Редкие Богослужебные тексты

Служба прп. Давиду Эвбейскому
1/14 нове́мбриа
На ма́лей вече́рни
поста́вим стиха́ 4 и пое́м стихи́ры подо́бны свята́го:
Глас 2.
Подо́бен: Егда́ от дре́ва:
Егда́ от ко́рене свята́го процве́л еси́,/ яко цвет благоуха́нен, Дави́де блаже́нне,/ тогда́ от ю́ности весь богоприя́тен вои́стинну яви́лся еси́,/ ра́зумом соверше́н, Святы́м Ду́хом направля́ем,/ те́мже и в му́жа преуспе́в во́зраста духо́вна,// доброде́телей де́латель иску́сен показался еси́.
Егда́ Госпо́день Крести́тель призва= тя к житию́ по Бо́зе,/ тогда́ после́довал еси́ ему с весе́лием,/ и в хра́ме его те́пле предстоя́л еси́,/ всем предобрази́в сла́ву свою́:/ те́мже и роди́тель твой, обре́т тя, ужасе́ся// твоего́ небе́снаго зва́ния указа́нию.
Егда́ благоволе́нием Бо́жиим на Эвбе́и яви́лся еси́,/ яко други́й А́нгел,/ тогда́ прибе́жище душа́м спаси́тельное Спа́су возве́л еси́,/Дави́де богоно́сне,/ яко богодохнове́нный орга́н Боже́ственныя благода́ти,/ иде́же ра́ка моще́й твои́х/ источа́ет исцеле́ний то́ки// с ве́рою притека́ющим к покро́ву твоему́.
Ра́дуется Локри́да, оте́чество твое́,/боже́ственную тя ле́торасль стяжа́вши, и ве́лию похвалу́,/ о́стров же Эвбе́я о тебе́ изря́дно лику́ет,/ Дави́де достохва=льне,/сла́ву тя обре́т и засту́пника и́стиннаго,/ спаса́ющаго его от вся́каго вре́да./ Сего́ ра́ди обоя́ твою́ боже́ственную па́мять почита́ют.
Сла́ва, глас 1.
Оста́вивый вои́стинну от ю́ности, о́тче,/ земны́я сла́дости наслажде́ние,/ Христу́ всем устремле́нием после́довал еси́,/ и дре́вних преподо́бных доброде́телем подража́я,/ равноа́нгельное житие́ подъя=л еси́,/ и разли́чными дарова́нии от Бо́га просла́вился еси́,// Ему́же моли́ся, мо́лимся, Дави́де преподобне, о чту́щих тя.
И ны́не, Богоро́дичен:
Гре́шных молитвы приемлющи и скорбя́щих воздыха́ния не презира́ющи, моли́ от пречи́стаго чре́ва рождшагося Сы́на Твоего́, спасти́ся на́м, Пресвята́я Де́во.

Стихи́ры на стихо́вне, глас 2
Подобен: Доме Евфрафов:
Просия́л еси́ вои́стинну, яко со́лнце в ми́ре,/ доброде́телей твои́х сия́нием и всех озаря́еши, Дави́де,// тя почита́ющих.
Стих: Честна́ пред Го́сподем смерть преподо́бных Его.
Веселится вои́стинну свята́я оби́тель твоя,/ Дави́де чудотво́рче,// пра́вило тя и о́браз доброде́тельнаго жития́ стяжа́вши.
Стих: Блаже́н муж, боя́йся Го́спода в заповедех Его восхощет зело
Честна́я глава́ твоя́/ невеще́ственною си́лою/ источа́ет прося́щим// спаси́тельная исцеле́ния.
Сла́ва, Тро́ичен:
О́тче с Сы́ном и Ду́хом Святы́м, Тро́ице Пресвята́я, поми́луй мир моли́твами преподо́бнаго Твоего́.
И ны́не, Богоро́дичен:
Име́ла еси́ во чре́ве вопло́щшееся Сло́во/ и родила́ еси́ неизрече́нно/ Христа́ всех Творца́, Де́во,// мир спа́сшаго.

На вели́цей вече́рни.
На Го́споди воззва́х стихиры глас 4.
Подо́бен: Яко до́бля:
Христу́ себе́ от ю́ности возложи́в,/ Све́та Христова исполнился еси и подви́жник богодохнове́ннейший, Дави́де всеблаже́нне, показа́лся еси́ вои́стинну,/ воздержа́ния по́двиги ду́шу и те́ло очи́стив,// сего́ ра́ди просла́вился еси́ Уте́шителевою благода́тию.
Гла́са послу́шав Предте́чева,/боже́ственным жела́нием тому́ после́довал еси́,/ младе́нец те́лом сый,/ ра́зумом же соверше́н,/предобразова́в яве небе́сное зва́ние твое,/ Дави́де преподо́бне./ Яко А́нгел бо, о́тче, пожи́л еси́,/ и Христо́вы Це́ркве свети́льник яви́лся еси́ новосве́тлый.
