Неотступная молитва по соглашению

Предлагаю сообществу 17 декабря прочесть акафист святому страстотерпцу князю Игорю, Киевскому и Черниговскому или акафист Иконе Богородицы "Игоревская". Просто вот не знаю, что бы выбрать. Логика подсказывает, что "выгоднее" было бы Богородице- так и Матери Божия, и святой поминаются, но у меня почему-то внутри мысль крутится, что надо бы именно князю Игорю.
Потому предлагаю в любое время дня прочесть оба или хотя бы один, кому как на душу ляжет- если это не наглость с моей стороны. Но этой Иконе и этому Святому читают акафисты очень редко, так что надо бы их почтить.
Повод - день рождения Игоря Ивановича Стрелкова, того самого, который возглавлял оборону Славянска. А то что -то приуныл наш первокомандующий... Хорошо бы ИМХО еще и причастится в субботу(тем более что на св. Варвару предположительно день Ангела их младенца дочери Иулиании)- но это я уже слишком много чего от сообщества хочу. Но идею – озвучиваю.
Извините, что политику притащила в молитвенную тему.

Акафист иконе Божией Матери «Игоревская»:

Кондак 1

Избранней от всех дщерей земли, от всякой погибели нас спасающей и ко спасению направляющей, всех обидимых Заступнице, похвальная восписуем Ти раби Твои, Богородице, Ты же от всех нас бед спаси и от обидящих защити, да велегласно зовем Ти: 
Радуйся, Всемилостивая Владычице, всех обидимых Покровительнице!
 
Икос 1

Ангелов и человеков Творец и Создатель, видя сердце Твое сострадательное и милосердие к падшему человечеству безконечное, избра Тя в Добрую Защитницу всех обидимых и обремененных, да познав Твое всемощное заступление, научатся прибегать к Твоему ходатайству и зовут Ти таковая: 
Радуйся, всех страждущих и обремененных Сострадательнице! 
Радуйся, благ земных лишенных небесных благ Подательнице! 
Радуйся, море милосердие неистощимое, вся скорби наши омывающее! 
Радуйся, Источниче милости бесконечныя, духовную жажду утоляющий! 
Радуйся, всех радости лишенных Милосердная Утешительнице! 
Радуйся, всех в скорби вопиющих быстрая Услышительнице! 
Радуйся, Всемилостивая Владычице, всех обидимых Покровительнице!
 
Кондак 2

Видяща Тя Милостивую Защитительницу обремененных и всех скорбящих Сострадательницу, все в узах содержимии и печалями обремененнии к Твоему заступлению прибегают и глаголют о Тебе, зовуща: Аллилуйя!
 
Икос 2

Разум неуразумеваемый хотя дати всем заступления Твоего ищущим, изволила верному рабу Твоему страдальцу князю Игорю дати икону Свою, да вси в скорбных обстояниях и узах прибывающии и помощи Твоея просящии, тому подражая, зовут сице: 
Радуйся, милосердия покрове ширший облака, в напастях нас покрывающий! 
Радуйся, щите несокрушимый, от стрел вражиих сохраняющий! 
Радуйся, броня от враг неодолимая, во всех бедах нас защищающая! 
Радуйся, Воительнице крепкая, за нас во бранях грозно ополчающаяся! 
Радуйся, орудие непобедимое, во бранях верным данное! 
Радуйся, мечу неотразимый, все поползновения враг наших посецающий! 
Радуйся, Всемилостивая Владычице, всех обидимых Покровительнице!
 
Кондак 3

Сила Вышнего дана Тебе, Мати Дево, быть всех обидимых Защитницей и Покровительницей, да все вернии, к Твоему заступлению прибегая и помощь Твою получая, всегда поют сице: Аллилуйя!
 
