я и ободря=я,/ яко премудрый кормчий, богоно=се./ Тем и нам явля=еши ди=вная:/ я=коже иногда= духовная ча=да твоя=/ ны=не управля=еши ны\ ко приста=нищу спасе=ния.

Смире=ния добро=ты проходя=/ стра=шную о=ную разуме=л еси=/ кре=стную славу, свя=те./ Нам же небе=сная словеса=/ де=тельных восхожде=ний явля=еши/ и ко смиренному=дрию наставля=еши,\ свяще=ннейший о=тче.

Ины, поемые в Оптиной Пустыни, глас 4:

Ум ангельский плодоно=сен Боже=ственный,/ столп целому=дрия,/ разсужде=ния светильник,/ Богопи=санная скрижаль отеческих преданий,/ мысленная сокровищница добродетелей многоценных,/ венценосец премудрости Божия,/ песньми да возвеличится днесь\ Макарий Богоблаженный.

Богоподража=тельнаго смирения проповедниче,/ кротости нрава учителю любезнейший,/ трудолюбия правило/ и молитвы свети=льниче,/ Оптинскаго старчества крепча=йшее утверждение/ и страждущих целителю,/ и засту=пниче оби=димым,/ отче преподобне Мака=рие,/ твое стадо окорми=,\ память твою любовию совершающее.

Священная память твоя,/ яко о=блак Боже=ственный,/ осеняет вся притека=ющия/ к ра=це мощей твоих/ и орошает благодатию независтно/ всяк возраст и всяко сосло=вие,/ иска=пающи сладость/ твоих смиренному=дрых рече=й,/ те=мже, богоно=се отче Мака=рие,/ омы=й нашу душе=вную нечистоту=/ и в светлую ризу покая=ния\ сподо=би оде=ятися.

Ины, поемые в Оптиной Пустыни, глас 2:
Подобен: Егда от древа:

Егда найде на тя рачение Вседержи=телево,/ тогда страсти плотския усмирил еси,/ и исторгл еси плевелы греха,/ древо богоразу=мия насадив,/ и учении Святоотеческими/ бразды душе=вныя напои=л еси,/ темже и процвете= яко крин смиренномудрие твое,/ его=же плоды напитал еси верных сердца/ и глад душевный утолил еси,\ богоно=се треблаже=нне отче Макарие.

Слава, глас 4.

От ю=ности, преподо=бне Мака=рие,/ Бога возлюбив,/ Тому= вседушно последовал еси,/ ничтоже предпоче=т сущих в мире./ Но вся яко уме=ты вменив,/ потща=лся еси благоугоди=ти Богу,/ за=поведьми Его утвержда=яся:/ темже жела=ния коне=чнаго достиг,/ Христу предстои=ши,/ Егоже моли=\ спасти и просвети=ти души наша.

На стиховне, глас 8.
Подобен: Что вас наречем:

Что тя нарече=м, блаже=нне?/ Наста=вника ли прему=дра,/ яко образ мона=шескаго жи=тельства яви=л еси?/ Столп ли веры Православныя,/ яко о славе Божии поревнова=л еси?/ Све=щник ли божественный?/ Озаря=еши бо доброде=тельми Руси= концы=./ Ши=пок ли? В мире бо словесы= благоуха=еши./ Ди=вна твоя дела=,/ хва=льна и дарова=ния.\ Моли= спасти=ся душа=м на=шим.

Тропарь, глас 6:

В
о глубину= смире=ния нисше=дый,/ на высоту= прозре=ния/ Богом вознесе=н еси,/ преблаже=нне отче Мака=рие,/ Оптинская похвало=/ и всея= Земли= Росси=йския уте=шителю,/ зна=тных и просты=х наста=вниче,/ немощны=х врачу=,/ страсте=й и бесо=в прогони=телю,/ моли=твенниче ве=лий пред Го=сподем,/ вку=пе с преподо=бным Львом/ и всем собо=ром старцев Оптинских\ моли=ся о душа=х наших.