Локри́ды прозябе́ние и Эвбе́и похвалу́,/ мона́шествующих премудрое,/ доброде́телей пра́вило, разуме́ния орга́н/ и любве́ сугу́быя тезоимени́тое селе́ние сла́вное,/увенча́им пе́сненными цве́ты Дави́да досточу=днаго,/ яко предста́теля на́шего ко Го́споду.
Глас 8.
Подо́бен: Что Тя нарече́м:
Что тя, о Дави́де, нарече́м? Любве́ боже́ственная уста́, или нра́вов исправле́ние? Мона́хом путевождя́, или учи́теля му́драго? Звезду́, от Локри́ды возсия́вшую, свети́льник Эвбе́и светле́йший? Мно́га твоя исправле́ния и мно́жайша дарова́ния. Моли́ спасти́ся душа́м на́шим.
Кто твоя́ по́двиги возмо́жет изрещи́, Дави́де, досто́йно/ и дарова́ния боже́ственная?/ Се́ти бесо́вския и ко́зни их?/ Доса́ды от неве́рных и ра́ны,/ я́же претерпе́л еси́ до́бле, Дави́де преподо́бне?/ Сего́ ра́ди тя ны́не ублажа́ем/ и любо́вию вопие́м ти:// моли́ спасти́ся душа́м на́шим.
От страсте́й тя́жких и неду́гов/ ра́ка моще́й твои́х врачу́ет ве́рныя/ и бесо́вский мрак от челове́к отгоня́ет./ Сего́ ра́ди к честне́й главе́ твое́й припа́дающе,/ исцеле́ния оби́льная почерпа́ем/ и благогове́йно ти взыва́ем:/ Дави́де, отце́в украше́ние,/ моли́ спасти́ся душа́м на́шим.
Сла́ва, глас 6.
Днесь, яко звезда́ новоявле́нная,/ преподо́бнаго Дави́да па́мять возсия́,/ благочестивых озаря́ющи у́мными луча́ми./ Той бо, яко све́та сын пожи́в,/ к све́ту боже́ственных за́поведей направля́ет вопию́щих к нему́:/ ра́дуйся, от младенства Бо́гу возложе́нный/ и да́нное ти зва́ние сла=внейше де́лы твои́ми показа́вый;/ ра́дуйся, мона́хом правило / и жи́зни о Ду́се служи́телю де́тельнейший;/ ра́дуйся, Локри́ды украше́ние,/ Эвбе́и сла́во и главо́/ и Це́ркве светило лучеза́рнейшее./ Но яко име́яй дерзнове́ние, о́тче, ко Господу// моли́ о душа́х на́ших.
И ны́не:
Кто Тебе́ не ублажи́т:
Прему́дрости Соломо́новы чте́ние:(Гл. 3:1-9.)
Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и еже от нас ше́ствие сокруше́ние: они же суть в ми́ре. Ибо пред лице́м челове́ческим аще и му́ку прии́мут, упова́ние их безсме́ртия испо́лнено: и вма́ле нака́зани бы́вше, вели́кими благоде́тельствовани бу́дут, яко Бог искуси́ их и обре́те их досто́йны себе́: яко зла́то в горни́ле искуси́ их, и яко всепло́дие же́ртвенное прия́т я. И во вре́мя посеще́ния их возсия́ют, и яко и́скры по сте́блию потеку́т: су́дят язы́ком и облада́ют людьми́, и воцари́тся в них Госпо́дь во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему, яко благода́ть и ми́лость в преподо́бных Его и посеще́ние во избра́нных Его.
Прему́дрости Соломо́новы чте́ние:(Гл. 5:15-6:3).
Пра́ведницы во ве́ки живу́т, и в Го́споде мзда их, попече́ние их у Вы́шняго. Сего́ ра́ди прии́мут ца́рствие благоле́пия, и вене́ц добро́ты от руки́ Госпо́дни: зане́ десни́цею покры́ет я, и мы́шцею защити́т их. Прии́мет всеору́жие рве́ние Свое, и вооружи́т тварь в месть враго́м. Облече́тся в броня́ пра́вды, и возложи́т шлем, суд нелицеме́рен. Прии́мет щит непобеди́мый, преподо́бие: поостри́т же напра́сный гнев во ору́жие: спобо́рет же с Ним мир на безу́мныя. По́йдут праволу́чныя стре́лы мо́лниины, и яко от благокру́гла лука облако́в, на наме́рение полетя́т: И от каменоме́тныя я́рости, испо́лнь паду́т гра́ды. Вознегоду́ет на них вода́ морска́я, ре́ки же потопя́т я на́гло. Сопроти́в ста́нет им дух си́лы, и яко ви́хор разве́ет их: и опустоши́т всю зе́млю беззако́ние, и злоде́йство преврати́т престо́лы си́льных. Слы́шите убо ца́рие и разуме́йте, навы́кните судии́ конце́в земли́. Внуши́те держа́щии мно́жества, и гордя́щиися о наро́дех язы́к: яко дана́ есть от Го́спода держа́ва вам, и си́ла от Вы́шняго.