Икос 3

Имуще икону Твою, Матери Господа своего, как Спасительницу и Всемилостивую Сострадательницу в узах своих, блаженный страдалец Христов благоверный князь Игорь всю скорбь и печаль свою пред нею изливал еси. Мы же подражая ему, вопием к Богородице: 
Радуйся, в скорбях и печалях Утешение! 
Радуйся, всяческих печалей и болезней Утоление! 
Радуйся, исполненная сострадания ко всем страждущим, обремененным и во узах заключенным! 
Радуйся, последнее прибежище надежды и утешения лишенным! 
Радуйся, не отвергающая моления самых падших и отверженных! 
Радуйся, и нас убогим сострадати научающая! 
Радуйся, Всемилостивая Владычице, всех обидимых Покровительнице!
 
Кондак 4

Бурю внутрь имея помышлений сумнительных, нечестивии соотечественники - звероподобные мучители ведуща князя Игоря достойна венца великаго князя киевского, иже по праву ему принадлежа, распыхахуся злобою, тщашася его отцовскаго наследства лишити и сим коварством завладети, посадиша славнаго князя Игоря в поруб, идеже ни окон, ни дверей. Сие страшное злодеяние совершиша, к беззаконию беззаконие преложиша, Бога не бояся и человек не срамяся. Он же перед иконой Владычицы неба и земли и славной Ходатаицы всех скорбящих и обремененных скорбь свою изливал, вопия Сыну Ея: Аллилуйя!
 
Икос 4

Слыша Тя, яко добрую Споручницу всех в узах содержимых и Защитительницу всех скорбящих и обремененных, вси в скорбях прибывающии вседушно к помощи Твоея притекают и по мере веры своея помощь от Тебе получающе, от всея души Тебя благодарят, поюще реша: 
Радуйся, Небесная Сокровищнице, сострадания исполненная! 
Радуйся, о всех лишенных утешения усердная Просительнице! 
Радуйся, печалей наших Утолительнице! 
Радуйся, даров Святаго Духа независтная Подательнице! 
Радуйся, всех с верою просящих от бед и скорбей Избавительнице! 
Радуйся, жития нашего Всемилостивая Устроительнице! 
Радуйся, Всемилостивая Владычице, всех обидимых Покровительнице!
 
Кондак 5

Боготечней звезде подобна явися икона Твоя, Богородице, иже пред нею князь Игорь скорби свои изливал еси. Мы же, подражая ему, о таковом сокровище благодарим, Богу вопиюще: Алиллуйя!
 
Икос 5

Видяще Тя, яко скорую вверженных в скорбь Заступницу и обидимых Покровительницу, все скорбями одержимии и узами тяжких житейских обстояний обремененнии к Твоему заступлению прибегают, о Всемилостивая наша Владычице, и по всесильному Твоему заступничеству в скорбях облегчение, в печалях утешение, в болезнях исцеление обретая, вопиют Благословенней: 
Радуйся, всякия скорби избавление! 
Радуйся, всех печалей утоление! 
Радуйся, ключу воды живой, сострадания исполненный! 
Радуйся, кладезю милосердия, открытый всем жаждущим утешения! 
Радуйся, во всяком скорбном обстоянии прибежище! 
Радуйся, всем страждущим Помощнице! 
Радуйся, Всемилостивая Владычице, всех обидимых Покровительнице!
 
Кондак 6

Проповедницы славнии милости Твоея все исцеленнии и утешеннии Тобою быша, иже, улучившии Твоя богатыя милости, поют Богу о Тебе: Аллилуйя!
 
Икос 6

Возсиял еси в келии славнаго страдальца благовернаго князя Игоря дивный образ Твой, Богомати, яко славное просвещение истины, к нему же все обремененнии в скорбях, печалях и болезнях прибегают, сих же избавльшеся, вопияху к Богородице: 
Радуйся, в терпении нести свой крест нас научающая! 
Радуйся, от погибели отчаяния спасающая! 
Радуйся, в терпении скорбей нас твердо укрепляющая! 
Радуйся, в стяжании Царствия Христова нам смысл жизни полагающая! 
Радуйся, всем ищущим премудрости славное просвещение Истины! 
Радуйся, тайны спасения всем верным, ищущим Пути Христова, открывающая! 
Радуйся, Всемилостивая Владычице, всех обидимых Покровительнице!
 