Ин тропарь, глас 3:

С
е=рдце, благода=ти испо=лненное/в ризе смире=ния и кротости/ чрез все житие твое пронесе=,/ преподобне отче Макарие блаже=нне;/ такожде жаждущих напои=л еси,/ скорбящих уте=шил еси, болезнующих исцели=л еси./ Темже испроси у Христа Бога/ ро=су благода=ти душам на=шим,\ мира и ве=лией милости.
Канон, глас 4.
Песнь 1

Ирмос: Отверзу уста моя:
Смирения сладких вод и трапе=зу тайную угото=ва днесь старец богоблаже=нный Макарий, грозд доброде=телей и умиления вино=. Прииди=те насладитися вси, память священную того пра=зднующе.
Господу тя от юности предызбра=вшу, ти=хостию и незло=бием нра=ва украша=шеся, я=ко и ма=терь твоя, отче кротча=йший Мака=рие, дивля=шеся и светильника преизря=дна тя быти непщева=ше.
Мира отринул еси тьму, в мире Христо=ве упокоеваяся, пучину житейскую ле=гце премину=л еси, и вся оставив Христа ради, же=мчуг духо=вный стяжа=л еси ку=плею смире=ния и послуша=ния.
Испи=л еси сладость духа и благодати хлеб снед, во отречении твоем от мира вспять не озира=яся, и в по=те лица преподо=бнически потруди=вся, древо возрасти=л еси и=стиннаго богопозна=ния.
Ре=вности огне=м соже=гл еси терния страстей, росо=ю же небесною угаси=л еси пла=мень вожделе=ний, и ту=чами слез напои=в душу свою, дости=гл еси Боже=ственнаго безстра=стия.
Ели=ко обеща= ти Господь воздае=т, яко смиря=яй себе возвы=сится, те=мже мы=сленное небо отве=рзеся тебе, в не=мже пари=ши яко голубь кроток, Мака=рие, а=вво богоблаже=нне.
Богородичен: На Тебе наде=ющиися и храня=щии девство помощь обретают, Стена бо еси Необори=мая, те=мже лю=тость бра=ни нашея утиши= и демонов усмири=, Марие, Дево Богоблаже=нная.

Песнь 3

Ирмос: Яко неплоды:
Зрим тя, отче, при ногу= Афана=сия ста=рца и преподо=бнаго Льва, я=ко при исхо=дищих вод насажде=нна, послуша=нием напая=ема и терпе=нием укрепля=ема, и плоды= разсужде=ния преудобре=нна. Помози=, блаже=нне, и нам поне= ма=ло в доброде=телех сих тебе подража=ти.
Истинный сладча=йший глас послу=шал еси и пре=лести мира отвергл еси, посох взем богоприя=тнаго послушания, на высоту доброде=телей восходил еси, отче, отеческим уста=вом после=дуя.
Якоже сад, Мака=рие, цвете=ши, арома=ты молитвы непреста=нныя испуща=я и плод любве стори=чествующий прино=сиши, доброде=тельми смире=ния и милосе=рдия облагоуха=нный.
Боже=ственныя благодати сподобля=емь, преподо=бне, зако=ном Христовым пита=еши ум и душу за=поведьми снабдева=еши, те=мже и благода=тию священства помазу=ешися и вопие=ши: несть свят паче Тебе, Человеколю=бче.
Отжени= злокозненнаго демона от стада твоего, блаже=нне, не терпит бо вони= смирения ангельскаго, и отбегает, тебе приближа=яся, темже и облагоуха=й сердца вопиющих: несть свят паче Тебе, Человеколю=бче.
Богородичен: В ложесна= Твоя волоща=емь, Всенепоро=чная, всели=ся Зижди=тель, на благодея=ние ве=рно пою=щим Тя.
Седален, глас 4.
Подобен: Скоро предвари:
Страстное покорил еси плотское мудрование, и горшая порабо=тив лучшему, отче Мака=рие пресла=вне, сокруши=л еси бесо=вския козни посто=м, и возсия=л еси в мире яко луча= со=лнечная, сия=нии твоих доброде=телей: сего ради тя воспева=ем.
Слава, и ныне. Предпразнства.