Прему́дрости Соломо́новы чте́ние:(Гл. 4:7-15).
Пра́ведник, аще пости́гнет сконча́тися, в поко́и бу́дет. Осу́дит же пра́ведник умира́яй живу́щия нечести́выя. У́зрят бо кончи́ну пра́веднаго и не разуме́ют, что совеща́ша о нем; яко пове́ржет Госпо́дь нечести́выя безгла́сны ниц, и поколе́блет их от основа́ний, и до после́дняго исче́знут в боле́зни, и па́мять их поги́бнет. Прии́дут бо в помышле́ние согреше́ний свои́х ужа́сни, и обличи́т их сопроти́в беззако́ния их. Тогда́ ста́нет в дерзнове́нии мно́зе пра́ведник пред лице́м оскорби́вших его и отмета́ющих труды́ его. Ви́девше же его, смяту́тся стра́хом мно́гим и ужа́снутся о пресла́вном спасе́нии его. Реку́т бо к себе́, ка́ющеся, и в тесноте́ ду́ха воздо́хнут и реку́т: сей бе, его́же име́хом не́когда в по́смех и в при́тчу поноше́ния, безу́мнии./Житие́ его вмени́хом неи́стово и кончи́ну его безче́стну. Ка́ко вмени́ся в сыне́х Бо́жиих, и во святы́х жре́бий его есть? У́бо заблуди́хом от пути́ и́стиннаго, и пра́вды свет не облиста́ нам, и со́лнце не возсия́ нам. Беззако́нных испо́лнихомся стезь и поги́бели, и ходи́хом стези́ непрохо́дны, пути́ же Госпо́дня не разуме́хом.
На Лити́и стихиры самогла́сны:
Глас 1.
Ра́дуйся о Го́споде, о́стров Эвбе́йский,/ Дави́дом преподо́бным обогати=выйся, яко сокро́вищем Небе́сным:/ Бо́жиим бо Про́мыслом к тебе́ приведе́ся, сме́рти избе́гнув,/и боже́ственный тебе́ наста́вник яви́ся и путево́ждь на лу́чшая,/ от зде́шних же преше́д,/засту́пник показа́ся ти ско́рый и ко Христу́ хода́тай тепле́йший:/ оба́че святу́ю того́ главу́ обступа́я, от нея чу=дных дарова́ний наслажда́йся, вопия=:/ Дави́де всеблаже́нне,/ непреста́нно моли́ спасти́ся тя ублажа́ющим.
Глас 2.
Возложе́н изде́тска Спа́су,/ по́стнически Тому́ после́довал еси́, Дави́де богому́дре,/ зре́ния боже́ственныя удосто́ився Предте́чевы благода́ти,/ житию́ того́ поревнова́л еси́,/ любо́вию Бо́жиею окриля́ем/ и ра́зума бога́тством украша́ем./ И о́браз себе́ предста́вив доброде́тельнаго жития́,/ мно́жайшия и́маши подо́бники и ревни́тели нра́вом твои́м,/ Христо́с бо тя просла́ви,// просла́вленный по́двигом твои́м.
Глас 3.
Оста́вив я́же на земли́,/ Го́рних жела́я и взыску́я,/Христу́ благоугоди́л еси́, о́тче преподо́бне,/ и на Эвбе́е быв, Ду́ха Свята́го испо́лнь,/ храм честны́й воздви́гл еси́,/ и́же на Фаво́ре просия́вшему Спа́су,/ яко Боже́ственных осия́ний зри́тель богови́дный:/ и приста́нище душа́м соде́лавый,/ ученико́м твои́м рекл еси́:/ премени=мся, ча́да, благи́м премене́нием,/ умо́м от ми́ра удали́вшеся,/ да сообра́зни Христу́ бу́дем// и ве́чная бла=га улучи́м.
Глас 4.
В беда́х помо́щника/ и в неду́зех врача́ скоре́йшаго,/ Дави́да блаже́ннаго восхва́лим днесь,/ той бо по́двигом преподо́бных доброде́телей превы́ше со́лнца просия́/ и си́лою чуде́с просла́вися,/ всем ве́рным неоску́дно подая= проше́ний исполне́ние./ Сего́ ра́ди к нему́ те́пле вопие́м, глаго́люще:/ сохраня́й, блаже́нне, ста́до твое́ неврежде́нно/ от вся́каго прило́га сопроти́внаго и обстоя́ния.
Сла́ва, глас 5.
Преподо́бне о́тче,/ непоро́чное житие от младе́нства возлюби́в,/ яже в ми́ре кра́сная презре́л еси́./ Сего́ ра́ди и по Па́влу рекл еси́:/ Христу́ сораспя́хся,/ живу́ же не к тому́ аз, но живе́т во мне Христо́с./ От Него́же досто́йно просла́влен быв,/ благода́ть исцеле́ний восприя́л еси́/ и ве́чных благ наслажде́ние, его́же и нас сподо́би к Бо́гу моли́твами твои́ми,// Дави́де блаже́нне, преподо́бных совсе́льниче.