Кондак 7

Хотяще от бед и скорбей совершенное избавление получити, все вернии к ходатайству Твоему прибегают, о Всемилостивая Владычице, и в скорбях утешение, от бед и печалей избавление по ходатайству Твоему получая, зовут: Аллилуйя!
 
Икос 7

Новую сокровищницу Божественной благодати показа икону Твою Господь, пред ней же святый князь Игорь, смертнаго часа чая, пав в слезах, во время Бескровной Жертвы Господней, тако молился: «Господи! призри на немощь мою, да бы, уповая на Тебя, мог я перенесть все; благодарю Тебя, яко Ты смирил еси мя; удостой взять меня из сего мятежнаго и мрачнаго мира в Твой свет». От того часа сия икона Твоя, о Богомати, иже Игоревской наречеся, чудодействует. Мы же, дивяся Твоему неизреченному милосердию, к невинным страдальцам являемому, воспеваем Тя, вопиюще: 
Радуйся, всем радости лишенным Всемилостивая Воздаятельнице! 
Радуйся, во всех скорбях Сострадательнице! 
Радуйся, обидящим и страха Божия лишенным грозная Отмстительнице! 
Радуйся, всех помощи лишенных Всемилостивая Защитительнице! 
Радуйся, о всех обидимых усердная Просительнице! 
Радуйся, от вечной смерти Избавительнице! 
Радуйся, Всемилостивая Владычице, всех обидимых Покровительнице!
 
Кондак 8

Странно есть неверующим видети, како вси благовернии, обидимии и правды ради гонимые к заступничеству Богоматери прибегая, в скорбях утешение, от печалей избавление, от всех злых обстояний спасение по Ея всесильному ходатайству получают, вопиюща Богу: Аллилуйя!
 
Икос 8

Вся бо в вышних ныне прибываеши, о Владычице, но и нас нижних никакоже отступаеши, Всемилостивая, яко сама на земле скорби велия претерпев, можеши всем страждущим помогати и скорбей на радость приложение нам даровати. Сего и ради слышиши сия: 
Радуйся, немощных Покровительнице! 
Радуйся, всех подвизающихся за правду Добрая Воительнице! 
Радуйся, ключу воды живой, всех Истины взыскующих напояющий! 
Радуйся, кладезю прохладный, жажду правды утоляющий! 
Радуйся, Книга, тайны Царствия Божия верным открывающая! 
Радуйся, Посох, всем взыскующим Пути Христова помогающий! 
Радуйся, Всемилостивая Владычице, всех обидимых Покровительнице!
 
Кондак 9

Всякое естество ангельское и человеческое непрестанно хвалы Тебе приносит, о Владычице, Ты бо послужила Царя Небесного вочеловечения делу, непреступнаго Бога зряще всем приступнаго человека, нам убо спребывающа, жизнь человеческую восприявша, слышаша же от всех: Аллилуйя!
 
Икос 9
 
Ветия многовещанныя суетнаго и жестокосерднаго века сего яко рыбы безгласныя зрим о Тебе, Богородице, недоумеют бо, како вси обидимые и за правду гонимые к Твоему заступлению прибегая, от всех скорбей и жестоких обстояний совершенное избавление и скорбей на радость преложение обретают. Мы же, на Твое всемилостивое покровительство упование возложив, верно вопием: 
Радуйся, гонимых правды ради защищение! 
Радуйся, обид и скорбей разрешение! 
Радуйся, невинных всех страдальцев воздаяние! 
Радуйся, обидящих всех наказание! 
Радуйся, грехов воюющих за правду отпущение! 
Радуйся, всех кающихся грешников прощение! 
Радуйся, Всемилостивая Владычице, всех обидимых Покровительнице!
 
