Неотступная молитва по соглашению

Дорогие братья и сестры! Присоединяйтесь к чтению канона святителю Николаю по четвергам без привязки ко времени.
Желающие присоединиться к чтению пишите имена в комментариях.
НЕПРЕМЕННО ВСТАВАЙТЕ НА МОЛИТВЕННЫЙ ТРУД ВМЕСТЕ СО ВСЕМИ УЧАСТНИКАМИ МОЛИТВЫ.
Прошу всех участников по возможности отмечаться в комментариях после прочтения. Перед чтением канона проверьте, пожалуйста, внесены ли ваши имена. Если имена отсутствуют, пишите мне в личку.
ПРЕДНАЧИНАТЕЛЬНЫЕ МОЛИТВЫ, ЧИТАЕМЫЕ ПЕРЕД КАНОНОМ
Боже, милостив буди мне грешному (поклон).

Боже, очисти мя грешнаго и помилуй мя (поклон).

Создавый мя, Господи, помилуй мя (поклон).

Без числа согреших, Господи, прости мя (поклон).

Владычице моя, Пресвятая Богородице, спаси мя грешнаго (поклон).

Ангеле Хранителю мой святый, от всякого зла сохрани мя (поклон).

Святый отче, Николае, моли Бога о мне (поклон).

Молитвами святых отец наших, Господи Иисусе Христе, Сыне Божий, помилуй нас. Аминь.

Святый Боже, Святый Крепкий, Святый Безсмертный, помилуй нас (трижды, с крестным знамением и поясными поклонами).
Слава Отцу и Сыну и Святому Духу, и ныне и присно и во веки веков. Аминь.

Пресвятая Троице, помилуй нас. Господи, очисти грехи наша. Владыко, прости беззакония наша. Святый, посети и исцели немощи наша, имени Твоего ради.

Господи, помилуй (трижды).
Слава Отцу и Сыну и Святому Духу, и ныне и присно и во веки веков. Аминь.

Отче наш, Иже еси на небесех. Да святится имя Твое. Да приидет царствие Твое. Да будет воля Твоя, яко на Небеси и на земли. Хлеб наш насущный даждь нам днесь. И остави нам долги наша, яко же и мы оставляем должником нашим, и не введи нас во искушение, но избави нас от лукаваго.
Господи Иисусе Христе, Сыне Божий, помилуй нас. Аминь.