И ны́не:
Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ Град Непоколеби́мый, Сте́ну Необори́мую,/ Предста́тельницу Тве́рдую / и Прибе́жище душ на́ших.
На стихо́вне стихи́ры глас 5.
Подо́бен: Ра́́дуйся
Ра́дуйся, Локри́ды прозябе́ние,/Эвбе́и богоблаже=ннейшая похвало́,/ преподо́бных дре́вних о́бразе изве́стный/ и исправле́нием их уподобле́ние; тех стопа́ми от ю́ности, преподо́бне, тве́рдо ходи́в,/ доброде́телей таи́нник до́блий показа́лся еси́/ и жития́ боже́ственнаго орга́н./ Те́мже, дарова́ний Ду́ха испо́лнен,/ чудотворя́ требующим твоего́ ско́раго заступле́ния,/ Дави́де досточу=дне,/ проси всем ве́лию ми́лость.
Стих: Честна́ пред Го́сподем смерть преподо́бных Его.
Ра́достно от о́троческих лет Бо́гу преда́выйся,/ я́коже же́ртва честна́я,/ зва́нием Небе́сным Предте́чева гла́са,/ того́ зрел еси́ призыва́ющаго тя,/ сего ради от сро́дник и оте́чества своего́ удали́лся еси́,/ и мно́гия места=, стра́нствуя, проше́л еси́,/ к высоте́ доброде́тели стремя=ся./ Те́мже, яко друго́е со́лнце, возсия́л еси́, преподо́бне, на Эвбе́и,/Про́мыслом путево́дствующия тя благода́ти,/ Дави́де богоно́сне,// и подае́ши прося́щим твое́ заступле́ние.
Стих: Блаже́н муж, боя́йся Го́спода, в заповедех его восхощет зело
Всего́ себе́ очи́стив/ воздержа́нием и усе́рдною моли́твою,/ прия́телище све́тлое был еси́ и светоно́сный храм/ Трисо́лнечнаго, о́тче, осия́ния,/таже храм благолепный Сотво́ршему вся воздвигл еси/ и мона́хом свяще́нную оби́тель/ преподо́бными твои́ми труды= соде́лал еси́, юже, яко боже́ственное ста́до и уде́л твой святы́й,/ кре́пким твоим предста́тельством покрыва́й непреста́нно/ и охраня́й, Дави́де Богоно́сне,/ прося́ всем Бо́жия ми́лости.
Сла́ва, глас 8.
Прииди́те, вся Эвбе́я/ со окре́стными о́стровы и гра́ды,/ Дави́да, чудесы́ препросла́вленнаго, пе́сненно возвели=чим./ Яко звезда́ бо све́тлая в после́дняя времена́ возсия́/ доброде́телей луча́ми и исцеле́ний дарова́ньми,/ ве́рных озаря́ет исполне́ние/ и от бед мно́гих избавля́ет,/ прося коему́ждо ко спасе́нию потре́бная и ве́лию ми́лость.
И ны́не, Богоро́дичен:
Безневе́стная Де́во, / яже Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем подаю́щи очище́ние прегреше́ний, / ны́не на́ша моле́ния прие́млющи, / моли́ спасти́ся всем нам.
Тропа́рь, глас 3. Боже́ственныя ве́ры:
Ве́лию обре́те Эвбе́я сла́ву,/ всепросла́вленнаго Дави́да боже́ственнаго,/ яко доброде́тели святы́я вмести́лище,/ и Христо́ва после́дователя и́стиннейшаго,/ и преподо́бных всех равностоя́теля./ Сего́ ра́ди молимся: о́тче преподо́бне,/ Христа́ Бо́га моли́//дарова́ти нам ве́лию ми́лость.
Ин тропарь, глас 4.
Подо́бен: Ско́ро предвари́:
Локри́ды украшение/ и Эвбе́и путево=дный огнь,/ светло показался еси́ равноангельным житием,/ Дави́де, о́тче преподо́бне,/ те́мже приходящим к святе=й главе= твоей/ подае=ши всегда цельбы= и здравие,// яко име=яй дерзновение ко Христу, тя прославльшему.
На у́трени
По 1-м стихосло́вии седа́лен, глас 1.
Подо́бен: Гроб твой, Спа́се:
Яко со́лнце све́тлое, в после́дняя времена́ возсия́л еси́, му́дре, доброде́тельно пожи́в, освеща́я ду́́ши на́ша луча́ми жития́ твоего́, Дави́де преподо́бне. Те́мже боже́ственную твою́ па́мять пра́зднуем, в весе́лии се́рдца Христа́ велича́юще.
Богоро́дичен:
Бо́га преесте́ственно от чи́стых крове́й Твои́х стра́шно воплоти́вшагося в назда́ние ми́ра неизрече́нно зачала́ еси́, и Де́ва пребыла́ еси́ по Рождестве́ несказа́ннем, Отрокови́це, Его́же моли́ спасти́ся Тя, Богоро́дице Чи́стая, велича́ющим.
По 2-м стихосло́вии седа́лен, глас 3.