Кондак 10

Спасти хотя мир всех Спаситель прииде, Чрево Твое Блаженное Благодатным Небом соделав и нам Тя яко Спасительницу и от всех злых Защитительницу даровав, яко Бог слышит: Аллилуйя!
 
Икос 10

Стена Нерушимая еси всем обидимым и правды ради гонимым, Богородице Дево, и всем к заступлению Твоему прибегающим, ибо Небеси и земли Творец вселься во утробе Твоей, Сыном Твоим став и вся прошения Твоя исполняет. Сего ради вся приглашати Тебе научи: 
Радуйся, блаженства правды алчущим и жаждущим дарующая! 
Радуйся, всех гонимых правды ради Покровительнице! 
Радуйся, лукавых любодеев Наказательнице! 
Радуйся, всех изгнанных за правду Защитительнице! 
Радуйся, всех страждущих за правду Сострадательнице! 
Радуйся, гонителям их грозная Отмстительнице! 
Радуйся, Всемилостивая Владычице, всех обидимых Покровительнице!
 
Кондак 11

Пение всякое побеждается, прославити тщашеся множество многих щедрот Твоих, Богородице, иже по ходатайству Твоему Сын Твой верным Своим дарует. Аще бо и многочисленне всех лествий земных и звезд небесных песни приносим Сыну Твоему и Богу нашему, ничтоже совершаем достойно, яже по ходатайству Твоему дал еси нам, Ему о Тебе вопиющим: Аллилуйя!
 
Икос 11

Светоприемную свещу во мраке скорбного жития нашего зрим икону Твою, Богородице, пред ней же угодник Твой славный князь Игорь усердно моляся, яко славное наследие остави нам, иже наставляет к разуму Божественному вся, милостию Твоею ум наш просвещающая, званиими же почитаемая сими: 
Радуйся, иже во всякой скорби видети волю Божию, вся ко благу устрояющую, нас научающая! 
Радуйся, ко спасению нас вразумляющая и направляющая! 
Радуйся, все скорби наша ко спасению обращающая! 
Радуйся, смысл жизни разумом Христовом просвещающая! 
Радуйся, всех плачущих надеждою утешающая! 
Радуйся, печали наша утоляющая! 
Радуйся, Всемилостивая Владычице, всех обидимых Покровительнице!
 
Кондак 12

Благодати источник неиссякаемый яви славную икону Твою благодати Податель, Владычице, да вси обидимии и напаствуемые к помощи Твоея прибегая и от всех бед и напастей спасение тобою улучая, вопиют Богу: Аллилуйя!
 
Икос 12

Поюще Твоя неизреченныя милости, к падшему и во скорбях погибающему роду человеческому являемые, хвалим Тя вси, яко одушевленный храм, Богородице: во Твоей бо вселився утробе вся содержаяй рукою Господь, всю Тя освяти, не токмо Тя, но и многия образы Твоя чудесы прослави и научи вопити Тебе всех: 
Радуйся, всяческих недугов врачевание! 
Радуйся, нечаянное всех благ исполнение! 
Радуйся, плоти созидание Бога Слова Созидателя! 
Радуйся, чудное селение всякой скорби Избавителя! 
Радуйся, млеком Своим кормившая всех благ вселенныя Подателя! 
Радуйся, рукой Своей носившая Носящего вся! 
Радуйся, Всемилостивая Владычице, всех обидимых Покровительнице!
 
Кондак 13

О, Всепетая Мати, рождшая всех святых Святейшее Слово! Нынешнее наши прими приношение во избавление нас от всякия скорби, от всех бед и печалей спаси и всех благ исполни, о Тебе Богу вопиющих: Аллилуйя!
 