Господи, помилуй (12 раз).
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу (поклон).
Приидите, поклонимся и припадем Христу Цареви нашему Богу(поклон).
Приидите, поклонимся и припадем к Самому Христу, Цареви и Богу нашему (поклон).
Псалом 50.
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззакония моя аз знаю и грех мой предо мною есть выну. Тебе Единому согреших, и лукавая пред Тобою сотворих, яко да оправдишися во словесех Твоих и победиши, внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая, тогда возложат на олтарь Твой тельцы.
Символ веры
Верую во Единаго Бога Отца, Вседержителя, Творца небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, Иже от Отца рожденнаго прежде всех век; Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И восшедшаго на небеса, и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа, Животворящего, Иже от Отца исходящаго, Иже со Отцем и Сыном спокланяема и сславима, глаголавшаго пророки. Во едину Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых, и жизни будущаго века. Аминь.
Канон Святителю Николаю,
Архиепископу Мирликийскому Чудотворцу
Канон, глас 2-й.
Песнь 1
Во глубине постла иногда фараонистское всевоинство преоруженная сила, воплощшееся же Слово всезлобный грех потребило есть: Препрославленный Господь, славно бо прославися.
Святителю отче Николае, моли Бога о нас.
Венценосец престолу Христову, премудре Николае, предстоя со Ангельскими воинствы, просвещение ми даруй, озаряющее души моея омрачение, яко да восхвалю радуяся твою, всеблаженне, память.(Дважды.)
Слава Отцу и Сыну, и Святому Духу.
Прославляяй вся Господь, того славящая, тя верным прибежище даде, напасте избавляюща притекающая к твоему крову, Николае, и призывающия тя верою и любовию, преславне.
И ныне и присно, и во веки веков. Аминь.
Сравнитися желание ми вложив змий вселукавый, Содетелю, яко пленникавосхити, Тобою же Всечистая, воззван бых, обожився истиннейше: Ты бо, о Богомати, мене Обожившаго родила еси.
Песнь 3
Процвела есть пустыня яко крин, Господи, языческая неплодящая церковь, пришествием Твоим, в нейже утвердися мое сердце.
Святителю отче Николае, моли Бога о нас.
Николае блаженне, Владыки искренний ученик ты быв, спасаеши к тебе притекающия отлютых бед и смерти горькия.(Дважды.)
Слава Отцу и Сыну, и Святому Духу.
Очисти рабы Твоя, грехов оставление яко Благ даруя, Николаа Твоего угодника, яже к Тебе ходатайствы, Многомилостиве.
И ныне и присно, и во веки веков. Аминь.
Утоли смущение души моея, Пречистая, и жизнь окорми, Всесвятая, Бога Рождшая, в Немже утвердися сердце мое.
Господи, помилуй! (Трижды.)
Седален, глас 8:
Возшед на высоту добродетелей, Божественными оттуду отче озарився сиянии чюдес, пресветел воистину явился еси мирови пастырь, нам в напастех сый престатель непобедимь:темже преславно врага победив, лжу отгнал еси и человеки спасл еси от смерти, Николае. Моли Христа Бога, грехов оставление даровати, чтущим любовию святую память твою.
Слава Отцу и Сыну, и Святому Духу и ныне и присно, и во веки веков. Аминь.
Яко Деву и Едину в женах Тя без семене рождшую Бога плотию, вси ублажаем роди человечестии: огнь бо вселися в Тя Божества, и яко младенца доиши Зиждителя и Господа. Тем ангельский и человеческий род достойно славим Пресвятое Рожество Твое, и согласно вопием Ти: моли Христа Бога грехов оставление даровати, покланяющымся верою Пресвятому Рождеству Твоему.
Песнь 4
Пришел еси от Девы, не ходатай, ни ангел, но Сам, Господи, воплощься, и спасл еси всего мя человека, тем зову Ти: слава силе Твоей, Господи.
Святителю отче Николае, моли Бога о нас.
Приближився чисте зарям духовным, светоносец был еси, мира просвещая концы, всем предстательствуя, и вся спасая верою к тебе притекающия.
Святителю отче Николае, моли Бога о нас.
Избавляя от смерти, яко явился еси первее Николае, юноши преподобне: тако и ныне мя спаси от всякаго обстояния, и напастей и бед, всеблаженне.
Слава Отцу и Сыну, и Святому Духу.
Облистал еси добродетелей сияньми всеблаженне, подражатель всеизряднейший твоего Владыки быв, спасаеши же призываемь, благоговением и любовию тя славящия.
И ныне и присно, и во веки веков. Аминь.
Найде на Тя Владыка твари Воплощаемь, и спасая яко Благоутробен всего мя человека: темже вернии Богородицу Тя славим.
Песнь 5
Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим: иного бо разве Тебе Бога не знаю.
Святителю отче Николае, моли Бога о нас.
Боголепным житием, треблаженне, просвещаемь, осужденныя неправедным изречением умрети, представ, избавил еси, Владыце Христу зовущия: иного бо разве Тебе Бога не знаем. (Дважды.)
Слава Отцу и Сыну, и Святому Духу.
На небесех присносущную славу ныне зря, и неизглаголанныя и Божественныя зари светлейшими наслаждаяся сиянии, покрый мя предстательством твоим, преподобне, угодниче Христов всечестне.
И ныне и присно, и во веки веков. Аминь.
Да Твой взыщеши образ, погребенный страстьми, Спасе, небесных утаився сил, воплощься из Девы, явился еси Тебе зовущим: иного разве Тебе Бога не знаем.
Песнь 6
В бездне греховней валяяся, неизследную милосердия Твоего призываю бездну, от тли, Боже, мя возведи.
Святителю отче Николае, моли Бога о нас.
Иже победы Николае, венец на твоем версе достойно положися: яко победитель убо изряднейший, тя призывающия спаси. (Дважды.)
Слава Отцу и Сыну, и Святому Духу.
Умерщвленна мя, блаженне, прегрешеньми, и страстей треволненьми погружаема, явився спаси ко пристанищу Божественыя воли.
И ныне и присно, и во веки веков. Аминь.
На Тя надежды возложих Мати Приснодево, спасения моего, и Тя Предстательницу полагаю жизни, тверду же и непоколебиму.
Господи, помилуй. (Трижды.)
Слава Отцу и Сыну, и Святому Духу и ныне и присно, и во веки веков. Аминь.
Кондак, глас 3.
В Мирех, святее, священнодействователь показался еси, Христово бо преподобне Евангелие исполнив, положил еси душу твою о людех твоих, и спасл еси неповинныя от смерти. Сего ради освятился еси, яко великий таинник Божия благодати.
Икос
Воспоим ныне святителя песньми, Мирским людем пастыря и учителя, да молитвами его просветимся: се бо явися чист весь, нетленен духом, Христу принося жертву непорочну, чисту, Богу благоприятну: яко святитель очищен и душею и телом, темже сый истинно Церкве предстатель и поборник Сея, яко великий таинник Божия благодати.
Песнь 7
Образу златому на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.
Святителю отче Николае, моли Бога о нас.
Во острое искушение впадох, и люте пострекаемь, и ко вратом ада приближихся, скорбьми поражаемь, спаси мя молитвами твоими, блаженне, и возстави поюща: благословен еси Боже отец наших.(Дважды.)
Слава Отцу и Сыну, и Святому Духу.
Незаходимаго света Невещественными лучами облистаемь, сущия во тьме скорбей озлобленныя исхити, и к просвещению веселия настави поющия: благословен еси Боже отец наших.
И ныне и присно, и во веки веков. Аминь.
Моли Христа, Сына Твоего и Бога, Дево Богородительнице, проданныя лютыми прегрешеньми и лестьми змииными, Кровию Его честною избавитися поющим: благословен еси Боже отец наших.
Песнь 8
В пещь огненну ко отроком еврейским снизшедшаго, и пламень в росу преложшаго Бога, пойте, дела, яко Господа, и превозносите во вся веки.
Святителю отче Николае, моли Бога о нас.
Яко благ и сострадателен, во глубине напастей люте содержимыя свободи, блаженне Николае, от содержащих лютых разрешение подая молитвами твоими, яже ко Спасу Христу, священнотаинниче.
Слава Отцу и Сыну, и Святому Духу.
Тайновождь сущих паче ума, святых служитель и Небесных сый богомудре, архиерей же верен, прегрешений оставление проси от Спаса нашего, священноявленне.
И ныне и присно, и во веки веков. Аминь.
Изнемогает мой ныне ум, во глубину впад безчестия, яко отвсюду различными объят есмь злыми: но Ты, Дево, исцели, безстрастия светом одевающи.
Песнь 9
Безначальна Родителя Сын, Бог и Господь, воплощься от Девы нам явися, помраченныя просветити, собрати расточенныя, Тем Всепетую Богородицу величаем.
Святителю отче Николае, моли Бога о нас.
Свещами благодати Богомудре просвещаемь, и светильник благочестия яве был еси, сущия в напастех спасаеши, и сущия во глубине морстей избавляеши, и питаеши алчущия преславно, всеблаженне.(Дважды.)
Слава Отцу и Сыну, и Святому Духу.
Иже в раи сладости ныне водворяяся, и неизреченную славу ясно зря, от Небесных круг певцы твоя назираеши, от страстей избавляя, богоносе всеблаженне.
И ныне и присно, и во веки веков. Аминь.
Премудрость, и Силу, и Слово Ипостасное Отчее, Богомати Чистая родила еси, от Твоих Пречистых кровей Свой Храм Приимшую, и сему по соединению соединившуюся нераздельно.