Подо́бен: Боже́ственныя веры:
Боже́ственный орга́н Уте́шителев яви́лся еси́ по́двиги твои́ми, и мно́гих ко спасе́нию путеводи́л еси́, и мона́хов образ показался еси́, и исцеле́ний де́йства соверши́л еси́. Дави́де преподо́бне, Христа́ Бо́га моли́ дарова́ти нам ве́лию ми́лость.
Богоро́дичен:
Весь непрело́жно Cло́во пребыв, всели́ся во чре́во Твое́, не отступи́в соседе́ния Ро́ждшему, и су́щим в ми́ре яви́выйся, яко благоволи́, от дре́вния кля́твы нас спасе́, Его́же моли́ дарова́ти Тя сла́вящим, Де́во, очище́ние и ве́лию ми́лость.
По полиеле́и седа́лен, глас 4.
Подо́бен: Вознесы́йся на Крест:
По́стнически подвиза́вся, о́тче, озаря́еши святы́м житие́м твои́м места, и=хже преше́л еси́. Изря́дно же, свя́те, на о́строве Эвбе́йстем па́че всех просия́л еси́, в не́мже упоко́ився, и освяща́еши его, Дави́де, святы́ми мощьми= твоими.
Богоро́дичен:
Ко кре́пкому Твоему́ предста́тельству, Де́во, прибега́ющих с те́плым упова́нием от вся́ких изба́ви обстоя́ний, да́руй мир Твой, и душа́м спасе́ние, и телесе́м исцеле́ние и прегреше́ний оставле́ние. Ты бо, су́щи Ма́терь Бо́жия, си́лу и́маши испо́лнити вся́кое проше́ние.
1-й антифо́н 4-го гла́са и проки́мен:
Честна́ пред Го́сподем смерть преподо́бных Его.
Стих: Блаже́н муж, боя́йся Го́спода, в за́поведех Его восхо́щет зело́.
Ева́нгелие от Мф., зач. 43 (Мф. 11:27-30).
Стихи́ра самогла́сна, глас 6.
Стих: Поми́луй мя Бо́же по вели́цей ми́лости Твое́й:
Днесь богоно́сный Дави́д,/ Эвбе́и преиму́щее украше́ние,/ стезе́ю по́стническою проше́дый,/ на Небеса́ восхо́д соде́ла/ и, воздая́ние трудо́в пожа́в,/ яже от ве́ка святы́м сора́дуется./ Нам же оста́ви, яко исто́чник освяще́ния и оте́ческое насле́дие,/ ра́ку честны́х моще́й свои́х,/ всем источа́ющую неоску́дно исцеле́ния.

Кано́н свята́го име́ет краегране́си́е в Богоро́дичнах: «Гера́сима». Глас 8.
Песнь 1.
Колесницегони́теля фарао́на погрузи́,/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре:/ Исра́иля же беглеца́ пешехо́дца спасе́,// песнь Бо́гови воспева́юща.
Велегла́сно святу́ю па́мять твою́ воспе́ти дерза́я, твоея́ благода́ти прошу́ многосве́тлыя, мой ум озаря́ющия и кре́пость мне да́рующия, яко да досто́йно хвалу́ воспою́ ти, Дави́де всеблаже́нне.
От сла́внаго ко́рене цве́т благора́сленнейший прозя́бл еси́ и непоро́чнаго жития́ благоуха́ние лу́чшее от о́трочества источа́л еси́, всеце́ло Спа́су возложи́вся, о́тче, Небе́сным мудрова́нием.
Ра́достно Крести́телева зре́ния, о́тче, сподо́бился еси́, и гла́су того́, веселя=ся, после́довал еси́, в несоверше́ннем телеси́ и соверше́нным ра́зумом, в хра́ме того́, преподо́́бне, пребыва́л еси́, вои́стинну яко безтеле́сен.
Ужасе́ся, о́тче, честны́й роди́тель твой, егда́ узре́ тя в хра́ме святе́м, всего́ блиста́ющася, пред о́бразом, преподо́бне, Иоа́нна сла́внейшаго, и твое́ гряду́щее осия́ние Ду́хом Святы́м прови́де.
Богоро́дичен:Род челове́ческий от осужде́ния спасе́ся первозда́ннаго Ада́ма Твои́м неизрече́нным Рождество́м, Всенепоро́чная, Бо́га воплоще́нна бо па́че сло́ва ро́ждши, ра́дости нам яви́лася еси́ Хода́таица. Те́мже по до́лгу Тя хва́лим.
Песнь 3.
Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.
Яко Бо́га возлюби́в измла́да, преподо́бне, роди́тельскую любо́вь благому́дренно оста́вил еси́, и несумне́нным се́рдцем и му́дрым разуме́нием Христо́вым стопа́м после́довал еси́.
Напая́ем то́ки Писа́ний, преподо́бне, и богодохнове́нными словесы́ всегда́ пита́ем, в ю́ношах сый, весь богому́др был еси, испо́лнь, свя́те, мно́гаго разуме́ния.