 Этот Кондак глаголи трижды, по сем 1-й Икос «Ангелов и человеков Творец…» и 1-й Кондак «Избранней от всех дщерей земли…»

Акафист св. Игорю
Память святого благоверного князя Игоря Черниговского празднуется 19 сентября (2 октября н. ст.) - в день мученической кончины святого благоверного князя, и 5 июня (18 июня н. ст.) – перенесение мощей и прослав­ление.

Кондак 1
Избранный страстотерпче Христов, благоверный княже Игоре, возсиявый людем твоим, яко звезда пресветлая! Ты бо славу земнаго княжения оставил еси и во иночестве Господеви работати вожделел еси, страдальчески земное житие скончав, и ныне, радуяся, предстоиши престолу Святыя Троицы. Молитвами твоими от всяких зол и напастей охраняй нас, да благодарственно со умилением зовем ти:
Радуйся, святый благоверный княже Игоре, во смирении за истину терпящим, скорый помощниче.

Икос 1
Ангельски поживши на земли, от юности возлюбил еси Божественное учение и сему последовав добрым житием, немолчно прославлял еси имя Господне чтением книг священных и пением церковным. Сего ради тебе, на небеси и на земли прославленному, вопием сице:
Радуйся, от рождения твоего Богом избранный.
Радуйся, семя слова Божия от юности восприявый.
Радуйся, великий угодниче Божий, благочестивую жизнь на земли возлюбивый.
Радуйся, путем трудным и тесным житие земное прошедый.
Радуйся, правды ради душу твою положивый.
Радуйся, от Царя Небеснаго, венец мученический приемый.
Радуйся, святый благоверный княже Игоре, во смирении за истину терпящим, скорый помощниче.

Кондак 2
Видя Господь чистоту сердца твоего, блаженне княже Игоре, избра тя зрети славу небесную, ты бо паче всего возлюбил еси чистоту душевную и телесную, и ради страданий временных, уповая избежати мучений вечных, великий угодник Божий был еси, и лицем к лицу зрети Господа удостоился еси. Темже притекающе к тихому пристанищу молитв твоих, вопием Христу Богу: Аллилуиа.

Икос 2
Разум озаренный благодатию Божиею из млада имел еси, княже Игоре, от юности бо хранил еси в сердце твоем закон Христов, великим угодником Божиим, прошедшим тернистым путем во Царствие Небесное, подражая. Темже и мы, уповая на твое предстательство, молимся: буди нам скорый помощник и покровитель в земном житии нашем, да благодарно вопием ти:
Радуйся, избранный и верный рабе Христов.
Радуйся, от юности чистоту жития возлюбивый.
Радуйся, из млада единому Христу угождавый.
Радуйся, Иисуса ради вся напасти безропотно претерпевый
Радуйся, Тому единому всею душею прилепивыйся.
Радуйся, всего себе на страдания правды ради предавый.
Радуйся, святый благоверный княже Игоре, во смирении за истину терпящим, скорый помощниче.

Кондак 3
Силою Вышняго, дарованною тебе, и долготерпением твоим укреплен был еси, блаженне, егда враг рода человеческаго наведе на тя люди злы, во еже лишити тя славы княжеския. Темже, дивящеся богатству терпения твоего, воспеваем укрепившему тя Господу песнь: Аллилуиа.

Икос 3
Имея желание в души своей вся красная и сладкая мира сего оставити и Христу последовати, еще млад сый, избрал еси себе путь служения Господеви. Мы же, подражая житию твоему и почитающе честная страдания твоя, правды ради претерпенная, величаем тя сице:
Радуйся, в души своей имевый желание мир оставити и Господеви послужити.
Радуйся, вся красная и сладкая мира сего презревый.
Радуйся, совершенную любовь ко Господу стяжавый.
Радуйся, за кротость души твоея наследие жизни вечныя получивый.
Радуйся, ум твой, сердце и волю в Бозе утвердивый.
Радуйся, дивную кротость духа в скорби показавый.
Радуйся, святый благоверный княже Игоре, во смирении за истину терпящим, скорый помощниче.