Молитва святителю Николаю Чудотворцу.
О великий заступниче, архиерею Божий, Николае преблаженне, иже подсолнечную осиявый чудесы, призывающим же тя скорый услышатель являйяся, ихже присно предваряеши и спасаеши, и избавляеши, и от бед всяческих изъимаеши, от Бога данною ти чудес и даров благодатию! Услыши мя недостойнаго, с верою тя призывающа и молебное тебе приносяща пение; тебе бо ходатая на умоление ко Христу предлагаю. О пресловущий в чудесех, святителем высото! яко имеяй дерзновение, скоро Владыце предстани, и преподобнии свои руце молебне к Нему простри о мне грешнем, и от Него щедроты благости подаждь ми, и приими мя в свое заступление, и от всех бед и зол мя избави, от нашествия врагов видимых и невидимых свобождая, и тех всех наветы и злохитрства погубляя, и борющих мя во всей жизни моей отражая; прегрешением же моим прощение испроси, и спасена мя Христу представи и Царствия Небеснаго сподоби улучити за множество того человеколюбия, емуже подобает всяка слава, честь и поклонение, со безначальным его Отцем, и с Пресвятым и Благим и Животворящим Духом, ныне и присно и во веки веков.

ОКОНЧАНИЕ МОЛИТВЫ ПОСЛЕ ЧТЕНИЯ АКАФИСТА
Молитва по соглашению
Господи Иисусе Христе, Сыне Божий, Ты сказал пречистыми устами Твоими: «Истинно говорю вам, что если двое из вас согласятся на земле просить о всяком деле, то, чего бы ни просили, будет им от Отца Моего Небесного, ибо, где двое или трое собраны во имя Мое, там Я посреди них». Непреложны словеса Твои, Господи, милосердие Твое бесприкладно и человеколюбию Твоему нет конца. Сего ради молим Тебя: даруй мне, и всем тем, кто возносит с нами соборную молитву, имена Ты их Господи знаешь Сам, согласившимся просить Тебя о всяком благополучном разрешении вопросов (в сфере финансов, жилья, трудоустройства) и о здравии рабов Твоих:
Патриарха Кирилла,
проиерея Михаила со сродниками,
иерея Игоря со сродниками,
Протоиерея Виталия, матушки Елены со чадами, Александра, Елены со чадами, бол. Елены, забл. Георгия,
отр. Алексия, отр. Анастасии, забл. Сергия, бол. Татианы, т.бол. Тамары, бол. Ирины, Владимира;
Александра, Валентины, Аллы со сродниками, бол. Виталия, Наталии со чадами, Ольги со чадом,
Татианы со чадами;
Андрея, Ольги
Николая, Галины, Алевтины, Александры, мл.Даниила, Игоря
Галины, Никиты

просьбы которых ты, Господи, знаешь сам, исполнения нашего прошения.
Помоги и мне грешно(му) и недостойно(му) (р.б. имя) в благополучном разрешении вопроса (излагаем свою просьбу)
Услышь нас Милостивый Господь молитвами Свт. Николая Архиепископа Мир Ликийского и воздаждь каждому молящемуся по Своей неизреченной Милости, Щедрости, Любви и Благодати во Славу Своего Святого Имени!
Но обаче не якоже мы хотим, но якоже Ты. Да будет во веки воля Твоя. Аминь.
Достойно есть, яко воистинну блажити Тя Богородицу, Присноблаженную и Пренепорочную и Матерь Бога Нашего.
Честнейшую Херувим и Славнейшую без сравнения Серафим, без истления Бога Слова рождшую, сущую Богородицу, Тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй (трижды). Благослови.
Молитвами святых отец наших, Господи Иисусе Христе, Боже наш, помилуй нас. Аминь.