Песнь 4
Ирмос: Седяй в славе:
Ви=дяй тя не то=кмо еже де=яти, но и еже помышля=ти открыва=юща отце=м, и Прия=вый воздыха=ния твоя и моле=ния, воздвиза=ет на све=щник тя ста=рчества и пасти= поставля=ет о=вцы Своя. Того ны=не моли и нам в любви Его утверди=тися.
Содея=в, пресл=авне Мака=рие, ду=шу твою храм Свято=му Духу, был еси насле=дник Го=рняго Царствия, с вы=шними Си=лами.
Красне=йшим прозябе=нием, о=тче Макарие, в дому= Божии прозя=бл еси, доброде=тельми укра=шен и плоды= чуде=сными облагоуха=емь.
Богородичен: Ни=ва духо=вная, я=коже из бразды= клас изнесла= еси, всю тварь Пита=ющаго, вся=ческих Бога, Присноде=во.
Песнь 5
Ирмос: Ужасошася всяческая:
Испыту=я творе=ния/ богопросвеще=ных Отцев/ дре=вния Церкве,/ пораде=л еси зело=,/ отче Мака=рие,/ о умноже=нии их Духоно=сных писа=ний,/ да всяк жа=ждай грядет/ и да пиет во=ду жи=ву\ во спасе=ние души= своея=.
Мирова=рница сый духа и еле=йница милости, приходя=щия к тебе верою пома=занием святым исцеля=еши, помози= и нам, отче Макарие, цельбоно=сными твоими моли=твами, память твою соверша=ющим присносве=тлую.
Ангельски, преподобне, ревну=я, пение благозву=чное устрояеши лики церковныя, первее убо согласное пение добродетелей в сердце твоем устроивый, и сладкозвучие жития твоего яви тя одушевле=нный Божий орган.
Киими гла=сы воспоим тя, или ки=и трубы= возвестят христоподража=тельное смиренному=дрие твое? Недоуме=ем бо, оба=че немо=лчно вопием: любителю Божия добро=ты, а=вво Мака=рие, испра=ви ча=да твоя несоверше=нная.
Богородичен: Исцели неду=гующаго ума моего омраче=ние, Врача ро=ждшая Христа, Всенепоро=чная Владычице.

Песнь 6
Ирмос: Божественное сие и всечестное:
Преподо=бне отче Макарие,/ ты блаже=н яви=ся вои=стинну,/ насы=тил бо еси а=лчущих ду=ши,/ ту=не пита=я всех/ сло=вом, исполненным благода=ти,/ потребля=я душе=вный глад,\умиря=я души, страстьми= обуреваемыя.
Еже от Святых Отец предание, отче, по всей стране Российстей распространися, ты бо воистинну книжник богоугодный явился еси, от Отеческих творений сам назида=яся, и чад богомудро назидая.
Авво богопросвеще=нный, Великому Мака=рию тезоимени=тый, вся по образу дре=вних Отец в скиту= возлю=бленнем устроил еси и яко новую Фиваи=ду сей показа=л еси. Не остави и нас, ны=нешних, своею любо=вию.
Вельми= смирение ублажил еси и гордыню запя=л еси, николи=же от старцев своих духовно отлуча=яся, Мака=рие. Сам же старец быв, превозноше=ния лука=вая отгнал еси, души чад своих любовию пои=стине привлека=я.
Богородичен: Господь с Тобою, Пречи=стая,/ я=коже изво=лил есть,/ быв, Отрокови=це,/ всех нас от о=бласти льсти=ваго/ хода=тайством Твои=м изба=вил есть:/ те=мже Тя ныне по до=лгу\ ро=дове родо=в убла=жаем.

Кондак, глас 8:

Т
езоимените блаженству,/ пустыннику великому подражая,/ блажен еси, поработав Христу,/ девятери=цу блаже=нств испо=лнив,/ яко благое иго Христово/ поне=сл еси тяготы= и=ноков и мирян,/ по всех душею боле=знуя/ и всех вмещая в се=рдце своем,/ ныне же, пребывая/ в Черто=зех Божественных/ со старцы святыми,/ моли о нас, грешных,/ Оптинская похвало,\ Макарие блаженне.
Икос
От пеле=н младе=нческих Бо=гом предызбра=н быв в души твоей красоту изобразити высокотво=рнаго смире=ния, темже нравы благочести=выми обу=чен быв и верою правою утвержде=н, явился еси роди=телем твоим благочестивое похвале=ние. Сего ради зовем ти:
Радуйся, Богом избра=нный сосу=де;
радуйся, смирения и любве крепкий соу=зе.
Радуйся, младенческий разум отверги=й;
радуйся, зло=бою при=сно младе=нствуяй.
Радуйся, разумли=вый закона Христова свети=льниче; радуйся, писаний отеческих присный любителю.
Радуйся, яко мирское оставль мудрование;
радуйся, яко к Божественным прини=кнувый писа=нием.
Радуйся, отче Макарие, зерца=ло смиренномудрия.
Песнь 7
Ирмос: Не послужиша твари богомудрии:
Яко свети=льник Божия благода=ти/ яви=лся еси=,/ преподобне отче Мака=рие,/ дале=че простира=я лучи=/ равноа=нгельнаго своего жития,/ имже просвещены бы=ша\ сидя=щии во тьме и се=ни смертней.
Богомудре старче Макарие, собеседник был еси святителей премудрых и учитель мирских, тии бо, в простоте твоей небесную мудрость прозрева=юще, сами поуча=хуся младенчески и других к поучению направля=ху.
Лесть лати=нян обличал еси, богомудре, чадом своим завещавая к писанием их не прикасатися, лесть бо вражия тонка есть и кто избежит се=тей лукавых? Но блюдите убо, како опасно ходите.
Апостольских преданий верный хранителю, и списа=телю тщали=вый слове=с святых, и премудрый изда=телю отеческих творе=ний, ди=вный отче, вся в памяти твоей возвесели= цевни=цею твоих рече=ний.
Богородичен: Ново Отроча= ро=ждши Пребезнача=льнаго Сло=ва, обетша=вшия ны грехо=м, обновила еси, Дево, и пе=ти укрепи=ла еси: отец наших Боже, благослове=н еси.

Песнь 8
Ирмос: Отроки благочестивыя в пещи:
Храму Божию прилежал еси, преподобне Макарие богопросвещенне, вся доброразсу=дно в храме устроя=л еси, те=мже и души челове=ческия зде добре устроя=ются, во еже пети: благослови=те вся дела Господня, Господа.
Ангельскими крила=ми моли=тв твоих покрый чада твоя, Макарие чадолю=бне, ты бо, устроя=я скит Оптинский, воспитал еси небесныя гражданы, иже ныне в Горнем восклицают: благословите вся дела Господня, Господа.
Идеже собраны есмы твоею па=мятию, тамо пребу=ди с нами, старче благодатный, и вразуми нас словесы= твоими, и разсуждение стяжа=ти помози=, да выну воспоем согла=сно: благословите вся дела Господня, Господа.
Помыслы своя тебе откры=ем, отче Макарие: где ныне обря=щем старца столь богомудраго, да вразумит нас и наставит словесы божественными, во еже пети: благословите вся дела Господня, Господа.
Богородичен: Вода еси неисчерпа=емая, Дево, от неяже вси пию=ще благодати исполня=емся, душе=ю и телом освяща=еми.
Песнь 9
Ирмос: Всяк земнородный:
Якоже иногда= братия и вси концы земли Ру=сския к тебе притека=юще, наставле=ние и отра=ду душа=м обрета=ху, тако, свя=те Мака=рие, ныне нас моля=щихся, и твоим моще=м покланя=ющихся, и подобие зрака твоего лобыза=ющих попече=нием оте=ческим не оста=ви.
Щедрому Богу служа, ни мало утаи=л еси от дарова=нных ти, преподобне, раздавая всем безмерне, никогоже от жаждущих лишил еси воды живы=я, но яко ма=ти о ча=дех своих и доныне пече=шися.
Иста=ял еси весь в любви к Сладчайшему Иисусу и изменился еси весь Божественным рачением, и благоле=пными ныне украшен светлостьми= в безсмертии Безсме=ртному Жениху сочетава=ешися.
Яко велик воин Царя Небе=снаго, страстьми= не побежден, демона устрашил еси, Мака=рие отче, аще и зауше=н от супостата, но смирением того низложил еси. Сего ради славим Христа, тебе просла=вльшаго.
Богородичен: Просвети, Чистая Дево, се=тующее сердце мое при=сно преступле=ньми и житейскими многими молва=ми, не остави мене врагом быти в радость, яко да сла=влю Тя и любо=вию пою, Препе=тая.
Светилен
Ликовствуют А=нгели и монахов множества в светоно=сней памяти Оптинскаго старца Макария, яко собеседник бысть первым, и вторым яви=ся наставник, и святых собором сопричастник.
И ныне: Предпразнства.