Кондак 4
Бури житейских бед и напастей не возмогоша поколебати крепости души твоея, благоверный княже Игоре, основана бо бе на твердем веры Христовы камени. Мы же, дивящеся великому терпению твоему, со умилением взываем Богу: Аллилуиа.

Икос 4
Слыша и видя, княже блаженне, распри и раздоры, врагом рода человеческаго воздвизаемыя, егда вступи на престол Киевский, абие восхотел еси вразумити люди своя и привести их к миру и благоразумию. Сего ради с любовию взываем ти:
Радуйся, яко тобою всякая вражда и злоба побеждаются.
Радуйся, чистоты веры и незлобия дивное воплощение.
Радуйся, образе кротости и терпения. 
Радуйся, зерцало совершеннаго незлобия.
Радуйся, многими скорбьми в радость Господа твоего вшедый.
Радуйся, помогаяй и нам терпети скорби и поношения.
Радуйся, святый благоверный княже Игоре, во смирении за истину терпящим, скорый помощниче.

Кондак 5
Боготечную звезду зрим тя, угодниче Божий, тя бо, восприимшаго великия страдания, прослави Господь, яко вернаго раба Своего, невинно убиеннаго злыми человеки по наущению диавольскому. Мы же, взирающе с любовию на честный образ твой, приклоняем колена, со умилением поя: Аллилуиа.

Икос 5
Видевше великий князь Киевский Всеволод, яко преклонился есть к вечеру день жития его, призва тя, Игоре блаженне, и завеща ти престол княжеский. Ты же воли брата твоего, яко воли Божией повинуяся, все упование на Господа возложил еси. Мы же, похваляя таковое смирение твое, воспеваем ти:
Радуйся, яко до конца крест жития твоего безропотно понесл еси.
Радуйся, благочестием Богови и людем послуживый.
Радуйся, велению брата своего покоривыйся.
Радуйся, в народоправлении велию добродетель показавый.
Радуйся, всем братолюбцем присное ободрение.
Радуйся, от людей своих велию любовь стяжавый.
Радуйся, святый благоверный княже Игоре, во смирении за истину терпящим, скорый помощниче.

Кондак 6
Проповедником добродетелей христианских был еси, княже Игоре, поучая любити братию и народ свой. Мы же ублажаем тя, яко добраго и истиннаго последователя Христова, живот свой за люди твоя положившаго, воспевая Господеви песнь: Аллилуиа.

Икос 6
Возсиял еси богоугодным житием твоим, благоверный княже Игоре, все упование свое на Господа, вся во благо устрояющаго, возлагая. Мы же, восхваляя подвиги твоя, глаголем сице:
Радуйся, яко в житии твоем добродетельми просиявый.
Радуйся, чистотою сердца твоего Господа созерцавый.
Радуйся, в несении трудов великаго княжения помощь от Господа получивый.
Радуйся, яко вместо княжеских почестей - мучения и скорби мужественно претерпевый.
Радуйся, иго Христово, благое и легкое, на рамена своя восприявый.
Радуйся, терпению Христову верно подражавый.
Радуйся, святый благоверный княже Игоре, во смирении за истину терпящим, скорый помощниче.

Кондак 7
Хотящу ти, блаженне, воли Божией покоритися, не воспротивился еси воином князя Изяслава, егда тии тя, еле жива суща, в хладном порубе заключиша, идеже ты, подобно Даниилу пророку, заточенному в рове львином, непрестанно взывал еси Богу: Аллилуиа.

Икос 7
Новаго видим тя избранника Божия, благоверный княже Игоре, егда пременил еси княжения славу во иночества образ смиренный. Ты бо, вся благая презрев, желанием восхотел еси единому Богу поработати. Темже, таковому твоему смирению и кротости дивящеся, вопием ти:
Радуйся, страдания лютая невинно претерпевый.
Радуйся, образ любве и незлобия нам показавый.
Радуйся, вся благая мира сего ни во что же вменивый.
Радуйся, злобу и коварство диавола смирением победивый.
Радуйся, послушанию иноческому всецело предавыйся.
Радуйся, усердным молитвенником за люди твоя явивыйся.
Радуйся, святый благоверный княже Игоре, во смирении за истину терпящим, скорый помощниче.