Си́лу боже́ственную име́я в душе́, свя́те, ми́ра пре́лесть оста́вил еси́ от ю́ности, и от оте́чества изше́д, ко Го́споду присели́лся еси́, Того́ сладча́йшее и́го взе́мый.
Всеце́лым жела́нием после́дуя, преподо́бне, с Небесе́ Боже́ственному зва́нию, обре́л еси́ направля́юща тя на путь до́бре Небе́снаго ше́ствия, му́драго Ака́кия, Про́мыслом благи́м.
Богоро́дичен:От чи́стых Твои́х крове́й преесте́ственно родила́ еси́ Зижди́теля всех, пло́тию соде́лавшася, да спасе́т челове́ка, па́дшаго ле́стию, Богоро́дице Влады́чице, ми́ру Прибе́жище.
Седа́лен, глас 8.
Подо́бен: Прему́дрость и Сло́во:
От младе́нства возжела́л еси́ вои́стинну доброде́тельнаго жития́ и чи́стаго, яко испо́лнь ра́зума и Вы́шняго зва́ния избра́нный сосу́д, и от мирски́х у́з Горе ́храня́й свой ум блаже́нне. Те́мже мона́шеский о́браз прия́в, единонра́вен и́же дре́вле по́стником был еси́, о́тче наш. Моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.
Сла́ва и ны́не:
Спа́са всех и Соде́теля, Его́же зачала́ еси́ преесте́ственно, Отрокови́це, изба́вльшаго всех от тя́жкия рабо́ты, яко Ма́терь, умоли́, от я́рости зми́евы и мирски́х собла́зн изба́́вити и скорбе́й, еди́на Богоро́дице, к Тебе́ взира́ющия и ве́рою взыску́ющия Твоего́ ско́раго заступле́ния, нас всегда́ спаса́ющаго, да гряду́щия сла́вы и све́тлости и ра́дости Сы́на Твоего́ улучи=м.
Песнь 4.
Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.
Боже́ственною любо́вию уя́звлен, ра́дуяся, подчини́лся еси́, блаже́нне Дави́де, Ака́кию, смиренному́дрием украша=ем.
Зми́я го́рдаго свое=ю кро=тостию, о́тче, покори́л еси́, де́лы преподо́бными возвыша́ем.
Яко мона́х Богоприя́тен, о́тче, на Афо́не подвизался еси́, боже́ственною любо́вию подвиг совершая и Святым Отце=м во бране=х подражая.
Преподо́бным всем купноревни́тель, богомудре Дави́де, и благода́ти их причастник, нам, чтущим тя, аки солнце, воссиял еси.
Богоро́дичен:Жезл Ты еси́ Богопрозябе́н, Цвет невозде́лан возде́лавшая, Отрокови́це, всех Го́спода, Благово́ния Боже́ственнаго мир испо́лнившаго, породила еси.
Песнь 5.
Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго? / Но обрати́ мя, / и к све́ту за́поведей Твои́х / пути́ моя́ напра́ви, молю́ся.
Распны́йся всем я́же в ми́ре, пло́ти умертви́л еси́, о́тче, мудрова́ние, и во всех яви́лся еси́ доброде́тельнаго жи́тельства образ, наста́внику твоему́ всеце́ло послу́шествуя, волю Бо́жию исполняя.
Боже́ственных Та́ин чисте́йший, о́́тче, и преподо́бный служи́тель был еси́; те́мже Боже́ственный Свет, окружа́яй тя, показа= твоея́ сла́вы осия́ние.
Путеводи́мый, о́тче, Ду́хом Святы́м, яко друг и́стинный Бо́га вся́ческих, в Сти́ри ко власте́м предста́л еси́, себе́ преда́в на муче́ния, богоно́сне, о пло́ти не творя́ попече́ния.
За бли́жняго, яко подо́бник Христо́в боже́ственнейший, ра́дуяся, наказа́ние же́стоко прия́л еси́, Дави́де пресла=вне, непра́ведно оклевета́н быв, любве́ и́стинныя испо́лняся и благода́ти.
Богоро́дичен:Неизрече́нно ро́ждшая Зижди́теля всех и Го́спода, Благода́тная Богоро́дице, Чи́стая Присноде́во, изба́ви ду́шу мою́ от стра́стнаго плене́ния и све́том покая́ния мя озари́.
Песнь 6.
Очи́сти мя, Спа́се, мно́га бо беззако́ния моя, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.
По́мыслом боголе́пным богому́дренно украша́ем и труды́ подви́жническими сияя́, блаже́нне, пожил еси́ яко А́нгел, на Эвбе́и Бо́жиим Промышле́нием, чу=дне.
Святы́ню мы́сленную име́я, о́тче, благода́ти, храм воздвиза́еши честны́й, отче всеблаже́нне, на горе́ Преобрази́вшемуся и Обожи́вшему челове́ка.
Во мрак Боже́ственный, му́дре, осия́ния несказа́ннаго, яко ду́шу очи́стивый, вшел еси́ в Ду́се, отону́ду прия́л еси́, о́тче, в се́рдце свет Боже́ственный и пресве́тлый.