Кондак 8
Странник и пришлец, по апостолу, явился еси на земли, боголюбезне княже, дольняя бо вся презрев, горняя взыскал еси, все помышление твое ко Господу имеяй. Темже помози и нам, молитвами твоими, добродетельное житие возлюбити, да купно с тобою вопием Богу: Аллилуиа.

Икос 8
Всею душею от юности Богу послуживый, блаженне княже Игоре, сего ради Господь прослави тя, Своего угодника, кротости ради и смирения твоего. Мы же, сим добродетелем последовати тщащиися, вопием ти радостно:
Радуйся, от юности Господа всею душею возлюбивый.
Радуйся, делы благими Христу благоугодивый.
Радуйся, всем житием твоим Бога прославивый.
Радуйся, тесный путь спасения от юности избравый.
Радуйся, благодать Божию в сердце своем стяжавый.
Радуйся, житие свое иночеством украсивый.
Радуйся, святый благоверный княже Игоре, во смирении за истину терпящим, скорый помощниче.

Кондак 9
Всего себе покорил еси воли Господни, яко раб благий и верный, егда пострижение иноческое восприим, во обитель святаго Феодора вселился еси, идеже всецело посту и молитве предался еси. Сего ради сподобился внити в радость Господа своего, Емуже предстоиши ныне со Ангелы, поя: Аллилуиа.

Икос 9
Витии многовещанныя не возмогут по достоянию восхвалити страдания твоя, страстотерпче Христов княже Игоре, ниже уразумети глубины упования твоего, приимши бо весть о убиении твоем, потщался еси в церковь Господню, со слезами пред образом Царицы Небесныя моляся. Убийцы же твои, яко звери дивии, емше тя молящагося, бив, повлекоша тя из храма. Ты же, благодатию Божиею укрепляемь, страдания кротко претерпел еси, за убивающих тя Господа умоляя. Сего ради величаем тя сице:
Радуйся, все упование на Господа и Его Пречистую Матерь возложивый.
Радуйся, на мучение безропотно предавыйся.
Радуйся, благодатию Божиею укрепляемь, страдания мужественно претерпевый.
Радуйся, яко сего ради венцем мученическим украшенный.
Радуйся, за убивающих тя кротко моливыйся.
Радуйся, душу свою в руце Божии радостно предавый.
Радуйся, святый благоверный княже Игоре, во смирении за истину терпящим, скорый помощниче.

Кондак 10
Спасти хотя душу свою, вся земная и временная во уметы вменил еси, неуклонно стопам Спасителевым последствовав. И ныне с лики ангельскими веселяся, немолчно вопиеши Прославльшему тя Господеви: Аллилуиа.

Икос 10
Стеною терпения оградився, верный раб Царя Небеснаго был еси. Вражиих бо устрашений не убоявся, всего себе в руце Божии предал еси и страдания мужественне претерпел еси. Мы же, чтуще святую память твою, ублажаем тя, вопиюще:
Радуйся, великий княже Игоре, престолу Небеснаго Владыки предстояй.
Радуйся, венец твой княжеский кровными каплями, яко драгими камнями украсил еси.
Радуйся, образ вернаго служения Богу терпением своим показавый.
Радуйся, житие свое тесною стезею мучений и страданий прошедый.
Радуйся, яко пред великим мужеством твоим, вернии преклоняются.
Радуйся, яко и ныне не престаеши благодеяти призывающим тя.
Радуйся, святый благоверный княже Игоре, во смирении за истину терпящим, скорый помощниче.