Яко доброде́тельнаго жития́ наста́вник и учи́тель, сонм учени́к име́л еси́ честны́й, богодохнове́нне, жи́тельства твоего́, Дави́де, подража́ющий боже́ственным по́двигом.
Богоро́дичен:Му́дрость Бо́жию Ипоста́сную, Непоро́чная, и Сло́во О́тчее сопресто́льное ро́ждшая, пло́ти подо́бием, изба́ви ду́шу мою́ от злоумышле́ний диавольских.
Конда́к, глас 4.
Подо́бен: Яви́лся еси́ днесь:
Яко звезда́ пресве́тлая, яви́лся еси́ в ми́ре, озаря=я всех, ве́рою приходя́щих к тебе́, Дави́де, отце́в похвало́, исцеле́ний боже́ственными дарова́ньми.
И́кос.
Песнь вси, ве́рнии, Бо́гу во́зслем, дарова́вшему кре́пость рабу́ Своему́ Дави́ду до́бре подвиза́тися доброде́тели красне́йшим по́двигом. В после́дняя бо времена́ явле́нный, яко звезда́ присносве́тлая боже́ственнаго светозаре́ния, дре́вним Отце́м купноревни́тель показа=ся и житие́м единонра́вен, и нра́вом соприча́стник и сла́вы и благода́ти о́бщник равносла́вный. И во мно́зех ме́стех подвиза́вся, на о́стров Эвбе́ю ма́нием Бо́жиим прии=де, иде=же храм на Фаво́ре преобрази́вшемуся Спа́су созда́ и свяще́нную оби́тель основа=, спасе́ния приста́нище неколе́блемо, еже всех благоде́йствует, душе́вне и теле́сне, исцеле́ний боже́ственными дарова́ньми.
Песнь 7.
О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.
Токи боже́ственных учений твоих, яко богоносный раб Господень, орошаеши душе́вныя ни́вы к лу́чшему благопло́дию Ве́чнаго Спасе́ния.
Ра́дуется дне́сь и пра́зднует оби́тель твоя́, всеблаже́нне, яко зла́то честно́е, те́ло твое стяжа́вши, и́мже разли́чных избавля́емся неду́гов душетле́нных.
Днесь Эвбе́я да лику́ет и псалмы́ и пе́сньми светоза=рно да пое́т Дави́да сла́внаго, яко того́ стяжа́вши предста́теля и побо́рника, засту́пника и ве́лию сла́ву.
Ты Влады́це всех храм воздви́гл еси́, преобрази́вшемуся на горе́ Фаво́рстей, в не́мже стоя́, богому́дре, приима́л еси́ в се́рдцы твое́м Того́ Боже́ственная осия́ния.
Богоро́дичен:Исцели́, Отрокови́це, ду́шу мою́, неисце́льным грехо́м неду́гующую, и кре́пость ми, Чи́стая, проти́ву ле́сти диаволи пода́ждь, яко да сокрушу́, Влады́чице, лю́тую того́ зло́бу.
Песнь 8.
На горе́ святе́й просла́вльшася,/ и в купине́ огне́м Присноде́вы/ Моисе́ови та́йну я́вльшаго,/ Го́спода по́йте// и превозноси́те во вся ве́ки.
С Небесе́ просла́вленный Госпо́дь, просла́вивый твое́, Дави́де, житие́ преподо́бное, моли́твами твои́ми изба́ви от я́звы комари́ныя я́же в Ди́стосе лю́те досажда́емыя.
Высо́кое жи́тельство стяжа́в, смиренному́дрен и возде́ржан яви́лся еси́, и сострада́телен, Дави́де, и Христоподража́телен, ми́луяй бога́тно и облегча́яй вся, да́льния же и бли́жния.
Ве́лий вои́стинну ты еси побо́рник в беда́х стра́ждущим, и в неду́зех врач всеизря́дный, и скорбя́щим утеше́ние сла́дкое, Дави́де чудотво́рче.
Возше́д на соверше́нства высоту́, чудотворе́ний, му́дре, благода́ть обре=л еси еси́, и мно́гая места, о́тче, преше́л еси́, цельбу́ подава́я душа́м же и телесе́м, яко Ду́ха прия́телище.
Богоро́дичен:Не опали́вши, Непоро́чная, ложесна́ Своя́, прия́ла еси́ стра́шно О́гнь Божества́, и Христа́ сугу́ба родила́ еси́, Еди́наго Ипоста́сию, непрело́жно и несме́сно, на спасе́ние ми́ра.
Песнь 9.
Ужасе́ся о сем не́бо,/ и земли́ удиви́шася концы́:/ я́ко Бог яви́ся челове́ком пло́тски,/ и чре́во Твое́ бысть простра́ннейшее небе́с./ Тем Тя Богоро́дицу/ / А́нгелов и челове́к чинонача́лия велича́ют.
Очи́стив се́рдце от пе́рстных помышле́ний, по́двигом твои́м усе́рдным, о́тче Дави́де, све́та испо́лнился еси́ у́мнаго. Сего́ ра́ди и я́вственно предвозвести́л еси́ ученико́м твои́м отше́ствие свое́ ко Го́споду, и́мже му́дро пре́дал еси́ заве́ты, благода́ти Бо́жия испо́лненыя.
Восте́кл еси́ к сла́ве небе́сней, по́двиг свой, преподо́бне, сконча́в, о́тче Дави́де, и живо́тнаго дре́ва чудоде́йственно наслади́лся еси́, к лико́м святы́х сопричте́н. Нам же, ча́дом твои́м, те́ло твое́ боже́ственное, яко утеше́ние оста́вил еси́.
Благода́ти Ду́ха сокро́вище вои́стинну многоце́нное показа́ся, о́тче Дави́де, глава́ твоя́ боже́ственная и ди́вная, при́сно арома́ты источа́ющи, и ду́ши веселя́щи ве́рных, и кре́пость и здра́вие подаю́щи к ней благогове́йно притека́ющим.
Ве́лий Эвбе́и защи́тниче, богоно́сне Дави́де всеблаже́нне, оби́тель твою́ сохраня́й от вся́каго наве́та вра=жия, и сей о́стров твой покрыва́й и сохраня́й неврежде́н, и мене́, ны́́не песнь испле́тшаго ти, на спасе́ния стезю́ напра́ви.
Богоро́дичен:Пресве́тлый Све́щниче златови́дный, Светоно́сный Хра́ме и пресла́вный, в не́мже Христо́с всели́ся, всех Соде́тель, и сосу́ды нас яви́ Боже́ственнаго де́йствия и добро́ты, Де́во Богоро́дице, све́том предста́тельства Твоего́ омраче́нный ум мой просвети́.
Свети́лен:
Подо́бен: Жены́, услы́шите:
Эвбе́и устрои́теля и боже́ственнаго засту́пника, и помо́щника в ну́ждах и ко Христу́ ве́лия предста́теля, Дави́да свяще́ннейшаго, преподо́бных украше́ние и иере́ев похвалу́ восхва́лим вси, честну́ю его па́мять соверша=юще.
Богоро́дичен:
От святы́х крове́й Твои́х Бог Пресу́щественный по нам осуществова́ся несказа́нно, яко весть, и ми́ру яви́ся, сугу́б Естествы́, Еди́н же Ипоста́сию, и спасе́, Богоро́дице, Рождество́ Твое́ хва́лящих.
На хвали́тех стихи́ры, глас 8.
Подо́бен: О, пресла́внаго чудесе́!
О́тче Дави́де всеблаже́нне, изде́тска Бо́гу себе возложи́вый, мирско́е пристра́стие богому́дренно отри́нув, и крест свой восприя́в, жи́тельством яви́лся еси́ равноа́нгелен. О, подвиго́в твои́х и па́че помышле́ния от Бо́га сла́вы и све́тлости, ея́же сподо́бился еси́!
О́тче Дави́де всепе́тый, от ю́ности богоно́сен быв и богодви́жен, и Ду́хом Божественным просвещаем, Крести́теля Христо́ва свои́ма очи́ма узре=л еси, той бо яко путеводитель к Небесному житию тебе яви=ся.
О́тче Дави́де богопросла́вленный, я́ко зарено́сная звезда́, Эвбе́е возсия́л еси́, доброде́тельными де́лы свяще́нно славосло́вимый, и оби́тель Бо́жию чес́тно воздви́гл еси́, и мона́шествующих лик собра́л еси́, и́хже к Черто=гом Небе́сным житие́м свои́м привел еси, и сло́вом благода́ти, и богодарова=нными чудесы́.
О́тче Дави́де свяще́ннейше, свяще́нную твою́ ра́ку, яко исто́чник святы́ни стяжа́вше, свя́те, кре́пость предивную прие́млем. Глава́ бо твоя́ всечестна́я всегда́ источа́ет нам исцеле́ния. К не́йже приходя́ще, от тя́жких озлобле́ний и неду́г и скорбе́й избавля́емся.
Сла́ва, глас 8.
Кре́постию Ду́ха препоя́сався, о́тче, по́стнически до́блествовал еси́ в после́дняя ле́та, мудрова́ние бо плотско́е си́лам души подчини́в, яко же́ртву благоприя́тную, житие́ твое́ Христу́ прине́сл еси́, и по достоя́нию по́честь улучи́л еси́. Сего́ ра́ди о́стров Эвбе́я хва́лится по́двиги твои́ми, и ко благода́ти твое́й притека́я, пра́зднует па́мять твою́. Его́же с небесе́ огражда́й, Дави́де блаже́нне, к Бо́гу моли́твами твои́ми.
И ны́́не, Богоро́дичен:
Небе́сная пою́т Тя, Обра́дованная Ма́́ти Безневе́стная, и мы славосло́вим неизсле́дованное Твое́ Рождество́. Богоро́дице, моли́ спасти́ся душа́м на́шим.