Кондак 11
Пение хвалебное приносим дивному во святых Своих Богу нашему, даровавшаго Церкви Своей и стране нашей дивнаго чудотворца и усерднаго молитвенника, благовернаго князя Игоря, иже и поныне не престает молитися за ны и научая пети всех: Аллилуиа.

Икос 11
Свет славы небесныя осия святое и многострадальное тело твое, страстотерпче Христов, егда оное положено бысть в церкви святаго Михаила. Людие же, окрест гроба твоего стоящии, и возжегаемыя невидимою рукою свещи и лампады зряще, приидоша в трепет и ужас, познавая, яко тако прослави Бог угодника Своего; тебе же, богомудре княже, воспеша тако:
Радуйся, усердный наш пред Богом молитвенниче и предстателю.
Радуйся, яко Господь прослави тя знаменьми и чудесы.
Радуйся, сиянием небеснаго света озаренный.
Радуйся, непорочную душу твою в руце Божии предавый.
Радуйся, нетленное тело твое в помощь нам оставивый.
Радуйся, яко за смиренномудрие твое венцем славы от Бога увенчанный.
Радуйся, святый благоверный княже Игоре, во смирении за истину терпящим, скорый помощниче.

Кондак 12
Благодать единения и братолюбия испроси нам у Всещедраго Бога, угодниче Христов, да вси людие возлюбят друг друга и единодушно исповедят веру Православную, воспевая Спасителю нашему: Аллилуиа.

Икос 12
Поюще добродетельное житие твое, ублажаем мученическую кончину твою, восхваляем и пренесение честных и многоцелебных мощей твоих из стольнаго града Киева во град Чернигов, воспеваем славу твою, иже на небесех, и усердно молим тя, страстотерпче княже Игоре: не возгнушайся нас, грешных и недостойных, зовущих ти:
Радуйся, яко великия благодати от Бога сподобивыйся.
Радуйся, яко теплый молитвенник и заступник от Бога нам дарованный.
Радуйся, яко всем призывающим тя скорый помощник бываеши.
Радуйся, духовнаго веселия сердца наша исполняющий.
Радуйся, в лице Русских святых славою многою от Бога превознесенный.
Радуйся, яко благочестивых множества любовию празднуют святую память твою.
Радуйся, святый благоверный княже Игоре, во смирении за истину терпящим, скорый помощниче.

Кондак 13
О, многострадальный страстотерпче Христов, благоверный великий княже Игоре! Приими сие малое, обаче от любящих сердец приносимое тебе сие моление наше, защити всех нас, за истину обиды и поношения терпящих, уврачуй душевныя и телесныя недуги, и от всех бед и скорбей избави ны да, благодарни суще, вопием Богу: Аллилуиа.

Тропарь, глас 4:
Наста днесь всечестная память страстотерпца благовернаго князя Игоря, созывающая люди в пречестный храм Спасов, идеже радостно сошедшеся благочестивых множество молитвенно празднуют святую память твою, и с верою взывают ти: молися, святе, стране Российстей, граду Чернигову и всем православным христианом в мире и благоденствии спастися.

Ин тропарь, глас 4:
Просветився Божественным крещением Духа Святаго светлостьми озаряем, Евангелие Христово в сердце твое восприял еси делом слово Сына Божия исполняя, благоверный княже Игоре, моли Всеблагаго Спасителя нашего даровати нам мир и милость и спасение душ наших, чтущих честную память твою.

Кондак, глас 6:
Изменил еси земнаго княжения славу во иночества образ смиренный, и страдальчески земное житие скончав, ныне на Небесех радуешися, усердно моляся о чтущих тя, Игоре, страдальцев похвало.

Ин кондак, Глас 8:
Княжескую диадиму обагрил еси кровию твоею, Богомудре страстотерпче Игоре, за скиптр крест в руку приим, явился еси победоносец и жертву непорочну Владыце принесл еси себе. Яко бо агнец незлобив от раб убиен был еси, и ныне радуяся предстоиши Святей Троице, молися спастися душам нашим.